ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

04․08․2025թ. թիվ ԵԴ1/1358/01/25 ք. Երևան
Երևան քաղաքի առաջին ատյանի ընդհանուր իրավասության քրեական դատարանը հետևյալ կազմով՝

Նախագահող դատավոր Կ.Ֆարխոյան
քարտուղարությամբ Մ․ Բոզոյանի
մասնակցությամբ հանրային մեղադրող Հ․ Միքաելյանի
պաշտպան Է․ Բեգլարյանի

Դռնբաց դատական նիստում, դատարանում, մեղադրյալի բացակայությամբ վարույթ իրականացնելով՝ հեռակա կարգով քննելով քրեական վարույթն ըստ մեղադրանքի՝ Կարեն Հենրիկի Դավթյանի, ծնված 03․12․1989 թվականին Երևան քաղաքում, ազգությամբ հայ, ՀՀ քաղաքացի, չի աշխատում, բնակվել է Երևան քաղաքի Ֆուչիկի փողոցի 1-ին նրբանցքի 11-րդ շենք բնակարան 6 հասցեում:
ՀՀ ՔԿ ԵՔՔՎ ՃՏՀ քննության բաժնում 19․10․2023 թվականին նախաձեռնվել է թիվ 60025423 քրեական վարույթը՝ ՀՀ քրեական օրենսգրքի 344-րդ հոդվածի 2-րդ մասով (հատոր 1, վ․թ․ 9-11)։
Երևան քաղաքի Աջափնյակ և Դավթաշեն վարչական շրջանների դատախազության դատախազ Հ․ Միքաելյանի կողմից 18․06․2024 թվականին թիվ 60025423 քրեական վարույթով Կարեն Հենրիկի Դավթյանի նկատմամբ ՀՀ քրեական օրենսգրքի 344-րդ հոդվածի 2-րդ մասով հարուցվել է հանրային քրեական հետապնդում: (հատոր 1, վ․թ․ 25-26)։
2024 թվականի հունիսի 19-ին Կարեն Հենրիկի Դավթյանի նկատմամբ որպես խափանման միջոց է կիրառվել բացակայելու արգելքը: (հատոր 1, վ․թ․ 28-29)։
Սույն քրեական վարույթը մեղադրական եզրակացությամբ Երևան քաղաքի առաջին ատյանի ընդհանուր իրավասության քրեական դատարան է ուղարկվել 15․04․2025 թվականին, որը դատարանում ստացվել է 16․04․2025 թվականին և մակագրվել է դատավոր Կ. Ֆարխոյանին, իսկ 17․04․2025 թվականին հանձնվել է դատավոր Կ. Ֆարխոյանի աշխատակազմին:
2025 թվականի ապրիլի 18-ին որոշում է կայացվել քրեական վարույթը ստանձնելու և նախնական դատալսումներ նշանակելու մասին:
2025 թվականի օգոստոսի 08-ին որոշում է կայացվել հիմնական դատալսումներ նշանակելու մասին:
2025 թվականի օգոստոսի 08-ին մեղադրյալ Կարեն Հենրիկի Դավթյանի նկատմամբ կայացվել է մեղադրական վերդիկտ:
Դատարանը պարզեց հետևյալը, որ սույն քրեական վարույթով մեղադրյալ Կարեն Հենրիկի Դավթյանը չունենալով տրանսպորտային միջոց վարելու իրավունք և գտնվելով հարբած (ոչ սթափ) վիճակում՝ մեկ լիտր արտաշնչած օդի մեջ մաքուր ալկոհոլի 0,340 միլիգրամ պարունակությամբ, 2023 թվականի հուլիսի 29-ին ժամը 01:45-ի սահմաններում, վարել է «Տոյոտա» մակնիշի 23 RR 001 հաշվառման համարանիշի ավտոմեքենան Երևան քաղաքի Մարգարյան փողոցում, որի վերաբերյալ ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի 2-րդ վաշտի պարեկի կողմից կազմվել է վարչական իրավախախտման մասին թիվ 8180259604 արձանագրությունը:
Քրեական վարույթի քննության ընթացքում՝ 18․04․2025 թվականին մեղադրյալ Կարեն Հենրիկի Դավթյանի կողմից գրություն է ստացվել դատարան, համաձայն որի՝ ընդունում է իրեն ներկայացված մեղադրանքը, զղջում է կատարածի համար։ 2024 թվականի մայիս ամսից գտնվում է ԱՄՆ-ում, որից ելնելով դեռևս նախաքննության ընթացքում խնդրել է, որպեսզի իր վերաբերյալ քրեական վարույթն իրականացվի հեռակա վարույթի կարգով։ Ավելացրել է, որ իր դիրքորոշումը հեռակա վարույթ իրականացնելու վերաբերյալ անփոփոխ է։
Հիմնական դատալսումների ընթացքում Մեղադրյալ Կարեն Հենրիկի Դավթյանին մեղսագրվող հանցավոր արարքը, բացի նրա կողմից տված խոստովանական ցուցմունքից հիմնավորվեց նաև հիմնական դատալսումների ընթացքում հետազոտված հետևյալ թույլատրելի և բավարար ապացույցներով.
-Զննում կատարելու մասին 13․06․2024 թվականի արձնագրությամբ, համաձայն որի՝ 2023 թվականի հուլիսի 29-ին՝ ժամը 02:02-ին, Երևան քաղաքի Ֆուչիկի 2-րդ նրբանցքում ՀՀ ոստիկանության պարեկային ծառայության Երևան քաղաքի գնդի 2-րդ գումարտակի 2-րդ վաշտի կրտսեր պարեկ Աշոտ Կարինյանի կողմից կազմվել է վարչական իրավախախտման վերաբերյալ արձանագրություն, ըստ որի` Կարեն Հենրիկի Դավթյանը (ծնված 1989 թվականին) 2023 թվականի հուլիսի 29-ին, ժամը 01:45-ին Երևան քաղաքի Մարգարյան փողոցում` ոչ սթափ վիճակում վարել է «Տոյոտա» մակնիշի 23 RR 001 հաշվառման համարանիշի ավտոմեքենան: Արձանագրության վարչական իրավախախտում կատարած անձի բացատրությունը և դիտողությունը՝ նշելու հատվածում առկա է ստորագրություն: Նշված է «Արձանագրությանը ծանոթացա», իմ իրավունքների ու պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումը ստանալու հատվածում առկա է ստորագրություն և «Դավթյան» ձեռագիր գրառումը։ Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր նշված է 203.5 թիվը:
Ճանապարհային ոստիկանության էլեկտրոնային ռեգիստրից արտատպված վարորդական վկայականի տվյալների քաղվածքի զննությամբ պարզվել է, որ Կարեն Հենրիկի Դավթյանը վարորդական իրավունքի վկայական չի ունեցել։
Քրեական վարույթում առկա է ալկոհոլի պարունակության ստուգման կտրոնի պատճեն, որի զննությամբ պարզվել է, որ սարքի համարն է 91101017, զննման համարը՝ 00875, զննման ամսաթիվը՝ 29.07.2023, ստուգումը կատարվել է ավտոմատ, ժամը 01:55:35-ին, ալկոհոլի պարունակությունը՝ 0,340 մգ/լ, վարորդի անուն ազգանունը՝ Կարեն Դավթյան, տրանսպորտային միջոցի համարանիշը՝ 23 RR 001, պարեկային ծառայող՝ Կարինյան, կրծքանշանի համար 01636: Առկա է նաև սթափության սարքի ստուգաչափման թիվ 095304 վկայականը, որի զննությամբ պարզվեց, որ ստուգաչափման թվականն է՝ 05.05.2023թ., այն ուժի մեջ է մինչև 2024 թվականի հունիսի 05-ը: Չափման միջոցի անվանումը և տեսակը՝ ալկոտեստեր, գործարանային համարը՝ 91101017, տեսակը՝ «Jupiter X/RP», չափման տիրույթը՝ 0.000-2.000 մգ/լ: (հատոր 1, վ․թ․ 3,4,5,6, 16-17)։
-Արտավարութային փաստաթուղթ ճանաչելու մասին 17․06․2024 թվականի որոշմամբ, համաձայն որի՝ թիվ 60025423 քրեական վարույթի նյութերում առկա Կարեն Հենրիկի Դավթյանի վերաբերյալ ՀՀ ոստիկանության պարեկային ծառայության Երևան քաղաքի գնդի 2-րդ գումարտակի 2-րդ վաշտի կրտսեր պարեկ Աշոտ Կարինյանի կողմից 29.07.2023 թվականին կազմված վարչական իրավախախտման վերաբերյալ արձանագրությունը, ճանապարհային ոստիկանության էլեկտրոնային ռեգիստրից արտատպված քաղվածքը, ալկոհոլի պարունակության ստուգման կտրոնի և ստուգաչափման թիվ 095304 վկայականի պատճենը ճանաչվել են որպես արտավարութային փաստաթուղթ։ (հատոր 1, վ․թ․ 18-19)։
Դատարանն արձանագրում է, որ հիմնական դատալսումների ընթացքում պատշաճ իրավական ընթացակարգով թույլատրելի բոլոր ապացույցները հանգամանորեն հետազոտվել են՝ դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, դատարանը հաստատված է համարում, որ Կարեն Հենրիկի Դավթյանը, չունենալով տրանսպորտային միջոց վարելու իրավունք և գտնվելով հարբած (ոչ սթափ) վիճակում՝ մեկ լիտր արտաշնչած օդի մեջ մաքուր ալկոհոլի 0,340 միլիգրամ պարունակությամբ, 2023 թվականի հուլիսի 29-ին ժամը 01:45-ի սահմաններում, վարել է «Տոյոտա» մակնիշի 23 RR 001 հաշվառման համարանիշի ավտոմեքենան Երևան քաղաքի Մարգարյան փողոցում, որի վերաբերյալ ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի 2-րդ վաշտի պարեկի կողմից կազմվել է վարչական իրավախախտման մասին թիվ 8180259604 արձանագրությունը:
Դատարանը հանգում է այն հետևության, որ մեղադրյալ Կարեն Հենրիկի Դավթյանը կատարել է իրեն մեղսագրված արարքը, որի համար կիրառելի է ՀՀ քրեական օրենսգրքի 344-րդ հոդվածի 2-րդ մասը:
Դատարանը հաստատված համարելով հանցագործության և դրա կատարման մեջ Կարեն Հենրիկի Դավթյանի մեղքի ապացուցված լինելը, գտնում է, որ նա ենթակա է պատժի կատարածի համար:
Որպես Կարեն Հենրիկի Դավթյանի պատասխանատվությունը և պատիժը մեղմացնող հանգամանք դատարանը հաշվի է առնում, որ վերջինիս ընդունել է իրեն ներկայացված մեղադրանքը և զղջացել է կատարածի համար։
Կարեն Հենրիկի Դավթյանի պատասխանատվությունը և պատիժը ծանրացնող հանգամանքներ առկա չեն:
Դատարանը մեղադրյալի նկատմամբ պատիժ նշանակելիս հաշվի է առնում ինչպես նրա կատարած գործողությունների բնույթն ու հանրության համար վտանգավորության աuտիճանը, պատասխանատվությունն ու պատիժը մեղմացնող հանգամանքների առկայությունը և պատասխանատվությունն ու պատիժը ծանրացնող հանգամանքների բացակայությունը, այնպես էլ նրա անձը բնութագրող տվյալները:
Մեղադրյալի նկատմամբ պատիժ նշանակելիս դատարանը ելնում է այն իրողությունից, որ օրենքի առաջնային պահանջը պատժի արդարացիությունն է, որը որպես քրեական իրավունքի սկզբունք ձևակերպված է ՀՀ քրեական օրենսգրքի 7-րդ հոդվածում. հանցանք կատարած անձի նկատմամբ կիրառվող պատիժը պետք է լինի արդարացի` համապատասխանի հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ ու բավարար լինեն նրան ուղղելու և նոր հանցագործությունները կանխելու համար:
ՀՀ քրեական օրենսգրքի 344-րդ հոդվածի 2-րդ մասի սանկցիան պատիժ է նախատեսում տուգանքի ձևով` առավելագույնը քսանապատիկի չափով, կամ հանրային աշխատանքներով՝ ութսունից հարյուր հիսուն ժամ տևողությամբ, կամ կարճաժամկետ ազատազրկում՝ մեկից երկու ամիս ժամկետով, կամ ազատազրկում՝ առավելագույնը երկու տարի ժամկետով:
Նույն օրենսգրքի 59-րդ հոդվածի 3-րդ և 5-րդ մասերի համաձայն`
(․․․),
3. Տուգանքը որպես հիմնական պատիժ սահմանվում է ոչ մեծ և միջին ծանրության հանցագործությունների համար՝ հանցանք կատարած անձի ամսական եկամտի հնգապատիկից հիսնապատիկի չափով:
(․․․)
5. Հանցանք կատարած անձի եկամտի բացակայության կամ դրա չափը պարզելու անհնարինության դեպքում տուգանքի չափը հաշվարկվում է հանցանքը կատարելու պահին նվազագույն աշխատավարձի չափով: Տուգանքի չափը որոշվում է նույն կարգով, եթե հանցանք կատարած անձի եկամուտն առաջացել է հանցանքն ավարտվելուց հետո: Տուգանքի չափը որոշվում է նույն կարգով նաև այն դեպքում, երբ անձի ամսական եկամտի հաշվարկի արդյունքով դրա չափը պակաս է ստացվում նվազագույն աշխատավարձի չափից:
Քրեաիրավական նշված նորմի վերլուծությունից պարզ է դառնում, որ տուգանքի հաշվարկման հիմքում դրվում է ոչ թե նվազագույն աշխատավարձը, այսինքն պետությունում սահմանված ֆիքսված որևէ գումար, այլ հանցանք կատարած անձի եկամուտը:
ՀՀ քրեական օրենսգրքի 3-րդ հոդվածի համաձայն.
(…)
Ամսական եկամուտ` հանցանքն ավարտվելու օրվան նախորդող 12 ամիսների ընթացքում անձի ստացած միջին ամսական եկամտի 35 տոկոսը: Միջին ամսական եկամտի մեջ հաշվարկվում են ստացվող աշխատավարձը և դրան հավասարեցված այլ վճարումները, (…):
Հաշվի առնելով այն, որ քրեական նոր օրենսգրքում տուգանքի հաշվարկման հիմքում դրվում է հանցանք կատարած անձի եկամուտը, օրենսդիրը կարգավորել է նաև այն իրավիճակները, երբ անձը եկամուտ չունի կամ դրա չափը անհնարին է պարզել: Այդ դեպքերում տուգանքի չափը հաշվարկվում է հանցանքը կատարելու պահին նվազագույն ամսական աշխատավարձի չափով:
2022 թվականի դեկտեմբերի 7-ին ընդունված՝ «Նվազագույն ամսական աշխատավարձի մասին» ՀՀ օրենքի 1-ին հոդվածի համաձայն՝ 2023 թվականի հունվարի 1-ին ՀՀ-ում որպես նվազագույն ամսական աշխատավարձ է սահմանվել 75.000 ՀՀ դրամը: Նկատի ունենալով, որ մեղադրյալ Կարեն Հենրիկի Դավթյանն իրեն մեղսագրվող հանցանքը կատարել է 2023 թվականի հուլիսի 29-ին, ուստի տվյալ պահին ՀՀ-ում ամսական նվազագույն աշխատավարձը հաշվարկվում է 75.000 ՀՀ դրամի չափով, դատարանը գտնում է, որ վերջինիս նկատմամբ որպես պատիժ պետք է նշանակել տուգանք՝ նվազագույն աշխատավարձի հնգապատիկի՝ 375.000 ՀՀ դրամի չափով:
Քննության առնելով դատապարտված մեղադրյալի նկատմամբ ընտրված խափանման միջոցի հարցը՝ դատարանը գտնում է, որ այն պետք է թողնել անփոփոխ մինչև դատավճիռն օրինական ուժի մեջ մտնելը :
Ապացույց ճանաչված արտավարութային փաստաթղթերը պետք է պահել քրեական վարույթում:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 9-րդ, 270-րդ, 347-350-րդ, 476-478-րդ, 480-481-րդ հոդվածներով, դատարանը
ՎՃՌԵՑ

Կարեն Հենրիկի Դավթյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով նախատեսված հանցանքում և նրա նկատմամբ որպես պատիժ նշանակել տուգանք՝ նվազագույն աշխատավարձի հնգապատիկի՝ 375.000 ՀՀ դրամի չափով։
Կարեն Հենրիկի Դավթյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ մինչև դատավճիռն օրինական ուժի մեջ մտնելը:
Ապացույց ճանաչված արտավարութային փաստաթղթերը պահել քրեական վարույթում:
Դատավճիռը հատուկ վերանայման կարգով կարող է բողոքարկվել ՀՀ վերաքննիչ քրեական դատարան՝ այն ստանալու օրվանից մեկամսյա ժամկետում :


ԴԱՏԱՎՈՐ՝ Կ.ՖԱՐԽՈՅԱՆ