Քրեական գործ թիվ ԵԴ1/0777/01/25






ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ
ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«23» ապրիլի 2025 թվական ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` նաև Դատարան)՝
նախագահությամբ դատավոր՝ Գ.ԱԲԵԼՅԱՆԻ
քարտուղարությամբ՝ Ս․ԶԱՔՈՅԱՆԻ
Գ․ԳԱԼՍՏՅԱՆԻ
հանրային մեղադրող՝ Ա․ԲԱՂԴԱՍԱՐՅԱՆԻ
պաշտպան՝ Կ․ԽԱՉԱՏՐՅԱՆԻ
թարգմանիչներ՝ Գ․ՄԻՐԶՈՅԱՆԻ
Վ․ՇԱՀԻՆՅԱՆԻ
մեղադրյալ՝ Կ․ՈՒՈՒԼՈՒՆԻ
դռնբաց դատական նիստում` արագացված վարույթի կարգով, քննեց քրեական գործն ըստ մեղադրանքի`
Կուդայբերդի Ժանժիգիտ Ուուլունի՝ ծնված՝ 1999 թվականի նոյեմբերի 20-ին, անձնագիր՝ AC3933826, ազգությամբ ղրղզ, Ղրղզստանի քաղաքացի, չամուսնացած, նախկինում չդատապարտված, միջնակարգ կրթությամբ, հաշվառված է Ղրղզստանի Հանրապետու¬թյան Բադկենի շրջանի Ռազակով քաղաքի Կուլտուկ փողոցում, փաստացի բնակվել է Լեհաստանի Հանրապետության Կոշալին քաղաքի Կոնիկովո փողոցի 36 Ա տուն հասցեում, մեղադրանք է ներկայացվել ՀՀ քրեական օրենսգրքի 44-469-րդ հոդվածի 1-ին և ՀՀ քրեական օրենսգրքի 457-րդ հոդվածի 1-ին մասով, որպես խափանման միջոց է կիրառվել կալանքը։

1․ Գործի դատավարական նախապատմությունը.
2025 թվականի հունվարի 23-ին ՀՀ ԱԱԾ ՍԶ ավագ սպա Ա․Իսկանդարյանը հաղորդում է ներկայացրել այս մասին, որ․ «(...) 2025 թվականի հունվարի 23-ին, իր տվյալներով Ղրղզստանի Հանրապետության քաղաքացու AC3933826 սերիա-համարի անձնագրով և դեռևս չպարզված ժամանակ ու հանգամանքներում ձեռք բերված պետական լիազոր մարմնի կողմից տրված, իրավունք վերապահող իրավաբանական փաստ հավաստող իր լուսանկարով և կենսորոշիչ տվյալներով լրացված թիվ RR 4381643 սերիա-համարի Լեհաստանի Հանրապետության կեղծ կացության քարտի օգտագործմամբ՝ Երևան քաղաքի «Զվարթնոց» օդանավակայանում, Երևան-Վենետիկ թիվ 6764 չվերթը սպասարկող «Վիզ էյր» ավիաընկերության աշխատակիցներին է ներկայացրել իրավունք վերապահող կեղծ կացության քարտը և հաշվառվելով հիշյալ չվերթին ստացել է նստեցման կտրոն:
Բացի այդ, Կ.Ուուլուն վերը նշված կեղծ փաստաթղթի օգտագործելով ԱԱԾ «Զվարթնոց» հսկիչ անցագրային կետով առանց սահմանված փաստաթղթերի և պատշաճ թույլտվության փորձել է ելք կատարել ՀՀ-ից, սակայն նրա դիտավորության մեջ ընդգրկված հանցագործությունն իր կամքից անկախ հանգամանքներում չի իրագործվել, քանի որ սահմանապահ ծառայողների կողմից կեղծ քարտով ՀՀ-ից մեկնելու հանգամանքը բացահայտվել է։ (…)։»:
2025 թվականի հունվարի 23-ին ժամը՝ 03։15-ին, Կուդայբերդի Ժանժիգիտ Ուուլունը՝ հանցանք կատարած լինելու անմիջականորեն ծագած հիմնավոր կասկածի առկայության հիմքով ՀՀ ԱԱԾ ՍԶ ավագ սպա Ա․Իսկանդարյանի կողմից ձերբակալվել է և նույն օրը ներկայացվել է վարույթն իրականացնող մարմնին։
Հաղորդման առթիվ՝ 2025 թվականի հունվարի 23-ին, ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչության երկրորդ վարչությունում ՀՀ քրեական օրենսգրքի 457-րդ հոդվածի 1-ին մասի և ՀՀ քրեական օրենսգրքի 44-469-րդ հոդվածի 1-ին մասի հատկանիշներով նախաձեռնվել է թիվ 58201525 քրեական վարույթը։
2025 թվականի հունվարի 23-ին, թիվ 58201525 քրեական վարույթով հսկող դատախազի կողմից կայացվել է Կուդայբերդի Ժանժիգիտ Ուուլունի նկատմամբ ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով հանրային քրեական հետապնդում հարուցելու մասին որոշում։
Դատարանի՝ 2025 թվականի հունվարի 24-ի որոշմամբ մեղադրյալ Կուդայբերդի Ժանժիգիտ Ուուլունի նկատմամբ որպես խափանման միջոց է կիրառվել կալանքը՝ երկու ամիս ժամկետով՝ մինչև 2025 թվականի մարտի 23-ը։
2025 թվականի մարտի 7-ին ՀՀ գլխավոր դատախազության սահմանադրական կարգի հիմունքների, պետության և հասարակական անվտանգության դեմ ուղղված հանցագործությունների գործերով վարչությունից Դատարան է ստացվել թիվ ԵԴ1/0777/01/25 (նախաքննական համարը՝ 58201525) քրեական գործն ըստ մեղադրանքի Կուդայբերդի Ժանժիգիտ Ուուլունի՝ ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով։
Նույն օրը քրեական գործն էլեկտրոնային եղանակով մակագրվել, իսկ 2025 թվականի մարտի 10-ին հանձնվել է Դատարանի դատավոր Գ․Աբելյանին։
2025 թվականի մարտի 10-ին Դատարանի դատավոր Գ․Աբելյանի կողմից որոշում է կայացվել թիվ ԵԴ1/0777/01/25 քրեական գործով վարույթը ստանձնելու և նախնական դատալսումներ նշանակելու մասին։
Դատարանի՝ 2025 թվականի մարտի 20-ի որոշմամբ մեղադրյալ Կուդայբերդի Ժանժիգիտ Ուուլունի նկատմամբ ընտրված խափանման միջոց կալանքի ժամկետը երկարաձգվել է 3 (երեք) ամիս ժամկետով։

2. Մեղադրանքի փաստական նկարագրությունը.
Կուդայբերդի Ժանժիգիտ Ուուլունին մեղադրանք է ներկայացվել ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով՝ այն բանի համար, որ. «(…) [Ն]ա, հանդիսանալով Ղրղզստանի Հանրապետության քաղաքացի, 2025 թվականի հունվարի 22-ին Ղրղզստանի Հանրապետության քաղաքացու անձնագրով «Զվարթնոց» օդանավակայանով ժամանել է Հայաստանի Հանրապետություն, որից հետո, առանց սահմանված փաստաթղթերի և պատշաճ թույլտվության Հայաստանի Հանրապետության պետական սահմանն ապօրինի հատելու և Իտալիայի Հանրապետության Վենետիկ քաղաք մեկնելու դիտավորությամբ, խախտելով «Պետական սահմանի մասին» ՀՀ օրենքի 11-րդ հոդվածի և «ՀՀ պետական սահմանի ռեժիմ սահմանելու մասին» ՀՀ կառավարության 2011 թվականի մայիսի 12-ի թիվ 702-Ն որոշման պահանջները, 2025 թվականի հունվարի 23-ին, Երևան քաղաքի «Զվարթնոց» օդանավակայանում Երևան-Վենետիկ չվերթը սպասարկող, «Վիզ Էյր» ավիաընկերության աշխատակիցներին է ներկայացրել դեռևս չպարզված ժամանակահատվածում և հանգամանքներում ձեռք բերված, պետական լիազոր մարմնի կողմից տրվող, իրավաբանական փաստ հավաստող, իրավունք վերապահող, իր լուսանկարով և կենսորոշիչ տվյալներով լրացված RR 4381643 սերիա-համարի Լեհաստանի Հանրապետությունում կացության կեղծ վկայականը, այդ կերպ օգտագործել կեղծ վկայականը, սակայն, ՀՀ ԱԱԾ ՍԶ աշխատակիցների կողմից իրականացված ստուգողական աշխատանքների արդյունքում բացահայտվել է ներկայացված փաստաթղթի կեղծված լինելու փաստը և արգելվել նրա ելքը Հայաստանի Հանրապետությունից, ինչի արդյունքում Կուդայբերդի Ժանժիգիտ Ուուլուն չի կարողացել ավարտին հասցնել հանցագործությունն իր կամքից անկախ հանգամանքներով։
Այսպիսով, Կուդայբերդի Ժանժիգիտ Ուուլուին մեղսագրվում է հանցավոր արարքների կատարում, որը նախատեսված է ՀՀ քրեական օրենսգրքի 457-րդ հոդվածի 1- ին մասով և ՀՀ քրեական օրենսգրքի 44-469-րդ հոդվածի 1-ին մասով: (…)»։

3. Արագացված վարույթը և լրացուցիչ դատալսումների ընթացքում հետազոտված թույլատրելի ապացույցները.
Նախնական դատալսումների ընթացքում մեղադրյալ Կուդայբերդի Ժանժիգիտ Ուուլունը ներկայացրեց արագացված վարույթ կիրառելու մասին միջնորդություն՝ հայտնելով, որ իրեն պարզ է ներկայացված մեղադրանքը, ամբողջությամբ համաձայն է ներկայացված մեղադրանքի հետ, միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպան՝ Կ․Խաչատրյանի հետ, գիտակցում է արագացված վարույթ կիրառելու հետևանքները և պնդում է ներկայացված միջնորդությունը:
Հանրային մեղադրող Ա․Բաղդասարյանը չառարկեց արագացված վարույթ կիրառելու դեմ:
Դատարանը, համոզվելով, որ առկա է ՀՀ քրեական դատավարության օրենսգրքի 464.1-ին հոդվածի 1-ին մասով նախատեսված հիմքը, բացակայում են ՀՀ քրեական դատավարության օրենսգրքի 464.1-ին հոդվածի 2-րդ մասով նախատեսված` արագացված վարույթի կիրառումը բացառող հանգամանքները, բավարարեց արագացված վարույթ կիրառելու մասին միջնորդությունը և որոշում կայացրեց լրացուցիչ դատալսումներ անցկացնելու մասին:
Լրացուցիչ դատալսումների ընթացքում հետազոտվել են հետևյալ թույլատրելի ապացույցները.
- 2025 թվականի հունվարի 23-ի՝ անձի ձերբակալման արձանագրությունը , որի համաձայն՝ նույն օրը, ժամը՝ 03։15-ին, Կուդայբերդի Ժանժիգիտ Ուուլունը հանցանք կատարած լինելու անմիջականորեն ծագած հիմնավոր կասկածի հիմքով ձերբակալվել է,
- ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանի 2025 թվականի հունվարի 23-ի Ձև 8 տեղեկանքը, համաձայն որի՝ Կուդայբերդի Ժանժիգիտ Ուուլունը նախկինում դատապարտված չի եղել ,
- Դատարանի՝ 2025 թվականի հունվարի 24-ի, թիվ ԵԴ1/0087/06/25 որոշումը , որի համաձայն՝ մեղադրյալ Կուդայբերդի Ժանժիգիտ Ուուլունի նկատմամբ որպես խափանման միջոց է ընտրվել կալանքը՝ 2 (երկու) ամիս ժամկետով։

4.Դատարանի փաստական վերլուծությունները և հաստատված կամ հերքված փաստական հանգամանքները.
Լրացուցիչ դատալսումների ընթացքում հետազոտված թույլատրելի ապացույցները, ինչպես նաև գործով կազմված մեղադրական եզրակացության մեջ պարունակվող տվյալները վերլուծելու և գնահատելու արդյունքում՝ Դատարանը հաստատված է համարում սույն քրեական գործի լուծման համար նշանակություն ունեցող հետևյալ փաստական հանգամանքները.
- Կուդայբերդի Ժանժիգիտ Ուուլունը նախկինում դատապարտված չի եղել,
- Կուդայբերդի Ժանժիգիտ Ուուլունն ունի միջնակարգ կրթություն,
- Կուդայբերդի Ժանժիգիտ Ուուլունի կողմից դատալսումների ժամանակ արված հայտարարությունն առ այն, որ ընդունել է ներկայացված մեղադրանքը և զղջացել կատարածի համար ։

5. Դատարանի իրավական վերլուծությունները, հետևությունները և որոշումները.
Արագացված վարույթ կիրառելու պայմաններում Դատարանն ապացուցված է համարում մեղադրյալ Կուդայբերդի Ժանժիգիտ Ուուլունին վերագրվող փաստական հանգամանքները (արարքները), այդ արարքների քրեական հակաիրավականու¬թյունը, մեղադրյալի կողմից այդ արարքները կատարելը, մեղադրյալի մեղավորությունը տվյալ արարքները կատարելու մեջ, ինչպես նաև գտնում է, որ մեղադրյալի արարքների նկատմամբ պետք է կիրառվի ՀՀ քրեական օրենսգրքի 457-րդ հոդվածի 1-ին մասը և ՀՀ քրեական օրենսգրքի 44-469-րդ հոդվածի 1-ին մասը։
Դատարանի կողմից հաստատված փաստական հանգամանքների հիման վրա՝ Դատարանը գտնում է, որ Կուդայբերդի Ժանժիգիտ Ուուլունի անձը բնութագրող հանգամանքներ են միջնակարգ կրթություն ունենալը և նախկինում դատապարտված չլինելը։
Դատարանը, ղեկավարվելով ՀՀ քրեական օրենսգրքի (այսուհետ՝ նաև Օրենսգիրք) 70-րդ հոդվածով գտնում է, որ Կուդայբերդի Ժանժիգիտ Ուուլունի պատասխանատվությունն ու պատիժը մեղմացնող հանգամանք պետք է դիտել՝ ներկայացված մեղադրանքում իրեն լիովին մեղավոր ճանաչելը, կատարած արարքների համար զղջալը ։
Դատարանը միաժամանակ արձանագրում է, որ Կուդայբերդի Ժանժիգիտ Ուուլունի պատասխանատվությունն ու պատիժը ծանրացնող՝ Օրենսգրքի 71-րդ հոդվածի 1-ին մասով նախատեսված հանգամանքներ առկա չեն:
Դատարանը գտնում է, որ կատարած հանցանքի համար մեղադրյալ Կուդայբերդի Ժանժիգիտ Ուուլունը ենթակա է պատժի։
Պատիժ նշանակելու հարցի համատեքստում Դատարանը հարկ է համարում արձանագրել հետևյալը՝
Օրենսգրքի 55-րդ հոդվածի համաձայն՝ «1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:»։
Օրենսգրքի 69-րդ հոդվածի համաձայն՝ «1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները»։
Օրենսգրքի 73-րդ հոդվածի 1-ին մասի համաձայն՝
«Չավարտված հանցագործության համար պատիժ նշանակելիս հաշվի են առնվում հանցավորի արարքի բնույթն ու վտանգավորության աստիճանը, հանցավոր մտադրության իրականացման աստիճանը և այն հանգամանքները, որոնց հետևանքով հանցագործությունն ավարտին չի հասցվել: (...)»։
Վճռաբեկ դատարանը մշտապես ընդգծել է, որ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ։ Քրեական օրենքը համընդհանուր բնույթ ունի, իսկ արարքը և հանցավորի անձը կոնկրետ են։ Հետևաբար, կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի , հանցավորի անձի, պատիժը մեղմացնող և ծանրացնող հանգամանքների վերլուծության հիման վրա` ելնելով պատժի նպատակների իրացումն ապահովելու անհրաժեշտությունից ։
Մասնավորապես՝ Վճռաբեկ դատարանն ընդգծել է, որ հանցանքի հանրային վտանգավորության բնույթն ու աստիճանը ճիշտ գնահատելու և հանցավորի նկատմամբ համաչափ պատիժ նշանակելու համար անհրաժեշտ է, ի թիվս այլնի, հատուկ ուշադրություն դարձնել հանցավոր վարքագծի դրսևորման եղանակին, հանցանքի կատարման գործիքին և հանցագործության իրադրությանը, պատճառված վնասի բնույթին, արարքի նկատմամբ անձի հոգեբանական վերաբերմունքին, հանցագործության նպատակին և շարժառիթին: Այս առումով Վճռաբեկ դատարանը փաստել է, որ անձի արարքում հանցակազմը որակյալ դարձնող մեկից ավելի հանգամանքների առկայությունը կարող է վկայել ինչպես հանցագործության, այնպես էլ հանցավորի անձի հանրային բարձր վտանգավորության մասին, հետևաբար այն պետք է համաչափ գնահատականի արժանանա դատարանի կողմից և հաշվի առնվի պատիժ նշանակելիս :
Հիմքում ունենալով վերոնշյալը և հաշվի առնելով մեղադրյալ Կուդայբերդի Ժանժիգիտ Ուուլունի կատարած հանցանքների հանգամանքները, նրա անձը բնութագրող տվյալները, պատասխանատվությունը և պատիժը մեղմացնող հանգամանքը, պատասխանատվությունը և պատիժը ծանրացնող հանգամանքների բացակայու¬թյունը, Օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ Օրենսգրքի 457-րդ հոդվածի 1-ին մասի և 469-րդ հոդվածի 1-ին մասի սանկցիաներով որպես հիմնական պատիժ է նախատեսված նաև տուգանքի ձևով և սույն դեպքում առավել խիստ պատիժ նշանակելու հիմքերը բացակայում են, գտնում է, որ Օրենսգրքի 77-րդ հոդվածի վերաբերելի կանոնների կիրառմամբ և Օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար՝ վերջինիս նկատմամբ՝
- Օրենսգրքի 457-րդ հոդվածի 1-ին մասով նախատեսված հանցանքի կատարման համար որպես հիմնական պատիժ պետք է նշանակել տուգանքը՝ հանցանքը կատարելու պահին նվազագույն աշխատավարձի քսանապատիկի՝ 1.500.000 (մեկ միլիոն հինգ հարյուր հազար) ՀՀ դրամի չափով (20x75․000)։
- Օրենսգրքի 44-469-րդ հոդվածի 1-ին մասով նախատեսված հանցանքի կատարման համար, որպես հիմնական պատիժ պետք է նշանակել տուգանքը՝ հանցանքը կատարելու պահին նվազագույն աշխատավարձի երեսնաապատիկի՝ 2․250.000 (երկու միլիոն երկու հարյուր հիսուն հազար) ՀՀ դրամի չափով (30x75․000)։
Տուգանքի հաշվարկման կարգի վերաբերյալ Դատարանի նախորդ պարբերություններում նշված հետևությունները պայմանավորված այն հանգամանքով, որ հանցանքն ավարտվելու օրվան նախորդող 12 ամիսների ընթացքում մեղադրյալ Կուդայբերդի Ժանժիգիտ Ուուլունը չի ունեցել եկամուտ (այդպիսի տվյալներ առկա չեն վարույթի նյութերում), ուստի Դատարանը գտնում է, որ վերջինիս նկատմամբ տուգանք պատժատեսակի չափը հաշվարկելիս որպես ելակետ պետք է ընդունել նրա կողմից հանցանք կատարելու պահին գործող Հայաստանի Հանրապետությունում սահմանված նվազագույն աշխատավարձի չափը, այսինքն՝ 75.000 (յոթանասունհինգ հազար) ՀՀ դրամը։
Դատարանը, հաշվի առնելով, որ մեղադրյալ Կուդայբերդի Ժանժիգիտ Ուուլունը հանդիսանում է Ղրղզստանի Հանրապետության քաղաքացի, ինչպես նաև այն, որ բացակայում են Օրենսգրքի 62-րդ հոդվածի 6-7-րդ մասով բացառող հանգամանքները և հիմքում ունենալով սույն գործի փաստական տվյալների ամբողջությունը, գտնում է, որ պատժի նպատակների իրականացումը՝ հատկապես համանման հանցանքների կանխումը, հնարավոր է մեղադրյալի նկատմամբ Օրենսգրքի 44-469-րդ հոդվածի 1-ին մասով որպես հիմնական պատիժ նշանակված 2․250.000 (երկու միլիոն երկու հարյուր հիսուն հազար) ՀՀ դրամի չափով տուգանքին լրացուցիչ պատիժ միացնելու եղանակով, այն է՝ օտարերկրյա քաղաքացուն Հայաստանի Հանրապետության տարածքից վտարելու, տվյալ դեպքում՝ մեղադրյալին ՀՀ-ից վտարելով Ղրղզստանի Հանրապետություն՝ 5 (հինգ) տարի ժամկետով։
Դատարանը գտնում է, որ Օրենսգրքի 74-րդ հոդվածով սահմանված կարգով՝ ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով նշանակված պատիժները լրիվ գումարելու միջոցով՝ Կուդայբերդի Ժանժիգիտ Ուուլունի նկատմամբ վերջնական պատիժ պետք է նշանակել տուգանք՝ նվազագույն աշխատավարձի հիսնապատիկի չափով 3.750.000 (երեք միլիոն յոթ հարյուր հիսուն հազար) ՀՀ դրամի չափով՝ ՀՀ-ից վերջինիս վտարելով Ղրղզստանի Հանրապետություն՝ 5 (հինգ) տարի ժամկետով։
Օրենսգրքի 79-րդ հոդվածի 4-րդ մասի համաձայն՝ անազատության մեջ գտնվող անձի նկատմամբ տուգանքի, որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու, զինվորական ծառայության մեջ սահմանափակման ձևով հիմնական պատիժ նշանակելիս դատարանը, հաշվի առնելով մինչև դատավճիռ կայացնելը, անկախ Հայաստանի Հանրապետության իրավազորությունից, փաստացի անազատության մեջ գտնվելու ժամկետը, մեղմացնում է նշանակված պատիժը կամ ազատում է պատիժը կրելուց:
Ղեկավարվելով Օրենսգրքի 79-րդ հոդվածի 4-րդ մասով և հաշվի առնելով Կուդայբերդի Ժանժիգիտ Ուուլունի 120 (հարյուր քսան) օր անազատության մեջ գտնվելու հանգամանքը՝ Դատարանը գտնում է, որ մեղադրյալի նկատմամբ նշանակված պատիժը պետք է մեղմացնել և նշանակված տուգանքի չափից համամասնորեն նվազեցնել 3․000․000 (երեք միլիոն) ՀՀ դրամը (120x25.000) ՝ վերջնական պատիժ նշանակելով 750․000 (յոթ հարյուր հիսուն հազար) ՀՀ դրամի չափով տուգանքը։
Դատարանը գտնում է, որ մեղադրյալ Կուդայբերդի Ժանժիգիտ Ուուլունը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն։
Անդրադառնալով խափանման միջոցի հարցին՝ Դատարանն արձանագրում է, որ Կուդայբերդի Ժանժիգիտ Ուուլունի նկատմամբ կիրառված խափանման միջոց կալանքը պետք է փոխել և Կուդայբերդի Ժանժիգիտ Ուուլունի նկատմամբ խափանման միջոց պետք է կիրառել բացակայելու արգելքը` մինչև դատավճռի օրինական ուժի մեջ մտնելը, քանի որ մեղադրական դատավճիռ կայացնելու և տուգանքի ձևով պատիժ նշանակելու պայմաններում առկա է ողջամիտ ենթադրություն առ այն, որ մեղադրյալը կարող է դիմել փախուստի և չկատարել իր վրա դրված պարտականությունները, իսկ նման խափանման միջոցի կիրառումը բավարար է մեղադրյալի փախուստը կանխելու և նրա վրա դրված պարտականությունների կատարումն ապահովելու համար։
Դատարանն արձանագրում է, որ ՀՀ քրեական դատավարության օրենսգրքի 348-րդ հոդվածի 1-ին մասի 11-13-րդ կետերով նշված հարցերին անդրադառնալու անհրաժեշտությունը սույն քրեական գործով բացակայում է։
Դատարանն արձանագրում է նաև, որ դատավճիռն օրինական ուժի մեջ մտնելուց հետո՝ իրեղեն ապացույց ճանաչված՝ Լեհաստանի Հանրապետության նմուշի, RR 4381643 սերիա-համարի կացության կեղծ քարտը, ինչպես նաև արտավարութային փաստաթղթերը պետք է պահել քրեական գործի նյութերի հետ՝ դրանք պահելու ամբողջ ընթացքում։
Դատարանը գտնում է, որ վարութային ծախսերի հարցը պետք է համարել լուծված, քանի որ արագացված վարույթ կիրառելու պայմաններում ՀՀ քրեական դատավարության օրենսգրքի 167-րդ հոդվածի 1-ին մաuով նախատեսված վարութային ծախսերը մեղադրյալ Կուդայբերդի Ժանժիգիտ Ուուլունից ենթակա չեն բռնագանձման՝ համաձայն ՀՀ քրեական դատավարության օրենսգրքի 464.4-րդ հոդվածի 3-րդ մասի։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 99-րդ, 100-րդ, 276-րդ, 347-350-րդ, 464.4-րդ և 464.5-րդ հոդվածներով` Դատարանը





ՎՃՌԵՑ

1. Կուդայբերդի Ժանժիգիտ Ուուլունին մեղավոր ճանաչել ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով նախատեսված հանցանքների կատարման մեջ։
2. ՀՀ քրեական օրենսգրքի 457-րդ հոդվածի 1-ին մասով նախատեսված հանցանքի կատարման համար Կուդայբերդի Ժանժիգիտ Ուուլունի նկատմամբ պատիժ նշանակել տուգանք՝ հանցանքը կատարելու պահին նվազագույն աշխատավարձի քսանապատիկի՝ 1.500.000 (մեկ միլիոն հինգ հարյուր հազար) ՀՀ դրամի չափով։
3. ՀՀ քրեական օրենսգրքի 44-469-րդ հոդվածի 1-ին մասով նախատեսված հանցանքի կատարման համար Կուդայբերդի Ժանժիգիտ Ուուլունի նկատմամբ պատիժ նշանակել տուգանք՝ հանցանքը կատարելու պահին նվազագույն աշխատավարձի երեսնաապատիկի՝ 2․250.000 (երկու միլիոն երկու հարյուր հիսուն հազար) ՀՀ դրամի չափով՝ ՀՀ-ից վտարելով Ղրղզստանի Հանրապետություն՝ 5 (հինգ) տարի ժամկետով։
4. ՀՀ քրեական օրենսգրքի 74-րդ հոդվածով սահմանված կարգով՝ հանցագործությունների համակցությամբ նշանակված պատիժները լրիվ գումարելու միջոցով՝ ՀՀ քրեական օրենսգրքի 457-րդ հոդվածի 1-ին մասով որպես պատիժ նշանակված՝ 1.500.000 (մեկ միլիոն հինգ հարյուր հազար) ՀՀ դրամ տուգանքը գումարել ՀՀ քրեական օրենսգրքի 44-469-րդ հոդվածի 1-ին մասով որպես պատիժ նշանակված՝ 2․250.000 (երկու միլիոն երկու հարյուր հիսուն հազար) ՀՀ դրամի չափով տուգանքին՝ վերջնական պատիժ նշանակելով տուգանք՝ 3.750.000 (երեք միլիոն յոթ հարյուր հիսուն հազար) ՀՀ դրամի չափով՝ ՀՀ-ից Կուդայբերդի Ժանժիգիտ Ուուլունին վտարելով Ղրղզստանի Հանրապետություն՝ 5 (հինգ) տարի ժամկետով։
5. ՀՀ քրեական օրենսգրքի 79-րդ հոդվածի 4-րդ մասի կիրառմամբ Կուդայբերդի Ժանժիգիտ Ուուլունի նկատմամբ նշանակված հիմնական պատիժը մեղմացնել՝ նկատի ունենալով վերջինիս կողմից 4 (չորս) ամիս փաստացի անազատության մեջ գտնվելու ժամանակահատվածը և Կուդայբերդի Ժանժիգիտ Ուուլունի նկատմամբ որպես հիմնական պատիժ նշանակել տուգանքը 750․000 (յոթ հարյուր հիսուն հազար) ՀՀ դրամի չափով։
6. ՀՀ քրեական օրենսգրքի 74-րդ հոդվածի 10-րդ մասի կիրառմամբ Կուդայբերդի Ժանժիգիտ Ուուլունի նկատմամբ նշանակված հիմնական պատժին՝ 750․000 (յոթ հարյուր հիսուն հազար) ՀՀ դրամ տուգանքին, գումարել Կուդայբերդի Ժանժիգիտ Ուուլունի նկատմամբ որպես լրացուցիչ պատիժ նշանակված Հայաստանի Հանրապետության տարածքից վտարելը, և վերջինիս նկատմամբ վերջնական պատիժ նշանակել տուգանքը՝ 750․000 (յոթ հարյուր հիսուն հազար) ՀՀ դրամի չափով և Հայաստանի Հանրապետության տարածքից վտարելը՝ 5 (հինգ) տարի ժամկետով:
7. Մեղադրյալ Կուդայբերդի Ժանժիգիտ Ուուլունի նկատմամբ կիրառված խափանման միջոցը՝ կալանքը, վերացնել և վերջինիս նկատմամբ խափանման միջոց կիրառել բացակայելու արգելքը՝ նրան անհապաղ ազատ արձակելով դատական նիստերի դահլիճից։
8. Դատավճիռն օրինական ուժի մեջ մտնելուց հետո վերացնել Կուդայբերդի Ժանժիգիտ Ուուլունի նկատմամբ կիրառված խափանման միջոցը՝ բացակայելու արգելքը։
9. Դատավճռի օրինական ուժի մեջ մտնելուց հետո՝ իրեղեն ապացույց ճանաչված Լեհաստանի Հանրապետության նմուշի, RR 4381643 սերիա-համարի կացության կեղծ քարտը, ինչպես նաև արտավարութային փաստաթղթերը պահել քրեական գործի նյութերի հետ՝ դրանք պահելու ամբողջ ընթացքում։
10. Վարութային ծախսերի հարցը համարել լուծված:
11. Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում, սակայն այն չի կարող բողոքարկվել ՀՀ քրեական դատավարության օրենսգրքի 373-րդ հոդվածով և 375-րդ հոդվածի 1-3-րդ մասերով նախատեսված հիմքերով:


ԴԱՏԱՎՈՐ՝ Գ․ԱԲԵԼՅԱՆ