ԵԴ1/1405/01/25




ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«08» դեկտեմբերի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` Դատարան)

նախագահությամբ՝ դատավոր Տաթևիկ Մուրադյանի,
քարտուղարությամբ՝ Ագնետա Հակոբյանի,

մասնակցությամբ՝
հանրային մեղադրող՝ Գոհար Մուրադյանի,
պաշտպան՝ Դավիթ Կարապետյանի,
տուժող՝ Ժիրայր Կարապետյանի,
մեղադրյալներ՝ Աշոտ Ղարոյանի,
Ռուբեն Մարտիրոսյանի,

դռնբաց դատական նիստում քննելով քրեական գործն ըստ մեղադրանքի՝

Աշոտ Արմենի Ղարոյանի՝
(ծնված՝ 09.02.1993թ. ք. Երևանում, ազգությամբ հայ, ՀՀ քաղաքացի, բարձրագույն կրթությամբ, չամուսնացած, չի աշխատում, նախկինում չդատապարտված, հաշվառված և բնակվող՝ ք. Երևան, Նոր Արեշ, 31-րդ փողոց, 51-րդ տուն հասցեում, որպես խափանման միջոց է կիրառվել բացակայելու արգելքը) 2003 թվականի ապրիլի 18-ին ընդունված ՀՀ քրեական օրենսգրքի 117-րդ հոդվածով,

Ռուբեն Ռաֆայելի Մարտիրոսյանի՝
(ծնված՝ 15.10.1984թ. ք. Երևանում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին երեք անչափահաս երեխաներ, հանդիսանում է անհատ ձեռնարկատեր, նախկինում չդատապարտված, հաշվառված և բնակվող՝ ք. Երևան, Նոր Արեշ, 31-րդ փողոց, 48-րդ տուն հասցեում, որպես խափանման միջոց է կիրառվել գրավը) 2003 թվականի ապրիլի 18-ին ընդունված ՀՀ քրեական օրենսգրքի 117-րդ հոդվածով,

ՊԱՐԶԵՑ

1. Քրեական գործի դատավարական նախապատմությունը.
2022 թվականի հունիսի 02-ին ՀՀ ոստիկանության Երևան քաղաքի վարչության Էրեբունու բաժնում 2003 թվականի ապրիլի 18-ին ընդունված ՀՀ քրեական օրենսգրքի 258-րդ հոդվածի 3-րդ մասի 1-ին կետով նախատեսված հանցագործության հատկանիշներով հարուցվել է թիվ 12858722 քրեական գործը:
2022 թվականի հունիսի 03-ին ՀՀ ՔԿ Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնում թիվ 12858722 քրեական գործն ընդունվել է վարույթ, և կատարվել է նախաքննություն:
2025 թվականի մարտի 26-ին ՀՀ դատախազության Երևան քաղաքի Էրեբունի և Նուբարաշեն վարչական շրջանների դատախազության ավագ դատախազ Գ.Մուրադյանի որոշմամբ՝ թիվ 12858722 քրեական վարույթով Ռուբեն Ռաֆայելի Մարտիրոսյանի նկատմամբ 2003 թվականի ապրիլի 18-ին ընդունված ՀՀ քրեական օրենսգրքի 117-րդ հոդվածով հարուցվել է հանրային քրեական հետապնդում:
2025 թվականի մարտի 26-ին ՀՀ դատախազության Երևան քաղաքի Էրեբունի և Նուբարաշեն վարչական շրջանների դատախազության ավագ դատախազ Գ.Մուրադյանի որոշմամբ՝ թիվ 12858722 քրեական վարույթով Աշոտ Արմենի Ղարոյանի նկատմամբ 2003 թվականի ապրիլի 18-ին ընդունված ՀՀ քրեական օրենսգրքի 117-րդ հոդվածով հարուցվել է հանրային քրեական հետապնդում:
Նախաքննության մարմնի 2025 թվականի ապրիլի 02-ի որոշմամբ թիվ 12858722 քրեական վարույթից անջատվել և առանձին վարույթում առանձնացվել է քննությամբ ինքնությունը չպարզված այլ անձանց կողմից դիտավորությամբ Ժիրայր Կարապետյանին մարմնական վնասվածքներ պատճառելը՝ նախատեսված ՀՀ քրեական օրենսգրքի 171-րդ հոդվածի 1-ին մասով:
2025 թվականի ապրիլի 18-ին Երևան քաղաքի առաջին ատյանի ընդհանուր իրավասության քրեական դատարան է ստացվել թիվ ԵԴ1/1405/01/25 քրեական գործն ըստ մեղադրանքի՝ Աշոտ Արմենի Ղարոյանի՝ 2003 թվականի ապրիլի 18-ին ընդունված ՀՀ քրեական օրենսգրքի 117-րդ հոդվածով և Ռուբեն Ռաֆայելի Մարտիրոսյանի՝ 2003 թվականի ապրիլի 18-ին ընդունված ՀՀ քրեական օրենսգրքի 117-րդ հոդվածով:
Նույն օրը քրեական գործն էլեկտրոնային եղանակով մակագրվել և 2025 թվականի ապրիլի 21-ին հանձնվել է դատավոր Տաթևիկ Մուրադյանին:
2025 թվականի ապրիլի 23-ին Դատարանի կողմից որոշում է կայացվել թիվ ԵԴ1/1405/01/25 քրեական գործի վարույթն ստանձնելու և նախնական դատալսումներ նշանակելու մասին։
2025 թվականի դեկտեմբերի 08-ին, Դատարանը թիվ ԵԴ1/1405/01/25 քրեական գործով կայացրել է մեղադրական վերդիկտ՝ Ռուբեն Ռաֆայելի Մարտիրոսյանին և Աշոտ Արմենի Ղարոյանին մեղավոր ճանաչելով 2003 թվականի ՀՀ քրեական օրենսգրքի 171-րդ հոդվածի 1-ին մասով նախատեսված արարքի կատարման մեջ:
2. Մեղադրանքի փաստական նկարագրությունը.
Ռուբեն Ռաֆայելի Մարտիրոսյանին մեղադրանք է ներկայացվել ՀՀ քրեական օրենսգրքի 171-րդ հոդվածի 1-ին մասով այն բանի համար, որ «նա Աշոտ Արմենի Ղարոյանի և քննությամբ ինքնությունը չպարզված այլ անձանց հետ դիտավորությամբ Ժիրայր Կարապետյանին պատճառել են առողջության կարճատև քայքայում առաջացրած մարմնական վնասվածքներ:
Այսպես Ռուբեն Ռաֆայելի Մարտիրոսյանը, Աշոտ Արմենի Ղարոյանը և քննությամբ ինքնությունը չպարզված այլ անձինք 2022 թվականի մայիսի 15-ին՝ ժամը 01:00-ի սահմաններում, Երևան քաղաքի Նոր Արեշ 29-րդ և 31-րդ փողոցների խաչմերուկի մոտակայքում միասնական հանցավոր դիտավորությամբ, մեկը մյուսի գործողությունները փոխլրացնելով ձեռքերով և ոտքերով բազմաթիվ հարվածներ են հասցրել Ժիրայր Կարապետյանի մարմնի տարբեր մասերին և վերջինիս պատճառել են առողջության կարճատև քայքայում առաջացրած՝ գանգուղեղային տրավմայի, քթի շրջանի սալջարդ վերքի, ճակատային, այտերի, ձախ նախաբազկի, կրծքավանդակի, աջ գոտկային, ձախ ծնկահոդի, զույգ սրունքների շրջանների քերծվածքների, ճակատի, քթի շրջանների արյունազեղումների և քթոսկրի կոտրվածքի ձևով մարմնական վնասվածքներ:»։
Աշոտ Արմենի Ղարոյանին մեղադրանք է ներկայացվել ՀՀ քրեական օրենսգրքի 171-րդ հոդվածի 1-ին մասով այն բանի համար, որ «նա Ռուբեն Ռաֆայելի Մարտիրոսյանի և քննությամբ ինքնությունը չպարզված այլ անձանց հետ դիտավորությամբ Ժիրայր Կարապետյանին պատճառել են առողջության կարճատև քայքայում առաջացրած մարմնական վնասվածքներ:
Այսպես Աշոտ Արմենի Ղարոյանը և Ռուբեն Ռաֆայելի Մարտիրոսյանը 2022 թվականի մայիսի 15-ին՝ ժամը 01:00-ի սահմաններում, Երևան քաղաքի Նոր Արեշ 29-րդ և 31-րդ փողոցների խաչմերուկի մոտակայքում միասնական հանցավոր դիտավորությամբ, մեկը մյուսի գործողությունները փոխլրացնելով ձեռքերով և ոտքերով բազմաթիվ հարվածներ են հասցրել Ժիրայր Կարապետյանի մարմնի տարբեր մասերին և վերջինիս պատճառել են առողջության կարճատև քայքայում առաջացրած՝ գանգուղեղային տրավմայի, քթի շրջանի սալջարդ վերքի, ճակատային, այտերի, ձախ նախաբազկի, կրծքավանդակի, աջ գոտկային, ձախ ծնկահոդի, զույգ սրունքների շրջանների քերծվածքների, ճակատի, քթի շրջանների արյունազեղումների և քթոսկրի կոտրվածքի ձևով մարմնական վնասվածքներ:»։
3. Դատաքննության ընթացքում հետազոտված թույլատրելի ապացույցները.
Հիմնական դատալսումների ընթացքում հետազոտված թույլատրելի ապացույցները.
- Դատաքննության ընթացքում մեղադրյալներ Աշոտ Ղարոյանը և Ռուբեն Մարտիրոսյանը, օգտվելով իրենց սահմանադրական իրավունքից, հրաժարվեցին ցուցմունք տալ։
(դատական նիստի արձանագրություն)
- Անձին լուսանկարով ճանաչման ներկայացնելու քննչական գործողությունների երկու արձանագրությունները, համաձայն որոնց՝ 2022 թվականի հունիսի 15-ին կատարված անձին լուսանկարով ճանաչման ներկայացնելու առաջին քննչական գործողության ընթացքում տուժող Ժիրայր Կարապետյանը ճանաչել է 1-ին համարի ներքո փակցված լուսանկարում պատկերված անձին /Ռուբեն Մարտիրոսյանի լուսանկար/ ու նշել, որ նա 2022 թվականի մայիսի 15-ին «Range Rover» ավտոմեքենայով դեպքի վայր եկած անձն է: Վերջինս իրեն ասել, որ «կանչում եմ, ինչի չես գալիս»: Նշել է նաև, որ նա դեպքի վայրում իրեն հարվածներ հասցրած անձանցից է:
(հատոր 1, գ.թ. 64-65, դատական նիստի արձանագրություն)
- 2022 թվականի հունիսի 15-ին կատարված անձին լուսանկարով ճանաչման ներկայացնելու մյուս քննչական գործողության ընթացքում տուժող Ժիրայր Կարապետյանը ճանաչել է 3-րդ համարի լուսանկարի ներքո պատկերված անձին /Աշոտ Ղարոյանի լուսանկար/ ու նշել, որ նա 2022 թվականի մայիսի 15-ին իրեն առաջինը մոտեցած անձն է, ով ասել է. «նստի ավտոմեքենան, միասին գնանք մեծ եղբոր մոտ»: Բացի այդ, նա իրեն հարվածներ հասցնողներից մեկն է եղել:
(հատոր 1, գ.թ. 68-69, դատական նիստի արձանագրություն)
- 2024 թվականի մարտի 5-ին զննության է ենթարկվել «տեղեկատվության պահանջ» քննչական գործողության շրջանակներում «ՄՏՍ Հայաստան» ՓԲ ընկերությունից ստացված և մագնիսական կրիչ հանդիսացող լազերային սկավառակի վրա գրառված թվային տվյալները, որոնք վերաբերում են տուժող Ժիրայր Սամվելի Կարապետյանի կողմից շահագործվող 094-449-049 բջջային հեռախոսահամարի ելքային և մուտքային հեռախոսազանգերի վերծանումներին, այդ թվում` զրոյական զանգերին, սպասարկման կայանների տեղակայման հասցեներին և բաժանորդային տվյալներին: Զննությամբ պարզվել է, որ 094-449-049 բջջային հեռախոսահամարը հաշվառված է Ժիրայր Սամվելի Կարապետյանի անվամբ: Նշված բջջային հեռախոսահամարի մուտքային զանգերին վերաբերող տվյալների զննությամբ պարզվեց, որ դեպքին նախորդած մեկ ժամվա ընթացքում՝ 2022 թվականի մայիսի լույս 15-ի գիշերը, 096-01-45-01 բջջային հեռախոսահամարով զանգահարել են Ժիրայր Կարապետյանի կողմից շահագործվող բջջային հեռախոսահամարին /սյունակներ 147 և 148/: Նախաքննության ընթացքում տվյալներ են ձեռք բերվել, որ 096-01-45-01 բջջային հեռախոսահամարը շահագործվել է Աշոտ Արմենի Ղարոյանի կողմից: 2022 թվականի մայիսի լույս 15-ի գիշերը, մասնավորապես՝ ժամը 00:00-ից մինչև 01:00-ն ընկած հատվածում, բացի 096-01-45-010 բջջային հեռախոսահամարից այլ հեռախոսահամարներով Ժիրայր Կարապետյանի կողմից շահագործվող բջջային հեռախոսահամարին մուտքային զանգեր առկա չեն:
Զննությամբ պարզվել է նաև, որ սույն վարույթի համար հետաքրքրություն ներկայացնող ժամանակահատվածում Ժիրայր Կարապետյանի կողմից շահագործվող բջջային հեռախոսահամարը սպասարկվել է Երևան քաղաքի Նոր Արեշ 41-րդ փողոցի 89 տան մոտ տեղակայված ալեհավաքով, այսինքն՝ իր բնակության թաղամասում:
(հատոր 1, գ.թ. 148-149, դատական նիստի արձանագրություն)
- 2024 թվականի մարտի 21-ին զննության է ենթարկվել «տեղեկատվության պահանջ» քննչական գործողության շրջանակներում ՄՏՍ Հայաստան ՓԲ ընկերությունից ստացված և մագնիսական կրիչ հանդիսացող լազերային սկավառակի վրա գրառված թվային տվյալները, որոնք վերաբերում են մեղադրյալ Աշոտ Արմենի Ղարոյանի կողմից շահագործվող 096-01-45-01 բջջային հեռախոսահամարի ելքային և մուտքային հեռախոսազանգերի վերծանումներին, այդ թվում՝ զրոյական զանգերին, սպասարկման կայանների տեղակայման հասցեներին և բաժանորդային տվյալներին: Նշված բջջային հեռախոսահամարի մուտքային զանգերին վերաբերող տվյալների զննությամբ պարզվել է, որ դեպքին նախորդած մեկ ժամվա ընթացքում՝ 2022 թվականի մայիսի լույս 15-ի գիշերը, հեռախոսազանգեր են գրանցվել սույն վարույթով տուժող Ժիրայր Սամվելի Կարապետյանի կողմից շահագործվող 094-449-049 բջջային հեռախոսահամարին, մասնավորապես՝ 2022 թվականի մայիսի լույս 15-ի գիշերը՝ ժամը 00:08 րոպե 57-րդ վայրկյանին /Inbound calls` 147-րդ սյունակ/: Այս հեռախոսազրույցը տևել է 29 վայրկյան: Նույն օրը՝ ժամը 00:40-րդ րոպե 25-րդ վայրկյանին, 096-01-45-01 բջջային հեռախոսահամարից կրկին զանգ է արձանագրվել 094-449-049 բջջային հեռախոսահամարին: Այս դեպքում հեռախոսազրույցը տևել է 20 վայրկյան /Inbound calls` 149-րդ սյունակ/: Նշված հեռախոսազանգերը կատարելու ժամանակ Աշոտ Ղարոյանի կողմից շահագործվող բջջային հեռախոսահամարը սպասարկվել է «Yerevan, Nor Aresh 41 str, near house 89>> հասցեում տեղակայված ալեհավաքով:
Զննությամբ պարզվել է նաև, որ սույն վարույթի համար հետաքրքրություն ներկայացնող ժամանակահատվածում Աշոտ Ղարոյանի կողմից շահագործվող բջջային հեռախոսահամարը սպասարկվել է Երևան քաղաքի Նոր Արեշ 41-րդ փողոցի 89 տան մոտ տեղակայված ալեհավաքով, այսինքն՝ իրենց թաղամասում:
(հատոր 1, գ.թ. 166-167, դատական նիստի արձանագրություն)
- 2024 թվականի ապրիլի 6-ին զննության է ենթարկվել «տեղեկատվության պահանջ» քննչական գործողության շրջանակներում Վիվա Արմենիա ՓԲ ընկերությունից ստացված և մագնիսական կրիչ հանդիսացող լազերային սկավառակի վրա գրառված թվային տվյալները, որոնք վերաբերում են մեղադրյալ Ռուբեն Ռաֆայելի Մարտիրոսյանի անվամբ գրանցված 093-00-97-00 բջջային հեռախոսահամարի ելքային և մուտքային հեռախոսազանգերի վերծանումներին, այդ թվում՝ զրոյական զանգերին, սպասարկման կայանների տեղակայման հասցեներին և բաժանորդային տվյալներին: Սույն վարույթի համար հետաքրքրություն ներկայացնող ժամանակահատվածում, մասնավորապես՝ 2022 թվականի մայիսի լույս 15-ի գիշերը՝ ժամը 00:00-ից մինչև 01:00-ն ընկած ժամանակահատվածում, վերը նշված բջջային հեռախոսը սպասարկվել է Երևանի Նոր Արեշ 41-րդ փողոցի թիվ 89 հասցեում տեղակայված ալեհավաքով /Outbound calls, սյունակ 48, Inbound calls, սյունակներ 80-81/, այսինքն՝ իրենց թաղամասում: Ռուբեն Մարտիրոսյանի անվամբ գրանցված բջջային հեռախոսահամարի մուտքային և ելքային հեռախոսազանգերի զննությամբ պարզվել է, որ տուժողի հեռախոսահամարից մուտքային զանգեր չեն արձանագրվել, չեն արձանագրվել նաև տուժողի հեռախոսահամարին ելքային զանգեր: Պարզվել է նաև, Ռուբեն Մարտիրոսյանի անվամբ գրանցված բջջային հեռախոսահամարից ելքային զանգեր չեն արձանագրվել Աշոտ Ղարոյանի կողմից շահագործվող 096-01-45-01 հեռախոսահամարին: Մինչդեռ նշված բջջային հեռախոսահամարից արձանագրվել են Ռուբեն Մարտիրոսյանի անվամբ գրանցված բջջային հեռախոսահամարին մուտքային զանգեր՝ 2024 թվականի մայիսի 9-ին և 21-ին /Inbound calls, սյունակներ 43 և 140/:
(հատոր 1, գ.թ. 197-198, դատական նիստի արձանագրություն)
- Նախաքննության մարմնի 2024 թվականի մարտի 05-ի, 2024 թվականի մարտի 21-ի և 2024 թվականի ապրիլի 06-ի որոշումներով արտավարութային փաստաթուղթ ճանաչված՝ բջջային օպերատորից ստացված թվային տվյալները կրող լազերային երեք սկավառակները:
(հատոր 1, գ.թ. 147, գ.թ. 150-151, գ.թ. 165, գ.թ. 168-169, գ.թ. 196, գ.թ. 199-200, դատական նիստի արձանագրություն)
- Զննում կատարելու մասին արձանագրությունը, համաձայն որի՝ 2025 թվականի փետրվարի 28-ին զննության է ենթարկվել «տեղեկատվության պահանջ» քննչական գործողության արդյունքում ՀՀ ՆԳՆ ոստիկանության պարեկային ծառայության Երևան քաղաքի գնդի վարչական վարույթի իրականացման բաժնից ստացված վարչական իրավախախտումների վերաբերյալ արձանագրությունները՝ ընդհանուր 8 /ութ/ թղթային կրիչ:
2022 թվականի օգոստոսի 21-ին թվագրվող «8200273271» համարի արձանագրությունը կազմվել է Աշոտ Արմենի Ղարոյանի նկատմամբ: Վերջինս «Range Rover» մակնիշի «01 CQ 100» հաշվառման համարանիշերով տրանսպորտային միջոցը վարել է՝ խախտելով «Ճանապարհային երթևեկության անվտանգության ապահովման մասին» ՀՀ օրենքի 15-րդ հոդվածով սահմանված պահանջները: Արձանագրությունը ստորագրել են այն կազմած կրտսեր պարեկ Ալբերտ Մարաբյանը /կրծքանշանի համարը՝ 05523/ և Աշոտ Արմենի Ղարոյանը /հասցեն՝ Նոր Արեշ 31-րդ փողոց տուն 51/:
2023 թվականի հունիսի 17-ին թվագրվող «8300647971» համարի արձանագրությունը կազմվել է Աշոտ Արմենի Ղարոյանի նկատմամբ: Վերջինս «Range Rover» մակնիշի «01 KK 100» հաշվառման համարանիշերով տրանսպորտային միջոցը վարել է լուսաթափանցելիության սահմանված չափի խախտմամբ ապակիներով: Արձանագրությունը ստորագրել են այն կազմած պարեկ Ստեփան Գրիգորյանը /կրծքանշանի համարը՝ 10723/ և Աշոտ Արմենի Ղարոյանը /ծնված՝ 09.02.1993թ./:
2022 թվականի օգոստոսի 29-ին թվագրվող «8200280472» համարի արձանագրությունը կազմվել է Ռուբեն Ռաֆայելի Մարտիրոսյանի նկատմամբ: Վերջինս «Range Rover» մակնիշի «01 KX 100» հաշվառման համարանիշերով տրանսպորտային միջոցը վարել է՝ առջևի հողմապակին թաղանթապատված վիճակում: Արձանագրությունը ստորագրել են այն կազմած պարեկ Սոնա Երիցյանը /կրծքանշանի համարը՝ 12774/ և Ռուբեն Ռաֆայելի Մարտիրոսյանը /հասցեն՝ Նոր Արեշ 31-րդ փողոց տուն 48/:
2023 թվականի հունվարի 23-ին թվագրվող «8300411069» համարի արձանագրությունը կազմվել է Ռուբեն Ռաֆայելի Մարտիրոսյանի նկատմամբ: Վերջինս «Range Rover» մակնիշի «01 KK 100» հաշվառման համարանիշերով տրանսպորտային միջոցը վարել է առանց ԱՊՊԱ պայմանագրի: Արձանագրությունը ստորագրել են այն կազմած պարեկ Կարեն Սարգսյանը /կրծքանշանի համարը՝ 04855/ և Ռուբեն Ռաֆայելի Մարտիրոսյանը /հասցեն՝ Նոր Արեշ 31-րդ փողոց տուն 48/:
2023 թվականի հունիսի 30-ին թվագրվող “8300671333>> համարի արձանագրությունը կազմվել է Ռուբեն Ռաֆայելի Մարտիրոսյանի նկատմամբ: Վերջինս «Range Rover» մակնիշի «01 KK 100» հաշվառման համարանիշերով տրանսպորտային միջոցը վարել է՝ այն կայանելով կանգառն արգելվող վայրում: Արձանագրությունը ստորագրել են այն կազմած պարեկ Նարեկ Սարգսյանը /կրծքանշանի համարը՝ 08815/ և Ռուբեն Ռաֆայելի Մարտիրոսյանը /հասցեն՝ Նոր Արեշ 31-րդ փողոց տուն 48/:
2023 թվականի օգոստոսի 26-ին թվագրվող «8300778193» համարի արձանագրությունը կազմվել է Ռուբեն Ռաֆայելի Մարտիրոսյանի նկատմամբ: Վերջինս «Range Rover» մակնիշի «01 KK 100» հաշվառման համարանիշերով տրանսպորտային միջոցը վարել է անվտանգության գոտիով չամրակապված: Արձանագրությունը ստորագրել են այն կազմած ավագ պարեկ Մուրադ Երվանդյանը /կրծքանշանի համարը՝ 00749/ և Ռուբեն Ռաֆայելի Մարտիրոսյանը /հասցեն՝ Նոր Արեշ 31-րդ փողոց տուն 48/:
2023 թվականի օգոստոսի 26-ին թվագրվող «8300778200» համարի արձանագրությունը կազմվել է Ռուբեն Ռաֆայելի Մարտիրոսյանի նկատմամբ: Վերջինս «Range Rover» մակնիշի «01 KK 100» հաշվառման համարանիշերով տրանսպորտային միջոցը վարելիս օգտվել է հեռախոսակապից: Արձանագրությունը ստորագրել են այն կազմած ավագ պարեկ Մուրադ Երվանդյանը /կրծքանշանի համարը՝ 00749/ և Ռուբեն Ռաֆայելի Մարտիրոսյանը /հասցեն՝ Նոր Արեշ 31-րդ փողոց տուն 48/:
2023 թվականի նոյեմբերի 10-ին թվագրվող «8300922664» համարի արձանագրությունը կազմվել է Ռուբեն Ռաֆայելի Մարտիրոսյանի նկատմամբ: Վերջինս «Range Rover» մակնիշի «01 KK 100» հաշվառման համարանիշերով տրանսպորտային միջոցը վարել է՝ ՀՀ օրենսդրությամբ սահմանված կարգով տեխնիկական զննություն չանցած: Արձանագրությունը ստորագրել են այն կազմած կրտսեր պարեկ Սարգիս Հակոբյանը /կրծքանշանի համարը՝ 02024/ և Ռուբեն Ռաֆայելի Մարտիրոսյանը /ծնված՝ 15.10.1984թ., հասցեն՝ Նոր Արեշ 31-րդ փողոց տուն 48/:
Հիշյալ արձանագրությունների զննությամբ փաստվում է, որ մեղադրյալներ Աշոտ Արմենի Ղարոյանը և Ռուբեն Ռաֆայելի Մարտիրոսյանն առնվազն 2022-2023 թվականների ընթացքում շահագործել են «Range Rover» մակնիշի ամենագնաց տրանսպորտային միջոցներ:
(հատոր 2, գ.թ. 86-88, դատական նիստի արձանագրություն)
- Նախաքննության մարմնի 2025 թվականի փետրվարի 28-ի որոշմամբ արտավարութային փաստաթուղթ ճանաչված՝ վարչական իրավախախտումների վերաբերյալ թիվ «8200273271», «8300647971», «8200280472», «8300411069», «8300671333», «8300778193», «8300778200» և «8300922664» արձանագրությունները:
(հատոր 2, գ.թ. 89-90, դատական նիստի արձանագրություն)
- Հանցագործության մասին բանավոր հաղորդում ընդունելու մասին թիվ 021988 արձանագրությունը /գրանցամատյանի համարը՝ 2597/, համաձայն որի՝ 2022 թվականի մայիսի 15-ին՝ ժամը 15:50-ին, Ժիրայր Սամվելի Կարապետյանը հաղորդում է տվել, որ 2022 թվականի մայիսի 15-ին՝ ժամը 01:00-ի սահմաններում, Երևան քաղաքի Նոր Արեշ 29-րդ փողոցի թիվ 2 տան մոտ անհայտ անձը հարված է հասցրել իր դեմքին, որից հետո ընկել է գետնին և գետնի վրա բազմաթիվ հարվածներ է ստացել դեմքին ու մարմնի տարբեր մասերին: Ժիրայր Կարապետյանը նշել է, որ կատարվածի առթիվ բողոքում է և խնդրել է հայտնաբերել արարքը կատարած անձանց:
(հատոր 1, գ.թ. 4, դատական նիստի արձանագրություն)
- Դեպքի վայրի զննության արձանագրությունը, համաձայն որի՝ ընթերականեր Արթուր Ռուբիկի Գալստյանի, Վարդան Սամվելի Մալխասյանի, ինչպես նաև տուժող Ժիրայր Կարապետյանի մասնակցությամբ, բնական լուսավորության պայմաններում, 2022 թվականի մայիսի 15-ին զննության է ենթարկվել դեպքի վայր հանդիսացող Երևան քաղաքի Նոր Արեշի 29-րդ փողոցի թիվ 2 հասցեի դիմացի հատվածը, որը հարակից է 31-րդ փողոցին: Զննությանը մասնակցող Ժիրայր Կարապետյանը հայտնել է, որ 2022 թվականի մայիսի 15-ին՝ ժամը 01:00-ի սահմաններում, քայլել է տան կողմ և Նոր Արեշ 29-րդ և 31-րդ փողոցների հատման մասում է անհայտ անձանց կողմից ծեծի ենթարկվել՝ ստանալով մարմնական վնասվածքներ: Նշված տարածքում՝ հողածածկ հատվածին, տեսանելի են եղել արնանման չորացած հետքեր: Դեպքի վայրի զննությամբ տեսանկարահանող սարքեր չեն հայտնաբերվել:
(հատոր 1, գ.թ. 5-7, դատական նիստի արձանագրություն)
- Դատաբժշկական փորձաքննության թիվ 0674 եզրակացությունը, համաձայն որի՝ Ժիրայր Կարապետյանը ստացել է գանգուղեղային տրավմայի, քթի շրջանի սալջարդ վերքի, ճակատային, այտերի, ձախ նախաբազկի, կրծքավանդակի, աջ գոտկային, ձախ ծնկահոդի, զույգ սրունքների շրջանների քերծվածքների, ճակատի, քթի շրջանների արյունազեղումների և քթոսկրի կոտրվածքի ձևով մարմնական վնասվածքներ, որոնք պատճառվել են բութ առարկաների ներգործությամբ, հնարավոր է գործի հանգամանքներում նշված ժամանակին, հանգամանքներում և միասին վերցված առաջացրել են առողջության թեթև վնաս՝ առողջության կարճատև քայքայումով:
(հատոր 1, գ.թ. 94-96, դատական նիստի արձանագրություն)
- Տուժող Ժիրայր Կարապետյանը դատաքննության ընթացքում ցուցմունք տվեց այն մասին, որ Աշոտ Ղարոյանին ճանաչում է զուտ դեմքով, վերջինիս հետ շփում չի ունեցել: 096-01-45-01 բջջային հեռախոսահամարը /Աշոտ Ղարոյանի կողմից շահագործվող բջջային հեռախոսահամար/ չի մտաբերում, սակայն հստակ հիշում է, որ դեպքին անմիջապես նախորդած ժամանակահատվածում բջջային հեռախոսով խոսել է երկու անձի հետ, որոնցից մեկը եղել է ընկերը, իսկ մյուսը հավանաբար Աշոտ Ղարոյանը, քանի որ երբ վերջինս առաջին անգամ զանգահարել է, ինքն ասել է, որ տանը չի: Երբ կրկին զանգահարել է, նրան ասել է, որ քայլում է տան կողմ, իսկ երբ հասել է տուն, տեսել է, որ նա տնից փոքր-ինչ հեռու կանգնած է՝ «սեդան» թափքով մուգ գույնի ավտոմեքենայով: 096-01-45-01 բջջային հեռախոսահամարով իրեն զանգահարած անձի անունը չի հիշում, սակայն վերջինս ասել է, որ իրենց փողոցից է: Ասել է նաև, որ «խոսալու բան կա ու սպասում ա»: Այնուհետև տեսել է, որ դռան դիմաց սպասողը Աշոտ Ղարոյանն է: Հայտնել է նաև, որ իրենց փողոցը շատ երկար է: Աշոտ Ղարոյանն իրեն առաջարկել է միասին գնալ եղբոր մոտ, սակայն ինքը հրաժարվել է, իսկ Աշոտ Ղարոյանը զանգահարել է ինչ-որ մեկին ու ասել, որ «չի գալիս»: Այնուհետև մուգ գույնի «Range Rover» մակնիշի ավտոմեքենայով եկել են երկու անձ, որոնցից մեկը եղել է Ռուբեն Մարտիրոսյանը, ում ճանաչել է լուսանկարով, ապա առերես հարցաքննության ժամանակ: Ռուբենի հետ որևէ հարաբերություն չի ունեցել: Վերջինս հարցրել է, թե ինչի չի եկել, ինքն էլ ի պատասխան ասել է, թե ինչու պետք է գա: Ռուբեն Մարտիրոսյանը խոսակցության ժամանակ անհարգալից է խոսել ոստիկանության մասին, ինքը սաստել է ու հարված է ստացել դեմքին: Դա եղել է առաջին հարվածը, որն իրեն հասցրել է հետևում՝ իրենից աջ կանգնած Աշոտ Ղարոյանը: Ռուբեն Մարտիրոսյանի հետ եկած մյուս անձը ևս կանգնած է եղել իր հետևում, բայց դեպի ձախ: Աշոտ Ղարոյանի հարվածից հետո իրեն հարվածել է նաև Ռուբեն Մարտիրոսյանը, հետո խառը հարվածել են: Այնուհետև ինքը ձեռքերով պահել է դեմքը ու չի տեսել հարվածներ հասցնողներին: Հարվածել են նաև, երբ ինքն ընկած է եղել: Հարվածներից գիտակցությունը կորցրել է, իսկ երբ ուշքի է եկել, տանն է եղել: Ժիրայր Կարապետյանը պնդել է, որ եղել են չորսով՝ ինքը, Աշոտ Ղարոյանը, Ռուբեն Մարտիրոսյանը և վերջինիս հետ եկած անձը, որին չի ճանաչում:
Ժիրայր Կարապետյանը ցուցմունքով պնդել է նաև, որ իրեն հարվածներ հասցնողները եղել են Աշոտ Ղարոյանն ու Ռուբեն Մարտիրոսյանը և կարծում է, որ նրանք զղջում են իրենց արածի համար, ուստի բողոք-պահանջ չունի:
(դատական նիստի արձանագրություն)
Լրացուցիչ դատալսումների ընթացքում հետազոտված թույլատրելի ապացույցները.
 ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից ստացված տեղեկանքը, համաձայն որի՝ Աշոտ Ղարոյանը նախկինում դատապարտված չի եղել:
 ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից ստացված տեղեկանքը, համաձայն որի՝ Ռուբեն Մարտիրոսյանը նախկինում դատապարտված չի եղել:
4. Դատարանի փաստական վերլուծությունները և հաստատված կամ հերքված փաստական հանգամանքները.
Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը գտնում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարելու, որ Ռուբեն Ռաֆայելի Մարտիրոսյանը Աշոտ Արմենի Ղարոյանի և քննությամբ ինքնությունը չպարզված այլ անձանց հետ դիտավորությամբ Ժիրայր Կարապետյանին պատճառել են առողջության կարճատև քայքայում առաջացրած մարմնական վնասվածքներ:
Այսպես, Ռուբեն Ռաֆայելի Մարտիրոսյանը, Աշոտ Արմենի Ղարոյանը և քննությամբ ինքնությունը չպարզված այլ անձինք 2022 թվականի մայիսի 15-ին՝ ժամը 01:00-ի սահմաններում, Երևան քաղաքի Նոր Արեշ 29-րդ և 31-րդ փողոցների խաչմերուկի մոտակայքում միասնական հանցավոր դիտավորությամբ, մեկը մյուսի գործողությունները փոխլրացնելով ձեռքերով և ոտքերով բազմաթիվ հարվածներ են հասցրել Ժիրայր Կարապետյանի մարմնի տարբեր մասերին և վերջինիս պատճառել են առողջության կարճատև քայքայում առաջացրած՝ գանգուղեղային տրավմայի, քթի շրջանի սալջարդ վերքի, ճակատային, այտերի, ձախ նախաբազկի, կրծքավանդակի, աջ գոտկային, ձախ ծնկահոդի, զույգ սրունքների շրջանների քերծվածքների, ճակատի, քթի շրջանների արյունազեղումների և քթոսկրի կոտրվածքի ձևով մարմնական վնասվածքներ:
Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը գտնում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարելու, որ Աշոտ Արմենի Ղարոյանը Ռուբեն Ռաֆայելի Մարտիրոսյանի և քննությամբ ինքնությունը չպարզված այլ անձանց հետ դիտավորությամբ Ժիրայր Կարապետյանին պատճառել են առողջության կարճատև քայքայում առաջացրած մարմնական վնասվածքներ:
Այսպես, Աշոտ Արմենի Ղարոյանը և Ռուբեն Ռաֆայելի Մարտիրոսյանը 2022 թվականի մայիսի 15-ին՝ ժամը 01:00-ի սահմաններում, Երևան քաղաքի Նոր Արեշ 29-րդ և 31-րդ փողոցների խաչմերուկի մոտակայքում միասնական հանցավոր դիտավորությամբ, մեկը մյուսի գործողությունները փոխլրացնելով ձեռքերով և ոտքերով բազմաթիվ հարվածներ են հասցրել Ժիրայր Կարապետյանի մարմնի տարբեր մասերին և վերջինիս պատճառել են առողջության կարճատև քայքայում առաջացրած՝ գանգուղեղային տրավմայի, քթի շրջանի սալջարդ վերքի, ճակատային, այտերի, ձախ նախաբազկի, կրծքավանդակի, աջ գոտկային, ձախ ծնկահոդի, զույգ սրունքների շրջանների քերծվածքների, ճակատի, քթի շրջանների արյունազեղումների և քթոսկրի կոտրվածքի ձևով մարմնական վնասվածքներ:
Դատարանը գտնում է, որ դատավճռի հիմքում դրված՝ փոխկապակցված վերաբերելի, թույլատրելի, հավաստի ապացույցների ամբողջությունը բացառում է Աշոտ Արմենի Ղարոյանին և Ռուբեն Ռաֆայելի Մարտիրոսյանին ներկայացված մեղադրանքի ապացուցվածության վերաբերյալ ցանկացած հիմնավոր կասկած։
Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքը. Աշոտ Ղարոյանը և Ռուբեն Մարտիրոսյանը նախկինում դատապարտված չեն եղել։
5. Դատարանի իրավական վերլուծությունները, հետևությունները և որոշումները.
Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալների մեղավորության վերաբերյալ չփարատվող բոլոր ողջամիտ կասկածները նրանց օգտին մեկնաբանելով, Դատարանը հանգում է հետևության, որ ապացուցված են Աշոտ Արմենի Ղարոյանին և Ռուբեն Ռաֆայելի Մարտիրոսյանին վերագրվող արարքները, այդ արարքների քրեական հակաիրավականությունը, այդ արարքները մեղադրյալների կողմից կատարելը, ինչպես նաև նրանց մեղավորությունը տվյալ արարքների կատարման մեջ:
Դատարանը հանգում է այն հետևության, որ մեղադրյալներ Աշոտ Արմենի Ղարոյանը և Ռուբեն Ռաֆայելի Մարտիրոսյանը կատարել են իրենց մեղսագրված արարքները, որոնց նկատմամբ կիրառելի է 2003 թվականի ապրիլի 18-ին ընդունված ՀՀ քրեական օրենսգրքի 117-րդ հոդվածը:
2003 թվականի ապրիլի 18-ին ընդունված ՀՀ քրեական օրենսգրքի 117-րդ հոդվածի համաձայն՝
Դիտավորությամբ մեկ ուրիշին մարմնական վնասվածք կամ առողջությանն այլ վնաս պատճառելը, որն առաջացրել է առողջության կարճատև քայքայում կամ ընդհանուր աշխատունակության աննշան կայուն կորուստ՝պատժվում է տուգանքով՝ նվազագույն աշխատավարձի հիսնապատիկից հարյուրհիսնապատիկի չափով, կամ կալանքով՝ առավելագույնը երկու ամիս ժամկետով::
Քննարկվող հանցակազմի օբյեկտիվ կողմն են կազմում՝ մարմնական վնասվածք կամ առողջությանն այլ վնաս պատճառելը, առողջության կարճատև քայքայում կամ ընդհանուր աշխատունակության աննշան կայուն կորուստ առաջացնելը (օրինակ՝ ձեռքի մատի կորուստը (բացառությամբ ցուցամատի և բթամատի), տեսողու թյան և լսողության թուլացումը՝ կապված ընդհանուր աշխատունակության աննշան կայուն կորստի հետ և այլն), ինչպես նաև նշված արարքի և հետևանքի միջև պատճառական կապը:
Քննարկվող հանցագործության սուբյեկտիվ կողմը բնութագրվում է դիտավորությամբ, որը տվյալ դեպքում կարող է լինել ինչպես ուղղակի, այնպես էլ անուղղակի:
Քննարկվող հանցագործության սուբյեկտ կարող է լինել 16 տարին լրացած յուրաքանչյուր մեղսունակ ֆիզիկական անձ:
Դատարանը, գտնում է, որ մեղադրյալ Աշոտ Ղարոյանի և մեղադրյալ Ռուբեն Մարտիրոսյանի նկատմամբ պատիժ չպետք է նշանակվի և նրանք ենթակա են քրեական պատասխանատվությունից ազատման՝ վաղեմության ժամկետն անցնելու հետևանքով:
18.04.2003թ. ընդունված ՀՀ քրեական օրենսգրքի 75-րդ հոդվածի համաձայն՝
«1. Անձն ազատվում է քրեական պատասխանատվությունից, եթե հանցանքն ավարտված համարելու օրվանից անցել են հետևյալ ժամկետները.
1) երկու տարի՝ ոչ մեծ ծանրության հանցանքն ավարտված համարելու օրվանից.(...)»
18.04.2003թ. ընդունված ՀՀ քրեական օրենսգրքի 19-րդ հոդվածի 2-րդ մասի համաձայն՝
«2. Ոչ մեծ ծանրության հանցագործություններ են համարվում դիտավորությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երկու տարի ժամկետով ազատազրկումը, կամ որոնց համար նախատեսված է ազատազրկման հետ կապ չունեցող պատիժ, ինչպես նաև անզգուշությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երեք տարի ժամկետով ազատազրկումը:»:
Դատարանն արձանագրում է, որ գործող ՀՀ քրեական օրենսգրքի 83-րդ հոդվածով հանցանք կատարած անձի վիճակը վատթարանում է, քանի որ ի տարբերություն 18.04.2003թ. ընդունված ՀՀ քրեական օրենսգրքի 75-րդ հոդվածի՝ գործող ՀՀ քրեական օրենսգրքով ոչ մեծ ծանրության հանցանքի դեպքում քրեական պատասխանատվությունից ազատելու վաղեմության ժամկետը սահմանվել է հինգ տարի, իսկ վաղեմության ժամկետի հաշվարկը սկսվում է հանցանքն ավարտելուն հաջորդող օրվանից մինչև անձի նկատմամբ քրեական հետապնդում հարուցելու մասին որոշում կայացնելը, մինչդեռ 18.04.2003թ. ընդունված ՀՀ քրեական օրենսգրքով քրեական պատասխանատվությունից ազատելու վաղեմության ժամկետը սահմանված է երկու տարի, իսկ վաղեմության ժամկետը հաշվարկվում է հանցանքն ավարտված համարելու օրվանից մինչև դատավճռի օրինական ուժի մեջ մտնելու պահը: Հետևաբար, գործող ՀՀ քրեական օրենսգիրքն այս առումով ավելի խիստ է, և չի կարող հիմք հանդիսանալ վաղեմության ժամկետը հաշվարկելիս, ուստի ժամկետի հաշվարկման կանոնների վրա սույն վարույթով պետք է շարունակվի գործել 18.04.2003թ. ընդունված ՀՀ քրեական օրենսգրքի նորմերը, այսինքն՝ մեղադրյալների նկատմամբ կիրառելի վաղեմության ժամկետը պետք է ընդունել երկու տարին։
Վերը նշված իրավանորմերի վերլուծությունից բխում է, որ մեղադրյալներ Աշոտ Ղարոյանը և Ռուբեն Մարտիրոսյանը կատարել են 18.04.2003թ. ընդունված ՀՀ քրեական օրենսգրքի 117-րդ հոդված նախատեսված արարքներ, որոնք, համաձայն արարքը կատարելու պահին գործող ՀՀ քրեական օրենսգրքի, համարվում են ոչ մեծ ծանրության հանցագործություններ: Ըստ ներկայացված մեղադրանքի փաստական հանգամանքների՝ հիշյալ արարքները կատարվել են 2022 թվականի մայիսի 15-ին, հետևաբար՝ հանցանքներն ավարտված համարելու օրվանից անցել է առավել, քան 2 տարի, հետևաբար՝ մեղադրյալներ Աշոտ Ղարոյանը և Ռուբեն Մարտիրոսյանը ենթակա են ազատման քրեական պատասխանատվությունից՝ վաղեմության ժամկետն անցնելու հետևանքով:
Դատարանը, անդրադառնալով ՀՀ քրեական դատավարության 348-րդ հոդվածով նախատեսված՝ դատավճիռ կայացնելիս դատարանի լուծմանը ենթակա հարցերին, արձանագրում է, որ գործով իրեղեն ապացույցներ չկան, գույքային հայց ներկայացված չէ, գույքի արգելադրում կիրառված չէ, խափանման միջոցներ կիրառված չեն, վարութային ծախսեր առկա չեն:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 347-350-րդ, 352-353-րդ, 364-րդ հոդվածներով` Դատարանը:

ՎՃՌԵՑ

Մեղադրյալ Աշոտ Արմենի Ղարոյանին մեղավոր ճանաչել 2003 թվականի ապրիլի 18-ին ընդունված ՀՀ քրեական օրենսգրքի 117-րդ հոդվածով նախատեսված հանցանքի կատարման մեջ և առանց պատիժ նշանակելու նրան ազատել քրեական պատասխանատվությունից՝ ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետի, այն է` վաղեմության ժամկետներն անցնելու հիմքով։
Մեղադրյալ Ռուբեն Ռաֆայելի Մարտիրոսյանին մեղավոր ճանաչել 2003 թվականի ապրիլի 18-ին ընդունված ՀՀ քրեական օրենսգրքի 117-րդ հոդվածով նախատեսված հանցանքի կատարման մեջ և առանց պատիժ նշանակելու նրան ազատել քրեական պատասխանատվությունից՝ ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետի, այն է` վաղեմության ժամկետներն անցնելու հիմքով:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում:




ԴԱՏԱՎՈՐ ՏԱԹԵՎԻԿ ՄՈՒՐԱԴՅԱՆ