Գործ ԵԴ1/0562/01/25


Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ
28.02.2025 թվական ք.Երևան

Երևան քաղաքի առաջին ատյանի ընդհանուր իրավասության քրեական դատարանը /դատավոր Դ.Բալայան/, համաձայնությամբ տուգանք նշանակելու վարույթի կիրառմամբ, գրավոր ընթացակարգով, քննության առնելով վարույթն ըստ մեղադրանքի՝
Երվանդ Հայկազի Էքմեքչյանի, ծնված՝ 11.01.1995 թվականին Երևան քաղաքում,
ազգությամբ հայ, ՀՀ քաղաքացի, չամուսնացած, խնամքին ոչ ոք, աշխատում է «Քրոսս Թեքնիքս» ՍՊԸ-ում, որպես օդանավերի պահեստամասերի պահեստի մասնագետ/ավիամեխանիկ, չդատված, բնակվում է քաղաք Երևան, Նուբարաշեն 17-րդ փողոց, 9-րդ տուն հասցեում, որպես խափանման միջոց է ընտրված բացակայելու արգելքը, մեղադրվում է ՀՀ քրեական օրենսգրքի 396-րդ հոդվածի 1-ին մասով

I.Գործի դատավարական նախապատմությունը.
2023 թվականի սեպտեմբերի 11-ին՝ ժամը 21:30-ին, Երվանդ Էքմեքչյանը ձերբակալվել է թմրանյութ ձեռք բերելու, պահելու, օգտագործելու և իրացնելու համար անմիջականորեն ծագած հիմնավոր կասկածով /հատոր 1-ին գ.թ. 6-7/:
Նույն օրը ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնի քննիչ Հ.Հովհաննիսյանը կազմել է արձանագրություն ՀՀ քրեական օրենսգրքի 393-րդ հոդվածի 1-ին մասի և 396-րդ հոդվածի 1-ին մասի հատկանիշներով թիվ 14865123 քրեական վարույթը նախաձեռնելու վերաբերյալ /հատոր 1-ին գ.թ. 8-9/:
2023 թվականի սեպտեմբերի 12-ին որոշում է կայացվել Երվանդ Էքմեքչյանին հանցանք կատարած լինելու անմիջականորեն ծագած հիմնավոր կասկածի հիմքով ձերբակալելու մասին /հատոր 1-ին գ.թ. 16-17/:
2023 թվականի սեպտեմբերի 13-ին որոշում է կայացվել ձերբակալված Երվանդ Էքմեքչյանին ազատ արձակել ձերբակալումից՝ նրան անազատության մեջ պահելու անհրաժեշտությունը վերանալու հիմքով /հատոր 1-ին գ.թ. 51-52/:
2024 թվականի դեկտեմբերի 16-ին Երևան քաղաքի Արաբկիր և Քանաքեռ-Զեյթուն վարչական շրջանների դատախազության դատախազ Էդ.Գրիգորյանը որոշում է կայացրել Երվանդ Էքմեքչյանի նկատմամբ ՀՀ քրեական օրենսգրքի 396-րդ հոդվածի 1-ին մասով հանրային քրեական հետապնդում հարուցելու մասին. «/…/ այն հանցանքը կատարելու համար, որ նա, խախտելով «Թմրամիջոցների և հոգեմետ (հոգեներգործուն) նյութերի մասին» ՀՀ օրենքի 11-րդ հոդվածի 2-րդ կետի, ՀՀ կառավարության 2010 թվականի մարտի 18-ի թիվ 270-Ն որոշման պահանջները, այն է՝ չունենալով բժշկական նպատակներով կամ բժշկի նշանակմամբ թմրամիջոցների և հոգեմետ /հոգեներգործուն/ նյութերի շրջանառություն իրականացնելու՝ թմրամիջոց ձեռք բերելու, պահելու, տարածելու, իրացնելու թույլտվություն, առանց իրացնելու նպատակի, «Տելեգրամ» սոցիալական հարթակի «OverdoseYvnChannel» օգտատիրոջից ապօրինի ձեռք է բերել և պահել ՀՀ կառավարության 2018 թվականի հունիսի 27-ի թիվ 707-Ն որոշման 1-ին հավելվածով՝ ՀՀ քրեական օրենսգրքի 393-րդ հոդվածի 4-րդ մասի հաշվարկման հիմքով մանր չափերի նվազագույն շեմի հնգապատիկից մինչև քսանհինգապատիկը ներառող չափով՝ զգալի չափերի՝ 0.086 գրամ ընդհանուր քաշով «Մեթամֆետամին» տեսակի թմրամիջոց, որը Երվանդ Հայկազի Էքմեքչյանի մոտից հայտնաբերվել է 2023 թվականի սեպտեմբերի 11-ին՝ ժամը 21:30-ի սահմաններում, Երևան քաղաքի Ն.Տիգրանյան հասցեի մոտից ապօրինի թմրամիջոց ձեռք բերելու, պահելու անմիջականորեն ծագած հիմնավոր կասկածի առկայության հիմքով ձերբակալելուց և ՀՀ ՆԳՆ ոստիկանության Արաբկիրի բաժին տեղափոխելուց հետո կատարված անձնական խուզարկությամբ /հատոր 1-ին գ.թ. 98-99/:
2024 թվականի դեկտեմբերի 17-ին Երվանդ Էքմեքչյանի նկատմամբ որպես խափանման միջոց է կիրառվել բացակայելու արգելքը /հատոր 1-ին գ.թ. 100-102/:
Նույն օրը Երվանդ Էքմեքչյանին է ներկայացվել է մեղադրանքը և պարզաբանվել են մեղադրյալի իրավունքներն ու պարտականությունները /հատոր 1-ին գ.թ. 105-107, 108/:
2024 թվականի դեկտեմբերի 17-ին որոշում է կայացվել թիվ 14865123 քրեական վարույթից ՀՀ քրեական օրենսգրքի 393-րդ հոդվածի 1-ին մասով վարույթը՝ 14832724 համարով անջատելու մասին /հատոր 1-ին գ.թ. 112-115/:
2025 թվականի հունվարի 15-ին կազմվել է արձանագրություն համաձայնությամբ տուգանք նշանակելու վարույթ նախաձեռնելու մասին /հատոր 1-ին գ.թ. 142-144/:
2025 թվականի հունվարի 29-ին կազմվել է մեղադրական եզրակացությունը /հատոր 1-ին գ.թ. 148-157/:
2025 թվականի փետրվարի 10-ին Երևան քաղաքի Արաբկիր և Քանաքեռ-Զեյթուն վարչական շրջանների դատախազության դատախազ Դ.Կյուրեղյանը որոշում է կայացրել մեղադրական եզրակացությունը հաստատելու մասին /հատոր 1-ին գ.թ. 161-162/:
2025 թվականի փետրվարի 13-ին քրեական վարույթը մուտք է եղել դատարան, էլեկտրոնային եղանակով մակագրվել և երեք օր անց հանձնվել է դատավոր Դ.Բալայանին /հատոր 1-ին գ.թ. 160/:
2025 թվականի փետրվարի 17-ին որոշում է կայացվել քրեական գործը վարույթ ստանձնելու և համաձայնությամբ տուգանք նշանակելու վարույթ հարուցելու մասին: Հիշյալ որոշումը մեղադրյալը ստացել է 20.02.2025 թվականին և որևէ տեղեկատվություն մինչ դատական ակտի հրապարակման օրը չի ներկայացրել /հատոր 1-ին գ.թ. 163-164, 167-168/:

II. Համաձայնությամբ տուգանք նշանակելու վարույթ կիրառելու մեղադրյալի համաձայնությունը և դրա քննարկումը
Ուսումնասիրելով քրեական գործի նյութերը, և հաշվի առնելով համաձայնությամբ տուգանք նշանակելու վարույթ նախաձեռնելու վերաբերյալ կազմված արձանագրությունը, դատարանն արձանագրում է, որ մեղադրյալը ծանուցվել է համաձայնությամբ տուգանք նշանակելու վարույթ կիրառելու հնարավորության և իրավական հետևանքների մասին, ինչպես նաև քննիչի, պաշտպանի և մեղադրյալի մասնակցությամբ կազմվել է արձանագրություն առ այն, որ մեղադրյալ՝ Երվանդ Էքմեքչյանը չի վիճարկում իրեն ներկայացված մեղադրանքի փաստական հիմքն ու իրավական գնահատականը, պաշտպանի հետ խորհրդակցելուց հետո կամավոր ցանկություն է հայտնում, որ դատարանում գործի քննությունն իրականացվի համաձայնությամբ տուգանք նշանակելու վարույթի կարգով:
Համաձայնությամբ տուգանք նշանակելու վարույթ կիրառելու հնարավորության և իրավական հետևանքների մասին մեղադրյալին ծանուցելիս հանրային մեղադրողն իր համաձայնությունն է հայտնել հիշյալ վարույթը կիրառելու վերաբերյալ։
Հիմք ընդունելով, որ քրեական գործում առկա է ՀՀ քրեական դատավարության օրենսգրքի 464.6-րդ հոդվածով սահմանված կարգով կազմված և ստորագրված՝ մեղադրյալի համաձայնությամբ տուգանք նշանակելու վարույթ կիրառելու իրավունքը բացատրելու մասին արձանագրություն, միևնույն ժամանակ բացակայում են նույն օրենսգրքի 464.7-րդ հոդվածի 2-րդ մասով նախատեսված հանգամանքները, դատարանը որոշում է կայացրել քրեական գործը վարույթ ստանձնելու և համաձայնությամբ տուգանք նշանակելու վարույթ հարուցելու մասին:

III.Դատարանի պատճառաբանությունը և եզրահանգումները.
Ներկայացված մեղադրանքը մեղադրյալ Երվանդ Էքմեքչյանի կողմից ընդունելու և համաձայնությամբ տուգանք նշանակելու վարույթ կիրառելու պայմաններում` դատարանը գտնում է, որ մեղադրյալ Երվանդ Էքմեքչյանի կողմից՝ նրա մեղավորությամբ, նրան մեղսագրված արարքի կատարումն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 396-րդ հոդվածի 1-ին մասով նախատեսված հանցագործության հատկանիշիներին։
Դատարանը, հաստատված համարելով հանցագործության և դրա կատարման մեջ Երվանդ Էքմեքչյանի մեղքի ապացուցված լինելը, գտնում է, որ նա ենթակա է պատժի կատարածի համար:
Դատարանը՝ ղեկավարվելով ՀՀ քրեական օրենսգրքի 7-րդ հոդվածի 1-ին, 55-րդ և 69-րդ հոդվածներով, գտնում է, որ մեղադրյալ Երվանդ Էքմեքչյանի նկատմամբ պատիժ նշանակելիս պետք է առաջնորդվել ՀՀ քրեական օրենսգրքի 77-րդ հոդվածի 6-րդ մասի կանոնով, այն է՝ ավարտված կամ չավարտված հանցագործություններով համաձայնությամբ տուգանք նշանակելու վարույթի դեպքում նշանակվում է սույն օրենսգրքի Հատուկ մասի համապատասխան հոդվածի սանկցիայով նախատեսված տուգանքի նվազագույն չափը՝ առանց լրացուցիչ պատիժ և անվտանգության միջոց նշանակելու:
Հաշվի առնելով որ ՀՀ ՊԵԿ տվյալների շտեմարանում առկա տեղեկատվության համաձայն Երվանդ Էքմեքչյանի աշխատավարձի և դրան հավասարեցված այլ վճարումների վերաբերյալ տվյալներով վերջինիս ամսական եկամտի՝ հանցանքն ավարտվելու օրվան նախորդող 12 ամիսների ընթացքում ստացած միջին ամսական եկամտի 35 տոկոսը, հաշվարկի արդյունքով պակաս է ստացվում նվազագույն աշխատավարձի չափից, դատարանն արձանագրում է, որ տուգանքի չափի հաշվարկը պետք է իրականացվի ՀՀ քրեական օրենսգրքի 59-րդ հոդվածի 5-րդ մասով սահմանված կարգով՝ «Նվազագույն ամսական աշխատավարձի մասին» օրենքով սահմանված նվազագույն ամսական աշխատավարձի չափով: Հիմք ընդունելով, որ «Նվազագույն ամսական աշխատավարձի մասին» ՀՀ օրենքի 1-ին հոդվածի համաձայն ՀՀ-ում ամսական նվազագույն աշխատավարձը սահմանված է 75.000 ՀՀ դրամը՝ դատարանը գտնում է, որ մեղադրյալ Երվանդ Էքմեքչյանի նկատմամբ պետք է նշանակել ՀՀ քրեական օրենսգրքի 396-րդ հոդվածի 1-ին մասի սանկցիայով նախատեսված տուգանքի նվազագույն չափը՝ տուգանք նվազագույն աշխատավարձի հնգապատիկի՝ 375.000 /երեք հարյուր յոթանասունհինգ հազար/ ՀՀ դրամի չափով։
Դատարանը հաշվի առնելով, որ մեղադրյալը 2 օր՝ 2023 թվականի սեպտեմբերի 11-ից 13-ը, գտնվել է անազատության մեջ և ղեկավարվելով ՀՀ քրեական օրենսգրքի 79-րդ հոդվածի 4-րդ մասի կանոնով, գտնում է, որ Երվանդ Էքմեքչյանի նկատմամբ նշանակված պատիժը պետք է մեղմացնել` այն սահմանելով տուգանք 350.000 ՀՀ դրամի չափով:
Միևնույն ժամանակ՝ հաշվի առնելով, որ մինչդատական վարույթի ընթացքում մեղադրյալը խնդրել է իր նկատմամբ նշանակվող տուգանքը տարաժամկետել 12 ամիս ժամկետով ու հիմք ընդունելով, որ որևէ տեղեկություն չի տրամադրվել նրա գույքային դրության մասին, դատարանը գտնում է, որ Երվանդ Էքմեքչյանն ի վիճակի չէ անհապաղ և ամբողջությամբ վճարել տուգանքը: ՀՀ քրեական օրենսգրքի 59-րդ հոդվածի 8-րդ մասի համաձայն՝ եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում։ Դատարանը գտնում է, որ մեղադրյալի նկատմամբ նշանակված տուգանքը վճարելու համար պետք է սահմանել 5 ամիս ժամկետ՝ յուրաքանչյուր ամիս 70.000 ՀՀ դրամ վճարելու պայմանով: Միաժամանակ դատարանն արձանագրում է, որ վճարման մեկ տարի ժամկետի սահմանումը կոնկետ դեպքում երակարաժմկետ է և չի կարող ծառայել պատժի նպատակների իրագործմանը:
Քննության առնելով մեղադրյալի նկատմամբ ընտրված խափանման միջոցի հարցը, դատարանը գտնում է, որ այն ենթակա է վերացման մինչ դատավճռի օրինական ուժի մեջ մտնելը:
Անդրադառնալով իրեղեն ապացույց ճանաչված «մեթամֆետամին» տեսակի թմրամիջոցի և կանեփ բույսի բաղադրատարր հանդիսացող «տետրահիդրոկաննաբինոլ (ՏՀԿ)» տեսակի թմրամիջոցի հետքեր պարունակող ապակե գլանակի տնօրինման հարցին դատարանը գտնում է, որ դրանք պետք է հանձնել ՀՀ ՔԿ Երևան քաղաքի քննչական վարչության Արաբկիր վարչական շրջանների քննչական բաժնին՝ թիվ 14832724 քրեական վարույթով տնօրինելու նպատակով:
Նկատի ունենալով, որ ՀՀ քրեական դատավարության օրենսգրքի 4649 հոդվածի 4-րդ մասի համաձայն՝ «Սույն օրենսգրքի 167-րդ հոդվածի 1-ին մասով նախատեսված վարույթային ծախսերը մեղադրյալից ենթակա չեն բռնագանձման», ուստի այդ հարցը պետք է համարել լուծված:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 9-րդ, 347-349-րդ և 464.9 հոդվածներով, դատարանը

Վ Ճ Ռ Ե Ց

Երվանդ Հայկազի Էքմեքչյանին մեղավոր ճանաչել ՀՀ քրեական օրենսգրքի 396-րդ հոդվածի 1-ին մասով նախատեսված արարքում և պատիժ նշանակել` տուգանք նվազագույն աշխատավարձի հնգապատիկի՝ 375.000 ՀՀ դրամի չափով:
ՀՀ քրեական օրենսգրքի 79-րդ հոդվածի 4-րդ մասի կանոնի կիրառմամբ Երվանդ Էքմեքչյանի նկատմամբ նշանակված պատիժը մեղմացնել` սահմանելով տուգանք 350.000 ՀՀ դրամ չափով:
Տուգանքը վճարելու համար սահմանել 5 ամիս ժամկետ՝ յուրաքանչյուր ամիս 70.000 ՀՀ դրամ վճարելու պայմանով:
Երվանդ Էքմեքչյանի նկատմամբ ընտրված խափանման միջոցը՝ բացակայելու արգելքը, վերացնել:
Իրեղեն ապացույց ճանաչված «մեթամֆետամին» տեսակի թմրամիջոցը և կանեփ բույսի բաղադրատար հանդիսացող «տետրահիդրոկաննաբինոլ (ՏՀԿ)» տեսակի թմրամիջոցի հետքեր պարունակող ապակե գլանակը հանձնել ՀՀ ՔԿ Երևան քաղաքի քննչական վարչության Արաբկիր վարչական շրջանի քննչական բաժնին՝ թիվ 14832724 քրեական վարույթով տնօրինելու նպատակով:
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան ստանալու օրվանից հետո՝ մեկամսյա ժամկետում՝ բացառությամբ ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով և 377-րդ հոդվածով նախատեսված հիմքերով:


ԴԱՏԱՎՈՐ Դ.ԲԱԼԱՅԱՆ