ԵԴ1/1400/01/25




ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«05» դեկտեմբերի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` Դատարան)

նախագահությամբ՝ դատավոր Տաթևիկ Մուրադյանի,
քարտուղարությամբ՝ Ագնետա Հակոբյանի,

մասնակցությամբ՝
հանրային մեղադրող Դավիթ Մարգարյանի,
պաշտպան Կատյա Գաբոյանի,
դռնբաց դատական նիստում քննելով քրեական գործն ըստ մեղադրանքի՝
Ալիկ Անդրոննիկի Ավետիսյանի՝
(ծնված՝ 07.10.1995թ. ՌԴ Կրասնոդար քաղաքում, ազգությամբ հայ, ՀՀ քաղաքացի, ամուսնացած, արարքը կատարելու պահին դատվածություն չունեցող, ներկայումս դատված, հաշվառված և բնակվող՝ ք.Երևան, Նոր Նորքի 8-րդ զանգված, 32-րդ շենք, 2-րդ բնակարան հասցեում, որպես խափանման միջոց է կիրառվել բացակայելու արգելքը) ՀՀ քրեական օրենսգրքի 344-րդ հոդվածի 2-րդ մասով,

ՊԱՐԶԵՑ

1. Քրեական գործի դատավարական նախապատմությունը.
2024 թվականի հունիսի 11-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության հատկանիշներով նախաձեռնվել է թիվ 60-2288-24 քրեական վարույթը:
2025 թվականի ապրիլի 09-ին ՀՀ դատախազության Երևան քաղաքի Կենտրոն և Նորք-Մարաշ վարչական շրջանների դատախազության ավագ դատախազ Դ.Մարգարյանի որոշմամբ՝ թիվ 60-2288-24 քրեական վարույթով Ալիկ Անդրոննիկի Ավետիսյանի նկատմամբ ՀՀ քրեական օրենսգրքի 344-րդ հոդվածի 2-րդ մասով հարուցվել է հանրային քրեական հետապնդում:
2025 թվականի ապրիլի 18-ին Երևան քաղաքի առաջին ատյանի ընդհանուր իրավասության քրեական դատարան է ստացվել թիվ ԵԴ1/1400/01/25 քրեական գործն ըստ մեղադրանքի՝ Ալիկ Անդրոննիկի Ավետիսյանի ՀՀ քրեական օրենսգրքի 344-րդ հոդվածի 2-րդ մասով:
Նույն օրը քրեական գործը էլեկտրոնային եղանակով մակագրվել և 2025 թվականի ապրիլի 21-ին հանձնվել է դատավոր Տաթևիկ Մուրադյանին:
2025 թվականի ապրիլի 23-ին Դատարանի կողմից որոշում է կայացվել թիվ ԵԴ1/2334/01/25 քրեական գործի վարույթն ստանձնելու և նախնական դատալսումներ նշանակելու մասին։
2025 թվականի նոյեմբերի 20-ին Դատարանը թիվ ԵԴ1/1400/01/25 քրեական գործով կայացրել է մեղադրական վերդիկտ՝ Ալիկ Անդրոննիկի Ավետիսյանին մեղավոր ճանաչելով ՀՀ քրեական օրենսգրքի 344-րդ հոդվածի 2-րդ մասով նախատեսված արարքի կատարման մեջ:
2025 թվականի օգոստոսի 06-ին Դատարան է ստացվել մեղադրյալ Ալիկ Ավետիսյանը դիմումը, որով վերջինս խնդրել է իրեն տրամադրել հանրային պաշտպան և դատական վարույթն իրականացնել իր բացակայությամբ:
ՀՀ քրեական դատավարության օրենսգրքի 272-րդ հոդվածի 4-րդ մասի կիրառմամբ դատական նիստերը Դատարանի որոշմամբ անցկացվել են մեղադրյալի բացակայությամբ:
2. Մեղադրանքի փաստական նկարագրությունը.
Ալիկ Անդրոննիկի Ավետիսյանին մեղադրանք է ներկայացվել ՀՀ քրեական օրենսգրքի 344-րդ հոդվածի 2-րդ մասով այն բանի համար, որ «նա ՀՀ ոստիկանության պարեկային ծառայության կողմից թիվ 8180144952 վարչական իրավախախտման գործով 2022 թվականի հունիսի 23-ին կայացված որոշմամբ 1/մեկ/ տարի ժամանակով զրկվել է տրանսպորտային միջոցներ վարելու իրավունքից՝ սկսած 2022 թվականի հունիսի 23-ից մինչև 2023 թվականի հունիսի 23-ը, որի մասին պատշաճ ծանուցվել է: Տրանսպորտային միջոցներ վարելու իրավունքից զրկման ժամկետն ավարտվելուց հետո Ալիկ Անդրոննիկի Ավետիսյանը, չստանալով տրանսպորտային միջոցներ վարելու իրավունքի վարորդական վկայական և համարվելով տրանսպորտային միջոցներ վարելու իրավունք չունեցող անձ, 2024 թվականի ապրիլի 5-ին՝ ժամը 04:00-ի սահմաններում, գտնվելով ոչ սթափ վիճակում՝ մեկ լիտր արյան մեջ մաքուր ալկոհոլի պարունակությունը 2,402% ((պրոմիլլե) համարժեք է 2,402 գ/լ ալկոհոլին), Երևան քաղաքի Խանջյան փողոցում վարել է «Նիսսան» մակնիշի 38 MM 038 հաշվառման համարանիշի տրանսպորտային միջոցը և ենթարկվել է վթարի:»։
3. Դատաքննության ընթացքում հետազոտված թույլատրելի ապացույցները.
Հիմնական դատալսումների ընթացքում հետազոտված թույլատրելի ապացույցները.
- Հրապարակվեց մեղադրյալ Ալիկ Անդրոննիկի Ավետիսյանի նախաքննական ցուցմունքը, համաձայն որի՝ ներկայացված մեղադրանքում իրեն մեղավոր է ճանաչել, ընդունել է, որ առանց վարորդական իրավունքի վկայական ունենալու, հարբած վիճակում Երևան քաղաքի Խանջյան փողոցում վարել է «Նիսսան» մակնիշի 38 MM 038 հաշվառման համարանիշի ավտոմեքենան և ենթարկվել է վթարի: Զղջում է իր կատարած արարքի համար, խնդրել է իր նկատմամբ լինել մեղմ ու ներողամիտ: (դատական նիստի արձանագրություն, գ.թ. 55-57)
- ՀՀ ՆԳՆ էլեկտրոնային ռեգիստրից ստացված տեղեկանքը, համաձայն որի՝ Ալիկ Անդրոննիկի Ավետիսյանի /ծնվ. 07.10.1995թ./ անվամբ հաշվառված վարորդական վկայականի տվյալներն են՝ RJ278023, ուղարկված 16.03.2017 թվականին: Զննմամբ պարզվել է նաև, որ ըստ զրկումների պատմության՝ զրկման սկիզբը 23.06.2022 թվականն է, ավարտը՝ 23.06.2023 թվականը:
(գ.թ. 4 դատական նիստի արձանագրություն)
- Ալկոհոլի պարունակության ստուգման կտրոնի պատճենը, համաձայն որի՝ ստուգաչափման սարքի համարն է՝ 91100940 զննման համարը՝ 04187, զննման ամսաթիվը՝ 28.07.2025թ., զննման ժամը՝ 01:52:20, վերջին ստուգաչափման ամսաթիվը՝ 17.01.2025թ., դատարկ թեստ՝ 0.000 մգ/լ, ստուգաչափման ձևաչափը՝ ավտոմատ, ալկոհոլի պարունակությունը՝ 0․563 մգ/լ, վարորդի անունն է՝ Ռուբեն, ազգանունը՝ Խաչատրյան, տրանսպորտային միջոցի համարանիշը՝ 37 RO 005 , ՀԾՀ՝ 3203990759, Պ/Ծ ազգանունը՝ Կարապետյան, կրծքանշանի համարը՝ 11596, ստորաբաժանում՝ 4-րդ գումարտակ, 3-րդ վաշտ:
(գ.թ. 20, դատական նիստի արձանագրություն)
- ՀՀ ՔԿ ԵՔՔՎ Ճանապարհատրանսպորտային հանցագործությունների քննության բաժնից ստացված թիվ 60116324 քրեական վարույթի շրջանակներում տուժողի հարցաքննության մասին արձանագրությունը, համաձայն որի՝ այն կազմվել է 25.05.2024 թվականին, Երևան քաղաքում, ժամը 14:13-ից 15:28-ը ընկած ժամանակահատվածում, ՀՀ ՔԿ ԵՔՔՎ Ճանապարհատրանսպորտային հանցագործությունների քննության բաժնի քննիչ Գեղամ Սարգսյանի կողմից: Զննմամբ պարզվել է հարցաքննությանը որպես տուժող մասնակցել է Ալիկ Անդրոննիկի Ավետիսյանը, ով ցուցմունք է տվել, որ Նիսսան մակնիշի 38MM038 հ/հ ավտոմեքենան պատկանել է իրեն, բայց հաշվառված է եղել իր կնոջ՝ Սուսաննա Տիգրանի Կարապետյանի անվամբ, իսկ 2024 թվականի ապրիլի 5-ին տեղի ունեցած դեպքի հետ կապված որևէ հանգամանք չի հիշում: Արձանագրության վերջում առկա է ստորագրություն, որի դիմաց գրված է Ա.Ավետիսյան, ինչպես նաև գրված է քննիչ, որի դիմաց առկա է ստորագրություն և գրված է Գ. Սարգսյան:
(գ.թ. 22-25, դատական նիստի արձանագրություն)
- ՀՀ ՔԿ ԵՔՔՎ Ճանապարհատրանսպորտային հանցագործությունների քննության բաժնից ստացված թիվ 60116324 քրեական վարույթը կարճելու մասին որոշումը, համաձայն որի՝ այն կայացվել է 11.06.2024 թվականին, Երևան քաղաքում, ՀՀ ՔԿ ԵՔՔՎ Ճանապարհատրանսպորտային հանցագործությունների քննության բաժնի քննիչ Գեղամ Սարգսյանի կողմից: Որոշման վերևի աջակողմյան հատվածում առկա է գրառում՝ «Հաստատում եմ Երևան քաղաքի դատախազության ավագ դատախազ' Ռ.Դոխայան», ինչպես նաև առկա է ստորագրություն և ամսաթիվ՝ 28.06.2024թ.: Զննությամբ պարզվել է նաև, որ 2024 թվականի ապրիլի 5-ին՝ ժամը 04:00-ին Ալիկ Անդրոննիկի Ավետիսյանը Երևան քաղաքի Խանջյան 5 հասցեի դիմաց, իր վարած Նիսսան մակնիշի 38MM038 հ/հ ավտոմեքենայով դուրս է եկել ճանապարհի երթևեկելի ուղեմասից, հայտնվել է մայթին և բախվել է մայթին գտնվող մետաղյա ճաղավանդակներին և ծառին, որի հետևանքով ստացել է մարմնական վնասվածքներ ու տեղափոխվել Հերացի թիվ 1 հիվանդանոց: Զննմամբ պարզվել է, որ Ալիկ Անդրոննիկի Ավետիսյանը ցուցմունքով հայտնել է, որ Նիսսան մակնիշի 38MM038 հ/հ ավտոմեքենան պատկանել է իրեն, բայց հաշվառված է եղել իր կնոջ՝ Սուսաննա Տիգրանի Կարապետյանի անվամբ, իսկ 2024 թվականի ապրիլի 5-ին տեղի ունեցած դեպքի հետ կապված որևէ հանգամանք չի հիշում: Զննմամբ պարզվել է նաև, որ Ալիկ Անդրոննիկի Ավետիսյանի կինը' Սուսաննա Տիգրանի Կարապետյանը ցուցմունքով հայտնել է, որ ինքը տեղյակ է եղել, որ Ալիկ Անդրոննիկի Ավետիսյանը 2022 թվականի հունիս ամսին զրկվել էր տրանսպորտային միջոց վարելու իրավունքից, բայց, թե հետագայում նա ստացել է վարորդական իրավունքի վկայական տեղյակ չի եղել: Իր կարծիքով Ալիկ Ավետիսյանը քնել է մեքենայի ղեկին և այդ իսկ պատճառով 2024 թվականի ապրիլի 5-ին՝ ժամը 03:50-ի սահմաններում մեքենան դարձել է անկառավարելի և դուրս գալով երթևեկելի գոտուց և հարվածել է ծառին ու մետաղական ճաղավանդակներին, ինչի պատճառով էլ ստացել է մարմնական վնասվածքներ և տեղափոխվել Հերացի թիվ 1 հիվանդանոց:
Զննության ընթացքում պարզվել է նաև «Փարքինգ Սիթի Սերվիս» ՓԲԸ-ից ստացված Երևան քաղաքի Խանջյան 5 հասցեի մոտակայքում մի փոքր բարձրության վրա տեղադրված, դեպքի պահն արձանագրած տեսանկարահանող սարքի տեսագրության մեջ երևում է Խանջյան փողոցը, որտեղ երթևեկում են տարբեր մեքենաներ, որոնց մակնիշները և պետհամարանիշերը չեն երևում: Տեսագրության 03:54:42-ին տեսանկարահանող տեսախցիկի տեսադաշտում են երևում Խանջյան փողոցով՝ Վարդանանց փողոցի կողմից դեպի Ագաթանգեղոս փողոցի ուղղությամբ երթևեկող երկու մեքենաների լույսեր, այնուհետև նույն ուղեմասի ձախ եզրային մասով իրար հետևից երթևեկող երկու 2 ավտոմեքենա: Տեսագրության 03:54:56-ին առաջին ավտոմեքենան շարունակում է ուղիղ ընթացքը ուղեմասի ձախ եզրային հատվածով, իսկ նրա հետևից երթևեկող մյուս ավտոմեքենան դեպի աջ մանևր է կատարում և առանց իր համար երթևեկելու համար որևէ խոչընդոտ ունենալու տեսագրության 03:54:58-ին դուրս գալով ճանապարհի երթևեկելի մասից բարձրանում է մայթի վրա և տեսագրության 03:54:59-ին բախվում է մետաղյա ճաղավանդակներին ու ծառին: Այնուհետև բախված մեքենայի մոտ են հավաքվում քաղաքացիներ, պարեկային ծառայության աշխատակիցներ, իսկ հետո գալիս է նաև շտապօգնության ավտոմեքենան:
(գ.թ. 26-31, դատական նիստի արձանագրություն)
- Ճանապարհատրանսպորտային դեպքի վայրի զննության մասին արձանագրությունը, համաձայն որի՝ դեպքը տեղի է ունեցել Երևան քաղաքի Խանջյան փողոցի թիվ 54 հասցեի դիմացի ճանապարհահատվածում: Դեպքի պահին եղանակը եղել է պարզ, առանց տեղումների, ասֆալտը՝ չոր, լուսավորությունը՝ արհեստական: Դեպքի պահին պատահարի մասնակից տրանսպորտային միջոցի վարորդը եղել է ոչ սթափ վիճակում:
(գ.թ. 8-10, դատական նիստի արձանագրություն)
- Դատաքիմիական փորձաքննության թիվ 236 եզրակացությունը, համաձայն որի՝ փորձաքննությանը ներկայացված Ալիկ Անդրոննիկի Ավետիսյանից վերցված արյան փորձանմուշի մեջ հայտնաբերվել է 2,402 % /պրոմիլլե/, որը համարժեք է 2,402 գ/լ ալկոհոլի:
(գ.թ. 11-13, դատական նիստի արձանագրություն)
- 2024 թվականի դեկտեմբերի 26-ին նախաքննության մարմնի կողմից կազմված՝ վերը նշված փաստաթղթերը զննելու վերաբերյալ արձանագրությունը:
(գ.թ. 32-34, դատական նիստի արձանագրություն)
- Նախաքննության մարմնի կողմից 26.12.2024թ. կայացված արտավարութային փաստաթուղթ ճանաչելու մասին որոշումը, համաձայն որի՝ Ալիկ Անդրոննիկի Ավետիսյանի վերաբերյալ ՀՀ ՆԳՆ էլեկտրոնային ռեգիստրից ստացված տեղեկանքը, ՀՀ ՔԿ Երևան քաղաքի քննչական վարչության ՃՏՀ քննության բաժնում նախաձեռնված թիվ 60116324 քրեական վարույթը կարճելու մասին որոշումը և թիվ 60116324 քրեական վարույթի շրջանակներում որպես տուժող՝ Ալիկ Անդրոննիկի Ավետիսյանի մասնակցությամբ կազմված հարցաքննության մասին արձանագրությունը ճանաչվել են արտավարութային փաստաթուղթ։
(գ.թ. 35-36, դատական նիստի արձանագրություն)
Լրացուցիչ դատալսումների ընթացքում հետազոտված թույլատրելի ապացույցները.
 ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից ստացված տեղեկանքը, համաձայն որի՝ Ալիկ Անդրոննիկի Ավետիսյանը ներկայումս ունի դատվածություն:
 Միասնական էլեկտրոնային տեղեկատվական համակարգում կատարված հարցման պատասխանի համաձայն՝ ՊԵԿ տվյալների շտեմարանում Ալիկ Ավետիսյանի միջին ամսական եկամտի 35 տոկոսի չափը պակաս է նվազագույն աշխատավարձի չափից։
 ՀՀ ԱՆ պրոբացիայի ծառայության Երևանի քաղաքային մարմնի պետի գրությունը և կից տեղեկանք, համաձայն որի՝ Ա.Ավետիսյանը թիվ ԵԴ1/2919/01/24 դատավճռով նշանակված 375.000 ՀՀ դրամ տուգանքից կատարել է 20.000 ՀՀ դրամի չափով վճարում:
 Ալիկ Ավետիսյանի առողջական վիճակի վերաբերյալ փաստաթղթերը։
4. Դատարանի փաստական վերլուծությունները և հաստատված կամ հերքված փաստական հանգամանքները.
Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը գտնում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարելու, որ Ալիկ Անդրոննիկի Ավետիսյանը ՀՀ ոստիկանության պարեկային ծառայության կողմից թիվ 8180144952 վարչական իրավախախտման գործով 2022 թվականի հունիսի 23-ին կայացված որոշմամբ 1/մեկ/ տարի ժամանակով զրկվել է տրանսպորտային միջոցներ վարելու իրավունքից՝ սկսած 2022 թվականի հունիսի 23-ից մինչև 2023 թվականի հունիսի 23-ը, որի մասին պատշաճ ծանուցվել է: Տրանսպորտային միջոցներ վարելու իրավունքից զրկման ժամկետն ավարտվելուց հետո Ալիկ Անդրոննիկի Ավետիսյանը, չստանալով տրանսպորտային միջոցներ վարելու իրավունքի վարորդական վկայական և համարվելով տրանսպորտային միջոցներ վարելու իրավունք չունեցող անձ, 2024 թվականի ապրիլի 5-ին՝ ժամը 04:00-ի սահմաններում, գտնվելով ոչ սթափ վիճակում՝ մեկ լիտր արյան մեջ մաքուր ալկոհոլի պարունակությունը 2,402% ((պրոմիլլե) համարժեք է 2,402 գ/լ ալկոհոլին), Երևան քաղաքի Խանջյան փողոցում վարել է «Նիսսան» մակնիշի 38 MM 038 հաշվառման համարանիշի տրանսպորտային միջոցը և ենթարկվել է վթարի:
Դատարանը գտնում է, որ դատավճռի հիմքում դրված՝ փոխկապակցված վերաբերելի, թույլատրելի, հավաստի ապացույցների ամբողջությունը բացառում է Ալիկ Անդրոննիկի Ավետիսյանին ներկայացված մեղադրանքի ապացուցվածության վերաբերյալ ցանկացած հիմնավոր կասկած։
Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները. Ալիկ Անդրոննիկի Ավետիսյանն այժմ դատվածություն ունեցող անձ է, սակայն արարքը կատարելու պահին դատվածություն չի ունեցել, մեղսագրվող հանցանքն ավարտվելու օրվան նախորդող 12 ամիսների ընթացքում վերջինիս ստացած ամսական եկամտի 35 տոկոսի չափը պակաս է նվազագույն աշխատավարձի չափից, Ալիկ Անդրոննիկի Ավետիսյանը թիվ ԵԴ1/2919/01/24 դատավճռով նշանակված 375.000 ՀՀ դրամ տուգանքից կատարել է 20.000 ՀՀ դրամի չափով վճարում:
5. Դատարանի իրավական վերլուծությունները, հետևությունները և որոշումները.
Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, Դատարանը հանգում է հետևության, որ ապացուցված է Ալիկ Անդրոննիկի Ավետիսյանին վերագրվող արարքը, այդ արարքի քրեական հակաիրավականությունը, այդ արարքը մեղադրյալի կողմից կատարելը, ինչպես նաև նրա մեղավորությունը տվյալ արարքի կատարման մեջ:
Դատարանը հանգում է այն հետևության, որ մեղադրյալ Ալիկ Անդրոննիկի Ավետիսյանը կատարել է իրեն մեղսագրված արարքը, որի նկատմամբ կիրառելի է ՀՀ քրեական օրենսգրքի 344-րդ հոդվածի 2-րդ մասը:
Դատարանը, հաստատված համարելով հանցագործության և դրա կատարման մեջ Ալիկ Անդրոննիկի Ավետիսյանի մեղքի ապացուցված լինելը, գտնում է, որ նա ենթակա է պատժի կատարած հանցանքի համար:
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, գտնում է, որ Ալիկ Անդրոննիկի Ավետիսյանի պատասխանատվությունն ու պատիժը մեղմացնող հանգամանք պետք է դիտել ներկայացված մեղադրանքում իրեն լիովին մեղավոր ճանաչելը և կատարածի համար զղջալը (Դատարանի նման մոտեցումը համահունչ է Սերոբ Սարգսյանի գործով 2012 թվականի նոյեմբերի 1-ի թիվ ՍԴ/0109/01/12 որոշման 27-րդ կետում ՀՀ վճռաբեկ դատարանի արտահայտած իրավական դիրքորոշմանը։
Դատարանը միաժամանակ արձանագրում է, որ Ալիկ Ավետիսյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71-րդ հոդվածի 1-ին մասով նախատեսված հանգամանքներ առկա չեն:
Որպես Ալիկ Ավետիսյանի անձը բնութագրող հանգամանք Դատարանը հաշվի է առնում նույնաբնույթ հանցանքի կատարման համար դատապարտված լինելը։
Դատարանը, հաշվի առնելով Ալիկ Անդրոննիկի Ավետիսյանի կատարած հանցանքի հանգամանքները, նրա անձը բնութագրող տվյալները, պատասխանատվությունը և պատիժը մեղմացնող հանգամանքը, պատասխանատվությունը և պատիժը ծանրացնող հանգամանքների բացակայությունը, ՀՀ քրեական օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ ՀՀ քրեական օրենսգրքի 344-րդ հոդվածի 2-րդ մասի սանկցիայով որպես հիմնական պատիժ է նախատեսված նաև կարճաժամկետ ազատազրկման ձևով և ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար նշված հանցագործության կատարման համար առավել խիստ պատիժ նշանակելու անհրաժեշտությունը բացակայում է, իսկ առավել մեղմ պատիժ նշանակելու հնարավորությունը բացակայում է՝ հաշվի առնելով նաև անձի առողջական վիճակի վերաբերյալ գործում առկա տվյալները, գտնում է, որ նրա նկատմամբ ՀՀ քրեական օրենսգրքի 344-րդ հոդվածի 2-րդ մասով հիմնական պատիժ պետք է նշանակել կարճաժամկետ ազատազրկում՝ 1 (մեկ) ամիս ժամկետով, որի միջոցով կապահովվի նաև հանցավորի վերասոցիալականացումը և իրավահպատակ վարքագծի ձևավորումը։
Դատարանը միաժամանակ գտնում է, որ ՀՀ քրեական օրենսգրքի 74-րդ հոդվածի 11-րդ մասի կիրառմամբ Ալիկ Անդրոննիկի Ավետիսյանի նկատմամբ սույն դատավճռով նշանակված պատժին՝ 1 (մեկ) ամիս ժամկետով կարճաժամկետ ազատազրկմանը պետք է լրիվ գումարել Երևան քաղաքի առաջին ատյանի ընդհանուր իրավասության քրեական դատարանի 2024 թվականի նոյեմբերի 01-ի թիվ ԵԴ1/2919/01/24 դատավճռով նշանակված 375.000 (երեք հարյուր յոթանասունհինգ հազար) ՀՀ դրամ տուգանք պատժի չվճարած մասը՝ 355.000 (երեք հարյուր հիսունհինգ հազար) ՀՀ դրամ տուգանք պատիժը, և վերջնական պատիժ նշանակել ազատազրկում՝ 1 (մեկ) ամիս ժամկետով և տուգանք՝ 355.000 (երեք հարյուր հիսունհինգ հազար) ՀՀ դրամի չափով:
Դատարանը միաժամանակ գտնում է, որ կատարած հանցանքի համար Ալիկ Անդրոննիկի Ավետիսյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
Մեղադրյալ Ալիկ Ավետիսյանի կողմից իր նկատմամբ նշանակված պատիժը կրելու հարցը որոշելիս Դատարանը հաշվի է առնում հետևյալ հանգամանքները՝
- Ալիկ Ավետիսյանը լիովին ընդունել է իրեն մեղսագրված հանցանքը և զղջացել կատարածի համար։
- Ալիկ Ավետիսյանն ունի առողջական խնդիրներ:
Դատարանը գտնում է, որ վերոգրյալ հանգամանքների պայմաններում Ալիկ Ավետիսյանի կողմից պատիժը փաստացի կրելը կարող է բացասաբար անդրադառնալ վերջինիս կյանքի պայմանների վրա։ Բացի այդ, Ալիկ Ավետիսյանի կողմից մեղքն ընդունելու պարագայում քրեական պատժի նպատակների իրացումը, այդ թվում՝ պատժի ենթարկված անձին ուղղելու հավանականությունը, զգալիորեն բարձրանում է, ինչը վկայում է այն մասին, որ ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակներին հնարավոր է հասնել նաև առանց Ալիկ Ավետիսյանի կողմից կարճաժամկետ ազատազրկման ձևով պատիժը փաստացի կրելու:
Այսպիսով՝ Դատարանը գտնում է, որ Ալիկ Ավետիսյանի նկատմամբ նշանակված պատիժը՝ 1 (մեկ) ամիս ժամկետով կարճաժամկետ ազատազրկումը, ՀՀ քրեական օրենսգրքի 84-րդ հոդվածի կիրառմամբ պետք է պայմանականորեն չկիրառել՝ սահմանելով 1 (մեկ) տարի ժամկետով փորձաշրջան:
Փորձաշրջանի ընթացքում Ալիկ Ավետիսյանի նկատմամբ պետք է նշանակել հետևյալ պարտականությունները՝
- առանց իր վարքագծի նկատմամբ վերահսկողություն իրականացնող իրավասու մարմնի համաձայնության չլքել Հայաստանի Հանրապետության տարածքը,
- բնակության վայրը փոխելու դեպքում իր վարքագծի նկատմամբ վերահսկողություն իրականացնող իրավասու մարմնին սեղմ ժամկետում հայտնել նոր բնակության վայրի հասցեն։
Միաժամանակ հաշվի առնելով վերջինիս գույքային դրության վերաբերյալ գործում առկա տվյալները՝ Դատարանը գտնում է, որ Ալիկ Անդրոննիկի Ավետիսյանին պետք է թույլատրել որպես պատիժ նշանակված 355.000 (երեք հարյուր հիսունհինգ հազար) ՀՀ դրամի չափով տուգանքը վճարել մաս առ մաս 1 (մեկ) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Դատարանը, անդրադառնալով ՀՀ քրեական դատավարության 348-րդ հոդվածով նախատեսված՝ դատավճիռ կայացնելիս դատարանի լուծմանը ենթակա մյուս հարցերին, արձանագրում է, որ գործով իրեղեն ապացույցներ չկան, գույքային հայց ներկայացված չէ, առկա չէ նաև հատուցման ենթակա գույքային այլ վնաս և դրա ապահովման նպատակով արգելադրված որևէ գույք, քրեական վարույթով առկա չեն նաև վարութային ծախսեր:
Անդրադառնալով մեղադրյալի նկատմամբ ընտրված խափանման միջոցի հարցին՝ Դատարանն արձանագրում է, որ վերջինիս նկատմամբ որպես խափանման միջոց ընտրված բացակայելու արգելքը պետք է թողնել անփոփոխ՝ մինչև դատավճռի օրինական ուժի մեջ մտնելը, իսկ դրանից հետո պետք է վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 167-րդ, 347-350-րդ և 352-353-րդ հոդվածներով` Դատարանը

ՎՃՌԵՑ

Ալիկ Անդրոննիկի Ավետիսյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով նախատեսված հանցանքի կատարման մեջ, և նրա նկատմամբ պատիժ նշանակել կարճաժամկետ ազատազրկում՝ 1 (մեկ) ամիս ժամկետով:
ՀՀ քրեական օրենսգրքի 74-րդ հոդվածի 11-րդ մասի կիրառմամբ Ալիկ Անդրոննիկի Ավետիսյանի նկատմամբ սույն դատավճռով նշանակված պատժին՝ 1 (մեկ) ամիս ժամկետով կարճաժամկետ ազատազրկմանը լրիվ գումարել Երևան քաղաքի առաջին ատյանի ընդհանուր իրավասության քրեական դատարանի 2024 թվականի նոյեմբերի 01-ի թիվ ԵԴ1/2919/01/24 դատավճռով նշանակված 375.000 (երեք հարյուր յոթանասունհինգ հազար) ՀՀ դրամ տուգանք պատժի չվճարած մասը՝ 355.000 (երեք հարյուր հիսունհինգ հազար) ՀՀ դրամ տուգանք պատիժը, և վերջնական պատիժ նշանակել ազատազրկում՝ 1 (մեկ) ամիս ժամկետով և տուգանք՝ 355.000 (երեք հարյուր հիսունհինգ հազար) ՀՀ դրամի չափով:
ՀՀ քրեական օրենսգրքի 84-րդ հոդվածի կիրառմամբ Ալիկ Անդրոննիկի Ավետիսյանի նկատմամբ նշանակված կարճաժամկետ ազատազրկման ձևով պատիժը պայմանականորեն չկիրառել՝ սահմանելով փորձաշրջան 1 (մեկ) տարի ժամկետով։ Փորձաշրջանի ընթացքում Ալիկ Անդրոննիկի Ավետիսյանի վարքի նկատմամբ վերահսկողությունը դնել ՀՀ ԱՆ պրոբացիայի ծառայության վրա՝ սահմանելով պարտականություն՝ առանց դատապարտյալի վարքագծի նկատմամբ վերահսկողություն իրականացնող իրավասու մարմնի համաձայնության չլքել Հայաստանի Հանրապետության տարածքը և բնակության վայրը փոխելու դեպքում դատապարտյալի վարքագծի նկատմամբ վերահսկողություն իրականացնող իրավասու մարմնին սեղմ ժամկետում հայտնել իր նոր բնակության վայրի հասցեն:
Ալիկ Անդրոննիկի Ավետիսյանին թույլատրել որպես պատիժ նշանակված 355.000 (երեք հարյուր հիսունհինգ հազար) ՀՀ դրամի չափով տուգանքը վճարել մաս առ մաս 1 (մեկ) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Ալիկ Անդրոննիկի Ավետիսյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել:
Դատավճիռը կարող է բողոքարկվել ՀՀ վերաքննիչ քրեական դատարան՝ ստանալու օրվանից հետո մեկամսյա ժամկետում:




ԴԱՏԱՎՈՐ ՏԱԹԵՎԻԿ ՄՈՒՐԱԴՅԱՆ