ԵԴ1/1230/01/25

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ
ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«04» հունիսի 2025 թվական ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` նաև Դատարան)՝
նախագահությամբ դատավոր՝ Գ.ԱԲԵԼՅԱՆԻ
քարտուղարությամբ՝ Գ․ԳԱԼՍՏՅԱՆԻ
հանրային մեղադրողներ՝ Ա․ԲԱԴԱԼՅԱՆԻ
պաշտպան՝ Է․ԱՂԱՋԱՆՅԱՆԻ
մեղադրյալ՝ Հ․ՆԻԿՈՂՈՍՅԱՆԻ
դռնբաց դատական նիստում` արագացված վարույթի կարգով, քննեց քրեական գործն ըստ մեղադրանքի`
Հովհաննես Արամայիսի Նիկողոսյանի՝ ծնված՝ 1954 թվականի սեպտեմբերի 30-ին, ազգությամբ հայ, ՀՀ քաղաքացի, նախկինում դատապարտված դատվածու¬թյունը մարված, հաշվառված՝ Արարատի մարզ, բնակավայր Ռանչպար, Նոր թաղամաս, 9 փողոց, 4 տնակ հասցեում, մեղադրանք է ներկայացվել ՀՀ քրեական օրենսգրքի 344-րդ հոդվածի 1-ին մասով և որպես խափանման միջոց է կիրառվել ՀՀ-ից բացակայելու արգելքը։

1․ Գործի դատավարական նախապատմությունը.
2023 թվականի մայիսի 31-ին, ՀՀ ոստիկանության ՊԾ ԵՔԳ ՎՎԻ բաժանմունքի պետ Ա․Բաբիկյանը զեկուցագիր է ներկայացրել ՀՀ ՆԳՆ ոստիկանության պարեկային ծառայության Երևան քաղաքի գնդի հրամանատար Ա․Իսախանյանին, համաձայն որի՝ «(…) ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի 2-րդ վաշտի կրտսեր պարեկ Արմեն Հայրապետյանը Հովհաննես Արամայիսի Նիկողոսյանի (ծնված` 1954 թվականի սեպտեմբերի 30-ին, ք.Մասիս, Ռանչպար, Նոր թղմ. 9 փողոց, 4 տնակ, ՀԾՀ՝ 4009540109) նկատմամբ 2023 թվականի մայիսի 28-ին՝ ժամը 08:45-ին, կազմել է թիվ 8180255345 արձանագրություն, քանի որ վերջինս 2023 թվականի մայիսի 28-ին՝ ժամը 08:00-ին, Երևան քաղաքի Արշակունյաց պողոտայում, «ՕՊԵԼ» մակնիշի 37 MP 634 հաշվառման համարանիշի տրանսպորտային միջոցը վարել է տրանսպորտային միջոցներ վարելու իրավունքը զրկված։
(…)
Ներկայացնում եմ թիվ 8180255345 արձանագրությունը, կից նյութերը և ՀՀ ՆԳՆ Ոստիկանության ՃՈ էլեկտրոնային ռեգիստրի հաշվառման շտեմարանից Հովհաննես Արամայիսի Նիկողոսյանի RF թիվ 871649 վարորդական իրավունքի վկայականի քաղվածքի պատճենը:
Միաժամանակ տեղեկացնում եմ, որ Հովհաննես Արամայիսի Նիկողոսյանը վարորդական իրավունքի վկայականից զրկվել է՝ 2023 թվականի հունվարի 19-ին ՀՀ ՆԳՆ ոստիկանության ՃՈ-ի ՏՄՀԻՎԳՔ բաժնի կողմից կայացված թիվ 2315745463, 2315744214 որոշումներով մեկ տարի ժամկետով: (…)»:
Դեպքի առթիվ՝ 2023 թվականի նոյեմբերի 16-ին ՀՀ քննչական կոմիտեի Երևան քաղաքի ճանապարհատրանսպորտային հանցագործությունների քննության բաժնում ՀՀ քրեական օրենսգրքի 344-րդ հոդվածի 1-ին մասի հատկանիշներով նախաձեռնվել է թիվ 60-0852-23 քրեական վարույթը:
2025 թվականի մարտի 21-ին, ՀՀ դատախազության Երևան քաղաքի Շենգավիթ վարչական շրջանի դատախազության դատախազ Ա․Բադալյանի որոշմամբ թիվ 60-0852-23 քրեական վարույթով Հովհաննես Արամայիսի Նիկողոսյանի նկատմամբ հանրային քրեական հետապնդում է հարուցվել ՀՀ քրեական օրենսգրքի 344-րդ հոդվածի 1-ին մասով:
2025 թվականի մարտի 21-ին Հովհաննես Արամայիսի Նիկողոսյանի նկատմամբ որպես խափանման միջոց է կիրառվել բացակայելու արգելքը:
2025 թվականի ապրիլի 7-ին ՀՀ դատախազության Երևան քաղաքի Շենգավիթ վարչական շրջանի դատախազությունից Դատարան է ստացվել թիվ ԵԴ1/1230/01/25 (նախաքննական համարը՝ 60085223) քրեական գործն ըստ մեղադրանքի Հովհաննես Արամայիսի Նիկողոսյանի՝ ՀՀ քրեական օրենսգրքի 344-րդ հոդվածի 1-ին մասով։
Նույն օրը քրեական գործն էլեկտրոնային եղանակով մակագրվել, իսկ 2025 թվականի ապրիլի 8-ին հանձնվել է Դատարանի դատավոր Գ․Աբելյանի աշխատակազմին։
2025 թվականի ապրիլի 11-ին Դատարանի դատավոր Գ․Աբելյանի կողմից որոշում է կայացվել թիվ ԵԴ1/1230/01/25 քրեական գործով վարույթը ստանձնելու և նախնական դատալսումներ նշանակելու մասին:

2. Մեղադրանքի փաստական նկարագրությունը.
Հովհաննես Արամայիսի Նիկողոսյանին մեղադրանք է ներկայացվել ՀՀ քրեական օրենսգրքի 344-րդ հոդվածի 1-ին մասով՝ այն բանի համար, որ. «(…) [Ն]ա, 1 տարի ժամկետով զրկված լինելով տրանսպորտային միջոցներ վարելու իրավունքից 2023 թվականի մայիսի 28-ին վարել է տրանսպորտային միջոց։
Այսպես.
Հովհաննես Նիկողոսյանը, 2023 թվականի հունվարի 10-ի թիվ 2315745463 որոշմամբ տրանսպորտային միջոցներ վարելու իրավունքից 1 տարի ժամկետով՝ 2023 թվականի հունվարի 19-ից մինչև 2024 թվականի հունվարի 19-ը զրկված վիճակում, այդ մասին պատշաճ ծանուցված լինելով, 2023 թվականի մայիսի 28-ին՝ ժամը 08:00-ի սահմաններում, Երևան քաղաքի Արշակունյաց պողոտայում վարել է «Օպել» մակնիշի 37 MP 634 հաշվառման համարանիշի տրանսպորտային միջոց, որը հայտնաբերվել է ՀՀ ՆԳՆ ոստիկանության պարեկային ծառայության պարեկի կողմից:
Այսինքն՝ Հովհաննես Արամայիսի Նիկողոսյանի արարքում առկա են ՀՀ քրեական օրենսգրքի 344-րդ հոդվածի 1-ին մասով նախատեսված հանցանքի կատարումը վկայող փաստեր: (…)»։

3. Արագացված վարույթը և լրացուցիչ դատալսումների ընթացքում հետազոտված թույլատրելի ապացույցները.
Նախնական դատալսումների ընթացքում մեղադրյալ Հովհաննես Արամայիսի Նիկողոսյանը ներկայացրեց արագացված վարույթ կիրառելու մասին միջնորդություն՝ հայտնելով, որ իրեն պարզ է ներկայացված մեղադրանքը, ամբողջությամբ համաձայն է ներկայացված մեղադրանքի հետ, միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպան Է․Աղաջանյանի հետ, գիտակցում է արագացված վարույթ կիրառելու հետևանքները և պնդում է ներկայացված միջնորդությունը:
Հանրային մեղադրող Ա․Բադալյանը չառարկեց արագացված վարույթ կիրառելու դեմ:
Դատարանը, համոզվելով, որ առկա է ՀՀ քրեական դատավարության օրենսգրքի 464.1-ին հոդվածի 1-ին մասով նախատեսված հիմքը, բացակայում են ՀՀ քրեական դատավարության օրենսգրքի 464.1-ին հոդվածի 2-րդ մասով նախատեսված` արագացված վարույթի կիրառումը բացառող հանգամանքները, բավարարեց արագացված վարույթ կիրառելու մասին միջնորդությունը և որոշում կայացրեց լրացուցիչ դատալսումներ անցկացնելու մասին:
Լրացուցիչ դատալսումների ընթացքում հետազոտվել են հետևյալ թույլատրելի ապացույցները.
- մեղադրյալ Հովհաննես Արամայիսի Նիկողոսյանի դատվածության վերաբերյալ տեղեկանքը , համաձայն որի՝ «(․․․) 1. ՆԻԿՈՂՈՍՅԱՆ ՀՈՎՀԱՆՆԵՍ ԱՐԱՄԱՅԻՍԻ
Ծննդյան ամսաթիվը` 30/09/1954, Ծննդավայրը` ԵՐԵՎԱՆ
Համարը՝ 08139322
1) Նախաքննության վերաբերյալ տեղեկատվություն
Նախաձեռնող մարմինը` ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉ. ՇՐՋ. ՔՆՆՉԱԿԱՆ ԲԱԺԻՆ,ամս` 01/07/2022
Մեղադրական հոդված՝ ՀՀ ՔՐ. ՕՐ. (2001Թ.) h 344 մ 1
ՈՒՂԱՐԿՎԵԼ Է ԴԱՏԱՐԱՆ
2) Դատապարտման վերաբերյալ տեղեկատվություն
Դատապարտող մարմինը` ԵՐԵՎԱՆ ՔԱՂԱՔԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆ,ամս` 22/12/2022 ՀՀ ՔՐ. ՕՐ. (2021Թ.) h 344 մ 1

Հիմնական պատիժը՝ ՏՈՒԳԱՆՔ 300.000 դրամ, ՏՈՒԳԱՆՔԻ ՎՃԱՐՄԱՆ ՏԱՐԱԺԱՄԿԵՏՈՒՄ 1 տարի ԱՐԱՐԱՏԻ ԵՎ ՎԱՅՈՑ ՁՈՐԻ ՄԱՐԶ. ԸՆԴՀ. ԻՐԱՎ.ԴԱՏԱՐԱՆ ամս՝ 08/08/2023 հիմքը՝ ՓՈՓՈԽՈՒՄ
ՀՀ ՔՐ. ՕՐ. (2021Թ.) h 344 մ 1
Հիմնական պատիժը՝ ՀԱՆՐԱՅԻՆ ԱՇԽԱՏԱՆՔՆԵՐ 96 ժամ
3) Պատժի կրման վայրի վերաբերյալ տեղեկատվություն չկա
4) Պատժից ազատման վերաբերյալ տեղեկատվություն
02.11.2023Թ. ՀԱՆՐԱՅԻՆ ԱՇԽԱՏԱՆՔՆԵՐԸ ԿԱՏԱՐՎԵԼ ԵՆ (…)»:,
- 2025 թվականի մարտի 28-ի մեղադրյալի հարցաքննության մասին արձանագրությունը, համաձայն որի՝ Հովհաննես Արամայիսի Նիկողոսյանն ընդունել է իրեն առաջադրված մեղադրանքը ,
- 2025 թվականի մայիսի 22-ին, ՀՀ ԱՆ պրոբացիայի ծառայությունից ստացված գրությունը, որի համաձայն՝ «(…) Արարատի մարզային մարմնի թղթային արխիվում առկա անձնական գործերի ուսումնասիրությամբ վեր է հանվել, որ թիվ ԵԴ1/1792/01/22 գործով Երևան քաղաքի առաջին ատյանի ընդհանուր իրավասության քրեական դատարանի 2022 թվականի դեկտեմբերի 22-ի դատավճռով Հովհաննես Արամայիսի Նիկողոսյանի նկատմամբ նշանակված 300000 (երեք հարյուր հազար) ՀՀ դրամ տուգանք պատիժը թիվ ԱՎԴ2/0016/15/23 դատական վարույթով 2023 թվականի օգոստոսի 8-ի որոշմամբ փոխարինվել է հանրային աշխատանքներով՝ 96 (իննսունվեց) ժամ տևողությամբ։
Պատժի կատարման վարույթով պրոբացիայի շահառու Հովհաննես Նիկողոսյանի անձնական գործի ուսումնասիրությամբ վեր է հանվել 2023 թվականի նոյեմբերի 2-ին ուղարկված թիվ Ն/29.3.2.2/39984-2023 գրությունը, համաձայն որի՝ շահառուն ամբողջությամբ կատարել է հանրային աշխատանքները և 2023 թվականի նոյեմբերի 2-ին հանվել է Պրոբացիայի ծառայության հաշվառումից: (…)» ։
-Երևան քաղաքի առաջին ատյանի ընդհանուր իրավասության քրեական դատարանի 2022 թվականի դեկտեմբերի 22-ի թիվ ԵԴ1/1792/01/22 դատավճիռը, որով Հովհաննես Արամայիսի Նիկողոսյան մեղավոր է ճանաչվել 2022 թվականի մայիսի 26-ի կատարված արարքի համար և դատապարտվել տուգանքի 300,000 ՀՀ դրամի չափով։ Հիշյալ դատավճիռն օրինական ուժի մեջ է մտել 2023 թվականի փետրվարի 20-ին։
- Հովհաննես Արամայիսի Նիկողոսյանի հայտարարությունն առ այն, որ ընդունում է մեղավորությունը, զղջում կատարածի համար և համաձայն է իր նկատմամբ հանրային աշխատանքներն որպես պատիժ նշանակելու հետ։

4.Դատարանի փաստական վերլուծությունները և հաստատված կամ հերքված փաստական հանգամանքները.
Լրացուցիչ դատալսումների ընթացքում հետազոտված թույլատրելի ապացույցները, ինչպես նաև գործով կազմված մեղադրական եզրակացության մեջ պարունակվող տվյալները վերլուծելու և գնահատելու արդյունքում Դատարանը հաստատված է համարում սույն քրեական գործի լուծման համար նշանակություն ունեցող հետևյալ փաստական հանգամանքները.
- Հովհաննես Արամայիսի Նիկողոսյանն ունի միջին-մասնագիտական կրթություն
- Հովհաննես Արամայիսի Նիկողոսյանը նախկինում դատապարտված է՝ դատվածությունը մարված, սակայն սույն գործով արարքը կատարելիս համարվել է դատվածություն ունեցող անձ,
- Հովհաննես Արամայիսի Նիկողոսյանը կենսաթոշակառու է,
- Հովհաննես Արամայիսի Նիկողոսյանը ներկայացված մեղադրանքում մեղավոր է ճանաչել,
- Հովհաննես Արամայիսի Նիկողոսյանը համաձայն է, որ իր նկատմամբ որպես պատիժ հանրային աշխատանքները նշանակելուն։

5. Դատարանի իրավական վերլուծությունները, հետևությունները և որոշումները.
Արագացված վարույթ կիրառելու պայմաններում Դատարանն ապացուցված է համարում մեղադրյալ Հովհաննես Արամայիսի Նիկողոսյանի վերագրվող փաստական հանգամանքները (արարքը), այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, ինչպես նաև գտնում է, որ մեղադրյալի արարքի նկատմամբ պետք է կիրառվի ՀՀ քրեական օրենսգրքի 344-րդ հոդվածի 1-ին մասը։
Դատարանի կողմից հաստատված փաստական հանգամանքների հիման վրա՝ Դատարանը գտնում է, որ Հովհաննես Արամայիսի Նիկողոսյանի անձը բնութագրող հանգամանք է միջին-մասնագիտական կրթություն ունենալը։
Դատարանը, ղեկավարվելով ՀՀ քրեական օրենսգրքի (այսուհետ՝ նաև Օրենսգիրք) 70-րդ հոդվածով, գտնում է, որ Հովհաննես Արամայիսի Նիկողոսյանի պատասխանատվությունն ու պատիժը մեղմացնող հանգամանքներ պետք է դիտել հանցանք կատարելու կամ պատիժ նշանակելու պահին հանցավորի 65 տարին լրացած լինելը և ներկայացված մեղադրանքում իրեն լիովին մեղավոր ճանաչելն ու կատարածի համար զղջալը ։
Դատարանը, միաժամանակ արձանագրում է, որ սույն դեպքում առկա է Հովհաննես Արամայիսի Նիկողոսյանի պատասխանատվությունն ու պատիժը ծանրացնող՝ Օրենսգրքի 71-րդ հոդվածի 1-ին մաս 1-ին կետով նախատեսված հանգամանքը, այն է՝ հանցանքը դատվածություն ունեցող անձի կողմից կատարելը։ Դատարանի նման հետևությունը պայմանավորված է այն հանգամանքով, որ սույն գործով մեղադրյալն իրեն մեղսագրված արարքը կատարել է 2023 թվականի մայիսի 28-ին, իսկ այդ արարքին նախորդող արարքի վերաբերյալ Դատարանի 2022 թվականի դեկտեմբերի 22-ի թիվ ԵԴ1/1792/01/22 դատավճիռն օրինական ուժի մեջ է մտել 2023 թվականի փետրվարի 20-ին, ընդ որում սկզբնական դատավճռով նշանակված պատիժ տուգանքը փոխարինվել է հանրային աշխատանքներով, որը վերջինս փաստացի կրել է 2023 թվականի նոյեմբերի 2-ին, հետևաբար, ղեկավարվելով Օրենսգրքի 93-րդ հոդվածի կարգավորումներով, պետք է արձանագրել, որ մեղադրյալն արարքը կատարել է մինչև դատվածության մարվելը։
Դատարանը գտնում է, որ կատարած հանցանքի համար մեղադրյալ Հովհաննես Արամայիսի Նիկողոսյանը ենթակա է պատժի։
Պատիժ նշանակելու հարցի համատեքստում Դատարանը հարկ է համարում արձանագրել հետևյալը՝
Օրենսգրքի 55-րդ հոդվածի համաձայն՝ «1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:»։
Օրենսգրքի 69-րդ հոդվածի համաձայն՝ «1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները»։
Վճռաբեկ դատարանը մշտապես ընդգծել է, որ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ։ Քրեական օրենքը համընդհանուր բնույթ ունի, իսկ արարքը և հանցավորի անձը կոնկրետ են։ Հետևաբար, կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի , հանցավորի անձի, պատիժը մեղմացնող և ծանրացնող հանգամանքների վերլուծության հիման վրա` ելնելով պատժի նպատակների իրացումն ապահովելու անհրաժեշտությունից ։
Մասնավորապես, Վճռաբեկ դատարանն ընդգծել է, որ հանցանքի հանրային վտանգավորության բնույթն ու աստիճանը ճիշտ գնահատելու և հանցավորի նկատմամբ համաչափ պատիժ նշանակելու համար անհրաժեշտ է, ի թիվս այլնի, հատուկ ուշադրություն դարձնել հանցավոր վարքագծի դրսևորման եղանակին, հանցանքի կատարման գործիքին և հանցագործության իրադրությանը, պատճառված վնասի բնույթին, արարքի նկատմամբ անձի հոգեբանական վերաբերմունքին, հանցագործության նպատակին և շարժառիթին: Այս առումով Վճռաբեկ դատարանը փաստել է, որ անձի արարքում հանցակազմը որակյալ դարձնող մեկից ավելի հանգամանքների առկայությունը կարող է վկայել ինչպես հանցագործության, այնպես էլ հանցավորի անձի հանրային բարձր վտանգավորության մասին, հետևաբար այն պետք է համաչափ գնահատականի արժանանա դատարանի կողմից և հաշվի առնվի պատիժ նշանակելիս :
Դատարանը, հաշվի առնելով Հովհաննես Արամայիսի Նիկողոսյանի կատարած հանցանքի հանգամանքները, նրա անձը բնութագրող տվյալները, պատասխանա¬տվու-թյունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքը, Օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ Օրենսգրքի 344-րդ հոդվածի 1-ին մասի սանկցիան այլընտրանքային է և հնարավորություն է տալիս Դատարանին, ելնելով կոնկրետ հանցագործության հանրային վտանգավորության բնույթից և աստիճանից, հանցանքը կատարած անձի նկատմամբ նշանակել արդարացի պատիժ՝ ընտրելով հոդվածի սանկցիայով նախատեսված պատժատեսակներից որևէ մեկը, գտնում է, որ Օրենսգրքի 77-րդ հոդվածի վերաբերելի կանոնների կիրառմամբ և Օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար Օրենսգրքի 344-րդ հոդվածի 1-ին մասը մասով նախատեսված հանցանքի կատարման համար նրա նկատմամբ հիմնական պատիժ պետք է նշանակել հանրային աշխատանքները՝ 70 (յոթանասուն) ժամ տևողությամբ: Դատարանի հետևությունը պայմանավորված է նաև այն հանգամանքով, որ մեղադրյալ Հովհաննես Արամայիսի Նիկողոսյանը համաձայն է իր նկատմամբ նշյալ պատժատեսակը նշանակելու համար։
Դատարանը միաժամանակ գտնում է, որ կատարած հանցանքի համար Հովհաննես Արամայիսի Նիկողոսյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
Դատարանը գտնում է, որ մեղադրյալ Հովհաննես Արամայիսի Նիկողոսյանը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն։
Դատարանն արձանագրում է, որ ՀՀ քրեական դատավարության օրենսգրքի 348-րդ հոդվածի 1-ին մասի 11-13-րդ կետերով նշված հարցերին անդրադառնալու անհրաժեշտությունը սույն քրեական գործով բացակայում է։
Դատարանը գտնում է, որ Հովհաննես Արամայիսի Նիկողոսյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ` մինչև դատավճռի օրինական ուժի մեջ մտնելը, քանի որ մեղադրական դատավճիռ կայացնելու և հանրային աշխատանքների ձևով պատիժ նշանակելու պայմաններում առկա է ողջամիտ ենթադրություն առ այն, որ մեղադրյալը, օգտագործելով անձը հաստատող փաստաթուղթ, կարող է հեռանալ Հայաստանի Հանրապետությունից՝ այդպիսով դիմելով փախուստի կամ չկատարելով իր վրա դրված պարտականությունները, իսկ բացակայելու արգելքի կիրառումը բավարար է մեղադրյալի փախուստը կանխելու և նրա վրա դրված պարտականությունների կատարումն ապահովելու համար։
Դատարանն արձանագրում է նաև, որ դատավճիռն օրինական ուժի մեջ մտնելուց հետո՝ արտավարութային փաստաթղթերը պետք է պահել քրեական գործի նյութերում դրանք պահելու ամբողջ ընթացքում։
Դատարանը գտնում է, որ վարութային ծախսերի հարցը պետք է համարել լուծված, քանի որ արագացված վարույթ կիրառելու պայմաններում ՀՀ քրեական դատավարության օրենսգրքի 167-րդ հոդվածի 1-ին մաuով նախատեսված վարութային ծախսերը մեղադրյալ Հովհաննես Արամայիսի Նիկողոսյանից ենթակա չեն բռնագանձման՝ համաձայն ՀՀ քրեական դատավարության օրենսգրքի 464.4-րդ հոդվածի 3-րդ մասի, բացի այդ սույն քրեական գործով այդպիսիք առկա չեն։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 99-րդ, 276-րդ, 347-350-րդ, 464.4-րդ և 464.5-րդ հոդվածներով` Դատարանը

ՎՃՌԵՑ

1. Հովհաննես Արամայիսի Նիկողոսյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով նախատեսված հանցանքի կատարման մեջ և նրա նկատմամբ պատիժ նշանակել հանրային աշխատանքներ՝ 70 (յոթանասուն) ժամ տևողությամբ։
2. Հովհաննես Արամայիսի Նիկողոսյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը։
3. Դատավճռի օրինական ուժի մեջ մտնելուց հետո արտավարութային փաստաթղթերը պահել քրեական գործի նյութերում դրանք պահելու ամբողջ ընթացքում։
4. Վարութային ծախսերի հարցը համարել լուծված:
5. Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում, սակայն այն չի կարող բողոքարկվել ՀՀ քրեական դատավարության օրենսգրքի 373-րդ հոդվածով և 375-րդ հոդվածի 1-3-րդ մասերով նախատեսված հիմքերով:


ԴԱՏԱՎՈՐ՝ Գ․ԱԲԵԼՅԱՆ