ԵԴ1/0647/01/25






Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

Հայաստանի Հանրապետության Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան),

Նախագահող դատավոր Ս.ԳԶՈԳՅԱՆԻ
քարտուղարությամբ Լ.ՉՈԲԱՆՅԱՆԻ
մասնակցությամբ
հանրային մեղադրող Գ․ՄՈՒՐԱԴՅԱՆԻ
տուժող Ա․ԱԼԻԽԱՆՅԱՆԻ
պաշտպան Մ․ԱՂԱԲԵԿՅԱՆԻ
մեղադրյալ Ա․ԹՈՐՈԶՅԱՆԻ


2025 թվականի հուլիսի 16-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի`
Արկադի Արարատի Թորոզյանի՝ ծնված 1962 թվականի փետրվարի 19-ին, Գորիս քաղաքում, հայ, ՀՀ քաղաքացի, միջնակարգ կրթությամբ, փաստացի ամուսնալուծված, խնամքին երկու անչափահաս երեխա, չի աշխատում, դատվածություն չունեցող, հաշվառված է՝ ք․Երևան, Արին Բերդ փողոց 5 տուն հասցեում, բնակվում է ք․Երևան, Արին Բերդ փողոց 10/3 տուն հասցեում, մեղադրանք է առաջադրվել ՀՀ քրեական օրենսգրքի 194-րդ հոդվածի 2-րդ մասի 4-րդ կետով, 4 դրվագ 195-րդ հոդվածի 2-րդ մասի 6-րդ կետով և 171-րդ հոդվածի 2-րդ մասի 6-րդ կետով, որպես խափանման միջոց է ընտրվել բացակայելու արգելքը,





ՊԱՐԶԵՑ

1.Գործի դատավարական նախապատմությունը
2023 թվականի հուլիսի 8-ին ՀՀ քրեական օրենսգրքի 194-րդ հոդվածի 2-րդ մասի 4-րդ կետի հատկանիշներով նախաձեռնվել է թիվ 12192523 քրեական վարույթ:
2023 թվականի օգոստոսի 27-ին ՀՀ քրեական օրենսգրքի 195-րդ հոդվածի 2-րդ մասի 6-րդ կետի հատկանիշներով նախաձեռնվել է թիվ 12820823 քրեական վարույթ:
Նախաքննության մարմնի 2023 թվականի հուլիսի 11-ի և օգոստոսի 27-ի և 2024 թվականի նոյեմբերի 6-ի որոշումներով Անուշ Վալերիկի Ալիխանյանը ճանաչվել է տուժող։
Նախաքննության մարմնի 2023 թվականի հոկտեմբերի 31-ի որոշմամբ թիվ 12192523 քրեական վարույթը միացվել է թիվ 12820823 քրեկան վարույթին և նախաքննությունը շարունակվել է թիվ 12820823 համարով։
2024 թվականի նոյեմբերի 6-ին ՀՀ քրեական օրենսգրքի 195-րդ հոդվածի 2-րդ մասի 6-րդ կետի հատկանիշներով նախաձեռնվել է թիվ 12197124 քրեական վարույթ:
Նախաքննության մարմնի 2023 թվականի նոյեմբերի 22-ի որոշմամբ թիվ 12197124 քրեական վարույթը միացվել է թիվ 12820823 քրեկան վարույթին և նախաքննությունը շարունակվել է թիվ 12820823 համարով։
Նախաքննության մարմնի 2024 թվականի դեկտեմբերի 2-ի որոշմամբ Արկադի Արարատի Թորոզյանի նկատմամբ քրեական հետապնդում է հարուցվել 2 դրվագ ՀՀ քրեական օրենսգրքի 195-րդ հոդվածի 2-րդ մասի 6-րդ կետով և 194-րդ հոդվածի 2-րդ մասի 4-րդ կետով։
Նախաքննության մրմնի 2024 թվականի դեկտեմբերի 10-ի որոշմամբ Արկադի Արարատի Թորոզյանը ձերբակալվել է։
Նախաքննության մարմնի 2024 դեկտեմբերի 10-ի մեկ այլ որոշմամբ Արկադի Արարատի Թորոզյանի նկատմամբ խափանման միջոց է ընտրվել վարչական հսկողությունը։
Երևան քաղաքի առաջին ատյանի ընդհանուր իրավասության քրեական դատարանի 2024 թվականի դեկտեմբերի 11-ի որոշմամբ Արկադի Արարատի Թորոզյանի նկատմամբ վարչական հսկողությունը որպես խափանման միջոց կիրառելու վերաբերյալ, մերժվել է։
Նախաքննության մարմնի 2024 դեկտեմբերի 11-ի մեկ այլ որոշմամբ Արկադի Արարատի Թորոզյանի նկատմամբ խափանման միջոց է ընտրվել բացակայելու արգելքը։
2025 թվականի փետրվարի 20-ին ՀՀ քրեական օրենսգրքի 195-րդ հոդվածի 2-րդ մասի 6-րդ կետի հատկանիշներով նախաձեռնվել է թիվ 12127925 քրեական վարույթ:
Նախաքննության մարմնի 2025 թվականի փետրվարի 20-ի որոշմամբ թիվ 12127925 քրեական վարույթը միացվել է թիվ 12820823 քրեկան վարույթին և նախաքննությունը շարունակվել է թիվ 12820823 համարով։
Նախաքննության մարմնի 2025 թվականի փետրվարի 21-ի որոշմամբ Արկադի Արարատի Թորոզյանի նկատմամբ քրեական հետապնդում է հարուցվել 3 դրվագ ՀՀ քրեական օրենսգրքի 195-րդ հոդվածի 2-րդ մասի 6-րդ կետով և 194-րդ հոդվածի 2-րդ մասի 4-րդ կետով այն արարքների համար, որ նա, հանդիսանալով Անուշ Վալերիկի Ալիխանյանի մերձավոր ազգականը վերջինիս նկատմամբ 3 դրվագ գործադրել է ֆիզիկական և 1 դրվագ՝ հոգեկան ներգործություն:
Այսպես.
Արկադի Արարատի Թորոզյանը 2023թ. հուլիսի 8-ին՝ ժամը 15:20-ի սահմաններում Երևան քաղաքի Արին Բերդ փողոցի 5 տանը վիճաբանել է իր հետ համատեղ բնակվող կնոջ Անուշ Ալիխանյանի հետ և հանդիսանալով վերջինիս մերձավոր ազգականը՝ սպառնացել է, որ դանակով մորթելով կսպանի նրան և այդ կերպ իրականացնելու իրական վտանգի առկայությամբ նրա նկատմամբ սպանության սպառնալիք հնչեցնելով հոգեկան ներգործություն է գործադրել նրա նկատմամբ:
Այսինքն՝ Արկադի Արարատի Թորոզյանը կատարել է հանցագործություն նախատեսված ՀՀ քրեական օրենսգրքի 194-րդ հոդվածի 2-րդ մասի 4-րդ կետով:
Բացի այդ, Արկադի Արարատի Թորոզյանը 2023թ. օգոստոսի 26-ին՝ ժամը 22:00-ի սահմաններում Երևան քաղաքի Արին Բերդ փողոցի 5 տանը վիճաբանել է իր հետ համատեղ բնակվող կնոջ՝ Անուշ Ալիխանյանի հետ և հանդիսանալով վերջինիս մերձավոր ազգականը՝ ձեռքերով հարվածներ է հասցրել նրա դեմքին և այդ կերպ ֆիզիկական ցավ պատճառելով ֆիզիկական ներգործություն է գործադրել նրա նկատմամբ։
Այսինքն՝ Արկադի Արարատի Թորոզյանը կատարել է հանցագործություն նախատեսված ՀՀ քրեական օրենսգրքի 195-րդ հոդվածի 2-րդ մասի 6-րդ կետով։
Այնուհետև, Արկադի Արարատի Թորոզյանը 2024թ. նոյեմբերի 6-ին՝ ժամը 15:30-ի սահմաններում Երևան քաղաքի Արին Բերդ փողոցի 10/3 տանը վիճաբանել է իր հետ համատեղ բնակվող կնոջ՝ Անուշ Ալիխանյանի հետ և հանդիսանալով վերջինիս մերձավոր ազգականը՝ ձեռքերով հարվածներ է հասցրել նրա մարմնի տարբեր մասերին և այդ կերպ ֆիզիկական ցավ պատճառելով ֆիզիկական ներգործություն է գործադրել նրա նկատմամբ:
Այսինքն՝ Արկադի Արարատի Թորոզյանը կատարել է հանցագործություն նախատեսված ՀՀ քրեական օրենսգրքի 195-րդ հոդվածի 2-րդ մասի 6-րդ կետով:
Այս ամենից հետո, Արկադի Արարատի Թորոզյանը 2025թ. հունվարի 8-ին՝ ժամը 02:30-ից 03.00-ի սահմաններում Երևան քաղաքի Արին Բերդ փողոցի 10/3 տանը վիճաբանել է իր հետ համատեղ բնակվող կնոջ՝ Անուշ Ալիխանյանի հետ, հանդիսանալով վերջինիս մերձավոր ազգականը՝ հարվածել հատակին է գցել կնոջը, ապա շարունակել է հարվածներ հասցնել նրա մարմնի տարբեր մասերին և այդ կերպ ֆիզիկական ցավ պատճառելով ֆիզիկական ներգործություն է գործադրել նրա նկատմամբ։
Այսինքն՝ Արկադի Արարատի Թորոզյանը կատարել է հանցագործություն նախատեսված ՀՀ քրեական օրենսգրքի 195-րդ հոդվածի 2-րդ մասի 6-րդ կետով:
Այսպիսով Արկադի Արարատի Թորոզյանին մեղսագրվում են 3 դրվագ ՀՀ քրեական օրենսգրքի 195-րդ հոդվածի 2-րդ մասի 6-րդ կետով և 1 դրվագ ՀՀ քրեական օրենսգրքի 194-րդ հոդվածի 2-րդ մասի 4-րդ կետով նախատեսված հանցագործությունների կատարում::
2025 թվականի մարտի 3-ին ՀՀ քրեական օրենսգրքի 195-րդ հոդվածի 2-րդ մասի 6-րդ կետի հատկանիշներով նախաձեռնվել է թիվ 12135325 քրեական վարույթ:
Նախաքննության մարմնի 2025 թվականի մարտի 3-ի և մարտի 12-ի որոշումներով Անուշ Վալերիկի Ալիխանյանը ճանաչվել է տուժող։
2025 թվականի մարտի 12-ին ՀՀ քրեական օրենսգրքի 195-րդ հոդվածի 2-րդ մասի 6-րդ կետի և 508-րդ հոդվածի 1-ին մասի հատկանիշներով նախաձեռնվել է թիվ 12139925 քրեական վարույթ:
Նախաքննության մարմնի 2025 թվականի մարտի 12-ի որոշմամբ Արկադի Արարատի Թորոզյանը ձերբակալվել է։
Նախաքննության մարմնի 2025 թվականի մարտի 13-ի որոշմամբ թիվ 12139925 քրեական վարույթը միացվել է թիվ 12135325 քրեկան վարույթին և նախաքննությունը շարունակվել է թիվ 12135325 համարով։
Նախաքննության մարմնի 2025 թվականի մարտի 13-ի որոշմամբ Անուշ Ալիխանյանը ճանաչվել է վկա Մաքս և Ալեքս Ալիխանյանների օրինական ներկայացուցիչ։
Նախաքննության մարմնի 2025 թվականի մարտի 14-ի որոշմամբ Արկադի Արարատի Թորոզյանի նկատմամբ քրեական հետապնդում է հարուցվել ՀՀ քրեական օրենսգրքի 195-րդ հոդվածի 2-րդ մասի 6-րդ կետով և 171-րդ հոդվածի 2-րդ մասի 6-րդ կետով:
Երևան քաղաքի առաջին ատյանի ընդհանուր իրավասության քրեական դատարանի 2025 թվականի մարտի 14-ի որոշմամբ Արկադի Արարատի Թորոզյանի նկատմամբ որպես խափանման միջոց է կիրառվել վարչական հսկողությունը։
Նախաքննության մարմնի 2025 թվականի մայիսի 30-ի որոշմամբ Արկադի Արարատի Թորոզյանի նկատմամբ քրեական հետապնդում է հարուցվել ՀՀ քրեական օրենսգրքի 195-րդ հոդվածի 2-րդ մասի 6-րդ կետով և 171-րդ հոդվածի 2-րդ մասի 6-րդ կետով այն արարքների համար, որ նա, հանդիսանալով Անուշ Վալերիկի Ալիխանյանի մերձավոր ազգականը վերջինիս նկատմամբ գործադրել է ֆիզիկական ներգործություն, բացի այդ նրա առողջությանը պատճառել է թեթև վնաս:
Այսպես.
Արկադի Արարատի Թորոզյանը 2025թ. մարտի 2-ին՝ ժամը 23:00-ի սահմաններում, Երևան քաղաքի Արին Բերդ փողոցի 10/3 շենքի 2-րդ բնակարանում վիճաբանել է իր հետ համատեղ բնակվող կնոջ՝ Անուշ Ալիխանյանի հետ և հանդիսանալով վերջինիս մերձավոր ազգականը՝ ձեռքերով հարվածներ է հասցրել նրա գլխին և մարմնի այլ մասերին՝ այդ կերպ ֆիզիկական ցավ և աջ բազկի մ/3-ի առաջադրսային մակերեսի քերծվածքների և արյունազեղման ձևով առողջության թեթև վնասի հատկանիշներ չպարունակող մարմնական վնասվածքներ պատճառելով ֆիզիկական ներգործություն է գործադրել նրա նկատմամբ:
Այսինքն՝ Արկադի Արարատի Թորոզյանը կատարել է հանցագործություն նախատեսված ՀՀ քրեական օրենսգրքի 195-րդ հոդվածի 2-րդ մասի 6-րդ կետով:
Այնուհետև, Արկադի Արարատի Թորոզյանը 2025թ. մարտի 12-ին՝ ժամը 17.00-ի սահմաններում, Երևան քաղաքի Արին Բերդ փողոցի 28 հասցեում վիճաբանել է իր կնոջ՝ Անուշ Ալիխանյանի հետ և հանդիսանալով վերջինիս մերձավոր ազգականը՝ ձեռքերով հարվածներ է հասցրել նրա գլխին, դեմքին և մարմնի տարբեր մասերին ինչի արդյունքում Անուշ Ալիխանյանին պատճառել է քթոսկրերի բեկորային կոտրվածքի, քթիմեջքային շրջանի փափուկ սալջարդի, զույգ ստորին կոպերի արյունազեղումների ձևով առողջությանը թեթև վնասի հատկանիշներ պարունակող մարմնական վնասվածքներ:
Այսինքն՝ Արկադի Արարատի Թորոզյանը կատարել է հանցագործություն նախատեսված ՀՀ քրեական օրենսգրքի 171-րդ հոդվածի 2-րդ մասի 6-րդ կետով:
Այսպիսով Արկադի Արարատի Թորոզյանին մեղսագրվում են ՀՀ քրեական օրենսգրքի 195-րդ հոդվածի 2-րդ մասի 6-րդ կետով և ՀՀ քրեական օրենսգրքի 171-րդ հոդվածի 2-րդ մասի 6-րդ կետով նախատեսված հանցագործությունների կատարում::
2025 թվականի փետրվարի 25-ին քրեական գործը մեղադրական եզրակացությամբ ստացվել է Երևան քաղաքի առաջին ատյանի ընդհանուր իրավասության քրեական դատարանում, գործին շնորհվել է ԵԴ1/0647/01/25 համարը:
2025 թվականի փետրվարի 27-ին Դատարանի դատավոր Ս.Գզոգյանը որոշում է կայացրել վարույթը ստանձնելու և նախնական դատալսումներ նշանակելու մասին։
2025 թվականի հունիսի 4-ին քրեական գործը մեղադրական եզրակացությամբ ստացվել է Երևան քաղաքի առաջին ատյանի ընդհանուր իրավասության քրեական դատարանում, գործին շնորհվել է ԵԴ1/1888/01/25 համարը:

2025 թվականի հունիսի 9-ին Դատարանի դատավոր Ա.Կարապետյանը որոշում է կայացրել վարույթը ստանձնելու և նախնական դատալսումներ նշանակելու մասին։
Երևան քաղաքի առաջին ատյանի ընդհանուր իրավասության քրեական դատարանի նախագահ Մ․Մարտիրոսյանի 2025 թվականի հուլիսի 14-ի գրության համաձայն՝ թիվ ԵԴ1/1888/01/25 քրեական գործը միացվել է թիվ ԵԴ1/0647/01/25 քրեական գործին։

2․ Արագացված վարույթ
Նախնական դատալսումների ընթացքում մեղադրյալ Արկադի Արարատի Թորոզյանը միջնորդել է կիրառել արագացված վարույթ:
Պաշտպան Մ․Աղաբեկյանը հայտարարել է, որ իր կողմից մեղադրյալին պարզաբանվել են արագացված վարույթ կիրառելու հետևանքները և միանում է միջնորդությանը։
Հանրային մեղադրողը, արագացված վարույթ կիրառելու վերաբերյալ միջնորդության դեմ առարկություն չի ներկայացրել և, ղեկավարվելով ՀՀ քրեական դատավարության օրենսգրքի 464․2-րդ հոդվածի 2-րդ մասով, ներկայացրել է մեղադրանքի փաստական հիմքը և մեղադրյալին վերագրվող արարքի իրավական որակումը:
Մեղադրյալը հայտարարել է, որ իրեն պարզ է ներկայացված մեղադրանքը, համաձայն է մեղադրանքի հետ, պնդում է արագացված վարույթ կիրառելու մասին իր միջնորդությունը, այն ներկայացրել է կամավոր, խորհրդակցել է պաշտպանի հետ, գիտակցում է արագացված վարույթ կիրառելու հետևանքները:
Տուժող Ա․Ալիխանյանը հայտնել է, որ Արկադի Թորոզյանի նկատմամբ որևէ բողոք պահանջ չունի և չի առակում, որ գործի քննությունն իրականացվի արագացված վարույթով և չի ցանկանում, որ նա ենթարկվի խիստ քրեական պատասխանատվության։
Դատարանը, փաստելով, որ առկա է սույն օրենսգրքի 464.1-ին հոդվածի 1-ին մասով նախատեսված հիմքը, բացակայում են սույն օրենսգրքի 464.1-ին հոդվածի 2-րդ մասով նախատեսված` արագացված վարույթի կիրառումը բացառող հանգամանքները, որոշում է կայացրել արագացված վարույթ կիրառելու մասին միջնորդությունը բավարարելու և լրացուցիչ դատալսումներ անցկացնելու վերաբերյալ:


3․ Դատարանի իրավական վերլուծությունները
Առաջադրված մեղադրանքը մեղադրյալ Արկադի Արարատի Թորոզյանի կողմից ընդունելու և արագացված վարույթ կիրառելու պայմաններում Դատարանը գտնում է, որ մեղադրյալ Արկադի Թորոզյանի կողմից տուժողին՝ իր կնոջը, ծեծելը, մի քանի անգամ ֆիզիկական ուժեղ ցավ պատճառելը և նրա առողջությանը թեթև վնաս պատճառելն ապացուցված է, այդ արարքները ճիշտ են որակված և համապատասխանում է ՀՀ քրեական օրենսգրքի 194-րդ հոդվածի 2-րդ մասի 4-րդ կետի, ՀՀ քրեական օրենսգրքի 171-րդ հոդվածի 2-րդ մասի 6-րդ կետի և 4 դրվագ ՀՀ քրեական օրենսգրքի 195-րդ հոդվածի 2-րդ մասի 6-րդ կետի հատկանիշներին։
ՀՀ քրեական օրենսգրքի 77-րդ հոդվածի համաձայն՝ «(․․․) 4.1. Արագացված վարույթ կիրառելու դեպքում պատիժը չի կարող գերազանցել սույն օրենսգրքի Հատուկ մասի համապատասխան հոդվածի սանկցիայով նախատեսված առավել խիստ պատժատեսակի համար նախատեսված առավելագույն չափի կամ ժամկետի երեք քառորդը։ Եթե առավել խիստ պատժատեսակի երեք քառորդը պակաս է ստացվում սույն օրենսգրքի Հատուկ մասի համապատասխան հոդվածի սանկցիայով նախատեսված առավել խիստ պատժատեսակի նվազագույն չափից կամ ժամկետից, ապա այն չի կարող պակաս լինել նվազագույն չափից կամ ժամկետից։(․․․)»։
Միևնույն ժամանակ, Դատարանն աձանագրում է, որ անձի նկատմամբ պատժի տեսակ և չափ ընտրելիս, ինչպես նաև այն կրելու նպատակահարմարության հարցը լուծելիս պետք է ղեկավարվել ՀՀ քրեական օրենսգրքի մի շարք դրույթներով:
ՀՀ քրեական օրենսգրքի 55-րդ հոդվածի 2-րդ մասի համաձայն՝ «2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները»։
ՀՀ քրեական օրենսգրքի 69-րդ հոդվածի համաձայն՝ «1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ։ (․․․)»։
ՀՀ վճռաբեկ դատարանի ձևավորած կայուն նախադեպային իրավունքի համաձայն՝ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ: Պատիժն արդարացի է, եթե համաչափ է կատարված հանցագործությանը, ինչպես նաև բավարար պատժի նպատակներին հասնելու տեսանկյունից: Պատժի արդարության պահանջներից նահանջելը կարող է հանգեցնել չափազանց մեղմ կամ չափազանց խիստ պատժի նշանակման: Քրեական օրենքը համընդհանուր բնույթ ունի, իսկ արարքը և այն կատարող անձը կոնկրետ են: Հետևաբար կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի, այն կատարող անձի, պատիժը մեղմացնող և ծանրացնող հանգամանքների վերլուծության հիման վրա: Նշված հանգամանքների գնահատման ժամանակ դատարանը պետք է ելնի ՀՀ քրեական օրենսգրքի 48-րդ հոդվածով նախատեսված՝ պատժի նպատակների իրացումն ապահովելու անհրաժեշտությունից (տե՛ս ՀՀ վճռաբեկ դատարանի՝ թիվ ԵՇԴ/0029/01/08, ԱՎԴ2/0059/01/08, ԵԱՔԴ/0078/01/09, ԵԿԴ/0042/01/11 որոշումները)։
Այսպես` Դատարանը մեղադրյալ Ա․Թորոզյանի նկատմամբ պատիժ նշանակելիս հաշվի է առնում նրան մեղսագրված հանցագործության՝ հանրության համար վտանգավորության աստիճանն ու բնույթը, այդ թվում՝ հանցանքի կատարման հանգամանքները և եղանակը, թմրամիջոցի տեսակը և չափը, ինչպես նաև խախտված հասարակական հարաբերության սոցիալական նշանակությունը:
Դատարանը մեղադրյալ Ա․Թորոզյանի նկատմամբ պատիժ նշանակելիս հաշվի է առնում նաև նրա անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Մասնավորապես, Դատարանը, որպես Ա․Թորոզյանի անձը բնութագրող տվյալ հաշվի է առնում այն, որ նա դատվածություն չունի։
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, որպես մեղադրյալ Ա․Թորոզյանի պատասխանատվությունն ու պատիժը մեղմացնող հանգամանք հաշվի է առնում այն, որ նա իրեն լիովին մեղավոր է ճանաչել և տվել խոստովանական ցուցմունքներ, անկեղծորեն զղջացել է կատարած արարքի համար:
Դատարանը, արձանագրում է, որ մեղադրյալ Ա․Թորոզյանի պատասխանատվությունն ու պատիժը ծանրացնող հանգամանքներ առկա չեն:
Դատարանը, հաշվի առնելով մեղադրյալ Ա․Թորոզյանի կատարած արարքների՝ հանրության համար վտանգավորության աստիճանն ու բնույթը, նրա անձը բնութագրող, պատասխանատվությունը և պատիժը մեղմացնող հանգամանքները, գտնում է, որ մեղադրյալ Ա․Թորոզյանն իր կատարած ՀՀ քրեական օրենսգրքի 194-րդ հոդվածի 2-րդ մասի 4-րդ կետով, 171-րդ հոդվածի 2-րդ մասի 6-րդ կետով և 4 դրվագ ՀՀ քրեական օրենսգրքի 195-րդ հոդվածի 2-րդ մասի 6-րդ կետով նախատեսված հանցագործության համար ենթակա է պատժի ազատության սահմանափակման ձևով։ Այսպես՝ ՀՀ քրեական օրենսգրքի 194-րդ հոդվածի 2-րդ մասի 4-րդ կետով՝ ազատության սահմանափակում՝ 6 (վեց) ամիս ժամկետով։ ՀՀ քրեական օրենսգրքի 195-րդ հոդվածի 2-րդ մասի 6-րդ կետով՝ ազատության սահմանափակում՝ 6 (վեց) ամիս ժամկետով, ՀՀ քրեական օրենսգրքի 195-րդ հոդվածի 2-րդ մասի 6-րդ կետով՝ ազատության սահմանափակում՝ 6 (վեց) ամիս ժամկետով, ՀՀ քրեական օրենսգրքի 195-րդ հոդվածի 2-րդ մասի 6-րդ կետով՝ ազատության սահմանափակում՝ 6 (վեց) ամիս ժամկետով, ՀՀ քրեական օրենսգրքի 195-րդ հոդվածի 2-րդ մասի 6-րդ կետով՝ ազատության սահմանափակում՝ 6 (վեց) ամիս ժամկետով, ՀՀ քրեական օրենսգրքի 171-րդ հոդվածի 2-րդ մասի 6-րդ կետով կետով՝ ազատության սահմանափակում՝ 6 (վեց) ամիս ժամկետով։
ՀՀ քրեական օրենսգրքի 64-րդ հոդվածի համաձայն՝ «1. Ազատության սահմանափակումը դատապարտյալին առանց ուսումնառությունից կամ աշխատանքից կտրելու տնային պայմաններում հսկողության տակ պահելն է:
2. Ազատության սահմանափակումը նշանակվում է ոչ մեծ և միջին ծանրության հանցագործությունների համար` 6 ամսից 3 տարի ժամկետով: Դատարանը, ազատության սահմանափակում նշանակելով, արգելում է հանցանք կատարած անձին այցելել տարբեր ժամանցային կամ այլ հաստատություններ, կազմակերպել, մասնակցել կամ այցելել որոշակի միջոցառումների կամ առանց դատապարտյալի նկատմամբ վերահսկողություն իրականացնող իրավասու մարմնի համաձայնության փոխել բնակության վայրը կամ որոշակի ժամերի բացակայել տնից: Դատարանը, ազատության սահմանափակում նշանակելով, դատապարտյալի նկատմամբ սահմանում է սույն մասով սահմանված արգելքներից մեկը կամ մի քանիսը։
3. Դատարանի նշանակած արգելքները չեն կարող սահմանափակել դատապարտյալի հետ համատեղ բնակվող անձանց ազատության կամ այլ անձանց հետ հաղորդակցվելու իրավունքը։
4. Որոշակի ժամերի տնից բացակայելու արգելքը չի կարող պակաս լինել օրական 8 և չի կարող ավելի լինել օրական 12 ժամից:
(․․․)»:
ՀՀ քրեական օրենսգրքի 74-րդ հոդվածի հիման վրա՝ նշանակված պատիժները լրիվ գումարելու միջոցով, նրա նկատմամբ վերջնական պատիժ պետք է նշանակել՝ ազատության սահմանափակում 3 (երեք) տարի ժամկետով։
Միաժամանակ ՀՀ քրեական օրենսգրքի 79-րդ հոդվածի 3-րդ մասի համաձայն՝ «Մինչև դատավճռի օրինական ուժի մեջ մտնելը, անկախ Հայաստանի Հանրապետության իրավազորությունից, փաստացի անազատության մեջ գտնվելու ժամկետը հաշվակցվում է կարճաժամկետ ազատազրկման, կարգապահական գումարտակում պահելու, ազատազրկման ձևով նշանակված պատժին` 1 օրը հաշվելով 1 օրվա դիմաց, ազատության սահմանափակման ձևով նշանակված պատժին՝ 1 օրը հաշվելով 2 օրվա դիմաց, իսկ հանրային աշխատանքների դեպքում՝ 1 օրը 8 ժամի դիմաց»:
Սույն գործով մեղադրյալ Արկադի Թորոզյանն անազատության մեջ է գտնվել երեք օր, որպիսի ժամկետը պետք է հաշվակցել նրա նկատմամբ նշանակվելիք պատժի ժամկետին, և նրա նկատմամբ վերջնական պատիժ սահմանել ազատության սահմանափակում՝ 2 (երկու) տարի 11 (տասմեկ) ամիս 24 (քսանչորս) օր ժամկետով։
Միևնույն ժամանակ, Դատարանը գտնում է, որ Արկադի Թորոզյանի նկատմամբ ազատության սահմանափակման ընթացքում պետք է սահմանել պարտականություն, այն է՝ առանց դատապարտյալի նկատմամբ վերահսկողություն իրականացնող իրավասու մարմնի համաձայնության չփոխել բնակության վայրը։
Դատարանն արձանագրում է, որ արտավարութային փաստաթուղթ ճանաչված և քրեական գործին կցված փաստաթղթերը և կրիչը պետք է թողնել կցված քրեական գործին՝ դատավճիռն օրինական ուժի մեջ մտնելուց հետո։
Քննարկելով մեղադրյալ Ա․Թորոզյանի նկատմամբ ընտրված խափանման միջոցի հարցը՝ Դատարանը գտնում է, որ վերջինիս նկատմամբ որպես խափանման միջոց ընտրված բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 347-350-րդ, 464․1-րդ-464․5-րդ հոդվածներով` Դատարանը

Վ Ճ Ռ Ե Ց

Մեղադրյալ Արկադի Արարատի Թորոզյանին մեղավոր ճանաչել ՀՀ քրեական օրենսգրքի 194-րդ հոդվածի 2-րդ մասի 4-րդ կետով, 171-րդ հոդվածի 2-րդ մասի 6-րդ կետով և 4 դրվագ ՀՀ քրեական օրենսգրքի 195-րդ հոդվածի 2-րդ մասի 6-րդ կետով և նախատեսված արարքների կատարման մեջ, և նրա նկատմամբ պատիժ նշանակել․
ՀՀ քրեական օրենսգրքի 194-րդ հոդվածի 2-րդ մասի 4-րդ կետով՝ ազատության սահմանափակում՝ 6 (վեց) ամիս ժամկետով։
ՀՀ քրեական օրենսգրքի 195-րդ հոդվածի 2-րդ մասի 6-րդ կետով՝ ազատության սահմանափակում՝ 6 (վեց) ամիս ժամկետով։
ՀՀ քրեական օրենսգրքի 195-րդ հոդվածի 2-րդ մասի 6-րդ կետով՝ ազատության սահմանափակում՝ 6 (վեց) ամիս ժամկետով։
ՀՀ քրեական օրենսգրքի 195-րդ հոդվածի 2-րդ մասի 6-րդ կետով՝ ազատության սահմանափակում՝ 6 (վեց) ամիս ժամկետով։
ՀՀ քրեական օրենսգրքի 195-րդ հոդվածի 2-րդ մասի 6-րդ կետով՝ ազատության սահմանափակում՝ 6 (վեց) ամիս ժամկետով։
ՀՀ քրեական օրենսգրքի 171-րդ հոդվածի 2-րդ մասի 6-րդ կետով կետով՝ ազատության սահմանափակում՝ 6 (վեց) ամիս ժամկետով։
ՀՀ քրեական օրենսգրքի 74-րդ հոդվածի հիման վրա՝ պատիժների լրիվ գումարելու միջոցով, մեղադրյալ Արկադի Արարատի Թորոզյանի նկատմամբ վերջնական պատիժ նշանակել ազատության սահմանափակում՝ 3 (երեք) տարի ժամկետով:
ՀՀ քրեական օրենսգրքի 79-րդ հոդվածի հիման վրա՝ հաշվակցել Արկադի Արարատի Թորոզյանի անազատության մեջ գտնվելու ժամանակահատվածը՝ 3 (երեք) օրը, և նրա նկատմամբ վերջնական պատիժ սահմանել ազատության սահմանափակում՝ 2 (երկու) տարի 11 (տասմեկ) ամիս 24 (քսանչորս) օր ժամկետով։
Արկադի Արարատի Թորոզյանին արգելել իր նկատմամբ վերահսկողություն իրականացնող իրավասու մարմնի համաձայնության փոխել բնակության վայրը:
Մեղադրյալ Արկադի Արարատի Թորոզյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը:
Արտավարութային փաստաթուղթ ճանաչված և քրեական գործին կցված փաստաթղթերը և լազերային կրիչը թողնել կցված քրեական գործին՝ դատավճիռն օրինական ուժի մեջ մտնելուց հետո։
Դատավճիռը, բացառությամբ ՀՀ քրեական դատավարության օրենսգրքի 373-րդ հոդվածով և 375-րդ հոդվածի 1-3-րդ մասերով նախատեսված հիմքերի, կարող է բողոքարկվել ՀՀ վերաքննիչ քրեական դատարան՝ ստանալու օրվանից հետո՝ մեկամսյա ժամկետում:


ԴԱՏԱՎՈՐ՝ Ս.ԳԶՈԳՅԱՆ