ԵԴ1/0570/01/25


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«28» Մարտի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
քարտուղարությամբ՝ ՌՈԲԵՐՏ ՍԻՐԱԿԱՆՅԱՆԻ
մասնակցությամբ.
հանրային մեղադրող՝ ԴԱՎԻԹ ԹԱԴԵՎՈՍՅԱՆԻ
մեղադրյալ՝ ԱՐՏԱՇԵՍ ՊԵՏՐՈՍՅԱՆԻ
դռնբաց դատական նիստում քննելով Արտաշես Տիգրանի Պետրոսյանի(1) վերաբերյալ քրեական գործն ըստ մեղադրանքի՝ ՀՀ քրեական օրենսգրքի 344 հոդվածի 2-րդ մասով.







1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ
Թիվ 60705224 քրեական վարույթով Արտաշես Տիգրանի Պետրոսյանին ՀՀ քրեական օրենսգրքի 344 հոդվածի 2-րդ մասով մեղադրանք է ներկայացվել հետևյալ արարքի համար.
«Ն]ա, տեղեկացված լինելով օրենքով սահմանված կարգով՝ վարչական իրավախախտման գործով թիվ 8180392514 որոշմամբ 2024 թվականի հունվարի 29-ից տրանսպորտային միջոցներ վարելու իր իրավունքից 1 տարի ժամկետով զրկված լինելու մասին, նշված իրավունքից զրկման ժամկետը լրացած չլինելու պայմաններում, 2024 թվականի հոկտեմբերի 28-ին՝ ժամը 08:20-ի սահմաններում, գտնվելով ոչ սթափ վիճակում՝ մեկ լիտր արտաշնչած օդի մեջ 0,601 մգ/լ մաքուր ալկոհոլի պարունակությամբ, Երևան քաղաքի Գ.Նժդեհի և Սևանի փողոցների խաչմերուկում վարել է «Opel» մակնիշի, 37 BN 603 հաշվառման համարանիշի տրանսպորտային միջոցը»։

2. ԴԱՏԱՔՆՆՈՒԹՅԱՆ ԸՆԹԱՑՔՈՒՄ ՀԵՏԱԶՈՏՎԱԾ ԹՈՒՅԼԱՏՐԵԼԻ ԱՊԱՑՈՒՅՑՆԵՐԸ.
ՀԻՄՆԱԿԱՆ ԴԱՏԱԼՍՈՒՄՆԵՐ

2.1 «Զննություն կատարելու մասին» 2025 թվականի հունվարի 14-ի արձանագրության համաձայն.
«Զննությամբ պարզվեց հետևյալը.
2024 թվականի հոկտեմբերի 28-ին ՀՀ ՆԳՆ ոստիկանության Պարեկային ծառայության պարեկի կողմից Արտաշես Տիգրանի Պետրոսյանի վերաբերյալ կազմվել է վարչական իրավախախտման վերաբերյալ թիվ 8180415420 արձանագրությունն այն մասին, որ վերջինս զրկված լինելով տրանսպորտային միջոցներ վարելու իրավունքից և գտնվելով ալկոհոլային խմիչք օգտագործած՝ ոչ սթափ վիճակում, նույն օրը՝ ժամը 08:20-ին, Երևան քաղաքի Գ.Նժհեհ-Սևանի փողոցների խաչմերուկում, վարել է «Օպել» մակնիշի 37BN603 հաշվառման համարանիշի տրանսպորտային միջոցը: Արձանագրության մեջ առկա է վարորդի ազգանունն ու ստորագրություններ, ինչպես նաև առկա է գրառում «համաձայն եմ զրկման հետ, բայց ոչ սթափի հետ համաձայն չեմ»:
2024 թվականի հունվարի 27-ին ՀՀ ՆԳՆ ոստիկանության Պարեկային ծառայության պարեկի կողմից Արտաշես Տիգրանի Պետրոսյանի վերաբերյալ կազմվել է վարչական իրավախախտման վերաբերյալ թիվ 8180392514 արձանագրությունն այն մասին, որ վերջինս նույն օրը տրանսպորտային միջոցը վարել է ոչ սթափ վիճակում, որի համար 29.01.2024 թվականին կայացված որոշմամբ վերջինս 1 տարի ժամկետով զրկվել է տրանսպորտային միջոցներ վարելու իրավունքից: Արձանագրության մեջ ստացա բաժնում առկա է ստորագրություն:
2023 թվականի հոկտեմբերի 24-ին ՀՀ ՆԳՆ ոստիկանության Պարեկային ծառայության պարեկի կողմից Արտաշես Տիգրանի Պետրոսյանի վերաբերյալ կազմվել է վարչական իրավախախտման վերաբերյալ թիվ 8180261979 արձանագրությունն այն մասին, որ վերջինս նույն օրը տրանսպորտային միջոցը վարել է ոչ սթափ վիճակում:
Սթափության կտրոնի զննությամբ պարզվել է, որ ստուգաչափման սարքի համարը՝ 91100982, զննման համարը 02016, զննման ամսաթիվը` 24.10.2023թ., ստուգումը կատարվել է ավտոմատ, ժամը՝ 01:26:54-ին, ալկոհոլի պարունակությունը՝ 0,163 մգ/լ, վարորդի անունը՝ Արտաշես, ազգանունը՝ Պետրոսյան տրանսպորտային միջոցի համարանիշը՝ 35SG621 տեսուչի ազգանունը՝ Ալավերդյան, կրծքանշանի համար՝ 07383, առկա են նաև ծանուցվող վարորդի և պարեկային ծառայողի ստորագրությունները:
Առկա է նաև սթափության 91100982 համարի սարքի, ստուգաչափման թիվ 102344 վկայականի պատճենը, որի զննությամբ պարզվել է, որ ստուգաչափման թվականն է 24.07.2023թ., այն ուժի մեջ է մինչև 24.07.2024թ.: Չափման միջոցի անվանումը և տեսակը՝ ալկոմետր, գործարանային համարը՝ 91100982 տեսակը՝ «Jupiter X/RP», չափման տիրույթը՝ (0.000-2.000 մգ/լ), ճշտության կարգը և դասը (սխալանքը) 0:0,1+-5%, 0,1-0,15+-8% > 0,15+-10%, արտադրողը՝ Չինաստան, պատկանում է ՀՀ ՆԳՆ ոստիկանություն:
Սթափության կտրոնի զննությամբ պարզվել է, որ ստուգաչափման սարքի համարը՝ 91101111 զննման 00188, զննման ամսաթիվը՝ 27.01.2024թ., ստուգումը կատարվել է ավտոմատ, ժամը՝ 03:32:38-ին, ալկոհոլի պարունակությունը՝ 0,399 մգ/լ վարորդի անունը՝ Արտաշես, ազգանունը՝ Պետրոսյան տրանսպորտային միջոցի համարանիշը՝ 35FM685 տեսուչի ազգանունը՝ Էլիզբարյան, կրծքանշանի համար՝ 02129, առկա են նաև ծանուցվող վարորդի և պարեկային ծառայողի ստորագրությունները:
Առկա է նաև սթափության 91101111 համարի սարքի, ստուգաչափման թիվ 106537 վկայականի պատճենը, որի զննությամբ պարզվել է, որ ստուգաչափման թվականն է 09.10.2023թ., այն ուժի մեջ է մինչև 09.10.2024թ.: Չափման միջոցի անվանումը և տեսակը՝ ալկոմետր, գործարանային համարը՝ 91101111 տեսակը՝ «Jupiter X/RP», չափման տիրույթը՝ (0.000-2.000 մգ/լ), ճշտության կարգը և դասը (սխալանքը) 0:0,1+-5%, 1-0,15-8% > 0,15+-10%, արտադրողը՝ Չինաստան, պատկանում է ՀՀ ՆԳՆ ոստիկանություն:
Սթափության կտրոնի զննությամբ պարզվել է, որ ստուգաչափման սարքի համարը՝ 91100996 զննման համարը 02443, զննման ամսաթիվը՝ 28.10.2024թ., ստուգումը կատարվել է ավտոմատ, ժամը` 10:46:43-ին, ալկոհոլի պարունակությունը՝ 0,601 մգ/լ, վարորդի անունը՝ Արտաշես, ազգանունը՝ Պետրոսյան տրանսպորտային միջոցի համարանիշը՝ 37BN603 տեսուչի ազգանունը՝ Փաշայան, կրծքանշանի համար՝ 08367, առկա են նաև ծանուցվող վարորդի և պարեկային ծառայողի ստորագրությունները:
Առկա է նաև սթափության 91100996 համարի սարքի, ստուգաչափման թիվ 120904 վկայականի պատճենը, որի զննությամբ պարզվել է, որ ստուգաչափման թվականն է 05.04.2024թ., այն ուժի մեջ է մինչև 05.03.2025թ.: Չափման միջոցի անվանումը և տեսակը՝ ալկոմետր, գործարանային համարը՝ 91100996 տեսակը՝ «Jupiter X/RP», չափման տիրույթը՝ (0.000-2,000 մգ/լ), ճշտության կարգը և դասը (սխալանքը) 0:0,1+-5%, 0,1-0,15+-8% > 0,15+-10%, արտադրողը՝ Չինաստան, պատկանում է ՀՀ ՆԳՆ ոստիկանություն:
ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրի զննությամբ պարզվել է, որ Արտաշես Տիգրանի Պետրոսյանի տրանսպորտային միջոցներ վարելու իրավունքը գտնվում է զրկված կարգավիճակում: Զրկման սկիզբ նշվել է 29.01.2024թ., ավարտը՝ 29.01.2025 թվականը»: (2)
2.2 Արտավարութային փաստաթուղթ ճանաչված՝ վարչական իրավախախտման վերաբերյալ թիվ 8180392514, 8180261979 և 8180415420 արձանագրությունների, ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրի, սթափության վիճակի զննության թիվ 02016, 00188, և 02443 կտրոնների և ստուգաչափման 91101111 համարի սարքի թիվ 106537, 91100996 համարի սարքի թիվ 120904 և 91100982 համարի սարքի թիվ 102344 վկայականի պատճենները պարունակում են դատավճռի 2.1 կետում նշված նույնական տվյալներ։ (3)
2.3 Արտաշես Տիգրանի Պետրոսյանը ներկայացված մեղադրանքում իրեն մեղավոր ճանաչեց, և օգտվելով իր սահմանադրական իրավունքից, հրաժարվեց դատարանում ցուցմունք տալուց: Արտաշես Պետրոսյանը նշեց նաև, որ չի հրաժարվում մինչդատական վարույթում իր տված ցուցմունքներից։
2.4 Արտաշես Տիգրանի Պետրոսյանը մինչդատական վարույթում, մեղադրյալի դատավարական կարգավիճակում 2025 թվականի հունվարի 30-ին, ըստ էության, ցուցմունք է տվել այն մասին, որ տեղյակ է եղել զրկման փաստի մասին, այդ մասին տեղեկացել է դեպքի հաջորդ օրը Մասիսի բաժնում։ Ինչ վերաբերում է 2024 թվականի հոկտեմբերի 28-ին՝ ժամը 08:20-ին Երևան քաղաքի Գ.Նժդեհ-Սևանի փողոցների խաչմերուկում, «Օպել» մակնիշի 37BN603 հաշվառման համարանիշի տրանսպորտային միջոցը վարելուն, հայտնել է, որ ինքն է վարել մեքենան ոչ սթափ վիճակում:


ԼՐԱՑՈՒՑԻՉ ԴԱՏԱԼՍՈՒՄՆԵՐ

2.5 ՀՀ ոստիկանության ինֆորմացիոն կենտրոն օպերատիվ-տեղեկատու քարտադարանի Ձև 8 տեղեկանքի և «DataLex» դատական տեղեկատվական համակարգում առկա տվյալների համաձայն՝
-Արտաշես Տիգրանի Պետրոսյանը Արագածոտնի մարզի քննչական բաժնի կողմից նախաձեռնված թիվ 29037545 քրեական վարույթն ուղարկվել է դատարան (թիվ ԱՐԱԴ/0431/01/24 քրեական գործ՝ ըստ մեղադրանքի Արտաշես Տիգրանի Պետրոսյանի ՀՀ քրեական օրենսգրքի 344 հոդվածի 1-ին մասով):
-Արտաշես Տիգրանի Պետրոսյանը Արագածոտնի մարզի առաջին ատյանի ընդհանուր իրավասության դատարանի 2024 թվականի ապրիլի 10-ի դատավճռով մեղավոր է ճանաչվել ՀՀ քրեական օրենսգրքի 344 հոդվածի 1-ին մասով նախատեսված հանցանքը կատարելու մեջ և նրա նկատմամբ պատիժ է նշանակվել տուգանք՝ 375.000 ՀՀ դրամի չափով:
-Արտաշես Տիգրանի Պետրոսյանի վերաբերյալ առկա է նաև մեկ այլ՝ թիվ 60616824 քրեական վարույթը, որն ուղարկվել է դատարան (թիվ ԵԴ1/0778/01/25 քրեական գործ՝ ըստ մեղադրանքի Արտաշես Տիգրանի Պետրոսյանի ՀՀ քրեական օրենսգրքի 344 հոդվածի 2-րդ մասով): (4)
2.6 ՀՀ արդարադատության նախարարության պրոբացիայի ծառայության Երևանի քաղաքային մարմնի պետ Վահրամ Խալաթյանի 2025 թվականի փետրվարի 26-ի թիվ 29.2.1/12357-2025 գրության համաձայն՝
«(...)
Թիվ ԱՐԱԴ1/0017/01/24 քրեական գործով Արագածոտնի մարզի առաջին ատյանի ընդհանուր իրավասության դատարանի 2024 թվականի ապրիլի 10-ի դատավճռով Արտաշես Տիգրանի Պետրոսյանը մեղավոր է ճանաչվել ՀՀ քրեական օրենսգրքի 344 հոդվածի 1-ին մասով նախատեսված արարքի համար և դատապարտվել է տուգանքի՝ 375.000 /երեք հարյուր յոթանասունհինգ հազար/ ՀՀ դրամի չափով։
Թիվ ԱՐԱԴ1/0017/01/24 դատավճիռը 20.05.2024թ.-ին մտել է օրինական ուժի մեջ, ՀՀ ԱՆ պրոբացիայի ծառայության Արմավիրի մարզային մարմնում ստացվել է 10.06.2024թ.-ին և ընդունվել է ի կատար ածման։
(...)
21.11.2024թ.-ին ներկայացվել է Պրոբացիայի ծառայության Արմավիրի մարմին, որտեղ նրան համաձայն N Ձև 3 արձանագրության, պարզաբանվել են տուգանքի ձևով նշանակված պատիժը կրելու կարգն ու պայմանները:
(...)
Նկատի ունենալով Ա.Պետրոսյանը խախտել է դատական ակտի հիմքով սահմանված տուգանքի վճարման պարտավորությունների կատարումը Պրոբացիայի ծառայության Երևանի քաղաքային մարմնի պետի կողմից 30.12.2024թ.-ին միջնորդություն է ներկայացվել դատարան 375.000 /երեք հարյուր յոթանասունհինգ հազար/ ՀՀ դրամի չափով գույք բռնագանձելու պահանջով:
Երևան քաղաքի առաջին ատյանի ընդհանուր իրավասության քրեական դատարանի 03.02.2025թ. թիվ ԵԴ1/1186/15/24 որոշմամբ` դատարանը որոշել է բռնագանձել թիվ ԱՐԱԴ1/0017/01/24 դատավճռով նշանակված 375.000 /երեք հարյուր յոթանասունհինգ հազար/ ՀՀ դրամի չափին գույք: Վերը նշված որոշումը ստացվել է 13.02.2025թ.-ին:
13.02.2025թ.-ին Ա.Պետրոսյանի նկատմամբ նշանակված 375.000 /երեք հարյուր յոթանասունհինգ հազար/ ՀՀ դրամ տուգանքի կատարումը կասեցվել է մինչև կատարողական վարույթն ավարտելու մասին Հարկադիր կատարողի որոշումը ստանալը: Առ 25.02.2025թ.-ն բռնագանձում իրականացնելու մասին տեղեկատվություն չի ստացվել»:
2.7 ՀՀ պետական եկամուտների կոմիտեի հարկ վճարողների սպասարկման վարչության պետի 2025 թվականի փետրվարի 26-ի գրության համաձայն՝ Արտաշես Տիգրանի Պետրոսյանը հանցանքն ավարտվելու օրվան նախորդող 12 ամիսների ընթացքում չի հանդիսացել վարձու աշխատող։ Հարկային մարմնի տեղեկատվական բազայում առկա չեն նաև Արտաշես Տիգրանի Պետրոսյանի կողմից իր ակտիվների ներդրմամբ (տրամադրմամբ) այլ անձանց գործունեությունից ստացված եկամուտի (շահաբաժնի, տոկոսի, ռոյալթիի, վարձակալական վճարի) վերաբերյալ տվյալներ: (5)
Քննարկման ենթակա հարցերի վերաբերյալ կողմերի դիրքորոշումները.
2.8 Պատժի վերաբերյալ հարցերը քննարկելիս հանրային մեղադրողը՝ հաշվի առնելով նախկինում Արտաշես Տիգրանի Պետրոսյանի նկատմամբ տուգանքի ձևով նշանակված պատիժը վերջինի կողմից չկատարելու հանգամանքը՝ խնդրեց նրա նկատմամբ որպես պատիժ նշանակել հանրային աշխատանքներ՝ 120-ից 130 ժամ տևողությամբ կամ կարճաժամկետ ազատազրկում՝ 1 ամիս ժամկետով:
2.9 Պատժի վերաբերյալ հարցերը քննարկելիս մեղադրյալ Արտաշես Պետրոսյանն, ըստ էության, նշեց, որ համաձայն է կատարել հանրային աշխատանքներ:
3. ԴԱՏԱՐԱՆԻ ՓԱՍՏԱԿԱՆ ՎԵՐԼՈՒԾՈՒԹՅՈՒՆՆԵՐԸ ԵՎ ԴԱՏԱՐԱՆԻ ԿՈՂՄԻՑ ՀԱՍՏԱՏՎԱԾ ԿԱՄ ՀԵՐՔՎԱԾ ՓԱՍՏԱԿԱՆ ՀԱՆԳԱՄԱՆՔՆԵՐԸ.
3.1 Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանն ապացուցված է համարում, որ Արտաշես Տիգրանի Պետրոսյանը, 1 տարի ժամկետով զրկված լինելով տրանսպորտային միջոցներ վարելու իրավունքից, ոչ սթափ վիճակում, այն է՝ նրա արտաշնչած 1 լիտր ծավալով օդի մեջ մաքուր ալկոհոլի պարունակությունը (հաշվի առնելով ստուգաչափման սարքի հնարավոր սխալանքը), կազմել է 0,5409 մգ/լ, 2024 թվականի հոկտեմբերի 28-ին՝ ժամը 08:20-ի սահմաններում, Երևան քաղաքի Գարեգին Նժդեհի և Սևանի փողոցների խաչմերուկում վարել է «Օպել» մակնիշի 37 BN 603 հաշվառման համարանիշի տրանսպորտային միջոցը։
3.2 Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև այն, Արտաշես Պետրոսյանն ունի դատվածություն, հանցանքն ավարտվելու օրվան նախորդող 12 ամիսների ընթացքում չի հանդիսացել վարձու աշխատող։
4. ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐՆ ՈՒ ՈՐՈՇՈՒՄՆԵՐԸ.
4.1 Դատարանի կողմից հաստատված փաստական հանգամանքների և 2025 թվականի մարտի 28-ին կայացված մեղադրական վերդիկտի հիման վրա Դատարանն ապացուցված է համարում մեղադրյալ Արտաշես Տիգրանի Պետրոսյանին վերագրվող արարքը, այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, սահմանելով, որ դատապարտված մեղադրյալի կատարած արարքի նկատմամբ ենթակա է կիրառման ՀՀ քրեական օրենսգրքի 344 հոդվածի 2-րդ մասը։
4.2 Դատարանի կողմից հաստատված փաստական հանգամանքների հիման վրա Դատարանն արձանագրում է, որ Արտաշես Տիգրանի Պետրոսյանի պատասխանատվությունն ու պատիժը մեղմացնող հանգամանքներ առկա չեն։
4.3 Նկատի ունենալով, որ թիվ ԱՐԱԴ1/0017/01/24 քրեական գործով Արագածոտնի մարզի առաջին ատյանի ընդհանուր իրավասության դատարանի 2024 թվականի ապրիլի 10-ի դատավճիռն օրինական ուժի մեջ է մտել 2024 թվականի մայիսի 20-ին, և այդ դատավճռով հաստատված հանցանքի համար ազատությունից զրկելու հետ չկապված պատիժը (տուգանքը) Արտաշես Տիգրանի Պետրոսյանը 2025 թվականի փետրվարի 25-ի դրությամբ չի կատարել, Դատարանն արձանագրում է, որ ՀՀ քրեական օրենսգրքի 93 հոդվածի 5-րդ մասի 2-րդ կետի ուժով նշված հանցանքի համար նրա դատվածությունը չի մարվել, հետևաբար սույն դատավճռով հաստատված հանցանքը Արտաշես Տիգրանի Պետրոսյանը կատարել է դատվածություն ունենալու պայմաններում։
Վերոգրյալի հիման վրա Դատարանն արձանագրում է, որ առկա է Արտաշես Տիգրանի Պետրոսյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71 հոդվածի 1-ին մասի 1-ին կետով նախատեսված հանգամանքը:


4.4 Կատարած հանցանքի համար մեղադրյալ Արտաշես Տիգրանի Պետրոսյանը ենթակա է պատժի։
4.5 Պատժի տեսակն ու չափը որոշելիս՝ Դատարանը հաշվի է առնում հետևյալը՝
-Արտաշես Տիգրանի Պետրոսյանի կատարած հանցանքի հանգամանքները, հանրային վտանգավորության աստիճանն ու բնույթը, մասնավորապես՝ այն, որ նրա կատարած հանցանքը դասվում է ոչ մեծ ծանրության հանցագործությունների շարքին։
-Արտաշես Տիգրանի Պետրոսյանի անձը բնութագրող տվյալները, մասնավորապես թիվ ԵԴ1/0778/01/25 և թիվ ԱՐԱԴ/0431/01/24 քրեական գործերով համասեռ հանցանքների համար մեղադրվելը:
-Արտաշես Տիգրանի Պետրոսյանի պատասխանատվությունը և պատիժը մեղմացնող հանգամանքների բացակայությունն ու ծանրացնող հանգամանքի առկայությունը, ՀՀ քրեական օրենսգրքի 69 հոդվածի 2-րդ մասում թվարկված մյուս հանգամանքները։
• Այսպիսով, Դատարանը գտնում է, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներն ապահովելու համար Արտաշես Տիգրանի Պետրոսյանի կողմից ՀՀ քրեական օրենսգրքի 344 հոդվածի 2-րդ մասով կատարված հանցագործության բնույթին, վտանգավորության աստիճանին, դրա կատարելու հանգամանքներին, ինչպես նաև հանցավորի անձին համաչափ պատիժ է 120 (հարյուր քսան) ժամ տևողությամբ հանրային աշխատանքները:
• Միևնույն ժամանակ Դատարանը գտնում է, որ կատարած հանցանքի համար Արտաշես Տիգրանի Պետրոսյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
4.6 Արտաշես Տիգրանի Պետրոսյանը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն։
4.7 Անդրադառնալով Արտաշես Տիգրանի Պետրոսյանի նկատմամբ սույն դատավճռով նշանակված պատժին թիվ ԱՐԱԴ1/0017/01/24 քրեական գործով Արագածոտնի մարզի առաջին ատյանի ընդհանուր իրավասության դատարանի 2024 թվականի ապրիլի 10-ի դատավճռով նշանակված պատիժը լրիվ կամ մասնակիորեն գումարելու հարցին՝ Դատարանը գտնում է, որ սույն քրեական գործով դատավճիռների համակցությամբ պատիժ նշանակելը կարող է անհաղթահարելի դատավարական արգելքներ ստեղծել այդ դատավճռով նշանակված պատժի կատարման համար, քանի որ արդեն իսկ սկսվել է նշանակված պատիժը ՀՀ քրեական օրենսգրքի 59 հոդվածով նախատեսված գործիքակազմերի կիրառմամբ կատարելու գործընթաց և կայացվել է դատական ակտ։ Ավելին՝ տուգանքի չափին համարժեք գույքի բացակայության պարագայում կարող են գործադրվել նաև տուգանքն ազատազրկմամբ փոխարինելու ՀՀ քրեական օրենսգրքի 59 հոդվածով նախատեսված մյուս ընթացակարգերը, մինչդեռ սույն քրեական գործով դատավճիռների համակցությամբ պատժի նշանակումն, ըստ էության «առոչինչ» կդարձնի այդ դատական վարույթի շրջանակներում կայացված դատական ակտը, ինչն իրավաչափ համարվել չի կարող։
Վերոգրյալի պայմաններում Դատարանը գտնում է, որ սույն քրեական գործով պատիժ նշանակելիս պետք է չկիրառել ՀՀ քրեական օրենսգրքի 75 հոդվածը և սույն դատավճռով նշանակվող պատժին պետք է չգումարել թիվ ԱՐԱԴ1/0017/01/24 քրեական գործով Արագածոտնի մարզի առաջին ատյանի ընդհանուր իրավասության դատարանի 2024 թվականի ապրիլի 10-ի Արտաշես Տիգրանի Պետրոսյանի նկատմամբ նշանակված պատիժը։
4.8 ՀՀ քրեական դատավարության օրենսգրքի 348 հոդվածի 1-ին մասի 11-14-րդ հարցերին անդրադառնալու անհրաժեշտությունը սույն քրեական գործով բացակայում է։
4.9 Արտաշես Տիգրանի Պետրոսյանը նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար։
4.10 ՀՀ քրեական դատավարության օրենսգրքի 167 հոդվածի 1-ին մասի 1-6-րդ կետերով նախատեսված վարութային ծախսեր սույն քրեական գործով առկա չեն, իսկ 7-րդ կետով նախատեսված ծախսերի վերաբերյալ տվյալները բացակայում են: Ավելին՝ այդ վարութային ծախսերի հատուցման պահանջ Դատարանին չի ներկայացվել, որպիսի պայմաններում վարութային ծախսերի հարցը պետք է համարել լուծված։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 167, 276, 347, 348, 349 և 364 հոդվածներով՝ Դատարանը

Վ Ճ Ռ Ե Ց

1. Արտաշես Տիգրանի Պետրոսյանին մեղավոր ճանաչել ՀՀ քրեական օրենսգրքի 344 հոդվածի 2-րդ մասով նախատեսված հանցանքը կատարելու մեջ և նրա նկատմամբ պատիժ նշանակել հանրային աշխատանքներ՝ 120 (հարյուր քսան) ժամ տևողությամբ։
2. Արտաշես Պետրոսյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը:
3. Վարութային ծախսերի հարցը համարել լուծված:
Դատավճիռը վերաքննության կարգով կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում:



ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ


(1)Ծնված՝ 1981 թվականի նոյեմբերի 11-ին Արմավիրի մարզի Փարաքար համայնքում, ազգությամբ հայ, ՀՀ քաղաքացի, 8-ամյա կրթությամբ, չամուսնացած, նախկինում դատապարտված, հաշվառված և բնակվում է Արմավիրի մարզի Փարաքար համայնքի Գևորգ Էմինի փողոցի թիվ 30 տնակում, որպես խափանման միջոց է կիրառված բացակայելու արգելքը:
(2)Տե՛ս, քրեական գործ, հատոր 1, թերթեր 18-19:
(3)Տե՛ս, քրեական գործ, հատոր 1, թերթեր 6-12:
(4)Տե՛ս քրեական գործ, հատոր 1, թերթ 21-22:
(5)2.6-2.7 կետերի վերաբերյալ տե՛ս Դատարանում ստեղծված նյութերը: