ԵԴ1/1392/01/25


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«5» Մայիսի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
քարտուղարությամբ՝ ՌՈԲԵՐՏ ՍԻՐԱԿԱՆՅԱՆԻ
մասնակցությամբ.
հանրային մեղադրող՝ ՎԱԶԳԵՆ ԵԴԻԳԱՐՅԱՆԻ
մեղադրյալ՝ ՄՀԵՐ ԽԱՉԱՏՐՅԱՆԻ
պաշտպան՝ ՍԱՀԱԿ ՊՈՂՈՍՅԱՆԻ
դռնբաց դատական նիստում արագացված վարույթի կարգով քննելով Մհեր Գարեգինի Խաչատրյանի(1) վերաբերյալ քրեական գործն ըստ մեղադրանքի՝ ՀՀ քրեական օրենսգրքի 344 հոդվածի 2-րդ մասով.






1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ.
Թիվ 60725824 քրեական վարույթով Մհեր Գարեգինի Խաչատրյանին ՀՀ քրեական օրենսգրքի 344 հոդվածի 2-րդ մասով մեղադրանք է ներկայացվել հետևյալ արարքի համար.
«[Նա] չունենալով տրանսպորտային միջոց վարելու իրավունք և գտնվելով հարբած (ոչ սթափ) վիճակում՝ ալկոհոլի պարունակությունը արտաշնչած օդում 0,561 մգ/լ, 2024 թվականի հոկտեմբերի 8-ին՝ ժամը 01:00-ի սահմաններում, Երևան քաղաքի Էրեբունի փողոցում վարել է «ԲՄՎ» մակնիշի 797 LL 77 հաշվառման համարանիշի ավտոմեքենան, ինչի վերաբերյալ ՀՀ ՆԳՆ ոստիկանության պարեկային ծառայության աշխատակցի կողմից կազմվել է վարչական իրավախախտման մասին թիվ 8180428508 արձանագրությունը»։
2. ԱՐԱԳԱՑՎԱԾ ՎԱՐՈՒՅԹԸ.
2.1 Նախնական դատալսումների ընթացքում մեղադրյալ Մհեր Գարեգինի Խաչատրյանը ներկայացրեց արագացված վարույթ կիրառելու միջնորդություն՝ հայտնելով, որ ներկայացված մեղադրանքն իրեն պարզ է, համաձայն է մեղադրանքի հետ, պնդում է արագացված վարույթ կիրառելու մասին միջնորդությունը, այն ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպանի հետ և գիտակցում է արագացված վարույթ կիրառելու հետևանքները:
2.2 Հանրային մեղադրողը չառարկեց արագացված վարույթ կիրառելու դեմ:
2.3 Դատարանը, համոզվելով, որ առկա է ՀՀ քրեական դատավարության օրենսգրքի 464.1 հոդվածի 1-ին մասով նախատեսված հիմքը և բացակայում են նույն հոդվածի 2-րդ մասով նախատեսված՝ արագացված վարույթի կիրառումը բացառող հանգամանքները, բավարարեց արագացված վարույթ կիրառելու մասին միջնորդությունը և որոշում կայացրեց քրեական գործով լրացուցիչ դատալսումներ անցկացնելու մասին։
3. ԼՐԱՑՈՒՑԻՉ ԴԱՏԱԼՍՈՒՄՆԵՐԻ ԸՆԹԱՑՔՈՒՄ ՀԵՏԱԶՈՏՎԱԾ ԹՈՒՅԼԱՏՐԵԼԻ ԱՊԱՑՈՒՅՑՆԵՐԸ ԵՎ ՔՆՆԱՐԿՄԱՆ ԵՆԹԱԿԱ ՀԱՐՑԵՐԻ ՎԵՐԱԲԵՐՅԱԼ ԿՈՂՄԵՐԻ ԲԱՑԱՏՐՈՒԹՅՈՒՆՆԵՐԸ.
3.1 Դատվածությունների և հետախուզման առկայության Ձև 8 հարցման պատասխնի, ինչպես նաև «DataLex» դատական տեղեկատվական համակարգում թիվ ԵԴ1/3733/01/24 քրեական գործի վերաբերյալ առկա տվյալների համաձայն՝
-Մհեր Գարեգինի Խաչատրյանը մեղավոր է ճանաչվել ՀՀ քրեական օրենսգրքի 344 հոդվածի 2-րդ մասով նախատեսված թվով 3 հանցանքներ կատարելու մեջ և նրա նկատմամբ վերջնական պատիժ է նշանակվել տուգանք՝ 1.000.000 ՀՀ դրամի չափով, որի վճարման համար սահմանվել է 1 տարի ժամկետ։
-ԵԴ1/3733/01/24 քրեական գործով դատավճիռը մտել է օրինական ուժի մեջ և 2025 թվականի ապրիլի 7-ին ուղարկվել է կատարման։
3.2 Ամուսնության պետական գրանցման թիվ 561 ակտի համաձայն՝ Մհեր Գարեգինի Խաչատրյանը և Աննա Վլադիմիրի Կարապետյանն ամուսնացած են:
3.3 Ծննդի պետական գրանցման թիվ 958 ակտի համաձայն՝ 2007 թվականի դեկտեմբերի 8-ին ծնված Գագիկ Մհերի Խաչատրյանի հայրն է Մհեր Գարեգինի Խաչատրյանը։
3.4 ՀՀ պետական եկամուտների կոմիտեի հարկ վճարողների սպասարկման վարչության պետի գրության համաձայն՝ Մհեր Գարեգինի Խաչատրյանը հանցանքն ավարտվելու օրվան նախորդող 12 ամիսների ընթացքում չի հանդիսացել վարձու աշխատող։ Հարկային մարմնի տեղեկատվական բազայում առկա չեն նաև Մհեր Գարեգինի Խաչատրյանի կողմից իր ակտիվների ներդրմամբ (տրամադրմամբ) այլ անձանց գործունեությունից ստացված եկամուտի (շահաբաժնի, տոկոսի, ռոյալթիի, վարձակալական վճարի) վերաբերյալ տվյալներ:(2)
3.5 Հանրային մեղադրողը Դատարանին խնդրեց Մհեր Գարեգինի Խաչատրյանին դատապարտել տուգանքի:
3.6 Մեղադրյալը նշեց, որ ցանկանում է կատարել հանրային աշխատանքներ:
4. ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐԸ ԵՎ ՈՐՈՇՈՒՄՆԵՐԸ.
4.1 Արագացված վարույթ կիրառելու պայմաններում Մհեր Գարեգինի Խաչատրյանին վերագրվող փաստական հանգամանքները (արարքը), այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, սահմանելով, որ մեղադրյալի արարքի նկատմամբ ենթակա են կիրառման ՀՀ քրեական օրենսգրքի 344 հոդվածի 2-րդ մասը։
4.2 Հաստատված փաստական հանգամանքների հիման վրա Դատարանն արձանագրում է, որ Մհեր Գարեգինի Խաչատրյանի պատասխանատվությունն ու պատիժը մեղմացնող ՀՀ քրեական օրենսգրքի 70 հոդվածով նախատեսված հանգամանք է պատիժ նշանակելու պահին մեղադրյալի խնամքի տակ անչափահաս երեխայի առկայությունը։
Դատարանը գտնում է, որ Մհեր Գարեգինի Խաչատրյանի պատասխանատվությունն ու պատիժը մեղմացնող հանգամանք պետք է դիտել նաև ներկայացված մեղադրանքում իրեն լիովին մեղավոր ճանաչելը և կատարածի համար զղջալը, քանի որ մեղքն ընդունելը, կատարածի համար զղջալը, որպես մեղավոր անձի հետհանցավոր դրական վարքագիծ, վկայում են այն մասին, որ նա լրիվ գիտակցել է իր արարքի հանրային վտանգավորությունը, զղջացել է դրա համար:
Դատարանն արձանագրում է, որ Մհեր Գարեգինի Խաչատրյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71 հոդվածով նախատեսված հանգամանքներ առկա չեն:
4.3 Կատարած հանցանքի համար մեղադրյալ Մհեր Գարեգինի Խաչատրյանը ենթակա է պատժի։
4.4 Պատժի տեսակն ու չափը որոշելիս Դատարանը, հաշվի է առնում հետևյալը՝
-Մհեր Գարեգինի Խաչատրյանի կատարած հանցանքի հանգամանքները, հանրային վտանգավորության աստիճանն ու բնույթը, մասնավորապես՝ այն, որ նրա կատարած հանցանքը դասվում է ոչ մեծ ծանրության հանցագործությունների շարքին։
-Մհեր Գարեգինի Խաչատրյանի անձը բնութագրող տվյալները, հանրային աշխատանքներ կատարելու համաձայնությունը, պատասխանատվությունը և պատիժը մեղմացնող հանգամանքների առկայությունն ու ծանրացնող հանգամանքների բացակայությունը, ՀՀ քրեական օրենսգրքի 69 հոդվածի 2-րդ մասում թվարկված մյուս հանգամանքները։
• Այսպիսով, Դատարանը գտնում է, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներն ապահովելու համար Մհեր Գարեգինի Խաչատրյանի կողմից կատարված հանցագործության բնույթին, վտանգավորության աստիճանին, այն կատարելու հանգամանքներին, ինչպես նաև հանցավորի անձին համաչափ պատիժ է 80 (ութսուն) ժամ տևողությամբ հանրային աշխատանքները:
4.5 Դատարանը գտնում է, որ ՀՀ քրեական օրենսգրքի 75 հոդվածով սահմանված կարգով սույն դատավճռով նշանակված պատժին պետք է լրիվ գումարել թիվ ԵԴ1/3733/01/24 քրեական գործով Երևան քաղաքի առաջին ատյանի ընդհանուր իրավասության քրեական դատարանի 2025 թվականի փետրվարի 20-ի դատավճռով նշանակված պատիժը՝ 1.000.000 (մեկ միլիոն) ՀՀ դրամ տուգանքը, և Մհեր Խաչատրյանի նկատմամբ վերջնական պատիժ նշանակել հանրային աշխատանքներ՝ 80 (ութսուն) ժամ տևողությամբ և 1.000.000 (մեկ միլիոն) ՀՀ դրամ տուգանք:
Հիմք ընդունելով ՀՀ քրեական օրենսգրքի 59 հոդվածի 8-րդ մասը, հաշվի առնելով մեղադրյալ Մհեր Գարեգինի Խաչատրյանի եկամտի բացակայության վերաբերյալ ստացված տվյալը, ինչպես նաև տուգանքի վճարման համար նախկինում սահմանված ժամկետը՝ Դատարանը գտնում է, որ սույն դատավճռով ևս տուգանքի վճարման ժամկետ պետք է սահմանել առավելագույնը՝ 1 (մեկ) տարի:
4.6 Կատարած հանցանքի համար Մհեր Գարեգինի Խաչատրյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
4.7 Մհեր Գարեգինի Խաչատրյանը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն։
4.8 ՀՀ քրեական դատավարության օրենսգրքի 348 հոդվածի 1-ին մասի 11-14-րդ հարցերին անդրադառնալու անհրաժեշտությունը սույն քրեական գործով բացակայում է։
4.9 Մհեր Գարեգինի Խաչատրյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար:
4.10 Վարութային ծախսերի հարցը պետք է համարել լուծված, քանի որ ՀՀ քրեական դատավարության օրենսգրքի 464.4 հոդվածի 3-րդ մասի համաձայն՝ արագացված վարույթ կիրառելու դեպքում ՀՀ քրեական դատավարության օրենսգրքի 167 հոդվածի 1-ին մաuով նախատեսված վարութային ծախսերը մեղադրյալից ենթակա չեն բռնագանձման։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 276, 347, 348, 349, 464.4 և 464.5 հոդվածներով՝ Դատարանը

Վ Ճ Ռ Ե Ց

1. Մհեր Գարեգինի Խաչատրյանին մեղավոր ճանաչել ՀՀ քրեական օրենսգրքի 344 հոդվածի 2-րդ մասով նախատեսված հանցանքը կատարելու մեջ և նրա նկատմամբ պատիժ նշանակել հանրային աշխատանքներ՝ 80 (ութսուն) ժամ տևողությամբ։
2. ՀՀ քրեական օրենսգրքի 75 հոդվածով սահմանված կարգով՝ սույն դատավճռով նշանակված պատժին լրիվ գումարել թիվ ԵԴ1/3733/01/24 քրեական գործով Երևան քաղաքի առաջին ատյանի ընդհանուր իրավասության քրեական դատարանի 2025 թվականի փետրվարի 20-ի դատավճռով նշանակված պատիժը՝ 1.000.000 (մեկ միլիոն) ՀՀ դրամ տուգանքը, և Մհեր Խաչատրյանի նկատմամբ վերջնական պատիժ նշանակել հանրային աշխատանքներ՝ 80 (ութսուն) ժամ տևողությամբ և 1.000.000 (մեկ միլիոն) ՀՀ դրամ տուգանք:
3. Տուգանքի վճարման ժամկետ սահմանել առավելագույնը՝ 1 (մեկ) տարի:
4. Մհեր Խաչատրյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը:
5. Վարութային ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում, սակայն չի կարող բողոքարկվել ՀՀ քրեական դատավարության օրենսգրքի 373 հոդվածով և 375 հոդվածի 1-3-րդ մասերով նախատեսված հիմքերով։



ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ


(1)Ծնված՝ 1982 թվականի հոկտեմբերի 6-ին Երևան քաղաքում, ազգությամբ հայ, ՀՀ քաղաքացի, թիվ ԵԴ1/3733/01/24 քրեական գործով դատապարտյալ, միջնակարգ կրթությամբ, ամուսնացած, խնամքին 1 անչափահաս երեխա, չի աշխատում, հաշվառված է և բնակվում է Երևան քաղաքի Գյուլբենկյան փողոցի 21 շենքի թիվ 51 բնակարանում, որպես խափանման միջոց է կիրառված բացակայելու արգելքը։
(2)3.1-3.4 կետերի վերաբերյալ տե՛ս, Դատարանում ստեղծված նյութերը: