ԵԴ1/0713/01/25






Ո Ր Ո Շ ՈՒ Մ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՎԱՐՈՒՅԹԸ
ԿԱՐՃԵԼՈՒ ՄԻՋՆՈՐԴՈՒԹՅՈՒՆԸ ՔՆՆՈՒԹՅԱՆ
ԱՌՆԵԼՈՒ ՄԱՍԻՆ

14 մայիսի 2025թ. ք. Երևան
Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ Դատարան), նախագահությամբ դատավոր՝ Տիգրան Ոսկանյանի, քարտուղարությամբ՝ Ս.Բադալյանի, մասնակցությամբ՝ հանրային մեղադրող Ե.Աբովյանի, տուժող Ա.Աբրահամյանի, պաշտպան Վ.Գասպարյանի, մեղադրյալ Ռ.Գևորգյանի, դռնբաց դատական նիստում քննության առնելով մեղադրյալ Ռազմիկ Արշակի Գևորգյանի (ծնված՝ 02.06.1988 թվականին, ազգությամբ հայ, ՀՀ քաղաքացի, բարձրագույն կրթությամբ, չամուսնացած, դատվածություն չունեցող, հաշվառված և փաստացի բնակվող՝ ք.Աբովյան, Երևանյան 9-րդ շենք, 1-ին բնակարան հասցեում) նկատմամբ ՀՀ քրեական օրենսգրքի 254-րդ հոդվածի 1-ին մասով իրականացվող քրեական հետապնդումը դադարեցնելու և թիվ ԵԴ1/0713/01/25 քրեական գործի վարույթը կարճելու մեղադրյալի միջնորդությունը,

Պ Ա Ր Զ Ե Ց
2024 թվականի դեկտեմբերի 14-ին՝ ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնում նախաձեռնվել է թիվ 09144124 քրեական վարույթը:
2024 թվականի դեկտեմբերի 14-ին՝ ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնի ավագ քննիչ Մ.Գրիգորյանի որոշմամբ՝ Արգամ Սամվելի Աբրահամյանը ճանաչվել է տուժող:
2024 թվականի դեկտեմբերի 16-ին, ժամը՝ 09:00-ին՝ հանցանք կատարած լինելու անմիջականորեն ծագած հիմնավոր կասկածի առկայության հիմքով ձերբակալվել է Ռազմիկ Արշակի Գևորգյանը:
2024 թվականի դեկտեմբերի 16-ին, ժամը՝ 14:20-ին՝ ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնի ավագ քննիչ Մ.Գրիգորյանի որոշմամբ՝ հանցանք կատարած լինելու անմիջականորեն ծագած հիմնավոր կասկածի առկայության հիմքով ձերբակալված Ռազմիկ Արշակի Գևորգյանը ազատ է արձակվել ձերբակալումից՝ անձին անազատության մեջ պահելու անհրաժեշտությունը վերանալու հիմքով:
2025 թվականի փետրվարի 19-ին՝ Երևան քաղաքի Արաբկիր և Քանաքեռ-Զեյթուն վարչական շրջանների դատախազության դատախազ Ե.Աբովյանի որոշմամբ՝ Ռազմիկ Արշակի Գևորգյանի նկատմամբ ՀՀ քրեական օրենսգրքի 254-րդ հոդվածի 1-ին մասով հարուցվել է հանրային քրեական հետապնդում:
2025 թվականի փետրվարի 19-ին՝ ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնի ավագ քննիչ Մ.Գրիգորյանի որոշմամբ՝ մեղադրյալ Ռազմիկ Արշակի Գևորգյանի նկատմամբ որպես խափանման միջոց է ընտրվել այլընտրանքային խափանման միջոց բացակայելու արգելքը:
Թիվ 09144124 քրեական վարույթի նյութերն ըստ մեղադրանքի Ռազմիկ Արշակի Գևորգյանի՝ ՀՀ քրեական օրենսգրքի 254-րդ հոդվածի 1-ին մասով, 2025 թվականի մարտի 03-ի գրությամբ Երևան քաղաքի Արաբկիր և Քանաքեռ-Զեյթուն վարչական շրջանների դատախազությունից ուղարկվել է Երևան քաղաքի առաջին ատյանի ընդհանուր իրավասության քրեական դատարան, մուտքագրվել է 04.03.2025 թվականին և նույն օրն էլ համակարգչային ծրագրի միջոցով իրականացվող գործերի բաշխմամբ, գործը մակագրվել է դատավոր Տիգրան Ոսկանյանին:
Քրեական գործին շնորհվել է թիվ ԵԴ1/0713/01/25 համարը:
Քրեական գործը դատավորին հանձնվել է 2025 թվականի մարտի 05-ին։
2025 թվականի մարտի 06-ին որոշում է կայացվել Ռազմիկ Արշակի Գևորգյանի վերաբերյալ ՀՀ քրեական օրենսգրքի 254-րդ հոդվածի 1-ին մասով թիվ ԵԴ1/0713/01/25 քրեական գործը վարույթ ստանձնելու և նախնական դատալսումների նշանակելու մասին:
Ռազմիկ Արշակի Գևորգյանի նկատմամբ հանրային քրեական հետապնդում է հարուցվել ՀՀ քրեական օրենսգրքի 254-րդ հոդվածի 1-ին մասով այն բանի համար, որ «նա ուրիշի գույքի գաղտնի հափշտակություն կատարելու դիտավորությամբ, 2024 թվականի դեկտեմբերի 13-ին՝ ժամը 21:15-ից դեկտեմբերի 14-ը՝ ժամը 12:30-ն ընկած ժամանակահատվածում, Երևան քաղաքի Ռուբինյանց 26/2 շենքի դիմաց կայանված ավտոմեքենայից հափշտակել է Արգամ Աբրահամյանին պատկանող ավտոմեքենայի լիցքավորման սարքը՝ այդ կերպ Արգամ Աբրահամյանին պատճառելով մարն չափի՝ 150.000 ՀՀ դրամի գույքային վնաս.
Այսպես.
Ռազմիկ Արշակի Գևորգյանը, 2024 թվականի դեկտեմբերի 13-ին՝ ժամը 21:30-ի սահմաններում, տաքսի ծառայություն իրականացնելիս՝ Երևան քաղաքի Ռուբինյանց փողոցի 26/2 հասցեում նկատել է լիցքավորման սարքին միացված և կայանված «Տեսլա 3» մակնիշի 03 SN 030 պետհամարանիշի ավտոմեքենան, ինչից հետո իր կողմից վարվող «Օպել» մակնիշի 35 XT 797 պետհամարանիշի ավտոմեքենան կայանել է Ռուբինյանց փողոցում, ավտոմեքենայից վերցրել պտուտակահան, մոտեցել «Տեսլա 3» մակնիշի 03 SN 030 պետհամարանիշի ավտոմեքենային, այնուհետև ուրիշի գույքի գաղտնի հափշտակություն կատարելու դիտավորությամբ՝ քաշելու եղանակով, գաղտնի հափշտակել է ավտոմեքենային միացված լիցքավորման սարքը, այնուհետև մոտենալով իր ավտոմեքենային հեռացել է դեպքի վայրից՝ այդ կերպ Արգամ Սամվելի Աբրահամյանին պատճառելով մանր չափի՝ 150.000 (մեկ հարյուր հիսուն հազար) ՀՀ դրամի գույքային վնաս»:
Նախնական դատալսումների ընթացքում Դատարանը, անդրադառնալով ՀՀ քրեական դատավարության օրենսգրքի 316-րդ հոդվածով նախատեսված հարցին, որոշում է կայացրել մեղադրյալի նկատմամբ մինչդատական վարույթի ընթացքում ընտրված խափանման միջոցը` բացակայելու արգելքը թողնել անփոփոխ:
Նախնական դատալսումների ընթացքում ՀՀ քրեական դատավարության 311-րդ հոդվածի 1-ին մասով նախատեսված հարցերի քննարկման ժամանակ մեղադրյալ Ռ.Գևորգյանը միջնորդեց տուժողի հետ հաշտության հիմքով իր նկատմամբ իրականացվող քրեական հետապնդումը դադարեցնել և գործի վարույթը կարճել:
Մեղադրյալը հայտնեց, որ համաձայն է այդ հիմքով քրեական հետապնդումը դադարեցնելուն և քրեական գործի վարույթը կարճելուն:
Տուժողը հայտնեց, որ մեղադրյալի նկատմամբ բողոք-պահանջ չունի, հաշտվել է նրա հետ, մեղադրյալի կողմից իրեն պատճառված գույքային վնասը փոխհատուցվել է:
Հանրային մեղադրողը չառարկեց միջնորդության դեմ:
ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետի համաձայն՝
«Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե`
(...) անձը Հայաuտանի Հանրապետության քրեական oրենuգրքի ընդհանուր կամ հատուկ մասի դրույթների ուժով ենթակա է ազատման քրեական պատաuխանատվությունից»:
ՀՀ քրեական օրենսգրքի 82-րդ հոդվածի համաձայն՝
«1. Եթե անձն առաջին անգամ է հանցանք կատարել, ապա ազատվում է քրեական պատասխանատվությունից, եթե նրա կատարած արարքը ոչ մեծ կամ միջին ծանրության հանցանք է, և նրա ու տուժողի միջև առկա է հաշտության վերաբերյալ ինքնուրույն և ազատ կամարտահայտության վրա հիմնված փոխադարձ համաձայնությունը, բացառությամբ այն դեպքերի, երբ կատարված հանցանքում առկա են ընտանիքում բռնության հատկանիշներ:
(...)»:
Նույն օրենսգրքի 254-րդ հոդվածի համաձայն՝
«1. Գողությունը՝ գաղտնի հափշտակությունը`
պատժվում է տուգանքով՝ առավելագույնը քսանապատիկի չափով, կամ հանրային աշխատանքներով՝ ութսունից հարյուր հիսուն ժամ տևողությամբ, կամ ազատության սահմանափակմամբ՝ առավելագույնը երկու տարի ժամկետով, կամ կարճաժամկետ ազատազրկմամբ՝ առավելագույնը երկու ամիս ժամկետով, կամ ազատազրկմամբ՝ առավելագույնը երկու տարի ժամկետով:»:
Նույն օրենսգրքի 17-րդ հոդվածի 2-րդ մասի համաձայն՝
«2. Ոչ մեծ ծանրության հանցանքներ են համարվում սույն օրենսգրքով նախատեսված այն արարքները, որոնց համար սույն օրենսգրքի Հատուկ մասով նախատեսված առավելագույն պատիժը չի գերազանցում 2 տարի ժամկետով ազատազրկումը, կամ որոնց համար նախատեսված է ազատությունից զրկելու հետ չկապված պատիժ:»:
ՀՀ քրեական դատավարության օրենսգրքի 311-րդ հոդվածի 1-ին մասի 3-րդ կետի համաձայն՝
«1. Նախնական դատալսումների ընթացքում սույն հոդվածով սահմանված հաջորդականությամբ դատարանը քննարկման առարկա է դարձնում՝
(…) 3) քրեական հետապնդումը դադարեցնելու կամ վարույթը կարճելու հարցը.»:
Նույն օրենսգրքի 315-րդ հոդվածի 1-ին մասի համաձայն` սույն օրենսգրքի 12-րդ հոդվածի 1-ին մասի 3-14-րդ կետերով նախատեսված որևէ հանգամանքի առկայության դեպքում, երբ դա հնարավոր է առանց ապացույցների հետազոտման, դատարանը որոշում է կայացնում քրեական հետապնդումը դադարեցնելու և վարույթը կարճելու մասին: Եթե քրեական հետապնդումը բացառող հանգամանքը վերաբերում է մեղադրյալներից մեկին, ապա քրեական հետապնդումը դադարեցվում է միայն նրա նկատմամբ՝ առանց վարույթը կարճելու:
Անդրադառնալով սույն քրեական վարույթի փաստական հանգամանքներին՝ Դատարանն արձանագրում է, որ մեղադրյալի և տուժողի միջև առկա է հաշտության վերաբերյալ ինքնուրույն և ազատ կամարտահայտության վրա հիմնված փոխադարձ համաձայնություն, համաձայն ՀՀ ՆԳՆ ոստիկանության ինֆորմացիոն կենտրոնի օպերատիվ տեղեկատու քարտադարանից Ռազմիկ Արշակի Գևորգյանի վերաբերյալ ստացված ձև 8 տեղեկանքի՝ վերջինս հանդիսանում է դատվածություն չունեցող, Ռազմիկ Արշակի Գևորգյանին մեղսագրվում է ոչ մեծ ծանրության հանցանքի կատարում, ուստի Դատարանը գտնում է, որ Ռազմիկ Արշակի Գևորգյանի նկատմամբ ՀՀ քրեական օրենսգրքի 254-րդ հոդվածի 1-ին մասով քրեական հետապնդումը պետք է դադարեցնել և թիվ ԵԴ1/0713/01/25 քրեական գործի վարույթը կարճել՝ ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետի հիմքով:
ՀՀ քրեական դատավարության օրենսգրքի 315-րդ հոդվածի 2-րդ մասի համաձայն` քրեական հետապնդումը դադարեցնելու մասին որոշմամբ վերացվում են տվյալ մեղադրյալի նկատմամբ կիրառված հարկադրանքի միջոցները, իսկ վարույթը կարճելու դեպքում` նաև այլ անձանց նկատմամբ կիրառված հարկադրանքի միջոցները: Վարույթը կարճելու մասին որոշմամբ լուծվում է նաև իրեղեն ապացույցների տնօրինման հարցը:
ՀՀ քրեական դատավարության օրենսգրքի 117-րդ հոդվածի 1-ին մասի համաձայն` եթե խափանման միջոցի գործողության ընթացքում փոխվել կամ վերացել են դրա իրավաչափության պայմանները, վարույթն իրականացնող մարմինն իր իրավասության սահմաններում որոշում է կայացնում խափանման միջոցը փոխելու կամ վերացնելու մասին:
Տվյալ դեպքում Դատարանը գտնում է, որ Ռազմիկ Արշակի Գևորգյանի նկատմամբ ընտրված խափանման միջոցը` բացակայելու արգելքը, պետք է վերացնել:
Անդրադառնալով իրեղեն ապացույցների տնօրինման հարցին՝ Դատարանը գտնում է, որ իրեղեն ապացույց ճանաչված և տուժող Արգամ Սամվելի Աբրահամյանին ի պահ հանձնված, Ռազմիկ Արշակի Գևորգյանի կողմից ներկայացրած «Տեսլա» մակնիշի ավտոմեքենայի լիցքավորման սարքն իր ադապտորով պետք է թողնել տուժող Արգամ Աբրահամյանի տնօրինությանը:
Հաշվի առնելով այն հանգամանքը, որ քրեական գործի վարույթը կարճելու պայմաններում վարույթային ծախսերը մեղադրյալից ենթակա չեն բռնագանձման, ուստի Դատարանն այդ հարցը համարում է լուծված:
Ելնելով վերոգրյալից և ղեկավարվելով ՀՀ քրեական օրենսգրքի 82-րդ և ՀՀ քրեական դատավարության օրենսգրքի 12-րդ, 33-րդ, 311-րդ, 315-րդ հոդվածներով, Դատարանը՝

Ո Ր Ո Շ Ե Ց
Միջնորդությունը բավարարել:
Ռազմիկ Արշակի Գևորգյանի նկատմամբ ՀՀ քրեական օրենսգրքի 254-րդ հոդվածի 1-ին մասով քրեական հետապնդումը դադարեցնել և թիվ ԵԴ1/0713/01/25 քրեական գործի վարույթը կարճել՝ ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետի, այն է՝ Հայաuտանի Հանրապետության քրեական oրենuգրքի 82-րդ հոդվածի 1-ին մասի ուժով քրեական պատաuխանատվությունից ազատման ենթակա լինելու հիմքով:
Ռազմիկ Արշակի Գևորգյանի նկատմամբ ընտրված բացակայելու արգելք խափանման միջոցը՝ վերացնել:
Իրեղեն ապացույց ճանաչված և տուժող Արգամ Աբրահամյանին ի պահ հանձնված «Տեսլա» մակնիշի ավտոմեքենայի լիցքավորման սարքն իր ադապտորով թողնել տուժող Արգամ Աբրահամյանի տնօրինությանը:
Դատական ծախսերի հարցը համարել լուծված:
Որոշումը կարող է բողոքարկվել ՀՀ վերաքննիչ քրեական դատարան` ստանալու պահից մեկամսյա ժամկետում:

ԴԱՏԱՎՈՐ ՏԻԳՐԱՆ ՈՍԿԱՆՅԱՆ