ԵԴ1/0687/01/25




ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«09» հունիսի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` Դատարան)

նախագահությամբ՝ դատավոր Տաթևիկ Մուրադյանի,
քարտուղարությամբ՝ Ագնետա Հակոբյանի,

մասնակցությամբ՝
հանրային մեղադրող՝ Վազգեն Եդիգարյանի,
մեղադրյալ՝ Արտյոմ Ապետյանի,

դռնբաց դատական նիստում քննելով քրեական գործն ըստ մեղադրանքի՝
Արտյոմ Գագիկի Ապետյանի՝
(ծնված՝ 07.05.1980թ. Գեղարքունիքի մարզի Երանոս գյուղում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, աշխատում է որպես Արտյոմ Ապետյան Ա/Ձ տնօրեն, նախկինում դատապարտված, հաշվառված՝ Սյունիքի մարզի Սիսիան քաղաքի Նորաշեն թաղամասի 7 Ա տանը, բնակվող՝ Երևան քաղաքի Նուբարաշեն 8-րդ փողոց, 5-րդ տուն հասցեում) ՀՀ քրեական օրենսգրքի 344-րդ հոդվածի 2-րդ մասով,

ՊԱՐԶԵՑ

1. Քրեական գործի դատավարական նախապատմությունը.
2025 թվականի հունվարի 23-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության հատկանիշներով նախաձեռնվել է թիվ 60128525 քրեական վարույթը:
2025 թվականի փետրվարի 11-ին ՀՀ դատախազության Երևան քաղաքի Էրեբունի և Նուբարաշեն վարչական շրջանների դատախազության դատախազ Վ.Եդիգարյանի որոշմամբ՝ թիվ 60128525 քրեական վարույթով Արտյոմ Գագիկի Ապետյանի նկատմամբ ՀՀ քրեական օրենսգրքի 344-րդ հոդվածի 2-րդ մասով հարուցվել է հանրային քրեական հետապնդում:
Նախաքննության մարմնի 2025 թվականի փետրվարի 12-ի որոշմամբ Արտյոմ Գագիկի Ապետյանի նկատմամբ որպես խափանման միջոց է կիրառվել բացակայելու արգելքը։
2025 թվականի փետրվարի 28-ին Երևան քաղաքի առաջին ատյանի ընդհանուր իրավասության քրեական դատարան է ստացվել քրեական գործն ըստ մեղադրանքի՝ Արտյոմ Գագիկի Ապետյանի՝ ՀՀ քրեական օրենսգրքի 344-րդ հոդվածի 2-րդ մասով, որին շնորհվել է ԵԴ1/0687/01/25 համարը:
Նույն օրը քրեական գործն էլեկտրոնային եղանակով մակագրվել և 2025 թվականի մարտի 03-ին հանձնվել է Երևան քաղաքի առաջին ատյանի ընդհանուր իրավասության քրեական դատարանի դատավոր Տաթևիկ Մուրադյանին։
2025 թվականի մարտի 04-ին Դատարանի կողմից որոշում է կայացվել թիվ ԵԴ1/0687/01/25 քրեական գործի վարույթն ստանձնելու և նախնական դատալսումներ նշանակելու մասին։
2025 թվականի մայիսի 06-ին, Դատարանը թիվ ԵԴ1/0687/01/25 քրեական գործով կայացրել է մեղադրական վերդիկտ՝ Արտյոմ Գագիկի Ապետյանին մեղավոր ճանաչելով ՀՀ քրեական օրենսգրքի 344-րդ հոդվածի 2-րդ մասով նախատեսված արարքի կատարման մեջ:
2. Մեղադրանքի փաստական նկարագրությունը.
Արտյոմ Գագիկի Ապետյանին մեղադրանք է ներկայացվել ՀՀ քրեական օրենսգրքի 344-րդ հոդվածի 2-րդ մասով այն բանի համար, որ «նա, չունենալով տրանսպորտային միջոց վարելու իրավունք և գտնվելով հարբած (ոչ սթափ) վիճակում, վարել է տրանսպորտային միջոց:
Այսպես.
Արտյոմ Գագիկի Ապետյանը, չունենալով տրանսպորտային միջոց վարելու իրավունք և գտնվելով հարբած (ոչ սթափ) վիճակում՝ ալկոհոլի պարունակությունը արտաշնչած օդում 0.316 մգ/լ, 2024 թվականի դեկտեմբերի 15-ին՝ ժամը 12:55-ին Երևան քաղաքի Էրեբունու փողոցում վարել է «Վոլկսվագեն» մակնիշի 37 EY 133 հաշվառման համարանիշի ավտոմեքենան, ինչի վերաբերյալ ՀՀ ՆԳՆ ոստիկանության պարեկային ծառայության աշխատակցի կողմից կազմվել է վարչական իրավախախտման վերաբերյալ թիվ 8180424626 արձանագրությունը:»։
3. Դատաքննության ընթացքում հետազոտված թույլատրելի ապացույցները.
Հիմնական դատալսումների ընթացքում հետազոտված թույլատրելի ապացույցները.
- Արտյոմ Գագիկի Ապետյանը, օգտվելով իր սահմանադրական իրավունքից, հրաժարվեց ցուցմունք տալ։
Հրապարակվեց Արտյոմ Գագիկի Ապետյանի՝ նախաքննության ընթացքում տված ցուցմունքը, համաձայն որի՝ վերջինս ներկայացված մեղադրանքում իրեն մեղավոր է ճանաչել, զղջացել է կատարած արարքի համար և օգտվելով իր դատավարական իրավունքներից՝ հրաժարվել է ցուցմունք տալ և պատասխանել որևէ հարցի:
(դատական նիստի արձանագրություն, գ.թ. 39-42)
- 15.12.2024 թվականին՝ ժամը 01:25-ին, Երևան քաղաքի Էրեբունի փողոցում ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 1-ին վաշտի պարեկ Հայկ Մելիքյանի /կրծքանշան թիվ 08262/ կողմից կազմվել է վարչական իրավախախտման վերաբերյալ արձանագրություն, համաձայն որի՝ Արտյոմ Գագիկի Ապետյանը 15.12.2024 թվականին՝ ժամը 12:55-ին, չունենալով տրանսպորտային միջոցներ վարելու իրավունք՝ Երևան քաղաքի Էրեբունի փողոցում ոչ սթափ վիճակում վարել է «Վոլկսվագեն» մակնիշի 37 EY 133 հաշվառման համարանիշի տրանսպորտային միջոցը: Արձանագրության վարչական իրավախախտում կատարած անձի բացատրությունը և դիտողությունը նշելու հատվածում առկա է վարորդի ստորագրությունը, իսկ արձանագրությանը ծանոթացա, իմ իրավունքների ու պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումը ստանալու հատվածում առկա է ստորագրություն: Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր նշված է 203.5 թիվը:
Ալկոհոլի պարունակության ստուգման կտրոնի զննությամբ պարզվեց, որ ստուգաչափման սարքի համարն է՝ 91101199, զննման համարն է՝ 02437, զննման ամսաթիվն է՝ 15.12.2024 թվական, զննման ժամն է՝ 01:00:01, վերջին ստուգաչափման ամսաթիվն է՝ 13.08.2024 թվական, դատարկ թեստ՝ 0.000 մգ/լ, ստուգաչափման ձևաչափը՝ ավտոմատ, ալկոհոլի պարունակությունը՝ 0.316 մգ/լ, վարորդի անունն է՝ Արտյոմ, վարորդի ազգանունն է՝ Ապետյան, Պ/Ծ-ի ազգանունն է՝ Մելիքյան, կրծքանշանի համարն է՝ 08262, ստորաբաժանումն է՝ 1-ին գումարտակ, 1-ին վաշտ:
ՀՀ էկոնոմիկայի նախարարության «Ստանդարտացման և չափագիտության ազգային մարմին» ՓԲԸ-ի կողմից տրված թիվ 131490 ստուգաչափման վկայականի զննությամբ պարզվեց, որ վկայականը ուժի մեջ է 13.08.2024 թվականից մինչև 13.08.2025 թվականը, ստուգաչափման սարքի գործարանային համարն է 91101199 տեսակը՝ Jupiter X/RP, չափման տիրույթը /սխալանքը/ 0.000-2.000մգ/լ/, ճշտության դասը, կարգը / սխալանքը/ +- 10%, արտադրողը՝ Չինաստան, պատկանում է ՀՀ ՊԾ-ին, ստուգաչափումը կատարվել է հետևյալ ստուգաչափման մեթոդիկայի անվանման նշագրի` MU2835-2008 MП 242-1353-2012, ստուգաչափող անվան դիմաց առկա է ստորագրություն և նշված է Վ.Բաբաջանյան, իսկ բաժնի /լաբորատորիայի վարիչ/ անվան դիմաց առկա է ստորագրություն և նշված է Գ. Մարտիրոսյան:
ՀՀ ՆԳՆ ոստիկանության «Ճանապարհային ոստիկանություն» ծառայության էլեկտրոնային ռեգիստրից արտատպված վարորդական իրավունքի վկայական չունենալու վերաբերյալ քաղվածքի զննությամբ պարզվեց, որ Արտյոմ Գագիկի Ապետյանը վարորդական իրավունքի վկայականից զրկված է եղել, զրկման սկիզբն է եղել 22-07-2023 թվականը, զրկումը ավարտվել է 22-07-2024 թվականին, որից հետո վերջինս չի վերականգնել իր վարորդական վկայականը:
(դատական նիստի արձանագրություն, գ.թ. 15-16)
- 04.02.2025 թվականին նախաքննության մարմնի կողմից կազմված՝ ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 1-ին վաշտի պարեկ Հայկ Մելիքյանի կողմից 15.12.2024 թվականին կազմված վարչական իրավախախտման վերաբերյալ արձանագրությունը, ալկոհոլի պարունակության ստուգման թիվ 02437 կտրոնը, ստուգաչափման թիվ 131490 վկայականը, ՀՀ ՆԳՆ ոստիկանության «Ճանապարհային ոստիկանություն» ծառայության էլեկտրոնային ռեգիստրից արտատպված վարորդական իրավունքի վկայական չունենալու վերաբերյալ քաղվածքը արտավարութային փաստաթուղթ ճանաչելու մասին որոշումը:
(դատական նիստի արձանագրություն, գ.թ. 17-19)
Լրացուցիչ դատալսումների ընթացքում հետազոտված թույլատրելի ապացույցները.
 ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից ստացված տեղեկանքը, համաձայն որի՝ Արտյոմ Գագիկի Ապետյանը ունի դատվածություն:
 Դատարանի հարցմանն ի պատասխան՝ ՀՀ ԱՆ պրոբացիայի ծառայության Երևանի քաղաքային մարմնի պետի գրությունը, համաձայն որի՝ 25.04.2025 թվականին ՀՀ ԱՆ պրոբացիայի ծառայության Երևանի քաղաքային մարմնի կողմից ներկայացվել է միջնորդություն՝ Ա. Ապետյանի նկատմամբ Արարատի և Վայոց ձորի մարզերի առաջին ատյանի ընդհանուր իրավասության դատարանի 30.07.2024թ. թիվ ԱՎԴ2/0155/01/24 դատավճռով նշանակված 375.000 (երեք հարյուր յոթանասունհինգ հազար) ՀՀ դրամ տուգանքի չափին համարժեք գույք բռնագանձելու մասին:
 Միասնական էլեկտրոնային տեղեկատվական համակարգում կատարված հարցման պատասխանի համաձայն՝ ՊԵԿ տվյալների շտեմարանում Ա.Ապետյանի կողմից հանցանքը կատարելուն նախորդող տասներկու ամիսների ընթացքում ստացած եկամուտները կազմում են 49.128 (քառասունինը հազար հարյուր քսանութ) ՀՀ դրամ:
4. Դատարանի փաստական վերլուծությունները և հաստատված կամ հերքված փաստական հանգամանքները.
Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը գտնում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարելու, որ Արտյոմ Ապետյանը, չունենալով տրանսպորտային միջոց վարելու իրավունք և գտնվելով հարբած (ոչ սթափ) վիճակում՝ ալկոհոլի պարունակությունը արտաշնչած օդում 0.316 մգ/լ, 2024 թվականի դեկտեմբերի 15-ին՝ ժամը 12:55-ին Երևան քաղաքի Էրեբունու փողոցում վարել է «Վոլկսվագեն» մակնիշի, 37 EY 133 հաշվառման համարանիշի ավտոմեքենան, ինչի վերաբերյալ ՀՀ ՆԳՆ ոստիկանության պարեկային ծառայության աշխատակցի կողմից կազմվել է վարչական իրավախախտման վերաբերյալ թիվ 8180424626 արձանագրությունը:
Դատարանը գտնում է, որ դատավճռի հիմքում դրված՝ փոխկապակցված վերաբերելի, թույլատրելի, հավաստի ապացույցների ամբողջությունը բացառում է Արտյոմ Գագիկի Ապետյանին ներկայացված մեղադրանքի ապացուցվածության վերաբերյալ ցանկացած հիմնավոր կասկած։
Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները. Արտյոմ Գագիկի Ապետյանը ունի դատվածություն, առկա է դատական վարույթ՝ Ա. Ապետյանի նկատմամբ Արարատի և Վայոց ձորի մարզերի առաջին ատյանի ընդհանուր իրավասության դատարանի 30.07.2024թ. թիվ ԱՎԴ2/0155/01/24 դատավճռով նշանակված 375.000 (երեք հարյուր յոթանասունհինգ հազար) ՀՀ դրամ տուգանքի չափին համարժեք գույք բռնագանձելու մասին, մեղսագրվող հանցանքը ավարտվելու օրվան նախորդող 12 ամիսների ընթացքում վերջինիս ստացած ընդհանուր եկամուտը կազմել է 49.128 (քառասունինը հազար հարյուր քսանութ) ՀՀ դրամ, նրա ստացած միջին ամսական եկամուտի 35 տոկոսը պակաս է նվազագույն աշխատավարձի չափից։
5. Դատարանի իրավական վերլուծությունները, հետևությունները և որոշումները.
Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, Դատարանը հանգում է հետևության, որ ապացուցված է Արտյոմ Գագիկի Ապետյանին վերագրվող արարքը, այդ արարքի քրեական հակաիրավականությունը, այդ արարքը մեղադրյալի կողմից կատարելը, ինչպես նաև նրա մեղավորությունը տվյալ արարքի կատարման մեջ:
Դատարանը հանգում է այն հետևության, որ մեղադրյալ Արտյոմ Գագիկի Ապետյանը կատարել է իրեն մեղսագրված արարքը, որոնց նկատմամբ կիրառելի է ՀՀ քրեական օրենսգրքի 344-րդ հոդվածի 2-րդ մասը:
Դատարանը, հաստատված համարելով հանցագործության և դրա կատարման մեջ Արտյոմ Գագիկի Ապետյանի մեղքի ապացուցված լինելը, գտնում է, որ նա ենթակա է պատժի կատարած հանցանքի համար:
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, գտնում է, որ Արտյոմ Գագիկի Ապետյանի պատասխանատվությունն ու պատիժը մեղմացնող հանգամանք պետք է դիտել ներկայացված մեղադրանքում իրեն լիովին մեղավոր ճանաչելը և կատարածի համար զղջալը (Դատարանի նման մոտեցումը համահունչ է Սերոբ Սարգսյանի գործով 2012 թվականի նոյեմբերի 1-ի թիվ ՍԴ/0109/01/12 որոշման 27-րդ կետում ՀՀ վճռաբեկ դատարանի արտահայտած իրավական դիրքորոշմանը:
Դատարանն արձանագրում է, որ Արտյոմ Գագիկի Ապետյանի պատասխանատվությունն ու պատիժը ծանրացնող հանգամանք պետք է համարել հանցանքը դատվածություն ունեցող անձի կողմից կատարելը:
Դատարանը, հաշվի առնելով Արտյոմ Գագիկի Ապետյանի կատարած հանցանքի հանգամանքները, նրա անձը բնութագրող տվյալները, պատասխանատվությունը և պատիժը մեղմացնող հանգամանքը, պատասխանատվությունը և պատիժը ծանրացնող հանգամանքը, ՀՀ քրեական օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ ՀՀ քրեական օրենսգրքի 344-րդ հոդվածի 2-րդ մասի սանկցիայով որպես հիմնական պատիժ է նախատեսված նաև տուգանքի ձևով և ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար նշված հանցագործությունների կատարման համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ ՀՀ քրեական օրենսգրքի 344-րդ հոդվածի 2-րդ մասով հիմնական պատիժ պետք է նշանակել տուգանքի ձևով, ընդ որում տուգանքի չափ սահմանելով՝ նվազագույն աշխատավարձի յոթապատիկի՝ 525.000 (հինգ հարյուր քսանհինգ հազար) ՀՀ դրամ գումարի չափով։
Անդրադառնալով սույն քրեական գործով ՀՀ քրեական օրենսգրքի 75-րդ հոդվածի կիրառման հնարավորությանը՝ Դատարանը գտնում է, որ նշված հոդվածի կանոններով Արտյոմ Գագիկի Ապետյանի նկատմամբ սույն դատավճռով նշանակված պատժին թիվ ԱՎԴ2/0155/01/24 քրեական գործով նշանակված պատիժը լրիվ կամ մասնակիորեն գումարելը բացասաբար կանդրադառնա այդ քրեական գործով տուգանքի ձևով նշանակված պատժի կատարման վրա, քանի որ այն արդեն իսկ գտնվում է կատարման մեկ այլ՝ տուգանքի բռնագանձման փուլում, իսկ պատիժները գումարելն անխուսափելիորեն կհանգեցնի այդ գործընթացի կասեցմանը։
Վերոգրյալի պայմաններում Դատարանը գտնում է, որ սույն քրեական գործով պատիժ նշանակելիս պետք է չկիրառել ՀՀ քրեական օրենսգրքի 75-րդ հոդվածի 1-ին մասը և սույն դատավճռով նշանակվող պատժին պետք է չգումարել թիվ ԱՎԴ2/0155/01/24 քրեական գործով Արտյոմ Գագիկի Ապետյանի նկատմամբ տուգանքի ձևով նշանակված պատիժը:
Դատարանը միաժամանակ գտնում է, որ կատարած հանցանքի համար Արտյոմ Գագիկի Ապետյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
Միաժամանակ հաշվի առնելով վերջինիս գույքային դրության վերաբերյալ գործում առկա տվյալները և մեղադրյալի հայտարարությունը՝ Դատարանը գտնում է, որ Արտյոմ Գագիկի Ապետյանի նկատմամբ նշանակվող տուգանքի վճարումը պետք է տարաժամկետել և նրան թույլատրել որպես պատիժ նշանակված 525.000 (հինգ հարյուր քսանհինգ հազար) ՀՀ դրամի չափով տուգանքը վճարել մաս առ մաս 6 (վեց) ամսվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Դատարանը, անդրադառնալով ՀՀ քրեական դատավարության 348-րդ հոդվածով նախատեսված՝ դատավճիռ կայացնելիս դատարանի լուծմանը ենթակա մյուս հարցերին, արձանագրում է, որ գործով իրեղեն ապացույցներ չկան, գույքային հայց ներկայացված չէ, առկա չէ նաև հատուցման ենթակա գույքային այլ վնաս և դրա ապահովման նպատակով արգելադրված որևէ գույք, քրեական վարույթով առկա չեն նաև վարութային ծախսեր:
Անդրադառնալով մեղադրյալի նկատմամբ ընտրված խափանման միջոցի հարցին՝ Դատարանն արձանագրում է, որ վերջինիս նկատմամբ որպես խափանման միջոց ընտրված բացակայելու արգելքը պետք է թողնել անփոփոխ՝ մինչև դատավճռի օրինական ուժի մեջ մտնելը, իսկ դրանից հետո պետք է վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 167-րդ, 347-350-րդ և 352-353-րդ հոդվածներով` Դատարանը

ՎՃՌԵՑ

Արտյոմ Գագիկի Ապետյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության կատարման մեջ և նրա նկատմամբ պատիժ նշանակել տուգանք՝ նվազագույն աշխատավարձի յոթապատիկի՝ 525.000 (հինգ հարյուր քսանհինգ հազար) ՀՀ դրամի չափով:
Արտյոմ Գագիկի Ապետյանին թույլատրել որպես պատիժ նշանակված 525.000 (հինգ հարյուր քսանհինգ հազար) ՀՀ դրամի չափով տուգանքը վճարել մաս առ մաս 6 (ամսվա) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Արտյոմ Գագիկի Ապետյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել։
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում:




ԴԱՏԱՎՈՐ ՏԱԹԵՎԻԿ ՄՈՒՐԱԴՅԱՆ