ԵԴ1/1266/01/25


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«20» Հունիսի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
քարտուղարությամբ՝ ՌՈԲԵՐՏ ՍԻՐԱԿԱՆՅԱՆԻ
մասնակցությամբ.
հանրային մեղադրող՝ ԱՐԹՈՒՐ ՀԵԲՈՅԱՆԻ
մեղադրյալ՝ ԽԱՉԻԿ ԲԱԴԱԼՅԱՆԻ
պաշտպան՝ ԱԿՍԵԼ ՄԱՆՈՒԿՅԱՆԻ
դռնբաց դատական նիստում քննելով Խաչիկ Էդուարդի Բադալյանի (1) վերաբերյալ քրեական գործն ըստ մեղադրանքի՝ ՀՀ քրեական օրենսգրքի 344 հոդվածի 1-ին մասով.




1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ
Թիվ 60-2680-24 քրեական վարույթով Խաչիկ Էդուարդի Բադալյանին ՀՀ քրեական օրենսգրքի 344 հոդվածի 1-ին մասով մեղադրանք է ներկայացվել հետևյալ արարքի համար.
«Խաչիկ Էդուարդի Բադալյանը, Ճանապարհային ոստիկանության տեխնիկական միջոցներով հայտնաբերված իրավախախտումների վերաբերյալ գործերի քննության բաժնի աշխատակցի կողմից կայացված թիվ 2417697691 վարչական տույժ նշանակելու մասին որոշմամբ 2024 թվականի փետրվարի 5-ից՝ 6 ամիս ժամկետով տրանսպորտային միջոց վարելու իրավունքը կասեցված լինելու պայմաններում և 2024 թվականի մայիսի 22-ին տեղեկացված լինելով սույն որոշման մասին, 2024 թվականի մայիսի 25-ին՝ ժամը 22:22-ին, Երևան քաղաքի Էրեբունի հրապարակում վարել է «Մերսեդես» մակնիշի, 99 BB 060 հաշվառման համարանիշի ավտոմեքենան, ինչի վերաբերյալ ՀՀ ՆԳՆ ոստիկանության պարեկային ծառայության աշխատակցի կողմից նույն օրը՝ ժամը 22:25-ին, կազմվել է վարչական իրավախախտման վերաբերյալ թիվ 8180407202 արձանագրությունը»։

2. ԴԱՏԱՔՆՆՈՒԹՅԱՆ ԸՆԹԱՑՔՈՒՄ ՀԵՏԱԶՈՏՎԱԾ ԹՈՒՅԼԱՏՐԵԼԻ ԱՊԱՑՈՒՅՑՆԵՐԸ.
ՀԻՄՆԱԿԱՆ ԴԱՏԱԼՍՈՒՄՆԵՐ

2.1 Արտավարութային փաստաթուղթ ճանաչված՝ «Վարչական իրավախախտման վերաբերյալ» թիվ 8180407202 արձանագրության համաձայն՝ այն կազմվել է 2024 թվականի մայիսի 25-ին՝ ժամը 22։25-ին։ Խաչիկ Էդուարդի Բադալյանը տրանսպորտային միջոցներ վարելու իրավունքը կասեցված վիճակում նույն օրը՝ ժամը 22:22-ին, Երևան քաղաքի Էրեբունի հրապարակում վարել է «Մերսեդես» մակնիշի 99 BB 060 հաշվառման համարանիշի տրանսպորտային միջոցը։ Որոշումը կարող է բողոքարկվել Պարեկային ծառայության պետին՝ ՀՀ ՎԻՎ օրենսգրքի 283 հոդվածով սահմանված կարգով հանձնելու (հանձնված համարվելու) օրվանից հետո՝ երեսուն օրվա ընթացքում կամ ՀՀ վարչական դատարան՝ օրենքով սահմանված կարգով և ժամկետներում: (2)
2.2 Արտավարութային փաստաթուղթ ճանաչված՝ Խաչիկ Էդուարդի Բադալյանի վերաբերյալ ՀՀ ճանապարհային ոստիկանության էլեկտրոնային ռեգիստրից արտատպված քաղվածքի համաձայն՝ նրա տրանսպորտային միջոցներ վարելու իրավունքը կասեցվել է 2024 թվականի փետրվարի 5-ից մինչև 2024 թվականի օգոստոսի 5-ը։ (3)
2.3 Արտավարութային փաստաթուղթ ճանաչված՝ «Վարչական տույժ նշանակելու մասին» թիվ 2417697691 որոշման պատճենի համաձայն՝ «Վարչական իրավախախտումների վերաբերյալ» ՀՀ օրենսգրքի 129.3 հոդվածի 1-ին մասի համաձայն՝ Խաչիկ Էդուարդի Բադալյանի տրանսպորտային միջոցներ վարելու իրավունքը կասեցվել է 6 (վեց) ամիս ժամկետով: (4)
2.4 Արտավարութային փաստաթուղթ ճանաչված՝ «Ծանուցման» համաձայն՝ Ճանապարհային ոստիկանության 2024 թվականի հունվարի 4-ի թիվ 2417697691 որոշման պատճենը Խաչիկ Էդուարդի Բադալյանը ստորագրությամբ ստացել է 2024 թվականի մայիսի 22-ին: (5)
2.5 «Տեսագրության զննում կատարելու մասին» 2025 թվականի մարտի 19-ի արձանագրության համաձայն՝ Խաչիկ Էդուարդի Բադալյանի մասնակցությամբ զննության է ենթարկվել ՀՀ ՆԳՆ ոստիկանության ՀՈԳՎ ՎԳ և ԲՔ վարչությունից ստացված թիվ 2417697691 որոշման հիմքում ընկած տեսագրությունը.
«Տեսախցիկի տեսադաշտում գտնվող հանդիպակաց փողոցից դուրս եկող երեք տրանսպորտային միջոցների հետևում երևում է սպիտակ գույնի «FORD» մակնիշի ավտոմեքենան, որը դուրս է գալիս հանդիպակաց գոտի և մոտենում է խաչմերուկին։ Տեսագրության մեջ տեսախցիկի կադրը մոտեցնելով նշված ավտոմեքենայի ղեկին երևում է վարորդը, որն էլ տեսնելով, մասնակից Խաչիկ Բադալյանը հայտարարեց, որ դա ինքն է, որ նշված խախտմանը չի վերաբերել ՀՀ ճանապարհային ոստիկանությունում ներկայացված դիմումը»։ (6)
2.6 Միասնական էլեկտրոնային համակարգի միջոցով Խաչիկ Էդուարդի Բադալյանի «Վարչական իրավախախտումների ամփոփաթերթ»-ի համաձայն՝ նա, վարելով «MERCEDES-BENZ E 320» մակնիշի 99 BB 060 հաշվառման համարանիշի տրանսպորտային միջոցը, 2025 թվականի մայիսի 31-ին և հունիսի 5-ին ենթարկվել է վարչական պատասխանատվության։ (7)
2.7 Մեղադրյալ Խաչիկ Էդուարդի Բադալյանը հիմնական դատալսումների ընթացքում, ըստ էության, ցուցմունք տվեց այն մասին, որ մշտապես հետևում է երթևեկության կանոններին, և աշխատում է հնարավորին չափ պահպանել դրանք: Իր վարորդական իրավունքը կասեցվելու մասին հաղորդագրությունը ստանալու օրվանից հետո՝ երկուս ու կես ամիս շարունակ, ամեն օր ճանապարհային ոստիկանության էլեկտրոնային համակարգում ստուգել է իր վարորդական իրավունքի կարգավիճակը, տեսել է, որ այն «գործող» է և այդ պատճառով շարունակել է տրասնպորտային միջոցներ վարել: Սույն դեպքի ժամանակ է տեղեկացել, որ իր վարորդական իրավունքը կասեցված է և դրանից հետո այլևս տրանսպորտային միջոց չի վարել: Եթե ինքն իմանար, որ իր տրանսպորտային միջոցներ վարելու իրավունքը կասեցված է, չէր շարունակի վարել, քանի որ օրենքի պահանջները խախտելու դիտավորություն չի ունեցել:
-Հանրային մեղադրողի հարցերին ի պատասխան՝ մեղադրյալը հայտնեց, որ ինքը ՀՀ ՆԳՆ պարեկային ծառայությունից 2024 թվականի մայիսի 22-ին ստանալով հերթական նամակը, այն չի կարդացել, քանի որ մտածել է, որ դա իրեն ուղարկված՝ վարչական իրավախախտման վերաբերյալ հերթական որոշում է: Իր աշխատանքի վայրում որպես երեք «Ֆորդ» մակնիշի ավտոմեքենաների շահագործող նշված է ինքը, և դրանով պայմանավորված իրեն ՀՀ ՆԳՆ ոստիկանության պարեկային ծառայությունից շատ հաճախ են նամակներ գալիս, որոնց ինքը չի ծանոթանում: 2024 թվականի մայիսի 22-ի նամակին ևս չի ծանոթացել, քանի որ ՀՀ ՆԳՆ ոստիկանության պարեկային ծառայության կայքէջում պարբերաբար ստուգելով իր վարորդական իրավունքի կարգավիճակը, չի մտածել, որ իր տրասնպորտային միջոցներ վարելու իրավունքը կասեցված է:
-Նախագահողի հարցերին ի պատասխան՝ մեղադրյալը հայտնեց, որ ՀՀ ՆԳՆ ոստիկանության պարեկային ծառայության կայքէջում 2 և ավել ամիս ստուգելուց հետո է մտածել, որ իր տրասնպորտային միջոցներ վարելու իրավունքը կասեցված չէ: Այդ ընթացքում՝ 2024 թվականի մարտի 17-ին, Երևան քաղաքի Մաշտոցի պողոտայում մեքենան սխալ կայանելու համար իրեն են մոտեցել ՀՀ ՆԳՆ ոստիկանության պարեկային ծառայության աշխատակիցներ, և ինքն, օգտվելով առիթից նրանց խնդրել է ստուգել իր վարորդական իրավունքի կարգավիճակը, իսկ պարեկները հայտնել են, որ որևէ խնդիր չկա: Ինքը հասկանում է, որ սխալ է վարվել, և պետք է մտածեր, որ խնդիրը միգուցե ծրագրային է, և մոտենար ՀՀ ՆԳՆ ոստիկանության պարեկային ծառայություն՝ խնդիրը տեղում հասկանալու համար: 2025 թվականի մայիսի 31-ին և հունիսի 5-ին կատարված վարչական իրավախախտումների ժամանակ իր վարորդական իրավունքի կասեցման ժամկետն արդեն ավարտվել էր։
ԼՐԱՑՈՒՑԻՉ ԴԱՏԱԼՍՈՒՄՆԵՐ

2.8 Դատվածությունների և հետախուզման առկայության Ձև 8 հարցման պատասխանի համաձայն՝ Խաչիկ Էդուարդի Բադալյանը նախկինում դատապարտված չի եղել: (8)
2.9 ՀՀ պետական եկամուտների կոմիտեի հարկ վճարողների սպասարկման վարչության պետի 2025 թվականի ապրիլի 22-ի գրությանը կից ներկայացված տեղեկատվության հիման վրա կատարված հաշվարկի համաձայն՝ հանցանքն ավարտվելու օրվան նախորդող 12 ամիսների ընթացքում ՀՀ քրեական օրենսգրքի 3 հոդվածի 1-ին մասի 6-րդ կետի իմաստով Խաչիկ Էդուարդի Բադալյանի ամսական եկամուտը կազմել է 64.744 ՀՀ դրամ: (9)
Քննարկման ենթակա հարցերի վերաբերյալ կողմերի դիրքորոշումները.
2.10 Պատժի վերաբերյալ հարցերը քննարկելիս հանրային մեղադրողը Դատարանին խնդրեց Խաչիկ Էդուարդի Բադալյանին դատապարտել տուգանքի։
2.11 Մեղադրյալը Դատարանին խնդրեց իր նկատմամբ նշանակել հանրային աշխատանքներ, քանի որ տուգանքը վճարելն իր համար կլինի ֆինանսական մեծ բեռ։

3. ԴԱՏԱՐԱՆԻ ՓԱՍՏԱԿԱՆ ՎԵՐԼՈՒԾՈՒԹՅՈՒՆՆԵՐԸ ԵՎ ԴԱՏԱՐԱՆԻ ԿՈՂՄԻՑ ՀԱՍՏԱՏՎԱԾ ԿԱՄ ՀԵՐՔՎԱԾ ՓԱՍՏԱԿԱՆ ՀԱՆԳԱՄԱՆՔՆԵՐԸ.
3.1 Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում հետևյալ փաստական հանգամանքները՝
ա) Խաչիկ Էդուարդի Բադալյանն իր տրանսպորտային միջոցներ վարելու իրավունքը 2024 թվականի փետրվարի 5-ից՝ 6 ամիս ժամկետով կասեցված լինելու պայմաններում, 2024 թվականի մայիսի 25-ին՝ ժամը 22:22-ին, Երևան քաղաքի Էրեբունի հրապարակում վարել է «Մերսեդես» մակնիշի 99 BB 060 հաշվառման համարանիշի տրանսպորտային միջոցը։
բ) Խաչիկ Էդուարդի Բադալյանը 2024 թվականի մայիսի 25-ին՝ ժամը 22:22-ին, Երևան քաղաքի Էրեբունի հրապարակում «Մերսեդես» մակնիշի 99 BB 060 հաշվառման համարանիշի տրանսպորտային միջոցը վարելու ժամանակ տեղեկացված է եղել (գիտակցել է) իր վարորդական իրավունքը կասեցված լինելու մասին։
գ) Դատարանն արժանահավատ չի համարում իր վարորդական իրավունքը կասեցված լինելու հանգամանքը չգիտակցելու մասին Խաչիկ Էդուարդի Բադալյանի ցուցմունքը, քանի որ առնվազն այն, որ վերջինը պարբերաբար փորձել է ստուգել իր վարորդական իրավունքի կարգավիճակը, վկայում է այն մասին, որ նա գիտակցել է իր վարորդական իրավունքի կասեցված լինելը։ Դատարանի համար համոզիչ չէ նաև ՀՀ ՆԳՆ պարեկային ծառայությունից 2024 թվականի մայիսի 22-ին հերթական նամակը ստանալու և այն չկարդալու մասին մեղադրյալի ցուցմունքը, քանի որ վերջինն իր ցուցմունքով հայտնել է, որ ամեն օր ճանապարհային ոստիկանության համացանցային հարթակում ստուգել է իր վարորդական իրավունքի կարգավիճակը, որպիսի պայմաններում անտրամաբանական է ՀՀ ՆԳՆ պարեկային ծառայությունից նամակ ստանալը և այն չստուգելը։
3.2 Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև այն, որ Խաչիկ Էդուարդի Բադալյանը նախկինում դատապարտված չի եղել և հանցանքն ավարտվելու օրվան նախորդող 12 ամիսների ընթացքում նրա միջին ամսական եկամուտը ցածր է հանցանքը կատարելու պահին ՀՀ-ում սահմանված նվազագույն աշխատավարձի չափից։

4. ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐՆ ՈՒ ՈՐՈՇՈՒՄՆԵՐԸ.
4.1 Դատարանի կողմից հաստատված փաստական հանգամանքների և 2025 թվականի հունիսի 20-ին կայացված մեղադրական վերդիկտի հիման վրա Դատարանն ապացուցված է համարում մեղադրյալ Խաչիկ Էդուարդի Բադալյանին վերագրվող արարքը, այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, սահմանելով, որ դատապարտված մեղադրյալի կատարած արարքի նկատմամբ ենթակա է կիրառման ՀՀ քրեական օրենսգրքի 344 հոդվածի 1-ին մասը։
4.2 Դատարանի կողմից հաստատված փաստական հանգամանքների հիման վրա Դատարանն արձանագրում է, որ Խաչիկ Էդուարդի Բադալյանի պատասխանատվությունն ու պատիժը մեղմացնող և ծանրացնող հանգամանքներ առկա չեն:
4.3 Կատարած հանցանքի համար մեղադրյալ Խաչիկ Էդուարդի Բադալյանը ենթակա է պատժի։
4.4 Պատժի տեսակն ու չափը որոշելիս՝ Դատարանը հաշվի է առնում հետևյալը՝
-Խաչիկ Էդուարդի Բադալյանի կատարած հանցանքի հանգամանքները, հանրային վտանգավորության աստիճանն ու բնույթը, մասնավորապես՝ այն, որ նրա կատարած հանցանքը դասվում է ոչ մեծ ծանրության հանցագործությունների շարքին։
-Խաչիկ Էդուարդի Բադալյանի անձը բնութագրող տվյալները, հանրային աշխատանքներ կատարելու համաձայնությունը, պատասխանատվությունը և պատիժը մեղմացնող հանգամանքների առկայությունն ու ծանրացնող հանգամանքների բացակայությունը, ՀՀ քրեական օրենսգրքի 69 հոդվածի 2-րդ մասում թվարկված մյուս հանգամանքները։
• Այսպիսով, Դատարանը գտնում է, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներն ապահովելու համար Խաչիկ Էդուարդի Բադալյանի կողմից ՀՀ քրեական օրենսգրքի 344 հոդվածի 1-ին մասով կատարված հանցագործության բնույթին, վտանգավորության աստիճանին, դրա կատարելու հանգամանքներին, ինչպես նաև հանցավորի անձին համաչափ պատիժ է 60 (վաթսուն) ժամ տևողությամբ հանրային աշխատանքները:
• Միևնույն ժամանակ Դատարանը գտնում է, որ կատարած հանցանքի համար Խաչիկ Էդուարդի Բադալյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
4.5 Խաչիկ Էդուարդի Բադալյանը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն։
4.6 ՀՀ քրեական դատավարության օրենսգրքի 348 հոդվածի 1-ին մասի 11-14-րդ հարցերին անդրադառնալու անհրաժեշտությունը սույն քրեական գործով բացակայում է։
4.7 Խաչիկ Էդուարդի Բադալյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար։
4.8 ՀՀ քրեական դատավարության օրենսգրքի 167 հոդվածի 1-ին մասի 1-6-րդ կետերով նախատեսված վարութային ծախսեր սույն քրեական գործով առկա չեն, իսկ 7-րդ կետով նախատեսված ծախսերի վերաբերյալ տվյալները բացակայում են: Ավելին՝ այդ վարութային ծախսերի հատուցման պահանջ Դատարանին չի ներկայացվել, որպիսի պայմաններում վարութային ծախսերի հարցը պետք է համարել լուծված։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 167, 276, 347, 348, 349 և 364 հոդվածներով՝ Դատարանը

Վ Ճ Ռ Ե Ց

1. Խաչիկ Էդուարդի Բադալյանին մեղավոր ճանաչել ՀՀ քրեական օրենսգրքի 344 հոդվածի 1-ին մասով նախատեսված հանցանքը կատարելու մեջ, և նրա նկատմամբ պատիժ նշանակել հանրային աշխատանքներ՝ 60 (վաթսուն) ժամ տևողությամբ:
2. Խաչիկ Բադալյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը:
3. Վարութային ծախսերի հարցը համարել լուծված:
Դատավճիռը վերաքննության կարգով կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում:

ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ

(1)Ծնված՝ 1989 թվականի օգոստոսի 10-ին, Արարատի մարզի Նոր Խարբերդ համայնքում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, նախկինում չդատապարտված, ըստ իր խոսքերի՝ աշխատում է «Ալեքս Ռիթեյլ Քամփընի» սահմանափակ պատասխանատվությամբ ընկերությունում որպես վարորդ, հաշվառված է և բնակվում է Արարատի մարզի Նոր Խարբերդ համայնքի 5 փողոցի թիվ 38 տանը, որպես խափանման միջոց է կիրառվել բացակայելու արգելքը:
(2)Տե՛ս, քրեական գործ, հատոր 1, թերթեր 3:
(3)Տե՛ս, քրեական գործ, հատոր 1, թերթեր 4:
(4)Տե՛ս, քրեական գործ, հատոր 1, թերթեր 5:
(5)Տե՛ս, քրեական գործ, հատոր 1, թերթեր 39:
(6)Տե՛ս, քրեական գործ, հատոր 1, թերթեր 77-78:
(7)Տե՛ս Դատարանում ստեղծված նյութերը:
(8)2.8-2.9 կետերի վերաբերյալ տե՛ս քրեական գործ, հատոր 1, թերթ 17:
(9)Տե՛ս Դատարանում ստեղծված նյութերը: