ԵԴ1/0668/01/25





Ո Ր Ո Շ ՈՒ Մ
Քրեական վարույթ սկսելը մերժելու մասին

Երևան քաղաքի առաջին ատյանի ընդհանուր իրավասության քրեական դատարանի դատավոր Ս.Գզոգյանս, 2025 թվականի մարտի 4-ին Երևան քաղաքում, քննարկելով թիվ Ռաֆիկ Գևորգյանի կողմից ներկայացրած քրեական հայցը,

Պ Ա Ր Զ Ե Ց Ի

2025 թվականի փետրվարի 27-ին Դատարան է ստացվել Ռաֆիկ Գևորգյանի կողմից ներկայացրած քրեական հայցը։
ՀՀ քրեական դատավարության 451-րդ հոդվածի համաձայն՝ 1. Մասնավոր մեղադրանքով վարույթը կարող է նախաձեռնվել այն դեպքում, երբ այն անձը, որը բավարար հիմքեր ունի ենթադրելու, որ Հայաստանի Հանրապետության քրեական օրենսգրքի 15-րդ հոդվածի 1-ին մասով նախատեuված արարքներով իրեն պատճառվել է վնաս, քրեական հայց է ներկայացնում դատարան:
2. Քրեական հայցը կարող է ներկայացնել միայն սույն հոդվածի 1-ին մասով նախատեսված անձը կամ նրա օրինական ներկայացուցիչը:
3. Քրեական հայցը պետք է բովանդակի՝
1) սույն հոդվածի 1-ին մասով նախատեսված անձի անունը, ազգանունը և բնակության կամ հաշվառման վայրը.
2) այն անձի անունը, ազգանունը և բնակության կամ հաշվառման վայրը, որի դեմ ներկայացվել է քրեական հայցը.
3) մեղադրանքի բովանդակությունը, այդ թվում՝ քրեական օրենսգրքի համապատասխան հոդվածը կամ հոդվածի մասը.
4) այն անձանց անունները, ազգանուններն ու բնակության կամ հաշվառման վայրերը, որոնք պետք է կանչվեն դատական նիստին.
5) մեղադրանքը հիմնավորող նյութերը:
4. Սույն հոդվածի 2-րդ մասով նախատեսված անձը քրեական հայցը ներկայացնում է ենթադրյալ հանցանքի կատարման վայրի առաջին ատյանի դատարան:
5. Մասնավոր մեղադրանքով մինչդատական վարույթն իրականացվում է բացառապես ենթադրյալ հանցանք կատարած անձին հայտնաբերելու համար:
ՀՀ քրեական դատավարության 452-րդ հոդվածի համաձայն՝ 1. Քրեական հայցն ստանալուց հետո դատավորը ստուգում է՝ արդյոք պահպանվել են սույն օրենսգրքի 451-րդ հոդվածի 3-րդ մասով սահմանված` քրեական հայցին ներկայացվող պահանջները, արդյոք քրեական հայցում նկարագրված փաստական հանգամանքների կապակցությամբ քրեական հետապնդումը կարող է իրականացվել մասնավոր կարգով, և հնգօրյա ժամկետում կայացնում է հետևյալ որոշումներից մեկը․
1) քրեական վարույթ սկսելու մասին.
2) քրեական հայցը վերադարձնելու մասին.
3) քրեական հայցը և կից նյութերն ըստ ընդդատության ուղարկելու մասին.
4) քրեական վարույթ սկսելը մերժելու մասին:
2. Քրեական հայցը, համապատասխան թերությունները մատնանշելով, առնվազն հինգ օր ժամկետով վերադարձվում է, եթե դրանում առկա են շտկելի թերություններ:
3. Քրեական հայցը և կից նյութերն ուղարկվում են ըստ ընդդատության, եթե պարզվում է, որ ենթադրյալ հանցանքի կատարման վայրը դուրս է տվյալ դատարանի դատական տարածքից:
4. Քրեական վարույթ սկսելը մերժվում է, եթե`
1) ենթադրյալ հանցանք կատարած անձը հայտնի չէ.
2) քրեական հայցում նկարագրված փաստական հանգամանքներն ակնհայտորեն հանցավոր չեն.
3) քրեական հայցում նկարագրված փաստական հանգամանքների կապակցությամբ քրեական հետապնդումը կարող է իրականացվել միայն հանրային կարգով.
4) դատարանի սահմանած ժամկետում քրեական հայցի թերությունները չեն վերացվել, կամ այն վերստին չի ներկայացվել»։
Ուսումնասիրելով քրեական հայցը և կից ներկայացված նյութերը, հիմք ընդունելով վերը մեջբերված իրավական նորմերը, գտնում եմ, որ Ռաֆիկ Գևորգյանի կողմից ներկայացված քրեական հայցով քրեական վարույթ սկսելը ենթակա է մերժման, քանի որ նախ հստակեցված չէ ենթադրյալ հանցանք կատարած անձը, բացի այդ, քրեական հայցում նկարագրված փաստական հանգամանքներն ակնհայտորեն հանցավոր չեն, քանի որ ըստ ներկայացված նյութերի՝ դեպքը տեղի է ունեցել 1988-1989 թվականերին, ինչը ենթադրում է, որ առերևույթ անցել են նաև հնարավոր հանցավոր անձին քրեական պատասխանատվության ենթարկելու վաղեմության ժամկետները։
Ամփոփելով վերոգրյալը՝ գտնում եմ, որ Ռաֆիկ Գևորգյանի կողմից չեն պահպանվել ՀՀ քրեական դատավարության օրենսգրքի 452-րդ հոդվածի 4-րդ մասով սահմանված պայմանները, ուստի քրեական հայցի կապակցությամբ քրեական վարույթ սկսելը ենթակա է մերժման:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 33-րդ և 451-452-րդ հոդվածներով՝
Ո Ր Ո Շ Ե Ց Ի

Ռաֆիկ Գևորգյանի ներկայացրած քրեական հայցի հիման վրա քրեական վարույթ սկսելը ենթակա է մերժման:
Որոշումը հատուկ վերանայման կարգով կարող է բողոքարկվել ՀՀ վերաքննիչ քրեական դատարան` ստանալու օրվանից հետո տասնօրյա ժամկետում:


ԴԱՏԱՎՈՐ` Ս.ԳԶՈԳՅԱՆ