ԵԴ1/1167/01/25

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՌԱՋԻՆ
ԱՏՅԱՆԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

2025թ․ հունիսի <<17>> ք․Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)

Նախագահող դատավոր Ա.Հովհաննիսյան
դատական նիստերի քարտուղար Մ․Հովհաննիսյան
հանրային մեղադրող Մ.Սահակյան
պաշտպան Տ.Գրիգորյան

դռնբաց դատական նիստում քննեց քրեական վարույթն ըստ մեղադրանքի՝ Վահան Աշոտի Մախմուրյանի՝ ծնված 1981 թվականի հոկտեմբերի 14-ին ազգությամբ հայ, ՀՀ քաղաքացի, նախկինում չդատապարտված, ամուսնացած, չի աշխատում, հաշվառված՝ Երևան քաղաքի Նոր-Արեշ 22-րդ փողոցի 45-րդ տանը, բնակվող՝ Երևան քաղաքի Նոր-Արեշ 2-րդ փողոցի 18-րդ տանը: Հանրային քրեական հետապնդում է հարուցվել ՀՀ քրեական օրենսգրքի 396-րդ հոդվածի 2-րդ մասով (2 դրվագ)․ որպես խափանման միջոց է կիրառված տնային կալանքը:
Վարութային նախապատմությունը․
2024 թվականի դեկտեմբերի 22-ին Վահան Աշոտի Մախմուրյանը ձերբակալվել է:
2024 թվականի դեկտեմբերի 22-ի ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնի քննիչ Մ.Գաբրիելյանի արձանագրությամբ ՀՀ քրեական օրենսգրքի 393-րդ հոդվածի 1-ին մասի և 396-րդ հոդվածի 2-րդ մասի հատկանիշներով նախաձեռնվել է թիվ 12824124 քրեական վարույթը:
2024 թվականի դեկտեմբերի 23-ի ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնի քննիչ Մ.Գաբրիելյանի որոշմամբ թիվ 12166924 քրեական վարույթը միացվել է թիվ 12824124 քրեական վարույթին և նախաքննությունը շարունակվել է 12824124 համարով:
2024 թվականի դեկտեմբերի 23-ի ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնի պետի տեղակալ Ռ.Մախմուդյանի որոշմամբ թիվ 12824124 քրեական վարույթով նախաքննության կատարումը հանձնարարվել է քննչական խմբին:
2024 թվականի դեկտեմբերի 23-ի ՀՀ դատախազության Երևան քաղաքի Էրեբունի և Նուբարաշեն վարչական շրջանների դատախազության դատախազ Մ.Սահակյանի որոշմամբ Վահան Աշոտի Մախմուրյանի նկատմամբ հանրային քրեական հետապնդում է հարուցվել այն հանցանքները կատարելու համար, որ նա առանց իրացնելու նպատակի իր մոտ 2024 թվականի սեպտեմբերի 12-ին ապօրինի պահել է խոշոր չափերով՝ 0.36 գրամ հաստատուն քաշով <<a-PVP>> տեսակի թմրամիջոց, իսկ 2024 թվականի դեկտեմբերի 22-ին ապօրինի՝ առանց իրացնելու նպատակի, իր մոտ պահել է խոշոր չափերով՝ 0.41 գրամ հաստատուն քաշով <<a-PVP>> տեսակի թմրամիջոց։
Այսպես. Վահան Մախմուրյանը խախտելով <<Թմրամիջոցների և հոգեմետ (հոգեներգործուն) նյութերի մասին>> ՀՀ օրենքի 11-րդ հոդվածի 2-րդ կետի, ՀՀ Կառավարության 2010 թվականի մարտի 18-ի թիվ 270-Ն որոշման պահանջները, այն է՝ չունենալով բժշկական նպատակներով կամ բժշկի նշանակմամբ թմրամիջոցների և հոգեմետ (հոգեներգործուն) նյութերի շրջանառություն իրականացնելու՝ թմրամիջոց ձեռք բերելու և պահելու թույլտվություն, 2024 թվականի սեպտեմբեր ամսին <<Տելեգրամ>> հեռահաղորդակցման հավելվածի միջոցով կապ է հաստատել թմրանյութերի վաճառքով զբաղվող <<Adjika>> կյաքէջի օգտատիրոջ հետ, որից առանց իրացնելու նպատակի ապօրինի ձեռք է բերել և իր անձնական օգտագործման համար իր մոտ՝ Երևան քաղաքի Ջրվեժի խճուղի 9-րդ հասցեում, ապօրինի պահել է ՀՀ կառավարության <<Թմրամիջոցների և հոգեմետ (հոգեներգործուն) նյութերի չափերը սահմանելու մասին>> 2018 թվականի հունիսի 27-ի թիվ 707-Ն որոշման հավելված N 1-ով սահմանված թմրամիջոցների ցանկի 267-րդ կետով նախատեսված խոշոր չափերով՝ 0.36 գրամ քաշով <<a-PVP>> տեսակի թմրամիջոց, որը 2024 թվականի սեպտեմբերի 13-ին ՀՀ ՆԳՆ ոստիկանության Էրեբունու բաժնում հայտնաբերվել է ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի 2-րդ վաշտի պարեկ Սերգեյ Ռուբենյանի կողմից՝ նրա անձնական խուզարկության ընթացքում։
Այսինքն՝ Վահան Մախմուրյանին մեղսագրվում է հանցավոր արարքի կատարում, որը նախատեսված է ՀՀ քրեական օրենսգրքի 396-րդ հոդվածի 2-րդ մասով:
Բացի այդ, Վահան Մախմուրյանը խախտելով <<Թմրամիջոցների և հոգեմետ (հոգեներգործուն) նյութերի մասին>> ՀՀ օրենքի 11-րդ հոդվածի 2-րդ կետի, ՀՀ Կառավարության 2010 թվականի մարտի 18-ի թիվ 270-Ն որոշման պահանջները, այն է՝ չունենալով բժշկական նպատակներով կամ բժշկի նշանակմամբ թմրամիջոցների և հոգեմետ /հոգեներգործուն/ նյութերի շրջանառություն իրականացնելու՝ թմրամիջոց ձեռք բերելու և պահելու թույլտվություն, 2024 թվականի դեկտեմբերի 22-ին քննությամբ չպարզված ժամանակահատվածում և հանգամանքներում, առանց իրացնելու նպատակի ապօրինի ձեռք է բերել և իր անձնական օգտագործման համար իր մոտ՝ Երևան քաղաքի Արցախի պողոտա 63/3 հասցեում, ապօրինի պահել է ՀՀ կառավարության <<Թմրամիջոցների և հոգեմետ (հոգեներգործուն) նյութերի չափերը սահմանելու մասին>> 2018 թվականի հունիսի 27-ի թիվ 707-Ն որոշման հավելված N 1-ով սահմանված թմրամիջոցների ցանկի 267-րդ կետով նախատեսված խոշոր չափերով՝ 0.41 գրամ քաշով <<a-PVP>> տեսակի թմրամիջոց, որը 2024 թվականի դեկտեմբերի 22-ին ՀՀ ՆԳՆ ոստիկանության Էրեբունու բաժնում հայտնաբերվել է ՀՀ ՆԳՆ ոստիկանության պարեկային ծառայության ԵՔԴ 2-րդ գումարտակի 3-րդ վաշտի պարեկ Ռոման Գևորգյանի կողմից՝ նրա անձնական խուզարկության ընթացքում:
Այսինքն՝ Վահան Մախմուրյանին մեղսագրվում է հանցավոր արարքի կատարում, որը նախատեսված է ՀՀ քրեական օրենսգրքի 396-րդ հոդվածի 2-րդ մասով։
Այպիսով, Վահան Աշոտի Մախմուրյանին մեղսագրվում է հանցավոր արարքների կատարում, նախատեսված է ՀՀ քրեական օրենսգրքի 396-րդ հոդվածի 2-րդ մասով (երկու դրվագ):
2024 թվականի դեկտեմբերի 24-ի Երևան քաղաքի առաջին ատյանի ընդհանուր իրավասության քրեական դատարանի որոշմամբ Վահան Աշոտի Մախմուրյանի նկատմամբ որպես խափանման միջոց է կիրառվել տնային կալանքը՝ 2 (երկու) ամիս ժամկետով:
2025 թվականի փետրվարի 19-ի Երևան քաղաքի առաջին ատյանի ընդհանուր իրավասության քրեական դատարանի որոշմամբ Վահան Աշոտի Մախմուրյանի նկատմամբ կիրառված խափանման միջոց տնային կալանքի ժամկետը երկարաձգվել է 2 (երկու) ամիս ժամկետով:
2025 թվականի մարտի 11-ի ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնի քննիչ Մ.Գաբրիելյանի որոշմամբ 0,41 գրամ քաշով փոշենման զանգվածը՝ <<a-PVP>> կրճատ անվանմամբ թմրամիջոցը իրեղեն ապացույց է ճանաչվել:
2025 թվականի մարտի 24-ի ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնի ավագ քննիչ Մ.Գաբրիելյանի որոշմամբ թիվ 12824124 քրեական վարույթից ՀՀ քրեական օրենսգրքի 393-րդ հոդվածի 1-ին մասով (2 դրվագ) անջատվել է թիվ 12148325 քրեական վարույթը:
2025 թվականի ապրիլի 4-ին թիվ 12824124 քրեական վարույթը մեղադրական եզրակացությամբ ուղարկվել է Երևան քաղաքի առաջին ատյանի ընդհանուր իրավասության քրեական դատարան:
2025 թվականի ապրիլի 15-ի Դատարանի որոշմամբ Վահան Մախմուրյանի նկատմամբ կիրառված այլընտրանքային խափանման միջոց տնային կալանքի ժամկետը երկարաձգվել է երկու ամիս ժամկետով:
Արագացված դատական քննություն.
Նախնական դատալսումների ընթացքում պաշտպան Տ.Գրիգորյանը միջնորդեց դատաքննությունն անցկացնել արագացված վարույթի կարգով՝ նկատի ունենալով, որ սույն վարույթի շրջանակում Վահան Մախմուրյանն իր մեղքն ընդունել է։
Հանրային մեղադրող Մ.Սահակյանը հրապարակեց մեղադրանքի փաստական հիմքն ու արարքին տրվող իրավական գնահատականը՝ միաժամանակ նշելով, որ չի առարկում արագացված կարգով վարույթի կիրառման դեմ:
Մեղադրյալ Վահան Մախմուրյանը հայտնեց, որ իրեն պարզ է առաջադրված մեղադրանքը, դրա հետ համաձայն է: Պնդում է ներկայացված միջնորդությունը, այն ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով վարույթ անցկացնելու հետևանքները:
Դատարանը, համոզվելով, որ առկա է ՀՀ քրեական դատավարության օրենսգրքի 464.1-ին հոդվածի 1-ին մասով նախատեսված հիմքը և բացակայում են սույն օրենսգրքի 464.1-ին հոդվածի 2-րդ մասով նախատեսված` արագացված վարույթի կիրառումը բացառող հանգամանքները, որոշում է կայացրել արագացված վարույթ կիրառելու միջնորդությունը բավարարելու մասին։
Հետևաբար, Դատարանը գտնում է, որ Վահան Մախմուրյանը կատարել է արարքներ՝ նախատեսված ՀՀ քրեական օրենսգրքի 396-րդ հոդվածի 2-րդ մասով (2 դրվագ):
Դատարանի իրավական վերլուծությունները.
Դատարանը, ուսումնասիրելով Վահան Աշոտի Մախմուրյանի պատասխանատվությունը և պատիժը մեղմացնող ու ծանրացնող հանգամանքները, վերասոցիալականացման և իրավահպատակ վարքագծի ձևավորման համար նշանակություն ունեցող տվյալները, եկավ հետևյալ եզրահանգման.
Վահան Աշոտի Մախմուրյանի անձը դրականորեն բնութագրող հանգամանք է նախկինում արատավորված՝ դատապարտված չլինելը:
Դատարանը Վահան Աշոտի Մախմուրյանի քրեական պատասխանատվություն ու պատիժը մեղմացնող հանգամանք է դիտում մեղքն ընդունելը և կատարածի համար զղջալը:
Ընդ որում, սույն մեղմացնող հանգամանքը վերագրվում է մեղսագրվող երկու դրվագներին:
Միաժամանակ, պետք է արձանագրել, որ Վահան Աշոտի Մախմուրյանի պատասխանատվությունն ու պատիժը ծանրացնող հանգամանքներ առկա չեն։
Կատարված արարքների համար մեղադրյալ Վահան Աշոտի Մախմուրյանը ենթակա է քրեական պատասխանատվության և պատժի։
ՀՀ վճռաբեկ դատարանը 2010 թվականի օգոստոսի 27-ի թիվ ՍԴ/0293/01/09 որոշմամբ դիրքորոշում է հայտնել, որ պատիժը համարվում է արդարացի, եթե դատարանը ճիշտ է գնահատում գործի բոլոր հանգամանքները, անձը բնութագրող տվյալները և, քրեական օրենքով նախատեսված պահանջներից ելնելով, հանցագործության մեջ մեղավոր անձի նկատմամբ նշանակում է այնպիսի պատիժ, որն անհրաժեշտ է և բավարար է այդ անձին ուղղելու և նրա կողմից նոր հանցանքի կատարումը կանխելու համար: Պատժի տեսակի և չափի որոշման ժամանակ դատարանը պետք է հաշվի առնի կատարված հանցագործության՝ հանրության համար վտանգավորության աստիճանն ու բնույթը, հանցավորի անձը բնութագրող տվյալները, այդ թվում՝ նրա պատասխանատվությունը մեղմացնող և (կամ) ծանրացնող հանգամանքները:
Դատարանը, հաշվի առնելով Վահան Աշոտի Մախմուրյանի կատարած արարքների բնույթը և հանրային վտանգավորության աստիճանը, մասնավորապես՝ այն, որ վերջինի կատարած հանցանքները հանդիսանում են միջին ծանրության հանցագործություններ, այդ թվում՝ նրա գործողությունների վտանգավորության աստիճանը, անձը բնութագրող, պատասխանատվությունն ու պատիժը մեղմացնող հանգամանքները, ծանրացնող հանգամանքների բացակայությունը, ինչպես նաև այն, որ մեղադրյալի կատարած արարքների համար քրեական օրենսգրքի համապատասխան հոդվածի սանկցիայով նախատեսված է պատիժ նաև հանրային աշխատանքների ձևով, գտնում է՝ Վահան Աշոտի Մախմուրյանի նկատմամբ 396-րդ հոդվածի 2-րդ մասով (յուրաքանչյուր դրվագով) պատիժ պետք է նշանակել հանրային աշխատանքներ՝ 200 (երկու հարյուր) ժամ տևողությամբ:
ՀՀ քրեական օրենսգրքի 74-րդ հոդվածի 1-ին և 9-րդ մասերի կիրառմամբ՝ նշանակված պատիժները լրիվ գումարելու միջոցով Վահան Աշոտի Մախմուրյանի նկատմամբ վերջնական պատիժ պետք է նշանակել հանրային աշխատանքներ՝ 270 (երկու հարյուր յոթանասուն) ժամ տևողությամբ:
Ընդ որում՝ հիմք է ընդունվել 270 ժամը, քանի որ հաշվարկի արդյունքում նշանակվող հանրային աշխատանքների տևողությունը գերազանցել է առավելագույն թույլատրելի ժամանակահատվածը՝ կազմելով 400 ժամ, որպիսի պարագայում սահմանվել է ՀՀ քրեական օրենսգրքի ընդհանուր մասով հանրային աշխատանքների համար նախատեսված առավելագույն թույլատրելի ժամանակը:
Ընդ որում, պատժի տեսակն ընտրելիս Դատարանի կողմից կարևորվում է նկատել, որ Վահան Մախմուրյանը որոշակի ժամանակ գտնվելով անազատության մեջ՝ չի աշխատել և անցնող ժամանակահատվածում վերջինը չի կարողացել վճարել անգամ տան էլեկտրաէներգիայի գումարը (այդ մասին տեղեկություն ստացվել է Պրոբացիայի ծառայությունից), որպիսի պայմաններում Դատարանի գնահատմամբ նրա նկատմամբ տուգանք պատժատեսակի նշանակումը կկրի ձևական բնույթ և չի ծառայի քրեական օրենսդրությամբ պատժի առջև դրված նպատակների իրագործմանը:
Այլ կերպ ասած՝ բոլոր դեպքերում, պատժի տեսակն ընտրելիս պետք է առաջանորդվել դրանց փաստացի կատարվելու կանխավարկածով, այլ ոչ թե նշանակել ձևական պատիժ՝ իմանալով, որ միևնույն է կամ մեծ է հավանականությունը, որ այն ի կատար չի ածվելու: Ընդ որում, ՀՀ քրեական օրենսգրքի 59-րդ հոդվածի 7-րդ մասի կարգավորումը ևս խոսում է այն մասին, որ տուգանք նշանակելու հնարավորությունը գնահատելիս պետք է հաշվի առնել մեղադրյալի գույքային դրությունը։
Միևնույն ժամանակ, անդրադառնալով նաև այն հարցին, թե ինչու չի նշանակվում ավելի խիստ պատիժ, մասնավորապես՝ ազատազրկում (պատիժը պայմանականորեն չկիրառելու դեպքում նույնպես), ապա այս դեպքում Դատարանը հաշվի է առնում, որ ի վերջո խոսք է գնում միջին ծանրության հանցագործությունների մասին, իսկ մեղադրյալը նախկինում արատավորված՝ դատապարտված չի եղել, ընդունել է մեղքը և զղջացել կատարվածի համար։
Հաջորդիվ անդրադառնալով Վահան Մախմուրյանի նկատմամբ կիրառված խափանման միջոցի հարցին՝ Դատարանը նկատում է, որ Պրոբացիայի ծառայության կողմից Դատարանին հասցեագրված գրությամբ նշվել է, որ 2025 թվականի ապրիլի 21-ից գրանցվել է <<էլեկտրաէներգիայի անջատում>> խախտման տեսակը, որի պատճառը եղել է էլեկտրաէներգիայի վարձավճարը չմուծելը, ինչի հետևանքով Պրոբացիայի ծառայությունը հնարավորություն չի ունեցել վերահսկողություն իրականացնել խափանման միջոցի նկատմամբ:
Այս կապակցությամբ Դատարանի արձանագրումը կայանում է նրանում, որ չնայած այն հանգամանքին, որ մեղադրյալի նկատմամբ փաստացի էլեկտրոնային հսկողություն իրականացնել հնարավոր չի եղել, սակայն միևնույն է, քրեական գործի նյութերում բացակայում են տվյալներն այն մասին, որ Վահան Մախմուրյանն այդ ժամանակահատվածում բացակայել է տնից կամ այլ կերպ խախտել է խափանման միջոցի պայմանները: Այլ խոսքով՝ տվյալ դեպքում որոշակի օբյեկտիվ կամ սուբյեկտիվ պատճառներից ելնելով թեև մեղադրյալը չի կարողացել վճարել վարձավճարը, սակայն այնուամենայնիվ, Դատարան չեն ստացվել տեղեկություններ առ այն, որ Վահան Մախմուրյանն այդ ամբողջ ժամանակահատվածում խախտել է խափանման միջոցի որևէ պայման: Ընդ որում, հանրային մեղադրողի կողմից ևս այս մասով առարկություն չներկայացվեց:
Ուստի Դատարանը գտնում է, որ Վահան Աշոտի Մախմուրյանի նկատմամբ կիրառված այլընտրանքային խափանման միջոցը՝ տնային կալանքը, պետք է վերացնել և վերջինին անհապաղ ազատ արձակել:
Վահան Աշոտի Մախմուրյանի նկատմամբ որպես այլընտրանքային խափանման միջոց պետք է կիրառել բացակայելու արգելքը, որը դատավճռի օրինական ուժի մեջ մտնելուց հետո ենթակա է վերացման:
Դատավճիռն օրինական ուժի մեջ մտնելուց հետո իրեղեն ապացույց ճանաչված 0,36 գրամ <<a-PVP>> տեսակի թմրամիջոցը, <<a-PVP>> տեսակի թմրամիջոցի հետքեր պարունակող <<zip>> փականով պոլիէթիլենային փաթեթը, <<a-PVP>> տեսակի թմրամիջոցի հետքեր պարունակող 2 ապակյա, 1 պոլիմերային գլանակները և 0,41 գրամ քաշով փոշենման զանգվածը՝ <<a-PVP>> կրճատ անվանմամբ թմրամիջոցը, պետք է կցել ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնում քննվող թիվ 12148325 քրեական վարույթին:
ՀՀ քրեական դատավարության օրենսգրքի 167-րդ հոդվածի 1-ին մաuով նախատեսված վարութային ծախսերը արագացված վարույթ կիրառելու դեպքում, համաձայն նույն օրենսգրքի 464.4-րդ հոդվածի 3-րդ մասի՝ դատապարտված մեղադրյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 167-րդ, 276-րդ, 342-րդ, 347-349-րդ, 353-րդ, 364-րդ հոդվածներով՝ Դատարանը

Վ Ճ Ռ Ե Ց


Վահան Աշոտի Մախմուրյանին մեղավոր ճանաչել ՀՀ քրեական օրենսգրքի 396-րդ հոդվածի 2-րդ մասով՝ 2 դրվագ:
ՀՀ քրեական օրենսգրքի 396-րդ հոդվածի 2-րդ մասով պատիժ նշանակել հանրային աշխատանքներ՝ 200 (երկու հարյուր) ժամ տևողությամբ:
ՀՀ քրեական օրենսգրքի 396-րդ հոդվածի 2-րդ մասով պատիժ նշանակել հանրային աշխատանքներ՝ 200 (երկու հարյուր) ժամ տևողությամբ:
ՀՀ քրեական օրենսգրքի 74-րդ հոդվածի 1-ին և 9-րդ մասերի կիրառմամբ՝ նշանակված պատիժները լրիվ գումարելու միջոցով Վահան Աշոտի Մախմուրյանի նկատմամբ պատիժ նշանակել հանրային աշխատանքներ՝ 270 (երկու հարյուր յոթանասուն) ժամ տևողությամբ:
Իրեղեն ապացույց ճանաչված 0,36 գրամ <<a-PVP>> տեսակի թմրամիջոցը, <<a-PVP>> տեսակի թմրամիջոցի հետքեր պարունակող <<zip>> փականով պոլիէթիլենային փաթեթը, <<a-PVP>> տեսակի թմրամիջոցի հետքեր պարունակող 2 ապակյա, 1 պոլիմերային գլանակները և 0,41 գրամ քաշով փոշենման զանգվածը՝ <<a-PVP>> կրճատ անվանմամբ թմրամիջոցը, դատավճիռն օրինական ուժի մեջ մտնելուց հետո կցել ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնում քննվող թիվ 12148325 քրեական վարույթին:
Վահան Աշոտի Մախմուրյանի նկատմամբ կիրառված խափանման միջոցը՝ տնային կալանքը, վերացնել և վերջինին անհապաղ ազատ արձակել:
Վահան Մախմուրյանի նկատմամբ որպես այլընտրանքային խափանման միջոց կիրառել բացակայելու արգելքը, որը դատավճռի օրինական ուժի մեջ մտնելուց հետո՝ վերացնել:
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 373-րդ հոդվածով և 375-րդ հոդվածի 1-3-րդ մասերով նախատեսված հիմքերով):


ԴԱՏԱՎՈՐ Ա.ՀՈՎՀԱՆՆԻՍՅԱՆ