ԵԴ1/1150/01/25


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«22» Ապրիլի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
համաձայնությամբ տուգանք նշանակելու վարույթով գրավոր ընթացակարգով քննելով Դավիթ Սամվելի Կարապետյանի(1) վերաբերյալ քրեական գործն ըստ մեղադրանքի՝ ՀՀ քրեական օրենսգրքի 457 հոդվածի 1-ին մասով.

Պ Ա Ր Զ Ե Ց

1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ.
Թիվ 16138725 քրեական վարույթով Դավիթ Սամվելի Կարապետյանին ՀՀ քրեական օրենսգրքի 457 հոդվածի 1-ին մասով մեղադրանք է ներկայացվել հետևյալ արարքի համար.
«[Նա] հանդիսանալով Հայաստանի Հանրապետության քաղաքացի և չունենալով ՀՀ վարորդական իրավունքի վկայական, պետական մարմնի կողմից տրվող, իրավունք վերապահող ակնհայտ կեղծ փաստաթուղթ օգտագործելու դիտավորությամբ 2025 թ. մարտի 11-ին՝ ժամը 00:25-ի սահմաններում, Երևան քաղաքի Իսահակ Գասպարյան փողոցում իր կողմից վարվող «ԲՄՎ» մակնիշի «96SD996» հաշվառման համարանիշի ավտոմեքենան ստուգման նպատակով կանգնեցելուց հետո ՀՀ ՆԳՆ ոստիկանության Պարեկային Ծառայության Երևան քաղաքի գնդի 2-րդ գումարտակի 3-րդ վաշտի պարեկ, ոստիկանության կապիտան Ս.Ումրշատյանին է ներկայացրել դեռևս չպարզված ժամանակ և հանգամանքներում՝ ձեռք բերած և անհայտ անձի կողմից գործով չպարզված հանգամանքներում համակարգչային գունավոր բազմացնող տպիչ սարքի միջոցով տպագրված, կեղծ՝ Դավիթ Սամվելի Կարապետյանի անվամբ տրված` «7707072366» համարի ՌԴ վարորդական իրավունքի վկայականը»։
2. ՀԱՄԱՁԱՅՆՈՒԹՅԱՄԲ ՏՈՒԳԱՆՔ ՆՇԱՆԱԿԵԼՈՒ ՎԱՐՈՒՅԹՈՎ ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐԸ ԵՎ ՈՐՈՇՈՒՄՆԵՐԸ.
2.1 Համաձայնությամբ տուգանք նշանակելու վարույթ կիրառելու պայմաններում Դատարանն ապացուցված է համարում մեղադրյալ Դավիթ Սամվելի Կարապետյանին վերագրվող փաստական հանգամանքները (արարքը), այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, սահմանելով, որ մեղադրյալի արարքի նկատմամբ ենթակա է կիրառման ՀՀ քրեական օրենսգրքի 457 հոդվածի 1-ին մասը:
2.2 ՀՀ քրեական օրենսգրքի 59 հոդվածի 3-րդ մասի և 77 հոդվածի 6-րդ մասի կիրառմամբ՝ համաձայնությամբ տուգանք նշանակելու վարույթով Դատարանը մեղադրյալ Դավիթ Սամվելի Կարապետյանի նկատմամբ որպես պատիժ պետք է նշանակի ՀՀ քրեական օրենսգրքի 457 հոդվածի 1-ին մասի սանկցիայով նախատեսված տուգանքի նվազագույն չափը՝ հնգապատիկը։
Հիմք ընդունելով ՀՀ քրեական օրենսգրքի 59 հոդվածի 3-րդ մասը և հաշվի առնելով մեղսագրվող հանցանքն ավարտվելու օրվան նախորդող 12 ամիսների ընթացքում Դավիթ Սամվելի Կարապետյանի միջին ամսական եկամտի վերաբերյալ ստացված տվյալները՝ տուգանքի չափը պետք է հաշվարկել այդ եկամտի 35 տոկոսի՝ 88.017 (ութսուն ութ հազար տասնյոթ) ՀՀ դրամի չափով: (2)
• Այսպիսով, ՀՀ քրեական օրենսգրքի 457 հոդվածի 1-ին մասով նախատեսված հանցանքի կատարման համար Դավիթ Սամվելի Կարապետյանի նկատմամբ որպես պատիժ պետք է նշանակել տուգանք՝ նրա ամսական եկամտի հնգապատիկի՝ 440.085 (չորս հարյուր քառասուն հազար ութսունհինգ) ՀՀ դրամի չափով։
2.3 ՀՀ քրեական դատավարության օրենսգրքի 348 հոդվածի 1-ին մասի 11-13-րդ հարցերին անդրադառնալու անհրաժեշտությունը սույն քրեական գործով բացակայում է։
2.4 Դատավճիռն օրինական ուժի մեջ մտնելուց հետո նախաքննության մարմնի 2025 թվականի մարտի 21-ի որոշմամբ իրեղեն ապացույց ճանաչված «Դավիթ Սամվելի Կարապետյանի անվամբ 7707072356 (դիմային կողմում՝ 7707072366) համարի կեղծ ՌԴ վարորդական վկայականը» պետք է հանձնել թիվ 16144125 քրեական վարույթն իրականացնող մարմնին՝ դրա տնօրինման հարցը այդ վարույթի շրջանակներում լուծելու համար:
2.5 Դավիթ Սամվելի Կարապետյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար։
2.6 Վարութային ծախսերի հարցը պետք է համարել լուծված, քանի որ ՀՀ քրեական դատավարության օրենսգրքի 464.9 հոդվածի 4-րդ մասի համաձայն՝ համաձայնությամբ տուգանք նշանակելու վարույթ կիրառելու դեպքում ՀՀ քրեական դատավարության օրենսգրքի 167 հոդվածի 1-ին մաuով նախատեսված վարութային ծախսերը մեղադրյալից ենթակա չեն բռնագանձման։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 100, 276, 347, 348, 349, 464.9 և 464.10 հոդվածներով՝ Դատարանը

Վ Ճ Ռ Ե Ց

1. Դավիթ Սամվելի Կարապետյանին մեղավոր ճանաչել ՀՀ քրեական օրենսգրքի 457 հոդվածի 1-ին մասով նախատեսված հանցանքը կատարելու մեջ և նրա նկատմամբ պատիժ նշանակել տուգանք՝ իր ամսական եկամտի հնգապատիկի՝ 440.085 (չորս հարյուր քառասուն հազար ութսունհինգ) ՀՀ դրամի չափով։
2. Դատավճիռն օրինական ուժի մեջ մտնելուց հետո նախաքննության մարմնի 2025 թվականի մարտի 21-ի որոշմամբ իրեղեն ապացույց ճանաչված «Դավիթ Սամվելի Կարապետյանի անվամբ 7707072356 (դիմային կողմում՝ 7707072366) համարի կեղծ ՌԴ վարորդական վկայականը» հանձնել թիվ 16144125 քրեական վարույթն իրականացնող մարմնին՝ դրա տնօրինման հարցը այդ վարույթի շրջանակներում լուծելու համար:
3. Դավիթ Կարապետյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը:
4. Վարութային ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում, սակայն չի կարող բողոքարկվել Հայաստանի Հանրապետության քրեական դատավարության օրենսգրքի 373 հոդվածով, 375 հոդվածի 1-3-րդ մասերով և 377 հոդվածով նախատեսված հիմքերով:

ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ


(1)Ծնված՝ 1996 թվականի դեկտեմբերի 20-ին Լոռու մարզի Վանաձոր քաղաքում, ազգությամբ հայ, ՀՀ քաղաքացի, նախկինում չդատապարտված, հաշվառված է Շիրակի մարզի Գյումրի քաղաքի 207/120 տնակում, բնակվում է Երևան քաղաքի Զաքարիա Քանաքեռցու փողոցի 149Ա շենքի թիվ 1 բնակարանում, որպես խափանման միջոց է կիրառված բացակայելու արգելքը:
(2)Տե՛ս ՀՀ պետական եկամուտների կոմիտեի հարկ վճարողների սպասարկման վարչության պետի 2025 թվականի ապրիլի 11-ի գրությանը կից ներկայացված տեղեկատվությունը։