ԵԴ1/0546/01/25




ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ
2025 թվականի հունիսի 02-ին քաղաք Երևան
Երևան քաղաքի առաջին ատյանի ընդհանուր իրավասության քրեական դատարանը /այսուհետ նաև` Դատարան/` հետևյալ կազմով
Նախագահությամբ դատավոր՝ Վ.Մելիքյանի
Քարտուղարությամբ՝ Մ.Ներսիսյանի
Մասնակցությամբ.
Հանրային մեղադրող՝ Լ.Նահապետյանի
Պաշտպան՝ Կ.Խաչատրյանի
Մեղադրյալ՝ Է.Մաթևոսյանի
դռնբաց դատական նիստում արագացված վարույթի կիրառմամբ, քննության առնելով քրեական գործն ըստ մեղադրանքի Էրիկ Արտակի Մաթևոսյանի (ծնված՝ 04.09.1998թ., Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, չի աշխատում, չդատված, հաշվառված և փաստացի բնակվում է ք.Երևան, Աէրացիա թղմ., 4-րդ շ., 43-րդ բնակարան հասցեում) ՀՀ քրեական օրենսգրքի 396-րդ հոդվածի 1-ին մասով,
1.Գործի դատավարական նախապատմությունը.
15.10.2022 թվականին ՀՀ ՔԿ ԵՔՔՎ Աջափնյակ և Դավթաշեն վարչական շրջանների քննչական բաժնում ՀՀ քրեական օրենսգրքի 396-րդ հոդվածի 1-ին մասով նախաձեռնվել է թիվ 10845522 քրեական վարույթը /հատոր 1-ին, գ.թ. 9/:
17.01.2025 թվականին Երևան քաղաքի Աջափնյակ և Դավթաշեն վարչական շրջանների դատախազության ավագ դատախազ Լ.Նահապետյանի որոշմամբ Էրիկ Արտակի Մաթևոսյանի նկատմամբ հարուցվել է հանրային քրեական հետապնդում ՀՀ քրեական օրենսգրքի 396-րդ հոդվածի 1-ին մասով /հատոր 2-րդ, գ.թ. 264-265/:
21.01.2025 թվականին նախաքննական մարմնի որոշմամբ մեղադրյալ Էրիկ Մաթևոսյանի նկատմամբ խափանման միջոց է կիրառվել բացակայելու արգելքը /հատոր 2-րդ, գ.թ. 267-268/:
Թիվ ԵԴ1/0546/01/25 (10845522 նախաքննական համար) քրեական գործն ըստ մեղադրանքի՝ Էրիկ Արտակի Մաթևոսյանի ՀՀ քրեական օրենսգրքի 396-րդ հոդվածի 1-ին մասի 1-ին մասով 12.02.2025 թվականին ստացվել է Երևան քաղաքի առաջին ատյանի ընդհանուր իրավասության քրեական դատարանում և նույն օրը համակարգչային ծրագրի միջոցով իրականացվող գործերի բաշխմամբ մակագրվել է դատավոր Վահագն Մելիքյանին:
Քրեական գործը դատավորին հանձնվել է 2025 թվականի փետրվարի 13-ին:
15.02.2025 թվականի որոշմամբ քրեական գործը վարույթ է ստանձնվել և նախնական դատալսումներ նշանակվել:
Էրիկ Արտակի Մաթևոսյանի նկատմամբ ՀՀ քրեական օրենսգրքի 396-րդ հոդվածի 1-ին մասով մեղադրանք է առաջադրվել այն բանի համար, որ նա խախտելով «Թմրամիջոցների և հոգեմետ/հոգեներգործուն/ նյութերի մասին» ՀՀ օրենքի և ՀՀ կառավարության 2010 թվականի մարտի 18-ի՝ «Թմրամիջոցների և հոգեմետ/հոգեներգործուն/ նյութերի և դրանց պրեկուրսորների շրջանառության կանոնները սահմանելու մասին» թիվ 270-Ն որոշման պահանջները, 2022 թվականի հոկտեմբերի 15-ին՝ ժամը 14:00-ի սահմաններում, «Telegram» սոցիալական կայքի քրեական վարույթով ինքնությունը չպարզված «MR.METHADO» անվամբ ալիքի օգտատիրոջից, առանց իրացնելու նպատակի, իր անձնական օգտագործման համար ապօրինի կերպով ձեռք է բերել և իր մոտ պահել է 1 փաթեթում փաթեթավորված ընդհանուր զգալի չափի՝ 0.1 գրամ քաշով «Մեթամֆետամին» տեսակի թմրամիջոց, որը տետրոհիդրոկանաբինոլի հետքեր պարունակող ապակյա գլանակի հետ միասին վերջինիս մոտից հայտնաբերվել և վերցվել է 2022 թվականի հոկտեմբերի 15-ին՝ ժամը 15:11-ին, Երևան քաղաքի Մազմանյան փողոցի 5/12 հասցեի մոտից ՀՀ ՆԳՆ ոստիկանության Երևան քաղաքի վարչության Մաշտոցի բաժնի ՔՀԲ ծառայողի կողմից ապօրինի կերպով թմրամիջոց ձեռք բերելու և պահելու հիմնավոր կասկածանքով վերջինիս ձերբակալելու և անձնական խուզարկության ենթարկելու արդյունքում:
Արագացված վարույթ.
Նախնական դատալսումների փուլում մեղադրյալ Էրիկ Արտակի Մաթևոսյանը միջնորդել է արագացված վարույթ կիրառելու մասին, հայտնելով, որ միջնորդությունը ներկայացրել է կամավոր, խորհրդակցել է պաշտպանի հետ, գիտակցում է արագացված վարույթի կիրառման հետևանքները, առաջադրված մեղադրանքն իրեն պարզ է, համաձայն է մեղադրանքի հետ, իրեն լիովին մեղավոր է ճանաչում առաջադրված մեղադրանքում:
Պաշտպան Կ.Խաչատրյանը հայտնեց, որ մեղադրյալը խորհրդակցել է իր հետ:
Հանրային մեղադրողը չառարկեց արագացված վարույթի կիրառման դեմ:
Դատարանը, համոզվելով, որ առկա են ՀՀ քրեական դատավարության օրենսգրքի 464.1-րդ հոդվածի 1-ին մասով նախատեսված հիմքը և բացակայում են նույն հոդվածի 2-րդ մասով նախատեսված՝ արագացված վարույթի կիրառումը բացառող հանգամանքները, ինչպես նաև մեղադրյալը համաձայն է իրեն մեղսագրվող արարքին, միջնորդությունը ներկայացրել է կամավոր և գիտակցում է իր միջնորդության բնույթը և հետևանքները, որոշում է կայացրել արագացված վարույթ կիրառելու մասին և անցել լրացուցիչ դասալսումների փուլ:
Դատարանի իրավական վերլուծությունները.
Դատարանը հիմք ընդունելով մեղադրանքն ամբողջ ծավալով մեղադրյալ Էրիկ Արտակի Մաթևոսյանի կողմից կամովին ու գիտակցաբար ընդունելու և դրա հետ համաձայն լինելու փաստերը, հանգում է հետևության, որ նա մեղավորությամբ կատարել է իրեն ՀՀ քրեական օրենսգրքի 396-րդ հոդվածի 1-ին մասով մեղսագրվող արարքը, դա կատարելու համար ենթակա է քրեական պատասխանատվության և պատժի:
Ուսումնասիրելով և գնահատելով գործով ձեռք բերված և հետազոտված ապացույցները վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, Դատարանն ապացուցված է համարում մեղադրյալ Էրիկ Արտակի Մաթևոսյանի կողմից հանցավոր արարք կատարելը:
Արարքը, որի կատարման մեջ մեղադրվում է վերջինս, համապատասխանում ՀՀ քրեական օրենսգրքի 396-րդ հոդվածի 1-ին մասի հատկանիշներին և ճիշտ է որակված:
Ապացուցված է նաև մեղադրյալ Էրիկ Արտակի Մաթևոսյանի կողմից նշված արարքը կատարելը և մեղավորությունը տվյալ հանցանքը կատարելու մեջ:
Մեղադրյալ Էրիկ Արտակի Մաթևոսյանի նկատմամբ պատիժ նշանակելիս դատարանը հաշվի է առնում ինչպես կատարած հանցագործության բնույթն ու հասարակական վտանգավորության աստիճանը, այնպես էլ նրա անձը:
Դատարանը մեղադրյալ Էրիկ Արտակի Մաթևոսյանի անձը բնութագրող և պատասխանատվությունն ու պատիժը մեղմացնող հանգամանքներ է արձանագրում, մեղքն ընդունելը, անկեղծորեն զղջալը և նախկինում դատապարտված չլինելը:
Դատարանը մեղադրյալ Էրիկ Արտակի Մաթևոսյանի պատասխանատվությունն ու պատիժը ծանրացնող հանգամանք չի արձանագրում:
Դատարանը, նպատակ ունենալով վերականգնելու սոցիալական արդարությունը, ուղղելու պատժի ենթարկված անձին, ինչպես նաև կանխելու հանցագործությունները և հաշվի առնելով Էրիկ Արտակի Մաթևոսյանի անձը, նրան բնութագրող դրական տվյալները, նրա պատասխանատվությունն ու պատիժը մեղմացնող հանգամանքների առկայությունը և ծանրացնող հանգամանքների բացակայությունը, հանգում է հետևության, որ մեղադրյալ Էրիկ Արտակի Մաթևոսյանն իր կատարած հանցագործության համար ենթակա է պատժի` նվազ խիստ տեսակի նշանակմամբ, քանի որ դա կարող է ապահովել պատժի նպատակները:
Միաժամանակ Դատարանը հաշվի առնելով, որ բացակայում է մեղադրյալի կողմից հանցանք կատարելու օրվան նախորդող մեկ տարվա ընթացքում եկամուտները, գտնում է, որ մեղադրյալի նկատմամբ նշանակվելիք տուգանքի ձևով պատժի չափը պետք է սահմանել վերջինիս կողմից հանցանք կատարելու պահին ՀՀ-ում գործող նվազագույն աշխատավարձի չափը, որը 68.000 ՀՀ դրամ է:
Քննելով տուգանքի ձևով պատիժը մեղադրյալ Էրիկ Մաթևոսյանի կողմից կրելու հարցը և հաշվի առնելով մեղադրյալի հայտարարությունն առ այն, որ միանգամից չի կարող վճարել տուգանքի գումարը, ունի նյութական խնդիրներ, Դատարանը գտնում է, որ մեղադրյալի կողմից տուգանքի գումարի վճարման համար պետք է ժամանակացույց սահմանել, թույլատրելով նրան տուգանքի գումարը վճարել մաս առ մաս հետևյալ պատճառաբանությամբ.
ՀՀ քրեական օրենսգրքի 59-րդ հոդվածի 8-րդ մասի համաձայն՝
<<Եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում առավելագույնը մեկ տարի ժամկետով կամ թույլատրում է տուգանքը մաս առ մաս վճարել նույն ժամկետում... (…)>>:
Վերը թվարկված իրավական նորմը կիրառելով սույն գործի փաստական տվյալների վրա, Դատարանը գտնում է, որ մեղադրյալ Էրիկ Մաթևոսյանն ի վիճակի չէ անհապաղ և ամբողջությամբ վճարելու նշանակված տուգանքը, ուստի անհրաժեշտ է դատավճռով նրա նկատմամբ նշանակվող տուգանքը տարաժամկետել մեկ տարով՝ հնարավորություն տալով վերջինս վճարելու տուգանքի գումարը:
Քննության առնելով մեղադրյալ Էրիկ Մաթևոսյանի նկատմամբ կիրառված խափանման միջոցի հարցը, Դատարանը գտնում է, որ Էրիկ Մաթևոսյանի նկատմամբ կիրառված բացակայելու արգելք խափանման միջոցը պետք է թողնել անփոփոխ՝ մինչև դատավճռի օրինական ուժի մեջ մտնելը:
Քննարկելով իրեղեն ապացույց տնօրինման հարցը, Դատարանը գտնում է, որ 0.1 գրամ քաշով «Մեթամֆետամին» տեսակի թմրամիջոցը դատավճիռն օրինական ուժի մեջ մտնելուց հետո վերադարձնել ՀՀ ՔԿ ԵՔՔՎ Աջափնյակ և Դավթաշեն վարչական շրջանների քննչական բաժին թիվ 10845522 քրեական վարույթից անջատված թիվ 10129723 քրեական վարույթին կցելու համար:
Արտավարույթային փաստաթղթերը պետք է թողնել կցված քրեական գործին դրա պահպանության ողջ ժամանակահատվածում:
Քրեական գործով գույքային հայց առկա չէ, իսկ դատական ծախսերը մեղադրյալից բռնագանձման ենթակա չեն:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 345-350-րդ, 464.4-րդ և 464.5-րդ հոդվածներով` Դատարանը
Վ Ճ Ռ Ե Ց
Մեղադրյալ Էրիկ Արտակի Մաթևոսյանին մեղավոր ճանաչել ՀՀ քրեական օրենսգրքի 396-րդ հոդվածի 1-ին մասով և դատապարտել տուգանքի նվազագույն աշխատավարձի /68.000 ՀՀ դրամ/ հնգապատիկի՝ 340.000 ՀՀ դրամի չափով:
Թույլատրել Էրիկ Արտակի Մաթևոսյանին դատավճռով նշանակված 340.000 ՀՀ դրամի չափով տուգանքը վճարել մաս առ մաս 1/մեկ/ տարվա ընթացքում՝ յուրաքանչյուր ամիս վճարելով 28.350 ՀՀ դրամ:
Մեղադրյալ Էրիկ Արտակի Մաթևոսյանի նկատմամբ կիրառված բացակայելու արգելք խափանման միջոցը թողնել անփոփոխ՝ մինչև դատավճռի օրինական ուժի մեջ մտնելը:
Արտավարութային փաստաթղթերը թողնել կցված քրեական գործին՝ դրա պահպանության ողջ ժամանակահատվածում:
Իրեղեն ապացույց ճանաչված 0.1 գրամ քաշով «Մեթամֆետամին» տեսակի թմրամիջոցը դատավճիռն օրինական ուժի մեջ մտնելուց հետո վերադարձնել ՀՀ ՔԿ ԵՔՔՎ Աջափնյակ և Դավթաշեն վարչական շրջանների քննչական բաժին թիվ 10845522 քրեական վարույթից անջատված թիվ 10129723 քրեական վարույթին կցելու համար:
Դատավճիռը կարող է բողոքարկվել ՀՀ վերաքննիչ քրեական դատարան դատավճիռը ստանալու օրվանից հետո՝ մեկամսյա ժամկետում, բացառությամբ ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով նախատեսված հիմքերով:

ԴԱՏԱՎՈՐ Վ.ՄԵԼԻՔՅԱՆ