Գործ ԵԴ1/1018/01/25





Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«14» ապրիլի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)՝ նախագահությամբ դատավոր Ս.Յուզբաշյանի, համաձայնությամբ տուգանք նշանակելու վարույթի կիրառմամբ, գրավոր ընթացակարգով քննության առնելով քրեական գործն ըստ մեղադրանքի՝
Նարեկ Աշոտի Խաչատրյանի՝ ծնված՝ 15.02.1987թ., ազգությամբ հայ, ՀՀ քաղաքացի, բարձրագույն կրթությամբ, աշխատում է «ՄԿՌ ԳՐՈՒՊ» ՍՊԸ-ում, կահույքի արտադրամասում որպես գլխավոր տնօրեն, ամուսնացած, խնամքին երկու անչափահաս երեխա, դատվածություն չունեցող, հաշվառված՝ ք.Երևան, Մարգարյան փողոց 17 շենք, 4 բնակարան հասցեում, բնակվող՝ ք.Մոսկվա, Կուրիժովա փող., 14 շենք 24 բնակարան հասցեում, մեղադրվում է ՀՀ քրեական օրենսգրքի 297-րդ հոդվածի 1-ին մասով, որպես խափանման միջոց է ընտրված գրավը.

Արտյոմ Վաղինակի Ավետիսյանի՝ ծնված 22.03.1991թ., ազգությամբ հայ, ՌԴ քաղաքացի, բարձրագույն կրթությամբ, աշխատում է «ԻնԲիո» ՍՊԸ-ում որպես ատամնաբուժ, ամուսնացած, խնամքին երեք անչափահաս երեխա, դատվածություն չունեցող, հաշվառված և բնակվող՝ ՌԴ, քաղաք Վոլոգդա, Ակրուժնոյե խճուղի, 26 շենք, 436 բնակարան հասցեում, մեղադրվում է ՀՀ քրեական օրենսգրքի 297-րդ հոդվածի 1-ին մասով, որպես խափանման միջոց է ընտրված գրավը.

1. Գործի դատավարական նախապատմությունը.
1.1 2024 թվականի սեպտեմբերի 27-ին Նարեկ Աշոտի Խաչատրյանը ձերբակալվել է /հատոր 1-ին, գ.թ. 5-6/:
1.2 2024 թվականի սեպտեմբերի 27-ին Արտյոմ Վաղինակի Ավետիսյանը ձերբակալվել է /հատոր 1-ին, գ.թ. 15-16/:
1.3 2024 թվականի սեպտեմբերի 27-ին Արթուր Սարգսի Շուշանյանը ձերբակալվել է /հատոր 1-ին, գ.թ. 24-25/:
1.4 2024 թվականի սեպտեմբերի 28-ին ՀՀ քննչական կոմիտեի Երևան քաղաքի քննչական վարչության «Զվարթնոց» միջազգային օդանավակայանի տարածքում կատարված հանցագործությունների քննության բաժնում ՀՀ քրեական օրենսգրքի 195-րդ հոդվածի 2-րդ մասի 5-րդ կետով և ՀՀ քրեական օրենսգրքի 297-րդ հոդվածի 2-րդ մասի 1-ին կետով նախաձեռնվել է թիվ 70920024 քրեական վարույթը /հատոր 1-ին, գ.թ. 32/։
1.5 2024 թվականի սեպտեմբերի 28-ին որոշում է կայացվել թիվ 70920024 քրեական վարույթով հանցանք կատարած լինելու անմիջականորեն ծագած հիմնավոր կասկածի հիմքով Նարեկ Աշոտի Խաչատրյանին ձերբակալելու մասին /հատոր 1-ին, գ.թ. 35/:
1.6 2024 թվականի սեպտեմբերի 28-ին որոշում է կայացվել թիվ 70920024 քրեական վարույթով հանցանք կատարած լինելու անմիջականորեն ծագած հիմնավոր կասկածի հիմքով Արթուր Սարգսի Շուշանյանին ձերբակալելու մասին /հատոր 1-ին, գ.թ. 46/:
1.7 2024 թվականի սեպտեմբերի 28-ին որոշում է կայացվել թիվ 70920024 քրեական վարույթով հանցանք կատարած լինելու անմիջականորեն ծագած հիմնավոր կասկածի հիմքով Արտյոմ Վաղինակի Ավետիսյանին ձերբակալելու մասին /հատոր 1-ին, գ.թ. 52/:
1.8 2024 թվականի սեպտեմբերի 29-ին Նարեկ Աշոտի Խաչատրյանի նկատմամբ ՀՀ քրեական օրենսգրքի 297-րդ հոդվածի 2-րդ մասի 1-ին կետով հարուցվել է հանրային քրեական հետապնդում և նույն օրը նրան մեղադրանք է ներկայացվել /հատոր 1-ին, գ.թ. 99-100, 105-107/:
1.9 2024 թվականի սեպտեմբերի 29-ին Արտյոմ Վաղինակի Ավետիսյանի նկատմամբ ՀՀ քրեական օրենսգրքի 297-րդ հոդվածի 2-րդ մասի 1-ին կետով հարուցվել է հանրային քրեական հետապնդում և նույն օրը նրան մեղադրանք է ներկայացվել /հատոր 1-ին, գ.թ. 101-102, 111-113/:
1.10 2024 թվականի սեպտեմբերի 29-ին Արթուր Սարգսի Շուշանյանի նկատմամբ ՀՀ քրեական օրենսգրքի 297-րդ հոդվածի 2-րդ մասի 1-ին կետով հարուցվել է հանրային քրեական հետապնդում և նույն օրը նրան մեղադրանք է ներկայացվել /հատոր 1-ին, գ.թ. 103-104, 118/:
1.11 2024 թվականի սեպտեմբերի 30-ին Երևան քաղաքի առաջին ատյանի ընդհանուր իրավասության քրեական դատարանի թիվ ԵԴ1/1831/06/24 որոշմամբ Ն.Խաչատրյանի նկատմամբ կալանքը որպես խափանման միջոց կիրառելու վերաբերյալ քննիչի միջնորդությունը մերժվել է և վերջինս անհապաղ ազատ է արձակվել /հատոր 1-ին, գ.թ. 160-188/:
1.12 2024 թվականի սեպտեմբերի 30-ին Երևան քաղաքի առաջին ատյանի ընդհանուր իրավասության քրեական դատարանի թիվ ԵԴ1/1833/06/24 որոշմամբ Ա.Շուշանյանի նկատմամբ կալանքը որպես խափանման միջոց կիրառելու վերաբերյալ քննիչի միջնորդությունը մերժվել է և վերջինս անհապաղ ազատ է արձակվել /հատոր 1-ին, գ.թ. 189-202/:
1.13 2024 թվականի սեպտեմբերի 30-ին Երևան քաղաքի առաջին ատյանի ընդհանուր իրավասության քրեական դատարանի թիվ ԵԴ1/1832/06/24 որոշմամբ Ա.Ավետիսյանի նկատմամբ կալանքը որպես խափանման միջոց կիրառելու վերաբերյալ քննիչի միջնորդությունը մերժվել է /հատոր 1-ին, գ.թ. 203-218/:
1.14 2025 թվականի սեպտեմբերի 30-ին թիվ 70920024 քրեական վարույթով մեղադրյալ Արտյոմ Վաղինակի Ավետիսյանի նկատմամբ որպես խափանման միջոց է կիրառվել բացակայելու արգելքը /հատոր 1-ին, գ.թ. 219-220/:
1.15 2025 թվականի սեպտեմբերի 30-ին թիվ 70920024 քրեական վարույթով մեղադրյալ Արթուր Սարգսի Շուշանյանի նկատմամբ որպես խափանման միջոց է կիրառվել բացակայելու արգելքը /հատոր 1-ին, գ.թ. 222-223/:
1.16 2025 թվականի սեպտեմբերի 30-ին թիվ 70920024 քրեական վարույթով մեղադրյալ Նարեկ Աշոտի Խաչատրյանի նկատմամբ որպես խափանման միջոց է կիրառվել բացակայելու արգելքը /հատոր 1-ին, գ.թ. 223-224/:
1.17 2025 թվականի հոկտեմբերի 31-ին թիվ 70920024 քրեական վարույթով մեղադրյալ Արտյոմ Վաղինակի Ավետիսյանի նկատմամբ որպես այլընտրանքային խափանման միջոց է կիրառվել գրավը՝ 5.000.000 /հինգ միլիոն/ ՀՀ դրամի չափով և որպես խափանման միջոց կիրառված բացակայելու արգելը վերացվել է /հատոր 2-րդ, գ.թ. 59-66/:
1.18 2025 թվականի նոյեմբերի 19-ին թիվ 70920024 քրեական վարույթով մեղադրյալ Նարեկ Աշոտի Խաչատրյանի նկատմամբ որպես այլընտրանքային խափանման միջոց է կիրառվել գրավը՝ 4.000.000 /չորս միլիոն/ ՀՀ դրամի չափով և որպես խափանման միջոց կիրառված բացակայելու արգելը վերացվել է /հատոր 2-րդ, գ.թ. 214-202/:
1.19 2025 թվականի մարտի 24-ին Նարեկ Աշոտի Խաչատրյանի նկատմամբ ՀՀ քրեական օրենսգրքի 297-րդ հոդվածի 1-ին մասով հարուցվել է հանրային քրեական հետապնդում և նույն օրը նրան մեղադրանք է ներկայացվել /հատոր 3-րդ, գ.թ. 42-43, 72-75/:
1.20 2025 թվականի մարտի 24-ին Արտյոմ Վաղինակի Ավետիսյանի նկատմամբ ՀՀ քրեական օրենսգրքի 297-րդ հոդվածի 1-ին մասով հարուցվել է հանրային քրեական հետապնդում և նույն օրը նրան մեղադրանք է ներկայացվել /հատոր 3-րդ, գ.թ. 44-45, 65-68/
1.21 2025 թվականի մարտի 24-ին որոշում է կայացվել Արթուր Սարգսի Շուշանյանի նկատմամբ ՀՀ քրեական օրենսգրքի 297-րդ հոդվածի 2-րդ մասի 1-ին կետով քրեական հետապնդումը դադարեցնելու և կիրառված խափանման միջոցը վերացնելու մասին /հատոր 3-րդ հատոր գ.թ. 56-64/:
1.22 2025 թվականի մարտի 26-ին կազմվել է թիվ 70920024 քրեական վարույթով մեղադրական եզրակացությունը /հատոր 3-րդ, գ.թ. 84-102/:
1.23 2025 թվականի մարտի 24-ին կազմվել է թիվ 70920024 քրեական վարույթով համաձայնությամբ տուգանք նշանակելու վարույթ նախաձեռնելու մասին արձանագրություններ /հատոր 3-րդ, գ.թ. 108, 114/:
1.24 2025 թվականի մարտի 27-ին որոշում է կայացվել թիվ 70920024 քրեական վարույթով մեղադրական եզրակացությունը հաստատելու մասին։
1.25 2025 թվականի մարտի 27-ին թիվ 70920024 քրեական գործը մուտք է եղել դատարան, նույն օրը թիվ ԵԴ1/1018/01/25 համարի ներքո մակագրվել և նույն թվականի մարտի 28-ին հանձնվել է դատավոր Ս․ Յուզբաշյանին։

2. Մեղադրանքի փաստական նկարագրությունը.
2.1 Նարեկ Աշոտի Գևորգյանին ՀՀ քրեական օրենսգրքի 297-րդ հոդվածի 1-ին մասով մեղադրանք է ներկայացվել պատժի սպառնալիքով արգելված մեղավորությամբ կատարված այն արարքի կատարման համար, որ նա «խուլիգանություն կատարելու դիտավորությամբ, 2024 թվականի սեպտեմբերի 27-ին՝ ժամը 20:20-ի սահմաններում «Զվարթնոց» միջազգային օդանավակայանի ժամանման սրահում, իր անձի թվացյալ առավելությունն ընդգծելու մոլուցքով տարված, բացահայտ մարտահրավեր նետելով հասարակության և բարոյականության համընդհանուր ճանաչում ստացած նորմերին, ժամանման սրահում գտնվող անձանց նկատմամբ ցուցաբերել է անհարգալից, իրավական և բարոյական նորմերի նկատմամբ բացահայտ արհամարհական վերաբերմունք, որն արտահայտվել է Արտյոմ Վաղինակի Ավետիսյանի հասցեին բազմաթիվ հայհոյանքներ հնչեցնելով, ինչպես նաև վերջինիս հետ վիճաբանելով ու փոխադարձ հարվածներ հասցնելով, որպեսզի գործողությունների արդյունքում խախտվել է այնտեղ գտնվող բազմաթիվ անձանց անդորրը, խոչընդոտելով «Զվարթնոց» միջազգային օդանավակայանի բնականոն աշխատանքը»:
2.2 Արտյոմ Վաղինակի Ավետիսյանին ՀՀ քրեական օրենսգրքի 297-րդ հոդվածի 1-ին մասով մեղադրանք է ներկայացվել պատժի սպառնալիքով արգելված մեղավորությամբ կատարված այն արարքի կատարման համար, որ նա «խուլիգանություն կատարելու դիտավորությամբ, 2024 թվականի սեպտեմբերի 27-ին՝ ժամը 20:20-ի սահմաններում «Զվարթնոց» միջազգային օդանավակայանի ժամանման սրահում, իր անձի թվացյալ առավելությունն ընդգծելու մոլուցքով տարված, բացահայտ մարտահրավեր նետելով հասարակության և բարոյականության համընդհանուր ճանաչում ստացած նորմերին, ժամանման սրահում գտնվող անձանց նկատմամբ ցուցաբերել է անհարգալից, իրավական և բարոյական նորմերի նկատմամբ բացահայտ արհամարհական վերաբերմունք, որն արտահայտվել է Նարեկ Աշոտի Խաչատրյանի հասցեին բազմաթիվ հայհոյանքներ հնչեցնելով, ինչպես նաև վերջինիս հետվիճաբանելով ու փոխադարձ հարվածներ հասցնելով, որպեսզի գործողությունների արդյունքում խախտվել է այնտեղ գտնվող բազմաթիվ անձանց անդորրը, խոչընդոտելով «Զվարթնոց» միջազգային օդանավակայանի բնականոն աշխատանքը»:

3. Համաձայնությամբ տուգանք նշանակելու վարույթ կիրառելու մեղադրյալի համաձայնությունը և դրա քննարկումը
3.1 Ուսումնասիրելով քրեական գործի նյութերը, և հաշվի առնելով 1.23 կետում նշված հանգամանքը, Դատարանն արձանագրում է, որ մեղադրյալները ծանուցվել են համաձայնությամբ տուգանք նշանակելու վարույթ կիրառելու հնարավորության և իրավական հետևանքների մասին, ինչպես նաև քննիչի, պաշտպանների և մեղադրյալների մասնակցությամբ կազմվել են արձանագրություններ առ այն, որ մեղադրյալներ՝ Նարեկ Աշոտի Խաչատրյանը և Արտյոմ Վաղինակի Ավետիսյանը չեն վիճարկում իրենց ներկայացված մեղադրանքի փաստական հիմքն ու իրավական գնահատականը, պաշտպանների հետ խորհրդակցելուց հետո կամավոր ցանկություն են հայտնում, որ դատարանում գործի քննությունն իրականացվի համաձայնությամբ տուգանք նշանակելու վարույթի կարգով:
3.2 Համաձայնությամբ տուգանք նշանակելու վարույթ կիրառելու հնարավորության և իրավական հետևանքների մասին մեղադրյալներին ծանուցելիս հանրային մեղադրողն իր համաձայնությունն է հայտնել հիշյալ վարույթը կիրառելու վերաբերյալ /հատոր 3-րդ, գ.թ. 107, 113/։
3.3 Նկատի ունենալով, որ քրեական գործով առկա է ՀՀ քրեական օրենսգրքի 464.6-րդ հոդվածով սահմանված կարգով կազմված և ստորագրված՝ մեղադրյալների համաձայնությամբ տուգանք նշանակելու վարույթ կիրառելու իրավունքը բացատրելու մասին արձանագրություն, միևնույն ժամանակ բացակայում են ՀՀ քրեական օրենսգրքի 464.7-րդ հոդվածի 2-րդ մասով նախատեսված հանգամանքները, Դատարանը 2025 թվականի մարտի 31-ին որոշում է կայացրել քրեական գործով վարույթ ստանձնելու և համաձայնությամբ տուգանք նշանակելու վարույթ հարուցելու մասին:

4. Դատարանի իրավական վերլուծությունները.
4.1 Ներկայացված մեղադրանքը մեղադրյալ Նարեկ Աշոտի Խաչատրյանի կողմից ընդունելու և համաձայնությամբ տուգանք նշանակելու վարույթ կիրառելու և գործով ձեռք բերված ապացույցների ընդհանուր կարգով սահմանված հետազոտություն չկատարելու պայմաններում, Դատարանն արձանագրում է, որ Ն.Խաչատրյանը կատարել է իրեն մեղսագրված հանցանքը, այն ճիշտ է որակված և համապատասխանում է ՀՀ քրեական օրենսգրքի 297-րդ հոդվածի 1-ին մասով նախատեսված հանցագործության հատկանիշներին, ինչպես նաև ապացուցված է մեղադրյալի մեղավորությունը տվյալ արարքը կատարելու մեջ։
4.2 Հաստատված համարելով մեղադրյալ Նարեկ Աշոտի Խաչատրյանի մեղավորությունը ՀՀ քրեական օրենսգրքի 297-րդ հոդվածի 1-ին մասով նախատեսված հանցանքի կատարման մեջ՝ Դատարանը գտնում է, որ մեղադրյալը ենթակա է քրեական պատասխանատվության և պատժի:
4.3 Մեղադրյալ Նարեկ Աշոտի Խաչատրյանի նկատմամբ պատիժ նշանակելու հարցը քննարկելիս՝ Դատարանն արձանագրում է հետևյալը.
ՀՀ քրեական օրենսգրքի 7-րդ հոդվածի 1-ին մասի համաձայն՝
Հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը։
ՀՀ քրեական օրենսգրքի 55-րդ հոդվածի համաձայն՝
«1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:»:
ՀՀ քրեական օրենսգրքի 69-րդ հոդվածի համաձայն՝
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե Դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները:
4. Պատժի կատարման կարգը և պայմանները սահմանվում են Հայաստանի Հանրապետության քրեակատարողական օրենսդրությամբ:»:
ՀՀ քրեական օրենսգրքի 77-րդ հոդվածի համաձայն՝
«/…/
6. Ավարտված կամ չավարտված հանցագործություններով համաձայնությամբ տուգանք նշանակելու վարույթի դեպքում նշանակվում է սույն օրենսգրքի Հատուկ մասի համապատասխան հոդվածի սանկցիայով նախատեսված տուգանքի նվազագույն չափը՝ առանց լրացուցիչ պատիժ և անվտանգության միջոց նշանակելու:
/…/»:
ՀՀ քրեական օրենսգրքի 79-րդ հոդվածի համաձայն՝
«1. Որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու, օտարերկրյա քաղաքացուն Հայաստանի Հանրապետության տարածքից վտարելու, զինվորական ծառայության մեջ սահմանափակման, ազատության սահմանափակման, կարգապահական գումարտակում պահելու, ազատազրկման ժամկետները հաշվարկվում են ամիսներով և տարիներով: Հանրային աշխատանքների ժամկետը հաշվարկվում է ժամերով: Կարճաժամկետ ազատազրկման ժամկետը հաշվարկվում է օրերով և ամիսներով:
2. Սույն հոդվածի 1-ին մասում նշված պատիժները փոխարինելիս կամ գումարելիս, ինչպես նաև պատիժը հաշվակցելիս ժամկետները կարող են հաշվարկվել օրերով:
3. Մինչև դատավճռի օրինական ուժի մեջ մտնելը, անկախ Հայաստանի Հանրապետության իրավազորությունից, փաստացի անազատության մեջ գտնվելու ժամկետը հաշվակցվում է կարճաժամկետ ազատազրկման, կարգապահական գումարտակում պահելու, ազատազրկման ձևով նշանակված պատժին` 1 օրը հաշվելով 1 օրվա դիմաց, ազատության սահմանափակման ձևով նշանակված պատժին՝ 1 օրը հաշվելով 2 օրվա դիմաց, իսկ հանրային աշխատանքների դեպքում՝ 1 օրը 8 ժամի դիմաց:
4. Անազատության մեջ գտնվող անձի նկատմամբ տուգանքի, որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու, զինվորական ծառայության մեջ սահմանափակման ձևով հիմնական պատիժ նշանակելիս դատարանը, հաշվի առնելով մինչև դատավճիռ կայացնելը, անկախ Հայաստանի Հանրապետության իրավազորությունից, փաստացի անազատության մեջ գտնվելու ժամկետը, մեղմացնում է նշանակված պատիժը կամ ազատում է պատիժը կրելուց»:
ՀՀ քրեական օրենսգրքի 297-րդ հոդվածի 1-ին մասի համաձայն՝
«Խուլիգանությունը` հասարակության նկատմամբ անհարգալից կամ իրավական կամ բարոյական նորմերի նկատմամբ բացահայտ արհամարհական վերաբերմունք ցուցաբերելը, որը դրսևորվել է անձին ստորացնելով կամ հայհոյանքներով կամ անպարկեշտ արտահայտություններով կամ համակեցության կանոնների ցուցադրաբար անտեսմամբ մարդկանց անդորրը խախտելով կամ նույն եղանակներով հանրային միջոցառումը, արարողությունը խափանելով կամ հասարակական նշանակության օբյեկտի, հիմնարկի կամ կազմակերպության բնականոն աշխատանքը խոչընդոտելով՝
պատժվում է տուգանքով՝ առավելագույնը քսանապատիկի չափով, կամ հանրային աշխատանքներով՝ ութսունից հարյուր հիսուն ժամ տևողությամբ, կամ ազատության սահմանափակմամբ՝ առավելագույնը երկու տարի ժամկետով, կամ կարճաժամկետ ազատազրկմամբ՝ առավելագույնը մեկ ամիս ժամկետով, կամ ազատազրկմամբ՝ առավելագույնը երկու տարի ժամկետով»:
ՀՀ քրեական օրենսգրքի 3-րդ հոդվածի 1-ին մասի 6-րդ և 7-րդ կետերի համաձայն՝
«6) ամսական եկամուտ` հանցանքն ավարտվելու օրվան նախորդող 12 ամիսների ընթացքում անձի ստացած միջին ամսական եկամտի 35 տոկոսը: Միջին ամսական եկամտի մեջ հաշվարկվում են ստացվող աշխատավարձը և դրան հավասարեցված այլ վճարումները, անձի կողմից իր ակտիվների ներդրմամբ (տրամադրմամբ) այլ անձանց գործունեությունից ստացված եկամուտը (շահաբաժինը, տոկոսը, ռոյալթին, վարձակալական վճարը): Ամսական եկամուտը հաշվարկելիս հաշվի չեն առնվում դրանց համար վճարվող հարկերը, տուրքերը կամ այլ վճարներ.
7) նվազագույն աշխատավարձ՝ «Նվազագույն ամսական աշխատավարձի մասին» օրենքով սահմանված նվազագույն ամսական աշխատավարձի չափը»:
Նվազագույն աշխատավարձի մասին ՀՀ օրենքի 1-ին հոդվածի համաձայն՝ 2023 թվականի հունվարի 1-ից «Հայաստանի Հանրապետությունում նվազագույն ամսական աշխատավարձը սահմանել 75000 դրամ»:
ՀՀ քրեական օրենսգրքի 59-րդ հոդվածի համաձայն՝
«1. Տուգանքը դրամական տուժանք է, որը նշանակվում է սույն օրենսգրքով նախատեսված դեպքերում և չափերով:
2. Տուգանքը որպես հիմնական պատիժ կարող է նշանակվել սույն օրենսգրքի Հատուկ մասով նախատեսված դեպքերում:
3. Տուգանքը որպես հիմնական պատիժ սահմանվում է ոչ մեծ և միջին ծանրության հանցագործությունների համար՝ հանցանք կատարած անձի ամսական եկամտի հնգապատիկից հիսնապատիկի չափով։
/.../
5․ Հանցանք կատարած անձի եկամտի բացակայության կամ դրա չափը պարզելու անհնարինության դեպքում տուգանքի չափը հաշվարկվում է հանցանքը կատարելու պահին նվազագույն աշխատավարձի չափով:
/.../»:
4.4 Վերը մեջբերված իրավական նորմերի լույսի ներքո հաշվի առնելով այն հանգամանքը, որ մեղադրյալ Նարեկ Աշոտի Խաչատրյանին մեղսագրվող արարքի համար տուգանքի ձևով նախատեսված պատժի նվազագույն չափը կազմում է հանցանք կատարած անձի ամսական եկամտի հնգապատիկը, ինչպես նաև այն, որ նրա՝ հանցանքը ավարտվելու օրվան նախորդող 12 ամիսների ընթացքում ստացած միջին ամսական եկամուտները բացակայում են, ուստի Դատարանը գտնում է, որ մեղադրյալ Նարեկ Աշոտի Խաչատրյանի նկատմամբ պետք է նշանակել ՀՀ քրեական օրենսգրքի 297-րդ հոդվածի 1-ին մասի սանկցիայով նախատեսված և թույլատրելի պատժի հետևյալ պատժաչափը՝ տուգանք՝ նվազագույն աշխատավարձի հնգապատիկի՝ 375.000 /երեք հարյուր յոթանասունհինգ հազար/ ՀՀ դրամի չափով։
Հաշվի առնելով, որ Նարեկ Աշոտի Խաչատրյանը մինչդատական վարույթի ընթացքում՝ 2024 թվականի սեպտեմբերի 27-ից մինչև 2024 թվականի սեպտեմբերի 30-ը՝ 3 /երեք/ օր գտնվել է փաստացի անազատության մեջ, ուստի ՀՀ քրեական օրենսգրքի 79-րդ հոդվածի կիրառմամբ՝ փաստացի անազատության մեջ գտնվելու ժամկետի հաշվառմամբ՝ անհրաժեշտ է մեղմացնել Նարեկ Աշոտի Խաչատրյանի նկատմամբ նշանակված 375.000 /երեք հարյուր յոթանասունհինգ հազար/ ՀՀ դրամ չափով տուգանքը և վերջնական պատիժ սահմանել տուգանք՝ 300.000 /երեք հարյուր հազար/ ՀՀ դրամ չափով:
4.5 Անդրադառնալով մեղադրյալ Ն.Խաչատրյանի նկատմամբ մինչդատական վարույթի ընթացքում ընտրված խափանման միջոցի հարցին՝ Դատարանը գտնում է, որ այն պետք է թողնել անփոփոխ` մինչ դատավճռի օրինական ուժի մեջ մտնելը: Դատավճռի օրինական ուժի մեջ մտնելուց հետո պետք է վերացնել այն, իսկ գրավի գումարը՝ 4.000.000 /չորս միլիոն/ ՀՀ դրամը, վերադարձնել գրավատուին:
4.6 Ներկայացված մեղադրանքը մեղադրյալ Արտյոմ Վաղինակի Ավետիսյանի կողմից ընդունելու և համաձայնությամբ տուգանք նշանակելու վարույթ կիրառելու և գործով ձեռք բերված ապացույցների ընդհանուր կարգով սահմանված հետազոտություն չկատարելու պայմաններում, Դատարանն արձանագրում է, որ Ա.Ավետիսյանը կատարել է իրեն մեղսագրված հանցանքը, այն ճիշտ է որակված և համապատասխանում է ՀՀ քրեական օրենսգրքի 297-րդ հոդվածի 1-ին մասով նախատեսված հանցագործության հատկանիշներին, ինչպես նաև ապացուցված է մեղադրյալի մեղավորությունը տվյալ արարքը կատարելու մեջ։
4.7 Հաստատված համարելով մեղադրյալ Արտյոմ Վաղինակի Ավետիսյանին մեղավորությունը ՀՀ քրեական օրենսգրքի 297-րդ հոդվածի 1-ին մասով նախատեսված հանցանքի կատարման մեջ՝ Դատարանը գտնում է, որ մեղադրյալը ենթակա է քրեական պատասխանատվության և պատժի:
4.8 Մեղադրյալ Արտյոմ Վաղինակի Ավետիսյանի նկատմամբ պատիժ նշանակելու հարցը քննարկելիս՝ Դատարանը, ղեկավարվելով 4.3 կետում առկա իրավական նորմերով և հաշվի առնելով այն հանգամանքը, որ մեղադրյալներ Արտյոմ Վաղինակի Ավետիսյանին մեղսագրվող արարքի համար տուգանքի ձևով նախատեսված պատժի նվազագույն չափը կազմում է հանցանք կատարած անձի ամսական եկամտի հնգապատիկը, ինչպես նաև այն, որ նրա՝ հանցանքը ավարտվելու օրվան նախորդող 12 ամիսների ընթացքում ստացած միջին ամսական եկամուտները բացակայում են, ուստի Դատարանը գտնում է, որ մեղադրյալ Արտյոմ Վաղինակի Ավետիսյանի նկատմամբ պետք է նշանակել ՀՀ քրեական օրենսգրքի 297-րդ հոդվածի 1-ին մասի սանկցիայով նախատեսված և թույլատրելի պատժի հետևյալ պատժաչափը՝ տուգանք՝ նվազագույն աշխատավարձի հնգապատիկի՝ 375.000 /երեք հարյուր յոթանասունհինգ հազար/ ՀՀ դրամի չափով։
Հաշվի առնելով, որ Արտյոմ Վաղինակի Ավետիսյանը մինչդատական վարույթի ընթացքում՝ 2024 թվականի սեպտեմբերի 27-ից մինչև 2024 թվականի սեպտեմբերի 30-ը՝ 3 /երեք/ օր գտնվել է փաստացի անազատության մեջ, ուստի ՀՀ քրեական օրենսգրքի 79-րդ հոդվածի կիրառմամբ՝ փաստացի անազատության մեջ գտնվելու ժամկետի հաշվառմամբ՝ անհրաժեշտ է մեղմացնել Արտյոմ Վաղինակի Ավետիսյանի նկատմամբ նշանակված 375.000 /երեք հարյուր յոթանասունհինգ հազար/ ՀՀ դրամ չափով տուգանքը և վերջնական պատիժ սահմանել տուգանք՝ 300.000 /երեք հարյուր հազար/ ՀՀ դրամ չափով:
4.9 Անդրադառնալով մեղադրյալ Ա.Ավետիսյանի նկատմամբ մինչդատական վարույթի ընթացքում ընտրված խափանման միջոցի հարցին՝ Դատարանը գտնում է, որ այն պետք է թողնել անփոփոխ` մինչ դատավճռի օրինական ուժի մեջ մտնելը: Դատավճռի օրինական ուժի մեջ մտնելուց հետո պետք է վերացնել այն, իսկ գրավի գումարը՝ 5.000.000 /հինգ միլիոն/ ՀՀ դրամը, վերադարձնել գրավատուին:
4.10 Դատարանը գտնում է նաև, որ վարույթային ծախսերի հարցը պետք է համարել լուծված, քանի որ ՀՀ քրեական դատավարության օրենսգրքի 464.9-րդ հոդվածի 4-րդ մասի համաձայն՝ նույն օրենսգրքի 167-րդ հոդվածի 1-ին մաuով նախատեսված վարույթային ծախսերը մեղադրյալից ենթակա չեն բռնագանձման:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 347-350-րդ, 352-353-րդ, 364-րդ և 464.6-464.10-րդ հոդվածներով՝ Դատարանը.

Վ Ճ Ռ Ե Ց

Նարեկ Աշոտի Խաչատրյանին մեղավոր ճանաչել ՀՀ քրեական օրենսգրքի 297-րդ հոդվածի 1-ին մասով նախատեսված արարքում և պատիժ նշանակել տուգանք՝ նվազագույն աշխատավարձի հնգապատիկի՝ 375.000 /երեք հարյուր յոթանասունհինգ հազար/ ՀՀ դրամ, չափով:
ՀՀ քրեական օրենսգրքի 79-րդ հոդվածի կիրառմամբ՝ փաստացի անազատության մեջ գտնվելու ժամկետի հաշվառմամբ, մեղմացնել Նարեկ Աշոտի Խաչատրյանի նկատմամբ նշանակված 375.000 /երեք հարյուր յոթանասունհինգ հազար/ ՀՀ դրամ չափով տուգանքը և վերջնական պատիժ սահմանել տուգանք՝ 300.000 /երեք հարյուր հազար/ ՀՀ դրամ, չափով:
Դատավճռի օրինական ուժի մեջ մտնելուց հետո Նարեկ Աշոտի Խաչատրյանի նկատմամբ ընտրված խափանման միջոցը վերացնել, իսկ գրավի գումարը վերադարձնել գրավատուին:
Արտյոմ Վաղինակի Ավետիսյանին մեղավոր ճանաչել ՀՀ քրեական օրենսգրքի 297-րդ հոդվածի 1-ին մասով նախատեսված արարքում և պատիժ նշանակել տուգանք՝ նվազագույն աշխատավարձի հնգապատիկի՝ 375.000 /երեք հարյուր յոթանասունհինգ հազար/ ՀՀ դրամ, չափով:
ՀՀ քրեական օրենսգրքի 79-րդ հոդվածի կիրառմամբ՝ փաստացի անազատության մեջ գտնվելու ժամկետի հաշվառմամբ, մեղմացնել Արտյոմ Վաղինակի Ավետիսյանի նկատմամբ նշանակված 375.000 /երեք հարյուր յոթանասունհինգ հազար/ ՀՀ դրամ չափով տուգանքը և վերջնական պատիժ սահմանել տուգանք՝ 300.000 /երեք հարյուր հազար/ ՀՀ դրամ, չափով:
Դատավճռի օրինական ուժի մեջ մտնելուց հետո Արտյոմ Վաղինակի Ավետիսյանի նկատմամբ ընտրված խափանման միջոցը վերացնել, իսկ գրավի գումարը վերադարձնել գրավատուին:
Վարույթային ծախսերի հարցը համարել լուծված:
Դատավճիռը, բացառությամբ ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով և 377-րդ հոդվածով նախատեսված հիմքերի, կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո՝ մեկամսյա ժամկետում։


ԴԱՏԱՎՈՐ Ս.ՅՈՒԶԲԱՇՅԱՆ