ԵԴ1/0545/01/25



Դ Ա Տ Ա Վ Ճ Ի Ռ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

<<07>> օգոստոսի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև՝ Դատարան)

նախագահությամբ՝ դատավոր Գ.Ս.Պողոսյանի,
քարտուղարությամբ՝ Վ.Շահինյանի,
Լ.Ալոյանի և
Ս.Բունոյանի,
մասնակցությամբ՝
հանրային մեղադրող՝ Ռ.Հարությունյանի,
մեղադրյալ՝ Խ.Հունանյանի,
պաշտպան՝ Ա.Մկրտչյանի,

դռնբաց դատական նիստում, քննելով քրեական գործն ըստ մեղադրանքի Խաչատուր Անդրանիկի Հունանյանի (ծնված՝ 1993 թվականի մայիսի 15-ին, ՀՀ Գեղարքունիքի մարզի Վարդենիս քաղաքում, ազգությամբ հայ, ՀՀ քաղաքացի, չամուսնացած, նախկինում չդատված, միջնակարգ կրթությամբ, չի աշխատում, հաշվառված՝ ՀՀ Գեղարքունիքի մարզի Վարդենիս քաղաքի Տիգրան Մեծի փողոցի 28-րդ տուն հասցեում, փաստացի բնակվող՝ Երևան քաղաքի Խուդյակով փողոցի 84/2 շենքի 20-րդ բնակարան հասցեում)՝ Հայաստանի Հանրապետության քրեական օրենսգրքի 344-րդ հոդվածի 1-ին մասով,

ՊԱՐԶԵՑ

Գործի դատավարական նախապատմությունը.
1. 2024 թվականի դեկտեմբերի 17-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ Մարինե Կոստանդյանի կողմից կազմված արձանագրության համաձայն՝ ՀՀ քրեական օրենսգրքի 344-րդ հոդվածի 1-ին մասով նախաձեռնվել է թիվ 60755424 քրեական վարույթը:
2025 թվականի հունվարի 13-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնում կազմված <<Հանրային քրեական հետապնդում հարուցելու մասին>> միջնորդությամբ՝ ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ Մ.Կոստանդյանը միջնորդել է թիվ 60755424 քրեական վարույթով հսկող դատախազին՝ Խաչատուր Անդրանիկի Հունանյանի նկատմամբ ՀՀ քրեական օրենսգրքի 344-րդ հոդվածի 1-ին մասով հարուցել քրեական հետապնդում:
2025 թվականի հունվարի 13-ին Երևան քաղաքի Կենտրոն և Նորք-Մարաշ վարչական շրջանների դատախազության դատախազ Ռ.Հարությունյանի կողմից կայացված <<Հանրային քրեական հետապնդում հարուցելու մասին>> որոշմամբ որոշվել է՝ թիվ 60755424 քրեական վարույթով նախաքննություն իրականացնող քննիչ Մ.Կոստանդյանի միջնորդությունը բավարարել և Խաչատուր Անդրանիկի Հունանյանի նկատմամբ ՀՀ քրեական օրենսգրքի 344-րդ հոդվածի 1-ին մասով հարուցել հանրային քրեական հետապնդում, որը Խաչատուր Անդրանիկի Հունանյանին ներկայացվել է 2025 թվականի հունվարի 15-ին:
2025 թվականի հունվարի 14-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնում կայացված <<Խափանման միջոց բացակայելու արգելք կիրառելու մասին>> որոշմամբ՝ թիվ 60755424 քրեական վարույթով Խաչատուր Անդրանիկի Հունանյանի նկատմամբ խափանման միջոց է կիրառվել բացակայելու արգելքը:
2025 թվականի փետրվարի 10-ին Երևան քաղաքի Կենտրոն և Նորք-Մարաշ վարչական շրջանների դատախազության դատախազ Ռ.Հարությունյանի կողմից կայացված <<Մեղադրական եզրակացությունը հաստատելու և վարույթի նյութերը դատարան հանձնելու մասին>> որոշմամբ որոշվել է՝ հաստատել թիվ 60755424 քրեական վարույթով մեղադրական եզրակացությունն ըստ մեղադրանքի Խաչատուր Անդրանիկի Հունանյանի՝ ՀՀ քրեական օրենսգրքի 344-րդ հոդվածի 1-ին մասով և վարույթի նյութերը հանձնել Երևան քաղաքի առաջին ատյանի ընդհանուր իրավասության քրեական դատարան՝ ըստ էության քննելու համար:
2025 թվականի փետրվարի 12-ին Երևան քաղաքի առաջին ատյանի ընդհանուր իրավասության քրեական դատարան է ստացվել քրեական գործն ըստ մեղադրանքի Խաչատուր Անդրանիկի Հունանյանի՝ ՀՀ քրեական օրենսգրքի 344-րդ հոդվածի 1-ին մասով։
Քրեական գործին շնորհվել է թիվ ԵԴ1/0545/01/25 համարը:
2025 թվականի փետրվարի 12-ին դատարաններում գործերի բաշխման հատուկ համակարգչային ծրագրի միջոցով քրեական գործը մակագրվել է դատավոր Գևորգ Պողոսյանին, իսկ 2025 թվականի փետրվարի 13-ին հանձնվել է վերջինիս աշխատակազմին:
2025 թվականի փետրվարի 17-ին Երևան քաղաքի առաջին ատյանի ընդհանուր իրավասության քրեական դատարանի դատավոր Գ.Ս.Պողոսյանի կողմից կայացված որոշմամբ՝ ստանձնվել թիվ ԵԴ1/0545/01/25 քրեական գործով վարույթը և նախնական դատալսումներ է նշանակվել:
2025 թվականի մայիսի 20-ի Երևան քաղաքի առաջին ատյանի ընդհանուր իրավասության քրեական դատարանի որոշմամբ՝ մեղադրյալ Խաչատուր Անդրանիկի Հունանյանի նկատմամբ կիրառված այլընտրանքային խափանման միջոցը՝ բացակայելու արգելքը, թողնվել է անփոփոխ:
2025 թվականի օգոստոսի 07-ին Երևան քաղաքի առաջին ատյանի ընդհանուր իրավասության քրեական դատարանը մեղադրյալ Խաչատուր Անդրանիկի Հունանյանի նկատմամբ կայացրել է արդարացման վերդիկտ՝ ապացուցված չհամարելով մեղադրյալ Խաչատուր Անդրանիկի Հունանյանին վերագրվող փաստական հանգամանքները՝ արարքը:

Մեղադրանքի փաստական նկարագրությունը.
2. Խաչատուր Անդրանիկի Հունանյանի նկատմամբ ՀՀ քրեական օրենսգրքի 344-րդ հոդվածի 1-ին մասով հանրային քրեական հետապնդում է հարուցվել այն բանի համար, որ <<[Ն]ա, տրանսպորտային միջոցներ վարելու իրավունքը կասեցված վիճակում վարել է ավտոմեքենա:
Այսպես.
ՀՀ ՆԳՆ ոստիկանության պարեկային ծառայության կողմից թիվ 8400770091 վարչական իրավախախտման գործով 2024 թվականի նոյեմբերի 11-ին կայացված որոշմամբ Խաչատուր Անդրանիկի Հունանյանի տրանսպորտային միջոցներ վարելու իրավունքը կասեցվել է 6 (վեց) ամիս ժամանակով՝ սկսած 2024 թվականի նոյեմբերի 11-ից մինչև 2025 թվականի մայիսի 11-ը: Ծանուցված լինելով իր՝ տրանսպորտային միջոցներ վարելու իրավունքը կասեցված լինելու մասին՝ Խաչատուր Անդրանիկի Հունանյանը 2024 թվականի դեկտեմբերի 02-ին՝ ժամը 00:05-ին, Երևան քաղաքի Գ.Լուսավորիչ փողոցում վարել է <<Տոյոտա>> մակնիշի 01 OY 022 հաշվառման համարանիշի տրանսպորտային միջոցը, որի վերաբերյալ նույն օրը ՀՀ ոստիկանության պարեկային ծառայության պարեկի կողմից կազմվել է վարչական իրավախախտման վերաբերյալ թիվ 8180418821 արձանագրությունը:>>:

Դատաքննության ընթացքում հետազոտված թույլատրելի ապացույցները.
3. Մեղադրյալ Խաչատուր Անդրանիկի Հունանյանը հիմնական դատալսումների ընթացքում ցուցմունք տվեց այն մասին, որ ինքն իմացել է, որ իր վարորդական իրավունքի կասեցման վերաբերյալ պարեկային ծառայության որոշումը բողոքարկելու դեպքում, մեքենա վարելու իրավունք ունի: Պրակտիկայում եղել են դեպքեր, որ տեսանկարահանող սարքերով հայտնաբերված իրավախախտումների որոշումները բողոքարկվել են և այդ ընթացքում բալերը չեն հանվել: Հայտնեց, որ ինքը բողոքարկել է իրեն մեղսագրվող արարքում նշված օրվանից առաջ, սակայն հստակ չի հիշում, թե կոնկրետ որ օրը, քանի որ իր փաստաբանն է բողոքը ներկայացրել դատարան: Համապատասխան որոշման բողոքարկամ հանգամանքով պայմանավորված ինքը շարունակել է մեքենա վարել: Նշեց նաև, որ վարչական դատարանի կողմից իր հայցը բավարարվել է ու ինքը համոզված է եղել, որ իր հայցը բավարարվելու է՝ հաշվի առնելով, որ նշված վայրում, որտեղ ինքն իբրև դուրս է եկել հանդիպակաց երթևեկելի գոտի, գծանշում առկա չի եղել:
(տե՛ս դատական նիստի արձանագրությունը)
3.1. 2024 թվականի նոյեմբերի 11-ին՝ ժամը 10:19-ին ՀՀ ոստիկանության պարեկային ծառայության պարեկ Վլադիմիր Մկրտչյանի կողմից կազմված <<Վարչական իրավախախտման վերաբերյալ թիվ 8400770091 արձանագրության>> համաձայն՝ Խաչատուր Անդրանիկի Հունանյանը 2024 թվականի նոյեմբերի 11-ին՝ ժամը 10:13-ին Երևան քաղաքի Լենինգրադյան փողոցում վարել է <<Տոյոտա>> մակնիշի 01 OY 022 հաշվառման համարանիշի տրանսպորտային միջոցը՝ դուրս գալով հանդիպակաց երթևեկության գոտի, որը կապված չէ վազանցը թույլատրված տեղերում վազանց կատարելու կամ կանգնած տրանսպորտային միջոցը կամ խոչընդոտը շրջանցելու համար: Արձանագրությանը ծանոթանալու, իրավունքների ու պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումը ստանալու հատվածում առկա է վարորդի ստորագրությունը: Որոշում է կայացվել Խաչատուր Անդրանիկի Հունանյանի՝ տրանսպորտային միջոցներ վարելու իրավունքը կասեցնել՝ 6 (վեց) ամիս ժամկետով: Որոշման պատճենը և կատարման կարգի մասին քաղվածքն ստացա հատվածում առկա է վարորդի ստորագրությունը:
(տե՛ս գ.թ. 6 և դատական նիստի արձանագրությունը)
3.2. 2024 թվականի դեկտեմբերի 02-ին՝ ժամը 00:15-ին ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի 1-ին վաշտի ավագ պարեկ Ռուբեն Գրիգորյանի կողմից կազմված <<Վարչական իրավախախտման վերաբերյալ թիվ 8180418821 արձանագրության>> համաձայն՝ Խաչատուր Անդրանիկի Հունանյանը 2024 թվականի դեկտեմբերի 02-ին՝ ժամը 00:05-ին, Երևան քաղաքի Գրիգոր Լուսավորիչ փողոցում վարել է <<Տոյոտա>> մակնիշի 01 OY 022 հաշվառման համարանիշի տրանսպորտային միջոցը՝ տրանսպորտային միջոցներ վարելու իրավունքը կասեցված վիճակում: Արձանագրության վարչական իրավախախտում կատարած անձի բացատրությունը, դիտողությունը և ստորագրությունը հատվածում առկա է <<հասցեատերը հրաժարվեց ստորագրելուց>> նշումը: Արձանագրությանը ծանոթանալու, իրավունքների ու պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումը ստանալու հատվածում առկա է <<հրաժարվեց ստորագրելուց>> նշումը:
(տե՛ս գ.թ. 4 և դատական նիստի արձանագրությունը)
3.3. <<ՀՀ ՆԳՆ ոստիկանության Ճանապարհային ոստիկանության էլեկտրոնային ռեգիստրից արտատպված քաղվածքի>> համաձայն՝ <<Վարորդական վկայականների որոնում>> բաժնում լրացված են Խաչատուր Անդրանիկի Հունանյանի անձնական տվյալները, կարգավիճակը՝ կասեցված, սկիզբը՝ 11.11.2024 թվական, ավարտը՝ 11.05.2025 թվական:
(տե՛ս գ.թ. 5 և դատական նիստի արձանագրությունը)
3.4. Հիմնական դատալսումների ընթացքում հրապարակվել և հետազոտվել են նաև 2025 թվականի հունվարի 09-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ Մ.Կոստանդյանի կողմից կազմված <<Զննություն կատարելու մասին>> արձանագրությունը և նույն օրը նույն քննիչի կողմից կայացված <<Արտավարութային փաստաթուղթ ճանաչելու մասին>> որոշումը:
(տե՛ս գ.թ. 11-14 և դատական նիստի արձանագրությունը)
3.5. Հիմնական դատալսումների ընթացքում հրապարակվել և հետազոտվել է նաև 2025 թվականի օգոստոսի 07-ի Երևան քաղաքի առաջին ատյանի ընդհանուր իրավասության քրեական դատարանի որոշմամբ արտավարութային փաստաթուղթն ապացույց ճանաչված թիվ ՎԴ2/0113/05/25 վարչական գործով ՀՀ վարչական դատարանի 2025 թվականի մայիսի 12-ի վճիռը, որի համաձայն՝ Խաչատուր Անդրանիկի Հունանյանի հայցը բավարարվել է: Անվավեր է ճանաչվել ՀՀ ներքին գործերի նախարարության ոստիկանության պարեկային ծառայության 11.11.2024 թվականի թիվ 8400770091 որոշումը և այն անփոփոխ թողնելու մասին 07.01.2025 թվականի վարչական բողոքի վերաբերյալ որոշումը։ Վճռվել է նաև ՀՀ ներքին գործերի նախարարության ոստիկանության պարեկային ծառայությունից հօգուտ Խաչատուր Անդրանիկի Հունանյանի բռնագանձել 10.380 դրամ, որից 10.000 դրամը պետական տուրքի, իսկ 380 դրամը փոստային ծախսերի գծով կատարված դատական ծախսերի փոխհատուցում: Օրինական ուժի մեջ մտնելուց ոչ ուշ, քան 10 օր հետո դատական ծախսերի հատուցման վճարումը չկատարելու դեպքում դատական ծախսերի մասով վճիռը կկատարվի հարկադիր կատարումն ապահովող ծառայության միջոցով՝ պարտապանի հաշվին:
(տե՛ս դատական նիստի արձանագրությունը)
3.6. Հիմնական դատալսումների ընթացքում հրապարակվել և հետազոտվել է նաև 2025 թվականի օգոստոսի 07-ի Երևան քաղաքի առաջին ատյանի ընդհանուր իրավասության քրեական դատարանի որոշմամբ արտավարութային փաստաթուղթն ապացույց ճանաչված ՀՀ փաստաբանների պալատի հանրային պաշտպանի գրասենյակի փաստաբան Ա.Մկրտչյանին հասցեագրված՝ ՀՀ վարչական դատարանի աշխատակազմի ղեկավարի պաշտոնակատար Ն.Բադալյանի 2025 թվականի հուլիսի 05-ի թիվ ԴԴԱ-5-Ե-55164/25 գրությունը, որի համաձայն՝ թիվ ՎԴ2/0113/05/25 վարչական գործով ՀՀ վարչական դատարանի վճիռն օրինական ուժի մեջ մտնելու վերաբերյալ Ձեր դիմումի կապակցությամբ հայտնում եմ, որ ԴԱՏԱԼԵՔՍ դատական տեղեկատվական համակարգի համաձայն՝ թիվ ՎԴ2/0113/05/25 վարչական գործով ՀՀ վարչական դատարանի 12.05.2025 թվականի վճիռը 13.06.2025 թվականին մտել է օրինական ուժի մեջ:
(տե՛ս դատական նիստի արձանագրությունը)

Լրացուցիչ դատալսումների ընթացքում հետազոտված թույլատրելի ապացույցները.
4. Լրացուցիչ դատալսումների ընթացքում ապացույցներ չեն հետազոտվել։

Դատարանի կողմից հաստատված կամ հերքված փաստական հանգամանքները.
5. Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանն արձանագրում է, որ առկա չէ փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարել, որ.
Խաչատուր Անդրանիկի Հունանյանը տրանսպորտային միջոցներ վարելու իրավունքը կասեցված վիճակում վարել է ավտոմեքենա:
Այսպես.
ՀՀ ՆԳՆ ոստիկանության պարեկային ծառայության կողմից թիվ 8400770091 վարչական իրավախախտման գործով 2024 թվականի նոյեմբերի 11-ին կայացված որոշմամբ Խաչատուր Անդրանիկի Հունանյանի տրանսպորտային միջոցներ վարելու իրավունքը կասեցվել է 6 (վեց) ամիս ժամանակով՝ սկսած 2024 թվականի նոյեմբերի 11-ից մինչև 2025 թվականի մայիսի 11-ը: Ծանուցված լինելով իր՝ տրանսպորտային միջոցներ վարելու իրավունքը կասեցված լինելու մասին՝ Խաչատուր Անդրանիկի Հունանյանը 2024 թվականի դեկտեմբերի 02-ին՝ ժամը 00:05-ին, Երևան քաղաքի Գ.Լուսավորիչ փողոցում վարել է <<Տոյոտա>> մակնիշի 01 OY 022 հաշվառման համարանիշի տրանսպորտային միջոցը, որի վերաբերյալ նույն օրը ՀՀ ոստիկանության պարեկային ծառայության պարեկի կողմից կազմվել է վարչական իրավախախտման վերաբերյալ թիվ 8180418821 արձանագրությունը:
Դատարանն արձանագրում է, որ դատավճռի հիմքում դրված՝ փոխկապակցված վերաբերելի, թույլատրելի, հավաստի ապացույցների ամբողջությունը հիմնավորում է Խաչատուր Անդրանիկի Հունանյանին ներկայացված մեղադրանքի ապացուցված չլինելու վերաբերյալ ցանկացած հիմնավոր կասկած:

Դատարանի իրավական վերլուծությունը և եզրահանգումը.
6. Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով՝ Դատարանը հանգում է հետևության, որ ապացուցված չէ Խաչատուր Անդրանիկի Հունանյանին վերագրվող արարքը:
Դատարանը վերը նշված հետևության հանգելիս մասնավորապես՝ հաշվի է առնում, որ հիմնական դատալսումների ընթացքում հետազոտված ապացույցներով հաստատված է, որ Խաչատուր Անդրանիկի Հունանյանի տրանսպորտային միջոցներ վարելու իրավունքը 6 (վեց) ամիս ժամկետով կասեցվել է 2024 թվականի նոյեմբերի 11-ին կազմված վարչական իրավախախտման վերաբերյալ թիվ 8400770091 արձանագրության հիման վրա՝ օրենքով սահմանված կարգի խախտմամբ։
Մասնավորապես, ՀՀ վարչական դատարանի 2025 թվականի մայիսի 12-ի թիվ ՎԴ2/0113/05/25 որոշմամբ՝ Խաչատուր Անդրանիկի Հունանյանի հայցը բավարարվել է, անվավեր է ճանաչվել ՀՀ ներքին գործերի նախարարության ոստիկանության պարեկային ծառայության 11.11.2024 թվականի թիվ 8400770091 որոշումը և այն անփոփոխ թողնելու մասին 07.01.2025 թվականի վարչական բողոքի վերաբերյալ որոշումը և նշված դատական ակտն օրինական ուժի մեջ է մտել 2025 թվականի հունիսի 13-ին։
Այսպիսով, սույն վարույթի հիմնական դատալսումների ընթացքում հետազոտված ապացույցներով հաստատվել է, որ Խաչատուր Անդրանիկի Հունանյանի տրանսպորտային միջոցներ վարելու իրավունքը 6 (վեց) ամիս ժամկետով կասեցնելու մասին 2024 թվականի նոյեմբերի 11-ի վարչական ակտը եղել է ոչ իրավաչափ, այն է՝ վարչական ակտն ընդունվել է օրենքի խախտմամբ և դրանով խախտվել են Խաչատուր Անդրանիկի Հունանյանի՝ օրենքով և այլ իրավական ակտերով ամրագրված իրավունքներն ու ազատությունները։
Առկա պայմաններում, հնարավոր չէ հաստատված համարել, որ 2024 թվականի դեկտեմբերի 02-ին՝ ժամը 00:05-ին, Երևան քաղաքի Գ.Լուսավորիչ փողոցում <<Տոյոտա>> մակնիշի 01 OY 022 հաշվառման համարանիշի տրանսպորտային միջոցը վարելիս Խաչատուր Անդրանիկի Հունանյանը ՀՀ քրեական օրենսգրքի 344-րդ հոդվածի 4-րդ մասի իմաստով հանդիսացել է տրանսպորտային միջոցներ վարելու իրավունքը օրենքով սահմանված կարգով կասեցված անձ:
Այսինքն՝ Խաչատուր Անդրանիկի Հունանյանի արարքում բացակայում է ՀՀ քրեական օրենսգրքի 344-րդ հոդվածի 1-ին մասով նախատեսված հանցակազմի օբյեկտիվ կողմը, որպիսի պայմաններում նրա նկատմամբ պետք է կայացվի արդարացման դատավճիռ։
Դատարանը հարկ է համարում նաև իր անհամաձայնությունը հայտնել եզրափակիչ ելույթի ընթացքում հանրային մեղադրողի արտահայտած այն դիրքորոշմանը, որ Խաչատուր Անդրանիկի Հունանյանի արարքում առկա են նրան մեղսագրվող հանցակազմի հատկանիշները, քանի որ արարքը կատարելու պահի դրությամբ վերջինիս տրանսպորտային միջոցներ վարելու իրավունքը կասեցնելու մասին վարչական ակտն անվավեր ճանաչված չի եղել։
Այդ առնչությամբ Դատարանը հարկ է համարում արձանագրել, որ անձի դատապարտման հիմքում չի կարող դրվել ոչ իրավաչափ՝ օրենքի խախտմամբ ընդունված և անձի իրավունքները խախտող վարչական ակտի պահանջները չկատարելու հանգամանքը՝ անկախ նրանից, որ կոնկրետ գործողությունը կատարելու պահի դրությամբ նշված վարչական ակտի ապօրինի լինելու հանգամանքը դեռևս հաստատված չի եղել։
Վերոգրյալների հիման վրա, ինչպես նաև հիմք ընդունելով 2025 թվականի օգոստոսի 07-ին կայացված արդարացման վերդիկտը՝ Դատարանը հանգում է հետևության, որ պետք է ճանաչել և հռչակել Խաչատուր Անդրանիկի Հունանյանի անմեղությունը ՀՀ քրեական օրենսգրքի 344-րդ հոդվածի 1-ին մասով նախատեսված հանցանքի կատարման մեջ՝ իրեն վերագրվող փաստական հանգամանքներն ապացուցված չլինելու հիմքով:
7. Դատարանը, անդրադառնալով ՀՀ քրեական դատավարության 348-րդ հոդվածով նախատեսված՝ դատավճիռ կայացնելիս դատարանի լուծմանն ենթակա մյուս հարցերին, արձանագրում է, որ ՀՀ քրեական դատավարության օրենսգրքի 348-րդ հոդվածի 1-ին մասի 2-րդ, 3-րդ, 4-րդ կետերով նախատեսված հարցերին անդրադառնալը առարկայազուրկ է, բացի այդ սույն քրեական գործով իրեղեն ապացույցներ չկան, գույքային հայց ներկայացված չէ, առկա չէ նաև հատուցման ենթակա գույքային այլ վնաս և դրա ապահովման նպատակով արգելադրված որևէ գույք, քրեական գործով առկա չեն նաև վարութային ծախսեր:
8. Ինչ վերաբերում է Խաչատուր Անդրանիկի Հունանյանի ռեաբիլիտացիայի հարցին, ապա այն պետք է համարել լուծված, քանի որ լրացուցիչ դատալսումների ընթացքում արդարացված մեղադրյալը ՀՀ քրեական դատավարության օրենսգրքի 164-րդ հոդվածով նախատեսված որևէ պահանջ չի ներկայացրել։
9. Անդրադառնալով մեղադրյալի նկատմամբ կիրառված խափանման միջոցի հարցին՝ Դատարանն արձանագրում է, որ վերջինիս նկատմամբ որպես խափանման միջոց կիրառված բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը, իսկ դրանից հետո պետք է վերացնել:
10. Ելնելով վերոգրյալից և ղեկավարվելով ՀՀ քրեական դատավարության օրենսգրքի 167-րդ, 347-350-րդ, 352-353-րդ և 364-րդ հոդվածներով՝ Դատարանը

Վ Ճ Ռ Ե Ց

Ճանաչել և հռչակել Խաչատուր Անդրանիկի Հունանյանի անմեղությունը ՀՀ քրեական օրենսգրքի 344-րդ հոդվածի 1-ին մասով նախատեսված հանցանքի կատարման մեջ՝ նրան վերագրվող փաստական հանգամանքներն ապացուցված չլինելու հիմքով:
Խաչատուր Անդրանիկի Հունանյանի ռեաբիլիտացիայի հարցը համարել լուծված:
Խաչատուր Անդրանիկի Հունանյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը, իսկ դրանից հետո՝ վերացնել:
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո՝ մեկամսյա ժամկետում:



ԴԱՏԱՎՈՐ Գ.Ս.ՊՈՂՈՍՅԱՆ