ԵԴ1/1296/01/25


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«18» Սեպտեմբերի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
քարտուղարությամբ՝ ՌՈԲԵՐՏ ՍԻՐԱԿԱՆՅԱՆԻ
մասնակցությամբ.
հանրային մեղադրող՝ ՀՐԱՆՏ ՊՈՂՈՍՅԱՆԻ
տուժողի լիազոր
ներկայացուցիչ՝ ՎԱՀԱԳՆ ՎԱՐԴԱՆՅԱՆԻ
մեղադրյալ՝ ՀԱՅԿ ՀՈՎՀԱՆՆԻՍՅԱՆԻ
պաշտպան՝ ԴԱՎԻԹ ԹՈՎՄԱՍՅԱՆԻ
դռնբաց դատական նիստում արագացված վարույթի կարգով քննելով Հայկ Հրաչյայի Հովհաննիսյանի(1) վերաբերյալ քրեական գործն ըստ մեղադրանքի՝ ՀՀ քրեական օրենսգրքի 255 հոդվածի 2-րդ մասի 3-րդ կետով և 457 հոդվածի 1-ին մասով.



1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ.
Թիվ 15-0045-23 քրեական վարույթով Հայկ Հրաչյայի Հովհաննիսյանի նկատմամբ ՀՀ քրեական օրենսգրքի 255 հոդվածի 2-րդ մասի 3-րդ կետով և 457 հոդվածի 1-ին մասով հարուցվել է նոր հանրային քրեական հետապնդում հետևյալ արարքի համար.
«[Նա] հանդիսանալով «Ինպուլս» ՍՊ ընկերության անվան ներքո գործող Երևան քաղաքի Մաշտոցի պողոտա 17 հասցեում գտնվող բջջային հեռախոսների խանութի փոխտնօրենը, 2023 թվականի հուլիսի 13-ին գտնվելով նույն խանութում, նախապես իր տրամադրության տակ ունենալով հիշյալ խանութի հաճախորդ հանդիսացած Արմեն Մխիթարի Մարտիրոսյանի անձնագրի պատճենը, նպատակադրվել է վերջինիս անձնագրային տվյալները օգտագործելու և Ա.Մարտիրոսյանի ստորագրությունը կեղծելու եղանակով կնքել պարտքի տարաժամկետ մարման վարկային կեղծ պայմանագիր և խաբեությամբ կատարել հափշտակություն։
Հանցավոր մտադրությունն իրագործելու նպատակով 2023 թվականի հուլիսի 13-ին գտնվելով Երևան քաղաքի Մաշտոցի պողոտա 17 հասցեում գտնվող «Ինպուլս» ՍՊ ընկերության անվան ներքո գործող բջջային հեռախոսների խանութում, Հայկ Հովհաննիսյանը վարկերի ձևակերպման համար նախատեսված առցանց հարթակում մուտքագրել է Արմեն Մխիթարի Մարտիրոսյանի անձնագրային տվյալները, կցել վերջինիս անձնագրի պատճեն, «Ինպուլս» ՍՊ ընկերությունից տարաժամկետ մարման վարկային պայմանագիր կնքելու միջոցով Արմեն Մարտիրոսյանի անունից առանց նրա գիտության և վերջինիս ստորագրությունը կեղծելու եղանակով «Այֆոն 14 պռո մաքս» մոդելի բջջային հեռախոս գնելու վերաբերյալ առցանց հարցում է կատարել «Ամերիաբանկ» ՓԲ ընկերություն՝ այդ կերպ խաբեությամբ ներկայանալով որպես Արմեն Մարտիրոսյան, որից հետո համապատասխան հարցման հաստատման արդյունքում Արմեն Մարտիրոսյանի ստորագրությունը կեղծելու եղանակով Արմեն Մարտիրոսյանի և «Ամերիաբանկ» ՓԲ ընկերության միջև ձևակերպել է թիվ «OF/520390» պարտքի տարաժամկետ մարման վարկային պայմանագիրը /օֆերտա/, որն օգտագործելու միջոցով խաբեությամբ «Ամերիաբանկ» ՓԲ ընկերությունից ստացել է 748 000 ՀՀ դրամ գումար և խարդախությամբ հափշտակել այն՝ «Ամերիաբանկ» ՓԲ ընկերությանը պատճառելով խոշոր չափերի՝ 748 000 ՀՀ դրամ արժողության գույքային վնաս»։
2. ԱՐԱԳԱՑՎԱԾ ՎԱՐՈՒՅԹԸ.
2.1 Նախնական դատալսումների ընթացքում մեղադրյալ Հայկ Հրաչյայի Հովհաննիսյանը ներկայացրեց արագացված վարույթ կիրառելու միջնորդություն՝ հայտնելով, որ ներկայացված մեղադրանքն իրեն պարզ է, համաձայն է մեղադրանքի հետ, պնդում է արագացված վարույթ կիրառելու մասին միջնորդությունը, այն ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպանի հետ և գիտակցում է արագացված վարույթ կիրառելու հետևանքները:
2.2 Հանրային մեղադրողը չառարկեց արագացված վարույթ կիրառելու դեմ:
2.3 Դատարանը, համոզվելով, որ առկա է ՀՀ քրեական դատավարության օրենսգրքի 464.1 հոդվածի 1-ին մասով նախատեսված հիմքը և բացակայում են նույն հոդվածի 2-րդ մասով նախատեսված՝ արագացված վարույթի կիրառումը բացառող հանգամանքները, բավարարեց արագացված վարույթ կիրառելու մասին միջնորդությունը և որոշում կայացրեց քրեական գործով լրացուցիչ դատալսումներ անցկացնելու մասին։
3. ԼՐԱՑՈՒՑԻՉ ԴԱՏԱԼՍՈՒՄՆԵՐԻ ԸՆԹԱՑՔՈՒՄ ՀԵՏԱԶՈՏՎԱԾ ԹՈՒՅԼԱՏՐԵԼԻ ԱՊԱՑՈՒՅՑՆԵՐԸ ԵՎ ՔՆՆԱՐԿՄԱՆ ԵՆԹԱԿԱ ՀԱՐՑԵՐԻ ՎԵՐԱԲԵՐՅԱԼ ԿՈՂՄԵՐԻ ԲԱՑԱՏՐՈՒԹՅՈՒՆՆԵՐԸ.
3.1 Կանխիկ մուտքի թիվ 000668 անդորրագրի համաձայն՝ Հայկ Հրաչյայի Հովհաննիսյանը «Ամերիաբանկ» փակ բաժնետիրական ընկերությանն է փոխանցել 1.098.600 ՀՀ դրամ՝ որպես Արմեն Մխիթարի Կարապետյանի հետ կնքված ապառիկ պայմանագրի իրական շահառու։ (2)
3.2 Դատվածությունների և հետախուզման առկայության Ձև 8 հարցման պատասխանի համաձայն.
«1. ՀՈՎՀԱՆՆԻՍՅԱՆ ՀԱՅԿ ՀՐԱՉՅԱՅԻ Ծննդյան ամսաթիվը` 16/03/1998, Ծննդավայրը` ԵՐԵՎԱՆ ԿԵՆՏՐՈՆ
Համարը` 13808421
1) Նախաքննության վերաբերյալ տեղեկատվություն
Նախաձեռնող մարմինը` ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉ.ՇՐՋ.Ք/Բ, ամս` 20/12/2021
Մեղադրական հոդված` ՀՀ ՔՐ. ՕՐ. (2003Թ.) հ 243.1 մ 1.1
ԿԱՐՃՎԱԾ Է ամս`27/12/2021 հիմք` 37 Հ. 1 Մ. 1 Կ.
2. ՀՈՎՀԱՆՆԻՍՅԱՆ ՀԱՅԿ ՀՐԱՉՅԱՅԻ
Ծննդյան ամսաթիվը` 16/03/1998, Ծննդավայրը` ԵՐԵՎԱՆ ԿԵՆՏՐՈՆ
Համարը` 13160823
1) Նախաքննության վերաբերյալ տեղեկատվություն
Նախաձեռնող մարմինը` ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉ.ՇՐՋ.Ք/Բ, ամս` 15/06/2023
Մեղադրական հոդված` ՀՀ ՔՐ. ՕՐ. հ 255 մ 2 կ 3 , հ 457 մ 1
ՈՒՂԱՐԿՎԵԼ Է ԴԱՏԱՐԱՆ
2) Դատապարտման վերաբերյալ տեղեկատվություն չկա
3) Պատժի կրման վայրի վերաբերյալ տեղեկատվություն չկա
4) Պատժից ազատման վերաբերյալ տեղեկատվություն չկա
3. ՀՈՎՀԱՆՆԻՍՅԱՆ ՀԱՅԿ ՀՐԱՉՅԱՅԻ
Ծննդյան ամսաթիվը` 16/03/1998, Ծննդավայրը` ԵՐԵՎԱՆ ԿԵՆՏՐՈՆ
Համարը` 15004523
1) Նախաքննության վերաբերյալ տեղեկատվություն
Նախաձեռնող մարմինը` ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉ.ՇՐՋ.Ք/Բ, ամս` 08/11/2023
Մեղադրական հոդված` ՀՀ ՔՐ. ՕՐ. հ 255 մ 2 կ 3 , հ 457 մ 1
ՈՒՂԱՐԿՎԵԼ Է ԴԱՏԱՐԱՆ
2) Դատապարտման վերաբերյալ տեղեկատվություն չկա
3) Պատժի կրման վայրի վերաբերյալ տեղեկատվություն չկա
4) Պատժից ազատման վերաբերյալ տեղեկատվություն չկա
4. ՀՈՎՀԱՆՆԻՍՅԱՆ ՀԱՅԿ ՀՐԱՉՅԱՅԻ
Ծննդյան ամսաթիվը` 16/03/1998, Ծննդավայրը` ԵՐԵՎԱՆ ԿԵՆՏՐՈՆ
Համարը` 10806322
1) Նախաքննության վերաբերյալ տեղեկատվություն
Նախաձեռնող մարմինը` ԱՋԱՓՆՅԱԿ ԵՎ ԴԱՎԻԹԱՇԵՆ ՎԱՐՉ.ՇՐՋ. Ք/Բ, ամս` 09/08/2022
Մեղադրական հոդված` ՀՀ ՔՐ. ՕՐ. հ 344 մ 1
ԿԱՐՃՎԱԾ Է ամս`26/12/2022 հիմք` ՔԴՕ 12 Հ I Մ 14 Կ
5. ՀՈՎՀԱՆՆԻՍՅԱՆ ՀԱՅԿ ՀՐԱՉՅԱՅԻ
Ծննդյան ամսաթիվը` 16/03/1998, Ծննդավայրը` ԵՐԵՎԱՆ ԿԵՆՏՐՈՆ
Համարը` 08183323
1) Նախաքննության վերաբերյալ տեղեկատվություն
Նախաձեռնող մարմինը` ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉ.ՇՐՋ.Ք/Բ, ամս` 27/07/2023
Մեղադրական հոդված` ՀՀ ՔՐ. ՕՐ. հ 255 մ 2 կ 3 , հ 457 մ 1
ՈՒՂԱՐԿՎԵԼ Է ԴԱՏԱՐԱՆ
2) Դատապարտման վերաբերյալ տեղեկատվություն
Դատապարտող մարմինը` ԵՐԵՎԱՆ ՔԱՂԱՔԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆ, ամս` 14/06/2024
ՀՀ ՔՐ. ՕՐ. հ 457 մ 1
Հիմնական պատիժը` ՏՈՒԳԱՆՔ 375.000 դրամ, ՏՈՒԳԱՆՔԻ ՎՃԱՐՄԱՆ ՏԱՐԱԺԱՄԿԵՏՈՒՄ 10 ամիս
3) Պատժի կրման վայրի վերաբերյալ տեղեկատվություն չկա
4) Պատժից ազատման վերաբերյալ տեղեկատվություն
04.07.2025Թ. ՏՈՒԳԱՆՔԸ ՎՃԱՐՎԵԼ»։
3.3 ՀՀ արդարադատության նախարարության պրոբացիայի ծառայության Երևանի քաղաքային մարմնի պետի 2025 թվականի սեպտեմբերի 14-ի գրության համաձայն.
«Երևան քաղաքի առաջին ատյանի ընդհանուր իրավասության քրեական դատարանի 13.05.2024թ. թիվ ԵԴ1/2265/01/23 դատավճռով Հայկ Հրաչյայի Հովհաննիսյանը (...) մեղավոր է ճանաչվել ՀՀ քրեական օրենսգրքի 457-րդ հոդվածի 1-ին մասով և դատապարտվել է տուգանքի՝ 450.000 ՀՀ դրամի չափով:
Թիվ ԵԴ1/2265/01/23 դատավճիռը մտել է օրինական ուժի մեջ 17.02.2025թ. իսկ ՀՀ ԱՆ պրոբացիայի ծառայության Երևանի քաղաքային մարմնում ստացվել է 13.03.2025թ. և ընդունվել է ի կատար ածման:
Երևան քաղաքի առաջին ատյանի ընդհանուր իրավասության քրեական դատարանի 29.04.2025թ. թիվ ԵԴ1/0249/13/25 որոշմամբ, թիվ ԵԴ1/2265/01/23 դատավճռով նշանակված տուգանք պատժի վճարման վերջնաժամկետը երկարաձգվել է 1/մեկ/ տարի ժամկետով՝ առ 29.04.2026p:
Հ.Հովհաննիսյանը իր նկատմամբ դատական ակտով նշանակված տուգանք պատժի վճարման անդորրագիր առ 14.09.2025թ. ՀՀ ԱՆ պրոբացիայի ծառայության Երևանի քաղաքային մարմին չի ներկայացրել»։
3.4 ՀՀ պետական եկամուտների կոմիտեի հարկ վճարողների սպասարկման վարչության պետի գրության համաձայն՝ Հայկ Հրաչյայի Հովհաննիսյանը հանցանքն ավարտվելու օրվան նախորդող 12 ամիսների ընթացքում չի հանդիսացել վարձու աշխատող։ Հարկային մարմնի տեղեկատվական բազայում առկա չեն նաև Հայկ Հրաչյայի Հովհաննիսյանի կողմից իր ակտիվների ներդրմամբ (տրամադրմամբ) այլ անձանց գործունեությունից ստացված եկամուտի (շահաբաժնի, տոկոսի, ռոյալթիի, վարձակալական վճարի) վերաբերյալ տվյալներ: (3)
Քննարկման ենթակա հարցերի վերաբերյալ կողմերի դիրքորոշումները.
3.5 Հանրային մեղադրողը Դատարանին խնդրեց Հայկ Հրաչյայի Հովհաննիսյանին դատապարտել տուգանքի:
3.6 Պաշտպանության կողմը վկայակոչելով մեղադրյալի ֆինանսական խնդիրները՝ Դատարանին խնդրեց որպես պատիժ նշանակել հանրային աշխատանքներ։ Պատասխանելով նախագահող դատավորի հարցերին՝ մեղադրյալը նշեց, որ հանրային աշխատանքների նշանակման դեպքում համաձայն է կատարել դրանք:
4. ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐԸ ԵՎ ՈՐՈՇՈՒՄՆԵՐԸ.
4.1 Արագացված վարույթ կիրառելու պայմաններում Հայկ Հրաչյայի Հովհաննիսյանին վերագրվող փաստական հանգամանքները (արարքները), այդ արարքների քրեական հակաիրավականությունը, մեղադրյալի կողմից այդ արարքները կատարելը, մեղադրյալի մեղավորությունը տվյալ արարքները կատարելու մեջ, սահմանելով, որ մեղադրյալի կատարած արարքների նկատմամբ ենթակա են կիրառման ՀՀ քրեական օրենսգրքի 255 հոդվածի 2-րդ մասի 3-րդ կետով և 457 հոդվածի 1-ին մասը։
4.2 Հաստատված փաստական հանգամանքների հիման վրա Դատարանն արձանագրում է, որ ՀՀ քրեական օրենսգրքի 255 հոդվածի 2-րդ մասի 3-րդ կետով կատարած արարքի մասով Հայկ Հրաչյայի Հովհաննիսյանի պատասխանատվությունն ու պատիժը մեղմացնող հանգամանք է հանցագործությամբ պատճառված վնասը կամովին հատուցելը։
4.3 Դատարանն արձանագրում է, որ Հայկ Հրաչյայի Հովհաննիսյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71 հոդվածով նախատեսված հանգամանքներ առկա չեն:
4.4 Կատարած հանցանքի համար մեղադրյալ Հայկ Հրաչյայի Հովհաննիսյանը ենթակա է պատժի։
4.5 Պատժի տեսակն ու չափը որոշելիս Դատարանը, հաշվի է առնում հետևյալ հանգամանքները՝
-Հայկ Հրաչյայի Հովհաննիսյանի կատարած հանցանքների հանգամանքները, հանրային վտանգավորության աստիճանն ու բնույթը, մասնավորապես՝ այն, որ նրա կատարած հանցանքները դասվում են ինչպես սեփականության այնպես էլ կառավարման կարգի դեմ ուղղված հանցագործությունների շարքին։
-Հայկ Հրաչյայի Հովհաննիսյանի անձը բնութագրող տվյալները, հանրային աշխատանքներ կատարելու համաձայնությունը, պատասխանատվությունը և պատիժը մեղմացնող հանգամանքը ու ծանրացնող հանգամանքների բացակայությունը, ՀՀ քրեական օրենսգրքի 69 հոդվածի 2-րդ մասում թվարկված մյուս հանգամանքները։
• Այսպիսով, Դատարանը գտնում է, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներն ապահովելու համար Հայկ Հրաչյայի Հովհաննիսյանի կողմից կատարված հանցագործությունների բնույթին, վտանգավորության աստիճանին, կատարելու հանգամանքներին, ինչպես նաև հանցավորի անձին համաչափ պատիժ է՝
-ՀՀ քրեական օրենսգրքի 255 հոդվածի 2-րդ մասի 3-րդ կետով նախատեսված հանցանքի կատարման համար հանրային աշխատանքները՝ 150 ժամ տևողությամբ,
-ՀՀ քրեական օրենսգրքի 457 հոդվածի 1-ին մասով նախատեսված հանցանքի կատարման համար՝ հանրային աշխատանքները՝ 150 ժամ տևողությամբ:
• Դատարանը գտնում է, որ ՀՀ քրեական օրենսգրքի 74 հոդվածով սահմանված կարգով նշանակվող պատիժները պետք է գումարել մասնակի, և Հայկ Հովհաննիսյանի նկատմամբ պատիժ նշանակել հանրային աշխատանքներ՝ 270 (երկու հարյուր յոթանասուն) ժամ տևողությամբ:
4.6 Միևնույն ժամանակ ՀՀ քրեական օրենսգրքի 74 հոդվածի 11 հոդվածով սահմանված կարգով սույն դատավճռով նշանակված պատժին պետք է լրիվ գումարել թիվ ԵԴ1/2265/01/23 քրեական գործով Երևան քաղաքի առաջին ատյանի ընդհանուր իրավասության քրեական դատարանի 2024 թվականի մայիսի 13-ի դատավճռով ՀՀ քրեական օրենսգրքի 457 հոդվածի 1-ին մասով նախատեսված հանցանքի կատարման համար նշանակված պատիժը՝ 450.000 (չորս հարյուր հիսուն հազար) ՀՀ դրամ տուգանքը, և Հայկ Հրաչյայի Հովհաննիսյանի նկատմամբ վերջնական պատիժ նշանակել հանրային աշխատանքներ՝ 270 (երկու հարյուր յոթանասուն) ժամ տևողությամբ և տուգանք՝ 450.000 (չորս հարյուր հիսուն հազար) ՀՀ դրամի չափով։
4.7 Միևնույն ժամանակ հիմք ընդունելով ՀՀ քրեական օրենսգրքի 59 հոդվածի 8-րդ մասը, հաշվի առնելով մեղադրյալ Հայկ Հրաչյայի Հովհաննիսյանի եկամտի բացակայության վերաբերյալ ստացված տվյալը, տուժողին պատճառված վնասը քրեական գործով նախնական դատալսումների ընթացքում հատուցելը, ինչպես նաև տուգանքի վճարման համար նախորդ դատական ակտերով սահմանված ժամկետը՝ Դատարանը գտնում է, որ սույն դատավճռով ևս տուգանքի վճարման ժամկետ պետք է սահմանել առավելագույնը՝ 1 (մեկ) տարի:
4.8 Կատարած հանցանքի համար Հայկ Հրաչյայի Հովհաննիսյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
4.9 Հայկ Հրաչյայի Հովհաննիսյանը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն։
4.10 ՀՀ քրեական դատավարության օրենսգրքի 348 հոդվածի 1-ին մասի 11-14-րդ հարցերին անդրադառնալու անհրաժեշտությունը սույն քրեական գործով բացակայում է։
4.11 Հայկ Հրաչյայի Հովհաննիսյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար:
4.12 Վարութային ծախսերի հարցը պետք է համարել լուծված, քանի որ ՀՀ քրեական դատավարության օրենսգրքի 464.4 հոդվածի 3-րդ մասի համաձայն՝ արագացված վարույթ կիրառելու դեպքում ՀՀ քրեական դատավարության օրենսգրքի 167 հոդվածի 1-ին մաuով նախատեսված վարութային ծախսերը մեղադրյալից ենթակա չեն բռնագանձման։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 276, 347, 348, 349, 464.4 և 464.5 հոդվածներով՝ Դատարանը

Վ Ճ Ռ Ե Ց

1. Հայկ Հրաչյայի Հովհաննիսյանին մեղավոր ճանաչել ՀՀ քրեական օրենսգրքի 255 հոդվածի 2-րդ մասի 3-րդ կետով և 457 հոդվածի 1-ին մասով նախատեսված հանցանքները կատարելու մեջ։
-ՀՀ քրեական օրենսգրքի 255 հոդվածի 2-րդ մասի 3-րդ կետով նախատեսված հանցանքի կատարման համար Հայկ Հովհաննիսյանի նկատմամբ պատիժ նշանակել հանրային աշխատանքներ՝ 150 (հարյուր հիսուն) ժամ տևողությամբ:
-ՀՀ քրեական օրենսգրքի 457 հոդվածի 1-ին մասով նախատեսված հանցանքի կատարման համար Հայկ Հովհաննիսյանի նկատմամբ պատիժ նշանակել հանրային աշխատանքներ՝ 150 (հարյուր հիսուն) ժամ տևողությամբ:
2. Նշանակված պատիժները մասնակի գումարել և Հայկ Հովհաննիսյանի նկատմամբ պատիժ նշանակել հանրային աշխատանքներ՝ 270 (երկու հարյուր յոթանասուն) ժամ տևողությամբ:
3. ՀՀ քրեական օրենսգրքի 74 հոդվածով սահմանված կարգով՝ սույն դատավճռով նշանակված պատժին լրիվ գումարել թիվ ԵԴ1/2265/01/23 քրեական գործով Երևան քաղաքի առաջին ատյանի ընդհանուր իրավասության քրեական դատարանի 2024 թվականի մայիսի 13-ի դատավճռով ՀՀ քրեական օրենսգրքի 457 հոդվածի 1-ին մասով նախատեսված հանցանքի կատարման համար նշանակված պատիժը՝ 450.000 (չորս հարյուր հիսուն հազար) ՀՀ դրամ տուգանքը, և Հայկ Հրաչյայի Հովհաննիսյանի նկատմամբ վերջնական պատիժ նշանակել հանրային աշխատանքներ՝ 270 (երկու հարյուր յոթանասուն) ժամ տևողությամբ և տուգանք՝ 450.000 (չորս հարյուր հիսուն հազար) ՀՀ դրամի չափով:
4. Տուգանքի վճարման ժամկետ սահմանել առավելագույնը՝ 1 (մեկ) տարի:
5. Հայկ Հովհաննիսյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը:
6. Վարութային ծախսերի հարցը համարել լուծված:
Դատավճիռը վերաքննության կարգով կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում, սակայն չի կարող բողոքարկվել ՀՀ քրեական դատավարության օրենսգրքի 373 հոդվածով և 375 հոդվածի 1-3-րդ մասերով նախատեսված հիմքերով:



ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ

(1)Ծնված՝ 1998 թվականի մարտի 16-ին Երևան քաղաքում, ազգությամբ հայ, ՀՀ քաղաքացի, նախկինում դատապարտված, միջնակարգ կրթությամբ, չամուսնացած, չի աշխատում, հաշվառված է Երևան քաղաքի Ամիրյան փողոցի 28 շենքի թիվ 17 բնակարանում, բնակվում է Երևան քաղաքի Բաբայան փողոցի 22 շենքի թիվ 35 բնակարանում, որպես խափանման միջոց է կիրառված բացակայելու արգելքը:
(2)Նշված փաստաթղթի հիման վրա տուժողի լիազոր ներկայացուցիչը հրաժարվել է գույքային հայցից և գույքային հայցի մասով վարույթը կարճվել է:
(3)3.1-3.4 կետերի վերաբերյալ տե՛ս, Դատարանում ստեղծված նյութերը: