ԵԴ1/0854/01/25

ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


2026 թվականի մայիսի 18-ին քաղաք Երևան
Երևան քաղաքի առաջին ատյանի ընդհանուր իրավասության քրեական դատարանը /այսուհետ նաև` Դատարան/` հետևյալ կազմով
Դռնբաց դատական նիստում արագացված վարույթի կիրառմամբ, քննության առնելով քրեական գործն ըստ մեղադրանքի Տիգրան Շոթայի Գրիգորյանի (ծնված՝ 01.06.1976թ., Երևան քաղաքում, ազգությամբ հայ, ՀՀ քաղաքացի, խնամքին անչափահաս երեխա և վատառողջ եղբայր, չի աշխատում, չդատված, հաշվառված՝ ք.Երևան, Հաղթանակ թաղամաս, 5-րդ փ., 47 տանը, փաստացի բնակվում է ք.Երևան, Հաղթանակ թաղամաս, 2-րդ փ., 2-րդ նրբ., 9 տանը) ՀՀ քրեական օրենսգրքի 452-րդ հոդվածի 1-ին մասով,
1.Գործի դատավարական նախապատմությունը.
23.05.2024 թվականին ՀՀ ՔԿ ՀԿԳ քննության գլխավոր վարչության մարդու դեմ ուղղված հանցագործությունների քննության վարչության ՀԿԳ ավագ քննիչ Ա.Այվազյանի կողմից կազմվել է թիվ 69114024 քրեական վարույթը նախաձեռնելու մասին արձանագրություն /հատոր 1-ին, գ.թ. 1-2/:
03.03.2025 թվականին ՀՀ գլխավոր դատախազության պետական իշխանության դեմ ուղղված հանցագործությունների գործերով վարչության դատախազ Ա.Խուդավերդյանի որոշմամբ Տիգրան Շոթայի Գրիգորյանի նկատմամբ հարուցվել է հանրային քրեական հետապնդում ՀՀ քրեական օրենսգրքի 452-րդ հոդվածի 1-ին մասով /հատոր 1-ին, գ.թ. 81-82/:
03.03.2025 թվականին նախաքննական մարմնի որոշմամբ մեղադրյալ Տիգրան Շոթայի Գրիգորյանի նկատմամբ խափանման միջոց է կիրառվել բացակայելու արգելքը /հատոր 1-ին, գ.թ. 83/:
Թիվ ԵԴ1/0854/01/25 (69114024 նախաքննական համար) քրեական գործն ըստ մեղադրանքի Տիգրան Շոթայի Գրիգորյանի ՀՀ քրեական օրենսգրքի 452-րդ հոդվածի 1-ին մասով ուղարկվել է Երևան քաղաքի առաջին ատյանի ընդհանուր իրավասության քրեական դատարան և համակարգչային ծրագրի միջոցով իրականացվող գործերի բաշխմամբ, գործը մակագրվել է դատավոր Վահագն Մելիքյանին:
Քրեական գործը դատավորի աշխատակազմին է փոխանցվել 13.03.2025 թվականին:
Դատարանի 17.03.2025 թվականի որոշմամբ քրեական գործը վարույթ է ստանձնվել և նախնական դատալսումներ է նշանակվել:
Տիգրան Շոթայի Գրիգորյանի նկատմամբ ՀՀ քրեական օրենսգրքի 452-րդ հոդվածի 1-ին մասով հանրային քրեական հետապնդում է հարուցվել այն բանի համար, որ նա պաշտոնատար անձի օրինական ծառայողական, քաղաքական գործունեությանը միջամտելու նպատակով բռնություն գործադրելու սպառնալիքներ է հնչեցրել պաշտոնատար անձի և նրա մերձավոր ազգականի նկատմամբ:
Այսպես՝
2024 թվականի մարտի 26-ին Տիգրան Գրիգորյանը, նպատակ ունենալով միջամտելպաշտոնատար անձի օրինական ծառայողական գործունեությանը, «***» սոցիալական ցանցում իր՝ «***» «***» նույնականացման տվյալով իր կողմից վարվող օգտահաշվի անվամբ գրանցված «Մեսինջեր» հավելվածով *** անվամբ ֆեյսբուքյան օգտահաշվին ուղարկել է *** ու նրա ընտանիքի անդամներին ուղղված հետևյալ բովանդակությամբ հաղորդագրություններ, այն է՝ «***», այդպիսով *** օրինական ծառայողական, քաղաքական գործունեությանը միջամտելու նպատակով բռնություն գործադրելու սպառնալիքներ է հնչեցրել *** և վերջինիս մերձավոր ազգականների հասցեին:
Արագացված վարույթ.
Քրեական գործով նախնական դատալսումների փուլում մեղադրյալ Տիգրան Շոթայի Գրիգորյանի պաշտպանը միջնորդել է կիրառել արագացված վարույթ:
Մեղադրյալ Տիգրան Շոթայի Գրիգորյանը միացել է ներկայացված միջնորդությանը և հայտնել, որ միջնորդությունը ներկայացրել է կամավոր, խորհրդակցել է պաշտպանի հետ, գիտակցում է արագացված վարույթի կիրառման հետևանքները, առաջադրված մեղադրանքն իրեն պարզ է, համաձայն է մեղադրանքի հետ, իրեն լիովին մեղավոր է ճանաչում առաջադրված մեղադրանքում:
Հանրային մեղադրողը չի առարկել արագացված վարույթի կիրառման դեմ:
Դատարանը, համոզվելով, որ առկա են ՀՀ քրեական դատավարության օրենսգրքի 464.1-րդ հոդվածի 1-ին մասով նախատեսված և բացակայում են նույն հոդվածի 2-րդ մասով նախատեսված պայմանները, որոշում է կայացրել արագացված վարույթ կիրառելու մասին և անցել է լրացուցիչ դասալսումների փուլ:
Դատարանի իրավական վերլուծությունները.
Դատարանը հիմք ընդունելով մեղադրանքն ամբողջ ծավալով Տիգրան Շոթայի Գրիգորյանի կողմից կամովին ու գիտակցաբար ընդունելու և դրա հետ համաձայն լինելու փաստերը, հանգում է հետևության, որ նա մեղավորությամբ կատարել է ՀՀ քրեական օրենսգրքի 452-րդ հոդվածի 1-ին մասով մեղսագրվող արարքը:
Ուսումնասիրելով և գնահատելով գործով ձեռք բերված և հետազոտված ապացույցները վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, Դատարանն ապացուցված է համարում մեղադրյալ Տիգրան Շոթայի Գրիգորյանի կողմից հանցավոր արարք կատարելը:
Արարքը, որի կատարման մեջ մեղադրվում է վերջինս, համապատասխանում է ՀՀ քրեական օրենսգրքի 452-րդ հոդվածի 1-ին մասի հատկանիշներին և ճիշտ է որակված:
Ապացուցված է նաև մեղադրյալ Տիգրան Շոթայի Գրիգորյանի կողմից նշված արարքը կատարելը և մեղավորությունը տվյալ հանցանքը կատարելու մեջ:
Մեղադրյալ Տիգրան Շոթայի Գրիգորյանի նկատմամբ պատիժ նշանակելիս դատարանը հաշվի է առնում ինչպես կատարած հանցագործության բնույթն ու հասարակական վտանգավորության աստիճանը, այնպես էլ նրա անձը:
Դատարանը մեղադրյալ Տիգրան Շոթայի Գրիգորյանի անձը բնութագրող և պատասխանատվությունն ու պատիժը մեղմացնող հանգամանքներ է արձանագրում մեղքն ընդունելը և անկեղծորեն զղջալը, դատված չլինելը, պատվոգրեր ստացած լինելը և խնամքին երկու անձ ունենալը:
Դատարանը մեղադրյալ Տիգրան Շոթայի Գրիգորյանի պատասխանատվությունն ու պատիժը ծանրացնող հանգամանք չի արձանագրում:
Դատարանը, նպատակ ունենալով վերականգնելու սոցիալական արդարությունը, ուղղելու պատժի ենթարկված անձին, ինչպես նաև կանխելու հանցագործությունները և հաշվի առնելով Տիգրան Շոթայի Գրիգորյանի անձը, նրա պատասխանատվությունն ու պատիժը մեղմացնող հանգամանքների առկայությունը և ծանրացնող հանգամանքների բացակայությունը, հաշվի առնելով նաև մեղադրյալի հայտարարությունն առ այն, որ չունի ֆինանսական միջոցներ, խնդրում է իր նկատմամբ պատիժ նշանակել հանրային աշխատանքների տեսքով, Դատարանը գտնում է, որ մեղադրյալի նկատմամբ պետք է պատիժ նշանակել հանրային աշխատանքներ, որը տվյալ դեպքում համաչափ է կատարված կոնկրետ հանցագործության բնույթին, վտանգավորության աստիճանին, այն կատարելու հանգամանքներին, հանցավորի անձին և բավարար է պատժի նպատակների նվաճման տեսանկյունից:
Քննության առնելով խափանման միջոցի հարցը, Դատարանը գտնում է, որ Տիգրան Շոթայի Գրիգորյանի նկատմամբ կիրառված բացակայելու արգելք խափանման միջոցը պետք է թողնել անփոփոխ՝ մինչև դատավճռի օրինական ուժի մեջ մտնելը:
Արտավարութային փաստաթղթերը պետք է թողնել կցված քրեական գործին՝ դրա պահպանության ողջ ժամանակահատվածում:
Քրեական գործով դատական ծախսեր, գույքային հայց և տնօրինման ենթակա իրեղեն ապացույցներ առկա չեն:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 345-350-րդ, 464.4-րդ և 464.5-րդ հոդվածներով` Դատարանը

Վ Ճ Ռ Ե Ց
Մեղադրյալ Տիգրան Շոթայի Գրիգորյանին մեղավոր ճանաչել ՀՀ քրեական օրենսգրքի 452-րդ հոդվածի 1-ին մասով և դատապարտել հանրային աշխատանքների 80 ժամ տևողությամբ:
Մեղադրյալ Տիգրան Շոթայի Գրիգորյանի նկատմամբ կիրառված բացակայելու արգելք խափանման միջոցը թողնել անփոփոխ՝ մինչև դատավճռի օրինական ուժի մեջ մտնելը:
Արտավարութային փաստաթղթերը թողնել կցված քրեական գործին՝ դրա պահպանության ողջ ժամանակահատվածում:
Դատավճիռը կարող է բողոքարկվել ՀՀ վերաքննիչ քրեական դատարան դատավճիռը ստանալու օրվանից հետո՝ մեկամսկա ժամկետում, բացառությամբ ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3 մասերով նախատեսված հիմքերով:

ԴԱՏԱՎՈՐ Վ.ՄԵԼԻՔՅԱՆ