Գործ ԵԴ1/0564/01/25


Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

09.07.2025 թվական ք.Երևան

ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ ԸՆԴՀԱՆՈՒՐ ԻՐԱՎԱՍՈՒԹՅԱՆ
ՔՐԵԱԿԱՆ ԴԱՏԱՐԱՆ

ԴԱՏԱՎՈՐ՝ Դ. ԲԱԼԱՅԱՆ
ՆԻՍՏԻ ՔԱՐՏՈՒՂԱՐ՝ Ա.ՄԱԼՈՅԱՆ
ՄԱՍՆԱԿՑՈՒԹՅԱՄԲ`
ԹԱՐԳՄԱՆԻՉ՝ Գ.ՄԻՐԶՈՅԱՆ /անգլերեն/
ՀԱՆՐԱՅԻՆ ՄԵՂԱԴՐՈՂ՝ Ռ.ԱՍԱՏՐՅԱՆ
ՊԱՇՏՊԱՆ՝ Վ.ԱՐՄԵՆԱԿՅԱՆ
ՄԵՂԱԴՐՅԱԼ՝ Շ.ՓԱԼԻԿԱՆԴԻ

Դռնբաց դատական նիստերում, դատական քննության հատուկ կարգի՝
համաձայնեցման վարույթի կիրառմամբ, քննեց քրեական վարույթն ըստ մեղադրանքի՝
Շիհաբ Փալիկանդիի ծնված 14.11.1990 թվականին Հնդկաստանի Հանրապետության,
Քանուր քաղաքում, ազգությամբ հնդիկ, Հնդկաստանի Հանրապետության քաղաքացի, չի աշխատում, չդատված, բնակվում է քաղաք Երևան, Պուշկինի փողոց, «Արմենա» հյուրանոցի 2-րդ սենյակում, որպես խափանման միջոց է ընտրված բացակայելու արգելքը, մեղադրվում է ՀՀ քրեական օրենսգրքի 319-րդ հոդվածի 1-ին մասով և ՀՀ քրեական օրենսգրքի 257-րդ հոդվածի 3-րդ մասի 1-ին և 3-րդ կետերով

I. Գործի դատավարական նախապատմությունը.
2024 թվականի հունվարի 11-ին Շիհաբ Փալիկանդիին մեղադրանք է առաջադրվել ՀՀ քրեական օրենսգրքի 319-րդ հոդվածի 1-ին մասով, ՀՀ քրեական օրենսգրքի 257-րդ հոդվածի 3-րդ մասի 1-ին և 3-րդ կետերով, ՀՀ քրեական օրենսգրքի 285-րդ հոդվածի 2-րդ մասի 1-ին և 3-րդ կետերով և ՀՀ քրեական օրենսգրքի 296-րդ հոդվածի 3-րդ մասի 1-ին և 3-րդ կետերով նախատեսված արարքների կատարման համար:
2024 թվականի ապրիլի 12-ին մեղադրյալ Շիհաբ Փալիկանդիի բացակայությամբ վերջինիս նկատմամբ որպես խափանման միջոց է ընտրվել կալանքը:
2024 թվականի ապրիլի 25-ին դատախազ Ռ.Ասատրյանը որոշում է կայացրել մեղադրյալ Շ.Փալիկանդիի նկատմամբ իրականացվող հանրային քրեական հետապնդման ժամկետը վերջինիս գտնվելու վայրը անհայտ լինելու հիմքով կասեցնելու մասին:
2024 թվականի նոյեմբերի 14-ին դատախազ Ռ.Ասատրյանը որոշում է կայացրել մեղադրյալ Շ.Փալիկանդիի նկատմամբ իրականացվող հանրային քրեական հետապնդման ժամկետը վերսկսելու մասին:
Նույն օրը մեղադրյալին ներկայացվել է մեղադրանքը և պարզաբանվել են մեղադրյալի իրավունքներն ու պարտականությունները:
2024 թվականի նոյեմբերի 15-ին մեղադրյալ Շ.Փալիկանդիի նկատմամբ որպես խափանման միջոց է կիրառվել կալանքը 2 ամիս ժամկետով, որի ժամկետը 2 ամսով երկարաձգվել է 2025 թվականի հունվարի 13-ին:
2025 թվականի փետրվարի 11-ին դատախազ Ռ.Ասատրյանը որոշում է կայացրել վերացնել Շ.Փալիկանդիի նկատմամբ որպես խափանման միջոց կիրառված կալանքը:
2025 թվականի փետրվարի 11-ին մեղադրյալի նկատմամբ որպես խափանման միջոց է կիրառվել բացակայելու արգելքը:
Նույն օրը Ռ.Ասատրյանի կողմից որոշում է կայացվել Շ.Փալիկանդիի նկատմամբ ՀՀ քրեական օրենսգրքի 285-րդ հոդվածի 2-րդ մասի 1-ին և 3-րդ կետերով և ՀՀ քրեական օրենսգրքի 296-րդ հոդվածի 3-րդ մասի 1-ին կետերով հարուցված քրեական հետապնդումը դադարեցնելու մասին՝ մեղասգրվող արարքը կատարած չլինելու հիմքով:
2025 թվականի փետրվարի 14-ին կազմվել է մեղադրական եզրակացությունը, նույն օրը դատախազ Ռ.Ասատրյանը որոշում է կայացրել մեղադրական եզրակացությունը հաստատելու մասին և քրեական գործը մուտք է եղել դատարան, էլեկտրոնային եղանակով մակագրվել և երեք օր անց հանձնվել է դատավոր Դ.Բալայանին:
2025 թվականի փետրվարի 18-ին որոշում է կայացվել քրեական գործը վարույթ ստանձնելու և նախնական դատալսումներ նշանակելու մասին:

II. Համաձայնեցման վարույթ կիրառելու վերաբերյալ միջնորդության լուծում

2025 թվականի հունիսի 09-ի նախնական դատալսումների ընթացքում, մեղադրյալ Շիհաբ Փալիկանդին միջնորդել է կիրառել համաձայնեցման վարույթ և հայտարարել է, որ ներկայացված մեղադրանքն իրեն պարզ է, համաձայն է մեղսագրվող արարքի հետ, համաձայնեցման վարույթ կիրառելու միջնորդությունը ներկայացրել է կամավոր, խորհրդակցել է պաշտպանի հետ, գիտակցում է համաձայնեցման վարույթ կիրառելու մասին իր միջնորդության բնույթը և դրա հետևանքները:
Պաշտպան Վ.Արմենակյանը խնդրել է բավարարել ներկայացված միջնորդությունը:
Մեղադրողը համաձայնեցման վարույթ կիրառելու վերաբերյալ միջնորդության դեմ առարկություն չի ներկայացել:
Դատարանը համոզվելով, որ առկա է ՀՀ քրեական դատավարության օրենսգրքի 458-րդ հոդվածի 1-ին մասով նախատեսված հիմքը և բացակայում են նույն օրենսգրքի 458-րդ հոդվածի 2-րդ մասով նախատեսված՝ համաձայնեցման վարույթի կիրառումը բացառող հանգամանքները՝ որոշում է կայացրել համաձայնեցման վարույթ կիրառելու վերաբերյալ միջնորդությունը բավարարելու մասին։

III. Համաձայնեցման վարույթով գործի քննությունը.
2025 թվականի հունիսի 30-ին հանրային մեղադրող Ռ.Ասատրյանը դատարանին է ներկայացրել ՀՀ քրեական դատավարության օրենսգրքի 460-րդ հոդվածի 4-րդ մասով սահմանված կարգով բանակցությունների արդյունքում համաձայնության գալու վերաբերյալ 26.06.2025 թվականին կազմված արձանագրությունը, համաձայն որի՝
«ՀՀ գլխավոր դատախազության սեփականության դեմ ուղղված հանցագործությունների գործերով վարչության ավագ դատախազ Ռ.Ասատրյանս, Երևան քաղաքի առաջին ատյանի ընդհանուր իրավասության դատարանի վարույթում գտնվող թիվ ԵԴ1/0564/01/25 69105525 քրեական վարույթով մեղադրյալի և նրա պաշտպանի կողմից ներկայացված և դատարանի կողմից բավարարված համաձայնեցման վարույթ կիրառելու մասին միջնորդության հիմքով ՀՀ գլխավոր դատախազությունում կազմեցի սույն արձանագրությունը հետևյալի մասին՝
Նկատի ունենալով, որ Դատարանը բավարարել է համաձայնեցման վարույթ կիրառելու մասին միջնորդությունը, ուստի անհրաժեշտ է բանակցություններ սկսել մեղադրյալի և նրա պաշտպանի հետ:

Բանակցություններին մասնակցում են՝

Հանրային մեղադրող՝

ՀՀ գլխավոր դատախազության սեփականության դեմ
ուղղված հանցագործությունների գործերով վարչության
դատախազ, արդարադատության առաջին դասի
խորհրդական Ռուզաննա Ասատրյանս,
Մեղադրյալ՝
Շիհաբ Փալլիկանդիի /SHIHAB PALLIKANDY, ծնված՝ 14.11.1990թ., Հնդկաստանի Հանրապետության քաղաքացի, անձնագիր՝ Տ6681982, ՀԾՀ՝ 2411901333, կացության քարտ՝ AA 05228/
Պաշտպան՝
ՀՀ փաստաբանների պալատի փաստաբան, Վահե Արմենակյան արտոնագիր 881


Շիհաբ Փալիկանդին մեղադրվում է այն բանի համար, որ նա նկատմամբ այն բանի համար, որ նա 2022թ. մարտի 8-ից մինչև 2023թ. դեկտեմբերի 8-ը մասնակցել է մի խումբ անձանց կողմից 2022թ. մարտին ստեղծված և ղեկավարվող հանցավոր կազմակերպությանը, հանցավոր կազմակերպության անդամների և կազմակերպության անդամ չհանդիսացող այլ անձանց միջոցով իրականացրել է առանձնապես խոշոր չափերով համակարգչային հափշտակություն:
Այսպես. Իսրայելի Պետության քաղաքացիներ Իգոր Գիլլերը և Եվգենի Մարտինիուկը, ինչպես նաև դեռևս քննությամբ չհստակեցված Հայաստանի Հանրապետության ու արտասահմանյան մի խումբ այլ քաղաքացիներ, նախնական համաձայնություն ձեռք բերելով միմյանց հետ տևական ժամանակ համակարգչային հափշտակությունների, փողերի լվացման հետ կապված համասեռ հանցագործություններ կազմակերպելու և կատարելու վերաբերյալ, 2022 թվականի մարտին ստեղծել և մինչև 2023 թվականի դեկտեմբերի 8-ը՝ 2022թ. սեպտեմբերից, Հայկ Թադևոսյանի մասնակցությամբ՝ ներգրավմամբ, շարունակել են ղեկավարել կայուն և միավորված անդրազգային հանցավոր կազմակերպություն, որի շրջանակներում, համատեղելով իրենց հանցավոր դիտավորության մեջ ընդգրկված նպատակներին հասնելուն ուղղված ջանքերը, հավաքագրել և ներգրավել են կազմակերպության առնվազն 144 անդամներ այդ թվում՝ անչափահասներ: Հիշյալ անդամների գործողությունները ղեկավարելու և համակարգելու նպատակով ստեղծել են բազմաստիճան հիերարխիկ կառուցվածք և կատարել մասնագիտացման վրա հիմնված դերաբաշխում, մշակել են վարքագծի և արգելքների ներխմբային նորմեր և հետևել դրանց պահպանմանը, ներդրել են հանցագործությունների կատարման հստակ և մանրակրկիտ մտածված մեխանիզմեր՝ ուղղորդելով քայլերի հաջորդականությունը, ներդրումներ կատարելու և հավելյալ մեծ եկամտաբերությամբ գումարներ վաստակելու ցանկություն հայտնած անձանց (այսուհետ՝ տուժողներ) գիտակցության վրա հոգեբանորեն ներազդելու հնարքները և այլն, ապահովել են հանցանքների կատարման համար անհրաժեշտ համակարգիչներով և այլ տեխնիկական միջոցներով ու ծրագրային ապահովումներով, մեծաթիվ տուժողների գայթակղելու նպատակով սոցիալական ցանցերում իրականացրել են գովազդներ և վստահությունն ամրապնդելու համար ստեղծել և ուղղորդել են կեղծ բովանդակությամբ համացանցային կայքեր՝ CT MATADOR, CRYPTO1CAPITAL, FIVORO, PhoenixTB, EXTON GLOBAL, GREENCAPiTALZ, ROYALCBANK, HORIZON, Green Capital, 24 Options, UFX, Global Markets, Bitcoin Prime, Uptos և այլն, վարձակալել են հարմարավետ գրասենյակային տարածքներ, որտեղ մուտքը վերահսկել են այցեքարտերով և նույնականացմամբ, ստեղծել աշխատանքի, հանգստի ու ժամանցի համար հարմարավետ պայմաններ, ներդրել անդամների ակտիվությունը խրախուսող հավելյալ վարձատրության համակարգեր, ինչպես նաև հանցավոր գործունեությունը քողարկելու և դրա բացահայտումը անհնարին դարձնելու կամ դժվարացնելու նպատակով ձեռնարկել են մի շարք միջոցներ, մասնավորապես՝ հաճախակի ստեղծել և փոփոխել են մտացածին ընկերությունների անվանումները և դրամական փոխանցումները կատարելու համար կիրառվող բանկային հաշվեհամարները, կրիպտոհաշիվները, տուժողների անվամբ են քողարկել կիրառվող հաշվեհամարները, օգտագործել են ինտերնետ հասանելիության աղբյուրը խեղաթյուրող ծրագրեր, էլեկտրոնային տվյալները պահպանել են համացանցային ամպային տիրույթներում /Cloud/, դրանցում առկա տեղեկատվության հայտնաբերումից զերծ մնալու նպատակով նախատեսել են անակնկալ այցելուների դեպքում համակարգչային սարքավորումների էներգամատակարարումը միաժամանակ դադարեցնելու եղանակ, կիրառել են արտասահմանյան վիրտուալ հեռախոսահամարներ, տեսախցիկների հատվածքները փակված և հեռահար եղանակով համացանցին հասանելիություն ստացող բջջային հեռախոսներ, խմբերի կազմում իրավապահ մարմինների աշխատակիցների կամ համագործակցող անձանց ներդնումից խուսափելու նպատակով իրականացրել են նոր ներգրավվող աշխատակիցների ինչպես պոլիգրաֆ սարքով, այնպես էլ իրենց հետ համագործակցող անձնանց միջոցով տարբեր ստուգումներ, աշխատակիցների տվյալների բացահայտումից խուսափելու համար նրանց տրվել են կեղծանուններ ու հերթական համարներ, հրահանգավորել են հնարավոր խնդիրների դեպքում համապատասխան վարքագծի կանոնների վերաբերյալ, տեղադրել և գործարկել են էլեկտրոնային տվյալների և այլ կրիչների ոչնչացման մեխանիզմներ:
Շիհաբ Փալլիկանդին /SHIHAB PALLIKANDY/ 2022 թվականի մարտի 8-ից մինչև 2023թ. դեկտեմբերի 8-ը, գիտակցելով բազմաթիվ այլ անձանց հետ հանցավոր կազմակերպության մեջ միավորվելու և նրանց հետ համատեղ գործելու հանգամանքը՝ անդամակցելով վերոնշված հանցավոր կազմակերպությանը, հանդիսանալով հանցավոր կազմակերպությունում անվանակոչվող Conversion /Կոնվերժն/ այնուհետև՝ Retention /Ռեթենշեն/, որից հետո նաև Recovery /Ռիքովերի/ խմբի անդամ՝ զանգ կատարող /գործակալ, իրավաբան//, հանդես գալով հիմնականում Սեմ Աբրահամ, Նեյլ Վուդ և համանման այլ կեղծանուններով, կապ է հաստատել արտասահմանյան՝ հիմնականում Եվրոպական երկրների բնակիչների՝ զոհերի հետ, ներկայացել որպես իբրև Միացյալ Թագավորության Նորին Մեծության գանձապետարանի աշխատակից՝ հանցավոր կազմակերպության բազմաթիվ անդամների և դրա առաջադրանքով գործող անդամ չհանդիսացող անձանց հետ կատարել է իրենց դիտավորության մեջ ընդգրկված համակարգչային հաշտակություններ, ինչի նպատակով օգտագործել են նախապես ստեղծված համակարգչային համակարգով ու ցանցով գործարկվող հաշիվներ՝ ապահովելով ինչպես իրենց, այնպես էլ կազմակերպության մյուս անդամների կողմից՝ առանց նույնականացում անցած տուժողների թույլտվության կամ իրավաչափ այլ հիմքերի՝ դրանց հասանելիության ստանալու, դրանցում առկա տեղեկատվությունը փոփոխելու և իրականությանը չհամապատասխանող տվյալներ լրացնելու տեխնիկական հնարավորություն /Ֆրոդ/, գործարկել են բարձր տոկոսով շահութաբերություն ապահովող ներդրումներ կատարելու առաջարկ պարունակող կայքեր և նախնական նույնականացումն ապահովող հարթակներ, ինչպես նաև օգտագործել են դրանց շուրջ ձեռք բերված պայմանավորվածությունը հնարավոր ռիսկերից ապահովագրող գոյություն չունեցող ընկերությունների կայք, որոնց մատնանշմամբ հեռահաղորդակցության ընթացքում տուժողներին մոլորեցնելուց և նրանց վստահությունն ամրապնդելուց հետո ուղղորդել են տարբեր չափերի գումարներ փոխանցելու իրենց կողմից կառավարվող հաշվեհամարներին, բանկերի կողմից փոխանցումներ կատարելու թույլտվության համար վճարումներ կատարելու, հափշտակված գումարները հետ վերադարձնելու համար միջնորդավճարներ տրամադրելու և այլ պատրվակներով պահանջել է կատարել հավելյալ գումարների փոխանցումներ՝ ապօրինի, անհատույց իրենցը դարձնելով արտասահմանյան երկրների ավելի քան 1404 տուժողների՝ առանձնապես խոշոր չափերի՝ ավելի քան 810.071.577 ՀՀ դրամ ֆինանսական միջոցները և ստացել դրանք տնօրինելու և օգտագործելու իրական հնարավորություն:
Այսինքն՝ Շիհաբ Փալիկանդին կատարել է ՀՀ քրեական օրենսգրքի 319-րդ հոդվածի 1-ին մասով, ՀՀ քրեական օրենսգրքի 257-րդ հոդվածի 3-րդ մասի 1-ին և 3-րդ կետերով նախատեսված հանցավոր արարքներ:
2025թ. փետրվարի 11-ին կայացված որոշմամբ մեղադրյալ Շիհաբ Փալիկանդիի նկատմամբ որպես խափանման միջոց է կիրառվել բացակայելու արգելքը:
Հիմք ընդունելով ՀՀ քրեական դատավարության օրենսգրքի 460-րդ հոդվածի 4-րդ մասի 9-րդ կետը և ՀՀ քրեական օրենսգրքի 77-րդ հոդվածի 1-ին մասը՝ կողմերը համաձայնվում են մեղադրյալին մեղսագրվող արարքների համար հետևյալ պատժատեսակների և պատժաչափերի վերաբերյալ՝
Շիհաբ Փալիկանդիին մեղավոր ճանաչել ՀՀ քրեական օրենսգրքի 319-րդ հոդվածի 1-ին մասով նախատեսված հանցագործություն կատարելու համար և նրա նկատմամբ որպես պատիժ նշանակել ազատազրկում 5 տարի 3 ամիս ժամկետով:
Շիհաբ Փալիկանդիին մեղավոր ճանաչել ՀՀ քրեական օրենսգրքի 257-րդ հոդվածի 3-րդ մասի 1-ին և 3-րդ կետերով նախատեսված հանցագործություն կատարելու համար և նրա նկատմամբ որպես պատիժ նշանակել ազատազրկում 5 տարի 3 ամիս ժամկետով:
ՀՀ քրեական օրենսգրքի 74-րդ հոդվածի կիրառմամբ Շիհաբ Փալիկանդիի նկատմամբ նշանակված պատիժները մասնակիորեն գումարելով՝ ՀՀ քրեական օրենսգրքի 319-րդ հոդվածի 1-ին մասով նշանակված` 5 տարի 3 ամիս ժամկետով ազատազրկմանը գումարել 257-րդ հոդվածի 3-րդ մասի 1-ին և 3-րդ կետերով՝ ազատազրկում 2 տարի 9 ամիս ժամկետով, նշանակելով ազատազրկում 8 տարի ժամկետով, միաժամանակ ՀՀ քրեական օրենսգրքի 79-րդ հոդվածի 3-րդ մասի համաձայն՝ նշանակված ազատազրկման ձևով պատժին հաշվակցել անազատության մեջ գտնվելու 2 /երկու/ ամիս 29/քսանինը/ օրը՝ վերջնական պատիժ սահմանելով ազատազրկում 7 յոթ տարի 9 ամիս 1 օր ժամկետով: ՀՀ քրեական օրենսգրքի 84-րդ հոդվածի կիրառմամբ պատիժը պայմանականորեն չկիրառել` սահմանելով փորձաշրջան 1 մեկ տարի ժամկետով: Միաժամանակ ՀՀ քրեական օրենսգրքի 59-րդ հոդվածի 4-րդ և 5-րդ մասերի կիրառմամբ՝ Շիհաբ Փալիկանդիի նկատմամբ որպես լրացուցիչ պատիժ նշանակել տուգանք՝ նվազագույն աշխատավարձի քսանապատիկի չափով՝ 1.500.000 ՀՀ դրամ և միաժամանակ ՀՀ քրեական օրենսգրքի 62-րդ հոդվածի կիրառմամբ նշանակել լրացուցիչ պատիժ օտարերկրյա քաղաքացուն Հայաստանի Հանրապետության սահմաններից վտարելը՝ 10 տասը տարի ժամկետով:
Վերջնական պատիժ նշանակել ազատազրկում 7 յոթ տարի 9 ամիս 1 օր ժամկետով, որը պայմանականորեն չկիրառել` սահմանելով փորձաշրջան 1 մեկ տարի ժամկետով, տուգանք 1.500.000 ՀՀ դրամ և Հայաստանի Հանրապետության սահմաններից վտարելը՝ 10 տասը տարի ժամկետով:
Մեղադրյալ Շիհաբ Փալիկանդիի նկատմամբ ընտրված խափանման միջոց բացակայելու արգելքը թողնել անփոփոխ՝ մինչև դատավճռի օրինական ուժի մեջ մտնելը:
Շիհաբ Փալիկանդիի նկատմամբ սահմանել բնակության վայրը փոխելու դեպքում դատապարտյալի վարքագծի նկատմամբ վերահսկողություն իրականացնող իրավասու մարմնին սեղմ ժամկետում իր նոր բնակության վայրի հասցեն հայտնելու, ինչպես նաև առանց դատապարտյալի վարքագծի նկատմամբ վերահսկողություն իրականացնող իրավասու մարմնի համաձայնության Հայաստանի Հանրապետության տարածքը չլքելու պարտականություններ:
Դատական ծախսերը համարել լուծված:
Արձանագրությունը կազմվեց հանրային մեղադրող Ռ․Ասատրյանի կողմից, բանակցությունների կողմերը ծանոթացան կազմված արձանագրությանը, ստացան դրա օրինակը, այն ճիշտ է, որի համար ստորագրում են՝

Հանրային մեղադրող՝ /ստորագրություն/ Ռուզաննա Ասատրյան

Պաշտպան՝ /ստորագրություն/ Վահե Արմենակյան

Մեղադրյալ՝ /ստորագրություն/ Շիհաբ Փալիկանդի»:

IV. Համաձայնեցման վարույթով լրացուցիչ դատալսումներ.
Դատարանը, հաշվի առնելով, որ համաձայնության մասին արձանագրությունը բովանդակային առումով համապատասխանում է օրենքով սահմանված վերաբերելի պահանջներին և բացակայում են ՀՀ քրեական դատավարության օրենսգրքի 461-րդ հոդվածի 2-րդ մասով նախատեսված՝ համաձայնության մասին արձանագրությունը չընդունելու հիմքերը, որոշում է կայացրել լրացուցիչ դատալսումներ անցկացնելու մասին։
Հանրային մեղադրողը հրապարակել է մեղադրյալի և նրա պաշտպանի հետ կնքված, համաձայնության մասին արձանագրությունը, որից հետո մեղադրյալը հայտարարել է, որ կնքված համաձայնության բովանդակությունն իրեն պարզ է, դրան համաձայն է, դրանում արտահայտել է իր իրական կամքը, գիտակցում է կնքված համաձայնության հետևանքները, պնդում է կնքված համաձայնությունը։
Պաշտպանը և դատախազը հայտնել են, որ պնդում են կնքված համաձայնությունը։

V. Դատարանի պատճառաբանությունը և եզրահանգումները.
Համաձայն ՀՀ քրեական դատավարության օրենսգրքի 463-րդ հոդվածի`
«1. Համաձայնեցման վարույթի արդյունքով դատարանը կայացնում է մեղադրական դատավճիռ սույն օրենսգրքի 347-350-րդ հոդվածներով սահմանված կարգով` հաշվի առնելով սույն հոդվածով նախատեսված առանձնահատկությունները:
2. Մեղադրական դատավճիռը պարունակում է համաձայնության մասին արձանագրության տեքստի բառացի շարադրանքը:
3. Մեղադրական դատավճռով դատարանը նշանակում է համաձայնության մասին արձանագրությամբ համաձայնեցված պատիժը (պատժատեսակն ու պատժաչափը), սահմանում է բռնագրավման ենթակա գույքը և դրա չափը:
4. Եթե առկա է գույքային հայց, ապա այն թողնվում է առանց լուծման:
5. Սույն օրենսգրքի 167-րդ հոդվածի 1-ին մասով նախատեսված վարութային ծախսերը մեղադրյալից ենթակա չեն բռնագանձման:
6. Դատավճիռը հրապարակելուց հետո դատավորը կողմերին պարզաբանում է նաև դատավճիռը բողոքարկելու` սույն օրենսգրքով նախատեսված սահմանափակումները»:
Ներկայացված մեղադրանքը մեղադրյալ Շիհաբ Փալիկանդիի կողմից ընդունելու և համաձայնեցման վարույթ կիրառելու պայմաններում` դատարանը գտնում է, որ Շիահաբ Փալիկանդիի կողմից՝ նրա մեղավորությամբ, նրան մեղսագրված արարքների կատարումն ապացուցված է, նրա արարքները ճիշտ են որակված և համապատասխանում են ՀՀ քրեական օրենսգրքի 319-րդ հոդվածի 1-ին մասով, ՀՀ քրեական օրենսգրքի 257-րդ հոդվածի 3-րդ մասի 1-ին և 3-րդ կետերի հատկանիշներին:
Հաշվի առնելով, որ կատարած հանցագործության համար մեղադրյալ Շիհաբ Փալիկանդիի նկատմամբ պատժատեսակների և պատժաչափերի, այն պայմանականորեն չկիրառելու վերաբերյալ հարցերը համաձայնեցվել են կողմերի միջև, դատարանը՝ ղեկավարվելով ՀՀ քրեական դատավարության օրենսգրքի 463-րդ հոդվածի 3-րդ մասով, գտնում է, որ դրանք պետք է լուծվեն ըստ համաձայնության մասին արձանագրության:
Քննության առնելով մեղադրյալի նկատմամբ ընտրված խափանման միջոցի հարցը՝ դատարանը գտնում է, որ այն պետք է թողնել անփոփոխ` մինչ դատավճռի օրինական ուժի մեջ մտնելը:
Նկատի ունենալով, որ ՀՀ քրեական դատավարության օրենսգրքի 463-րդ հոդվածի 5-րդ մասի համաձայն՝ «Սույն օրենսգրքի 167-րդ հոդվածի 1-ին մասով նախատեսված վարույթային ծախսերը մեղադրյալից ենթակա չեն բռնագանձման», ուստի այդ հարցը պետք է համարել լուծված:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 9-րդ, 347-349-րդ, 458-464-րդ հոդվածներով դատարանը

Վ Ճ Ռ Ե Ց

Շիհաբ Փալիկանդիին մեղավոր ճանաչել ՀՀ քրեական օրենսգրքի 319-րդ հոդվածի 1-ին մասով և 257-րդ հոդվածի 3-րդ մասի 1-ին և 3-րդ կետերով նախատեսված արարքներում և հիմք ընդունելով համաձայնության գալու մասին կողմերի միջև 2025 թվականի հունիսի 26-ին կազմված արձանագրությունը, Շիհաբ Փալիկանդիի նկատմամբ պատիժ նշանակել՝
ՀՀ քրեական օրենսգրքի 319-րդ հոդվածի 1-ին մասով՝ ազատազրկում 5 տարի 3 ամիս ժամկետով՝ Հայաստանի Հանրապետության տարածքից վտարելով 10 տարի ժամկետով:
ՀՀ քրեական օրենսգրքի 257-րդ հոդվածի 3-րդ մասի 1-ին և 3-րդ կետերով՝ ազատազրկում 5 տարի 3 ամիս ժամկետով և տուգանք՝ նվազագույն աշխատավարձի քսանապատիկի՝ 1.500.000 ՀՀ դրամ գումարի չափով:
ՀՀ քրեական օրենսգրքի 74-րդ հոդվածի 1-ին, 4-րդ և 10-րդ մասերի կանոններով ՀՀ քրեական օրենսգրքի 319-րդ հոդվածի 1-ին մասով՝ նաշանակված հիմնական պատժին՝ 5 տարի 3 ամիս ժամկետով ազատազրկմանը մասնակիորեն գումարել մյուս արարքով նշանակված հմնական պատժից 2 տարի 9 ամիս ժամկետով ազատազրկումը, իսկ լրացուցիչ պատիժները լրիվ գումարելու միջոցով վերջնական պատիժ նշանակել ազատազրկում 8/ութ/ տարի ժամկետով՝ Հայաստանի Հանրապետության տարածքից վտարում 10 տարի ժամկետով և տուգանք՝ նվազագույն աշխատավարձի քսանապատիկի՝ 1.500.000 ՀՀ դրամ գումարի չափով:
ՀՀ քրեական օրենսգրքի 79-րդ հոդվածի 3-րդ մասի կանոնով ազատազրկման ձևով նշանակված պատժին հաշվակցել Շիհաբ Փալիկանդիին անազատության մեջ գտնվելու 2 ամիս 29 օրը և թողնել կրելու ազատազրկում 7 /յոթ/ տարի 9/ինը/ ամիս 1/մեկ/ օր ժամկետով:
ՀՀ քրեական օրենսգրքի 84-րդ հոդվածի կիրառմամբ նշանակված ազատազրկանման ձևով պատիժը պայմանականորեն չկիրառել՝ սահմանելով փորձաշրջան 1 տարի ժամկետով:
Շիհաբ Փալիկանդիի վարքագծի նկատմամբ վերահսկողությունը դնել ՀՀ ԱՆ պրոբացիայի ծառայության համապատասխան բաժնի վրա՝ ըստ բնակության վայրի: Շիհաբ Փալիկանդիին պարտավորեցնել՝ բնակության վայրը փոխելու դեպքում սեղմ ժամկետում իր նոր բնակության վայրի հասցեն հայտնել վերահսկողություն իրականացնող մարմնին և առանց իրավասու մարմնի թույլտվության չլքել ՀՀ տարածքը:
Շիհաբ Փալիկանդիի նկատմամբ ընտրված խափանման միջոցը՝ բացակայելու արգելքը, վերացնել` դատավճռի օրինական ուժի մեջ մտնելուց հետո:
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան այն ստանալու օրվանից հետո՝ մեկամսյա ժամկետում, բացառությամբ ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով և 377-րդ հոդվածով նախատեսված հիմքերի:



ԴԱՏԱՎՈՐ Դ.ԲԱԼԱՅԱՆ