ԵԴ1/0541/01/25







Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

Հայաստանի Հանրապետության Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան),

Նախագահող դատավոր Ս.ԳԶՈԳՅԱՆԻ
քարտուղարությամբ Լ.ՉՈԲԱՆՅԱՆԻ
մասնակցությամբ
հանրային մեղադրող Գ․ՄՈՒՐԱԴՅԱՆԻ
մեղադրյալ Հ․ՎԱՐԴԱՆՅԱՆԻ


2025 թվականի օգոստոսի 12-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի`
Հրանտ Մայիսի Վարդանյանի՝ ծնված 1991 թվականի օգոստոսի 26-ին, ք․Երևան, հայ, ՀՀ քաղաքացի, ութամյա կրթությամբ, ամուսնացած, ըստ իր հայտարարության խնամքին՝ մեկ անչափահաս երեխա, նախկինում դատապարտված, կատարում է մասնավոր աշխատանքներ, փաստացի բնակվում է ք․Երևան, Ա․Հովհաննիսյան 25/1 հասցեում, մեղադրանք է առաջադրվել 2 դրվագ ՀՀ քրեական օրենսգրքի 344-րդ հոդվածի 2-րդ մասով, որպես խափանման միջոց է ընտրվել բացակայելու արգելքը,

ՊԱՐԶԵՑ

1.Գործի դատավարական նախապատմությունը
2024 թվականի ապրիլի 25-ին ՀՀ քրեական օրենսգրքի 344-րդ հոդվածի 2-րդ մասի հատկանիշներով նախաձեռնվել է թիվ 60-1593-24 քրեական վարույթը:
2024 թվականի հուլիսի 30-ին ՀՀ քրեական օրենսգրքի 344-րդ հոդվածի 2-րդ մասի հատկանիշներով նախաձեռնվել է թիվ 60-2838-24 քրեական վարույթը:
Նախաքննական մարմնի 2024 թվականի հուլիսի 30-ի որոշմամբ թիվ 60283824 քրեական վարույթը միացվել է թիվ 60159324 քրեական վարույթին։
2025 թվականի հունվարի 30-ի որոշմամբ Հրանտ Մայիսի Վարդանյանի նկատմամբ քրեական հետապնդում է հարուցվել 2 դրվագ ՀՀ քրեական օրենսգրքի 344-րդ հոդվածի 2-րդ մասով այն արարքների համար, որ նա, չունենալով տրանսպորտային միջոց վարելու իրավունք, հարբած, ոչ սթափ վիճակում վարել է տրանսպորտային միջոց:
Այսպես.
Հրանտ Վարդանյանը, չունենալով տրանսպորտային միջոց վարելու իրավունք, 2023 թվականի հունիսի 17-ին՝ ժամը 21:30-ի սահմաններում, Երևան քաղաքի Արցախի պողոտայով ոչ սթափ վիճակում՝ արտաշնչած օդի մեջ ալկոհոլի 1.138 միլիգրամ պարունակությամբ, վարել է «Օպել» մակնիշի 37 PX 140 հաշվառման համարանիշի տրանսպորտային միջոցը, որպիսի փաստն արձանագրվել է թիվ 8180257888 արձանագրությամբ:
(․․․)
Բացի այդ, Հրանտ Վարդանյանը, չունենալով տրանսպորտային միջոց վարելու իրավունք, 2024 թվականի հուլիսի 13-ին՝ ժամը 03:20-ի սահմաններում, Երևան քաղաքի Րաֆֆու փողոցով ոչ սթափ վիճակում՝ արտաշնչած օդի մեջ ալկոհոլի 0.568 միլիգրամ պարունակությամբ, վարել է «ՇԵՎՐՈԼԵՏ» մակնիշի 37 20 448 հաշվառման համարանիշի տրանսպորտային միջոցը, որպիսի փաստն արձանագրվել է թիվ 8180400265 արձանագրությամբ:
(․․․)
Այսպիսով՝ Հրանտ Վարդանյանին մեղսագրվում է ՀՀ քրեական օրենսգրքի 344-րդ հոդվածի 2-րդ մասով և ՀՀ քրեական օրենսգրքի 344-րդ հոդվածի 2-րդ մասով նախատեսված հանցանքների կատարում::
2025 թվականի հունվարի 31-ի որոշմամբ Հրանտ Մայիսի Վարդանյանի նկատմամբ որպես խափանման միջոց է ընտրվել բացակայելու արգելքը:
2025 թվականի փետրվարի 12-ին քրեական գործը մեղադրական եզրակացությամբ ստացվել է Երևան քաղաքի առաջին ատյանի ընդհանուր իրավասության քրեական դատարանում, գործին շնորհվել է ԵԴ1/0541/01/25 համարը, մակագրվել է դատավոր Գ․Պողոսյանին:
2025 թվականի հունիսի 10-ին գործը վերամակագրվել և հանձնվել է դատավոր ՍԳզոգյանին։
2025 թվականի հունիսի 12-ին Դատարանի դատավոր Ս.Գզոգյանը որոշում է կայացրել վարույթը ստանձնելու և նախնական դատալսումներ նշանակելու մասին։
2025 թվականի օգոստոսի 12-ին Դատարանը Հրանտ Մայիսի Վարդանյանի նկատմամբ կայացրել է մեղադրական վերդիկտ։


2.Դատարանում հետազոտված և գնահատված ապացույցներ
Մեղադրյալ Հրանտ Մայիսի Վարդանյանն առաջադրված մեղադրանքում իրեն մեղավոր է ճանաչել, հիմնական դատալսումների ընթացքում, օգտվելով իր իրավունքներից, հրաժարվել է ցուցմունք տալ (տե՛ս դատական նիստի արձանագրությունը):
Մինչդատական վարույթի ընթացքում Հրանտ Մայիսի Վարդանյանը ցուցմունք է տվել այն մասին, որ չունի և երբևէ չի ունեցել տրանսպորտային միջոցներ վարելու իրավունք: 2023 թվականի հունիսի 17-ին՝ ժամը 21:30-ին Երևան քաղաքի Արցախի պողոտայում «Օպել» մակնիշի 32 PX 140 հաշվառման համարանիշի ավտոմեքենան վարել է տրանսպորտային միջոցներ վարելու իրավունք չունենալով և ոչ սթափ վիճակում գտնվելով, որի վերաբերյալ պարեկային ծառայության աշխատակիցների կողմից կազմվել է թիվ 8180257888 արձանագրությունը: Բացի այդ, 2024 թվականի հուլիսի 13-ին՝ ժամը 03:20-ին Երևան քաղաքի Րաֆֆու փողոցում «Շևրոլետ» մակնիշի 37 ZO 448 հաշվառման համարանիշի ավտոմեքենան վարել է տրանսպորտային միջոցներ վարելու իրավունք չունենալով և ոչ սթափ վիճակում գտնվելով, որի վերաբերյալ պարեկային ծառայության աշխատակիցների կողմից կազմվել է թիվ 8180400265 արձանագրությունը: Նշված արձանագրություններին ծանոթացել է, համաձայն է այդ արձանագրությունների հետ: Նշված արարքները կատարելու համար ընդունում է իր մեղավորությունը, զղջում է կատարվածի համար, խնդրում է այդ հանգամանքը հաշվի առնել և իր նկատմամբ մեղմ պատիժ նշանակել (տե´ս դատական նիստի արձանագրություն, քրեական գործ, 52-53-րդ թերթ)։
Ցուցմունքը հրապարակելուց հետո Հրանտ Մայիսի Վարդանյանը հայտարարել է, որ դրանք համապատասխանում են իրականությանը (տե՛ս դատական նիստի արձանագրությունը):
Հիմնական դատալսումների ընթացքում հետազոտվել են հետևյալ գրավոր ապացույցները.
Վարչական իրավախախտման վերաբերյալ արձանագրություն որի համաձայն՝ Հրանտ Վարդանյանը 2023 թվականի հունիսի 17-ին՝ ժամը 21:30-ի սահմաններում, Երևան քաղաքի Արցախի պողոտայում, ոչ սթափ վիճակում գտնվելով, վարել է «Օպել» մակնիշի 37 PX 140 հաշվառման համարանիշի ավտոմեքենան՝ չունենալով տրանսպորտային միջոցներ վարելու իրավունք: Արձանագրության համապատասխան տողերում առկա են ծանուցվող վարորդի և պարեկային ծառայողի ստորագրությունը։
Հրանտ Մայիսի Վարդանյանի սթափության կտրոնը, որի համաձայն՝ ստուգաչափման սարքի համարը՝ 91100955, զննման համարը՝ 00638, զննման ամսաթիվը՝ 17.06.2023թ., ստուգումը կատարվել է ավտոմատ, ժամը՝ 21:42:14-ին, ալկոհոլի պարունակությունը՝ 1.138 մգ/լ, վարորդի անունը՝ Հրանտ, ազգանունը՝ Վարդանյան, տրանսպորտային միջոցի համարանիշը՝ 37 PX 140, ՎՎ (անձնագիր)՝ 011814126, տեսուչի ազգանունը՝ Վարդանյան, կրծքանշանի համար՝ 08323։ Առկա է նաև սթափության 91100955 համարի սարքի, ստուգաչափման թիվ 083749 վկայականի պատճենը, որի զննությամբ պարզվեց, որ ստուգաչափման թվականն է 21.11.2022թ., այն ուժի մեջ է մինչև 21.11.2023թ.: Չափման միջոցի անվանումը և տեսակը՝ ալկոմետր, գործարանային համարը՝ 91100955 տեսակը՝ Jupiter X/RP», չափման տիրույթը՝ (0.000-0.200 մգ/լ), ճշտության կարգի և ճշտության կարգը և դասը (սխալանքը) +- 5%, +-10%, արտադրողը՝ Չինաստան, պատկանում ՀՀ ՊՕ։
Հրանտ Մայիսի Վարդանյանի վերաբերյալ ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրից կատարված քաղվածքի պատճենը, որի համաձայն՝ վերջինս տվյալների մուտքագրման արդյունքում տրանսպորտային միջոցներ վարելու իրավունքի վերաբերյալ տվյալներ առկա չեն:
Վարչական իրավախախտման վերաբերյալ արձանագրությունը (կից լրացված վարչական իրավախախտման որոշում՝ 8180100265), որի համաձայն՝ Հրանտ Վարդանյանը 2024 թվականի հուլիսի 13-ին՝ ժամը 03:20-ի սահմաններում, Երևան քաղաքի Րաֆֆու փողոցում, ոչ սթափ վիճակում գտնվելով, վարել է «Շևրոլետ» մակնիշի 37 2O 448 հաշվառման համարանիշի ավտոմեքենան՝ չունենալով տրանսպորտային միջոցներ վարելու իրավունք: Արձանագրության համապատասխան տողերում առկա են «Հրաժարվեց ստորագրել ու բացատրություն տալ» գրառումը և պարեկային ծառայողի ստորագրությունը։
Հրանտ Մայիսի Վարդանյանի սթափության կտրոնը, որի համաձայն՝ ստուգաչափման սարքի համարը՝ 91101177, զննման համարը՝ 01946, զննման ամսաթիվը՝ 13.07.2023թ., ստուգումը կատարվել է ավտոմատ, ժամը՝ 03:25:49-ին, ալկոհոլի պարունակությունը՝ 0.568 մգ/լ, վարորդի անունը՝ Հրանտ, ազգանունը՝ Վարդանյան, տրանսպորտային միջոցի համարանիշը՝ 37 20 448, ՎՎ (անձնագիր)՝ 011814126, տեսուչի ազգանունը՝ Ավետիսյան, կրծքանշանի համար՝ 07180։ Առկա է նաև սթափության 91101177 համարի սարքի, ստուգաչափման թիվ 120905 վկայականի պատճենը, որի զննությամբ պարզվեց, որ ստուգաչափման թվականն է 05.04.2024թ., այն ուժի մեջ է մինչև 05.04.2025թ.: Չափման միջոցի անվանումը և տեսակը՝ ալկոմետր, գործարանային համարը՝ 91101177 տեսակը՝ Jupiter X/RP» չափման տիրույթը՝ (0.000-2.000 մգ/լ), ճշտության կարգը և դասը (սխալանքը) 0:0,15%, 0,1-0,15-8% 0,15-10%, արտադրողը՝ Չինաստան, պատկանում է ՀՀ ՆԳՆ ոստիկանությանը: (տե՛ս դատական նիստի արձանագրություն, քրեական գործ, 29-30-րդ թերթ):
Հ․Վարդանյանի դատավածության վերաբերյալ տեղեկանքը, որի համաձայն Հ․Վարդանյանը նախկինում դատպարտված է եղել (տե´ս դատական նիստի արձանագրություն, քրեական գործ, 35-36-րդ թերթ):

3.Դատարանի իրավական վերլուծությունները
Դատարանը, վերլուծելով մեղադրյալ Հրանտ Մայիսի Վարդանյանին առաջադրված մեղադրանքի հիմքում դրված և հիմնական դատալսումների ընթացքում հետազոտված վերոգրյալ ապացույցները՝ դրանք գնահատելով վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր կասկածները նրա օգտին մեկնաբանելով, հաստատված է համարում, որ Հրանտ Վարդանյանը, չունենալով տրանսպորտային միջոց վարելու իրավունք, 2023 թվականի հունիսի 17-ին՝ ժամը 21:30-ի սահմաններում, Երևան քաղաքի Արցախի պողոտայով ոչ սթափ վիճակում՝ արտաշնչած օդի մեջ ալկոհոլի 1.138 միլիգրամ պարունակությամբ, վարել է «Օպել» մակնիշի 37 PX 140 հաշվառման համարանիշի տրանսպորտային միջոցը, որպիսի փաստն արձանագրվել է թիվ 8180257888 արձանագրությամբ, բացի այդ, Հրանտ Վարդանյանը, չունենալով տրանսպորտային միջոց վարելու իրավունք, 2024 թվականի հուլիսի 13-ին՝ ժամը 03:20-ի սահմաններում, Երևան քաղաքի Րաֆֆու փողոցով ոչ սթափ վիճակում՝ արտաշնչած օդի մեջ ալկոհոլի 0.568 միլիգրամ պարունակությամբ, վարել է «ՇԵՎՐՈԼԵՏ» մակնիշի 37 20 448 հաշվառման համարանիշի տրանսպորտային միջոցը, որպիսի փաստն արձանագրվել է թիվ 8180400265 արձանագրությամբ:
Այսպիսով, Դատարանը գտնում է, որ սույն գործով ձեռք բերված հավաստի ապացույցների համակցությունը բավարար է հիմնավոր կասկածից վեր ապացուցողական չափանիշին համապատասխան հաստատված համարելու մեղադրյալ Հրանտ Վարդանյանի կողմից երկու անգամ ոչ սթափ վիճակում տրանսպորտային միջոց վարելը տրանսպորտային միջոց վարելու իրավունք չունենալու պայմաններում, այդ արարքն ապացուցված է, այն ճիշտ է որակված և համապատասխանում է 2 դրվագ ՀՀ քրեական օրենսգրքի 344-րդ հոդվածի 2-րդ մասի հատկանիշներին:
Անդրադառնալով մեղադրյալի նկատմամբ նշանակվելիք պատժի հարցին՝ Դատարանն արձանագրում է, որ անձի նկատմամբ պատժի տեսակ և չափ ընտրելիս, ինչպես նաև այն կրելու նպատակահարմարության հարցը լուծելիս պետք է ղեկավարվել ՀՀ քրեական օրենսգրքի մի շարք դրույթներով:
ՀՀ քրեական օրենսգրքի 55-րդ հոդվածի 2-րդ մասի համաձայն՝ «2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները»։
ՀՀ քրեական օրենսգրքի 69-րդ հոդվածի համաձայն՝ «1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ։ (․․․)»։
ՀՀ վճռաբեկ դատարանի ձևավորած կայուն նախադեպային իրավունքի համաձայն՝ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ: Պատիժն արդարացի է, եթե համաչափ է կատարված հանցագործությանը, ինչպես նաև բավարար պատժի նպատակներին հասնելու տեսանկյունից: Պատժի արդարության պահանջներից նահանջելը կարող է հանգեցնել չափազանց մեղմ կամ չափազանց խիստ պատժի նշանակման: Քրեական օրենքը համընդհանուր բնույթ ունի, իսկ արարքը և այն կատարող անձը կոնկրետ են: Հետևաբար կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի, այն կատարող անձի, պատիժը մեղմացնող և ծանրացնող հանգամանքների վերլուծության հիման վրա: Նշված հանգամանքների գնահատման ժամանակ դատարանը պետք է ելնի ՀՀ քրեական օրենսգրքի 48-րդ հոդվածով նախատեսված՝ պատժի նպատակների իրացումն ապահովելու անհրաժեշտությունից (ի թիվս այլնի տե՛ս ՀՀ վճռաբեկ դատարանի թիվ ԵՇԴ/0029/01/08, ԱՎԴ2/0059/01/08, ԵԱՔԴ/0078/01/09 ԵԿԴ/0042/01/11 որոշումները)։
Այսպես` Դատարանը մեղադրյալ Հ․Վարդանյանի նկատմամբ պատիժ նշանակելիս հաշվի է առնում նրան մեղսագրված հանցագործության՝ հա նրության համար վտանգավորության աստիճանն ու բնույթը, այդ թվում՝ հանցանքի կատարման հանգամանքները և եղանակը, ինչպես նաև խախտված հասարակական հարաբերության սոցիալական նշանակությունը:
Դատարանը մեղադրյալ Հ․Վարդանյանի նկատմամբ պատիժ նշանակելիս հաշվի է առնում նաև նրա անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, որպես մեղադրյալ Հ․Վարդանյանի պատասխանատվությունն ու պատիժը մեղմացնող հանգամանք հաշվի է առնում այն, որ նա իրեն լիովին մեղավոր է ճանաչել և տվել խոստովանական ցուցմունքներ, անկեղծորեն զղջացել է կատարած արարքի համար:
Դատարանը, արձանագրում է, որ մեղադրյալ Հ․Վարդանյանի պատասխանատվությունն ու պատիժը ծանրացնող հանգամանքներ առկա չեն։
Դատարանը, հաշվի առնելով մեղադրյալ Հ․Վարդանյանի կատարած արարքների՝ հանրության համար վտանգավորության աստիճանն ու բնույթը, նրա անձը բնութագրող, պատասխանատվությունը և պատիժը մեղմացնող հանգամանքները, գտնում է, որ մեղադրյալ Հ․Վարդանյանն իր կատարած 2 դրվագ ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության համար ենթակա է պատժի տուգանքի ձևով՝ ՀՀ քրեական օրենսգրքի 344-րդ հոդվածի 2-րդ մասով՝ տուգանք՝ 375․000 (երեք հարյուր յոթանասունհինգ հազար) ՀՀ դրամի չափով և ՀՀ քրեական օրենսգրքի 344-րդ հոդվածի 2-րդ մասով՝ տուգանք՝ 375․000 (երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 74-րդ հոդվածի հիման վրա՝ պատիժների լրիվ գումարելու միջոցով, մեղադրյալ Հ․Վարդանյանի նկատմամբ վերջնական պատիժ նշանակել տուգանք՝ 750․000 (յոթ հարյուր հիսուն հազար) ՀՀ դրամի չափով:
ՀՀ քրեական օրենսգրքի 59-րդ հոդվածի հիման վրա՝ նրա նկատմամբ նշանակված տուգանքը տարաժամկետել 12 (տասներկու) ամիս ժամկետով և թույլատրել տուգանքը վճարել մաս առ մաս՝ յուրաքանչյուր ամիս 62․500 (վաթսուներկու հազար հինգ հարյուր) ՀՀ դրամի չափով։
Դատարանն արձանագրում է, որ արտավարութային փաստաթուղթ ճանաչված և քրեական գործին կցված փաստաթղթերը պետք է թողնել կցված քրեական գործին՝ դատավճիռն օրինական ուժի մեջ մտնելուց հետո։
Քննարկելով մեղադրյալ Հ․Վարդանյանի նկատմամբ ընտրված խափանման միջոցի հարցը՝ Դատարանը գտնում է, որ վերջինիս նկատմամբ որպես խափանման միջոց ընտրված բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 342-349-րդ հոդվածներով` Դատարանը



Վ Ճ Ռ Ե Ց

Հրանտ Մայիսի Վարդանյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով և ՀՀ քրեական օրենսգրքի 344-րդ հոդվածի 2-րդ մասով նախատեսված արարքների կատարման մեջ և նրա նկատմամբ պատիժ նշանակել․
ՀՀ քրեական օրենսգրքի 344-րդ հոդվածի 2-րդ մասով՝ տուգանք՝ 375․000 (երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 344-րդ հոդվածի 2-րդ մասով՝ տուգանք՝ 375․000 (երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 74-րդ հոդվածի հիման վրա՝ պատիժների լրիվ գումարելու միջոցով, մեղադրյալ Հրանտ Մայիսի Վարդանյանի նկատմամբ վերջնական պատիժ նշանակել տուգանք՝ 750․000 (յոթ հարյուր հիսուն հազար) ՀՀ դրամի չափով:
ՀՀ քրեական օրենսգրքի 59-րդ հոդվածի հիման վրա՝ նրա նկատմամբ նշանակված տուգանքը տարաժամկետել 12 (տասներկու) ամիս ժամկետով և թույլատրել տուգանքը վճարել մաս առ մաս՝ յուրաքանչյուր ամիս 62․500 (վաթսուներկու հազար հինգ հարյուր) ՀՀ դրամի չափով։
Մեղադրյալ Հրանտ Մայիսի Վարդանյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ մինչև դատավճռի օրինական ուժի մեջ մտնելը:
Արտավարութային փաստաթղթերը թողնել կցված քրեական գործին դատավճիռն օրինական ուժի մեջ մտնելուց հետո։
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո՝ մեկամսյա ժամկետում:


ԴԱՏԱՎՈՐ՝ Ս.ԳԶՈԳՅԱՆ