ԵԴ1/0937/01/25


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«15» Սեպտեմբերի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
քարտուղարությամբ՝ ՌՈԲԵՐՏ ՍԻՐԱԿԱՆՅԱՆԻ
մասնակցությամբ.
հանրային մեղադրող՝ ՌՈԼԱՆԴ ԳՐԻԳՈՐՅԱՆԻ
մեղադրյալ՝ ՀՈՄԲԵՐՏ ԱՎԵՏԻՍՅԱՆԻ
դռնբաց դատական նիստում քննելով Հոմբերտ Յուրիկի Ավետիսյանի(1) վերաբերյալ քրեական գործն ըստ մեղադրանքի՝ ՀՀ քրեական օրենսգրքի 344 հոդվածի 2-րդ մասով (2 դրվագ).






1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ.
Թիվ 60211224 քրեական վարույթով Հոմբերտ Յուրիկի Ավետիսյանին ՀՀ քրեական օրենսգրքի 344 հոդվածի 2-րդ մասով (2 դրվագ) մեղադրանք է ներկայացվել հետևյալ արարքների համար.
«[Ն]ա չունենալով տրանսպորտային միջոցներ վարելու իրավունք, 2024 թվականի ապրիլի 21-ին՝ ժամը 17:55-ի սահմաններում, Երևան քաղաքի Ա.Բաբաջանյան փողոցում, ոչ սթափ վիճակում՝ 0,8226 մգ/լ պարունակությամբ ալկոհոլ օգտագործած (հաշվի առնելով ստուգաչափման սարքի սխալանքը` ±10), վարել է «ՎԱԶ» մակնիշի 37 TU 100 հաշվառման համարանիշի ավտոմեքենան, ինչը հայտնաբերվել է տվյալ տարածքում ծառայություն իրականացնող ՀՀ ոստիկանության պարեկային ծառայության աշխատակցի կողմից, և ինչի կապակցությամբ կազմվել է վարչական իրավախախտման վերաբերյալ թիվ 8180269922 արձանագրությունը:
Բացի այդ՝ Հոմբերտ Յուրիկի Ավետիսյանը, չունենալով տրանսպորտային միջոցներ վարելու իրավունք, 2024 թվականի սեպտեմբերի 23-ին՝ ժամը 00:25-ի սահմաններում, Երևան քաղաքի Ռոստովյան փողոցում, ոչ սթափ վիճակում՝ 0,999 մգ/լ պարունակությամբ ալկոհոլ օգտագործած (հաշվի առնելով ստուգաչափման սարքի սխալանքը` ±10), վարել է «Վոլկսվագեն» մակնիշի 37 MU 994 հաշվառման համարանիշի ավտոմեքենան, ինչը հայտնաբերվել է տվյալ տարածքում ծառայություն իրականացնող ՀՀ ոստիկանության պարեկային ծառայության աշխատակցի կողմից, և ինչի կապակցությամբ կազմվել է վարչական իրավախախտման վերաբերյալ թիվ 8180417530 արձանագրությունը»։
2. ԴԱՏԱՔՆՆՈՒԹՅԱՆ ԸՆԹԱՑՔՈՒՄ ՀԵՏԱԶՈՏՎԱԾ ԹՈՒՅԼԱՏՐԵԼԻ ԱՊԱՑՈՒՅՑՆԵՐԸ.
ՀԻՄՆԱԿԱՆ ԴԱՏԱԼՍՈՒՄՆԵՐ

2.1 «Զննություն կատարելու մասին» 2025 թվականի փետրվարի 6-ի արձանագրության համաձայն.
«Թիվ 8180269922 որոշման զննությամբ պարզվեց, որ 2024 թվականի ապրիլի 21-ին՝ ժամը 18:05-ին, Երևան քաղաքի Բաբաջանյան փողոցում ՀՀ ոստիկանության պարեկային ծառայության Երևան քաղաքի գնդի կրտսեր պարեկ Լիլիթ Ստյոպայի Գրիգորյանի (կրծքանշանի համար՝ 06041) կողմից Հոմբերտ Յուրիկի Ավետիսյանի (ծնվ.10.02.1984թ.) վերաբերյալ կազմվել է վարչական իրավախախտման վերաբերյալ արձանագրություն (կից չլրացված վարչական իրավախախտման որոշում՝ 8180269922) այն մասին, որ վերջինս նույն օրը՝ ժամը 17:55-ի սահմաններում, Երևան քաղաքի Բաբաջանյան փողոցում, ոչ սթափ վիճակում գտնվելով, վարել է «Վազ» մակնիշի 37 TU 100 հաշվառման համարանիշի ավտոմեքենան՝ չունենալով տրանսպորտային միջոցներ վարելու իրավունք:
Արձանագրության համապատասխան տողերում առկա են ծանուցվող վարորդի և պարեկային ծառայողի ստորագրությունները:
Հոմբերտ Յուրիկի Ավետիսյանի սթափության կտրոնի զննությամբ պարզվեց, որ ստուգաչափման սարքի համարը՝ 91101226, զննման համարը՝ 01059, զննման ամսաթիվը՝ 21.04.2024թ., ստուգումը կատարվել է ավտոմատ, ժամը՝ 18:02:59-ին, ալկոհոլի պարունակությունը՝ 0.914 մգ/լ, վարորդի անունը՝ Հոմբերտ, ազգանունը՝ Ավետիսյան, տրանսպորտային միջոցի համարանիշը՝ 37 TU 100, անձնագիր՝ AT0651863, տեսուչի ազգանունը՝ Գրիգորյան, կրծքանշանի համար՝ 06041:
Առկա է նաև սթափության 91101226 համարի սարքի, ստուգաչափման թիվ 115145 վկայականի պատճենը, որի զննությամբ պարզվեց, որ ստուգաչափման թվականն է 26.01.2024թ., այն ուժի մեջ է մինչև 26.01.2025թ.: Չափման միջոցի անվանումը և տեսակը՝ ալկոմետր, գործարանային համարը՝ 91101226 տեսակը՝ «Jupiter X/RP», չափման տիրույթը՝ (0.000-2.000 մգ/լ), ճշտության կարգը և դասը (սխալանքը) 0:0,15%, 0.1- 0,15+-8% > 0,15+-10%, արտադրողը՝ Չինաստան, պատկանում է ՀՀ ՆԳՆ ոստիկանությանը:
Հոմբերտ Յուրիկի Ավետիսյանի վերաբերյալ ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրից կատարված քաղվածքի պատճենի զննությամբ պարզվել է, որ վերջինս տվյալների մուտքագրման արդյունքում տրանսպորտային միջոցներ վարելու իրավունքի վերաբերյալ տվյալներ առկա չեն:
Թիվ 8180417530 որոշման զննությամբ պարզվեց, որ 2024 թվականի սեպտեմբերի 23-ին՝ ժամը 00:30-ին, Երևան քաղաքի Ռոստովյան փողոցում ՀՀ ոստիկանության պարեկային ծառայության Երևան քաղաքի գնդի ավագ պարեկ Ասպետ Արշակի Արշակյանի (կրծքանշանի համար՝ 07686) կողմից Հոմբերտ Յուրիկի Ավետիսյանի (ծնվ.10.02.1984թ.) վերաբերյալ կազմվել է վարչական իրավախախտման վերաբերյալ արձանագրություն (կից չլրացված վարչական իրավախախտման որոշում՝ 8180417530) այն մասին, որ վերջինս նույն օրը՝ ժամը 00:25-ի սահմաններում, Երևան քաղաքի Ռոստովյան փողոցում, ոչ սթափ վիճակում գտնվելով, վարել է «Վոլկսվագեն» մակնիշի 37 MU 944 հաշվառման համարանիշի ավտոմեքենան՝ չունենալով տրանսպորտային միջոցներ վարելու իրավունք:
Արձանագրության համապատասխան տողերում առկա են ծանուցվող վարորդի և պարեկային ծառայողի ստորագրությունները։
Հոմբերտ Յուրիկի Ավետիսյանի սթափության կտրոնի զննությամբ պարզվեց, որ ստուգաչափման սարքի համարը՝ 91101202, զննման համարը` 02044, զննման ամսաթիվը 23.09.2024թ., ստուգումը կատարվել է ավտոմատ, ժամը՝ 00:29:40-ին, ալկոհոլի պարունակությունը` 1.110 մգ/լ, վարորդի անունը՝ Հոմբերտ, ազգանունը՝ Ավետիսյան, տրանսպորտային միջոցի համարանիշը՝ 37 MU 994, ՀԾՀ 2002840377, տեսուչի ազգանունը՝ Արշակյան, կրծքանշանի համար՝ 07686:
Առկա է նաև սթափության 91101202 համարի սարքի, ստուգաչափման թիվ 128897 վկայականի պատճենը, որի զննությամբ պարզվեց, որ ստուգաչափման թվականն է 12.08.2024թ., այն ուժի մեջ է մինչև 12.09.2025թ.: Չափման միջոցի անվանումը և տեսակը՝ ալկոմետր, գործարանային համարը՝ 91101202 տեսակը՝ «Jupiter X/RP», չափման տիրույթը՝ (0.000-2.000 մգ/լ), ճշտության կարգը և դասը (սխալանքը)) 0:0,1+-5%, 0,1- 0,15+-8% > 0,15+-10%, արտադրողը՝ Չինաստան, պատկանում է ՀՀ ՆԳՆ ոստիկանությանը:
(...)»: (2)
2.2 Արտավարութային փաստաթուղթ ճանաչված՝ վարչական իրավախախտման վերաբերյալ թիվ 8180269922 և 8180417530 որոշումների, սթափության զննության թիվ 01059 և 02044 կտրոնների, ստուգաչափման թիվ 115145 և 128897 վկայականների, ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրի պատճենները պարունակում են դատավճռի 2.1 կետում նշված նույնական տվյալներ: (3)

2025 ԹՎԱԿԱՆԻ ՍԵՊՏԵՄԲԵՐԻ 15-ԻՆ ԴԱՏԱՐԱՆԸ ՄԵՂԱԴՐՅԱԼ ՀՈՄԲԵՐՏ ՅՈՒՐԻԿԻ ԱՎԵՏԻՍՅԱՆԻ ՆԿԱՏՄԱՄԲ ԿԱՅԱՑՐԵԼ Է ՄԵՂԱԴՐԱԿԱՆ ՎԵՐԴԻԿՏ։
ԼՐԱՑՈՒՑԻՉ ԴԱՏԱԼՍՈՒՄՆԵՐ

2.3 ՀՀ պետական եկամուտների կոմիտեի հարկ վճարողների սպասարկման վարչության պետի 2025 թվականի մարտի 31-ի գրության համաձայն՝ Հոմբերտ Յուրիկի Ավետիսյանը հանցանքներից վերջինն ավարտվելու օրվան նախորդող 12 ամիսների ընթացքում չի հանդիսացել վարձու աշխատող։ Հարկային մարմնի տեղեկատվական բազայում առկա չեն նաև Հոմբերտ Ավետիսյանի կողմից իր ակտիվների ներդրմամբ (տրամադրմամբ) այլ անձանց գործունեությունից ստացված եկամուտի (շահաբաժնի, տոկոսի, ռոյալթիի, վարձակալական վճարի) վերաբերյալ տվյալներ:
2.4 Դատվածությունների և հետախուզման առկայության Ձև 8 հարցման պատասխանի ինչպես նաև «DataLex» դատական տեղեկատվական համակարգում առկա տվյալների համաձայն՝
-Թիվ ԵՇԴ/0174/01/17 քրեական գործով Երևան քաղաքի առաջին ատյանի ընդհանուր իրավասության դատարանի 2019 թվականի փետրվարի 20-ի որոշմամբ Հոմբերտ Յուրիկի Ավետիսյանի նկատմամբ «Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» ՀՕ-414-Ն ՀՀ օրենքի 2 հոդվածի 5-րդ մասի 2-րդ կետի կիրառմամբ ՀՀ նախկին քրեական օրենսգրքի 113 հոդվածի 2-րդ մասի 3-րդ կետով քրեական հետապնդումը դադարեցվել:
-Թիվ ԿԴ/0835/01/25 քրեական գործով Հոմբերտ Յուրիկի Ավետիսյանը մեղադրվում է ՀՀ քրեական օրենսգրքի 344 հոդվածի 2-րդ մասով նախատեսված ենթադրյալ հանցանքը կատարել մեջ: Քրեական գործը գտնվում է նախնական դատալսումների փուլում:
2.5 ՀՀ քաղաքացիական կացության ակտերի գրանցման տվյալների շտեմարանում միասնական էլեկտրոնային տեղեկատվական համակարգի միջոցով կատարված հարցմանն ի պատասխան ստացվել են՝
-ամուսնության պետական գրանցման թիվ 40 ակտի համաձայն՝ Հոմբերտ Յուրիկի Ավետիսյանը և Ջուլիետա Հարությունի Եղիազարյանն ամուսնացած են,
-ծննդի պետական գրանցման թիվ 70 ակտի համաձայն՝ 2006 թվականի հունվարի 27-ին ծնված Յուրա Հոմբերտի Ավետիսյանի հայրն է Հոմբերտ Ավետիսյանը,
-ծննդի պետական գրանցման թիվ 1719 ակտի համաձայն՝ 2007 թվականի նոյեմբերի 1-ին ծնված Բադալ Հոմբերտի Ավետիսյանի հայրն է Հոմբերտ Ավետիսյանը: (4)
2.6 «Անձի ֆունկցիոնալության գնահատման» թիվ 2024.Ֆ-6524.16-7533.594 որոշման համաձայն՝ Ջուլիետա Եղիազարյանի ֆունկցիոնալության սահմանափակման աստիճանն է՝ միջին, միավորը՝ 32%: Կարգավիճակը սահմանվել է 1 տարի ժամկետով, որպես հաշմանդամության կարգավիճակի վերջնաժամկետ նշվել է՝ 2025 թվականի մայիսի 1-ը, կրկնակի գնահատման ժամկետ նշվել է՝ 2025 թվականի ապրիլի 23-ը:
2.7 «Բժշկասոցիալական փորձաքննական մինչև 18 տարեկան երեխայի թիվ 632011 որոշման» համաձայն՝ Բադալ Հոմբերտի Ավետիսյանի նկատմամբ սահմանվել է «հաշմանդամ երեխա» կարգավիճակ՝ 2 տարի ժամկետով: Հաշմանդամությունը սահմանվել է մինչև 2025 թվականի հունիսի 1-ը, վերափորձաքննության ժամկետն է՝ 2025 թվականի հունիսի 11-ը:
2.8 «Բժշկասոցիալական փորձաքննական մինչև 18 տարեկան երեխայի թիվ 632011 որոշման» համաձայն՝ Նարեկ Հոմբերտի Ավետիսյանի նկատմամբ սահմանվել է «հաշմանդամ երեխա» կարգավիճակ: Հաշմանդամությունը սահմանվել է մինչև 2025 թվականի հունիսի 1-ը, վերափորձաքննության ժամկետն է՝ 2025 թվականի մայիսի 11-ը։ (5)
Քննարկման ենթակա հարցերի վերաբերյալ կողմերի դիրքորոշումները.
2.9 Պատժի վերաբերյալ հարցերը քննարկելիս հանրային մեղադրողը Դատարանին խնդրեց Հոմբերտ Յուրիկի Ավետիսյանի նկատմամբ յուրաքանչյուր հանցանքի կատարման համար որպես պատիժ նշանակել տուգանք՝ նվազագույն աշխատավարձի յոթնապատիկի չափով:
2.10 Մեղադրյալը Դատարանին, ըստ էության, հայտնեց, որ չի ցանկանում կատարել հանրային աշխատանքներ, քանի որ դրանք չի կարողանա համատեղել իր աշխատանքի հետ, իսկ իր նկատմամբ տուգանք նշանակելու դեպքում՝ ինքը կկարողանա այն վճարել: Մեղադրյալն իր խոսքում նաև նշեց, որ երեխաներն ու կինը հաշմանդամության կարգի հետ կապված տվյալ պահին անցնում են համապատասխան փորձաքննություններ։
3. ԴԱՏԱՐԱՆԻ ՓԱՍՏԱԿԱՆ ՎԵՐԼՈՒԾՈՒԹՅՈՒՆՆԵՐԸ ԵՎ ԴԱՏԱՐԱՆԻ ԿՈՂՄԻՑ ՀԱՍՏԱՏՎԱԾ ԿԱՄ ՀԵՐՔՎԱԾ ՓԱՍՏԱԿԱՆ ՀԱՆԳԱՄԱՆՔՆԵՐԸ.
3.1 Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում այն, որ.
-Հոմբերտ Յուրիկի Ավետիսյանը չունենալով տրանսպորտային միջոցներ վարելու իրավունք, 2024 թվականի ապրիլի 21-ին՝ ժամը 17:55-ի սահմաններում, Երևան քաղաքի Ա.Բաբաջանյան փողոցում, ոչ սթափ՝ 0,8226 մգ/լ պարունակությամբ ալկոհոլ օգտագործած վիճակում (հաշվի առնելով ստուգաչափման սարքի սխալանքը` +10), վարել է «ՎԱԶ» մակնիշի 37 TU 100 հաշվառման համարանիշի ավտոմեքենան,
-Հոմբերտ Յուրիկի Ավետիսյանը, չունենալով տրանսպորտային միջոցներ վարելու իրավունք, 2024 թվականի սեպտեմբերի 23-ին՝ ժամը 00:25-ի սահմաններում, Երևան քաղաքի Ռոստովյան փողոցում, ոչ սթափ՝ 0,999 մգ/լ պարունակությամբ ալկոհոլ օգտագործած վիճակում (հաշվի առնելով ստուգաչափման սարքի սխալանքը` +10), վարել է «Վոլկսվագեն» մակնիշի 37 MU 994 հաշվառման համարանիշի ավտոմեքենան:
3.2 Լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները.
-Հոմբերտ Յուրիկի Ավետիսյանը սույն քրեական գործով հաստատված հանցանքներից վերջինը կատարելու պահին չի ունեցել դատվածություն,
-Հանցանքներից վերջինն ավարտվելու օրվան նախորդող 12 ամիսների ընթացքում Հոմբերտ Ավետիսյանի ստացած եկամտի վերաբերյալ տվյալներ առկա չեն։
-Հոմբերտ Յուրիկի Ավետիսյանի խնամքին են մեկ անչափահաս և վատառողջ երեխան, մեկ վատառողջ երեխան, ինչպես նաև վատառողջ կինը:


4. ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐՆ ՈՒ ՈՐՈՇՈՒՄՆԵՐԸ.
4.1 Դատարանի կողմից հաստատված փաստական հանգամանքների և 2025 թվականի սեպտեմբերի 15-ին կայացված մեղադրական վերդիկտի հիման վրա Դատարանն ապացուցված է համարում մեղադրյալ Հոմբերտ Յուրիկի Ավետիսյանին վերագրվող արարքները, այդ արարքների քրեական հակաիրավականությունը, մեղադրյալի կողմից այդ արարքները կատարելը, մեղադրյալի մեղավորությունը տվյալ արարքը կատարելու մեջ, սահմանելով, որ նրա կատարած արարքներից յուրաքանչյուրի նկատմամբ ենթակա է կիրառման ՀՀ քրեական օրենսգրքի 344 հոդվածի 2-րդ մասը:
4.2 Դատարանի կողմից հաստատված փաստական հանգամանքների հիման վրա Դատարանն արձանագրում է, որ Հոմբերտ Յուրիկի Ավետիսյանի պատասխանատվությունն ու պատիժը մեղմացնող՝ ՀՀ քրեական օրենսգրքի 70 հոդվածով նախատեսված հանգամանք է պատիժ նշանակելու պահին մեղադրյալի խնամքի տակ մեկ անչափահաս առկայությունը:
Միևնույն ժամանակ Դատարանն արձանագրում է, որ Հոմբերտ Յուրիկի Ավետիսյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71 հոդվածով նախատեսված հանգամանքներ առկա չեն:
4.3 Կատարած հանցանքների համար մեղադրյալ Հոմբերտ Յուրիկի Ավետիսյանը ենթակա է պատժի։
4.4 Դատապարտված մեղադրյալի նկատմամբ նշանակվող պատժի տեսակն ու չափը որոշելիս՝ Դատարանը հաշվի է առնում հետևյալը՝
-Հոմբերտ Յուրիկի Ավետիսյանի կատարած հանցանքների հանգամանքները, հանրային վտանգավորության աստիճանն ու բնույթը, մասնավորապես՝ նրա կողմից օգտագործած ալկոհոլի քանակը։
-Հոմբերտ Յուրիկի Ավետիսյանը չունի մշտական աշխատանք, վերջինի խնամքին են անչափահաս և հաշմանդամ երեխան և հաշմանդամություն ունեցող մյուս երեխան ու կինը, հետևաբար նրա նկատմամբ տուգանքի ձևով պատիժ նշանակելու հնարավորությունը բացակայում է, քանի որ առերևույթ բացակայում է դատապարտվողի՝ եկամուտ ստանալու հնարավորությունը և նա հնարավորություն չի ունենա վճարել նշանակված տուգանքը, բացի այդ Հոմբերտ Ավետիսյանը հրաժարվել է հանրային աշխատանքներ կատարելուց:
-Հոմբերտ Յուրիկի Ավետիսյանի անձը բնութագրող տվյալները, ինչպես նաև պատասխանատվությունը և պատիժը մեղմացնող հանգամանքի առկայությունն ու ծանրացնող հանգամանքների բացակայությունը, ՀՀ քրեական օրենսգրքի 69 հոդվածի 2-րդ մասում թվարկված մյուս հանգամանքները։
• Այսպիսով, Դատարանը գտնում է, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներն ապահովելու համար Հոմբերտ Յուրիկի Ավետիսյանի կողմից ՀՀ քրեական օրենսգրքի 344 հոդվածի 2-րդ մասով կատարված հանցագործությունների բնույթին, վտանգավորության աստիճանին, դրանց կատարելու հանգամանքներին, ինչպես նաև հանցավորի անձին համաչափ պատիժ է հանցանքներից յուրաքանչյուրի համար կարճաժամկետ ազատազրկումը՝ 1 (մեկ) ամիս ժամկետով:
• ՀՀ քրեական օրենսգրքի 74 հոդվածով սահմանված կարգով՝ նշանակված պատիժները լրիվ գումարելու միջոցով, Հոմբերտ Յուրիկի Ավետիսյանի նկատմամբ վերջնական պատիժ պետք է նշանակել կարճաժամկետ ազատազրկումը՝ 2 (երկու) ամիս ժամկետով։
• Միևնույն ժամանակ, Դատարանն արձանագրում է, որ կատարած հանցանքների համար Հոմբերտ Ավետիսյանի նկատմամբ լրացուցիչ պատիժ նշանակելու հիմքերն ու անհրաժեշտությունը տվյալ դեպքում բացակայում են։
4.5 Մեղադրյալ Հոմբերտ Յուրիկի Ավետիսյանի կողմից իր նկատմամբ նշանակված պատիժը կրելու հարցը որոշելիս Դատարանը հաշվի է առնում հետևյալը.
-Հոմբերտ Յուրիկի Ավետիսյանը չունի դատվածություն, լիովին ընդունել է իր մեղքը։
-Հոմբերտ Ավետիսյանի կատարած հանցանքը դասվում է ոչ մեծ ծանրության հանցագործությունների շարքին։
-Հոմբերտ Ավետիսյանը հաշմանդամ է, անաշխատունակ է, հանդիսանում է ընտանիքի միակ խնամակալը։
Դատարանը գտնում է, որ վերոգրյալ հանգամանքների պայմաններում Հոմբերտ Յուրիկի Ավետիսյանի կողմից պատիժը փաստացի կրելը կարող է բացասաբար անդրադառնալ նրա ընտանիքի կենսապայմանների վրա։ Բացի այդ, Հոմբերտ Յուրիկի Ավետիսյանի կողմից մեղքն ընդունելու պարագայում քրեական պատժի նպատակների իրացումը, այդ թվում՝ պատժի ենթարկված անձին ուղղելու հավանականությունը, զգալիորեն բարձրանում է, ինչը վկայում է այն մասին, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներին հնարավոր է հասնել նաև առանց Հոմբերտ Ավետիսյանի կողմից կարճաժամկետ ազատազրկման ձևով պատիժը փաստացի կրելու:
• Այսպիսով՝ Դատարանը գտնում է, որ Հոմբերտ Յուրիկի Ավետիսյանի նկատմամբ նշանակված պատիժը՝ 2 (երկու) ամիս ժամկետով կարճաժամկետ ազատազրկումը, ՀՀ քրեական օրենսգրքի 84 հոդվածի կիրառմամբ պետք է պայմանականորեն չկիրառել՝ սահմանելով 2 (երկու) տարի ժամկետով փորձաշրջան։
Փորձաշրջանի ընթացքում Հոմբերտ Ավետիսյանի նկատմամբ պետք է նշանակել հետևյալ պարտականությունը.
-առանց իր վարքագծի նկատմամբ վերահսկողություն իրականացնող իրավասու մարմնի համաձայնության չլքել Հայաստանի Հանրապետության տարածքը:
4.6 ՀՀ քրեական դատավարության օրենսգրքի 348 հոդվածի 1-ին մասի 11-14-րդ հարցերին անդրադառնալու անհրաժեշտությունը սույն քրեական գործով բացակայում է։
4.7 Հոմբերտ Յուրիկի Ավետիսյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար։
4.8 ՀՀ քրեական դատավարության օրենսգրքի 167 հոդվածի 1-ին մասի 1-6-րդ կետերով նախատեսված վարութային ծախսեր սույն քրեական գործով առկա չեն, իսկ 7-րդ կետով նախատեսված ծախսերի վերաբերյալ տվյալները բացակայում են: Ավելին՝ այդ վարութային ծախսերի հատուցման պահանջ Դատարանին չի ներկայացվել, որպիսի պայմաններում վարութային ծախսերի հարցը պետք է համարել լուծված։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 167, 276, 347, 348, 349 և 364 հոդվածներով՝ Դատարանը

Վ Ճ Ռ Ե Ց

1. Հոմբերտ Յուրիկի Ավետիսյանին մեղավոր ճանաչել ՀՀ քրեական օրենսգրքի 344 հոդվածի 2-րդ մասով նախատեսված թվով երկու հանցանքները կատարելու մեջ։
-ՀՀ քրեական օրենսգրքի 344 հոդվածի 2-րդ մասով նախատեսված առաջին հանցանքի կատարման համար Հոմբերտ Ավետիսյանի նկատմամբ պատիժ նշանակել կարճաժամկետ ազատազրկում՝ 1 (մեկ) ամիս ժամկետով:
-ՀՀ քրեական օրենսգրքի 344 հոդվածի 2-րդ մասով նախատեսված երկրորդ հանցանքի կատարման համար Հոմբերտ Ավետիսյանի նկատմամբ պատիժ նշանակել կարճաժամկետ ազատազրկում՝ 1 (մեկ) ամիս ժամկետով:
2. Նշանակված պատիժները լրիվ գումարել և Հոմբերտ Ավետիսյանի նկատմամբ վերջնական պատիժ նշանակել կարճաժամկետ ազատազրկում՝ 2 (երկու) ամիս ժամկետով:
3. Հոմբերտ Յուրիկի Ավետիսյանի նկատմամբ նշանակված պատիժը պայմանականորեն չկիրառել՝ սահմանելով փորձաշրջան՝ 1 (մեկ) տարի ժամկետով:
Փորձաշրջանի ընթացքում Հոմբերտ Ավետիսյանի նկատմամբ նշանակել հետևյալ պարտականությունը՝
-առանց իր վարքագծի նկատմամբ վերահսկողություն իրականացնող իրավասու մարմնի համաձայնության չլքել Հայաստանի Հանրապետության տարածքը:
4. Հոմբերտ Ավետիսյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը:
5. Վարութային ծախսերի հարցը համարել լուծված:
Դատավճիռը վերաքննության կարգով կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում:



ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ

(1)Ծնված՝ 1984 թվականի փետրվարի 10-ին Արագածոտնի մարզի Աշտարակ քաղաքում, ազգությամբ հայ, ՀՀ քաղաքացի, դատվածություն չունեցող, ամուսնացած, խնամքին երկու անչափահաս երեխա և հաշմանդամություն ունեցող կին, հաշվառված է և բնակվում է Արագածոտնի մարզի Աշտարակ համայնքի Կոշ գյուղի 1 փողոցի 5 նրբանցքի թիվ 8 տանը, որպես խափանման միջոց է կիրառված բացակայելու արգելքը:
(2)Տե՛ս, քրեական գործ, հատոր 1, թերթեր 30-31:
(3)Տե՛ս, քրեական գործ, հատոր 1, թերթեր 3-6 և 15-18:
(4)2.3-2.5 կետերի վերաբերյալ, տե՛ս, Դատարանում ստեղծված նյութերը:
(5)2.6-2.8 կետի վերաբերյալ, տե՛ս քրեական գործ, հատոր 1, թերթեր 59-62: