ԵԴ1/1077/01/25

Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

23 մայիսի 2025թ․ ք.Երևանում

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)

նախագահությամբ՝
դատավոր՝ Մ․Արամյանի
քարտուղարությամբ՝ Մ.Գևորգյանի
մասնակցությամբ`
հանրային մեղադրող՝ Ա․Կոստանյանի
մեղադրյալ՝ Գ․Սարգսյանի

դռնբաց դատական նիստում քննեց քրեական գործն ըստ մեղադրանքի` Գարիկ Երջանիկի Սարգսյանի (ծնված` 26.08.1986թ. ծննդավայրը` Կոտայքի մարզ, քաղաք Աբովյան, ազգությամբ հայ, ՀՀ քաղաքացի, հաշվառված՝ Կոտայքի մարզ, գյուղ Արամուս, 5 փողոց, 23 տուն հասցեում, բնակվող՝ քաղաք Երևան, Ներքին Շենգավիթ, 9 փողոց, 103 տուն հասցեում, ամուսնացած, խնամքին երկու անչափահաս, չդատված, զբաղվում է մասնավոր շինարարությամբ)։
Գարիկ Երջանիկի Սարգսյանին մեղադրանք է առաջադրվել ՀՀ քրեական օրենսգրքի 344-րդ հոդվածի 2-րդ մասով, որպես խափանման միջոց է կիրառվել բացակայելու արգելքը:

1․ Դատավճռի նկարագրական մաս.
2024 թվականի մայիսի 31-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 344-րդ հոդվածի 2-րդ մասով նախաձեռնվել է թիվ 60-2155-24 քրեական վարույթը։
2025 թվականի հունվարի 27-ին թիվ 60-2155-24 քրեական վարույթն ուղարկվել է ՀՀ քննչական կոմիտեի Երևան քաղաքի քննչական վարչության Երևան քաղաքի Ավան և Նոր Նորք վարչական շրջանների քննչական բաժին։
2025 թվականի հունվարի 31-ին որոշում է կայացվել Գարիկ Երջանիկի Սարգսյանի նկատմամբ ՀՀ քրեական օրենսգրքի 344-րդ հոդվածի 2-րդ մասով նախատեսված հանցանք կատարելու համար հանրային քրեական հետապնդում հարուցելու մասին։
2025 թվականի հունվարի 31-ին մեղադրյալ Գարիկ Երջանիկի Սարգսյանի նկատմամբ որպես խափանման միջոց, կիրառվել է բացակայելու արգելքը։
2025 թվականի մարտի 06-ին որոշում է կայացվել մեղադրյալ Գարիկ Երջանիկի Սարգսյանի նկատմամբ հարուցված հանրային քրեական հետապնդման ժամկետը վերսկսելու վերաբերյալ։
2025 թվականի մարտի 06-ին Գարիկ Երջանիկի Սարգսյանին առաջադրվել է մեղադրանք։
2025 թվականի ապրիլի 01-ին ՀՀ դատախազության Ավան և Նորք-Մարաշ վարչական շրջանների դատախազությունից Երևան քաղաքի առաջին ատյանի ընդհանուր իրավասության քրեական դատարան է ստացվել թիվ 60-2155-24 նախաքննական համարով քրեական գործն ըստ մեղադրանքի՝ Գարիկ Երջանիկի Սարգսյանի՝ ՀՀ քրեական օրենսգրքի 344-րդ հոդվածի 2-րդ մասով։
2025 թվականի ապրիլի 01-ին դատավորների միջև գործերի բաշխման էլեկտրոնային մակագրության համակարգի միջոցով թիվ ԵԴ1/1077/01/25 քրեական գործը մակագրվել է Երևան քաղաքի առաջին ատյանի ընդհանուր իրավասության քրեական դատարանի դատավոր Մ․ Արամյանին:
Գործը դատավորին է հանձնվել 2025 թվականի ապրիլի 02-ին:
Գարիկ Երջանիկի Սարգսյանը մեղադրվում է քրեական օրենսգրքով նախատեսված, պատժի սպառնալիքով արգելված, մեղավորությամբ կատարված հանրորեն վտանգավոր այն արարքի կատարման համար, որ նա «զրկված լինելով տրանսպորտային միջոցներ վարելու իրավունքից, ոչ սթափ վիճակում վարել է տրանսպորտային միջոցը․
Ասյպես՝
Գարիկ Երջանիկի Սարգսյանը, զրկված լինելով տրանսպորտային միջոցներ վարելու իրավունքից, 2024 թվականի փետրվարի 10-ին՝ ժամը 02։22-ի սահմաններում, գտնվելով 0,478 մգ/լ ալկոհոլի ազդեցության տակ՝ ոչ սթափ վիճակում Երևան քաղաքի Աճառյան փողոցում վարել է «Նիսան» մակնիշի 36 SD 646 հաշվառման համարանիշի ավտոմեքենան, որի վերաբերյալ ՀՀ ոստիկանության պարեկային ծառայության աշխատակցի կողմից կազմվել է թիվ 8180269652 արձանագրությունը։
Այսինքն՝ Գարիկ Երջանիկի Սարգսյանին մեղսագրվում է մեղավորությամբ կատարված արարք՝ նախատեսված ՀՀ քրեական օրենսգրքի 344-րդ հոդվածի 2-րդ մասով»։

Դատաքննության ընթացքում հետազոտված թույլատրելի ապացույցներ
Հաշվի առնելով, որ մեղադրյալ Գարիկ Սարգսյանը հրաժարվեց ցուցմունք տալուց Դատարանը որոշեց հրապարակել մեղադրյալի նախաքննության ընթացքում տված ցուցմունքը՝ համաձայն որի «զղջում է իր կատարած արարքի համար, խնդրում է հնրավորինս մեղմ վերաբերմունք իր նկատմամբ։ 2024 թվականի փետրվարի 10-ին ազգականներից մեկի տանը օգտագործել է ոգելից խմիչք, որից հետո Երևան քաղաքի Աճառյան փողոցով վարել է իրեն պատկանող «Նիսսան Տիդա» մակնիշի 36 SD 646 հաշվառման համարանիշի ավտոմեքենան, գնացել է ավտոլվացման կետ, որի ընթացքում իրեն կանգնեցրել են ոստիկանության ծառայողները, ստուգել են իր սթափության վիճակը, որից հետո կազմել են արձանագրություն։ Ինքը տեղյակ է եղել վարորդական իրավունքի զրկված լինելու հանգամանքի մասին և ավտոմեքենա վարել է աշխատանքի պատճառով, քանի որ ավտոմեքենան շատ անհրաժեշտ է աշխատանքի վայր գնալու և գալու համար։ Հավելել է, որ ինչ որոշում էլ կայացվի իր նկատմամբ, խնդրում է հնարավորինս մեղմ վերաբերվել, պարտավորվում է այլևս նման արարք չկատարել»։Վ.Թ. 99-102
Որպես արտավարույթային փաստաթուղթ ապացույց ճանաչված, զննված և քրեական վարույթի նյութերին կցված հետևյալ փաստաթղթերը.
29.01.2025թ. զննություն կատարելու մասին արձանագրությունը, համաձայն որի՝ զննության է ենթարկվել քրեական վարույթում առկա վարչական իրավախախտման վերբերյալ արձանագրությունների պատճենը, ՀՀ ոստիկանության ՃՈ էլեկտրոնային ռեգիստրից արտատպված Գարիկ Երջանիկի Սարգսյանի վարորդական վկայական փնտրելու վերաբերյալ քաղվածքը, ստուգաչափման վկայականի պատճենը և սթափությունը ստուգելու արձանագրությունը։
ՀՀ ոստիկանության ՃՈ էլեկտրոնային ռեգիստրից արտատպված Գարիկ Երջանիկի Սարգսյանի վարորդական վկայական փնտրելու վերաբերյալ քաղվածքի զննության ընթացքում ձեռք է բերվել տեղեկություն այն մասին, որ Գարիկ Երջանիկի Սարգսյանի MB980949 հերթական համար վարորդական վկայականի կարգավիճակ դաշտում առկա է «զրկված» գրառումը՝ կասեցման սկիզբ՝ 19․09․2023թ․, ավարտ՝ 19․09․2024թ․։
Վարչական իրավախախտումների վերաբերյալ 8180289199 արձանագրության զննության ընթացքում ձեռք է բերվել տեղեկություն այն մասին, որ վարչական իրավախախտման վերաբերյալ արձանագրությունը կազմվել է 2023 թվականի սեպտեմբերի 19-ին՝ ժամը 00։25-ին, Կոտայքի մարզի, Հրազդան քաղաքի, Հայ Ֆիդայիներ փողոցում։ Արձանագրությունը կազմվել է ՀՀ ոստիկանության պարեկային ծառայության սերժանտ կրթսեր պարեկ՝ Դերենիկ Գրիգորյանի կողմից (կրծքանշանի համար՝ 12495) կողմից։ Արձանագրությունը կազմվել է այն մասին, որ քաղաքացի՝ Գարիկ Երջանիկի Սարգսյանը (ծնված՝ 26․08․1986թ․, բնակվող՝ Կոտայք, Արամուս) Կոտայքի մարզի, Հրազդան քաղաքի, Հայ Ֆիդայիներ փողոցում 2023 թվականի սեպտեմբերի 19-ին՝ ժամը 00։02-ին, «OPEL ASTRA 1.6» մակնիշի 34 TM 108 հաշվառման համարանիշի ավտոմեքենան վարել է ոչ սթափ վիճակում (վարորդի մեկ լիտր արտաշնչած օդի մեջ մաքուր ալկոհոկի պարունակությունը գերազանցում է 0,5 միլիգրամը)։ Նույն օրն որոշում է կայացվել Գարիկ Երջանիկի Սարգսյանին զրկել տրանսպորտային միջոց վարելու իրավունքից 1 տարի ժամկետով։ Գարիկ Երջանիկի Սարգսյանը հրաժարվել է որոշման իր օրինակը ստանալուց։
Վարչական իրավախախտումների վերաբերյալ 8180269652 արձանագրության զննության ընթացքում ձեռք է բերվել տեղեկություն այն մասին, որ վարչական իրավախախտման վերաբերյալ արձանագրությունը կազմվել է 2024 թվականի փետրվարի 10-ին՝ ժամը 02։32-ին, քաղաք Երևան, Աճարյան փողոց, 11-րդ հասցեում։ Արձանագրությունը կազմվել է ՀՀ ոստիկանության պարեկային ծառայության 2-րդ գումարտակի 3-րդ վաշտի պարեկ՝ Արտակ Մուրադի Սարգսյանի կողմից (կրծքանշանի համար՝ 08503) կողմից։ Արձանագրությունը կազմվել է այն մասին, որ քաղաքացի՝ Գարիկ Երջանիկի Սարգսյանը (ծնված՝ 26․08․1986թ․, բնակվող՝ Կոտայք Արամուս, 5-րդ փողոց, 23-րդ տուն հասցեում) քաղաք Երևան, Աճարյան փողոց, 11-րդ հասցեում ժամը 02։22-ին «NISSAN» մակնիշի 36 SD 646 հաշվառման համարանիշի ավտոմեքենան վարել է տրանսպորտային միջոց վարելու իրավունքից զրկված ոչ սթափ վիճակում։ Արփանագրության վրա առկա է ստուգաչափման սարքի համարը՝ 91100892 և զննման համարը՝ 02529։ Արձանագրության վրա առկա է ինչպես խախտում թույլ տված անձի այնպես էլ արձանագրություն կազմող անձի ստորագրությունը։
Թիվ 91100892 գործարանային համարով ալկոտեստեր սարքի կողմից կազմված 02529 արձանագրության զննության ընթացքում ձեռք է բերվել տեղեկություն այն մասին, որ զննությունը կատարվել է 2024 թվականի փետրվարի 10-ին ժամը 02։27։49 վարկյանին։ Զննության ընթացքում ձեռք բերվեց տեղեկություն, որ Գարիկ Սարգսյանի օրգանիզմում ալկոհոլի պարունակությունը կազմել է 0,478 մգ/լ։ Գարիկ Սարգսյանը վարել է 36 SD 646 հաշվառման համարանիշի ավտոմեքենան։ Զննությունը կատարել է Սարգսյանը, կրծքանշանի համար՝ 08503, ստորաբաժանում 2 գումարտակ, 3-րդ վաշտ։
Թիվ 099448 ստուգաչափման վկայականի զննության ընթացքում ձեռք է բերվել տեղեկություն այն մասին, որ «Ալկոտեստեր» սարքի ստուգաչափման թվականը գրառված է 2023 թվականի հուլիսի 7-ը, ուժի մեջ է մինչև 2024 թվականի հուլիսի 3-ը։ Ստուգաչափվել է 91100892 հերթական համարի ալկոտեստեր սարքը։ Սարքի տեսակը նշված է «Jupiter X/RP», չափման տիրույթը նշված է 0,000÷2,000 մգ/լ, սարքի ճշտության դասը, կարգը (սխալանքը)0։0,1-5%, 0,1-0,15-8%, 0,15-10%, սարքի արտադրող Չինաստան, սարքը պատկանում է ՀՀ ՊԾ։ Զննության ընթացքում ձեռք է բերվել տեղեկություն այն մասին, որ ստուգաչափման արդյունքերի հիման վրա չափման միջոցը բավարարում է սահմանված պահանջներին։ Ստուգաչափման սարքը հաստատված է ՀՀ տնտեսական զարգացման և ներդրումների նախարարի 19․02․2018թ․, թիվ 133-Ն հրամանով։Վ.Թ. 34-35
12.03.2025թ. որոշմամբ որպես արտավարութային փաստաթուղթն ապացույց ճանաչված և քրեական վարույթին կցված` վարչական իրավախախտումների վերաբերյալ թիվ 8180289199 և թիվ 8180269652 արձանագրությունների պատճենները, ՀՀ ոստիկանության ՃՈ էլեկտրոնային ռեգիստրից արտատպված Գարիկ Երջանիկի Սարգսյանի վարորդական վկայական փնտրելու վերաբերյալ քաղվածքը, ստուգաչափման վկայականի պատճեն և սթափությունը ստուգելու վերաբերյալ արձանագրությունը։Վ.Թ. 3-7, 104-105
Վերոգրյալ ապացույցների հիման վրա Դատարանը հաստատված է համարում հետևյալ փաստական հանգամանքները, մասնավորապես.
-Գարիկ Սարգսյանը 2024 թվականի փետրվարի 10-ի դրությամբ զրկված է եղել տրանսպորտային միջոցներ վարելու իրավունքից,
-Գարիկ Սարգսյանը 2024 թվականի փետրվարի 10-ին՝ ժամը 02։22-ի սահմաններում, գտնվելով 0,478 մգ/լ ալկոհոլի ազդեցության տակ՝ ոչ սթափ վիճակում Երևան քաղաքի Աճառյան փողոցում վարել է «Նիսան» մակնիշի 36 SD 646 հաշվառման համարանիշի ավտոմեքենան։

Դատավճռի պատճառաբանական մաս.
ՀՀ քրեական դատավարության օրենսգրքի 97-րդ հոդվածի համաձայն/․․․/ 1. Վարույթի ընթացքում ձեռք բերված ապացույցները, ներառյալ վարույթի մասնավոր մասնակիցների ներկայացրած ապացույցները համարվում են թույլատրելի, քանի դեռ պատշաճ իրավական ընթացակարգով հակառակը չի հաստատվել:
2. Օրենքի էական խախտմամբ ստացված տվյալները, ինչպես նաև դրանց հիման վրա կատարված վարութային գործողությունների արդյունքով ձեռք բերված տվյալները ճանաչվում են անթույլատրելի և չեն կարող օգտագործվել որպես ապացույց/․․․/:
ՀՀ քրեական դատավարության օրենսգրքի 102-րդ հոդվածի համաձայն`
/․․․/1. Քրեական վարույթի ընթացքում ապացուցման ենթակա են՝
1)դեպքը և դրա հանգամանքները (ժամանակը, տեղը, եղանակը և այլն).
2)մեղադրյալի առնչությունը դեպքին.
3)ենթադրյալ հանցագործության՝ քրեական օրենքով նախատեսված հատկանիշները.
4) մեղադրյալի մեղավորությունը ենթադրյալ հանցանքը կատարելու մեջ.
5) քրեական պատասխանատվությունը կամ պատիժը մեղմացնող և ծանրացնող հանգամանքները.
6) մեղադրյալի անձը բնութագրող հանգամանքները.
7) ենթադրյալ հանցագործությամբ պատճառված վնասը.
8)այն հանգամանքները, որոնք թույլ են տալիս անձին ազատել քրեական պատասխանատվությունից կամ պատժից.
9) այն հանգամանքները, որոնցով անձը հիմնավորում է վարույթի ընթացքում իր գույքային պահանջները.
10) այն հանգամանքները, որոնցով վարույթի մասնակիցը կամ այլ անձը հիմնավորում է իր պահանջները/․․․/:
ՀՀ քրեական դատավարության օրենսգրքի 105-րդ հոդվածի համաձայն` /․․․/ 1.Յուրաքանչյուր ապացույց ենթակա է գնահատման՝ վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից:
2. Քննիչը, դատախազը, դատավորը, ղեկավարվելով քրեադատավարական օրենսդրությամբ, ներառյալ ապացուցման չափանիշների մասին վերաբերելի կանոններով, ապացույցները գնահատում են դրանց պատշաճ հետազոտման և վերլուծության վրա հիմնված ներքին համոզմամբ:
3. Ոչ մի տվյալ նախապես հավաստի ապացույցի ուժ չունի: Դատավորը, ինչպես նաև քննիչը և դատախազը չպետք է կանխակալ վերաբերմունք դրսևորեն ապացույցներին, չպետք է դրանց որոշ մասին մյուսների նկատմամբ առավել կամ նվազ նշանակություն տան, քանի դեռ պատշաճ իրավական ընթացակարգի շրջանակներում դրանք չեն գնահատվել/․․․/:
ՀՀ քրեական դատավարության օրենսգրքի 276-րդ հոդվածը սահմանում է, որ
/․․․/ 1. Առաջին ատյանի դատարանում վարույթն իրականացվում է միայն մեղադրյալի նկատմամբ և միայն նրան ներկայացված մեղադրանքով:/․․․/:
Հետազոտված ապացույցների հիման վրա Դատարանը առանձին սենյակում գնահատելով դրանք իրենց համակցության մեջ, համադրելով մեղադրյալին առաջադրված մեղադրանքի ձևակերպման հետ, որ նա «զրկված լինելով տրանսպորտային միջոցներ վարելու իրավունքից, ոչ սթափ վիճակում վարել է տրանսպորտային միջոցը․
Ասյպես՝
Գարիկ Երջանիկի Սարգսյանը, զրկված լինելով տրանսպորտային միջոցներ վարելու իրավունքից, 2024 թվականի փետրվարի 10-ին՝ ժամը 02։22-ի սահմաններում, գտնվելով 0,478 մգ/լ ալկոհոլի ազդեցության տակ՝ ոչ սթափ վիճակում Երևան քաղաքի Աճառյան փողոցում վարել է «Նիսան» մակնիշի 36 SD 646 հաշվառման համարանիշի ավտոմեքենան, որի վերաբերյալ ՀՀ ոստիկանության պարեկային ծառայության աշխատակցի կողմից կազմվել է թիվ 8180269652 արձանագրությունը», նշված արարքը ՀՀ քրեական օրենսգրքի 344-րդ հոդվածի 2-րդ մասով որակման համատեքստում ՀՀ քրեական դատավարության օրենսգրքի 342-րդ հոդվածի 1-ին մասով նախատեսված հարցերին պատասխանելիս գտել է, որ
ապացուցված են մեղադրյալին վերագրվող փաստական հանգամանքները (արարքը),
ապացուցված է այդ արարքի քրեական հակաիրավականությունը,
ապացուցված է մեղադրյալի կողմից այդ արարքը կատարելը,
ապացուցված է մեղադրյալի մեղավորությունը տվյալ արարքը կատարելու մեջ:
2. Սույն հոդվածի 1-ին մասում նշված հարցերից որևէ մեկին ժխտական պատասխան տալու դեպքում դատարանը կայացնում է արդարացման վերդիկտ։
3. Սույն հոդվածի 1-ին մասում նշված բոլոր հարցերին հաստատական պատասխան տալու դեպքում դատարանը կայացնում է մեղադրական վերդիկտ, որով սահմանում է նաև, թե ապացուցված արարքի նկատմամբ քրեական օրենսգրքի, որ հոդվածը, հոդվածի մասը կամ կետն է ենթակա կիրառման:
Համաձայն ՀՀ քրեական դատավարության օրենսգրքի 348-րդ հոդվածի` դատավճիռ կայացնելիս դատարանը մի շարք այլ հարցերի հետ միասին պետք է լուծի նաև այն հարցը, թե մեղադրյալը պատժի ենթակա է, թե ոչ, պատժի ինչ տեսակ պետք է նշանակվի և պետք է արդյոք նա այն կրի:
Դատարանը դրական պատասխանելով ՀՀ քրեական դատավարության օրենսգրքի 342-րդ հոդվածի 1-ին մասով նախատեսված հարցերին գտնում է, որ կատարած արարքի համար Գարիկ Սարգսյանն ենթակա է քրեական պատասխանատվության և պատժի:
ՀՀ քրեական օրենսգրքի 55-րդ հոդվածի համաձայն` /․․․/ Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները/․․․/:
ՀՀ քրեական օրենսգրքի 70-րդ հոդվածի համաձայն՝ «1.Քրեական պատասխանատվությունը կամ պատիժը մեղմացնող հանգամանքներ են՝(…)
4) պատիժ նշանակելու պահին հանցանք կատարած անձի խնամքի տակ անչափահասի կամ հաշմանդամություն ունեցող անձի առկայությունը, բացառությամբ այն դեպքերի, երբ հանցանքը կատարվել է խնամքի տակ գտնվող անձի նկատմամբ, (…)
2. Պատիժ նշանակելիս դատարանը կարող է հաշվի առնել նաև սույն հոդվածի 1-ին մասով չնախատեսված մեղմացնող այլ հանգամանքներ: (…)»։
Դատարանը, որպես մեղադրյալ Գարիկ Սարգսյանի պատիժը մեղմացնող հանգամանքներ է դիտարկում այն, որ՝
-առաջադրված մեղադրանքում իրեն մեղավոր է ճանաչել՝ նախաքննության ընթացքում տվել խոստովանական ցուցմունքներ, զղջացել է իր կատարած արարքի համար:
Գարիկ Սարգսյանի անձը բնութագրող հանգամանքներն են, մասնավորապես դատվածություն չունեցող անձ հանդիսանալը:
Դատարանը միաժամանակ արձանագրում է, որ Գարիկ Սարգսյանի պատասխանատվությունն ու պատիժը ծանրացնող հանգամանքներ առկա չեն:
Դատարանը, հաշվի առնելով վերոգրյալը, ինչպես նաև Գարիկ Սարգսյանի կատարած հանցագործության հանրության համար վտանգավորության աստիճանը և բնույթը, նրա անձը բնութագրող տվյալները, պատասխանատվությունն ու պատիժը մեղմացնող հանգամանքները, ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի ՀՀ քրեական օրենսգրքի 344-րդ հոդվածի 2-րդ մասով նախատեսված հանրորեն վտանգավոր արարքների սանկցիաներով նախատեսված է տուգանք` առավելագույնը քսանապատիկի չափով, կամ հանրային աշխատանքներ՝ ութսունից հարյուր հիսուն ժամ տևողությամբ, կամ կարճաժամկետ ազատազրկում՝ մեկից երկու ամիս ժամկետով, կամ ազատազրկում՝ առավելագույնը երկու տարի ժամկետով:
Մեղադրյալին վերագրվող արարքը ՀՀ քրեական օրենսգրքի 17-րդ հոդվածի համաձայն հանդիսանում է ոչ մեծ ծանրության հանցանք։
ՀՀ քրեական օրենսգրքի 67-րդ հոդվածի 5-րդ կետի համաձայն /․․․/ 5. Առաջին անգամ ոչ մեծ ծանրության հանցագործություն կատարած անձը չի կարող դատապարտվել ազատազրկման/․․․/ ինչպես նաև հաշվի առնելով Գարիկ Սարգսյանի անձը բնութագրող տվյալները, գտնում է, որ ՀՀ քրեական օրենսգրքի 55-րդ հոդվածով սահմանված պատժի նպատակներին հասնելու համար նրա նկատմամբ ՀՀ քրեական օրենսգրքի 344-րդ հոդվածի 2-րդ մասով կատարած հանցանքի համար պետք է նշանակել տուգանքի ձևով պատժատեսակ։
Հանցանք կատարելու պահին «Նվազագույն աշխատավարձի մասին» ՀՀ օրենքի 1-ին հոդվածի համաձայն /․․․/ 1. Հայաստանի Հանրապետությունում նվազագույն ամսական աշխատավարձը սահմանել 75.000 դրամ:/․․․/։
Նկատի ունենալով, որ Դատարանին չի ներկայացվել Գարիկ Սարգսյանի՝ հանցանքը կատարելուց առաջ մեկ տարվա ընթացքում ստացած, միջին եկամուտի չափը Դատարանը, որպես հաշվարկային միավոր ընդունում է հանցանք կատարելու օրը սահմանված նվազագույն աշխատավարձը և պատիժ նշանակում տուգանք՝ նվազագույն աշխատավարձի հնգապատիկի չափով՝ 375․000 ՀՀ դրամ։
Բավարարելով մեղադրյալի միջնորդությունը Դատարանը նշանակված տուգանք պատժի վճարումը տարաժամկետում է մեկ տարի ժամկետով՝ 11 (տասնմեկ) ամիս սահմանել վճարման պարտականություն յուրաքանչյուր ամիս 30.000 (երեսուն հազար) ՀՀ դրամի չափով, իսկ վերջին 1 (մեկ) ամիսը 45.000 (քառասունհինգ հազար) ՀՀ դրամի չափով:
Անդրադառնալով խափանման միջոցի հարցին, Դատարանը գտնում է, որ Գարիկ Սարգսյանի նկատմամբ ընտրված խափանման միջոցը` բացակայելու արգելքը, պետք է թողնել անփոփոխ, մինչև դատավճռի օրինական ուժի մեջ մտնելը:
Բացի այդ, Դատարանը գտնում է, որ դատավճիռը օրինական ուժի մեջ մտնելուց հետո Գարիկ Սարգսյանի վերաբերյալ Հայաստանի Հանրապետության սահմանային էլեկտրոնային կառավարման տեղեկատվական (ՍԷԿՏ) համակարգում բացառապես սույն գործով առկա արգելանքը պետք է վերացնել:
ՀՀ քրեական դատավարության օրենսգրքի 348-րդ հոդվածի 1-ին մասի համաձայն` դատավճիռ կայացնելիս Դատարանը պարտավոր է անդրադառնալ ի թիվս այլնի նաև իրեղեն ապացույցների, վարույթային ծախսերի, գույքի նկատմամբ կիրառված (կիրառվելիք) արգելադրման, գույքային հայցի հարցերին, սակայն Դատարանը, պարզելով, որ սույն քրեական գործով մեղադրյալի գույքի վրա արգելանք չի կիրառվել, գույքային հայց չի ներկայացվել, սահմանափակվում է այդ փաստերի արձանագրմամբ:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 97-րդ, 102-րդ, 105-րդ, 276-րդ, 348-349-րդ, 352-356-րդ և 364-րդ հոդվածներով` Դատարանը․
Վ Ճ Ռ Ե Ց

Գարիկ Երջանիկի Սարգսյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով նախատեսված հանցանք կատարելու մեջ և պատիժ նշանակել տուգանք՝ նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով։
Նշանակված տուգանք պատժի վճարումը տարաժամկետել մեկ տարի ժամկետով՝ 11 (տասնմեկ) ամիս սահմանել վճարման պարտականություն յուրաքանչյուր ամիս 30.000 (երեսուն հազար) ՀՀ դրամի չափով, իսկ վերջին 1 (մեկ) ամիսը 45.000 (քառասունհինգ հազար) ՀՀ դրամի չափով:
Գարիկ Երջանիկի Սարգսյանի նկատմամբ ընտրված խափանման միջոցը` բացակայելու արգելքը, թողնել անփոփոխ մինչև սույն դատավճռի օրինական ուժի մեջ մտնելը:
Դատավճիռը օրինական ուժի մեջ մտնելուց հետո Գարիկ Երջանիկի Սարգսյանի վերաբերյալ Հայաստանի Հանրապետության սահմանային էլեկտրոնային կառավարման տեղեկատվական (ՍԷԿՏ) համակարգում բացառապես սույն գործով առկա արգելանքը վերացնել:
Իրեղեն ապացույցների, գույքային հայցի, դատական ծախսերի հարցը համարել լուծված:
Քրեական գործին կցված արտավարութային փաստաթղթերը պահել քրեական գործի հետ միասին՝ դրանց պահելու ամբողջ ժամանակամիջոցում:
Դատավճիռը կարող է բողոքարկվել Հայաստանի Հանրապետության վերաքննիչ քրեական դատարան` ստանալու օրվանից մեկամսյա ժամկետում:


ԴԱՏԱՎՈՐ` ՄՈՒՇԵՂ ԱՐԱՄՅԱՆ