ԵԴ1/0845/01/25


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«21» Ապրիլի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
քարտուղարությամբ՝ ՌՈԲԵՐՏ ՍԻՐԱԿԱՆՅԱՆԻ
մասնակցությամբ.
հանրային մեղադրող՝ ԱՐՏՅՈՄ ԲԱԴԱԼՅԱՆԻ
մեղադրյալ՝ ՎԱՉԱԳԱՆ ՀՈՎՀԱՆՆԻՍՅԱՆԻ
դռնբաց դատական նիստում քննելով Վաչագան Գևորգի Հովհաննիսյանի (1) վերաբերյալ քրեական գործն ըստ մեղադրանքի՝ ՀՀ քրեական օրենսգրքի 344 հոդվածի 2-րդ մասով (2 դրվագ).





1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ.
Թիվ 60650724 քրեական վարույթով Վաչագան Գևորգի Հովհաննիսյանին ՀՀ քրեական օրենսգրքի 344 հոդվածի 2-րդ մասով (2 դրվագ) մեղադրանք է ներկայացվել հետևյալ արարքների համար.
«[Նա] չունենալով տրանսպորտային միջոց վարելու իրավունք 2024 թվականի հոկտեմբերի 9-ին՝ ժամը 01:43-ին, Երևան քաղաքի Թամանցիների փողոցում գտնվելով հարբած (ոչ սթափ վիճակում)՝ արտաշնչած մեկ լիտր օդի մեջ մաքուր ալկոհոլի պարունակությունը 0,437 մգ/լ, վարել է «Վոլկսվագեն» մակնիշի, 37 BD 767 հաշվառման համարանիշով տրանսպորտային միջոցը, ինչը հայտնաբերվել է ՀՀ ՆԳՆ ոստիկանության պարեկային ծառայության աշխատակիցների կողմից և կազմվել է վարչական իրավախախտման վերաբերյալ արձանագրություն:
(...)
Բացի այդ, Վաչագան Գևորգի Հովհաննիսյանը չունենալով տրանսպորտային միջոց վարելու իրավունք 2024 թվականի հոկտեմբերի 9-ին՝ ժամը 03:43-ին, Երևան քաղաքի Թբիլիսյան խճուղում՝ գտնվելով հարբած (ոչ սթափ վիճակում)՝ արտաշնչած մեկ լիտր օդի մեջ մաքուր ալկոհոլի պարունակությունը 0,291 մգ/լ, վարել է «Վոլկսվագեն» մակնիշի, 37 BD 767 հաշվառման համարանիշով տրանսպորտային միջոցը, ինչը հայտնաբերվել է ՀՀ ՆԳՆ ոստիկանության պարեկային ծառայության աշխատակիցների կողմից և կազմվել է վարչական իրավախախտման վերաբերյալ արձանագրություն»։

2. ԴԱՏԱՔՆՆՈՒԹՅԱՆ ԸՆԹԱՑՔՈՒՄ ՀԵՏԱԶՈՏՎԱԾ ԹՈՒՅԼԱՏՐԵԼԻ ԱՊԱՑՈՒՅՑՆԵՐԸ.
ՀԻՄՆԱԿԱՆ ԴԱՏԱԼՍՈՒՄՆԵՐ

2.1 2024 թվականի փետրվարի 11-ի «Զննում կատարելու մասին» արձանագրության համաձայն.
«2024 թվականի հոկտեմբերի 9-ին՝ ժամը 01:52-ին, Երևան քաղաքի Թամանցիների փողոցում ՀՀ ՆԳՆ ոստիկանության պարեկային ծառայության Երևան քաղաքի գնդի 4-րդ գումարտակի 3-րդ վաշտի պարեկ Բաբկեն Սարգսյանի /կրծքանշան թիվ 00573/ կողմից կազմվել է վարչական իրավախախտման վերաբերյալ թիվ 8180421033 արձանագրությունը, համաձայն որի՝ Վաչագան Գևորգի Հովհաննիսյանը (ծնված՝ 31.07.1995թ.) չունենալով տրանսպորտային միջոցներ վարելու իրավունք՝ ժամը 01:43-ին Երևան քաղաքի Թամանցիների փողոցում՝ ոչ սթափ վիճակում վարել է «Վոլկսվագեն» մակնիշի 37 BD 767 հաշվառման համարանիշի տրանսպորտային միջոցը։
Արձանագրության վարչական իրավախախտում կատարած անձի բացատրությունը և դիտողությունը նշելու հատվածում առկա է ստորագրություն:
Ալկոհոլի պարունակության ստուգման կտրոնի զննությամբ պարզվեց, որ ստուգաչափման սարքի համարն է՝ 91101104, զննման համարը՝ 02524, զննման ամսաթիվը՝ 09.10.2024թ., զննման ժամը՝ 01:47:59, վերջին ստուգաչափման ամսաթիվը՝ 05.04.2024թ., դատարկ թեստ՝ 0.000 մգ/լ, ստուգաչափման ձևաչափը՝ ավտոմատ, ալկոհոլի պարունակությունը՝ 0.437մգ/լ, վարորդի անունն է՝ Վաչագան, ազգանունը՝ Հովհաննիսյան, տրանսպորտային միջոցի համարանիշը՝ 37 BD 767, ՀԾՀ 2305970323, ՊԾ ազգանունը՝ Ավետիսյան, կրծքանշանի համարը՝ 09504, ստորաբաժանում՝ 4-րդ գումարտակ, 3-րդ վաշտ:
ՀՀ էկոնոմիկայի նախարարության «Ստանդարտացման և չափագիտության ազգային մարմին» ՓԲԸ-ի կողմից տրված թիվ 120901 ստուգաչափման վկայականի զննությամբ պարզվեց, որ վկայականը ուժի մեջ է 2024 թվականի ապրիլի 5-ից մինչև 2025 թվականի ապրիլի 5-ը, ստուգաչափման սարքի գործարանային համարն է 91101104, տեսակը՝ Jupiter X/RP, չափման տիրույթը՝ 0.00±2.000մգ/լ, ճշտության դասը, կարգը /սխալանքը/ +10%, արտադրողը՝ Չինաստան, պատկանում է ՀՀ ՊԾ-ին, ստուգաչափումը կատարվել է հետևյալ ստուգաչափման մեթոդիկայի անվանման նշագրի՝ MU2835-2008, ստուգաչափող անվան դիմաց առկա է ստորագրություն և նշված է Վ.Բաբաջանյան, իսկ բաժնի /լաբորատորիայի վարիչ/ անվան դիմաց առկա է ստորագրություն և նշված է Գ.Մարտիրոսյան։
ՀՀ ՆԳՆ ոստիկանության «Ճանապարհային ոստիկանություն» ծառայության էլեկտրոնային ռեգիստրից ստացված տեղեկատվության զննությամբ պարզվեց, որ Վաչագան Գևորգի Հովհաննիսյանի անվամբ հաշվառված թիվ RJ378657 վարորդական վկայականը գտնվում է զրկված վիճակում, սկիզբ՝ 16.04.2021թ., ավարտ՝ 16.04.2022թ.:
2021 թվականի ապրիլի 11-ին՝ ժամը 02:15-ին, Երևան քաղաքի Մոսկովյան փողոցում ՀՀ ոստիկանության ճանապարհային ոստիկանության 1-ին սպայական գումարտակի 2-րդ դասակի տեսուչ Հակոբ Հակոբյանի /կրծքանշան թիվ 05031/ կողմից կազմվել է վարչական իրավախախտման վերաբերյալ թիվ ԱՖ607392 արձանագրությունը, համաձայն որի` Վաչագան Գևորգի Հովհաննիսյանը (ծնված՝ 31.07.1985թ.), ժամը՝ 01:30-ին Երևան քաղաքի Մոսկովյան փողոցում՝ ոչ սթափ վիճակում վարել է «ԲՄՎ» մակնիշի 36 XR 948 հաշվառման համարանիշի տրանսպորտային միջոցը:
Արձանագրության վարչական իրավախախտում կատարած անձի բացատրությունը և դիտողությունը նշելու հատվածում առկա է «վարորդը հրաժարվեց ստորագրելուց բացատրություն տալուց և որոշման իր օրինակը ստանալուց» գրառումը:
Նույն օրը կայացված թիվ ԱՖ607392 որոշման համաձայն՝ Վաչագան Հովհաննիսյանը 1 (մեկ) տարի ժամկետով զրկվել է տրանսպորտային միջոցներ վարելու իրավունքից:
Որոշման պատճենը և կատարման կարգի մասին քաղվածքն ստացա հատվածում առկա է «Հասցեատերը հրաժարվեց» գրառումը։
Թիվ ԱՖ607392 որոշման առաքանու վրա առկա է «16.04.21թ.» գրառումը և ստորագրություն:
Ալկոհոլի պարունակության ստուգման կտրոնի զննությամբ պարզվեց, որ ստուգաչափման սարքի համարն է՝ 864738, զննման համարը՝ 05283, զննման ամսաթիվը՝ 11.04.2021թ., վերջին ստուգաչափման ամսաթիվը՝ 25.10.2020թ., դատարկ թեստ՝ 0.000 մգ/լ, ստուգաչափման ձևաչափը ավտոմատ, ալկոհոլի պարունակությունը՝ 0.869մգ/լ, վարորդի անունն է՝ Վաչագան, ազգանունը՝ Հովհաննիսյան, տրանսպորտային միջոցի համարանիշը՝ 36 XR 948, Վ/Վ՝ RJ378657, տեսուչի ազգանունը՝ Գրիգորյան, կրծքանշանի համարը՝ 00336, ստորաբաժանում՝ 1-ին գումարտակ, 2-րդ դասակ:
ՀՀ էկոնոմիկայի նախարարության «Ստանդարտացման և չափագիտության ազգային մարմին» ՓԲԸ-ի կողմից տրված թիվ 038859 ստուգաչափման վկայականի զննությամբ պարզվեց, որ վկայականը ուժի մեջ է 2020 թվականի հոկտեմբերի 25-ից մինչև 2021 թվականի հոկտեմբերի 25-ը, ստուգաչափման սարքի գործարանային համարն է 861758, տեսակը՝ Jupiter X/RP, չափման տիրույթը՝ 0.000÷2.500մգ/լ, ճշտության դասը, կարգը /սխալանքը/ ±10%, արտադրողը՝ Չինաստան, պատկանում է ՀՀ ՊԾ-ին, ստուգաչափումը կատարվել է հետևյալ ստուգաչափման մեթոդիկայի անվանման նշագրի՝ MU2835-2008, ստուգաչափող անվան դիմաց առկա է ստորագրություն և նշված է Ա.Գուլքանյան, իսկ բաժնի /լաբորատորիայի վարիչ/ անվան դիմաց առկա է ստորագրություն և նշված է Գ.Մարտիրոսյան:
2024 թվականի հոկտեմբերի 9-ին՝ ժամը 03:45-ին, Երևան քաղաքի Թբիլիսյան խճուղում ՀՀ ՆԳՆ ոստիկանության պարեկային ծառայության Երևան քաղաքի գնդի 4-րդ գումարտակի 1-ին վաշտի կրտսեր պարեկ Արա Դավթյանի /կրծքանշան թիվ 01243/ կողմից կազմվել է վարչական իրավախախտման վերաբերյալ թիվ 8180404497 արձանագրությունը, համաձայն որի՝ Վաչագան Գևորգի Հովհաննիսյանը (ծնված 31.07.1995թ.) չունենալով տրանսպորտային միջոցներ վարելու իրավունք՝ ժամը 03:43-ին Երևան քաղաքի Թբիլիսյան խճուղում՝ ոչ սթափ վիճակում վարել է «Վոլկսվագեն» մակնիշի 37 BD 767 հաշվառման համարանիշի տրանսպորտային միջոցը։
Արձանագրության վարչական իրավախախտում կատարած անձի բացատրությունը և դիտողությունը նշելու հատվածում առկա է ստորագրություն:
Ալկոհոլի պարունակության ստուգման կտրոնի զննությամբ պարզվեց, որ ստուգաչափման սարքի համարն է՝ 91100939, զննման համարը՝ 02880, զննման ամսաթիվը՝ 09.10.2024թ., զննման ժամը՝ 03:43:29, վերջին ստուգաչափման ամսաթիվը՝ 26.06.2024թ., դատարկ թեստ՝ 0.000 մգ/լ, ստուգաչափման ձևաչափը` ավտոմատ, ալկոհոլի պարունակությունը՝ 0.291մգ/լ, վարորդի անունն է՝ Վաչագան, ազգանունը՝ Հովհաննիսյան, տրանսպորտային միջոցի համարանիշը՝ 37 BD 767, ՀԾՀ 2305970323, ՊԾ ազգանունը՝ Դավթյան, կրծքանշանի համարը՝ 01243, ստորաբաժանում 4-րդ գումարտակ, 1-ին վաշտ:
ՀՀ էկոնոմիկայի նախարարության «Ստանդարտացման և չափագիտության ազգային մարմին» ՓԲԸ-ի կողմից տրված թիվ 128154 ստուգաչափման վկայականի զննությամբ պարզվեց, որ վկայականը ուժի մեջ է 2024 թվականի հունիսի 26-ից մինչև 2025 թվականի հունիսի 26-ը, ստուգաչափման սարքի գործարանային համարն է 91100939, տեսակը՝ Jupiter X/RP, չափման տիրույթը՝ 0.00÷2.000մգ/լ, ճշտության դասը, կարգը /սխալանքը/ ±10%, արտադրողը՝ Չինաստան, պատկանում է ՀՀ ՊԾ-ին, ստուգաչափումը կատարվել է հետևյալ ստուգաչափման մեթոդիկայի անվանման նշագրի՝ MU2835-2008, ստուգաչափող անվան դիմաց առկա է ստորագրություն և նշված է Վ.Բաբաջանյան, իսկ բաժնի /լաբորատորիայի վարիչ անվան դիմաց առկա է ստորագրություն և նշված է Գ.Մարտիրոսյան»: (2)

ԼՐԱՑՈՒՑԻՉ ԴԱՏԱԼՍՈՒՄՆԵՐ

2.2 Դատվածությունների և հետախուզման առկայության Ձև 8 հարցման պատասխանի, համաձայն՝ Վաչագան Գևորգի Հովհաննիսյանը նախկինում դատապարտված չի եղել:
2.3 ՀՀ քաղաքացիական կացության ակտերի գրանցման տվյալների շտեմարանում միասնական էլեկտրոնային տեղեկատվական համակարգի միջոցով կատարված հարցմանն ի պատասխան ստացվել են՝
-ծննդի պետական գրանցման թիվ 18153 ակտը, համաձայն որի՝ 2022 թվականի հուլիսի 7-ին ծնված Արևիկ Վաչագանի Հովհաննիսյանի հայրն է Վաչագան Գևորգի Հովհաննիսյանը,
-ծննդի պետական գրանցման թիվ 29402 ակտը, համաձայն որի՝ 2023 թվականի հոկտեմբերի 13-ին ծնված Գևորգ Վաչագանի Հովհաննիսյանի հայրն է Վաչագան Գևորգի Հովհաննիսյանը:
2.4 ՀՀ պետական եկամուտների կոմիտեի հարկ վճարողների սպասարկման վարչության պետի 2025 թվականի մարտի 27-ի գրության համաձայն՝ Վաչագան Գևորգի Հովհաննիսյանը հանցանքներից վերջինն ավարտվելու օրվան նախորդող 12 ամիսների ընթացքում չի հանդիսացել վարձու աշխատող։ Հարկային մարմնի տեղեկատվական բազայում առկա չեն նաև Վաչագան Գևորգի Հովհաննիսյանի կողմից իր ակտիվների ներդրմամբ (տրամադրմամբ) այլ անձանց գործունեությունից ստացված եկամուտի (շահաբաժնի, տոկոսի, ռոյալթիի, վարձակալական վճարի) վերաբերյալ տվյալներ։ (3)
Քննարկման ենթակա հարցերի վերաբերյալ կողմերի դիրքորոշումները.
2.5 Պատժի վերաբերյալ հարցերը քննարկելիս հանրային մեղադրողը խնդրեց Դատարանին Վաչագան Գևորգի Հովհաննիսյանի կողմից կատարված հանցանքներից յուրաքանչյուրի նկատմամբ որպես պատիժ նշանակել տուգանք՝ նվազագույն աշխատավարձի վեցապատիկի չափով, և ՀՀ քրեական օրենսգրքի 74 հոդվածով սահմանված կարգով նշանակված պատիժները լրիվ գումարել:
2.6 Մեղադրյալ Վաչագան Հովհաննիսյանն, ըստ էության, նշեց, որ չի ցանկանում կատարել հանրային աշխատանքներ, քանի որ ունի առողջական խնդիրներ, և խնդրեց Դատարանին տուգանքի ձևով պատժի նշանակման դեպքում վճարման ժամկետը տարաժամկետել մինչև 1 տարի, քանի որ հնարավորություն չի ունենա մի անգամից և ամբողջությամբ վճարել այն:

3. ԴԱՏԱՐԱՆԻ ՓԱՍՏԱԿԱՆ ՎԵՐԼՈՒԾՈՒԹՅՈՒՆՆԵՐԸ ԵՎ ԴԱՏԱՐԱՆԻ ԿՈՂՄԻՑ ՀԱՍՏԱՏՎԱԾ ԿԱՄ ՀԵՐՔՎԱԾ ՓԱՍՏԱԿԱՆ ՀԱՆԳԱՄԱՆՔՆԵՐԸ.
3.1 Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում որ.
-Վաչագան Գևորգի Հովհաննիսյանը, չունենալով տրանսպորտային միջոց վարելու իրավունք, 2024 թվականի հոկտեմբերի 9-ին՝ ժամը 01:43-ին, Երևան քաղաքի Թամանցիների փողոցում գտնվելով հարբած (ոչ սթափ վիճակում), ոչ սթափ վիճակի այնպիսի հաշվառմամբ, որ արտաշնչած 1 լիտր ծավալով օդի մեջ մաքուր ալկոհոլի պարունակությունը կազմել է 0,3933 մգ/լ, վարել է «Վոլկսվագեն» մակնիշի, 37 BD 767 հաշվառման համարանիշի տրանսպորտային միջոցը,
-Վաչագան Գևորգի Հովհաննիսյանը, չունենալով տրանսպորտային միջոց վարելու իրավունք, 2024 թվականի հոկտեմբերի 9-ին՝ ժամը 03:43-ին, Երևան քաղաքի Թբիլիսյան խճուղում՝ գտնվելով հարբած (ոչ սթափ վիճակում)՝ ոչ սթափ վիճակի այնպիսի հաշվառմամբ, որ արտաշնչած 1 լիտր ծավալով օդի մեջ մաքուր ալկոհոլի պարունակությունը կազմել է 0,2619 մգ/լ, վարել է «Վոլկսվագեն» մակնիշի, 37 BD 767 հաշվառման համարանիշի տրանսպորտային միջոցը:
3.2 Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները.
-Վաչագան Հովհաննիսյանի խնամքին են երկու անչափահաս երեխաներ։
-հանցանքներից վերջինն ավարտվելու օրվան նախորդող 12 ամիսների ընթացքում Վաչագան Հովհաննիսյանի ստացած եկամտի վերաբերյալ տվյալներ առկա չեն։
4. ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐՆ ՈՒ ՈՐՈՇՈՒՄՆԵՐԸ.
4.1 Դատարանի կողմից հաստատված փաստական հանգամանքների և 2025 թվականի ապրիլի 21-ին կայացված մեղադրական վերդիկտի հիման վրա Դատարանն ապացուցված է համարում մեղադրյալ Վաչագան Գևորգի Հովհաննիսյանին վերագրվող արարքները, այդ արարքների քրեական հակաիրավականությունը, մեղադրյալի կողմից այդ արարքները կատարելը, մեղադրյալի մեղավորությունը տվյալ արարքները կատարելու մեջ, սահմանելով, որ դատապարտված մեղադրյալի արարքներից յուրաքանչյուրի նկատմամբ ենթակա է կիրառման ՀՀ քրեական օրենսգրքի 344 հոդվածի 2-րդ մասը։
4.2 Դատարանի կողմից հաստատված փաստական հանգամանքների հիման վրա Դատարանն արձանագրում է, որ Վաչագան Գևորգի Հովհաննիսյանի պատասխանատվությունն ու պատիժը մեղմացնող ՀՀ քրեական օրենսգրքի 70 հոդվածով նախատեսված հանգամանք է պատիժ նշանակելու պահին մեղադրյալի խնամքի տակ երկու անչափահաս երեխաների առկայությունը:
Դատարանն արձանագրում է, որ Վաչագան Գևորգի Հովհաննիսյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71 հոդվածով նախատեսված հանգամանքներ առկա չեն:
4.3 Կատարած հանցանքների համար մեղադրյալ Վաչագան Գևորգի Հովհաննիսյանը ենթակա է պատժի։
4.4 Պատժի տեսակն ու չափը որոշելիս՝ Դատարանը հաշվի է առնում հետևյալը՝
-Վաչագան Գևորգի Հովհաննիսյանի կատարած հանցանքների հանգամանքները, հանրային վտանգավորության աստիճանն ու բնույթը, մասնավորապես՝ այն, որ նրա կատարած հանցանքները դասվում է ոչ մեծ ծանրության հանցագործությունների շարքին։
-Վաչագան Գևորգի Հովհաննիսյանի անձը բնութագրող տվյալները, պատասխանատվությունը և պատիժը մեղմացնող հանգամանքի առկայությունն ու ծանրացնող հանգամանքների բացակայությունը, ՀՀ քրեական օրենսգրքի 69 հոդվածի 2-րդ մասում թվարկված մյուս հանգամանքները։
Այսպիսով, Դատարանը գտնում է, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներն ապահովելու համար Վաչագան Գևորգի Հովհաննիսյանի կողմից ՀՀ քրեական օրենսգրքի 344 հոդվածի 2-րդ մասով կատարված հանցագործությունների բնույթին, վտանգավորության աստիճանին, դրանց կատարելու հանգամանքներին, ինչպես նաև հանցավորի անձին համաչափ պատիժ է հանցանքներից յուրաքանչյուրի համար հնգապատիկի չափով տուգանքը:
Հիմք ընդունելով ՀՀ քրեական օրենսգրքի 59 հոդվածի 5-րդ մասը, և հաշվի առնելով վերջին հանցանքն ավարտվելու օրվան նախորդող 12 ամիսների ընթացքում Վաչագան Գևորգի Հովհաննիսյանի եկամտի բացակայության վերաբերյալ տվյալները՝ տուգանքի չափը պետք է հաշվարկել հանցանքը կատարելու պահին՝ 2024 թվականի հոկտեմբերի 9-ին ՀՀ նվազագույն աշխատավարձի՝ 75.000 (յոթանասունհինգ հազար) ՀՀ դրամի չափով:
• Այսպիսով, Դատարանը գտնում է, որ ՀՀ քրեական օրենսգրքի 344 հոդվածի 2-րդ մասով նախատեսված հանցանքներից յուրաքանչյուրի առաջին համար Վաչագան Գևորգի Հովհաննիսյանի նկատմամբ պատիժ պետք է նշանակել տուգանք՝ նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով։
Միևնույն ժամանակ Դատարանը գտնում է, որ ՀՀ քրեական օրենսգրքի 74 հոդվածով սահմանված կարգով՝ նշանակված պատիժները լրիվ գումարելու միջոցով, Վաչագան Գևորգի Հովհաննիսյանի նկատմամբ վերջնական պատիժ պետք է նշանակել 750.000 (յոթ հարյուր հիսուն հազար) ՀՀ դրամի չափով տուգանք։
4.5 Դատարանը գտնում է, որ կատարած հանցանքի համար Վաչագան Գևորգի Հովհաննիսյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
4.6 Վաչագան Գևորգի Հովհաննիսյանը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն։
4.7 Հիմք ընդունելով ՀՀ քրեական օրենսգրքի 59 հոդվածի 8-րդ մասը, հաշվի առնելով մեղադրյալ Վաչագան Գևորգի Հովհաննիսյանի եկամտի բացակայության վերաբերյալ տվյալները, ինչպես նաև տուգանքի վճարման համար ժամկետ սահմանելու մասին վերջինի խնդրանքը՝ Դատարանը գտնում է, որ նշանակված տուգանքի վճարման ժամկետ պետք է սահմանել առավելագույնը՝ 1 (մեկ) տարի:
4.8 ՀՀ քրեական դատավարության օրենսգրքի 348 հոդվածի 1-ին մասի 11-14-րդ հարցերին անդրադառնալու անհրաժեշտությունը սույն քրեական գործով բացակայում է։
4.9 Վաչագան Գևորգի Հովհաննիսյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար։
4.10 ՀՀ քրեական դատավարության օրենսգրքի 167 հոդվածի 1-ին մասի 1-6-րդ կետերով նախատեսված վարութային ծախսեր սույն քրեական գործով առկա չեն, իսկ 7-րդ կետով նախատեսված ծախսերի վերաբերյալ տվյալները բացակայում են: Ավելին՝ այդ վարութային ծախսերի հատուցման պահանջ Դատարանին չի ներկայացվել, որպիսի պայմաններում վարութային ծախսերի հարցը պետք է համարել լուծված։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 167, 276, 347, 348, 349 և 364 հոդվածներով՝ Դատարանը

Վ Ճ Ռ Ե Ց

1. Վաչագան Գևորգի Հովհաննիսյանին մեղավոր ճանաչել ՀՀ քրեական օրենսգրքի 344 հոդվածի 2-րդ մասով նախատեսված թվով երկու հանցանքները կատարելու մեջ։
-ՀՀ քրեական օրենսգրքի 344 հոդվածի 2-րդ մասով նախատեսված առաջին հանցանքի կատարման համար Վաչագան Հովհաննիսյանի նկատմամբ պատիժ նշանակել տուգանք՝ հանցանքը կատարելու պահին նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով:
-ՀՀ քրեական օրենսգրքի 344 հոդվածի 2-րդ մասով նախատեսված երկրորդ հանցանքի կատարման համար Վաչագան Հովհաննիսյանի նկատմամբ պատիժ նշանակել տուգանք՝ հանցանքը կատարելու պահին նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով։
2. Նշանակված պատիժները լրիվ գումարել և Վաչագան Հովհաննիսյանի նկատմամբ վերջնական պատիժ նշանակել տուգանք՝ 750.000 (յոթ հարյուր հիսուն հազար) ՀՀ դրամի չափով:
3. Տուգանքի վճարման ժամկետ սահմանել առավելագույնը՝ 1 (մեկ) տարի:
4. Վաչագան Հովհաննիսյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը:
5. Վարութային ծախսերի հարցը համարել լուծված:
Դատավճիռը վերաքննության կարգով կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում:



ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ

(1)Ծնված՝ 1995 թվականի հուլիսի 31-ին Կոտայքի մարզի Բալահովիտ համայնքում, ազգությամբ հայ, ՀՀ քաղաքացի, միջնակարգ կրթությամբ, խնամքին երկու անչափահաս երեխա, նախկինում չդատապարտված, չի աշխատում, հաշվառված է և բնակվում է Կոտայքի մարզի Աբովյան համայնքի Բալահովտի բնակավայրի 1 փողոցի 4 փակուղու թիվ 3 տանը, որպես խափանման միջոց է կիրառված բացակայելու արգելքը:
(2)Տե՛ս, քրեական գործ, հատոր 1, թերթեր 39-41:
(3)2.2-2.4 կետերի վերաբերյալ տե՛ս Դատարանում ստեղծված նյութերը: