ԵԴ1/0542/01/25




ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«08» մայիսի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` Դատարան)

նախագահությամբ՝ դատավոր Տաթևիկ Մուրադյանի,
քարտուղարությամբ՝ Ագնետա Հակոբյանի,

մասնակցությամբ՝
հանրային մեղադրող՝ Ռիտա Հարությունյանի,
մեղադրյալ՝ Արսեն Մկրտչյանի,

դռնբաց դատական նիստում քննելով քրեական գործն ըստ մեղադրանքի՝
Արսեն Վահանի Մկրտչյանի՝
(ծնված՝ 06.05.1997թ. ք. Սիսիան, ազգությամբ հայ, ՀՀ քաղաքացի, միջնակարգ կրթությամբ, չամուսնացած, աշխատում է «ՎՈՒԴՈՒ ԼԱՈՒՆՋ» ՍՊԸ-ում՝ որպես բարմեն, դատապարտված, հաշվառված՝ Սյունիքի մարզի Սիսիան քաղաքի Նորաշեն թաղամասի 7 Ա տանը, բնակվող՝ Երևան քաղաքի Ագաթանգեղոս փողոցի 7-րդ շենքի 251-րդ բնակարան հասցեում) ՀՀ քրեական օրենսգրքի 344-րդ հոդվածի 2-րդ մասով,

ՊԱՐԶԵՑ

1. Քրեական գործի դատավարական նախապատմությունը.
2024 թվականի դեկտեմբերի 25-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության հատկանիշներով նախաձեռնվել է թիվ 60763724 քրեական վարույթը:
2025 թվականի հունվարի 20-ին ՀՀ դատախազության Երևան քաղաքի Կենտրոն և Նորք-Մարաշ վարչական շրջանների դատախազության դատախազ Ռ.Հարությունյանի որոշմամբ՝ թիվ 60763724 քրեական վարույթով Արսեն Վահանի Մկրտչյանի նկատմամբ ՀՀ քրեական օրենսգրքի 344-րդ հոդվածի 2-րդ մասով հարուցվել է հանրային քրեական հետապնդում:
Նախաքննության մարմնի 2025 թվականի հունվարի 21-ի որոշմամբ Արսեն Վահանի Մկրտչյանի նկատմամբ որպես խափանման միջոց է ընտրվել բացակայելու արգելքը։
2025 թվականի փետրվարի 12-ին Երևան քաղաքի առաջին ատյանի ընդհանուր իրավասության քրեական դատարան է ստացվել քրեական գործն ըստ մեղադրանքի՝ Արսեն Վահանի Մկրտչյանի՝ ՀՀ քրեական օրենսգրքի 344-րդ հոդվածի 2-րդ մասով, որին շնորհվել է ԵԴ1/0542/01/25 համարը:
Նույն օրը քրեական գործն էլեկտրոնային եղանակով մակագրվել և 2025 թվականի փետրվարի 13-ին հանձնվել է Երևան քաղաքի առաջին ատյանի ընդհանուր իրավասության քրեական դատարանի դատավոր Տաթևիկ Մուրադյանին։
2025 թվականի փետրվարի 14-ին Դատարանի կողմից որոշում է կայացվել թիվ ԵԴ1/0542/01/25 քրեական գործի վարույթն ստանձնելու և նախնական դատալսումներ նշանակելու մասին։
2025 թվականի փետրվարի 28-ին, Դատարանը թիվ ԵԴ1/0542/01/25 քրեական գործով կայացրել է մեղադրական վերդիկտ՝ Արսեն Վահանի Մկրտչյանին մեղավոր ճանաչելով ՀՀ քրեական օրենսգրքի 344-րդ հոդվածի 2-րդ մասով նախատեսված արարքի կատարման մեջ:

2. Մեղադրանքի փաստական նկարագրությունը.
Արսեն Վահանի Մկրտչյանին մեղադրանք է ներկայացվել ՀՀ քրեական օրենսգրքի 344-րդ հոդվածի 2-րդ մասով այն բանի համար, որ «նա չունենալով տրանսպորտային միջոցներ վարելու իրավունք և գտնվելով ոչ սթափ վիճակում (սթափության վիճակի զննման կտրոնի համարը՝ 02451)՝ մեկ լիտր արտաշնչած օդի մեջ մաքուր ալկոհոլի պարունակությունը 0.283 մգ/լ (առնվազն՝ 0.2547 մգ/լ՝ նկատի ունենալով ստուգաչափող թիվ 91100888 ալկոտեստեր սարքի չափման ճշտության հնարավոր 10% սխալանքը), 2024 թվականի դեկտեմբերի 13-ին՝ ժամը 03:57-ին, Երևան քաղաքի Սայաթ-Նովա փողոցում վարել է «Նիսսան» մակնիշի 37 ZX 091 հաշվառման համարանիշի տրանսպորտային միջոցը, որի վերաբերյալ ՀՀ ոստիկանության պարեկային ծառայության պարեկի կողմից նույն օրը կազմվել է վարչական իրավախախտման վերաբերյալ թիվ 8180415855 արձանագրությունը։»։

3. Դատաքննության ընթացքում հետազոտված թույլատրելի ապացույցները.
Հիմնական դատալսումների ընթացքում հետազոտված թույլատրելի ապացույցները.
- Դատաքննության ընթացքում մեղադրյալ Արսեն Վահանի Մկրտչյանը ցուցմունք տվեց այն մասին, որ տեղյակ է եղել իր տրանսպորտային միջոցներ վարելու իրավունք չունենալու մասին: Տրանսպորտային միջոց վարելը չի եղել խիստ հրատապ, պարզապես պետք է մեքենան տուն տաներ: Հավելեց, որ ընդունում է իրեն առաջադրված մեղադրանքը:
(դատական նիստի արձանագրություն)
- Նախաքննության մարմնի կողմից 17.01.2025թ. կազմված զննում կատարելու մասին արձանագրությունը, համաձայն որի` վարչական իրավախախտման վերաբերյալ կազմված թիվ 8180415855 արձանագրության պատճենի զննությամբ պարզվել է, որ 13.12.2024թ Երևան քաղաքի Սայաթ-Նովա փողոցում՝ ժամը 04:20-ին ՀՀ ոստիկանության պարեկային ծառայության 3-րդ գումարտակի 1-ին վաշտի ավագ պարեկ Արսեն Հովհաննիսյանը /կրծքանշանի համար 05234/ Արսեն Վահանի Մկրտչյանի նկատմամբ կազմել է վարչական իրավախախտման վերաբերյալ արձանագրություն, ըստ որի Արսեն Վահանի Մկրտչյանը 13.12.2024 թվականին՝ ժամը 03:57-ին Երևան քաղաքի Սայաթ-Նովա փողոցում վարել է «Նիսսան» մակնիշի 37 ZX 091 հաշվառման համարանիշի տրանսպորտային միջոցը՝ չունենալով տրանսպորտային միջոցներ վարելու իրավունք և ոչ սթափ վիճակում: Նշված արձանագրությանը վարորդը ծանոթացել է և ստորագրել։
Ալկոհոլի պարունակության ստուգման կտրոնի պատճենը, համաձայն որի՝ սարքի համարն է 91100888, զննման համարը՝ 02451, զննման ամսաթիվը՝ 13.12.2024, ժամը՝ 04:03-ին, ստուգումը կատարվել է ավտոմատ, ալկոհոլի պարունակությունը՝ 0.283 մգ/լ, վարորդի անունը՝ Արսեն, ազգանունը՝ Մկրտչյան, տրանսպորտային միջոցի համարանիշը՝ 37 ZX 091, ՊԾ ազգանունը՝ Հովհաննիսյան, կրծքանշանի համար 05234, ստորաբաժանում՝ 3-րդ գումարտակ 1-ին վաշտ:
Սթափության սարքի ստուգաչափման թիվ 131488 վկայականի պատճենը, համաձայն որի՝ ստուգաչափման թվականն է՝ 13.08.2024թ., այն ուժի մեջ է մինչև 2025 թվականի օգոստոսի 13-ը: Չափման միջոցի անվանումը և տեսակը՝ Ալկոմետր, գործարանային համարը՝ 91100888, տեսակը՝ Jupiter X/RP, չափման տիրույթը՝ 0.000-2.000 մգ/լ, արտադրողը՝ Չինաստան, պատկանում է՝ ՀՀ ՆԳՆ ոստիկանություն:
Ճանապարհային ոստիկանության էլեկտրոնային ռեգիստրից արտատպված փաստաթղթի պատճենը, համաձայն որի՝ Արսեն Վահանի Մկրտչյանը տրանսպորտային միջոցներ վարելու իրավունքի վկայական չի ստացել։
(գ.թ. 13-14, դատական նիստի արձանագրություն)
- Նախաքննության մարմնի կողմից 2025 թվականի հունվարի 17-ին կայացված արտավարութային փաստաթուղթ ճանաչելու մասին որոշումը, համաձայն որի՝ արտավարութային փաստաթուղթ են ճանաչվել վարչական իրավախախտման վերաբերյալ թիվ 8180415855 արձանագրությունը, ալկոհոլի պարունակության ստուգման կտրոնի և ստուգաչափման վկայականի, Ճանապարհային ոստիկանության էլեկտրոնային ռեգիստրից արտատպված փաստաթղթի պատճենները, որոնք կցվել են քրեական վարույթի նյութերին:
(գ.թ. 4, 5, 6, 8, 15-16, դատական նիստի արձանագրություն)
Լրացուցիչ դատալսումների ընթացքում հետազոտված թույլատրելի ապացույցները.
 ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից ստացված տեղեկանքը, համաձայն որի՝ Արսեն Վահանի Մկրտչյանը ունի դատվածություն:
 Դատարանի հարցմանն ի պատասխան՝ ՀՀ ԱՆ պրոբացիայի ծառայության Երևանի քաղաքային մարմնի պետի գրությունը, համաձայն որի՝ Երևան քաղաքի առաջին ատյանի ընդհանուր իրավասության քրեական դատարանի 05.11.2024 թվականի թիվ ԵԴ1/0924/15/24 որոշմամբ՝ դատապարտյալ Ա.Մկրտչյանից բռնագանձման ենթակա է նրա նկատմամբ թիվ ԵԴ1/0514/01/24 դատավճռով նշանակված 375.000 (երեք հարյուր յոթանասունհինգ հազար) ՀՀ դրամին համարժեք գույքի չվճարված մասի՝ 355.000 (երեք հարյուր հիսունհինգ հազար) ՀՀ դրամին համարժեք գույք:
 Դատարանի հարցմանն ի պատասխան՝ ՀՀ ՊԵԿ հարկ վճարողների սպասարկման վարչության պետի գրությունը, համաձայն որի՝ հանցանքը կատարելուն նախորդող տասներկու ամիսների ընթացքում Արսեն Մկրտչյանը ստացել է ընդհանուր 1.639.946 մեկ միլիոն վեց հարյուր երեսունինը հազար ինը հարյուր քառասունվեց ՀՀ դրամի չափով եկամուտ։

4. Դատարանի փաստական վերլուծությունները և հաստատված կամ հերքված փաստական հանգամանքները.
Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը գտնում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարելու, որ Արսեն Մկրտչյանը, չունենալով տրանսպորտային միջոցներ վարելու իրավունք և գտնվելով ոչ սթափ վիճակում (սթափության վիճակի զննման կտրոնի համարը՝ 02451)՝ մեկ լիտր արտաշնչած օդի մեջ մաքուր ալկոհոլի պարունակությունը 0.283 մգ/լ (առնվազն՝ 0.2547 մգ/լ՝ նկատի ունենալով ստուգաչափող թիվ 91100888 ալկոտեստեր սարքի չափման ճշտության հնարավոր 10% սխալանքը), 2024 թվականի դեկտեմբերի 13-ին՝ ժամը 03:57-ին, Երևան քաղաքի Սայաթ-Նովա փողոցում վարել է «Նիսսան» մակնիշի 37 ZX 091 հաշվառման համարանիշի տրանսպորտային միջոցը, որի վերաբերյալ ՀՀ ոստիկանության պարեկային ծառայության պարեկի կողմից նույն օրը կազմվել է վարչական իրավախախտման վերաբերյալ թիվ 8180415855 արձանագրությունը։
Դատարանը գտնում է, որ դատավճռի հիմքում դրված՝ փոխկապակցված վերաբերելի, թույլատրելի, հավաստի ապացույցների ամբողջությունը բացառում է Արսեն Վահանի Մկրտչյանին ներկայացված մեղադրանքի ապացուցվածության վերաբերյալ ցանկացած հիմնավոր կասկած։
Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները. Արսեն Վահանի Մկրտչյանը ունի դատվածություն, մեղսագրվող հանցանքը ավարտվելու օրվան նախորդող 12 ամիսների ընթացքում վերջինիս ստացած ընդհանուր եկամուտը կազմել է 1.639.946 մեկ միլիոն վեց հարյուր երեսունինը հազար ինը հարյուր քառասունվեց ՀՀ դրամ, նրա ստացած միջին ամսական եկամուտը կազմում է 136.662 ՀՀ դրամ, որի 35 տոկոսը կազմում է 47.831 ՀՀ դրամ, որը պակաս է նվազագույն աշխատավարձի չափից։

5. Դատարանի իրավական վերլուծությունները, հետևությունները և որոշումները.
Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, Դատարանը հանգում է հետևության, որ ապացուցված է Արսեն Վահանի Մկրտչյանին վերագրվող արարքը, այդ արարքի քրեական հակաիրավականությունը, այդ արարքը մեղադրյալի կողմից կատարելը, ինչպես նաև նրա մեղավորությունը տվյալ արարքի կատարման մեջ:
Դատարանը հանգում է այն հետևության, որ մեղադրյալ Արսեն Վահանի Մկրտչյանը կատարել է իրեն մեղսագրված արարքը, որոնց նկատմամբ կիրառելի է ՀՀ քրեական օրենսգրքի 344-րդ հոդվածի 2-րդ մասը:
Դատարանը, հաստատված համարելով հանցագործության և դրա կատարման մեջ Արսեն Վահանի Մկրտչյանի մեղքի ապացուցված լինելը, գտնում է, որ նա ենթակա է պատժի կատարած հանցանքի համար:
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, գտնում է, որ Արսեն Վահանի Մկրտչյանի պատասխանատվությունն ու պատիժը մեղմացնող հանգամանք պետք է դիտել ներկայացված մեղադրանքում իրեն լիովին մեղավոր ճանաչելը և կատարածի համար զղջալը (Դատարանի նման մոտեցումը համահունչ է Սերոբ Սարգսյանի գործով 2012 թվականի նոյեմբերի 1-ի թիվ ՍԴ/0109/01/12 որոշման 27-րդ կետում ՀՀ վճռաբեկ դատարանի արտահայտած իրավական դիրքորոշմանը:
Դատարանն արձանագրում է, որ Արսեն Վահանի Մկրտչյանի պատասխանատվությունն ու պատիժը ծանրացնող հանգամանք պետք է համարել հանցանքը դատվածություն ունեցող անձի կողմից կատարելը:
Դատարանը, հաշվի առնելով Արսեն Վահանի Մկրտչյանի կատարած հանցանքի հանգամանքները, նրա անձը բնութագրող տվյալները, պատասխանատվությունը և պատիժը մեղմացնող հանգամանքը, պատասխանատվությունը և պատիժը ծանրացնող հանգամանքը, ՀՀ քրեական օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ ՀՀ քրեական օրենսգրքի 344-րդ հոդվածի 2-րդ մասի սանկցիայով որպես հիմնական պատիժ է նախատեսված նաև տուգանքի ձևով և ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար նշված հանցագործությունների կատարման համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ ՀՀ քրեական օրենսգրքի 344-րդ հոդվածի 2-րդ մասով հիմնական պատիժ պետք է նշանակել տուգանքի ձևով, ընդ որում տուգանքի չափ սահմանելով՝ նվազագույն աշխատավարձի վեցապատիկի՝ 450.000 (չորս հարյուր հիսուն հազար) ՀՀ դրամ գումարի չափով։
Հիմք ընդունելով ՀՀ ԱՆ պրոբացիայի ծառայության Երևանի քաղաքային մարմնի պետի գրությունը, համաձայն որի՝ Երևան քաղաքի առաջին ատյանի ընդհանուր իրավասության քրեական դատարանի 05.11.2024 թվականի թիվ ԵԴ1/0924/15/24 որոշմամբ՝ դատապարտյալ Ա.Մկրտչյանից բռնագանձման ենթակա է նրա նկատմամբ թիվ ԵԴ1/0514/01/24 դատավճռով նշանակված 375.000 (երեք հարյուր յոթանասունհինգ հազար) ՀՀ դրամին համարժեք գույքի չվճարված մասի՝ 355.000 (երեք հարյուր հիսունհինգ հազար) ՀՀ դրամին համարժեք գույք՝ Դատարանը գտնում է, որ պատիժ նշանակելիս դատավճիռների համակցության ՀՀ քրեական օրենսգրքի 75-րդ հոդվածով սահմանված կարգը պետք է չկիրառել։
Դատարանը միաժամանակ գտնում է, որ կատարած հանցանքի համար Արսեն Վահանի Մկրտչյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
Միաժամանակ հաշվի առնելով վերջինիս գույքային դրության վերաբերյալ գործում առկա տվյալները և մեղադրյալի հայտարարությունը՝ Դատարանը գտնում է, որ Արսեն Վահանի Մկրտչյանի նկատմամբ նշանակվող տուգանքի վճարումը պետք է տարաժամկետել և նրան թույլատրել որպես պատիժ նշանակված 450.000 (չորս հարյուր հիսուն հազար) ՀՀ դրամի չափով տուգանքը վճարել մաս առ մաս 1 (մեկ) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Դատարանը, անդրադառնալով ՀՀ քրեական դատավարության 348-րդ հոդվածով նախատեսված՝ դատավճիռ կայացնելիս դատարանի լուծմանը ենթակա մյուս հարցերին, արձանագրում է, որ գործով իրեղեն ապացույցներ չկան, գույքային հայց ներկայացված չէ, առկա չէ նաև հատուցման ենթակա գույքային այլ վնաս և դրա ապահովման նպատակով արգելադրված որևէ գույք, քրեական վարույթով առկա չեն նաև վարութային ծախսեր:
Անդրադառնալով մեղադրյալի նկատմամբ ընտրված խափանման միջոցի հարցին՝ Դատարանն արձանագրում է, որ վերջինիս նկատմամբ որպես խափանման միջոց ընտրված բացակայելու արգելքը պետք է թողնել անփոփոխ՝ մինչև դատավճռի օրինական ուժի մեջ մտնելը, իսկ դրանից հետո պետք է վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 167-րդ, 347-350-րդ և 352-353-րդ հոդվածներով` Դատարանը

ՎՃՌԵՑ

Արսեն Վահանի Մկրտչյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության կատարման մեջ և նրա նկատմամբ պատիժ նշանակել տուգանք՝ նվազագույն աշխատավարձի վեցապատիկի՝ 450.000 (չորս հարյուր հիսուն հազար) ՀՀ դրամի չափով:
Արսեն Վահանի Մկրտչյանին թույլատրել որպես պատիժ նշանակված 450.000 (չորս հարյուր հիսուն հազար) ՀՀ դրամի չափով տուգանքը վճարել մաս առ մաս 1 (մեկ) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Արսեն Վահանի Մկրտչյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել։
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում:




ԴԱՏԱՎՈՐ ՏԱԹԵՎԻԿ ՄՈՒՐԱԴՅԱՆ