ԵԴ1/1041/01/25
ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ
Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)՝

Նախագահությամբ՝ Մ.ԱՐԶՈւՄԱՆՅԱՆ
քարտուղարությամբ Մ․ՍԻՄՈՆՅԱՆԻ
մասնակցությամբ
հանրային մեղադրող Գ․ՀՈՎԱԿԻՄՅԱՆԻ
Կ.ՀԱՐՈւԹՅՈւՆՅԱՆ
պաշտպաններ Մ․ՄԱՐՏԻՐՈՍՅԱՆԻ
Լ․ՀՈՎՀԱՆՆԻՍՅԱՆԻ
թարգմանիչ Լ․ԿԱՐԱՊԵՏՅԱՆԻ
մեղադրյալ Ն․ՖԱՏԵԵՎԻ

2025 թվականի հունիսի 16-ին Երևան քաղաքում, դռնբաց դատական նիստում, համաձայնեցման վարույթի կարգով քննելով քրեական գործն ըստ մեղադրանքի Նիկիտա Սերգեյի Ֆատեևի (ծնված՝ 10․08․2002թ․, ՌԴ Մոսկվա քաղաքում, ազգությամբ ռուս, ՌԴ քաղաքացի, թերի բարձրագույն կրթությամբ, չի աշխատում, նախկինում չդատապարտված, ամուսնացած, բնակվում է Երևան քաղաքի Ռաֆայել Իսրաելյան փողոցի 30/3 հասցեում) նկատմամբ ՀՀ քրեական օրենսգրքի 457-րդ հոդվածի 1-ին մասով և 44-469-րդ հոդվածի 1-ին մասով,
ՊԱՐԶԵՑ
Գործի դատավարական նախապատմությունը.
2025 թվականի փետրվարի 15-ին Նիկիտա Սերգեյի Ֆատեևը հանցանք կատարած լինելու անմիջականորեն ծագած հիմնավոր կասկածի առկայության հիմքով ձերբակալվել է։
2025 թվականի փետրվարի 15-ին ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչության երկրորդ վարչության ՀԿԳ քննիչ Ն․Ավետիսյանի կողմից ՀՀ քրեական օրենսգրքի 457-րդ հոդվածի 1-ին մասով և 44-469-րդ հոդվածի 1-ին մասով նախաձեռնվել է թիվ 58203825 քրեական վարույթը։
2025 թվականի փետրվարի 15-ին ՀՀ գլխավոր դատախազության սահմանադրական կարգի հիմունքների, պետության և հասարակական անվտանգության դեմ ուղղված հանցագործությունների գործերով վարչության պետի տեղակալ Գ․Հովակիմյանը որոշում է կայացրել թիվ 58203825 քրեական վարույթով Նիկիտա Սերգեյի Ֆատեևի նկատմամբ ՀՀ քրեական օրենսգրքի 457-րդ հոդվածի 1-ին մասով և 44-469-րդ հոդվածի 1-ին մասով հանրային քրեական հետապնդում հարուցելու մասին այն արարքի համար, որ նա 2025 թվականի փետրվարի 15-ին՝ ժամը 08։10-ին, Երևան-Միլան թիվ 245 չվերթի սահմանային վերահսկողության ժամանակ, նպատակ ունենալով ապօրինի՝ առանց սահմանված փաստաթղթերի և պատշաճ թույլտվության, կեղծ փաստաթղթի օգտագործմամբ հատել Հայաստանի Հանրապետության (այսուհետ՝ ՀՀ) պետական սահմանը, մոտեցել է ՀՀ «Զվարթնոց» օդանավակայանում տեղակայված ՀՀ ԱԱԾ ՍԶ հսկիչ անցագրային սահմանային անցակետին, որտեղ, դիտավորությամբ խախտելով «Պետական սահմանի մասին» ՀՀ օրենքի 11-րդ հոդվածի և «ՀՀ պետական սահմանի ռեժիմ սահմանելու մասին» ՀՀ կառավարության 2011 թվականի մայիսի 12-ի թիվ 702-Ն որոշման պահանջները, ՀՀ ԱԱԾ ՍԶ ծառայողին է ներկայացրել դեռևս չպարզված հանգամանքներում ձեռք բերված, պետական լիազոր մարմնի կողմից տրվող, իրավաբանական փաստ հավաստող, իրավունք վերապահող, Լեհաստանի Հանրապետության քաղաքացու՝ իր տվյալներով ձևակերպված RR1465154 սերիա-համարի կեղծ կացության քարտը՝ այդ կերպ փորձելով ապօրինի՝ առանց սահմանված փաստաթղթերի և պատշաճ թույլտվության, կեղծ փաստաթղթի օգտագործմամբ հատել ՀՀ պետական սահմանը, սակայն նրա դիտավորության մեջ ընդգրկված հանցագործությունը նրա կամքից անկախ հանգամանքներով չի իրագործվել, քանի որ կացության կեղծ քարտի օգտագործման փաստը հայտնաբերվել է ՀՀ ԱԱԾ սահմանապահ ծառայողների կողմից։
2025 թվականի փետրվարի 17-ին Երևան քաղաքի առաջին ատյանի ընդհանուր իրավասության քրեական դատարանը որոշում է կայացրել քննիչի միջնորդությունը մասնակի բավարարելու մասին և թիվ 58203825 քրեական վարույթով մեղադրյալ Նիկիտա Սերգեյի Ֆատեևի նկատմամբ որպես խափանման միջոց է կիրառվել կալանքը՝ մեկ ամիս ժամկետով՝ սահմանափակելով վերջինիս՝ այլ անձանց հետ հաղորդակցվելու իրավունքը՝ օրենքով նախատեսված բացառությունների հաշվառմամբ։
2025 թվականի մարտի 14-ին Երևան քաղաքի առաջին ատյանի ընդհանուր իրավասության քրեական դատարանը որոշում է կայացրել քննիչի միջնորդությունը մասնակի բավարարելու մասին և թիվ 58203825 քրեական վարույթով մեղադրյալ Նիկիտա Սերգեյի Ֆատեևի նկատմամբ որպես խափանման միջոց է կիրառվել տնային կալանքը՝ մեկ ամիս ժամկետով, 5․000․000 ՀՀ դրամի չափով գրավը և բացակայելու արգելքը։
2025 թվականի մարտի 28-ին թիվ 58203825 քրեական վարույթը մեղադրական եզրակացությամբ ուղարկվել է Երևան քաղաքի առաջին ատյանի ընդհանուր իրավասության քրեական դատարան և մակագրվել դատավոր Մ.Արզումանյանին։
2025 թվականի ապրիլի 2-ին Երևան քաղաքի առաջին ատյանի ընդհանուր իրավասության քրեական դատարանի դատավոր Մ.Արզումանյանի կողմից որոշում է կայացվել քրեական գործի վարույթը ստանձնելու և նախնական դատալսումներ նշանակելու մասին:
2025 թվականի ապրիլի 14-ին Դատարանը որոշում է կայացրել թիվ ԵԴ1/1041/01/25 քրեական վարույթով մեղադրյալ Նիկիտա Սերգեյի Ֆատեևի նկատմամբ որպես այլընտրանքային խափանման միջոցներ կիրառված տնային կալանքը, գրավը՝ 5.000.000 (հինգ միլիոն) ՀՀ դրամի չափով և բացակայելու արգելքը անփոփոխ թողնելու մասին։ Թիվ ԵԴ1/1041/01/25 քրեական վարույթով մեղադրյալ Նիկիտա Սերգեյի Ֆատեևի նկատմամբ որպես այլընտրանքային խափանման միջոց կիրառված տնային կալանքի ժամկետը երկարաձգվել է երեք ամիս ժամկետով։

Համաձայնեցված վարույթ կիրառելու միջնորդությունը և դրա քննարկումը․
ՀՀ քրեական դատավարության օրենսգրքի 311-րդ հոդվածով նախատեսված հարցերի քննարկման ընթացքում մեղադրյալ Նիկիտա Ֆատեևը միջնորդություն ներկայացրեց կիրառել համաձայնեցման վարույթ և հայտնեց, որ միջնորդությունը ներկայացնում է կամավոր, խորհրդակցել է պաշտպանի հետ, գիտակցում է համաձայնեցման վարույթով դատաքննություն անցկացնելու հետևանքները, ներկայացված մեղադրանքն իրեն պարզ է, համաձայն է մեղադրանքի հետ, ինչպես նաև հայտնեց, որ ներկայացված մեղադրանքում իրեն մեղավոր է ճանաչում:
Հանրային մեղադրող Գ․Հովակիմյանը և պաշտպաններ Լ․Հովհաննիսյանը, Մ․Մարտիրոսյանը չառարկեցին համաձայնեցման վարույթ կիրառելու միջնորդության դեմ:
Դատարանը, նկատի ունենալով, որ առկա է ՀՀ քրեական դատավարության օրենսգրքի 458-րդ հոդվածի 1-ին մասով նախատեսված հիմքը, ինչպես նաև այն, որ մեղադրյալը համաձայն է իրեն ներկայացված արարքին, միջնորդությունը ներկայացրել է կամավոր, գիտակցում է իր միջնորդության բնույթը, հետևանքները, և բացակայում են նույն օրենսգրքի 458-րդ հոդվածի 2-րդ մասով նախատեսված` համաձայնեցման վարույթի կիրառումը բացառող հանգամանքները, և ղեկավարվելով ՀՀ քրեական դատավարության օրենսգրքի 459-րդ հոդվածի 2-րդ մասով, բավարարեց մեղադրյալի միջնորդությունը և կողմերի բանակցությունների համար սահմանեց վերջիններիս կողմից միջնորդված ժամկետը:

Համաձայնության մասին արձանագրությունը.
«ԱՐՁԱՆԱԳՐՈՒԹՅՈՒՆ
ՀՀ քրեական դատավարության օրենսգրքի 460-րդ հոդվածով սահմանված կարգով համաձայնության գալու վերաբերյալ
Սույն արձանագրությունը կազմվել է թիվ ԵԴ1/1041/01/25 քրեական գործով 2025 թվականի հունիսի 16-ին Երևան քաղաքում մասնակցությամբ.
1. Հանրային մեղադրող՝ ՀՀ գլխավոր դատախազության սահմանադրական կարգի հիմունքների, պետության և հասարակական անվտանգության դեմ ուղղված հանցագործությունների գործերով վարչության պետի տեղակալ Գորիկ Հովակիմյանի,
2. Մեղադրյալ Նիկիտա Սերգեյի Ֆատեևի (ծնված՝ 2002 թվականի օգոստոսի 10-ին, Ռուսաստանի Դաշնության Մոսկվա քաղաքում, Ռուսաստանի Դաշնության քաղաքացի, ազգությամբ ռուս, մայրենի լեզուն՝ ռուսերեն, չի աշխատում, նախկինում չդատված, թերի բարձրագույն կրթությամբ, ամուսնացած, բնակվել է Վրաստանի Թբիլիսի քաղաքի Դավիդ Սուլիաշվիլիի փողոցի 6-րդ տանը, ՀՀ-ում բնակվում է Երևան քաղաքի Ռաֆայել Իսրաելյան փողոցի 30/3 հասցեի բնակարանում),
3. Պաշտպաններ՝ ՀՀ փաստաբանների պալատի փաստաբաններ Մարտիկ Մարտիրոսյանի և Լուսինե Հովհաննիսյանի,
4. Թարգմանիչ՝ Լիանա Կարապետյան:
Նիկիտա Սերգեյի Ֆատեևին ՀՀ քրեական օրենսգրքի 457-րդ հոդվածի 1-ին մասով և 44-469-րդ հոդվածի 1-ին մասով մեղադրանք է ներկայացվել այն բանի համար, որ նա 2025 թվականի փետրվարի 15-ին՝ ժամը 08։10-ին, Երևան-Միլան թիվ 245 չվերթի սահմանային վերահսկողության ժամանակ, նպատակ ունենալով ապօրինի՝ առանց սահմանված փաստաթղթերի և պատշաճ թույլտվության, կեղծ փաստաթղթի օգտագործմամբ հատել Հայաստանի Հանրապետության (այսուհետ՝ ՀՀ) պետական սահմանը, մոտեցել է ՀՀ «Զվարթնոց» օդանավակայանում տեղակայված ՀՀ ԱԱԾ ՍԶ հսկիչ անցագրային սահմանային անցակետին, որտեղ, դիտավորությամբ խախտելով «Պետական սահմանի մասին» ՀՀ օրենքի 11-րդ հոդվածի և «ՀՀ պետական սահմանի ռեժիմ սահմանելու մասին» ՀՀ կառավարության 2011 թվականի մայիսի 12-ի թիվ 702-Ն որոշման պահանջները, ՀՀ ԱԱԾ ՍԶ ծառայողին է ներկայացրել դեռևս չպարզված հանգամանքներում ձեռք բերված, պետական լիազոր մարմնի կողմից տրվող, իրավաբանական փաստ հավաստող, իրավունք վերապահող, Լեհաստանի Հանրապետության քաղաքացու՝ իր տվյալներով ձևակերպված RR1465154 սերիա-համարի կեղծ կացության քարտը՝ այդ կերպ փորձելով ապօրինի՝ առանց սահմանված փաստաթղթերի և պատշաճ թույլտվության, կեղծ փաստաթղթի օգտագործմամբ հատել ՀՀ պետական սահմանը, սակայն նրա դիտավորության մեջ ընդգրկված հանցագործությունը նրա կամքից անկախ հանգամանքներով չի իրագործվել, քանի որ կացության կեղծ քարտի օգտագործման փաստը հայտնաբերվել է ՀՀ ԱԱԾ սահմանապահ ծառայողների կողմից։
Մեղադրյալ Նիկիտա Ֆատեևի նկատմամբ Երևան քաղաքի առաջին ատյանի ընդհանուր իրավասության քրեական դատարանի՝ 2025 թվականի փետրվարի 17-ի թիվ ԵԴ1/0213/06/25 որոշմամբ որպես խափանման միջոց կիրառվել է կալանքը՝ 1 ամսով։
Երևան քաղաքի առաջին ատյանի ընդհանուր իրավասության քրեական դատարանի՝ 2025 թվականի մարտի 14-ի թիվ ԵԴ1/0213/06/25 որոշմամբ մեղադրյալ Նիկիտա Ֆատեևի նկատմամբ որպես այլընտրանքային համակցված խափանման միջոցներ են կիրառվել տնային կալանքը, գրավ՝ 5․000․000 ՀՀ դրամի չափով և բացակայելու արգելքը։
Դատարանի՝ 2025 թվականի ապրիլի 14-ի որոշմամբ մեղադրյալ Նիկիտա Ֆատեևի նկատմամբ կիրառված տնային կալանքի ժամկետն երկարաձգվել է 3 ամիս ժամկետով՝ մինչև 2025 թվականի հուլիսի 14-ը ներառյալ:
Հիմք ընդունելով ՀՀ քրեական դատավարության օրենսգրքի 460-րդ հոդվածը և ղեկավարվելով ՀՀ քրեական օրենսգրքի 77-րդ հոդվածը՝ կողմերը համաձայնվում են մեղադրյալ Նիկիտա Ֆատեևին մեղսագրվող արարքների համար հետևյալ պատժատեսակի և պատժաչափի վերաբերյալ.
ՀՀ քրեական օրենսգրքի 457-րդ հոդվածի 1-ին մասով պատիժ նշանակել տուգանք՝ նվազագույն աշխատավարձի քսանապատիկի՝ 1.500.000 ՀՀ դրամի չափով:
ՀՀ քրեական օրենսգրքի 44-469-րդ հոդվածի 1-ին մասով պատիժ նշանակել տուգանք՝ նվազագույն աշխատավարձի երեսնապատիկի՝ 2.250.000 ՀՀ դրամի չափով և Հայաստանի Հանրապետության տարածքից վտարելը՝ 5 տարի ժամկետով:
ՀՀ քրեական օրենսգրքի 74-րդ հոդվածի 1-ին մասի կանոնով, նշանակված պատիժները լրիվ գումարելու, ինչպես նաև՝ մեղադրյալ Նիկիտա Ֆատեևի անազատության մեջ գտնված լինելու հանգամանքով պայմանավորված, նշանակված հիմնական պատիժը մեղմացնելու միջոցով Նիկիտա Ֆատեևի նկատմամբ վերջնական պատիժ նշանակել տուգանք՝ 2.500.000 ՀՀ դրամի չափով և Հայաստանի Հանրապետության տարածքից Վրաստան վտարելը՝ 5 տարի ժամկետով:
Մեղադրյալ Նիկիտա Ֆատեևին Հայաստանի Հանրապետության տարածքից վտարելը՝ որպես լրացուցիչ պատժի հաշվարկը սկսել ՀՀ տարածքից վտարելու պահից:
Մեղադրյալ Նիկիտա Սերգեյի Ֆատեևի նկատմամբ որպես խափանման միջոց կիրառված տնային կալանքը վերացնել, իսկ այլընտրանքային համակցված խափանման միջոցներ գրավը և բացակայելու արգելքը թողնել անփոփոխ:
Վարութային ծախսերի հարցը համարել լուծված:
Հանրային մեղադրող՝ /ստորագրություն/ Գ. Հովակիմյան
Մեղադրյալ՝ /ստորագրություն/ Ն.Ֆատեև
Պաշտպաններ՝ /ստորագրություն/ Մ. Մարտիրոսյան
/ստորագրություն/ Լ. Հովհաննիսյան
Թարգմանիչ՝ /ստորագրություն/ Լ․Կարապետյան»:
Դատարանը, ղեկավարվելով ՀՀ քրեական դատավարության օրենսգրքի 461-րդ հոդվածի 1-ին մասով, ընդունեց համաձայնության մասին արձանագրությունը և որոշում կայացրեց լրացուցիչ դատալսումներ անցկացնելու մասին:

Համաձայնեցման վարույթով լրացուցիչ դատալսումները.
Հանրային մեղադրողի կողմից համաձայնության մասին արձանագրության հրապարակումից հետո մեղադրյալ Նիկիտա Ֆատեևը, պատասխանելով նախագահողի հարցերին, հայտնեց, որ իրեն պարզ է կնքված համաձայնության բովանդակությունը, արտահայտել է իր իրական կամքը, գիտակցել է կնքված համաձայնության հետևանքները և պնդում է կնքված համաձայնությունը։
Հրապարակված արձանագրության վերաբերյալ հանրային մեղադրողը և պաշտպանները հայտնեցին, որ պնդում են կնքված համաձայնությունը:

Դատարանի իրավական վերլուծությունները․
ՀՀ քրեական դատավարության օրենսգրքի 463-րդ հոդվածի 1-ին մասի համաձայն՝ համաձայնեցման վարույթի արդյունքով դատարանը կայացնում է մեղադրական դատավճիռ՝ հաշվի առնելով սույն օրենսգրքի 347-350-րդ հոդվածներով սահմանված կարգով՝ հաշվի առնելով սույն հոդվածով նախատեսված առանձնահատկությունները:
Նույն հոդվածի 2-րդ և 3-րդ մասերի համաձայն՝ մեղադրական դատավճիռը պարունակում է համաձայնության մասին արձանագրության տեքստի բառացի շարադրանքը: Մեղադրական դատավճռով դատարանը նշանակում է համաձայնության մասին արձանագրությամբ համաձայնեցված պատիժը (պատժատեսակն ու պատժաչափը), սահմանում է բռնագրավման ենթակա գույքը և դրա չափը:
Այսպիսով, ներկայացված մեղադրանքը մեղադրյալ Ն․Ֆատեևի կողմից ընդունելու և համաձայնեցման վարույթ կիրառելու պայմաններում Դատարանը գտնում է, որ մեղադրյալին մեղսագրված արարքների կատարումն ապացուցված է, արարքների իրավաբանական որակումը տրված է ճիշտ, համապատասխանում է ՀՀ քրեական օրենսգրքի 457-րդ հոդվածի 1-ին մասով և 44-469-րդ հոդվածի 1-ին մասով նախատեսված հանցագործությունների հատկանիշներին։
Դատարանը, միաժամանակ հաշվի առնելով, որ կատարած հանցագործությունների համար մեղադրյալ Նիկիտա Ֆատեևի՝ պատժի ենթակա լինելու և նրա նկատմամբ պատիժ նշանակելու հարցերը համաձայնեցվել են կողմերի միջև և ղեկավարվելով ՀՀ քրեական դատավարության օրենսգրքի 463-րդ հոդվածի 3-րդ մասով՝ գտնում է, որ դրանք պետք է լուծվեն ըստ համաձայնության մասին արձանագրության։
Անդրադառնալով մեղադրյալի նկատմամբ կիրառված խափանման միջոցին՝ Դատարանը գտնում է, որ Նիկիտա Սերգեյի Ֆատեևի նկատմամբ կիրառված խափանման միջոցը՝ տնային կալանքը, պետք է վերացնել, իսկ գրավը և բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը, իսկ դատավճռի օրինական ուժի մեջ մտնելուց հետո գրավի գումար հանդիսացող 5.000.000 (հինգ միլիոն) ՀՀ դրամը՝ մուծված Երևան քաղաքի առաջին ատյանի ընդհանուր իրավասության քրեական դատարանի դեպոզիտ հաշվին, վերադարձնել գրավատուին:
Անդրադառնալով ապացույցներին՝ Դատարանն արձանագրում է, որ դատավճիռն օրինական ուժի մեջ մտնելուց հետո քրեական գործով իրեղեն ապացույց ճանաչված՝ «Այֆոն 12 մինի» մոդելի, 353022116122752 նույնականացման համարի բջջային հեռախոսը պետք է վերադարձնել օրինական տիրապետողին, իսկ Նիկիտա Ֆատեևի անվամբ լրացված Լեհաստանի Հանրապետության քաղաքացու ժամանակավոր կացության գրանցման վկայականը և որպես ապացույց արտավարութային փաստաթուղթ ճանաչված՝ առերևույթ հանցանքի մասին հաղորդումը, զեկուցագիրը, անձանց և փաստաթղթերի հատուկ ստուգման ենթարկելու թիվ 2/150201 ակտը, Նիկիտա Ֆատեևի ձերբակալման արձանագրությունը, Նիկիտա Ֆատեևի տվյալներով ձևակերպված սահմանահատումների պատմության վերաբերյալ տեղեկանքը, ՀՀ ՆԳՆ ոստիկանության ՔՈԳՎ ՀՀ-ում Ինտերպոլի ԱԿԲ-ից ստացված՝ 20.02.2025 թվականի AG/24/44/25 գրությանը կից տրամադրված տեղեկանքը պահել գործի նյութերի հետ՝ դրանց պահման ամբողջ ընթացքում:
Ինչ վերաբերում է արտավարութային փաստաթուղթ ճանաչված Նիկիտա Սերգեյի Ֆատեևի տվյալներով տրված ՌԴ քաղաքացու 769367178 համարի անձնագրին, ապա այն դատավճիռն օրինական ուժի մեջ մտնելուց հետո շահագրգիռ անձանց խնդրանքով կհանձնվի նրանց, իսկ քրեական գործի նյութերում կպահվի դրա պատճենը:
ՀՀ քրեական դատավարության օրենսգրքի 463-րդ հոդվածի 5-րդ մասի համաձայն՝ նույն օրենսգրքի 167-րդ հոդվածի 1-ին մաuով նախատեսված վարութային ծախսերը մեղադրյալից ենթակա չեն:
Ելնելով վերոգյալից և ղեկավարվելով ՀՀ քրեական դատավարության օրենսգրքի 33-րդ, 347-350-րդ, 364-րդ, 458-464-րդ հոդվածներով՝ Դատարանը

Վ Ճ Ռ Ե Ց
Նիկիտա Սերգեյի Ֆատեևի մեղավոր ճանաչել ՀՀ քրեական օրենսգրքի 457-րդ հոդվածի 1-ին մասով և 44-469-րդ հոդվածի 1-ին մասով։
ՀՀ քրեական օրենսգրքի 457-րդ հոդվածի 1-ին մասով Նիկիտա Սերգեյի Ֆատեևի նկատմամբ պատիժ նշանակել տուգանք՝ նվազագույն աշխատավարձի քսանապատիկի՝ 1․500․000 (մեկ միլիոն հինգ հարյուր հազար) ՀՀ դրամի չափով:
ՀՀ քրեական օրենսգրքի 44-469-րդ հոդվածի 1-ին մասով Նիկիտա Սերգեյի Ֆատեևի նկատմամբ պատիժ նշանակել տուգանք՝ նվազագույն աշխատավարձի երեսնապատիկի՝ 2․250․000 (երկու միլիոն երկու հարյուր հիսուն հազար) ՀՀ դրամի չափով, և Հայաստանի Հանրապետության տարածքից Վրաստանի Հանրապետություն վտարելը 5 (հինգ) տարի ժամկետով:
ՀՀ քրեական օրենսգրքի 74-րդ հոդվածով սահմանված կարգով` նշանակված պատիժները լրիվ գումարելու միջոցով, Նիկիտա Սերգեյի Ֆատեևի նկատմամբ վերջնական պատիժ նշանակել տուգանք՝ 3․750․000 (երեք միլիոն յոթ հարյուր հիսուն հազար) ՀՀ դրամի չափով, և Հայաստանի Հանրապետության տարածքից Վրաստանի Հանրապետություն վտարելը 5 (հինգ) տարի ժամկետով։
ՀՀ քրեական օրենսգրքի 79-րդ հոդվածի 4-րդ մասի կիրառմամբ նշանակված պատիժը մեղմացնել և վերջնական պատիժ նշանակել տուգանք՝ 2․500․000 (երկու միլիոն հինգ հարյուր հազար) ՀՀ դրամի չափով, և Հայաստանի Հանրապետության տարածքից Վրաստանի Հանրապետություն վտարելը 5 (հինգ) տարի ժամկետով։
Մեղադրյալ Նիկիտա Սերգեյի Ֆատեևի նկատմամբ որպես լրացուցիչ պատիժ նշանակված Հայաստանի Հանրապետության տարածքից վտարելու պատժի սկիզբը հաշվել ՀՀ տարածքից վտարելու պահից։
Նիկիտա Սերգեյի Ֆատեևի նկատմամբ կիրառված խափանման միջոցը՝ տնային կալանքը, վերացնել, իսկ գրավը և բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը, իսկ դատավճռի օրինական ուժի մեջ մտնելուց հետո գրավի գումար հանդիսացող 5.000.000 (հինգ միլիոն) ՀՀ դրամը՝ մուծված Երևան քաղաքի առաջին ատյանի ընդհանուր իրավասության քրեական դատարանի դեպոզիտ հաշվին, վերադարձնել գրավատուին:
Նիկիտա Սերգեյի Ֆատեևին անհապաղ ազատ արձակել դատական նիստերի դահլիճում։
Դատավճիռն օրինական ուժի մեջ մտնելուց հետո քրեական գործով իրեղեն ապացույց ճանաչված՝ «Այֆոն 12 մինի» մոդելի, 353022116122752 նույնականացման համարի բջջային հեռախոսը վերադարձնել օրինական տիրապետողին, իսկ Նիկիտա Ֆատեևի անվամբ լրացված Լեհաստանի Հանրապետության քաղաքացու ժամանակավոր կացության գրանցման վկայականը և ապացույց ճանաչված արտավարութային փաստաթղթերը պահել գործի նյութերի հետ՝ դրանց պահման ամբողջ ընթացքում:
Դատավճիռը, բացառությամբ ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով և 377-րդ հոդվածով նախատեսված հիմքերի, կարող է բողոքարկվել ՀՀ վերաքննիչ քրեական դատարան՝ ստանալու պահից մեկամսյա ժամկետում:

ԴԱՏԱՎՈՐ Մ.ԱՐԶՈւՄԱՆՅԱՆ