ԵԴ1/0792/01/25
Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈւԹՅԱՆ ԱՆՈւՆԻՑ
«28» մարտի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)՝

Նախագահությամբ՝ Մ.ԱՐԶՈւՄԱՆՅԱՆԻ
քարտուղարությամբ Մ.ՍԻՄՈՆՅԱՆԻ
մասնակցությամբ՝
հանրային մեղադրող Ա․ԲԱԴԱԼՅԱՆԻ
մեղադրյալ Ռ․ՄԱՅԻԼՅԱՆԻ

դռնբաց դատական նիստում, քննության առնելով քրեական գործն ըստ մեղադրանքի Ռազմիկ Վահանի Մայիլյանի (ծնված՝ 1991 թվականի հոկտեմբերի 21-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին են չորս անչափահաս երեխաները, նախկինում չդատապարտված, աշխատում է «Մաստեր Ռուբերուդ» ԱՁ-ում որպես փականակագործ, հաշվառված է Սյունիքի մարզի Մուծք գյուղի 1-ին փողոցի 15-րդ տանը, բնակվում է Երևան քաղաքի Նորագավիթ 6-րդ փողոցի 40-րդ տանը) երկու դրվագ ՀՀ քրեական օրենսգրքի 344-րդ հոդվածի 2-րդ մասով, խափանման միջոց է ընտրված բացակայելու արգելքը,

Պ Ա Ր Զ Ե Ց

Գործի դատավարական նախապատմությունը.
2024 թվականի հուլիսի 15-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնի քննիչ Տ․Կարապետյանի կողմից ՀՀ քրեական օրենսգրքի 344-րդ հոդվածի 2-րդ մասով նախաձեռնվել է թիվ 60-2620-24 քրեական վարույթը։
2024 թվականի նոյեմբերի 27-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնի քննիչ Տ․Կարապետյանի կողմից ՀՀ քրեական օրենսգրքի 344-րդ հոդվածի 2-րդ մասով նախաձեռնվել է թիվ 60715124 քրեական վարույթը։
2024 թվականի նոյեմբերի 27-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնի քննիչ Տ․Կարապետյանը որոշում է կայացրել թիվ 60715124 քրեական վարույթը թիվ 60262024 քրեական վարույթին միացնելու և նախաքննությունը թիվ 60262024 քրեական վարույթի համարով շարունակելու մասին։
2025 թվականի փետրվարի 25-ին Երևան քաղաքի Շենգավիթ վարչական շրջանի դատախազության դատախազ Ա․Բադալյանը որոշում է կայացրել թիվ 60262024 քրեական վարույթով Ռազմիկ Վահանի Մայիլյանի նկատմամբ երկու դրվագ ՀՀ քրեական օրենսգրքի 344-րդ հոդվածի 2-րդ մասով հանրային քրեական հետապնդում հարուցելու մասին:
2025 թվականի փետրվարի 26-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնի քննիչ Տ․Կարապետյանը որոշում է կայացրել թիվ 60262024 քրեական վարույթով մեղադրյալ Ռազմիկ Վահանի Մայիլյանի նկատմամբ որպես խափանման միջոց բացակայելու արգելքը կիրառելու մասին:
2025 թվականի մարտի 7-ին Ռ․Մայիլյանի վերաբերյալ թիվ 60262024 քրեական վարույթը մեղադրական եզրակացությամբ ուղարկվել է Դատարան, որին շնորհվել է ԵԴ1/0792/01/25 համարը։
2025 թվականի մարտի 10-ին թիվ ԵԴ1/0792/01/25 քրեական գործը հանձնվել է դատավոր Մ․Արզումանյանին։
2025 թվականի մարտի 10-ին Երևան քաղաքի առաջին ատյանի ընդհանուր իրավասության քրեական դատարանի դատավոր Մ.Արզումանյանը որոշում է կայացրել թիվ ԵԴ1/0792/01/25 քրեական գործի վարույթը ստանձնելու և նախնական դատալսումներ նշանակելու վերաբերյալ։

Մեղադրանքի փաստական նկարագրությունը.
Ռազմիկ Վահանի Մայիլյանի նկատմամբ հարուցվել է հանրային քրեական հետապնդում երկու դրվագ ՀՀ քրեական օրենսգրքի 344-րդ հոդվածի 2-րդ մասով այն հանրորեն վտանգավոր արարքների կատարման համար, որ նա, տրանսպորտային միջոցներ վարելու իրավունք չունենալով հարբած (ոչ սթափ) վիճակում 2024 թվականի մայիսի 22-ին և 2024 թվականի հոկտեմբերի 30-ին վարել է տրանսպորտային միջոց:
Այսպես. Ռազմիկ Մայիլյանը, չունենալով տրանսպորտային միջոց վարելու իրավունք, ոչ սթափ վիճակում՝ 1 լիտր արտաշնչած օդի մեջ մաքուր ալկոհոլի պարունակությունը՝ 0.925 մգ/լ, 2024 թվականի մայիսի 22-ին՝ ժամը 03:30-ին, Երևան քաղաքի Թամանցիների փողոցում վարել է «Օպել» մակնիշի, 36 A 170 հաշվառման համարանիշի տրանսպորտային միջոց, որը հայտնաբերվել է ՀՀ ՆԳՆ ոստիկանության պարեկային ծառայության պարեկի կողմից և կազմվել է վարչական իրավախախտման թիվ 8180404305 արձանագրությունը:
Բացի այդ, Ռազմիկ Մայիլյանը, չունենալով տրանսպորտային միջոց վարելու իրավունք, ոչ սթափ վիճակում՝ արյան մեջ մաքուր ալկոհոլի պարունակությունը՝ 1.244 գ/լ, 2024 թվականի հոկտեմբերի 30-ին՝ ժամը 01:28-ին, Երևան քաղաքի Նորագավիթ 1-ին փողոցում վարել է «Օպել» մակնիշի, 35 GT 719 հաշվառման համարանիշի տրանսպորտային միջոց, որը հայտնաբերվել է ՀՀ ՆԳՆ ոստիկանության պարեկային ծառայության պարեկի կողմից և կազմվել է վարչական իրավախախտման թիվ 8180415114 արձանագրությունը։

Հիմնական դատալսումների ընթացքում հետազոտված թույլատրելի ապացույցները.
- Զննություն կատարելու մասին 2024 թվականի դեկտեմբերի 5-ի արձանագրությունը, համաձայն որի՝ զննության են ենթարկվել 2024 թվականի մայիսի 22-ին՝ ժամը 03:40-ին, Երևան քաղաքի Թամանցիների փողոցում ՀՀ ոստիկանության պարեկային ծառայության Երևան քաղաքի գնդի պարեկ Անդրանիկ Հարությունյանի (12970) կողմից Ռազմիկ Վահանի Մայիլյանի (ծնված՝ 21.10.1991թ., անձնագիր՝ AR 0649646, բնակվող՝ Սյունիքի մարզ, գ.Մուծք, 1-ին փողոց 15-րդ տուն) վերաբերյալ կազմված վարչական իրավախախտման վերաբերյալ արձանագրությունը (կից չլրացված վարչական իրավախախտման որոշում՝ 8180404305), համաձայն որի՝ վերջինը 2024 թվականի մայիսի 22-ին՝ ժամը 03:30-ին, Երևան քաղաքի Թամանցիների փողոցում վարել է «Օպել» մակնիշի, 36 AP 170 հաշվառման համարանիշի ավտոմեքենան՝ չունենալով տրանսպորտային միջոցներ վարելու իրավունք և ոչ սթափ վիճակում: Արձանագրության համապատասխան տողերում առկա են «վարորդը հրաժարվեց ստորագրել և բացատրություններ տալուց» գրառումը և ստորագրություն:
Ռազմիկ Մայիլյանին սթափության զննության ենթարկելու վերաբերյալ կտրոնի պատճենը, համաձայն որի՝ զննության սարքի համարն է 91101208, զննման համարը՝ 01499, զննման ամսաթիվը՝ 22.05.2024թ., ստուգումը կատարվել է ավտոմատ, ժամը 03:35:06-ին, ալկոհոլի պարունակությունը՝ 0.925մգ/լ, վարորդի անունը՝ Ռազմիկ, ազգանունը՝ Մայիլյան, տրանսպորտային միջոցի համարանիշը՝ 36 AP 170, անձնագիր՝ AR 0649646, պարեկային ծառայողի ազգանունը՝ Հարությունյան, կրծքանշանի համար՝ 12970, սթափության զննության կտրոնի համապատասխան տողերում առկա են ստորագրություններ:
Սթափության զննության 91101208 համարի սարքի ստուգաչափման թիվ 115135 վկայականի պատճենը, համաձայն որի՝ ստուգաչափման թվականն է 26.01.2024թ., այն ուժի մեջ է մինչև 26.01.2025թ.։ Չափման միջոցի անվանումը և տեսակը՝ ալկոտեստեր, գործարանային համարը՝ 91101208 տեսակը՝ «Jupiter X/RP», չափման տիրույթը՝ (0.000-2.000մգ/լ), ճշտության կարգը և դասը (սխալանքը) 0+0,1±5%,0.1-0.15±8%>0.15±10%, արտադրողը՝ Չինաստան, պատկանում է ՀՀ ՊԾ:
ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրի՝ Ռազմիկ Վահանի Մայիլյանի տվյալների (ՀԾՀ 3110910403) մուտքագրման արդյունքում ստացված տեղեկատվության քաղվածքի պատճենը, համաձայն որի՝ Ռազմիկ Մայիլյանը տրանսպորտային միջոցներ վարելու իրավունքից 2022 թվականի օգոստոսի 13-ին զրկվել է 1 տարի ժամկետով (զրկման սկիզբ՝ 13.08.2022թ, զրկման ավարտ՝ 14.08.2023թ)։
2022 թվականի օգոստոսի 13-ին՝ ժամը 04:13-ին, Երևան քաղաքի Վրացյան 90 հասցեում ՀՀ ոստիկանության պարեկային ծառայության Երևան քաղաքի գնդի պարեկ Դավիթ Դավթյանի կողմից Ռազմիկ Վահանի Մայիլյանի (ծնված՝ 21.10.1991թ., անձնագիր՝ AR0649646, բնակվող՝ Սյունիքի մարզ, գ.Մուծք, 1-ին փողոց, 15-րդ տուն) վերաբերյալ կազմվածվարչական իրավախախտման վերաբերյալ արձանագրությունը, համաձայն որի՝ վերջինը 2022 թվականի օգոստոսի 13-ին՝ ժամը 04:00-ին, Երևան քաղաքի Խանջյան փողոցում «Օպել» մակնիշի, 36 AP 170 հաշվառման համարանիշի ավտոմեքենան վարել է ոչ սթափ վիճակում, ինչից հետո կայացվել է վարչական իրավախախտման վերաբերյալ թիվ 8180152628 որոշումը՝ Ռազմիկ Վահանի Մայիլյանին տրանսպորտային միջոցներ վարելու իրավունքից 1 տարի ժամկետով զրկելու վերաբերյալ: Վարչական իրավախախտման արձանագրության և որոշման համապատասխան տողերում առկա են «Վարորդը հրաժարվեց բացատրություններ տալուց և ստորագրելուց» գրառումը և պարեկային ծառայողի ստորագրությունները: Վարչական իրավախախտման վերաբերյալ կայացված որոշման դարձերեսին առկա են «36 AP 170 մեքենայի հաշվառման վկայագիրը վերադարձվեց ինձ 19.08.2022թ» և «Ստացա որոշման իմ օրինակը ՎՎԻ բաժանմունքից, Մայիլյան Ռազմիկ, 19.08.2022թ․» գրառումները և ստորագրություններ։
Ռազմիկ Մայիլյանին սթափության զննության ենթարկելու վերաբերյալ կտրոնի պատճենը, համաձայն որի՝ զննության սարքի համարն է 91100892, զննման համարը՝ 00215, ալկոհոլի պարունակությունը՝ 0.804մգ/լ, վարորդի անունը՝ Ռազմիկ, ազգանունը՝ Մայիլյան, տրանսպորտային միջոցի համարանիշը՝ 36 AP 170, ՎիՎ. RP155096, պարեկային ծառայողի ազգանուն՝ Դավթյան, կրծքանշանի համար՝ 08097։
Սթափության զննության թիվ 91100892 համարի սարքի ստուգաչափման թիվ 074607 վկայականի պատճենը, համաձայն որի՝ ստուգաչափման թվականն է 13.07.2022թ., այն ուժի մեջ է մինչև 13.07.2023թ.։ Չափման միջոցի անվանումը և տեսակը՝ ալկոտեստեր, գործարանային համարը՝ 911008924 տեսակը՝ «Jupiter X/RP», չափման տիրույթը՝ (0.000-0.200մգ/լ), ճշտության կարգը և դասը (սխալանքը) 0÷0,1±5%,0.1-0.15±8%>0.15±10%, արտադրողը՝ Չինաստան, պատկանում է՝ ՀՀ ՊԾ:
2024թ. նոյեմբերի 1-ին՝ ժամը 15:05-ին, Երևան քաղաքի Թաիրով 14 հասցեում ՀՀ ոստիկանության պարեկային ծառայության Երևան քաղաքի գնդի պարեկ Սուրեն Փաշայանի (08367) կողմից Ռազմիկ Վահանի Մայիլյանի (ծնված՝ 21.10.1991թ., անձնագիր՝ AR0649646, բնակվող՝ Սյունիքի մարզ, գ.Մուծք, 1-ին փողոց 15-րդ տուն) վերաբերյալ կազմված վարչական իրավախախտման վերաբերյալ արձանագրությունը (կից չլրացված վարչական իրավախախտման որոշում՝ 8180415414), այն մասին, որ վերջինս 2024 թվականի հոկտեմբերի 30-ին՝ ժամը 01:28-ին, Երևան քաղաքի Նորագավիթ 1-ին փողոցում վարել է «Օպել» մակնիշի, 35 GT 719 հաշվառման համարանիշի ավտոմեքենան չունենալով տրանսպորտային միջոցներ վարելու իրավունք և ոչ սթափ վիճակում: Արձանագրության համապատասխան տողերում առկա են ծանուցվողի «վարորդի» և պարեկային ծառայողի ստորագրությունները:
Թիվ 002645 վարորդի սթափության վիճակի զննության ուղեգիրը, համաձայն որի՝ ուղեգիրը լրացվել է ՀՀ ՊԾ ԵՔԳ 3-րդ գումարտակի 2-րդ վաշտի կրտսեր պարեկ Սառիկյանի (06335) կողմից առ այն, որ Ռազմիկ Վահանի Մայիլյանը (ծնված՝ 21.10.1991թ., անձնագիր՝ AR 649646, բնակվող՝ Սյունիքի մարզ, գ.Մուծք, 1-ին փողոց, 15-րդ տուն) սթափության վիճակի զննության ներկայացվել է Երևան քաղաքի Աճառյան 2/2 հասցեում գտնվող «ԿԲԱԿ» ՓԲԸ 2024 թվականի հոկտեմբերի 30-ին՝ ժամը 02:45-ին: Հերթապահ բժիշկը եղել է Դավիթ Հարությունյանը:
Բուժհաստատությունների կողմից վարորդի սթափության վիճակի զննության N486 արձանագրությունը, համաձայն որի՝ Ռազմիկ Վահանի Մայիլյանը զննության ներկայացվել է ՀՀ ԱՆ «Կախվածությունների բուժման ազգային Կենտրոն» ՓԲԸ 2024 թվականի հոկտեմբերի 30-ին՝ ժամը 03:00-ին: Զննություն կատարողի անունը, ազգանունը և պաշտոնը տողում առկա է՝ հերթապահ բժիշկ, նարկոլոգ Դավիթ Հարությունյան: Տեղեկություններ ալկոհոլի, թմրանյութերի, հոգեմետ (հոգեներգործուն) նյութերի գործածման մասին տողում առկա է՝ «նշում է 2 բաժակ ալկոհոլ» գրառումը, արտաշնչած օդի հետազությունը տողում առկա է՝ «խուսափում է զննությունից» գրառումը։ Օրգանիզմի հետազոտությունը տողում առկա է՝ «1,244 գ/լ» գրառումը։ Եզրակացությունը տողում առկա է «Ոչ սթափ» գրառումը։ Արձանագրության համապատասխան տողերում առկա են ստորագրություներ:
ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրի Ռազմիկ Վահանի Մայիլյանի տվյալների (ՀԾՀ՝ 3110910403) մուտքագրման արդյունքում ստացված տեղեկատվության քաղվածքի պատճենը, համաձայն որի՝ Ռազմիկ Մայիլյանը տրանսպորտային միջոցներ վարելու իրավունքից 2022 թվականի օգոստոսի 13-ին զրկվել է 1 տարի ժամկետով (զրկման սկիզբ՝ 13.08.2022թ․, զրկման ավարտ՝ 14.08.2023թ․)։
2022 թվականի օգոստոսի 13-ին՝ ժամը 04:13-ին, Երևան քաղաքի Վրացյան 90 հասցեում ՀՀ ոստիկանության պարեկային ծառայության Երևան քաղաքի գնդի պարեկ Դավիթ Դավթյանի կողմից Ռազմիկ Վահանի Մայիլյանի (ծնված՝ 21.10.1991թ., անձնագիր՝ AR0649646, բնակվող՝ Սյունիքի մարզ, գ.Մուծք, 1-ին փողոց, 15-րդ տուն) վերաբերյալ կազմված վարչական իրավախախտման վերաբերյալ արձանագրությունը, համաձայն որի՝ վերջինը 2022 թվականի օգոստոսի 13-ին՝ ժամը 04:00-ին, Երևան քաղաքի Խանջյան փողոցում «Օպել» մակնիշի, 36 AP 170 հաշվառման համարանիշի ավտոմեքենան վարել է ոչ սթափ վիճակում, ինչից հետո կայացվել է վարչական իրավախախտման վերաբերյալ թիվ 8180152628 որոշումը՝ Ռազմիկ Վահանի Մայիլյանին տրանսպորտային միջոցներ վարելու իրավունքից 1 տարի ժամկետով զրկելու վերաբերյալ: Վարչական իրավախախտման արձանագրության և որոշման համապատասխան տողերում առկա են «Վարորդը հրաժարվեց բացատրություններ տալուց և ստորագրելուց» գրառումը և պարեկային ծառայողի ստորագրությունները: Վարչական իրավախախտման վերաբերյալ կայացված որոշման դարձերեսին առկա են «36 AP 170 մեքենայի հաշվառման վկայագիրը վերադարձվեց ինձ 19.08.2022թ․» և «Ստացա որոշման իմ օրինակը ՎՎԻ բաժանմունքից, Մայիլյան Ռազմիկ, 19.08.2022թ․» գրառումները և ստորագրություններ:
Ռազմիկ Մայիլյանին սթափության զննության ենթարկելու վերաբերյալ կտրոնի պատճենը, համաձայն որի՝ զննության սարքի համարն է՝ 91100892, զննման համարը՝ 00215, ալկոհոլի պարունակությունը՝ 0.804մգ/լ, վարորդի անունը՝ Ռազմիկ, ազգանունը՝ Մայիլյան, տրանսպորտային միջոցի համարանիշը՝ 36 AP 170, ՎիՎ RP155096, պարեկային ծառայողի ազգանունը՝ Դավթյան, կրծքանշանի համար՝ 08097։
Սթափության զննության թիվ 91100892 համարի սարքի ստուգաչափման թիվ 074607 վկայականի պատճենը, համաձայն որի՝ ստուգաչափման թվականն է 13.07.2022թ., այն ուժի մեջ է մինչև 13.07.2023թ.։ Չափման միջոցի անվանումը և տեսակը՝ ալկոտեստեր, գործարանային համարը՝ 911008924 տեսակը՝ «Jupiter X/RP», չափման տիրույթը՝ (0.000-0.200մգ/լ), ճշտության կարգը և դասը (սխալանքը) 0÷0,15%,0.1-0.15±8%>0.15±10%, արտադրողը՝ Չինաստան, պատկանում է ՀՀ ՊԾ: Վկայականի դարձերեսին առկա են «Վկայական 074607, Չափման տիրույթը՝ 0,000-2,000մգ/լ, վրիպակի արդյունքում նշվել է՝ 0,000-0,200մգ/լ, պետք է գրվեր 0,000- 2,000մգ/լ» գրառումները և ստորագրություններ:
- Արտավարութային փաստաթուղթ ճանաչելու մասին 2025 թվականի հունվարի 7-ի որոշումը, համաձայն որի՝ թիվ 60262024 քրեական վարույթով արտավարութային փաստաթուղթ են ճանաչվել և կցվել քրեական վարույթին ՀՀ ՆԳՆ ոստիկանության «Ճանապարհային ոստիկանություն» ծառայության էլեկտրոնային ռեգիստրում առկա՝ Ռազմիկ Վահանի Մայիլյանի վարորդական վկայականի վերաբերյալ տեղեկատվության քաղվածքի, Ռազմիկ Վահանի Մայիլյանի վերաբերյալ 2024 թվականի մայիսի 22-ին կազմված վարչական իրավախախտման վերաբերյալ արձանագրության (կից չլրացված վարչական իրավախախտման որոշում՝ 8180404305), Ռազմիկ Մայիլյանին սթափության զննության ենթարկելու վերաբերյալ թիվ 01499 կտրոնի, 91101208 սթափության զննության սարքի ստուգաչափման թիվ 115135 վկայականի, Ռազմիկ Վահանի Մայիլյանի վերաբերյալ 2022 թվականի օգոստոսի 13-ին կազմված վարչական իրավախախտման վերաբերյալ արձանագրության և դարձերեսի (կից լրացված վարչական իրավախախտման որոշում՝ 8180152628), Ռազմիկ Մայիլյանին սթափության զննության ենթարկելու վերաբերյալ թիվ 00215 կտրոնի, 91100892 սթափության զննության սարքի ստուգաչափման թիվ 074607 վկայականի և դարձերեսի, Ռազմիկ Վահանի Մայիլյանի վերաբերյալ 2024 թվականի նոյեմբերի 1-ին կազմված վարչական իրավախախտման վերաբերյալ արձանագրության (կից չլրացված վարչական իրավախախտման որոշում՝ 8180415414), Ռազմիկ Մայիլյանին սթափության զննության ներկայացնելու թիվ 002645 վարորդի սթափության վիճակի զննության ուղեգրի, Ռազմիկ Մայիլյանի վերաբերյալ կազմված բուժհաստատությունների կողմից վարորդի սթափության վիճակի զննության N486 արձանագրության պատճենները:
- Մեղադրյալ Ռազմիկ Վահանի Մայիլյանը, հայտարարելով, որ իրեն մեղավոր է ճանաչում, զղջում է կատարվածի համար և օգտվելով իր սահմանադրական իրավունքից, դատարանում ցուցմունք տալու ցանկություն չհայտնեց:
Հիմնական դատալսումների ընթացքում հրապարակվեց մեղադրյալ Ռազմիկ Վահանի Մայիլյանի նախաքննական ցուցմունքը, համաձայն որի՝ մեղադրյալ Ռ․Մայիլյանը ցուցմունք է տվել այն մասին, որ ունեցել է «B,C» կարգերի վարորդական իրավունքի վկայական: 2022 թվականի օգոստոս ամսին տրանսպորտային միջոցը վարել է ոչ սթափ վիճակում, ինչի կապակցությամբ պարեկային ծառայության համապատասխան ծառայողների կողմից կազմվել է վարչական իրավախախտման վերաբերյալ արձանագրություն և կայացվել է համապատասխան որոշում՝ իրեն տրանսպորտային միջոցներ վարելու իրավունքից մեկ տարի ժամկետով զրկելու վերաբերյալ: Որոշման վերաբերյալ ծանուցումը ստացել է հենց այդ պահին՝ կայացնելուց անմիջապես հետո: 2024 թվականի մայիսի 22-ին՝ ժամը ստույգ չի հիշում՝ գիշերային ժամի, Երևան քաղաքի Թամանցիների փողոցում «Օպել» մակնիշի, 37 AP 170 հաշվառման համարանիշի ավտոմեքենան վարել է ոչ սթափ վիճակում, չունենալով տրանսպորտային միջոցներ վարելու իրավունք, ինչի կապակցությամբ պարեկային ծառայողները կանգնեցնելով իրեն, ստուգել են իր փաստաթղթերը, սթափությունը և կազմել են վարչական իրավախախտման վերաբերյալ թիվ 8180404305 արձանագրությունը: Արձանագրությունը կազմելուց հետո պարեկային ծառայողները ծանոթացրել են արձանագրության բովանդակության հետ, որից հետո ստորագրել է սթափության զննության կտրոնի համապատասխան տողում: 2024 թվականի հոկտեմբերի 30-ին՝ ժամը ստույգ չի հիշում՝ գիշերային ժամի, Երևան քաղաքի Նորագավիթ 1-ին փողոցում «Օպել» մակնիշի, 37 GT 719 հաշվառման համարանիշի ավտոմեքենան վարել է ոչ սթափ վիճակում՝ չունենալով տրանսպորտային միջոցներ վարելու իրավունք, ինչի կապակցությամբ պարեկային ծառայողները, կանգնեցնելով իրեն, ստուգել են իր փաստաթղթերը, այնուհետև առաջարկել են անցնել սթափության զննություն՝ արտաշնչելու եղանակով, սակայն ունեցել է շնչառական խնդիրներ և չի կարողացել զննության համար բավարար քանակի օդ արտաշնչել, ինչից հետո իրեն ուղեկցել են Ավանի նարկոլոգիական հիվանդանոց, որտեղ հանձնել է արյան նմուշ՝ զննության համար: 2024 թվականի նոյեմբերի 1-ին պարեկային ծառայողների կողմից կազմվել է վարչական իրավախախտման վերաբերյալ թիվ 8180415414 արձանագրությունը այն մասին, որ 2024 թվականի հոկտեմեբերի 30-ին տրանսպորտային միջոցը վարել է ոչ սթափ վիճակում՝ չունենալով տրանսպորտային միջոցներ վարելու իրավունք: Արձանագրությունը կազմելուց հետո պարեկային ծառայողները ծանոթացրել են արձանագրության բովանդակության հետ, որից հետո ստորագրել է արձանագրության համապատասխան տողում: Հայտարարել է, որ խնամքին ունի 4 անչափահաս երեխա, իսկ 5-րդ երեխային սպասում են՝ իր կինը հղի է: Ցուցմունքին կից ներակայացրել է համապատասխան փաստաթղթղերի պատճենները, զղջում է կատարվածի համար և խնդրում է վարույթն իրականացնող մարմնին հաշվի առնելով այդ հանգամանքները հնարավորինս մեղմ վերաբերվել։

Լրացուցիչ դատալսումների ընթացքում հետազոտված ապացույցները.
- ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանի ձև 8 տեղեկանքը, համաձայն որի՝ Ռազմիկ Վահանի Մայիլյանի վերաբերյալ տվյալներ առկա չեն։
- Ծննդյան թիվ ԱԲ 401902 պետական վկայականի պատճենը, համաձայն որի՝ Վահան Ռազմիկի Մայիլյանը ծնվել է 2016 թվականի հունվարի 14-ին, հայրը հանդիսանում է Ռազմիկ Վահանի Մայիլյանը, մայրը՝ Մարգարիտ Գարեգինի Թումանյանը։
- Ծննդյան թիվ ԱԲ 547232 պետական վկայականի պատճենը, համաձայն որի՝ Նունե Ռազմիկի Մայիլյանը ծնվել է 2017 թվականի հունվարի 27-ին, հայրը հանդիսանում է Ռազմիկ Վահանի Մայիլյանը, մայրը՝ Մարգարիտ Գարեգինի Թումանյանը։
- Ծննդի մասին թիվ ԲԱ410742 պետական վկայականի պատճենը, համաձայն որի՝ Մոնթե Ռազմիկի Մայիլյանը ծնվել է 2021 թվականի հունիսի 9-ին, հայրը հանդիսանում է Ռազմիկ Վահանի Մայիլյանը, մայրը՝ Մարգարիտ Գարեգինի Թումանյանը։
- Ծննդի մասին թիվ ԲԱ696318 պետական վկայականի պատճենը, համաձայն որի՝ Մոնիկա Ռազմիկի Մայիլյանը ծնվել է 2023 թվականի ապրիլի 14-ին, հայրը հանդիսանում է Ռազմիկ Վահանի Մայիլյանը, մայրը՝ Քաղցրիկ Մանվելի Մայիլյանը։
- Քաղցրիկ Մանվելի Մայիլյանի հղիության վերաբերյալ անհատական քարտից 2025 թվականի փետրվարի 25-ին տրված քաղվածքի պատճենը։
- մեղսագրվող հանցանքներն ավարտվելու օրվան նախորդող 12 ամիսների ընթացքում Ռազմիկ Վահանի Մայիլյանի ստացած եկամուտների վերաբերյալ ՀՀ պետական եկամուտների կոմիտեից ստացված գրությունը։

Դատարանի փաստական վերլուծությունները և Դատարանի կողմից հաստատված փաստական հանգամանքները.
Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը գտնում է, որ առկա է փոխկապակցված վերաբերելի, թույլատրելի, հավաստի ապացույցների բավարար համակցություն, որը թույլ է տալիս հաստատված համարելու Ռազմիկ Մայիլյանին ներկայացված մեղադրանքի փաստական հանգամանքները՝ բացառելով դրանց ապացուցվածության վերաբերյալ ցանկացած հիմնավոր կասկած։
Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում քրեական գործի լուծման համար նշանակություն ունեցող հետևյալ փաստական հանգամանքները.
- Ռազմիկ Վահանի Մայիլյանի կողմից տրանսպորտային միջոցներ վարելու իրավունք չունենալը,
- Ռազմիկ Վահանի Մայիլյանի կողմից ոչ սթափ վիճակում՝ 1 լիտր արտաշնչած օդի մեջ մաքուր ալկոհոլի պարունակությունը 0.925 մգ/լ, 2024 թվականի մայիսի 22-ին՝ ժամը 03:30-ին, Երևան քաղաքի Թամանցիների փողոցում «Օպել» մակնիշի, 36 A 170 հաշվառման համարանիշի տրանսպորտային միջոցը վարելը,
- Ռազմիկ Վահանի Մայիլյանի կողմից ոչ սթափ վիճակում՝ արյան մեջ մաքուր ալկոհոլի պարունակությունը՝ 1.244 գ/լ, 2024 թվականի հոկտեմբերի 30-ին՝ ժամը 01:28-ին, Երևան քաղաքի Նորագավիթ 1-ին փողոցում «Օպել» մակնիշի, 35 GT 719 հաշվառման համարանիշի տրանսպորտային միջոցը վարելը,
- խնամքին չորս անչափահաս երեխաների և հղի կնոջ գտնվելը,
- ներկայացված մեղադրանքում Ռազմիկ Մայիլյանի կողմից իրեն մեղավոր ճանաչելը և զղջալը,
- Ռազմիկ Վահանի Մայիլյանի ստացած եկամուտների վերաբերյալ տվյալների առկայությունը,
- նախկինում դատապարտված կամ այլ կերպ արատավորված չլինելը:

Դատարանի իրավական վերլուծությունները, հետևությունները և որոշումները.
Դատարանի կողմից հաստատված փաստական հանգամանքների և 2025 թվականի մարտի 18-ին կայացված մեղադրական վերդիկտի հիման վրա Դատարանը գտնում է, որ ապացուցված են մեղադրյալ Ռազմիկ Վահանի Մայիլյանին վերագրվող փաստական հանգամանքները, այդ արարքների քրեական հակաիրավականությունը, մեղադրյալի կողմից այդ արարքները կատարելը, մեղադրյալի մեղավորությունը տվյալ արարքները կատարելու մեջ, ինչպես նաև գտնում է, որ մեղադրյալ Ռ․Մայիլյանի արարքների նկատմամբ պետք է կիրառվի ՀՀ քրեական օրենսգրքի 344-րդ հոդվածի 2-րդ մասը և ՀՀ քրեական օրենսգրքի 344-րդ հոդվածի 2-րդ մասը։
Դատարանը, հաստատված համարելով մեղադրյալ Ռազմիկ Վահանի Մայիլյանի մեղավորությունը ՀՀ քրեական օրենսգրքի 344-րդ հոդվածի 2-րդ մասով նախատեսված հանցանքի կատարման մեջ, գտնում է, որ մեղադրյալ Ռ․Մայիլյանի անձը բնութագրող հանգամանք պետք է դիտարկել նախկինում դատապարտված կամ այլ կերպ արատավորված չլինելը։
Ղեկավարվելով ՀՀ քրեական օրենսգրքի 70-րդ հոդվածի 2-րդ մասով, Դատարանը գտնում է, որ Ռազմիկ Վահանի Մայիլյանի պատասխանատվությունն ու պատիժը մեղմացնող հանգամանքներ պետք է դիտարկել ներկայացված մեղադրանքում իրեն մեղավոր ճանաչելը և զղջալը (Դատարանի նման մոտեցումը համահունչ է Սերոբ Սարգսյանի գործով 2012 թվականի նոյեմբերի 1-ի թիվ ՍԴ/0109/01/12 որոշման 27-րդ կետում ՀՀ վճռաբեկ դատարանի արտահայտած իրավական դիրքորոշմանը), խնամքին չորս անչափահաս երեխաների և հղի կնոջ գտնվելը:
Դատարանը միաժամանակ արձանագրում է, որ Ռազմիկ Մայիլյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71-րդ հոդվածի 1-ին մասով նախատեսված հանգամանքներ առկա չեն:
Դատարանը գտնում է, որ կատարած հանցանքների համար մեղադրյալ Ռազմիկ Վահանի Մայիլյանը ենթակա է պատժի։
ՀՀ քրեական օրենսգրքի 7-րդ հոդվածի 1-ին մասի համաձայն` հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը:
ՀՀ քրեական օրենսգրքի 55-րդ հոդվածի 1-ին մասի համաձայն՝ պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ: Նույն հոդվածի 2-րդ մասի համաձայն՝ պատժի նպատակներն են՝ վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:
ՀՀ քրեական օրենսգրքի 69-րդ հոդվածի 1-ին, 2-րդ և 3-րդ մասերի համաձայն` հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները: Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ: Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները:
Պատիժ նշանակելու ընդհանուր սկզբունքներին ՀՀ վճռաբեկ դատարանն անդրադարձել է Նարեկ Սարգսյանի վերաբերյալ 2011 թվականի դեկտեմբերի 22-ի թիվ ԵԿԴ/0042/01/11 գործով կայացված որոշման մեջ, որտեղ իրավական դիրքորոշում է ձևավորել այն մասին, որ «(...) [Պ]ատիժ նշանակելու ընդհանուր սկզբունքները քրեական օրենքով նախատեսված այն հիմնադրույթներն են, որոնցով պետք է ղեկավարվի դատարանը պատիժ նշանակելիս: Այդ սկզբունքներն են՝
ա) օրինականությունը,
բ) արդարությունը,
գ) պատժի անհատականացումը,
դ) մարդասիրությունը:
Պատիժ նշանակելու վերոնշյալ սկզբունքները սահմանում են այն հիմնական դրույթները, որոնցով ղեկավարվում է դատարանը յուրաքանչյուր քրեական գործով պատժի տեսակն ու չափն ընտրելիս:
(…) [Պ]ատժի նշանակման իրավական շրջանակները սահմանված են ՀՀ քրեական օրենսգրքով: Դրա հետ մեկտեղ, սակայն, վերոնշյալ օրենքը դատարանին հնարավորություն է տվել որոշակի սկզբունքների (…) պահպանմամբ, իր ներքին համոզմանը և իրավագիտակցությանը համապատասխան, ՀՀ քրեական օրենսգրքի Ընդհանուր և Հատուկ մասերով նախատեսված սահմաններում որոշել պատժի տեսակն ու չափը: Այլ կերպ՝ ուրվագծելով կոնկրետ հանցանքի համար նշանակման ենթակա պատժի առավելագույն և նվազագույն սահմանները՝ ՀՀ քրեական օրենքը դատարանին տվել է այդ շրջանակում հայեցողություն դրսևորելու հնարավորություն»։
ՀՀ վճռաբեկ դատարանը Արարատ Ավագի Ավագյանի և Վահան Սերյոժայի Սահակյանի վերաբերյալ 2009 թվականի փետրվարի 17-ի թիվ ԵԿԴ/0252/01/13 որոշմամբ արտահայտել է հետևյալ իրավական դիրքորոշումը. «(…) [Ն]շանակվող պատժի արդարացիության հիմնական պահանջն այն է, որ պատիժը պետք է համապատասխանի հանցագործության հանրային վտանգավորության աստիճանին և բնույթին:
(…):
Հանցագործության հանրային վտանգավորության տիպային բնութագիրն արտացոլվում է օրենսդրի կողմից սահմանված սանկցիայում, իսկ յուրաքանչյուր կոնկրետ գործով արարքի հանրային վտանգավորության գնահատականը դատարանի կողմից կարող է որոշվել կոնկրետ հանցագործության տարրերի առանձնահատկությունների, դրա կատարման հանգամանքների, հանցավորի անձնավորության, պատասխանատվությունն ու պատիժը մեղմացնող և ծանրացնող հանգամանքների հիման վրա:
Արարքի բնույթն ու հանրային վտանգավորության աստիճանի վերաբերյալ ՀՀ վճռաբեկ դատարանը դիրքորոշում է հայտնել Գարուշ Մադաթյանի վերաբերյալ 2009 թվականի փետրվարի 17-ի թիվ ԵՇԴ/0029/01/08 որոշմամբ՝ «(…) Արարքի հանրային վտանգավորության բնույթը հանցագործության որակական կողմն է, այն որոշվում է մեղքի ձևի և տեսակի, հանցագործության նպատակի և շարժառիթի, ինչպես նաև քրեական օրենսդրությամբ պահպանվող հասարակական հարաբերության` հանցանքի կատարման պահին ունեցած սոցիալական նշանակության վերաբերյալ փաստական տվյալների ամբողջությամբ:
Արարքի հանրային վտանգավորության աստիճանի որոշման ժամանակ դատարանը պետք է բացահայտի կատարված հանցագործությամբ պատճառված վնասի չափը, հանցագործության կատարման եղանակը, հանցավոր մտադրության իրականացման աստիճանը, հանցակցության դեպքում` հանցավորի կատարած արարքը և հանցագործությանը նրա մասնակցության աստիճանը:
(…)
Արարքի հանրային վտանգավորության բնույթի որոշման հարցում Վճռաբեկ դատարանը կարևորում է խախտված քրեաիրավական նորմով պաշտպանվող հասարակական հարաբերության սոցիալական նշանակությունը: Վճռաբեկ դատարանը գտնում է, որ պատիժ նշանակելիս դատարանները պարտավոր են հաշվի առնել տվյալ ժամանակահատվածում քրեական օրենսդրությամբ պահպանվող կոնկրետ հասարակական հարաբերության սոցիալական նշանակությունը, այդ ոլորտում պետության քրեական քաղաքականության ուղղվածությունը:
(…)»:
Դատարանի համոզմամբ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ: Պատիժն արդարացի է, եթե համաչափ է կատարված հանցագործությանը, ինչպես նաև բավարար պատժի նպատակներին հասնելու տեսանկյունից: Պատժի արդարության պահանջներից նահանջելը կարող է հանգեցնել չափազանց մեղմ կամ չափազանց խիստ պատժի նշանակման: Քրեական օրենքը համընդհանուր բնույթ ունի, իսկ արարքը և հանցավորի անձը կոնկրետ են: Հետևաբար՝ կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի, հանցավորի անձի, պատիժը մեղմացնող և ծանրացնող հանգամանքների վերլուծության հիման վրա: Նշված հանգամանքների գնահատման ժամանակ դատարանը պետք է ելնի ՀՀ քրեական օրենսգրքի 55-րդ հոդվածով նախատեսված՝ պատժի նպատակների իրացումն ապահովելու անհրաժեշտությունից:
ՀՀ քրեական օրենսգրքի 344-րդ հոդվածի 2-րդ մասի համաձայն՝
«Տրանսպորտային միջոցներ վարելու իրավունքից զրկված կամ տրանսպորտային միջոցներ վարելու իրավունքը կասեցված կամ տրանսպորտային միջոց վարելու իրավունք չունեցող անձի կողմից հարբած (ոչ սթափ) վիճակում տրանսպորտային միջոց վարելը կամ այդ անձի կողմից սթափության վիճակի զննություն անցնելուց հրաժարվելը կամ խուսափելը`
պատժվում է տուգանքով՝ առավելագույնը քսանապատիկի չափով, կամ հանրային աշխատանքներով՝ ութսունից հարյուր հիսուն ժամ տևողությամբ, կամ կարճաժամկետ ազատազրկմամբ՝ մեկից երկու ամիս ժամկետով, կամ ազատազրկմամբ՝ առավելագույնը երկու տարի ժամկետով»:
Վերը մեջբերված իրավական նորմերի և դիրքորոշումների լույսի ներքո մեղադրյալ Ռազմիկ Վահանի Մայիլյանի նկատմամբ պատժի տեսակը և չափը որոշելիս Դատարանը հաշվի է առնում նրա կողմից կատարված հանցագործությունների բնույթը և հանրության համար վտանգավորության աստիճանը, մասնավորապես՝ այն, որ նա կատարել է ոչ մեծ ծանրության դիտավորյալ հանցագործություններ, խախտված հասարակական հարաբերության սոցիալական նշանակությունը, հանցանքները կատարելուց հետո մեղադրյալի դրսևորած վարքագիծը, պատասխանատվությունն ու պատիժը մեղմացնող հանգամանքները, ինչպես նաև պատասխանատվությունը և պատիժը ծանրացնող հանգամանքի բացակայությունը։ Նման պայմաններում Դատարանն արձանագրում է, որ ՀՀ քրեական օրենսգրքի 344-րդ հոդվածի 2-րդ մասով և ՀՀ քրեական օրենսգրքի 344-րդ հոդվածի 2-րդ մասով նախատեսված արարքներից յուրաքանչյուրի համար տուգանք պատժատեսակի նվազագույն չափի, այն է՝ նվազագույն աշխատավարձի հնգապատիկի նշանակման միջոցով հնարավոր է հասնել պատժի նպատակներին` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:
Հիմք ընդունելով ՀՀ քրեական օրենսգրքի 59-րդ հոդվածի 5-րդ մասը և մեղսագրվող հանցանքն ավարտվելու օրվան նախորդող 12 ամիսների ընթացքում մեղադրյալ Ռազմիկ Վահանի Մայիլյանի եկամտի վերաբերյալ տվյալները (հիմք՝ ՀՀ պետական եկամուտների կոմիտեից ստացված գրությունը)՝ Դատարանը գտնում է, որ տուգանքի չափը պետք է հաշվարկվի հանցանքները կատարելու պահին (2024 թվականի մայիսի 22 և 2024 թվականի հոկտեմբերի 30), սահմանված նվազագույն աշխատավարձի, այն է՝ 75.000 (յոթանասունհինգ հազար) ՀՀ դրամի չափով (տե՛ս «Նվազագույն ամսական աշխատավարձի մասին» ՀՀ օրենքի 1-ին հոդվածը)։
Վերոգրյալի համատեքստում Դատարանը գտնում է, որ մեղադրյալի նկատմամբ պետք է պատիժ նշանակել տուգանք յուրաքանչյուր դրվագով՝ ՀՀ քրեական օրենսգրքի 344-րդ հոդվածի 2-րդ մասով և ՀՀ քրեական օրենսգրքի 344-րդ հոդվածի 2-րդ մասով՝ նվազագույն աշխատավարձի հնգապատիկի՝ 375․000 (երեք հարյուր յոթանասունհինգ հազար) ՀՀ դրամի չափով։
ՀՀ քրեական օրենսգրքի 74-րդ հոդվածի համաձայն՝
«1. Հանցագործությունների համակցությամբ յուրաքանչյուր հանցագործության համար առանձին պատիժ (հիմնական և լրացուցիչ) նշանակելով` դատարանը վերջնական պատիժը որոշում է նշանակված պատիժները լրիվ կամ մասնակիորեն գումարելու միջոցով: Մասնակի գումարման դեպքում վերջնական պատիժը պետք է ավելի լինի, քան համակցության մեջ մտնող հանցագործությունների համար նշանակված առավել խիստ պատիժը: Հանցագործությունների համակցությամբ վերջնական պատիժը որոշելիս մասնակի գումարվող պատիժը չի կարող պակաս լինել տվյալ պատժատեսակի համար սույն օրենսգրքով նախատեսված նվազագույն չափից կամ ժամկետից, սակայն վերջնական պատիժը չի կարող գերազանցել սույն հոդվածի 2-րդ, 3-րդ, 4-րդ, 5-րդ, 6-րդ և 9-րդ մասերով նախատեսված առավելագույն չափը կամ ժամկետը:
(…)
9. Հանցագործությունների համակցության դեպքում մյուս պատիժները լրիվ կամ մասնակիորեն գումարելու դեպքում նշանակվող վերջնական պատիժը չի կարող գերազանցել սույն օրենսգրքի Ընդհանուր մասով պատժի տվյալ տեսակի համար սահմանված առավելագույն ժամկետը կամ չափը։
(…)»։
Դատարանը, նկատի ունենալով, որ Ռազմիկ Մայիլյանը մեկից ավելի արարքներով ՀՀ քրեական օրենսգրքով նախատեսված երկու հանցանք է կատարել և նա դրանցից ոչ մեկի համար քրեական պատասխանատվության չի ենթարկվել, գտնում է, որ նրա նկատմամբ պատիժները լրիվ գումարելու միջոցով վերջնական պատիժ պետք է նշանակել տուգանք՝ 750․000 (յոթ հարյուր հիսուն հազար) ՀՀ դրամի չափով։
Տվյալ դեպքում սահմանված պատիժը համաչափ է կատարված կոնկրետ հանցագործությունների բնույթին, վտանգավորության աստիճանին, դրանք կատարելու հանգամանքներին, հանցավորի անձին և բավարար է պատժի նպատակների նվաճման տեսանկյունից:
ՀՀ քրեական օրենսգրքի 59-րդ հոդվածի 8-րդ մասի համաձայն՝ եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում (…)։
Միաժամանակ, Դատարանը, հաշվի առնելով այն հանգամանքը, որ մեղադրյալ Ռ․Մայիլյանը հայտարարեց, որ ինքն անհապաղ ի վիճակի չէ ամբողջությամբ վճարել տուգանքը, այլ կարող է այն վճարել մեկ տարվա ընթացքում, և հիմք ընդունելով ՀՀ քրեական օրենսգրքի 59-րդ հոդվածի 8-րդ մասի իրավակարգավորումները, գտնում է, որ նշանակված 750․000 (յոթ հարյուր հիսուն հազար) ՀՀ դրամի չափով տուգանքի վճարման ժամկետ պետք է սահմանել 1 (մեկ) տարի:
Անդրադառնալով մեղադրյալ Ռ․Մայիլյանի նկատմամբ ընտրված խափանման միջոցի հարցին՝ Դատարանը գտնում է, որ նրա նկատմամբ որպես խափանման միջոց ընտրված բացակայելու արգելքը պետք է թողնել անփոփոխ՝ մինչև դատավճռի օրինական ուժի մեջ մտնելը:
Անդրադառնալով ապացույցների տնօրինման և պահպանման հարցին՝ Դատարանը գտնում է, որ արտավարութային փաստաթուղթ ապացույց ճանաչված՝ թիվ 60262024 քրեական վարույթով ՀՀ ՆԳՆ ոստիկանության «Ճանապարհային ոստիկանություն» ծառայության էլեկտրոնային ռեգիստրում առկա՝ Ռազմիկ Վահանի Մայիլյանի վարորդական վկայականի վերաբերյալ տեղեկատվության քաղվածքի, Ռազմիկ Վահանի Մայիլյանի վերաբերյալ 2024 թվականի մայիսի 22-ին կազմված վարչական իրավախախտման վերաբերյալ արձանագրության (կից չլրացված վարչական իրավախախտման որոշում՝ 8180404305), Ռազմիկ Մայիլյանին սթափության զննության ենթարկելու վերաբերյալ թիվ 01499 կտրոնի, 91101208 սթափության զննության սարքի ստուգաչափման թիվ 115135 վկայականի, Ռազմիկ Վահանի Մայիլյանի վերաբերյալ 2022 թվականի օգոստոսի 13-ին կազմված վարչական իրավախախտման վերաբերյալ արձանագրության և դարձերեսի (կից լրացված վարչական իրավախախտման որոշում՝ 8180152628), Ռազմիկ Մայիլյանին սթափության զննության ենթարկելու վերաբերյալ թիվ 00215 կտրոնի, 91100892 սթափության զննության սարքի ստուգաչափման թիվ 074607 վկայականի և դարձերեսի, Ռազմիկ Վահանի Մայիլյանի վերաբերյալ 2024 թվականի նոյեմբերի 1-ին կազմված վարչական իրավախախտման վերաբերյալ արձանագրության (կից չլրացված վարչական իրավախախտման որոշում՝ 8180415414), Ռազմիկ Մայիլյանին սթափության զննության ներկայացնելու թիվ 002645 վարորդի սթափության վիճակի զննության ուղեգրի, Ռազմիկ Մայիլյանի վերաբերյալ կազմված բուժհաստատությունների կողմից վարորդի սթափության վիճակի զննության N486 արձանագրության պատճենները պետք է պահել գործի նյութերի հետ՝ դրանց պահման ամբողջ ընթացքում:
Նկատի ունենալով այն հանգամանքը, որ սույն քրեական գործով գույքային հայց, գույք բռնագրավելու անհրաժեշտություն, վարույթային ծախսեր, արգելադրված գույք առկա չեն՝ Դատարանն այդ հարցերին չի անդրադառնում։
Ելնելով վերոգրյալից և ղեկավարվելով Հայաստանի Հանրապետության քրեական դատավարության օրենսգրքի 30-31-րդ, 100-րդ, 167-րդ, 347-350-րդ, 352-353-րդ, 364-րդ հոդվածներով՝ Դատարանը

Վ Ճ Ռ Ե Ց

Ռազմիկ Վահանի Մայիլյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով և ՀՀ քրեական օրենսգրքի 344-րդ հոդվածի 2-րդ մասով։
ՀՀ քրեական օրենսգրքի 344-րդ հոդվածի 2-րդ մասով Ռազմիկ Վահանի Մայիլյանի նկատմամբ պատիժ նշանակել տուգանք՝ նվազագույն աշխատավարձի հնգապատիկի՝ 375․000 (երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 344-րդ հոդվածի 2-րդ մասով Ռազմիկ Վահանի Մայիլյանի նկատմամբ պատիժ նշանակել տուգանք՝ նվազագույն աշխատավարձի հնգապատիկի՝ 375․000 (երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 74-րդ հոդվածով սահմանված կարգով` նշանակված պատիժները լրիվ գումարելու միջոցով, Ռազմիկ Վահանի Մայիլյանի նկատմամբ վերջնական պատիժ նշանակել տուգանք՝ 750․000 (յոթ հարյուր հիսուն հազար) ՀՀ դրամի չափով։
Նշանակված տուգանքի վճարման ժամկետ սահմանել 1 (մեկ) տարի:
Ռազմիկ Վահանի Մայիլյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը:
Ապացույց ճանաչված արտավարութային փաստաթղթերը պահել գործի նյութերի հետ՝ դրանց պահման ամբողջ ընթացքում:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո՝ մեկամսյա ժամկետում:

ԴԱՏԱՎՈՐ Մ.ԱՐԶՈւՄԱՆՅԱՆ