Գործ N ԵԴ1/0927/01/25




Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈւՆԻՑ
ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

ՆԱԽԱԳԱՀՈՂ ԴԱՏԱՎՈՐ` Վ.Լ.ԳՐԻԳՈՐՅԱՆ
ՔԱՐՏՈՒՂԱՐՈՒԹՅԱՄԲ` Լ.ՊՐԱԶՅԱՆԻ,
Մասնակցությամբ`
ՄԵՂԱԴՐՈՂ` Դ.ՄԱՐԳԱՐՅԱՆԻ,
ՄԵՂԱԴՐՅԱԼ` Ա.ԱՍԱՏՐՅԱՆԻ,

2025 թվականի մարտի 28-ին Երևան քաղաքում` դռնբաց դատական նիստում` քննության առնելով քրեական գործն ըստ մեղադրանքի`
Ալբերտ Խաչատուրի Ասատրյանի /ծնված` 11.10.2002թ., Երևան քաղաքում, ազգությամբ հայ, ՀՀ քաղաքացի, չամուսնացած, ՀԱՊՀ-ի 5-րդ կուրսի ուսանող, նախկինում չդատված, չի աշխատում, հաշվառված և բնակվող՝ ք. Երևան, Մաշտոցի պողոտա, 19 շենք, բն. 7 հասցեում/: Մեղադրվում է ՀՀ քրեական օրենսգրքի 344-րդ հոդվածի 2-րդ մասով, ՀՀ քրեական օրենսգրքի 344-րդ հոդվածի 2-րդ մասով, ՀՀ քրեական օրենսգրքի 344-րդ հոդվածի 1-ին մասով.

Պ Ա Ր Զ Ե Ց

Գործի դատավարական նախապատմությունը.
2024 թվականի օգոստոսի 14-ին ՀՀ ՔԿ ԵՔՔՎ ՃՀՔ բաժնի քննիչ Մ.Կոստանդյանը կազմել է արձանագրություն՝ ՀՀ քրեական օրենսգրքի 344-րդ հոդվածի 2-րդ մասի հատկանիշներով թիվ 60-3035-24 քրեական վարույթը նախաձեռնելու մասին:
2024 թվականի սեպտեմբերի 27-ին քննիչ Մ.Կոստանդյանը կազմել է արձանագրություն՝ ՀՀ քրեական օրենսգրքի 344-րդ հոդվածի 2-րդ մասի հատկանիշներով թիվ 60615324 քրեական վարույթը նախաձեռնելու մասին:
2024 թվականի սեպտեմբերի 30-ին քննիչ Մ.Կոստանդյանը որոշում է կայացրել թիվ 60615324 քրեական վարույթը թիվ 60303524 քրեական վարույթին միացնելու մասին:
2024 թվականի հոկտեմբերի 10-ին քննիչ Մ.Կոստանդյանը կազմել է արձանագրություն՝ ՀՀ քրեական օրենսգրքի 344-րդ հոդվածի 1-ին մասի հատկանիշներով թիվ 60626524 քրեական վարույթը նախաձեռնելու մասին:
2024 թվականի հոկտեմբերի 31-ին քննիչ Մ.Կոստանդյանը որոշում է կայացրել թիվ 60626524 քրեական վարույթը թիվ 60303524 քրեական վարույթին միացնելու մասին:
2025 թվականի փետրվարի 10-ին քննիչ Մ.Կոստանդյանը որոշում է կայացրել Ալբերտ Խաչատուրի Ասատրյանի՝ վարչական իրավախախտման վերաբերյալ թիվ 8180413182, 8180265288, 8188418166, 8180409760 արձանագրությունների, ալկոհոլի պարունակության ստուգման կտրոնների և ստուգաչափման վկայականների, Հայփոստի ծանուցագրի, Ճանապարհային ոստիկանության էլեկտրոնային ռեգիստրից արտատպված փաստաթղթի պատճենները թիվ 60303524 քրեական վարույթով որպես արտավարութային փաստաթուղթ ապացույց ճանաչելու մասին:
2025 թվականի փետրվարի 14-ին Երևան քաղաքի Կենտրոն և Նորք-Մարաշ վարչական շրջանների դատախազության դատախազ Ռ.Հարությունյանը որոշում է կայացրել թիվ 60303524 քրեական վարույթով Ալբերտ Խաչատուրի Ասատրյանի նկատմամբ ՀՀ քրեական օրենսգրքի 344-րդ հոդվածի 2-րդ մասով, ՀՀ քրեական օրենսգրքի 344-րդ հոդվածի 2-րդ մասով, ՀՀ քրեական օրենսգրքի 344-րդ հոդվածի 1-ին մասով հանրային քրեական հետապնդում հարուցելու մասին:
2025 թվականի փետրվարի 19-ին քննիչ Մ.Կոստանդյանը որոշում է կայացրել թիվ 60303524 քրեական վարույթով Ալբերտ Խաչատուրի Ասատրյանի նկատմամբ որպես խափանման միջոց բացակայելու արգելք կիրառելու մասին:
2025 թվականի մարտի 17-ին թիվ 60303524 քրեական վարույթը՝ հաստատված մեղադրական եզրակացությամբ, ստացվել է Երևան քաղաքի առաջին ատյանի ընդհանուր իրավասության քրեական դատարանում, որը ստացել է թիվ ԵԴ1/927/01/25 դատական համարը:

Մեղադրանքի փաստական նկարագրությունը.
2025 թվականի փետրվարի 14-ին Երևան քաղաքի Կենտրոն և Նորք-Մարաշ վարչական շրջանների դատախազության դատախազ Ռ.Հարությունյանը որոշում է կայացրել թիվ 60303524 քրեական վարույթով Ալբերտ Խաչատուրի Ասատրյանի նկատմամբ ՀՀ քրեական օրենսգրքի 344-րդ հոդվածի 2-րդ մասով, ՀՀ քրեական օրենսգրքի 344-րդ հոդվածի 2-րդ մասով, ՀՀ քրեական օրենսգրքի 344-րդ հոդվածի 1-ին մասով հանրային քրեական հետապնդում հարուցելու մասին քրեական օրենսգրքով նախատեսված այն արարքի կատարման համար, որ նա ՀՀ ոստիկանության պարեկային ծառայության կողմից թիվ 8180265288 վարչական իրավախախտման գործով 2023 թվականի նոյեմբերի 22-ին կայացված որոշմամբ 1 (մեկ) տարի ժամանակով զրկվել է տրանսպոտրային միջոցներ վարելու իրավունքից՝ սկսած 2023 թվականի նոյեմբերի 29-ից մինչև 2024 թվականի նոյեմբերի 29-ը, որի մասին վերջինս ծանուցվել է: Ծանուցված լինելով, որ զրկված է տրանսպոտրային միջոցներ վարելու իրավունքից, 2024 թվականի հունիսի 29-ին՝ ժամը 02:00-ին, գտնվելով ոչ սթափ վիճակում (սթափության վիճակի զննման կտրոնի համարը՝ 01980) մեկ լիտր արտաշնչած օդի մեջ մաքուր ալկոհոլի պարունակությունը 0.132 մգ/լ (առնվազն՝ 0.1188 մգ/լ նկատի ունենալով ստուգաչափող թիվ 91101139 ալկոտեստեր սարքի չափման ճշտության հնարավոր 10% սխալանքը), Երևան քաղաքի Վարդանանց փողոցում վարել է «ԲՄՎ» մակնիշի 01 OL 002 հաշվառման համարանիշի տրանսպորտային միջոցը, որի վերաբերյալ ՀՀ ոստիկանության պարեկային ծառայության պարեկի կողմից կազմվել է վարչական իրավախախտման վերաբերյալ թիվ 8180413182 արձանագրությունը:
Բացի այդ, Ալբերտ Խաչատուրի Ասատրյանը ՀՀ ոստիկանության պարեկային ծառայության կողմից թիվ 8180265288 վարչական իրավախախտման գործով 2023 թվականի նոյեմբերի 22-ին կայացված որոշմամբ 1 (մեկ) տարի ժամանակով զրկվել է տրանսպոտրային միջոցներ վարելու իրավունքից՝ սկսած 2023 թվականի նոյեմբերի 29-ից մինչև 2024 թվականի նոյեմբերի 29-ը, որի մասին վերջինս ծանուցվել է: Ծանուցված լինելով, որ զրկված է տրանսպոտրային միջոցներ վարելու իրավունքից, 2024 թվականի սեպտեմբերի 12-ին՝ ժամը 05:45-ին, գտնվելով ոչ սթափ վիճակում (սթափության վիճակի զննման կտրոնի համարը՝ 02730)՝ մեկ լիտր արտաշնչած օդի մեջ մաքուր ալկոհոլի պարունակությունը 0.126 մգ/լ (առնվազն՝ 0.1134 մգ/լ՝ նկատի ունենալով ստուգաչափող թիվ 91100981 ալկոտեստեր սարքի չափման ճշտության հնարավոր 10% սխալանքը), Երևան քաղաքի Խանջյան փողոցում վարել է «ԲՄՎ» մակնիշի 01 OL 002 հաշվառման համարանիշի տրանսպորտային միջոցը, որի վերաբերյալ ՀՀ ոստիկանության պարեկային ծառայության պարեկի կողմից կազմվել է վարչական իրավախախտման վերաբերյալ թիվ 8180418166 արձանագրությունը:
Բացի այդ, Ալբերտ Խաչատուրի Ասատրյանը ՀՀ ոստիկանության պարեկային
ծառայության կողմից թիվ 8180265288 վարչական իրավախախտման գործով 2023 թվականի նոյեմբերի 22-ին կայացված որոշմամբ 1 (մեկ) տարի ժամանակով զրկվել է տրանսպոտրային միջոցներ վարելու իրավունքից՝ սկսած 2023 թվականի նոյեմբերի 29-ից մինչև 2024 թվականի նոյեմբերի 29-ը, որի մասին վերջինս ծանուցվել է: Ծանուցված լինելով, որ զրկված է տրանսպոտրային միջոցներ վարելու իրավունքից, 2024 թվականի սեպտեմբերի 26-ին՝ ժամը 00:25-ին, Երևան քաղաքի Վարդանանց փողոցում վարել է «ԲՄՎ» մակնիշի 01 OL 002 հաշվառման համարանիշի տրանպորտային միջոցը, որի վերաբերյալ ՀՀ ոստիկանության պարեկային ծառայության պարեկի կողմից կազմվել է վարչական իրավախախտման վերաբերյալ թիվ 8180409760 արձանագրությունը:

Դատաքննությամբ հետազոտված թույլատրելի ապացույցները.
Քրեական գործի դատաքննության փուլում մեղադրյալ Ալբերտ Խաչատուրի Ասատրյանը հրաժարվեց ցուցմունք տալ:
/դատական նիստի արձանագրություն՝ 28.03.2025թ./
Նախաքննության ընթացքում որպես վկա հարցաքննվելիս Ալբերտ Խաչատուրի Ասատրյանը ցուցմունք է տվել այն մասին, որ 2024 թվականի հունիսի 29-ին՝ ժամը 02.00-ին Երևան քաղաքի Վարդանանց փողոցում վարել է իր կողմից շահագործվող «ԲՄՎ» 01 OL 002 հաշվառման համարանիշի ավտոմեքենան, որը կանգնեցրել է պարեկային ծառայողը և պահանջել իր փաստաթղթերը: Հայտնել է, որ վարելու իրավունքից զրկվեծ է մեկ տարի ժամկետով, որի պատճառով իր մոտ վարորդական իրավունքի վկայական չունի: Պարեկան ծառայողը համապատասխան սարքավորման միջոցով ստուգել է իր սթափության աստիճանը, որից հետո կազմել է արձանագրություն, այն մասին, որ ինքը տրանսպորտային միջոց վարելու իրավունքից զրկված և ոչ սթափ վիճակում վարել է ավտոմեքենա, դրա տակ ինքը ստորագրել է: Հայտնել է, որ վարելու իրավունքից զրկելու վերաբերյալ կայացված որոշումը Հայփոստի միջոցով ուղարկվել է իր բնակության հասցեով, որը ստացել է մայրը՝ Հասմիկ Սոլկարյանը և նույն օրը փոխանցել է իրեն, այսինքն ինքը տեղյակ է եղել, որ զրկված է վարելու իրավունքից, սակայն վարել է ավտոմեքենա խիստ անհրաժեշտությունից ելնելով: Հայտնել է, որ 2024 թվականի սեպտեմբերի 12-ին՝ ժամը 05:45-ի սահմաններում Երևան քաղաքի Խանջյան փողոցում վարել է վերը նշված ավտոմեքենան, որը կանգնեցրել է պարեկային ծառայողը, ստուգել է իր սթափության աստիճանը և կազմել է արձանագրություն այն մասին, որ զրկված և ոչ սթափ վիճակում վարել է ավտոմեքենա, որի տակ ինքը ստորագրել է: 2024 թվականի սեպտեմբերի 26-ին՝ ժամը 00:25-ի սահմաններում Երևան քաղաքի Վարդանանց փողոցում վարել է վերը նշված ավտոմեքենան և պարեկային ծառայողը կանգնեցրել է և կազմել է արձանագրություն այն մասին, որ զրկված վիճակում վարել է ավտոմեքենա, որի տակ ինքը ստորագրել է: Հայտնել է, որ ինքը զրկված վիճակում վարել է ավտոմեքենա միայն նշված երեք դեպքերով, սակայն հայտնել է, որ ինքը երեք անգամն էլ վարել է ավտոմեքենա խիստ անհրաժեշտությունից ելնելով և վերջին դեպքից հետո այլևս չի վարել ավտոմեքենա: Զղջում է կատարած արարքների համար և խնդրել է իր նկատմամբ հնարավորինս մեղմ վերաբերվել:
/Հատոր 1, գ.թ. 66-69/
Նախաքննության ընթացքում որպես մեղադրյալ հարցաքննվելիս Ալբերտ Խաչատուրի Ասատրյանը ցուցմունք է տվել այն մասին, որ իրեն ներկայացված մեղադրանքում իրեն մեղավոր է ճամաչում: 2024 թվականի հունիսի 29-ին՝ ժամը 02.00-ին Երևան քաղաքի Վարդանանց փողոցում վարել է իր կողմից շահագործվող «ԲՄՎ» 01 OL 002 հաշվառման համարանիշի ավտոմեքենան, որը կանգնեցրել է պարեկային ծառայողը և պահանջել իր փաստաթղթերը: Հայտնել է, որ վարելու իրավունքից զրկված է մեկ տարի ժամկետով, որի պատճառով իր մոտ վարորդական իրավունքի վկայական չունի: Պարեկան ծառայողը համապատասխան սարքավորման միջոցով ստուգել է իր սթափության աստիճանը, որից հետո կազմել է արձանագրություն այն մասին, որ ինքը տրանսպորտային միջոց վարելու իրավունքից զրկված և ոչ սթափ վիճակում վարել է ավտոմեքենա, դրա տակ ինքը ստորագրել է: Հայտնել է, որ վարելու իրավունքից զրկելու վերաբերյալ կայացված որոշումը Հայփոստի միջոցով ուղարկվել է իր բնակության հասցեով, որը ստացել է մայրը՝ Հասմիկ Սոլկարյանը և նույն օրը փոխանցել է իրեն, այսինքն ինքը տեղյակ է եղել, որ զրկված է վարելու իրավունքից, սակայն վարել է ավտոմեքենա խիստ անհրաժեշտությունից ելնելով: Հայտնել է, որ 2024 թվականի սեպտեմբերի 12-ին՝ ժամը 05:45-ի սահմաններում Երևան քաղաքի Խանջյան փողոցում վարել է վերը նշված ավտոմեքենան, որը կանգնեցրել է պարեկային ծառայողը, ստուգել է իր սթափության աստիճանը և կազմել է արձանագրություն այն մասին, որ զրկված և ոչ սթափ վիճակում վարել է ավտոմեքենա, որի տակ ինքը ստորագրել է: 2024 թվականի սեպտեմբերի 26-ին՝ ժամը 00:25 ի սահմաններում Երևան քաղաքի Վարդանանց փողոցում վարել է վերը նշված ավտոմեքենան և պարեկային ծառայողը կանգնեցրել է և կազմել է արձանագրություն այն մասին, որ զրկված վիճակում վարել է ավտոմեքենա, որի տակ ինքը ստորագրել է: Հայտնել է, որ ինքը զրկված վիճակում վարել է ավտոմեքենա միայն նշված երեք դեպքերով, սակայն հայտնել է, որ ինքը երեք անգամն էլ վարել է ավտոմեքենա խիստ անհրաժեշտությունից ելնելով և վերջին դեպքից հետո այլևս չի վարել ավտոմեքենա: Զղջում է կատարած արարքների համար և խնդրել է իր նկատմամբ հնարավորինս մեղմ վերաբերվել:
/Հատոր 1, գ.թ. 90-92/
Զննություն կատարելու մասին 10.02.2025թ. արձանագրության համաձայն՝ զննության է ենթարկվել վարչական իրավախախտման վերաբերյալ թիվ 8180413182, 8180265288, 8180418166, 8180409760 արձանագրությունների, ալկոհոլի պարունակության ստուգման կտրոնների և ստուգաչափման վկայականների, Հայփոստի ծանուցագրի, Ճանապարհային ոստիկանության էլեկտրոնային ռեգիստրից արտատպված փաստաթղթի պատճենները:
«Զննությամբ պարզվել է հետևյալը.
1. Սույն քրեական վարույթի 4-րդ էջում առկա է 8180413182 վարչական իրավախախտման վերաբերյալ արձանագրության պատճենը, որի զննությամբ պարզվեց, որ 29.06.2024թ Երևան քաղաքի Թաիրով 14 հասցեում՝ ժամը 02:33-ին ՀՀ ոստիկանության պարեկային ծառայության 2-րդ գումարտակի 1-ին վաշտի կրտսեր պարեկ Գոռ Ադամյանը /կրծքանշանի համար 10148/ Ալբերտ Խաչատուրի Այսատրյանի նկատմամբ կազմել է վարչական իրավախախտման վերաբերյալ արձանագրություն, ըստ որի Ալբերտ Խաչատուրի Ասատրյանը 29.06.2024 թվականին՝ ժամը 02-00-ին Երևան քաղաքի Վարդանանց փողոցում վարել է «ԲՄՎ» մակնիշի 01 OL 002 հաշվառման համարանիշի տրանսպորտային միջոցը ոչ սթափ վիճակում՝ զրկված լինելով տրանսպորտային միջոցներ վարելու իրավունքից: Նշված արձանագրությանը վարորդը ծանոթացել է և ստորագրել:
2. Սույն քրեական վարույթի 5-րդ էջում առկա է ալկոհոլի պարունակության ստուգման կտրոնի պատճեն, որի զննությամբ պարզվեց, որ սարքի համարն է 91101139, զննման համարը՝ 01980, զննման ամսաթիվը՝ 29.06.2024, ստուգումը կամարվել է ավտոմատ, ժամը՝ 02:29-ին, ալկոհոլի պարունակությունը՝ 0.132 մգ/լ, վարորդի անունը՝ Աբերտ, ազգանունը՝ Ասատրյան, տրանսպորտային միջոցի համարանիշը՝ 01 OL 002, պարեկային ծառայողի ազգանունը Արամյան, կրծքանշանի համար 02915, ստորաբաժանում՝ 2-րդ գումարտակ 1-ին վաշտ:
3. Սույն քրեական վարույթի 6-րդ էջում առկա է սթափության սարքի ստուգաչափման 117634 վկայականի պատճենը, որի զննությամբ պարզվեց, որ ստուգաչափման թվականն է՝ 07.12.2023թ., այն ուժի մեջ է մինչև 2024 թվականի դեկտեմբերի 07-ը: Չափման միջոցի անվանումը և տեսակը՝ Ալկոմետր, գործարանային համարը՝ 91101139, տեսակը՝ Jupiter X/RP, չափման տիրույթը՝ 0.000-2.000 մգ/լ, արտադրողը՝ Չինաստան, պատկանում է ՀՀ ՆԳՆ ոստիկանություն:
4. Սույն քրեական վարույթի 7-րդ, 28-րդ, 48-րդ էջերում առկա է 8180265288 վարչական իրավախախտման վերաբերյալ արձանագրության պատճենը, որի զնությամբ պարզվեց, որ 19.11.2023թ Երևան քաղաքի Գրիգոր Լուսավորիչ փողոցում ժամը 03:15-ին ՀՀ ոստիկանության պարեկային ծառայության 1-ին գումարտակի 3-րդ վաշտի պարեկ Արթուր Վարդանյանը /կրծքանշանի համար 08929/ Ալբերտ Խաչատուրի Ասատրյանի նկատմամբ կազմել է վարչական իրավախախտման վերաբերյալ արձանագրություն, ըստ որի Ալբերտ Խաչատուրի Ասատրյանը 19.11.2023 թվականին՝ ժամը 03:00-ին Երևան քաղաքի Գրիգոր Լուսավորիչ փողոցում վարել է «ԲՄՎ» մակնիշի 01 OL 002 հաշվառման համարանիշի տրանսպորտային միջոցը ոչ սթափ վիճակում: Նշված արձանագրությանը վարորդը ծանոթացել է, ստորագրել և առկա է գրառում «Վարել եմ սթափ վիճակում սարքը սխալ է ցույց տալիս, հրաժարվել են 2 անգամ ստուգելուց, ...»: 22.11.2023թ. կայացված որոշմամբ Ալբերտ Խաչատուրի Ասատրյանը մեկ տարի ժամկետով զրկվել է տրանսպորտային միջոցներ վարելու իրավունքից:
5. Սույն քրեական վարույթի 8-րդ, 29-րդ, 49-րդ էջերում առկա է ալկոհոլի պարունակության ստուգման կտրոնի պատճեն, որի զննությամբ պարզվեց, որ սարքի համարն է 91101147, զննման համարը՝ 00940, զննման ամսաթիվը՝ 19.11.2013, ստուգումը կատարվել է ավտոմատ, ժամը՝ 03:07-ին, ալկոհոլի պարունակությունը՝ 0.201 մգ/լ, վարորդի անունը՝ Ալբերտ, ազգանունը՝ Ասատրյան, տրանսպորտային միջոցի համարանիշը՝ 01 OL 002, պարեկային ծառայողի ազգանունը Վարդանյան, կրծքանշանի համար 08929, ստորաբաժանում՝ 1-ին գումարտակ 3-րդ վաշտ:
6. Սույն քրեական վարույթի 9-րդ, 30-րդ, 50-րդ էջում առկա է սթափության սարքի ստուգաչափման թիվ 102342 վկայականի պատճենը, որի զննությամբ պարզվեց, որ ստուգաչափման թվականն է՝ 24.07.2023թ., այն ուժի մեջ է մինչև 2024 թվականի հուլիսի 24-ը: Չափման միջոցի անվանումը և տեսակը՝ Ալկոմետր, գործարանակին համարը՝ 91101147, տեսակը՝ Jupiter XIRP, չափման տիրույթը՝ 0.000-2.000 մգ/լ, արտադրողը՝ Չինաստան, պատկանում է ՀՀ ՊԾ:
7. Սույն քրեական վարույթի 10-րդ, 31-րդ, 51-րդ էջում առկա է Հայփոստի ծանուցագրի կտրոնը, որի զննությամբ պարզվեց, որ թիվ 8180265288 որոշումը 23.11.2023թ. առաքվել է Ալբերտ Ասատրյանին Երևան քաղաքի Մաշտոցի պողոտայի 19 շ. 7 բն. հասցեով: Ամսաթիվ և ստորագրություն հատվածում առկա է 29.11.23 գրառումը և ստորագրություն:
8. Սույն քրեական վարույթի 11-րդ, 27-րդ, 52-րդ էջում առկա է Ճանապարհային ոստիկանության էլեկտրոնային ռեգիստրից արտատպված փաստաթղթի պատճեն, որի զննությամբ պարզվեց, որ Ալբերտ Խաչատուրի Ասատրյանը տրանսպորտային միջոցներ վարելու իրավունքից զրկվել է 29.11.2023 թվականից մինչև 29.11.2024թ.:
9. Սույն քրեական վարույթի 24-րդ էջում առկա է 8180418166 վարչական իրավախախտման վերաբերյալ արձանագրության պատճենը, որի զննությամբ պարզվեց, որ 12.09.2024թ Երևան քաղաքի Սայաթ-Նովա փողոցում՝ ժամը 06:00-ին ՀՀ ոստիկանության պարեկային ծառայության 3-րդ գումարտակի 3-րդ վաշտի կրտսեր պարեկ Ղուկաս Սարգսյանը /կրծքանշանի համար 06004/ Ալբերտ Խաչատուրի Ասատրյանի նկատմամբ կազմել է վարչական իրավախախտման վերաբերյալ արձանագրություն, ըստ որի Ալբերտ Խաչատուրի Ասատրյանը 12.09.2024 թվականին՝ ժամը 05:45-ին Երևան քաղաքի Խանջյան փողոցում վարել է «ԲՄՎ» մակնիշի 01 OL 002 հաշվառման համարանիշի տրանսպորտային միջոցը ոչ սթասի վիճակում՝ զրկված լինելով տրանսպորտային միջոցներ վարելու իրավունքից: Նշված արձանագրությանը վարորդը ծանոթացել է և ստորագրել:
10. Սույն քրեական վարույթի 25-րդ էջում առկա է ալկոհոլի պարունակության ստուգման կտրոնի պատճեն, որի զննությամբ պարզվեց, որ սարքի համարն է 91100981, զննման համարը՝ 02730, զննման ամսաթիվը՝ 12.09.2024, ստուգումը կամարվել է ավտոմատ, ժամը՝ 05:58-ին, ալկոհոլի պարունակությունը՝ 0.126 մգ/լ, վարորդի անունը՝ Ալբերտ, ազգանունը՝ Ասատրյան, տրանսպորտային միջոցի համարանիշը՝ 01 OL 002, պարեկային ծառայողի ազգանունը Սարգսյան, կրծքանշանի համար 06004, ստորաբաժանում՝ 3-րդ գումարտակ 3-րդ վաշտ:
11. Սույն քրեական վարույթի 26-րդ էջում առկա է սթափության սարքի ստուգաչափման թիվ 120883 վկայականի պատճենը, որի զննությամբ պարզվեց, որ ստուգաչափման թվականն է՝ 04.04.2024թ., այն ուժի մեջ է մինչև 2025 թվականի ապրիլի 04-ը: Չափման միջոցի անվանումը և տեսակը՝ Ալկոմետր, գործարանային համարը՝ 91100981, տեսակը՝ Jupiter XYRP, չափման տիրույթը՝ 0.000-2.000 մգ/լ, արտադրողը՝ Զինաստան, պատկանում է ՀՀ ՆԳՆ ոստիկանություն:
12. Սույն քրեական վարույթի 47-րդ էջում առկա է 8180409760 վարչական իրավախախտման վերաբերյալ արձանագրության պատճենը, որի զննությամբ պարզվեց, որ 26.09.2024թ Երևան քաղաքի Վարդանանց փողոցում՝ ժամը 00:50-ին ՀՀ ոստիկանության պարեկային ծառայության 1-ին գումարտակի 1-ին վաշտի կրտսեր պարեկ Հովհաննես Հովհաննիսյանը /կրծքանշանի համար 09650/ Ալբերտ Խաչատուրի Ասատրյանի նկատմամբ կազմել է վարչական իրավախախտման վերաբերյալ արձանագրություն, ըստ որի Ալբերտ Խաչատուրի Ասատրյանը 26.09.2024 թվականին՝ ժամը 00:25-ին Երևան քաղաքի Վարդանանց փողոցում վարել է «ԲՄՎ» մակնելի 01 OL 002 հաշվառման համարանիշի տրանսպորտային միջոցը՝ զրկված լինելով տրանսպորտային միջոցներ վարելու իրավունքից: Նշված արձանագրությանը վարորդը ծանոթացել է և ստորագրել:
/Հատոր 1, գ.թ. 60-63/
Որպես արտավարութային փաստաթուղթ ապացույց են ճանաչվել 29.06.2024թ. վարչական իրավախախտման վերաբերյալ կազմված թիվ 8180413182 արձանագրության պատճենը, 29.06.2024թ. ալկոհոլի պարունակության ստուգման թիվ 01980 զննման կտրոնի պատճենը, Jupiter X/RP տեսակի 91101139 համարի սարքի թիվ 117634 ստուգաչափման վկայականի պատճենը, 19.11.2023թ. վարչական իրավախախտման վարաբերյալ կազմված թիվ 8180265288 արձանագրության պատճենը, 19.11.2023թ. ալկոհոլի պարունակության ստուգման թիվ 00940 զննման կտրոնի պատճենը, Jupiter X/RP տեսակի 91101147 համարի սարքի թիվ 102342 ստուգաչափման վկայականի պատճենը, Հայփոստի ծանուցագրի կտրոնի պատճենը, 12.09.2024թ. վարչական իրավախախտման վերաբերյալ կազմված թիվ 8180418166 արձանագրության պատճենը, 12.09.2024թ. ալկոհոլի պարունակության ստուգման թիվ 02730 զննման կտրոնի պատճենը, Jupiter X/RP տեսակի 91100981 համարի սարքի թիվ 120883 ստուգաչափման վկայականի պատճենը, 26.09.2024թ. վարչական իրավախանտման վերաբերյալ կազմված թիվ 8180409760 արձանագրության պատճենը, Ալբերտ Խաչատուրի Ասատրյանի վերաբերյալ Ճանապարհային ոստիկանության էլեկտրոնային ռեգիստրից արտատպված փաստաթղթի պատճենը:
/Հատոր 1, գ.թ. 4, 5, 6, 7, 8, 9, 10, 11, 24, 25, 26, 27, 28, 29, 30, 31, 47, 48, 49, 50, 51, 52, 64-65/

Դատարանի իրավական վերլուծությունները.
ՀՀ քրեական օրենսգրքի 14-րդ հոդվածի համաձայն` «1. Քրեական պատասխանատվության հիմքն ինչպես ավարտված, այնպես էլ չավարտված հանցանք կատարելն է:»:
ՀՀ քրեական օրենսգրքի 16-րդ հոդվածի համաձայն`
«1. Հանցանք է համարվում սույն օրենսգրքով նախատեսված, պատժի սպառնալիքով արգելված, հանցագործության սուբյեկտի կողմից մեղավորությամբ կատարված արարքը:
(...)»:
ՀՀ 05.05.2021թ. քրեական օրենսգրքի 344-րդ հոդվածի համաձայն`
«1. Տրանսպորտային միջոցներ վարելու իրավունքից զրկված կամ տրանսպորտային միջոցներ վարելու իրավունքը կասեցված անձի կողմից տրանսպորտային միջոց վարելը՝
պատժվում է տուգանքով` առավելագույնը տասնապատիկի չափով, կամ հանրային աշխատանքներով` առավելագույնը հարյուր ժամ տևողությամբ, կամ կարճաժամկետ ազատազրկմամբ՝ առավելագույնը մեկ ամիս ժամկետով:
(...)
4. Սույն օրենսգրքի իմաստով՝ անձի՝ տրանսպորտային միջոցներ վարելու իրավունքը համարվում է կասեցված, եթե նրա` տրանսպորտային միջոցներ վարելու իրավունքն օրենքով սահմանված կարգով կասեցվել է, և կասեցման ժամկետը չի լրացել:
(...)»:
ՀՀ քրեական դատավարության օրենսգրքի 22-րդ հոդվածի համաձայն`
«1. Քրեական վարույթի համար նշանակություն ունեցող ցանկացած հանգամանք պետք է հաստատվի պատշաճ ապացույցների բավարար համակցությամբ:
2. Եզրափակիչ դատավարական ակտը պետք է հիմնվի հետազոտված ապացույցների ազատ և բարեխիղճ գնահատման վրա:
3. Մեղադրական դատավճռի հիմքում դրվող յուրաքանչյուր փաստական հանգամանք պետք է հիմնավորվի ապացույցների այնպիսի ծավալով, որը կբացառի դրա ապացուցվածության վերաբերյալ ցանկացած հիմնավոր կասկած: Դատավճիռ կայացնելիս պետք է հաշվի առնվի անհրաժեշտ և հնարավոր ապացույցների բացակայությունը:
4. Վարույթն իրականացնող մարմինը պարտավոր է հանգամանորեն ստուգել ի պաշտպանություն մեղադրյալի բերված և պատշաճ ձևակերպված փաստարկները:
5. Հանցագործության համար անձի մեղավորության մասին հետևությունը չի կարող հիմնվել ենթադրությունների վրա. այն պետք է հաստատվի փոխկապակցված վերաբերելի, թույլատրելի, հավաստի ապացույցների ամբողջությամբ:
6. Խոստովանական ցուցմունքը չի կարող անձին դատապարտելու հիմք հանդիսանալ, եթե այն չի հիմնավորվել պատշաճ իրավական ընթացակարգի շրջանակներում հետազոտված բավարար ապացույցներով:
(...)»:
ՀՀ քրեական դատավարության օրենսգրքի 101-րդ հոդվածի համաձայն՝
«1. Ապացուցումը սույն օրենսգրքով նախատեսված` ապացուցման ենթակա փաստական հանգամանքները, ինչպես նաև վարույթի համար նշանակություն ունեցող այլ հանգամանքներ հաստատելու կամ հերքելու նպատակով ապացույցներ հավաքելը, ստուգելը և գնահատելն է:»:
ՀՀ քրեական դատավարության օրենսգրքի 102-րդ հոդվածի համաձայն՝
«1. Քրեական վարույթի ընթացքում ապացուցման ենթակա են՝
1) դեպքը և դրա հանգամանքները (ժամանակը, տեղը, եղանակը և այլն).
2) մեղադրյալի առնչությունը դեպքին.
3) ենթադրյալ հանցագործության՝ քրեական օրենքով նախատեսված հատկանիշները.
4) մեղադրյալի մեղավորությունը ենթադրյալ հանցանքը կատարելու մեջ.
5) քրեական պատասխանատվությունը կամ պատիժը մեղմացնող և ծանրացնող հանգամանքները.
6) մեղադրյալի անձը բնութագրող հանգամանքները.
7) ենթադրյալ հանցագործությամբ պատճառված վնասը.
8) այն հանգամանքները, որոնք թույլ են տալիս անձին ազատել քրեական պատասխանատվությունից կամ պատժից.
9) այն հանգամանքները, որոնցով անձը հիմնավորում է վարույթի ընթացքում իր գույքային պահանջները.
10) այն հանգամանքները, որոնցով վարույթի մասնակիցը կամ այլ անձը հիմնավորում է իր պահանջները:
2. Սույն օրենսգրքով նախատեսված վարույթի առանձին տեսակների համար կարող է սահմանվել ապացուցման ենթակա հանգամանքների այլ շրջանակ:»:
ՀՀ քրեական դատավարության օրենսգրքի 105-րդ հոդվածի համաձայն՝
«1. Յուրաքանչյուր ապացույց ենթակա է գնահատման՝ վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից:
2. Քննիչը, դատախազը, դատավորը, ղեկավարվելով քրեադատավարական օրենսդրությամբ, ներառյալ ապացուցման չափանիշների մասին վերաբերելի կանոններով, ապացույցները գնահատում են դրանց պատշաճ հետազոտման և վերլուծության վրա հիմնված ներքին համոզմամբ:
3. Ոչ մի տվյալ նախապես հավաստի ապացույցի ուժ չունի: Դատավորը, ինչպես նաև քննիչը և դատախազը չպետք է կանխակալ վերաբերմունք դրսևորեն ապացույցներին, չպետք է դրանց որոշ մասին մյուսների նկատմամբ առավել կամ նվազ նշանակություն տան, քանի դեռ պատշաճ իրավական ընթացակարգի շրջանակներում դրանք չեն գնահատվել:»:
Վերլուծելով մեղադրյալ Ալբերտ Խաչատուրի Ասատրյանին առաջադրված մեղադրանքը և հիմնվելով հետազոտված թույլատրելի ապացույցների վրա` Դատարանը գտնում է, որ.
- ապացուցված է մեղադրյալ Ալբերտ Խաչատուրի Ասատրյանին վերագրվող փաստական հանգամանքները (արարքները),
- ապացուցված է ՀՀ քրեական օրենսգրքի 344-րդ հոդվածի 1-ին և 2-րդ մասերով նախատեսված արարքների քրեական հակաիրավականությունը,
- ապացուցված է մեղադրյալ Ալբերտ Խաչատուրի Ասատրյանի կողմից այդ արարքները կատարելը,
- ապացուցված է մեղադրյալ Ալբերտ Խաչատուրի Ասատրյանի մեղավորությունը տվյալ արարքները կատարելու մեջ։
Մեղադրյալի նկատմամբ պատիժ նշանակելու հարցը քննարկելիս` Դատարանը գտնում է հետևյալը.
ՀՀ Սահմանադրության 71-րդ հոդվածի համաձայն՝
«1. Հանցանք կատարած անձի պատժի հիմքը նրա մեղքն է:
2. Օրենքով սահմանված պատիժը, ինչպես նաև նշանակված պատժատեսակը և պատժաչափը պետք է համաչափ լինեն կատարված արարքին»:
ՀՀ քրեական օրենսգրքի 55-րդ հոդվածի համաձայն`
«1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:»:
ՀՀ քրեական օրենսգրքի 69-րդ հոդվածի համաձայն`
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները:
4. Պատժի կատարման կարգը և պայմանները սահմանվում են Հայաստանի Հանրապետության քրեակատարողական օրենսդրությամբ:»:
ՀՀ քրեական օրենսգրքի 344-րդ հոդվածի 1-ին և 2-րդ մասերի սանկցիաներն այլընտրանքային են, պատիժ են նախատեսում ինչպես տուգանքի, այնպես էլ՝ հանրային աշխատանքների, կարճաժամկետ ազատազրկման և ազատազրկման ձևով:
Ուսումնասիրելով մեղադրյալ Ալբերտ Խաչատուրի Ասատրյանի անձը` նրա կատարած հանցագործությունների համար պատիժ նշանակելիս Դատարանը հաշվի է առնում հանցագործությունների բնույթն ու հանրության համար վտանգավորության աստիճանը, հանցավորի անձը, այն որ վերջինս նախկինում դատապարտված չի եղել, ուսանող է, իրեն մեղավոր է ճանաչել և զղջացել է կատարածի համար:
Հաշվի առնելով մեղադրյալ Ալբերտ Խաչատուրի Ասատրյանի կատարած հանցագործությունների բնույթը և հանրության համար վտանգավորության աստիճանը, դրանց կատարման եղանակը, հանցավոր մտադրության իրականացման աստիճանը, հանցագործությունները կատարելուց հետո նրա դրսևորած վարքագիծը, ինչպես նաև խախտված հասարակական հարաբերության սոցիալական նշանակությունը` դատարանը գտնում է, որ Ալբերտ Խաչատուրի Ասատրյանն իր կատարած` ՀՀ քրեական օրենսգրքի 344-րդ հոդվածի 1-ին և 2-րդ մասերով նախատեսված հանցագործությունների համար ենթակա է տուգանքի ձևով նախատեսված պատժի:
ՀՀ քրեական օրենսգրքի 59-րդ հոդվածի համաձայն՝
«1. Տուգանքը դրամական տուժանք է, որը նշանակվում է սույն օրենսգրքով նախատեսված դեպքերում և չափերով:
2. Տուգանքը որպես հիմնական պատիժ կարող է նշանակվել սույն օրենսգրքի Հատուկ մասով նախատեսված դեպքերում:
3. Տուգանքը որպես հիմնական պատիժ սահմանվում է ոչ մեծ և միջին ծանրության հանցագործությունների համար՝ հանցանք կատարած անձի ամսական եկամտի հնգապատիկից հիսնապատիկի չափով։
(…)
5. Հանցանք կատարած անձի եկամտի բացակայության կամ դրա չափը պարզելու անհնարինության դեպքում տուգանքի չափը հաշվարկվում է հանցանքը կատարելու պահին նվազագույն աշխատավարձի չափով: Տուգանքի չափը որոշվում է նույն կարգով, եթե հանցանք կատարած անձի եկամուտն առաջացել է հանցանքն ավարտվելուց հետո։ Տուգանքի չափը որոշվում է նույն կարգով նաև այն դեպքում, երբ անձի ամսական եկամտի հաշվարկի արդյունքով դրա չափը պակաս է ստացվում նվազագույն աշխատավարձի չափից:
(…)
8. Եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում։ Եթե տուգանքը նշանակելուց հետո դատապարտյալի նյութական վիճակի վատթարացման հետևանքով նա զրկվում է տուգանքը վճարելու հնարավորությունից, ապա դատարանը, հաշվի առնելով դատապարտյալի դիրքորոշումը`
1) երկարաձգում է տուգանքի վճարման սահմանված վերջնաժամկետը` առավելագույնը 1 տարով,
2) նշանակում է հանրային աշխատանքներ` հանրային աշխատանքների 24 ժամը հաշվարկելով հանցանքը կատարելու պահին նվազագույն աշխատավարձի չափով:
(…)»:
Նկատի ունենալով, որ մեղադրյալ Ալբերտ Խաչատուրի Ասատրյանը չի աշխատում, ուստի Դատարանը գտնում է, որ տուգանքի չափը պետք է հաշվարկել արարքը կատարելու պահի նվազագույն աշխատավարձի չափով, ինչպես նաև Դատարանը գտնում է, որ վերջինիս նկատմամբ պետք է նշանակվի ՀՀ քրեական օրենսգրքի 344-րդ հոդվածի 1-ին և 2-րդ մասերի սանկցիայով նախատեսված տուգանքի նվազագույն՝ հնգապատիկի չափով, որով հնարավոր է վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:
Միաժամանակ հաշվի առնելով մեղադրյալի հայտարարությունը, որ տուգանքը միանվագ վճարելու հնարավորություն չունի, Դատարանը գտնում է, որ մեղադրյալ Ալբերտ Խաչատուրի Ասատրյանին պետք է թույլատրել նշանակված տուգանքը վճարել մաս առ մաս՝ 12 /տասներկու/ ամսվա ընթացքում:
ՀՀ քրեական օրենսգրքի 74-րդ հոդվածի համաձայն՝
«1. Հանցագործությունների համակցությամբ յուրաքանչյուր հանցագործության համար առանձին պատիժ (հիմնական և լրացուցիչ) նշանակելով` դատարանը վերջնական պատիժը որոշում է նշանակված պատիժները լրիվ կամ մասնակիորեն գումարելու միջոցով: Մասնակի գումարման դեպքում վերջնական պատիժը պետք է ավելի լինի, քան համակցության մեջ մտնող հանցագործությունների համար նշանակված առավել խիստ պատիժը: Հանցագործությունների համակցությամբ վերջնական պատիժը որոշելիս մասնակի գումարվող պատիժը չի կարող պակաս լինել տվյալ պատժատեսակի համար սույն օրենսգրքով նախատեսված նվազագույն չափից կամ ժամկետից, սակայն վերջնական պատիժը չի կարող գերազանցել սույն հոդվածի 2-րդ, 3-րդ, 4-րդ, 5-րդ, 6-րդ և 9-րդ մասերով նախատեսված առավելագույն չափը կամ ժամկետը:
(…)»:
Քննարկելով անցագործությունների համակցությամբ պատիժ նշանակելու հարցը, Դատարանն արձանագրում է, որ հանցագործությունների համակցությամբ վերջնական պատիժը որոշելիս մասնակի գումարվող պատիժը չի կարող պակաս լինել տվյալ պատժատեսակի համար սույն օրենսգրքով նախատեսված նվազագույն չափից կամ ժամկետից, իսկ սույն գործով արդեն իսկ որոշվել է Ալբերտ Խաչատուրի Ասատրյանի նկատմամբ նշանակել ՀՀ քրեական օրենսգրքի 344-րդ հոդվածի 1-ին և 2-րդ մասերի սանկցիայով նախատեսված տուգանքի նվազագույն չափով պատիժ, ուստի նշանակվող պատիժները պետք է ամբողջությամբ գումարվեն:
ՀՀ քրեական օրենսգրքի 61-րդ հոդվածի համաձայն՝
«1. Որոշակի պաշտոններ զբաղեցնելու իրավունքից զրկելը՝ որոշակի պաշտոններ զբաղեցնելը, իսկ որոշակի գործունեությամբ զբաղվելու իրավունքից զրկելը՝ կատարված հանցանքի բնույթի հետ կապված որոշակի գործունեությամբ զբաղվելն արգելելն է:
(…)
4. Որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելը որպես լրացուցիչ պատիժ սահմանվում է ոչ մեծ և միջին ծանրության հանցագործությունների համար՝ 1-3 տարի, իսկ ծանր և առանձնապես ծանր հանցագործությունների համար՝ 1-5 տարի ժամկետով:
5. Որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելը որպես լրացուցիչ պատիժ կարող է նշանակվել այն դեպքում, երբ դատարանը, ելնելով հանցավորի պաշտոնավարության կամ որոշակի գործունեությամբ զբաղվելու ժամանակ նրա կատարած հանցանքի բնույթից, հնարավոր չի համարում անձի կողմից հետագա ժամանակահատվածում որոշակի պաշտոններ զբաղեցնելը կամ որոշակի գործունեությամբ զբաղվելը:
(…)»:
Քննարկելով մեղադրյալ Ալբերտ Խաչատուրի Ասատրյանի նկատմամբ լրացուցիչ պատիժ նշանակելու հարցը` Դատարանը փաստում է, որ վերջինս տրանսպորտային միջոցներ վարելու իրավունքը զրկելու ժամկետը լրանալուց հետո օրենքով սահմանված ընթացակարգերի պահպանմամբ չի վերականգնել այն, հետևաբար Դատարանը գտնում է, որ մեղադրյալ Ալբերտ Խաչատուրի Ասատրյանի նկատմամբ չի կարող լրացուցիչ պատիժ նշանակվել:
Քննարկելով խափանման միջոցի հարցը` Դատարանը գտնում է, որ մեղադրյալ Ալբերտ Խաչատուրի Ասատրյանի նկատմամբ «Բացակայելու արգելք» խափանման միջոցն ընտրված է ճիշտ և վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը:
Քննարկելով արտավարութային փաստաթղթերի պահպանման հարցը, Դատարանը գտնում է, որ դրանք անհրաժեշտ է թողնել կցված քրեական գործին:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 347-350-րդ` Դատարանը.

Վ Ճ Ռ Ե Ց

Ալբերտ Խաչատուրի Ասատրյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով, ՀՀ քրեական օրենսգրքի 344-րդ հոդվածի 2-րդ մասով, ՀՀ քրեական օրենսգրքի 344-րդ հոդվածի 1-ին մասով:
ՀՀ քրեական օրենսգրքի 344-րդ հոդվածի 2-րդ մասով դատապարտել տուգանքի` նվազագույն աշխատավարձի հնգապատիկի՝ 375.000 երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 344-րդ հոդվածի 2-րդ մասով դատապարտել տուգանքի` նվազագույն աշխատավարձի հնգապատիկի՝ 375.000 երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 344-րդ հոդվածի 1-ին մասով դատապարտել տուգանքի` նվազագույն աշխատավարձի հնգապատիկի՝ 375.000 երեք հարյուր յոթանասունհինգ հազար) ՀՀ դրամի չափով:
Պատիժների լրիվ գումարմամբ Ալբերտ Խաչատուրի Ասատրյանի նկատմամբ որպես վերջնական պատիժ նշանակել տուգանք՝ նվազագույն աշխատավարձի տասնհինգապատիկի՝ 1.125.000 մեկ միլիոն հարյուր քսանհինգ հազար) ՀՀ դրամ չափով:
Դատավճիռն օրինական ուժի մեջ մտնելուց հետո թույլատրել Ալբերտ Խաչատուրի Ասատրյանին դատավճռով նշանակված 1.125.000 մեկ միլիոն հարյուր քսանհինգ հազար) ՀՀ դրամը վճարել մաս առ մաս՝ 12 /տասներկու/ ամսվա ընթացքում, յուրաքանչյուր ամիս նվազագույնը 93.750 /իննսուներեք հազար յոթ հարյուր հիսուն/ ՀՀ դրամի չափով:
Ալբերտ Խաչատուրի Ասատրյանի նկատմամբ ընտրված խափանման միջոց «Բացակայելու արգելքը» թողնել անփոփոխ մինչև դատավճռի օրինական ուժի մեջ մտնելը:
Ապացույց ճանաչված արտավարութային փաստաթղթերը թողնել կցված քրեական գործին:
Դատավճիռը կարող է բողոքարկվել ՀՀ քրեական վերաքննիչ դատարան` ստանալու օրվանից հետո մեկամսյա ժամկետում:

ԴԱՏԱՎՈՐ` Վ.Լ.ԳՐԻԳՈՐՅԱՆ