ԵԴ1/1107/01/25

Ո Ր Ո Շ ՈՒ Մ
ՔՐԵԱԿԱՆ ՎԱՐՈՒՅԹ ՆԱԽԱՁԵՌՆԵԼԸ ՄԵՐԺԵԼՈՒ ՎԵՐԱԲԵՐՅԱԼ

04 ապրիլի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան), նախագահությամբ՝ դատավոր Մ.Մելքոնյանի, ուսումնասիրելով Գևորգ Էդուարդի Աթանեսյանի կողմից ներկայացված քրեական հայցը․

Պ Ա Ր Զ Ե Ց Ի

1․ Վարույթի դատավարական նախապատմությունը․
1․1․ 2025 թվականի ապրիլի 01-ին բողոքաբեր Գևորգ Էդուարդի Աթանեսյանը քրեական հայց է ներկայացրել Երևան քաղաքի ընդհանուր իրավասության առաջաին ատյանի քրեական դատարան՝ քրեական վարույթ սկսելու և Հուսիկ Ցոլակի Միլիտոսյանին և Տաթևիկ Հուսիկի Միլիտոսյանին ՀՀ քրեական օրենսգրքի 256-րդ հոդվածի 3-րդ մասի 3-րդ կետով նախատեսված արարք կատարելու մեջ մեղավոր ճանաչելու պահանջով։
1․2․ Ներկայացված քրեական հայցը ԵԴ1/1107/01/25 համարի ներքո 01․04․2025 թվականին մուտք է արվել դատարան և դատավորների միջև գործերի բաշխման համակարգչային ծրագրի միջոցով քրեական գործը 2025 թվականի ապրիլի 01-ին մակագրվել և ապրիլի 02-ին հանձնվել է դատավոր Մ.Մելքոնյանի աշխատակազմին:
2․ներկայացված քրեական հայցի հիմքերն ու հիմնավորումները․
(․․․)Համաձայն ՀՀ իրավաբանական անձանց պետական ռեգիստրի էլեկտրոնային շտեմարանից ստացված քաղվածքի «ՄԻԼ հաուս» ՍՊ ընկերությունը գտնվում է Երևան, Նոր Նորք, Թևոսյան փողոց թիվ 3/1 հասցեում, ՀՎՀՀ 00192719, ՁԿԴ 51327485, Գրանցման համար 264․110․1045326/2018-11-09։Ընկերության իրական շահառուն է Տաթևիկ Միլիտոսյանը, որը հանդիսանում է ընկերության 100 տոկոս սեփականատերը։ 2․ «ՄԻԼ հաուս» ՍՊ ընկերության և Գևորգ Աթանեսյանի միջև ձեռք է բերվել համաձայնություն այն մասին, որ ընկերությունը կառուցում և Գ․ Աթանեսյանին ի սեփականություն է հանձնում ք․ Երևան, Թբիլիսյան 7/8 շենքի, 2-րդ մասնաշենքի 1-ին հարկից, 58 քմ վերանորոգված բնակարան։3․ 2023թ-ի օգոստոսի 2-ին Գևորգ Աթանեսյանի՝ փոխատուի, և ֆիզիկական անձ Հուսիկ Ցոլակի Միլիտոսյանի՝ փոխառուի միջև կնքվել և նույն օրը նոտարական կարգով վավերացվել է թիվ 457-20230802-7167960 նոտարական կոդով փոխառության պայմանագիրը։4․Փոխառության պայմանագրի 1-ին կետի, ինչպես նաև 2023թ-ի օգոստոսի 2-ի թիվ 11363 վճարման հանձնարարականի հիման վրա Գևորգ Աթանեսյանի կողմից Հուսիկ Միլիտոսյանին փոխառուին փոխառության կարգով բանկային փոխանցմամբ փոխանցվել է 26․300․000 ՀՀ դրամ ի կատարումն փոխառության պայմանագրի։Փոխառության պայմանագրի 2-րդ կետի հիման վրա Հուսիկ Միլիտոսյանը փոխառության կարգով ստացած լինելով 26․300․000 ՀՀ դրամ գումար բանկային փոխանցմամբ, պարտավոր էր այն վերադարձնել փոխառության կարգով ստացած վերոգրյալ գումարը մինչև 2023թ-ի նոյեմբերի 30-ը։ 5․Սակայն նույն փոխառության պայմանագրի նոտարական վավերացումից հետո Հուսիկ Միլիտոսյանն իր ձեռագրով կատարել է գրառում այն մասին, որ այդ գումարը նախատեսված է ք․ Երևան, Թբիլիսյան 7/8 շենքի, 2-րդ մասնաշենքի 1-ին հարկից, 58 քմ վերանորոգված բնակարանն ինձ Գևորգ Աթանեսյանիս որպես սեփականություն հանձնելու համար։6․ 22 հուլիսի 2023 թ-ին Ցոլակ Հուսիկի Միլիտոսյանը հանդես գալով որպես «ՄԻԼ հաուս» ՍՊԸ տնօրեն Տաթևիկ Հուսիկի Միլիտոսյանի կողմից հասարակ գրավոր ձևով տրված լիազորագրի հիման վրա ընկերության ներկայացուցիչ իմ մայր Հերմինե Թելմանի Սարգսյանից ևս ստանում է 200․000 ՀՀ դրամ գումար, որպես ք․ Երևան, Թբիլիսյան 7/8 շենքի, 2-րդ մասնաշենքի 1-ին հարկից, 58 քմ վերանորոգված բնակարանի դիմաց կանխավճար, որտեղ բնականաբար բացակայում է ընկերության կնիքը կամ որևէ այլ իրավական հիմնավորում։7․ 26․11․2024թ-ին փաստաբանական գրասենյակի կողմից կատարվել է գրավոր հարցում «ՄԻԼ հաուս» ՍՊ ընկերությանը այս փաստերի իսկությունը ճշտելու և գումարներն ընկերության դրամարկղ մուտք եղած լինելու մասին, սակայն մինչ օրս որևէ գրավոր պատասխան չի ստացվել։ Այլ իմ հեռախոսահամարին է զանգահարել մի երիտասարդ, որը հրավիրել է ինձ իրենց գրասենյակ պարզաբանումներ տրամադրելու համար, որին ես հրաժարվել եմ։4․ Փաստաբանական գրասենյակի կողմից 05 դեկտեմբերի 2024թ-ին ներկայացված հայտարարության հիման վրա 03 հունվարի 2025թ-ին Ավան և Նոր Նորք վարչական շրջանների դատախազության կողմից հայտարարությունն ուղարկվել է քննչական կոմիտե հետագա ընթացքը լուծելու համար։ 5․ Ավագ քննիչի կողմից 08 հունվարի 2025թ-ին կազմվել է գրություն քրեական վարույթ չնախաձեռնելու մասին՝ սահմանելով մասնավոր վարույթ նախաձեռնելու դատավարական իրավունքը։ 2․ Մասնավոր բողոքի իրավական հիմնավորումները․ Համաձայն ՀՀ քրեական օրենսգրքի 256 հոդվածի պահանջների․ 1. Հանցավորին վստահված, այսինքն՝ նրա տնօրինմանը, տիրապետմանը կամ օգտագործմանը փաստացի կամ իրավաբանորեն ազատ կամքով հանձնված գույքի հափշտակությունը, եթե այդ գույքը հափշտակելու դիտավորությունը ծագել է օրինական հիմքերով այն ստանալուց հետո՝․․․ 3. Վստահված գույքը հափշտակելը, որը կատարվել է՝ 1) հանցավոր կազմակերպության կողմից, 2) պատմական, գեղարվեստական կամ մշակութային առանձնակի արժեք ունեցող առարկա հափշտակելով կամ 3) առանձնապես խոշոր չափերով »։Համաձայն ՀՀ Քրեական դատավարության օրենսգրքի 451 հոդվածի պահանջների․ « 1. Մասնավոր մեղադրանքով վարույթը կարող է նախաձեռնվել այն դեպքում, երբ այն անձը, որը բավարար հիմքեր ունի ենթադրելու, որ Հայաստանի Հանրապետության քրեական օրենսգրքի 15-րդ հոդվածի 1-ին մասով նախատեuված արարքներով իրեն պատճառվել է վնաս, քրեական հայց է ներկայացնում դատարան»:Համաձայն ՀՀ Քրեական օրենսգրքի 15 հոդվածի պահանջների․ « 1. Վարույթի իրականացումը հանրային գործունեություն է, որի ընթացքում և արդյունքում ապահովվում է հանրային և մասնավոր շահերի հավասարակշռված պաշտպանությունը:2. Արդարադատությունը, դատախազական հսկողությունը, նախաքննությունը, հետաքննությունը և հանրային այլ գործունեությունն իրականացվում են բացառապես իրավունքի շահից ելնելով` օրենքի հիման վրա ստեղծված իրավասու մարմինների կողմից: 5. Ֆիզիկական և իրավաբանական անձինք իրավունք ունեն սույն օրենսգրքով նախատեսված մասնակցություն ունենալու քրեական վարույթում հանրային շահերի պաշտպանությանը:6. Սույն օրենսգրքով նախատեսված դեպքերում և կարգով ֆիզիկական և իրավաբանական անձինք, այդ թվում` տուժողը, պարտավոր են օժանդակել քրեական վարույթում հանրային շահերի պաշտպանությանը» ։Համաձայն ՀՀ Քրեական դատավարության օրենսգրքի 451 հոդվածի պահանջների․ « 3. Քրեական հայցը պետք է բովանդակի՝ 1) սույն հոդվածի 1-ին մասով նախատեսված անձի անունը, ազգանունը և բնակության կամ հաշվառման վայրը. 2) այն անձի անունը, ազգանունը և բնակության կամ հաշվառման վայրը, որի դեմ ներկայացվել է քրեական հայցը. 3) մեղադրանքի բովանդակությունը, այդ թվում՝ քրեական օրենսգրքի համապատասխան հոդվածը կամ հոդվածի մասը. 4) այն անձանց անունները, ազգանուններն ու բնակության կամ հաշվառման վայրերը, որոնք պետք է կանչվեն դատական նիստին. 5) մեղադրանքը հիմնավորող նյութերը․ 4. Սույն հոդվածի 2-րդ մասով նախատեսված անձը քրեական հայցը ներկայացնում է ենթադրյալ հանցանքի կատարման վայրի առաջին ատյանի դատարան»: 3․ Մասնավոր վարույթի պահանջը Ելնելով վերոգրյալից և ղեկավարվելով ՀՀ Քրեական դատավարության օրենսգրքի 452 հոդվածի 1-ին մասի պահանջներով, Հարգելի դատարանին խնդրում եմ․ 1․ Կայացնել որոշում քրեական վարույթ սկսելու մասին, 2․ Հանրային կարգով քրեական հետապնդման կարգով կայացնել մեղադրական դատավճիռ, Հուսիկ Ցոլակի Միլիտոսյանին և Տաթևիկ Հուսիկի Միլիտոսյանին մեղավոր ճանաչելով ՀՀ քրեական օրենսգրքի 256 հոդվածի 3-րդ մասի 3-րդ կետով նախատեսված հանցանք կատարելու մեջ (․․․)
3․Դատարանի իրավական վերլուծություններն ու եզրահանգումը
3․1․ ՀՀ քրեական օրենսգրքի 15-րդ հոդվածը կարգավորում է քրեական պատասխանատվությունը հանցագործությունից տուժածի քրեական հայցի հիման վրա, համաձայն որի՝ 1. Սույն օրենսգրքի 167-րդ հոդվածի 1-ին մասով, 168-րդ հոդվածի 1-ին մասով, 169-րդ հոդվածի 1-ին մասով, 170-րդ հոդվածի 1-ին մասով, 171-րդ հոդվածի 1-ին մասով, 172-րդ հոդվածով, 173-րդ հոդվածով, 178-րդ հոդվածի 1-ին մասով, 180-րդ հոդվածի 1-ին մասով, 182-րդ հոդվածի 1-ին մասով, 194-րդ հոդվածի 1-ին մասով, 195-րդ հոդվածի 1-ին մասով, 227-րդ հոդվածի 1-ին մասով, 228-րդ հոդվածի 1-ին մասով, 253-րդ հոդվածի 1-ին մասով, 254-րդ հոդվածի 1-ին մասով, 255-րդ հոդվածի 1-ին մասով, 256-րդ հոդվածի 1-ին մասով, 257-րդ հոդվածի 1-ին մասով, 259-րդ հոդվածի 1-ին մասով, 262-րդ հոդվածի 1-ին մասով, 263-րդ հոդվածի 1-ին մասով, 264-րդ հոդվածի 1-ին մասով, 265-րդ հոդվածով կամ 266-րդ հոդվածով նախատեսված հանցանքը կատարած անձը կարող է ենթարկվել քրեական պատասխանատվության միայն հանցագործությունից տուժածի քրեական հայցի հիման վրա, բացառությամբ Հայաստանի Հանրապետության քրեական դատավարության օրենսգրքով նախատեսված դեպքերի։
3․2․ ՀՀ քրեական դատավարության օրենսգրքի 13-րդ բաժնի 54-րդ գլուխը կարգավորում է մասնավոր մեղադրանքով վարույթները։
3․3․ ՀՀ քրեական դատավարության օրենսգրքի 451-րդ հոդվածը սահմանում է վարույթ նախաձեռնելը, համաձայն որի՝ 1. Մասնավոր մեղադրանքով վարույթը կարող է նախաձեռնվել այն դեպքում, երբ այն անձը, որը բավարար հիմքեր ունի ենթադրելու, որ Հայաստանի Հանրապետության քրեական օրենսգրքի 15-րդ հոդվածի 1-ին մասով նախատեսված արարքներով իրեն պատճառվել է վնաս, քրեական հայց է ներկայացնում դատարան: 2. Քրեական հայցը կարող է ներկայացնել միայն սույն հոդվածի 1-ին մասով նախատեսված անձը կամ նրա օրինական ներկայացուցիչը: 3. Քրեական հայցը պետք է բովանդակի` 1) սույն հոդվածի 1-ին մասով նախատեսված անձի անունը, ազգանունը և բնակության կամ հաշվառման վայրը. 2) այն անձի անունը, ազգանունը և բնակության կամ հաշվառման վայրը, որի դեմ ներկայացվել է քրեական հայցը. 3) մեղադրանքի բովանդակությունը, այդ թվում` քրեական օրենսգրքի համապատասխան հոդվածը կամ հոդվածի մասը. 4) այն անձանց անունները, ազգանուններն ու բնակության կամ հաշվառման վայրերը, որոնք պետք է կանչվեն դատական նիստին. 5) մեղադրանքը հիմնավորող նյութերը: 4. Սույն հոդվածի 2-րդ մասով նախատեսված անձը քրեական հայցը ներկայացնում է ենթադրյալ հանցանքի կատարման վայրի առաջին ատյանի դատարան: 5. Մասնավոր մեղադրանքով մինչդատական վարույթն իրականացվում է բացառապես ենթադրյալ հանցանք կատարած անձին հայտնաբերելու համար:
3․4․ ՀՀ քրեական դատավարության օրենսգրքի 452-րդ հոդվածը սահմանում է քրեական վարույթ սկսելուց առաջ դատարանի գործողությունները, համաձայն որի՝ 1. Քրեական հայցն ստանալուց հետո դատավորը ստուգում է` արդյոք պահպանվել են սույն օրենսգրքի 451-րդ հոդվածի 3-րդ մասով սահմանված` քրեական հայցին ներկայացվող պահանջները, արդյոք քրեական հայցում նկարագրված փաստական հանգամանքների կապակցությամբ քրեական հետապնդումը կարող է իրականացվել մասնավոր կարգով, և հնգօրյա ժամկետում կայացնում է հետևյալ որոշումներից մեկը. 1) քրեական վարույթ սկսելու մասին. 2) քրեական հայցը վերադարձնելու մասին. 3) քրեական հայցը և կից նյութերն ըստ ընդդատության ուղարկելու մասին. 4) քրեական վարույթ սկսելը մերժելու մասին: 2. Քրեական հայցը, համապատասխան թերությունները մատնանշելով, առնվազն հինգ օր ժամկետով վերադարձվում է, եթե դրանում առկա են շտկելի թերություններ: 3. Քրեական հայցը և կից նյութերն ուղարկվում են ըստ ընդդատության, եթե պարզվում է, որ ենթադրյալ հանցանքի կատարման վայրը դուրս է տվյալ դատարանի դատական տարածքից: 4. Քրեական վարույթ սկսելը մերժվում է, եթե` 1) ենթադրյալ հանցանք կատարած անձը հայտնի չէ. 2) քրեական հայցում նկարագրված փաստական հանգամանքներն ակնհայտորեն հանցավոր չեն. 3) քրեական հայցում նկարագրված փաստական հանգամանքների կապակցությամբ քրեական հետապնդումը կարող է իրականացվել միայն հանրային կարգով. 4) դատարանի սահմանած ժամկետում քրեական հայցի թերությունները չեն վերացվել, կամ այն վերստին չի ներկայացվել:
3․5․ Ամփոփելով մեջբերված իրավանորմերը, դրանց համադրումը բողոքաբերի կողմից քրեական հայցի փաստական հանգամանքները Դատարանն արձանագրում է, որ քրեական հայց ներկայացնող անձ Գևորգ Աթանեսյանի կողմից մատնանշվել է ՀՀ քրեական օրենսգրքի 256-րդ հոդվածի 3-րդ մասի 3-րդ կետով նախատեսված արարքի հատկանիշներ, ինչի կապակցությամբ քրեական հետապնդումը կարող է իրականացվել միայն հանրային կարգով։
Ելնելով վերոգրյալից, հիմք ընդունելով սույն որոշման 3․1-ից մնչև 3․5 կետերում վերլուծված հիմնավորումները, ղեկավարվելով ՀՀ քրեական օրենսգրքի 15-րդ, ՀՀ քրեական դատավարության օրենսգրքի 33, 451, 452-րդ հոդվածներով․ Դատարանը

Ո Ր Ո Շ Ե Ց

1․ Գևորգ Էդուարդի Աթանեսյանի կողմից Հուսիկ Ցոլակի Միլիտոսյանի և Տաթևիկ Հուսիկի Միլիտոսյանի նկատմամբ ՀՀ քրեական օրենսգրքի 256-րդ հոդվածի 3-րդ մասի 3-րդ կետով քրեական վարույթ սկսելու վերաբերյալ ներկայացված քրեական հայցը մերժել։
2․ Որոշման օրինակները տրամադրել կողմերին։
3․ Որոշումը կարող է բողոքարկվել ՀՀ վերաքննիչ քրեական դատարան, դատական ակտը ստանալու պահից տասնօրյա ժամկետում։

Դ Ա Տ Ա Վ Ո Ր Մ Ա Ս Ի Ս Մ Ե Լ Ք Ո Ն Յ Ա Ն