ԵԴ1/1379/01/25




ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«01» հուլիսի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` Դատարան)

նախագահությամբ՝ դատավոր Տաթևիկ Մուրադյանի,
քարտուղարությամբ՝ Ագնետա Հակոբյանի,

մասնակցությամբ՝
հանրային մեղադրող՝ Արսեն Կոստանյանի,
մեղադրյալ՝ Արմեն Մելքումյանի,

դռնբաց դատական նիստում քննելով քրեական գործն ըստ մեղադրանքի՝
Արմեն Սերգեյի Մելքումյանի՝
(ծնված՝ 13.01.1985թ. Աշտարակ քաղաքում, ազգությամբ հայ, ՀՀ քաղաքացի, ութամյա կրթությամբ, ամուսնացած, ըստ իր հայտարարության՝ խնամքին ունի երեք երեխա, չի աշխատում, նախկինում չդատված, հաշվառված՝ Կոտայքի մարզ, ք. Աբովյան, Բալահովիտ, Գ. Արշակյան թաղամաս, 1-ին փողոց, 2-րդ փակուղի, 3-րդ շենք, բնակարան 29 հասցում, բնակվող՝ ք. Աշտարակ, Րաֆֆու փողոց, տուն 69 հասցեում, որպես խափանման միջոց է կիրառվել բացակայելու արգելքը) ՀՀ քրեական օրենսգրքի 344-րդ հոդվածի 2-րդ մասով,

ՊԱՐԶԵՑ

1. Քրեական գործի դատավարական նախապատմությունը.
2025 թվականի փետրվարի 07-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության հատկանիշներով նախաձեռնվել է թիվ 60158125 քրեական վարույթը:
2025 թվականի մարտի 13-ին ՀՀ դատախազության Երևան քաղաքի Ավան և Նոր Նորք վարչական շրջանների դատախազության դատախազ Արմեն Գրիգորյանի որոշմամբ՝ թիվ 60158125 քրեական վարույթով Արմեն Սերգեյի Մելքումյանի նկատմամբ ՀՀ քրեական օրենսգրքի 344-րդ հոդվածի 2-րդ մասով հարուցվել է հանրային քրեական հետապնդում:
2025 թվականի ապրիլի 17-ին Երևան քաղաքի առաջին ատյանի ընդհանուր իրավասության քրեական դատարան է ստացվել քրեական գործն ըստ մեղադրանքի՝ Արմեն Սերգեյի Մելքումյանի՝ ՀՀ քրեական օրենսգրքի 344-րդ հոդվածի 2-րդ մասով, որին շնորհվել է ԵԴ1/1379/01/25 համարը:
Նույն օրը քրեական գործն էլեկտրոնային եղանակով մակագրվել և 2025 թվականի ապրիլի 21-ին հանձնվել է Երևան քաղաքի առաջին ատյանի ընդհանուր իրավասության քրեական դատարանի դատավոր Տաթևիկ Մուրադյանին։
2025 թվականի ապրիլի 23-ին Դատարանի կողմից որոշում է կայացվել թիվ ԵԴ1/1379/01/25 քրեական գործի վարույթն ստանձնելու և նախնական դատալսումներ նշանակելու մասին։
2025 թվականի հունիսի 27-ին, Դատարանը թիվ ԵԴ1/1379/01/25 քրեական գործով կայացրել է մեղադրական վերդիկտ՝ Արմեն Սերգեյի Մելքումյանին մեղավոր ճանաչելով ՀՀ քրեական օրենսգրքի 344-րդ հոդվածի 2-րդ մասով նախատեսված արարքի կատարման մեջ:
2. Մեղադրանքի փաստական նկարագրությունը.
Արմեն Սերգեյի Մելքումյանին մեղադրանք է ներկայացվել ՀՀ քրեական օրենսգրքի 344-րդ հոդվածի 2-րդ մասով այն բանի համար, որ «նա, չունենալով տրանսպորտային միջոցներ վարելու իրավունք, 2025 թվականի հունվարի 28-ին՝ ժամը 02:25-ին, Երևան քաղաքի Գյուրջյան փողոցում հարբած (ոչ սթափ) վիճակում վարել է «BMW» մակնիշի 37 GZ 130 հաշվառման համարանիշի տրանսպորտային միջոցը։
Այսպես.
Արմեն Սերգեյի Մելքումյանը, 2025 թվականի հունվարի 28-ին` ժամը 02:25-ին, Երևան քաղաքի Գյուրջյան փողոցում վարել է «BMW» մակնիշի 37 GZ 130 հաշվառման համարանիշի տրանսպորտային միջոցը, որը ստուգման նպատակով կանգնեցվել է ՀՀ ՆԳՆ ոստիկանության պարեկային ծառայության աշխատակցի կողմից։ Ստուգման արդյունքում պարզվել է, որ Արմեն Սերգեյի Մելքումյանը, չունենալով տրանսպորտային միջոցներ վարելու իրավունք, տրանսպորտային միջոցը վարել է հարբած (ոչ սթափ) վիճակում, այսինքն՝ սթափության վիճակի զննությամբ պարզվել է, որ նրա մեկ լիտր արտաշնչած օդի մեջ մաքուր ալկոհոլի պարունակությունը կազմել է 0.432 մգ/լ, որն ըստ Վարչական իրավախախտումների վերաբերյալ ՀՀ օրենսգրքի 126-րդ հոդվածի 9-րդ մասի՝ համարվում է ոչ սթափ վիճակում գտնվող, որի վերաբերյալ ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 1-ին վաշտի ավագ պարեկ Մարինե Հովակիմյանի կողմից նույն օրը կազմվել է վարչական իրավախախտման վերաբերյալ թիվ 82590121090 արձանագրությունը։»։
3. Դատաքննության ընթացքում հետազոտված թույլատրելի ապացույցները.
Հիմնական դատալսումների ընթացքում հետազոտված թույլատրելի ապացույցները.
- Դատաքննության ընթացքում մեղադրյալ Արմեն Սերգեյի Մելքումյանը, օգտվելով իր սահմանադրական իրավունքից, հրաժարվեց ցուցմունք տալ։ Վերջինս հանդես եկավ հայտարարությամբ այն մասին, որ ինքը տրանսպորտային միջոցը վարել է ՌԴ կողմից տրված վարորդական իրավունքի վկայականով: Հավելեց, որ վկայականի վավերականության ժամկետը լրացել է 2024 թվականին, սակայն երեք տարին մեկ անգամ ինքնաբերաբար դրա ժամկետը երկարաձգվում է:
(դատական նիստի արձանագրություն)
- 2025 թվականի հունվարի 28-ին՝ ժամը 03։05-ին, ՀՀ պարեկային ծառայության Երևանի գնդի 1-ին գումարտակի 1-ին վաշտի ավագ պարեկ Մարինե Ռոբերտի Հովակիմյանի կողմից կազմված վարչական իրավախախտումների վերաբերյալ թիվ 8259012190 արձանագրությունը, համաձայն որի՝ Արմեն Սերգեյի Մելքումյանը (ծնված 13.01.1985թ., բնակվող՝ Կոտայքի մարզ, Բալահովիտ, Գ. Արշակյան թաղամաս, 1-ին փողոց, 2-րդ փակուղի, 2-րդ տուն, ՀԾՀ՝ 2301850706) 2025 թվականի հունվարի 28-ին՝ ժամը 02։25-ի սահմաններում, Երևան քաղաքի Գյուրջյան փողոցում վարել է BMW մակնիշ 37 GZ 130 հաշվառման համարանիշի տրանսպորտային միջոցը՝ չունենալով տրանսպորտային միջոցներ վարելու իրավունք և ոչ սթափ վիճակում:
Արձանագրությանը կցվում է հատվածում առկա է ՝ ս/հ 91101122, զ/հ 02633։
Արձանագրության՝ վարչական իրավախախտում կատարած անձի բացատրությունը և դիտողությունը նշելու հատվածում առկա է ստորագրություն:
Արձանագրությանը, իրավունքներին և պարտականություններին ծանոթանալու հատվածում առկա է ստորագրություն:
Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր /կոդ/ նշված՝ 203.5 թիվը։
(գ. թ. 4, դատական նիստի արձանագրություն)
- Վարորդի սթափության վիճակի զննության կտրոնի պատճենը, համաձայն որի՝ ստուգաչափման սարքի համարն է՝ 91101122, զննման համարը՝ 02693, զննման ամսաթիվը՝ 28.01.2025թ., զննման ժամը՝ 02։34։11-ին, ստուգաչափման վերջին ամսաթիվը՝ 24.12.2024թ., դատարկ թեստ՝ 0.000 մգ/լ, ստուգաչափման ձևաչափը՝ ավտոմատ, ալկոհոլի պարունակությունը՝ 0.432 մգ/լ՝ ստորագրություն, վարորդի անունն է՝ Արմեն, ազգանունը՝ Մելքումյան, տրանսպորտային միջոցի համարանիշը՝ 37 GZ 130, ՀԾՀ՝ 2301850706, Պ/Ծ տեսուչ՝ Հովակիմյան, կրծքանշանի համարը՝ 02852, ստորաբաժանումը՝ 1-ին գումարտակ, 1-ին վաշտ: Ներքևի հատվածում առկա է ստորագրություն։
(գ. թ. 5, դատական նիստի արձանագրություն)
- ՀՀ էկոնոմիկայի նախարարության «Ստանդարտացման և չափագիտության ազգային մարմին» ՓԲԸ-ի կողմից տրված թիվ 143233 ստուգաչափման վկայականի պատճենը, համաձայն որի՝ վկայականն ուժի մեջ է 2024 թվականի դեկտեմբերի 24-ից մինչև 2025 թվականի դեկտեմբերի 24-ը, ստուգաչափման սարքի գործարանային համարն է 91101122, տեսակը՝ Jupiter X/RP, չափման տիրույթը՝ 0.000÷2,000մգ/լ, ճշտության դասը, կարգը /սխալանքը/ 0-0,1±5-%, 0,1-0,15±8%>0,15±10%, արտադրողը՝ Չինաստան, պատկանում է ՀՀ ՆԳՆ ոստիկանությանը, ստուգաչափումը կատարվել է հետևյալ ստուգաչափման մեթոդիկայի անվանման նշագրի՝ MU2835-2008, ստուգաչափող անվան դիմաց առկա է ստորագրություն և նշված է Վ. Բաբաջանյան, իսկ բաժնի /լաբորատորիայի վարիչ/ անվան դիմաց առկա է ստորագրություն և նշված է Գ. Մարտիրոսյան:
(գ. թ. 6, դատական նիստի արձանագրություն)
- ՀՀ ՆԳՆ ոստիկանության Ճանապարհային ոստիկանություն ծառայության էլեկտրոնային ռեգիստրից ստացված տեղեկատվությունը, համաձայն որի՝ Արմեն Սերգեյի Մելքումյան (ՀԾՀ՝ 2301850706) տվյալներով վարորդական իրավունքի վկայական առկա չէ։
(գ. թ. 8, դատական նիստի արձանագրություն)
- 2025 թվականի մարտի 07-ին կազմված զննում կատարելու մասին արձանագրությունը, համաձայն որի՝ զննության են ենթարկվել վերը նշված փաստաթղթերը:
(գ.թ. 13-14, դատական նիստի արձանագրություն)
- Նախաքննության մարմնի 2025 թվականի մարտի 07-ի որոշմամբ որպես արտավարութային փաստաթուղթ ճանաչված՝ զննության ենթարկված՝ Արմեն Սերգեյի Մելքումյանի վերաբերյալ վարչական իրավախախտումների մասին թիվ 8259012190 արձանագրության պատճենը, վարորդի սթափության վիճակի զննության թիվ 02693 կտրոնի պատճենը, ստուգաչափման թիվ 143233 վկայականի պատճենը, ՀՀ ՆԳՆ ոստիկանության Ճանապարհային ոստիկանություն էլեկտրոնային ծառայության ռեգիստրից ստացված քաղվածքը:
(գ.թ. 15-16, դատական նիստի արձանագրություն)
Լրացուցիչ դատալսումների ընթացքում հետազոտված թույլատրելի ապացույցները.
 ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից ստացված տեղեկանքը, համաձայն որի՝ Արմեն Սերգեյի Մելքումյանը 2021 թվականի հունիսի 11-ին ՌԴ Կանավինսկու շրջանի դատարանի կողմից դատապարտվել է ազատազրկման 6 տարի 6 ամիս ժամկետով, սակայն հիշյալ դատավճիռն օրինական ուժի մեջ մտած լինելու վերաբերյալ տեղեկատվություն առկա չէ։
 Միասնական էլեկտրոնային տեղեկատվական համակարգում կատարված հարցման պատասխանի համաձայն՝ ՊԵԿ տվյալների շտեմարանում Արմեն Մելքումյանի կողմից հանցանքը կատարելուն նախորդող տասներկու ամիսների ընթացքում ստացած եկամուտների վերաբերյալ տվյալները բացակայում են:
4. Դատարանի փաստական վերլուծությունները և հաստատված կամ հերքված փաստական հանգամանքները.
Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը գտնում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարելու, որ Արմեն Մելքումյանը, չունենալով տրանսպորտային միջոցներ վարելու իրավունք, 2025 թվականի հունվարի 28-ին՝ ժամը 02:25-ին, Երևան քաղաքի Գյուրջյան փողոցում հարբած (ոչ սթափ) վիճակում վարել է «BMW» մակնիշի 37 GZ 130 հաշվառման համարանիշի տրանսպորտային միջոցը։
Դատարանը գտնում է, որ վարորդական վկայական ունենալու պայմաններում տրանսպորտային միջոց վարելու վերաբերյալ մեղադրյալի պատճառաբանություններն արժանահավատ չեն և հերքվում է հիմնական դատալսումների ընթացքում պատշաճ հետազոտված ապացույցների առկայությամբ։
Անդրադառնալով մեղադրյալի հայտարարությանը՝ ՌԴ տրանսպորտային միջոցներ վարելու իրավունքի վկայական ունենալու վերաբերյալ՝ Դատարանը նախևառաջ արձանագրում է, որ Արմեն Սերգեյի Մելքումյանը հանդիսանում է ՀՀ քաղաքացի, ով, փաստորեն, տրանսպորտային միջոցը վարել է այլ պետության կողմից տրված և Հայաստանի Հանրապետությունում չփոխարինված վարորդական վկայականով, ինչը նշանակում է, որ վերջինս համարվել է տրանսպորտային միջոց վարելու իրավունք չունեցող անձ:
Այսպիսով՝ Դատարանը հաստատված է համարում, որ Արմեն Սերգեյի Մելքումյանը, 2025 թվականի հունվարի 28-ին` ժամը 02:25-ին, Երևան քաղաքի Գյուրջյան փողոցում վարել է «BMW» մակնիշի 37 GZ 130 հաշվառման համարանիշի տրանսպորտային միջոցը, որը ստուգման նպատակով կանգնեցվել է ՀՀ ՆԳՆ ոստիկանության պարեկային ծառայության աշխատակցի կողմից։ Ստուգման արդյունքում պարզվել է, որ Արմեն Սերգեյի Մելքումյանը, չունենալով տրանսպորտային միջոցներ վարելու իրավունք, տրանսպորտային միջոցը վարել է հարբած (ոչ սթափ) վիճակում, այսինքն՝ սթափության վիճակի զննությամբ պարզվել է, որ նրա մեկ լիտր արտաշնչած օդի մեջ մաքուր ալկոհոլի պարունակությունը կազմել է 0.432 մգ/լ, որն ըստ Վարչական իրավախախտումների վերաբերյալ ՀՀ օրենսգրքի 126-րդ հոդվածի 9-րդ մասի՝ համարվում է ոչ սթափ վիճակում գտնվող, որի վերաբերյալ ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 1-ին վաշտի ավագ պարեկ Մարինե Հովակիմյանի կողմից նույն օրը կազմվել է վարչական իրավախախտման վերաբերյալ թիվ 82590121090 արձանագրությունը։
Դատարանը գտնում է, որ դատավճռի հիմքում դրված՝ փոխկապակցված վերաբերելի, թույլատրելի, հավաստի ապացույցների ամբողջությունը բացառում է Արմեն Սերգեյի Մելքումյանին ներկայացված մեղադրանքի ապացուցվածության վերաբերյալ ցանկացած հիմնավոր կասկած։
Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները. Արմեն Սերգեյի Մելքումյանը չունի դատվածություն, մեղսագրվող հանցանքը ավարտվելու օրվան նախորդող 12 ամիսների ընթացքում վերջինիս ստացած ընդհանուր եկամուտների վերաբերյալ տվյալները բացակայում են:
5. Դատարանի իրավական վերլուծությունները, հետևությունները և որոշումները.
Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, Դատարանը հանգում է հետևության, որ ապացուցված է Արմեն Սերգեյի Մելքումյանին վերագրվող արարքը, այդ արարքի քրեական հակաիրավականությունը, այդ արարքը մեղադրյալի կողմից կատարելը, ինչպես նաև նրա մեղավորությունը տվյալ արարքի կատարման մեջ:
Դատարանը հանգում է այն հետևության, որ մեղադրյալ Արմեն Սերգեյի Մելքումյանը կատարել է իրեն մեղսագրված արարքը, որի նկատմամբ կիրառելի է ՀՀ քրեական օրենսգրքի 344-րդ հոդվածի 2-րդ մասը:
Դատարանը, հաստատված համարելով հանցագործության և դրա կատարման մեջ Արմեն Սերգեյի Մելքումյանի մեղքի ապացուցված լինելը, գտնում է, որ նա ենթակա է պատժի կատարած հանցանքի համար:
Դատարանը գտնում է, որ Արմեն Սերգեյի Մելքումյանի պատասխանատվությունն ու պատիժը մեղմացնող և պատասխանատվությունն ու պատիժը ծանրացնող հանգամանքներ առկա չեն:
Դատարանը, հաշվի առնելով Արմեն Սերգեյի Մելքումյանի կատարած հանցանքի հանգամանքները, նրա անձը բնութագրող տվյալը, պատասխանատվությունը և պատիժը մեղմացնող և ծանրացնող հանգամանքների բացակայությունը, ՀՀ քրեական օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ ՀՀ քրեական օրենսգրքի 344-րդ հոդվածի 2-րդ մասի սանկցիայով որպես հիմնական պատիժ է նախատեսված նաև տուգանքի ձևով և ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար նշված հանցագործությունների կատարման համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ ՀՀ քրեական օրենսգրքի 344-րդ հոդվածի 2-րդ մասով հիմնական պատիժ պետք է նշանակել տուգանքի ձևով, ընդ որում տուգանքի չափ սահմանելով՝ նվազագույն աշխատավարձի վեցապատիկի՝ 450.000 (չորս հարյուր հիսուն հազար) ՀՀ դրամ գումարի չափով։
Դատարանը միաժամանակ գտնում է, որ կատարած հանցանքի համար Արմեն Սերգեյի Մելքումյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
Միաժամանակ հաշվի առնելով վերջինիս գույքային դրության վերաբերյալ գործում առկա տվյալները և մեղադրյալի հայտարարությունը՝ Դատարանը գտնում է, որ Արմեն Սերգեյի Մելքումյանի նկատմամբ նշանակվող տուգանքի վճարումը պետք է տարաժամկետել և նրան թույլատրել որպես պատիժ նշանակված 450.000 (չորս հարյուր հիսուն հազար) ՀՀ դրամի չափով տուգանքը վճարել մաս առ մաս 1 (մեկ) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Դատարանը, անդրադառնալով ՀՀ քրեական դատավարության 348-րդ հոդվածով նախատեսված՝ դատավճիռ կայացնելիս դատարանի լուծմանը ենթակա մյուս հարցերին, արձանագրում է, որ գործով իրեղեն ապացույցներ չկան, գույքային հայց ներկայացված չէ, առկա չէ նաև հատուցման ենթակա գույքային այլ վնաս և դրա ապահովման նպատակով արգելադրված որևէ գույք, քրեական վարույթով առկա չեն նաև վարութային ծախսեր:
Անդրադառնալով մեղադրյալի նկատմամբ ընտրված խափանման միջոցի հարցին՝ Դատարանն արձանագրում է, որ վերջինիս նկատմամբ որպես խափանման միջոց ընտրված բացակայելու արգելքը պետք է թողնել անփոփոխ՝ մինչև դատավճռի օրինական ուժի մեջ մտնելը, իսկ դրանից հետո պետք է վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 167-րդ, 347-350-րդ և 352-353-րդ հոդվածներով` Դատարանը

ՎՃՌԵՑ

Արմեն Սերգեյի Մելքումյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության կատարման մեջ և նրա նկատմամբ պատիժ նշանակել տուգանք՝ նվազագույն աշխատավարձի վեցապատիկի՝ 450.000 (չորս հարյուր հիսուն հազար) ՀՀ դրամի չափով:
Արմեն Սերգեյի Մելքումյանին թույլատրել որպես պատիժ նշանակված 450.000 (չորս հարյուր հիսուն հազար) ՀՀ դրամի չափով տուգանքը վճարել մաս առ մաս 1 (մեկ) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Արմեն Սերգեյի Մելքումյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել։
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում:




ԴԱՏԱՎՈՐ ՏԱԹԵՎԻԿ ՄՈՒՐԱԴՅԱՆ