ԵԴ1/1309/01/25



Դ Ա Տ Ա Վ Ճ Ի Ռ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

<<14>> նոյեմբերի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև՝ Դատարան)

նախագահությամբ՝ դատավոր Գ.Ս.Պողոսյանի,
քարտուղարությամբ՝ Լ.Ալոյանի,
մասնակցությամբ՝
հանրային մեղադրող՝ Դ.Թադևոսյանի,
մեղադրյալ՝ Ն.Շախնազարյանի,

դռնբաց դատական նիստում, քննելով քրեական գործն ըստ մեղադրանքի Նարեկ Սիմոնի Շախնազարյանի (ծնված՝ 1991 թվականի օգոստոսի 13-ին, Երևան քաղաքում, ազգությամբ հայ, ՀՀ քաղաքացի, նախկինում դատված, միջնակարգ կրթությամբ, ամուսնացած, աշխատում է <<Ադդրեսս>> ՍՊ ընկերությունում՝ որպես պահակապետ, հաշվառված՝ Երևան քաղաքի Նորաշեն թաղամասի 17-րդ շենքի 9-րդ բնակարան հասցեում, փաստացի բնակվող՝ Երևան քաղաքի Ներքին Չարբախ 8-րդ փողոցի 18/7-րդ տուն հասցեում)՝ Հայաստանի Հանրապետության քրեական օրենսգրքի 344-րդ հոդվածի 2-րդ մասով,

ՊԱՐԶԵՑ

Գործի դատավարական նախապատմությունը.
1. 2025 թվականի փետրվարի 07-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ Մանան Աբաջյանի կողմից կազմված <<Թիվ 60160525 րեական վարույթը նախաձեռնելու մասին>> արձանագրության համաձայն՝ ՀՀ քրեական օրենսգրքի 344-րդ հոդվածի 2-րդ մասով նախաձեռնվել է թիվ 60160525 քրեական վարույթը:
2025 թվականի մարտի 28-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնում կազմված <<Հանրային քրեական հետապնդում հարուցելու մասին>> միջնորդությամբ՝ ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ Մ.Աբաջյանը միջնորդել է թիվ 60160525 քրեական վարույթով հսկող դատախազին՝ Նարեկ Սիմոնի Շախնազարյանի նկատմամբ ՀՀ քրեական օրենսգրքի 344-րդ հոդվածի 2-րդ մասով հարուցել հանրային քրեական հետապնդում:
2025 թվականի մարտի 31-ին Երևան քաղաքի Շենգավիթ վարչական շրջանի դատախազության դատախազ Դ.Թադևոսյանի կողմից կայացված <<Հանրային քրեական հետապնդում հարուցելու մասին>> որոշմամբ՝ թիվ 60160525 քրեական վարույթով Նարեկ Սիմոնի Շախնազարյանի նկատմամբ ՀՀ քրեական օրենսգրքի 344-րդ հոդվածի 2-րդ մասով հարուցվել է հանրային քրեական հետապնդում:
2025 թվականի մարտի 31-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ Մ.Աբաջյանի կողմից կայացված <<Մեղադրյալի նկատմամբ բացակայելու արգելքը որպես այլընտրանքային խափանման միջոց կիրառելու մասին>> որոշմամբ՝ թիվ 60160525 քրեական վարույթով Նարեկ Սիմոնի Շախնազարյանի նկատմամբ որպես խափանման միջոց է կիրառվել Հայաստանի Հանրապետությունից բացակայելու արգելքը:
2025 թվականի ապրիլի 11-ին Երևան քաղաքի Շենգավիթ վարչական շրջանի դատախազության դատախազ Դ.Թադևոսյանի կողմից կայացված <<Մեղադրական եզրակացությունը հաստատելու մասին>> որոշմամբ որոշվել է՝ հաստատել թիվ 60160525 քրեական վարույթով մեղադրյալ Նարեկ Սիմոնի Շախնազարյանի վերաբերյալ մեղադրական եզրակացությունը, որը քրեական վարույթի նյութերի հետ հանձնել Երևան քաղաքի առաջին ատյանի ընդհանուր իրավասության քրեական դատարան:
2025 թվականի ապրիլի 11-ին Երևան քաղաքի առաջին ատյանի ընդհանուր իրավասության քրեական դատարան է ստացվել քրեական գործն ըստ մեղադրանքի Նարեկ Սիմոնի Շախնազարյանի՝ ՀՀ քրեական օրենսգրքի 344-րդ հոդվածի 2-րդ մասով:
Քրեական գործին շնորհվել է թիվ ԵԴ1/1309/01/25 համարը:
2025 թվականի ապրիլի 11-ին դատարաններում գործերի բաշխման հատուկ համակարգչային ծրագրի միջոցով քրեական գործը մակագրվել է դատավոր Գևորգ Պողոսյանին, իսկ 2025 թվականի ապրիլի 14-ին հանձնվել է վերջինիս աշխատակազմին:
2025 թվականի ապրիլի 17-ին Երևան քաղաքի առաջին ատյանի ընդհանուր իրավասության քրեական դատարանի դատավոր Գ.Ս.Պողոսյանի կողմից կայացված որոշմամբ՝ ստանձնվել թիվ ԵԴ1/1309/01/25 քրեական գործով վարույթը և նախնական դատալսումներ է նշանակվել:
2025 թվականի հունիսի 04-ի Երևան քաղաքի առաջին ատյանի ընդհանուր իրավասության քրեական դատարանի որոշմամբ՝ մեղադրյալ Նարեկ Սիմոնի Շախնազարյանի նկատմամբ կիրառված այլընտրանքային խափանման միջոցը՝ բացակայելու արգելքը, թողնվել է անփոփոխ:
2025 թվականի հոկտեմբերի 31-ին Երևան քաղաքի առաջին ատյանի ընդհանուր իրավասության քրեական դատարանը մեղադրյալ Նարեկ Սիմոնի Շախնազարյանի նկատմամբ կայացրել է արդարացման վերդիկտ՝ ապացուցված չհամարելով մեղադրյալ Նարեկ Սիմոնի Շախնազարյանին վերագրվող փաստական հանգամանքները՝ արարքը:

Մեղադրանքի փաստական նկարագրությունը.
2. Նարեկ Սիմոնի Շախնազարյանի նկատմամբ ՀՀ քրեական օրենսգրքի 344-րդ հոդվածի 2-րդ մասով հանրային քրեական հետապնդում է հարուցվել այն բանի համար, որ <<[Ն]ա, չունենալով տրանսպորտային միջոցներ վարելու իրավունք, ոչ սթափ (հարբած) վիճակում վարել է տրանսպորտային միջոց:
Այսպես.
Նարեկ Շախնազարյանը, չունենալով տրանսպորտային միջոցներ վարելու իրավունք, 2025 թվականի հունվարի 28-ին՝ ժամը 02:58-ի սահմաններում, գտնվելով ոչ սթափ վիճակում՝ մեկ լիտր արտաշնչած օդի մեջ 0.425 մգ/լ մաքուր ալկոհոլի պարունակությամբ, Երևան քաղաքի Արարատյան փողոցում վարել է <<Hyundai>> մակնիշի 37 VX 610 հաշվառման համարանիշի տրանսպորտային միջոցը:>>:
Դատաքննության ընթացքում հետազոտված թույլատրելի ապացույցները.
3. 2025 թվականի հունվարի 28-ին ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 2-րդ վաշտի պարեկ Վ.Նանյանի կողմից կազմված <<Վարչական իրավախախտման վերաբերյալ թիվ 8259012049 արձանագրության>> համաձայն՝ Նարեկ Սիմոնի Շախնազարյանը, չունենալով տրանսպորտային միջոցներ վարելու իրավունք, նույն օրը՝ ժամը 02:55-ին, Երևան քաղաքի Արարատյան փողոցում ոչ սթափ վիճակում վարել է <<Հյունդաի>> մակնիշի 37 VX 610 հաշվառման համարանիշի տրանսպորտային միջոցը: Արձանագրության՝ արձանագրությանը ծանոթացա, իմ իրավունքների և պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումն ստացա հատվածում առկա է վարորդի ստորագրությունը:
(տե՛ս գ.թ. 3 և դատական նիստի արձանագրությունը)
3.1. <<Alcovisor-Jupiter X/RP տեսակի 91100835 համարի ալկոտեստերի կտրոնի>> համաձայն՝ զննման կտրոնն ունի 03107 համարը, զննումը կատարվել է 2025 թվականի հունվարի 28-ին՝ ժամը 02:58:47-ին, ալկոհոլի պարունակությունը կազմել է 0.425 մգ/լ, վարորդ՝ Նարեկ Շախնազարյան, Տ/Մ համարանիշ 37 VX 610, Վ/Վ համար՝ ՀԾՀ՝ 230891010, ՊԾ ազգանուն՝ Նանյան, կրծքանշանի համար՝ 05017:
(տե՛ս գ.թ. 4 և դատական նիստի արձանագրությունը)
3.2. <<Ստուգաչափման թիվ 143226 վկայականի>> համաձայն՝ թիվ 91100835 ալկոմետր սարքի ստուգաչափումը կատարվել է 2024 թվականի դեկտեմբերի 23-ին և ուժի մեջ է մինչև 2025 թվականի դեկտեմբերի 23-ը: Չափման տիրույթը 0,000-2,000 մգ/լ, ճշտության դասը, կարգը (սխալանքը)՝ 0-0,1+-5%, 0,1-0,15+-8%, 0,15>+-10%:
(տե՛ս գ.թ. 7 և դատական նիստի արձանագրությունը)
3.3. <<ՀՀ ՆԳՆ ոստիկանության Ճանապարհային ոստիկանության էլեկտրոնային ռեգիստրից արտատպված քաղվածքի>> համաձայն՝ <<Վարորդական վկայականների որոնում>> բաժնում լրացված է Նարեկ Սիմոնի Շախնազարյանի անվամբ թիվ MB955673 սերիա-համարի վարորդական վկայականի կարգավիճակն ուժը կորցրած է, թողարկված է՝ 16.08.2013թ.:
(տե՛ս գ.թ. 5 և դատական նիստի արձանագրությունը)
3.4. Հիմնական դատալսումների ընթացքում հրապարակվել և հետազոտվել է նաև Երևան քաղաքի առաջին ատյանի ընդհանուր իրավասության քրեական դատարանի 2025 թվականի օգոստոսի 28-ի որոշմամբ արտավարութային փաստաթուղթն ապացույց ճանաչված ՀՀ ՆԳՆ հաշվառման-քննական ծառայությունների մատուցման, թույլտվությունների և լիցենզավորման վարչության պետ Ա.Թևոսյանի 2025 թվականի օգոստոսի 18-ի թիվ 57/10270-15 գրությունը, որով, մասնավորապես՝ նշվել է. <<(…) 29.03.2017թ-ին քաղաքացի Նարեկ Սիմոնի Շախնազարյանի (ծնված՝ 13.08.1991թ.) վարորդական իրավունքը դադարել է և նրա <<B,C>> կարգերի MB955673 վարորդական իրավունքի վկայականը ուժը կորցրել է, որի վերաբերյալ նշում է կատարվել ՀՀ ՆԳՆ էլեկտրոնային ռեգիստրում: Հայտնում եմ նաև, որ վերոնշված խնդրով քաղաքացուն առանձին ծանուցելու պարտավորություն սահմանված չէ ՀՀ գործող օրենսդրությամբ:
Հարկ է նշել, որ անձի վարորդական իրավունքը դադարում և վարորդական վկայականը ուժը կորցրած է համարվում ուղղակիորեն օրենքով սահմանված կարգով՝ իրավունքի ուժով և այդ կապակցությամբ որոշում կայացնելու ընթացակարգ նախատեսված չէ ՀՀ գործող օրենսդրությամբ:
Վերը բերված հիմնավորման մասին համանման տեսակետ են հայտնել նաև ՀՀ Սահմանադրական դատարանն իր 2012 թվականի թիվ ՍԴՈ-1056 և ՀՀ վճռաբեկ դատարանն իր 2017 թվականի թիվ ՎԴ3/0196/05/16 որոշումներով:(…)>>:
(տե՛ս դատական նիստի արձանագրությունը)
3.5. Հիմնական դատալսումների ընթացքում հրապարակվել և հետազոտվել են նաև Երևան քաղաքի առաջին ատյանի ընդհանուր իրավասության քրեական դատարանի 2025 թվականի հոկտեմբերի 31-ի որոշմամբ արտավարութային փաստաթուղթն ապացույց ճանաչված, 2024 թվականի հունվարի 11-ին՝ ժամը 03:55-ին ՀՀ ՆԳՆ ոստիկանության պարեկային ծառայության Երևան քաղաքի գնդի 3-րդ գումարտակի 2-րդ վաշտի պարեկ Հ.Սարդարյանի կողմից կազմված <<Վարչական իրավախախտման վերաբերյալ թիվ 8180267779 արձանագրությունը>>, որի համաձայն՝ Նարեկ Սիմոնի Շախնազարյանը, չունենալով տրանսպորտային միջոցներ վարելու իրավունք, 2024 թվականի հունվարի 11-ին՝ ժամը 03:20-ին, Երևան քաղաքի Մարգարյան փողոցում ոչ սթափ վիճակում վարել է <<Հյունդայի>> մակնիշի 37 VX 610 հաշվառման համարանիշի տրանսպորտային միջոցը: Արձանագրության՝ արձանագրությանը ծանոթացա, իմ իրավունքների և պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումն ստացա հատվածում առկա է վարորդի ստորագրությունը:
<<Alcovisor-Jupiter X/RP տեսակի 91100888 համարի ալկոտեստերի կտրոնը>>, որի համաձայն՝ զննման կտրոնն ունի 01253 համարը, զննումը կատարվել է 2025 թվականի հունվարի 12-ին՝ ժամը 03:52:11-ին, ալկոհոլի պարունակությունը կազմել է 0.335 մգ/լ, վարորդ՝ Նարեկ Շախնազարյան, Տ/Մ համարանիշ 37 VX 610, Վ/Վ համար՝ ՀԾՀ՝ 2308910100, ՊԾ ազգանուն՝ Սարդարյան, կրծքանշանի համար՝ 06945:
<<Ստուգաչափման թիվ 110939 վկայականը>>, որի համաձայն՝ թիվ 91100888 ալկոմետր սարքի ստուգաչափումը կատարվել է 2023 թվականի նոյեմբերի 15-ին և ուժի մեջ է մինչև 2024 թվականի նոյեմբերի 15-ը: Չափման տիրույթը 0,000-2,000 մգ/լ, ճշտության դասը, կարգը (սխալանքը)՝ 0-0,1+-5%, 0,1-0,15+-8%, 0,15>+-10%:
2024 թվականի մայիսի 10-ին՝ ժամը 04:47-ին ՀՀ ՆԳՆ ոստիկանության պարեկային ծառայության 2-րդ գումարտակի 1-ին վաշտի կրտսեր պարեկ Խ.Սաֆարյանի կողմից կազմված <<Վարչական իրավախախտման վերաբերյալ թիվ 8180252751 արձանագրությունը>>, որի համաձայն՝ Նարեկ Սիմոնի Շախնազարյանը, չունենալով տրանսպորտային միջոցներ վարելու իրավունք, նույն օրը՝ ժամը 02:45-ին, Երևան քաղաքի Բագրատունյաց փողոցում վարել է <<Կիա>> մակնիշի 37 RC 891 հաշվառման համարանիշի տրանսպորտային միջոցը՝ հրաժարվելով (խուսափելով) սթափության վիճակի զննություն անցնելուց: Արձանագրության՝ արձանագրությանը կցվում է հատվածում առկա են՝ <<բուժ. հաստ. ուղղգ. N001215>>, իսկ վարչական իրավախախտում կատարած անձի բացատրությունը, դիտողությունը, ստորագրությունը հատվածում՝ <<հրաժարվեց ծանոթանալուց և ստորագրելուց Սաֆարյան և ստորագրություն>> գրառումները:
<<Վարորդի սթափության վիճակի զննության թիվ 001215 ուղեգիրը>>, որի համաձայն՝ 2024 թվականի մայիսի 10-ին՝ ժամը 04:10-ին ՀՀ ՆԳՆ ոստիկանության պարեկային ծառայության 2-րդ գումարտակի 1-ին վաշտի կրտսեր պարեկ Խ.Սաֆարյանը Նարեկ Սիմոնի Շախնազարյանին ներկայացրել է սթափության վիճակի զննության ՀՀ ԱՆ ԿԲԱԿ ՓԲԸ:
(տե՛ս դատական նիստի արձանագրությունը)

Լրացուցիչ դատալսումների ընթացքում հետազոտված թույլատրելի ապացույցները.
4. Լրացուցիչ դատալսումների ընթացքում ապացույցներ չեն հետազոտվել:

Դատարանի կողմից հաստատված կամ հերքված փաստական հանգամանքները.
5. Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանն արձանագրում է, որ առկա չէ փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարել, որ.
Նարեկ Սիմոնի Շախնազարյանը չունենալով տրանսպորտային միջոցներ վարելու իրավունք, ոչ սթափ (հարբած) վիճակում վարել է տրանսպորտային միջոց:
Այսպես.
Նարեկ Շախնազարյանը, չունենալով տրանսպորտային միջոցներ վարելու իրավունք, 2025 թվականի հունվարի 28-ին՝ ժամը 02:58-ի սահմաններում, գտնվելով ոչ սթափ վիճակում՝ մեկ լիտր արտաշնչած օդի մեջ 0.425 մգ/լ մաքուր ալկոհոլի պարունակությամբ, Երևան քաղաքի Արարատյան փողոցում վարել է <<Hyundai>> մակնիշի 37 VX 610 հաշվառման համարանիշի տրանսպորտային միջոցը:
Դատարանն արձանագրում է, որ դատավճռի հիմքում դրված՝ փոխկապակցված վերաբերելի, թույլատրելի, հավաստի ապացույցների ամբողջությունը հիմնավորում է Նարեկ Սիմոնի Շախնազարյանին ներկայացված մեղադրանքի ապացուցված չլինելու վերաբերյալ ցանկացած հիմնավոր կասկած:

Դատարանի իրավական վերլուծությունը և եզրահանգումը.
6. Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով՝ Դատարանը հանգում է հետևության, որ ապացուցված չէ Նարեկ Սիմոնի Շախնազարյանին վերագրվող արարքը:
Տվյալ դեպքում Դատարանը նախ հարկ է համարում արձանագրել, որ Նարեկ Սիմոնի Շախնազարյանի նկատմամբ հանրային քրեական հետապնդում հարուցելու մասին որոշմամբ մեղսագրված արարքի նկարագրությունը որոշակի և հստակ չէ:
Մասնավորապես՝ հանրային քրեական հետապնդում հարուցելու մասին դատախազի որոշումն արդար դատաքննության հիմնարար իրավունքի իրացման առումով որոշակիացված և հստակեցված չէ, դատախազը մեղադրյալ Նարեկ Սիմոնի Շախնազարյանի նկատմամբ հանրային քրեական հետապնդում հարուցելու մասին որոշմամբ վերջինիս մեղադրանքը ձևակերպելիս սահմանափակվել է միայն ՀՀ քրեական օրենսգրքի 344-րդ հոդվածի 2-րդ մասով նախատեսված հանցակազմի ընդհանրական նկարագրությամբ, որպիսի պայմաններում այն պարունակում է թերի, անհստակ ձևակերպումներ:
Այսպես.
ՀՀ քրեական օրենսգրքի 344-րդ հոդվածը համաձայն՝
<<1. Տրանսպորտային միջոցներ վարելու իրավունքից զրկված կամ տրանսպորտային միջոցներ վարելու իրավունքը կասեցված անձի կողմից տրանսպորտային միջոց վարելը՝
(…)
2. Տրանսպորտային միջոցներ վարելու իրավունքից զրկված կամ տրանսպորտային միջոցներ վարելու իրավունքը կասեցված կամ տրանսպորտային միջոց վարելու իրավունք չունեցող անձի կողմից հարբած (ոչ սթափ) վիճակում տրանսպորտային միջոց վարելը կամ այդ անձի կողմից սթափության վիճակի զննություն անցնելուց հրաժարվելը կամ խուսափելը`
(…)
3. Սույն օրենսգրքի իմաստով՝ անձը համարվում է տրանսպորտային միջոցներ վարելու իրավունքից զրկված, եթե նա օրենքով սահմանված կարգով զրկվել է տրանսպորտային միջոցներ վարելու իրավունքից, և զրկման ժամկետը չի լրացել:
4. Սույն օրենսգրքի իմաստով՝ անձի՝ տրանսպորտային միջոցներ վարելու իրավունքը համարվում է կասեցված, եթե նրա` տրանսպորտային միջոցներ վարելու իրավունքն օրենքով սահմանված կարգով կասեցվել է, և կասեցման ժամկետը չի լրացել:
5. Սույն օրենսգրքի իմաստով՝ անձը համարվում է տրանսպորտային միջոցներ վարելու իրավունք չունեցող, եթե նա սահմանված կարգով չի ստացել տվյալ կարգի տրանսպորտային միջոց վարելու իրավունքի վարորդական վկայական կամ սահմանված կարգով ստացել է վարորդական վկայական, սակայն օրենքով սահմանված կարգով զրկվել է տրանսպորտային միջոցներ վարելու իրավունքից, և զրկման ժամկետը լրանալուց հետո սահմանված կարգով չի վերականգնել տրանսպորտային միջոցներ վարելու իրավունքը, բացառությամբ ուսումնական վարման դեպքերի:>>:
Տվյալ դեպքում Դատարանը հարկ է համարում արձանագրել, որ Նարեկ Սիմոնի Շախնազարյանի նկատմամբ հանրային քրեական հետապնդում հարուցելու մասին որոշմամբ նշվել է, որ <<[Ն]ա, չունենալով տրանսպորտային միջոցներ վարելու իրավունք, ոչ սթափ (հարբած) վիճակում վարել է տրանսպորտային միջոց>>, մինչդեռ չի նշվել, թե կոնկրետ ՀՀ քրեական օրենսգրքի 344-րդ հոդվածի 5-րդ մասով սահմանված՝ տրանսպորտային միջոցներ վարելու իրավունք չունենալու համար որ հանգամանքն է առկա եղել՝ ա/ սահմանված կարգով չի ստացել տվյալ կարգի տրանսպորտային միջոց վարելու իրավունքի վարորդական վկայական, թե բ/ սահմանված կարգով ստացել է վարորդական վկայական, սակայն օրենքով սահմանված կարգով զրկվել է տրանսպորտային միջոցներ վարելու իրավունքից, և զրկման ժամկետը լրանալուց հետո սահմանված կարգով չի վերականգնել տրանսպորտային միջոցներ վարելու իրավունքը:
Մասնավորապես՝ եթե Դատարանը հիմք ընդունի, այն, որ դատախազը հաշվի է առել քրեական գործի նյութերում առկա MB955673 համարի վարորդական իրավունքի վկայականի մասին տեղեկությունը, ապա պարզ չէ, թե ըստ մեղադրանքի կողմի մեղադրյալը համարվում է տրանսպորտային միջոցներ վարելու իրավունք չունեցող, քանի որ սահմանված կարգով ստացել է վարորդական վկայական, սակայն օրենքով սահմանված կարգով զրկվել է տրանսպորտային միջոցներ վարելու իրավունքից, թե զրկման ժամկետը լրանալուց հետո սահմանված կարգով չի վերականգնել տրանսպորտային միջոցներ վարելու իրավունքը:
Դատարանն արձանագրում է, որ սույն քրեական գործի հիմնական դատալսումների ընթացքում հետազոտված ապացույցներից և հանրային քրեական հետապնդում հարուցելու մասին որոշման ձևակերպումներից հնարավոր չէ փաստել, որ մեղադրյալ Նարեկ Սիմոնի Շախնազարյանն օրենքով սահմանված կարգով զրկվել է տրանսպորտային միջոցներ վարելու իրավունքից, ավելին՝ այդ մասին առկա չէ նաև մեղադրանքի կողմի հաստատված որևէ դատողություն:
Մասնավորապես՝ հնարավոր չէ պնդել, որ Նարեկ Սիմոնի Շախնազարյանը զրկվել է տրանսպորտային միջոցներ վարելու իրավունքից ՀՀ ՆԳՆ ոստիկանության Ճանապարհային ոստիկանության էլեկտրոնային ռեգիստրից արտատպված քաղվածքում վերջինիս անվամբ թողարկված MB955673 սերիա-համարի վարորդական վկայականի վերաբերյալ ուժը կորցրած նշում կատարելու փաստով:
Այդ կապակցությամբ Դատարանը հատկանշական է համարում այն հանգամանքը, որ Նարեկ Սիմոնի Շախնազարյանի MB955673 սերիա-համարի վարորդական վկայականի վերաբերյալ ՀՀ ՆԳՆ ոստիկանության Ճանապարհային ոստիկանության էլեկտրոնային ռեգիստրից արտատպված քաղվածքում ուժը կորցրած նշում կատարելու համար հիմք է հանդիսացել <<Ճանապարհային երթևեկության անվտանգության ապահովման մասին>> ՀՀ օրենքի 29-րդ հոդվածի 1-ին մասի <<Բ>> ենթակետը, համաձայն որի․ <<Անձի վարորդական վկայականը համարվում է ուժը կորցրած, եթե` առկա է նրա հոգեկան հիվանդության վերաբերյալ և (կամ) առողջական վիճակը օրենսդրությամբ սահմանված չափորոշիչներին չհամապատասխանելու մասին իրավասու մարմնի եզրակացությունը>>, մինչդեռ քրեական գործի նյութերում մեղադրյալի հոգեկան հիվանդության վերաբերյալ և (կամ) առողջական վիճակը օրենսդրությամբ սահմանված չափորոշիչներին չհամապատասխանելու մասին որևէ եզրակացություն առկա չէ, բնականաբար հիմնական դատալսումների ընթացքում էլ նման ապացույց չի հետազոտվել և ՀՀ ՆԳՆ ոստիկանության Ճանապարհային ոստիկանության էլեկտրոնային ռեգիստրից արտատպված քաղվածքում ևս որևէ նշում այդ մասով առկա չէ:
Այսինքն՝ Դատարանն արձանագրում է, որ Նարեկ Սիմոնի Շախնազարյանի նկատմամբ հանրային քրեական հետապնդում հարուցելու մասին որոշմամբ հստակ չի նշվել, թե մեղադրյալը սահմանված կարգով չի ստացել տվյալ կարգի տրանսպորտային միջոց վարելու իրավունքի վարորդական վկայական, թե սահմանված կարգով ստացել է վարորդական վկայական, սակայն օրենքով սահմանված կարգով զրկվել է տրանսպորտային միջոցներ վարելու իրավունքից, և զրկման ժամկետը լրանալուց հետո սահմանված կարգով չի վերականգնել տրանսպորտային միջոցներ վարելու իրավունքը, որպիսի պայմաններում Դատարանն արձանագրում է, որ հանրային քրեական հետապնդում հարուցելու մասին որոշումը պարունակում է թերի, անհստակ ձևակերպումներ, որոնք պաշտպանության կողմին զրկել են պատշաճ իրացնելու պաշտպանության իրավունքը, իսկ Դատարանին՝ գնահատել մեղադրանքի հիմնավորվածությունը։
Այսուհանդերձ Դատարանը հարկ է համարում անդրադառնալ նաև անձի վարելու իրավունքի դադարման, անձի վարորդական վկայականի ուժը կորցնելու վերաբերյալ նախկինում և ներկայումս գործող իրավակարգավորումներին։
Այսպես.
Սույն քրեական գործի հիմնական դատալսումների ընթացքում հետազոտված և սույն Դատավճռի 3.4-րդ կետում առկա ՀՀ ՆԳՆ հաշվառման-քննական ծառայությունների մատուցման, թույլտվությունների և լիցենզավորման վարչության պետ Ա.Թևոսյանի 2025 թվականի օգոստոսի 18-ի թիվ 57/10270-15 գրությամբ նշվել է, որ 29.03.2017թ.-ին քաղաքացի Նարեկ Սիմոնի Շախնազարյանի (ծնված՝ 13.08.1991թ.) վարորդական իրավունքը դադարել է և նրա <<B,C>> կարգերի MB955673 վարորդական իրավունքի վկայականը ուժը կորցրել է, որի վերաբերյալ նշում է կատարվել ՀՀ ՆԳՆ էլեկտրոնային ռեգիստրում, վերը նշված օրվա՝ 2017 թվականի մարտի 29-ի դրությամբ կատարված փոփոխություններով և լրացում-ներով՝ <<Ճանապար¬հային երթևեկության անվտանգության ապահովման մասին>> ՀՀ օրենքի (այսուհետ՝ Օրենք) 29-րդ հոդ¬վածի <<Բ>> ենթակետի համաձայն՝ անձի վարորդական իրավունքի վկա¬յա¬կանը համարվում է ուժը կորցրած, եթե՝ առկա է նրա հոգեկան հիվանդության վե¬րա¬բերյալ և (կամ) առող¬ջական վիճակը օրենսդրությամբ սահմանված չափորոշիչներին չհամապատասխանելու մասին իրավասու մարմնի եզրակացությունը:
Նույն հոդվածի 2-րդ մասի համաձայն՝ վարորդական վկայականի գործողությունը դա¬դարում է օրենքով սահմանված կարգով վարելու իրավունքից զրկելու մասին դատարանի կամ իրավասու այլ մարմնի որոշումն ուժի մեջ մտնելու պահից՝ մինչև դրանում սահման¬ված ժամկետի ավարտը:
Միայն տվյալ Օրենքում 2019 թվականի դեկտեմբերի 09-ի ՀՕ-278-Ն օրենքով փոփոխութ¬յուն կատարելու միջոցով է 29-րդ հոդվածի 1-ին մասը խմբագրվել և 2-րդ կե¬տով սահման¬վել, որ անձի վարելու իրավունքը դադարում է, եթե առկա է նրա՝ հոգեկան, թմրա¬մի¬ջոցների և (կամ) հոգեմետ (հոգեներգործուն) նյութերի օգտագործմամբ պայ¬մա¬¬¬նավորված հիվանդության վերաբերյալ և (կամ) առողջական վիճակը օրենսդրութ¬յամբ սահ¬¬մանված պայմաններին չհամապատասխանելու մասին իրավասու մարմնի եզրա¬կա¬¬¬ցություն:
Նույն հոդվածի 2-րդ մասի համաձայն՝ անձի վարորդական վկայականն ուժը կորցնում է, եթե՝ առկա է սույն հոդվածի 1-ին մասով նախատեսված հիմքերից որևէ մեկը:
Վերը նշված կարգավորումը շարունակում է գործել մինչ օրս, քրեական հետապնդման մար¬մին¬ներն ենթադրաբար հենց այդ կարգավո¬րումն են հաշվի առել մեղադրյալի նկատմամբ հանրային քրեական հետապնդում հարուցելու մասին որոշում կայացնելիս և նրա նկատմամբ մեղադրական եզրա¬կա¬ցություն կազմելիս, հաստատելիս և գործը մեղադրական եզրակացությամբ դատա¬րան ուղարկելիս։
Մինչդեռ, քրեական հետապնդման մարմինները պարտավոր էին հաշվի առ¬նել ՀՀ քրեական օրենսգրքի 344-րդ հոդվածի 2-րդ մասով նախատեսված հանցա¬կազմի կառուցվածքն ու առանձնահատկությունները։
Ինչպես վերը նշվեց՝ ՀՀ քրեական օրենսգրքի 344-րդ հոդվածի իմաստով անձը համար¬¬¬վում է տրանսպորտային միջոցներ վա¬րե¬լու իրավունք չունեցող, եթե նա սահմանված կարգով չի ստացել տվյալ կարգի տրանսպորտային միջոց վարելու իրավունքի վարորդական վկայական կամ սահմանված կարգով ստացել է վարորդական վկայական, սակայն օրենքով սահմանված կարգով զրկվել է տրանսպորտային միջոցներ վարելու իրավունքից, և զրկման ժամկետը լրանալուց հետո սահմանված կարգով չի վերականգնել տրանսպորտային միջոցներ վարելու իրավունքը:
Սույն դեպքում դատախազը ենթադրաբար Նարեկ Սիմոնի Շախնազարյանի նկատմամբ ՀՀ քերական օրենսգրքի 344-րդ հոդվածի 2-րդ մասով հանրային քրեական հետապնդում հարուցելու մասին որոշում կայացնելից նկատի է ունեցել, որ նա սահմանված կարգով ստացել է վարորդական վկայական, սակայն օրենքով սահմանված կարգով զրկվել է տրանսպորտային միջոցներ վարելու իրավունքից, և զրկման ժամկետը լրանալուց հետո սահմանված կարգով չի վերականգնել տրանսպորտային միջոցներ վարելու իրավունքը, ինչի համար էլ ենթադրաբար հիմք է հանդիսացել այն, որ նրա վարորդական իրավունքը 2017 թվականի մարտի 29-ին ուժը կորցրել է, ինչի վերաբերյալ նշում է կատարվել ՀՀ ՆԳՆ էլեկտրոնային ռեգիստրում, որպիսի պայմաններում դատախազի կողմից մեղադրյալ Նարեկ Սիմոնի Շախնազարյանի նկատմամբ հանրային քրեական հետապնդում հարուցելու մասին որոշում կայացնելիս հաշվի չի առնվել այն, որ մինչև 2019 թվականի դեկտեմբերի 09-ի ՀՕ-278-Ն օրենքով <<Ճանապարհային երթևե¬կութ¬յան անվտանգության ապահովման մասին>> ՀՀ օրենքի 29-րդ հոդվածի 2-րդ կետում փոփոխություն կատարելը թմրամիջոցների և (կամ) հոգեմետ (հոգեներգործուն) նյութերի օգտա¬գործմամբ պայմանա¬վորված հիվանդության վերաբերյալ իրավասու մարմնի եզրա¬կացության առկայությունը վարորդական վկայականն ուժը կորցրած ճանաչելու կամ անձի վարելու իրավունքը դադարեցնելու իրավական հնարավորություն չէր տալիս, Օրենքում նման հիմք նախատեսված չէր, հետևաբար՝ այն 2017 թվականի մարտի 29-ին մեղադրյալի նկատ¬¬¬մամբ կիրառվել չէր կարող:
Այսպիսով, թեև Նարեկ Սիմոնի Շախնազարյանի վարորդական իրավունքի վկայականը 2017 թվա¬կանի մարտի 29-ին ՀՀ ՆԳՆ էլեկտրոնային ռեգիստրում նշվել է որպես ուժը կորցրած, սակայն նա տրանսպորտային միջոց վարելու իրավունքից չի զրկվել, առավել ևս՝ դա չի իրականացվել օրենքով սահմանված կարգի պահպանմամբ, քանի որ նարկոլոգիական կաբինետում հաշվառված լինելու փաստարկով ՏՄ վարելու իրավունքի դադարեցման հիմքը քննարկվող Օրենքում (մինչև 2019 թվականի դեկտեմբերի 09-ին կատարված փոփո¬խությունը) նախատեսված չէր, որևէ այլ նորմատիվ իրավական ակտում՝ ևս:
Տվյալ դեպքում թեև սույն քրեական գործի հիմնական դատալսումների ընթացքում հետազոտված ապացույց¬ներով հաաստատվել է, որ Նարեկ Սիմոնի Շախնազարյանը առանց վարորդական իրավունքի վկա¬յականի, ոչ սթափ (հարբած) վիճակում վարել է տրանսպորտային միջոց, սակայն նրա արարքում բացակայում է ՀՀ քրեական օրենսգրքի 344-րդ հոդվածի 2-րդ մա¬սով նախատեսված հանցակազմը, իրավախախտումը կատարելու պահին Նարեկ Սիմոնի Շախնազարյանը վարելու իրավունքից զրկված չի եղել, եթե անգամ նրա վերաբերյալ ՀՀ ՆԳՆ ոստիկանության Ճանապարհային ոստիկանության էլեկտրոնային ռեգիստրում արված ուժը կորցրած նշումը մեկնաբանվի այդ համա-տեքստում և նույնացվի իրավունքի զրկման հետ, ապա միևնույնն է այդ զրկումը չի իրա¬կանացվել տվյալ պահին գործող <<օրենքով>>, այդ թվում՝ ենթաօրենսդրա¬¬¬¬կան ակտե¬րով սահմանված կարգով:
Որպես վերը նշված դատողությունը հիմնավորող լրացուցիչ փաստարկ Դատարանը հարկ է համարում արձանագրել նաև, որ սույն քրեական գործում առկա չէ և բնականաբար հիմնական դատալսումների ընթացքում էլ չի հետազոտվել թմրամի¬ջոց¬նե¬րի և (կամ) հոգեմետ (հոգեներգործուն) նյութերի օգտագործմամբ պայմա¬նավոր¬ված հիվանդության մասին բժշկական եզրակացությու¬նը, որը անձի վարելու իրավուն¬քը դադարած համարելու կամ վարորդական վկա¬¬յականը ուժը կորցրած ճանաչելու իրա¬վական հիմքն է:
Ամբողջացնելով վերոգրյալնները Դատարանը հարկ է համարում արձանագրել նաև, որ <<անձի տրանսպորտային միջոցներ վարելու իրավունքը դադարելը>> և <<անձի վարորդական վկայականի ուժը կորցնելը>> տարբեր եզրութներ են և ի վերջո մեղադրյալ Նարեկ Սիմոնի Շախնազարյանի տրանսպորտային միջոցներ վարելու վարորդական վկայականը 2017 թվականի մարտի 29-ին ուժը կորցրած ճանաչելու պահին գործող <<Ճանապարհային երթևեկության անվտանգության ապահովման մասին>> ՀՀ օրենքի իրավակարգավորումների համաձայն՝ առնվազն ուժը կորցրած կարող էր ճանաչվել վերջինիս տրանսպորտային միջոցներ վարելու վարորդական վկայականը, այլ ոչ թե նրա տրանսպորտային միջոցներ վարելու իրավունքը, այնքանով որքանով այդ ժամանակահատվածում գործող վերը նշված օրենքով անձի տրանսպորտային միջոցներ վարելու վարորդական վկայականը կարող էր ուժը կորցրած ճանաչվել ի թիվս այլնի նաև այն դեպքում, երբ լրացած կլիներ վարորդական վկայականի գործողության ժամկետը, իսկ 2019 թվականի դեկտեմբերի 09-ի ՀՕ-278-Ն օրենքով <<Ճանապարհային երթևե¬կութ¬յան անվտանգության ապահովման մասին>> ՀՀ օրենքի 29-րդ հոդվածի 2-րդ կետում փոփոխություն կատարելուց հետո նոր միայն անձի վարորդական վկայականի ուժը կորցրած ճանաչելը կարող է հանգեցնել նաև անձի վարելու իրավունքի դադարման:
Տվյալ դեպքում Դատարանը հարկ է համարում արձանագրել նաև, որ Նարեկ Սիմոնի Շախնազարյանի տրանսպորտային միջոցներ վարելու վարորդական վկայականը 2017 թվականի մարտի 29-ին ուժը կորցրած ճանաչելու պահին գործող <<Ճանապարհային երթևեկության անվտանգության ապահովման մասին>> ՀՀ օրենքի իրավակարգավորումների համաձայն՝ անձի վարորդական վկայականը համարվում է ուժը կորցրած, եթե` առկա է նրա հոգեկան հիվանդության վերաբերյալ և (կամ) առողջական վիճակը օրենսդրությամբ սահմանված չափորոշիչներին չհամապատասխանելու մասին իրավասու մարմնի եզրակացությունը, իսկ 2019 թվականի դեկտեմբերի 09-ի ՀՕ-278-Ն օրենքով <<Ճանապարհային երթևե¬կութ¬յան անվտանգության ապահովման մասին>> ՀՀ օրենքի 29-րդ հոդվածի 2-րդ կետում փոփոխություն կատարելուց հետո նոր միայն անձի վարելու իրավունքը դադարում է, կամ անձի վարորդական վկայականն ուժը կորցնում է, եթե՝ առկա է նրա՝ հոգեկան, թմրամիջոցների և (կամ) հոգեմետ (հոգեներգործուն) նյութերի օգտագործմամբ պայմանավորված hիվանդության վերաբերյալ և (կամ) առողջական վիճակը օրենսդրությամբ սահմանված պայմաններին չհամապատասխանելու մասին եզրակացություն:
Այսպիսով, սույն վարույթի հիմնական դատալսումների ընթացքում հետազոտված ապացույցներով հնարավոր չէ հաստատված համարել, որ 2025 թվականի հունվարի 28-ին՝ ժամը 02:58-ի սահմաններում, գտնվելով ոչ սթափ վիճակում՝ մեկ լիտր արտաշնչած արտաշնչած օդի մեջ 0.425 մգ/լ մաքուր ալկոհոլի պարունակությամբ, Երևան քաղաքի Արարատյան փողոցում <<Hyundai>> մակնիշի 37 VX 610 հաշվառման համարանիշի տրանսպորտային միջոցը վարելիս Նարեկ Սիմոնի Շախնազարյանը ՀՀ քրեական օրենսգրքի 344-րդ հոդվածի 5-րդ մասի իմաստով հանդիսացել է տրանսպորտային միջոցներ վարելու իրավունք չունեցող անձ:
Այսինքն՝ Նարեկ Սիմոնի Շախնազարյանի արարքում բացակայում է ՀՀ քրեական օրենսգրքի 344-րդ հոդվածի 2-րդ մասով նախատեսված հանցակազմի օբյեկտիվ կողմը, որպիսի պայմաններում նրա նկատմամբ պետք է կայացվի արդարացման դատավճիռ։
Վերոգրյալների հիման վրա, ինչպես նաև հիմք ընդունելով 2025 թվականի հոկտեմբերի 31-ին կայացված արդարացման վերդիկտը՝ Դատարանը հանգում է հետևության, որ պետք է ճանաչել և հռչակել Նարեկ Սիմոնի Շախնազարյանի անմեղությունը ՀՀ քրեական օրենսգրքի 344-րդ հոդվածի 2-րդ մասով նախատեսված հանցանքի կատարման մեջ՝ իրեն վերագրվող փաստական հանգամանքներն ապացուցված չլինելու հիմքով:
7. Դատարանը, անդրադառնալով ՀՀ քրեական դատավարության 348-րդ հոդվածով նախատեսված՝ դատավճիռ կայացնելիս դատարանի լուծմանն ենթակա մյուս հարցերին, արձանագրում է, որ ՀՀ քրեական դատավարության օրենսգրքի 348-րդ հոդվածի 1-ին մասի 2-րդ, 3-րդ, 4-րդ կետերով նախատեսված հարցերին անդրադառնալը առարկայազուրկ է, բացի այդ սույն քրեական գործով իրեղեն ապացույցներ չկան, գույքային հայց ներկայացված չէ, առկա չէ նաև հատուցման ենթակա գույքային այլ վնաս և դրա ապահովման նպատակով արգելադրված որևէ գույք, քրեական գործով առկա չեն նաև վարութային ծախսեր:
8. Ինչ վերաբերում է Նարեկ Սիմոնի Շախնազարյանի ռեաբիլիտացիայի հարցին, ապա այն պետք է համարել լուծված, քանի որ լրացուցիչ դատալսումների ընթացքում արդարացված մեղադրյալը ՀՀ քրեական դատավարության օրենսգրքի 164-րդ հոդվածով նախատեսված որևէ պահանջ չի ներկայացրել։
9. Անդրադառնալով մեղադրյալի նկատմամբ կիրառված խափանման միջոցի հարցին՝ Դատարանն արձանագրում է, որ վերջինիս նկատմամբ որպես խափանման միջոց կիրառված բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը, իսկ դրանից հետո պետք է վերացնել:
10. Ելնելով վերոգրյալից և ղեկավարվելով ՀՀ քրեական դատավարության օրենսգրքի 167-րդ, 347-350-րդ, 352-353-րդ և 364-րդ հոդվածներով՝ Դատարանը

Վ Ճ Ռ Ե Ց

Ճանաչել և հռչակել Նարեկ Սիմոնի Շախնազարյանի անմեղությունը ՀՀ քրեական օրենսգրքի 344-րդ հոդվածի 2-րդ մասով նախատեսված հանցանքի կատարման մեջ՝ նրան վերագրվող փաստական հանգամանքներն ապացուցված չլինելու հիմքով:
Նարեկ Սիմոնի Շախնազարյանի ռեաբիլիտացիայի հարցը համարել լուծված:
Նարեկ Սիմոնի Շախնազարյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը, իսկ դրանից հետո՝ վերացնել:
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո՝ մեկամսյա ժամկետում:



ԴԱՏԱՎՈՐ Գ.Ս.ՊՈՂՈՍՅԱՆ