ԵԴ1/0549/01/25







ՈՐՈՇՈՒՄ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ
ՔՐԵԱԿԱՆ ՎԱՐՈՒՅԹԸ ԿԱՐՃԵԼՈՒ ՄԱՍԻՆ

«14» ապրիլի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)

ՆԱԽԱԳԱՀՈՒԹՅԱՄԲ` ԴԱՏԱՎՈՐ ՎԱՀԵ ՋԻՎԱՆՅԱՆԻ
ՔԱՐՏՈՒՂԱՐՈՒԹՅԱՄԲ` ԳՈՀԱՐ ԽԱՉԱՏՐՅԱՆԻ
ԱԳՆԵՏԱ ՀԱԿՈԲՅԱՆԻ
ՄԱՍՆԱԿՑՈՒԹՅԱՄԲ`
ՀԱՆՐԱՅԻՆ ՄԵՂԱԴՐՈՂ ԿԱՐԵՆ ԻՍՐԱԵԼՅԱՆԻ
ՄԵՂԱԴՐՅԱԼԻ ՕՐԻՆԱԿԱՆ
ՆԵՐԿԱՅԱՑՈՒՑԻՉ ԱՆԻ ՀԱՅՐԱՊԵՏՅԱՆԻ
ՏՈՒԺՈՂ ԱՐՓԻՆԵ ՕՀԱՆՅԱՆԻ

«Աջափնյակ 1» նստավայրում, դռնբաց դատական նիստում քննեց քրեական գործով ըստ մեղադրանքի Ենոք Նորիկի Հայրապետյանի՝ ՀՀ քրեական օրենսգրքի 342-րդ հոդվածի 1-ին մասով (ծնված՝ 05․12․1960 թվականին՝ Երևան քաղաքում, ազգությամբ հայ, ՀՀ քաղաքացի, բնակվել է՝ քաղաք Երևան, Նորագավիթ 10-րդ փողոց, 1-ին փակուղի, 4-րդ տուն հասցեում (մահացել է 14․09․2023 թվականին)), մեղադրյալի նկատմամբ քրեական հետապնդումը մահվան հիմքով դադարեցնելու և քրեական գործի վարույթը կարճելու մասին միջնորդությունը։

1. Նկարագրական մաս.
2023 թվականի սեպտեմբերի 05-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում ՀՀ քրեական օրենսգրքի 342-րդ հոդվածի 1-ին մասով նախաձեռնվել է թիվ 60-0021-23 քրեական վարույթը։
2025 թվականի հունվարի 29-ին Ենոք Նորիկի Հայրապետյանի նկատմամբ ՀՀ քրեական օրենսգրքի 342-րդ հոդվածի 1-ին մասով հարուցվել է հանրային քրեական հետապնդում։
2025 թվականի փետրվարի 12-ին մեղադրական եզրակացությամբ Երևան քաղաքի առաջին ատյանի ընդհանուր իրավասության քրեական դատարան են մուտքագրվել քրեական վարույթի նյութերը։
2025 թվականի փետրվարի 13-ին քրեական գործը հանձնվել է դատավոր Վ․Ջիվանյանին, որով 2025 թվականի փետրվարի 17-ին ստանձնվել է վարույթ և նշանակվել նախնական դատալսումներ։

1.1. Մեղադրանքի փաստական նկարագրություն.
Մեղադրյալ Ենոք Նորիկի Հայրապետյանի նկատմամբ հանրային քրեական հետապնդում է հարուցվել հանրորեն վտանգավոր այն արարքի համար, որ նա 2023 թվականի սեպտեմբերի 04-ին՝ ժամը 22:45-ի սահմաններում, իրեն պատկանող «ՎԱԶ 21099» մակնիշի 37 TM 629 հաշվառման համարանիշի ավտոմեքենան վարելով Երևան քաղաքի Նորագավիթ 1-ին փողոցով՝ 7-րդ փողոցի կողմից 6-րդ փողոցի ուղղությամբ և հասնելով թիվ 87 հասցեի դիմաց՝ թույլ է տվել ՀՀ ճանապարհային երթևեկության կանոնները և տրանսպորտային միջոցների շահագործումն արգելող անսարքությունների և պայմանների ցանկը հաստատելու մասին ՀՀ կառավարության 2007 թվականի հունիսի 28-ի թիվ 955-Ն որոշման 73-րդ կետի և «Ճանապարհային երթևեկության անվտանգության ապահովման մասին» ՀՀ օրենքի 23-րդ հոդվածի 3-րդ մասի պահանջներին հակասող գործողություններ, այն է՝ առանց նախապես համոզվելու վազանցի կատարման անվտանգության մեջ, իր առջևից ու իրեն համընթաց երթևեկող «ZHONGTONG LCK6860HGN» մակնիշի 758 CQ 61 հ/հ-ի (5749S_հ/հ) ավտոբուսի հետնամասից դուրս է եկել վազանցի ու ավտոմեքենայի թափքի ամբողջական մասով 2,48-2,8 վայրկյան շուրջ 44 կմ/ժ արագությամբ առանց արգելակման ընթացել է հանդիպակաց ուղեմասով, որի արդյունքում իր վարած ավտոմեքենայով խոչընդոտել է հանդիպակաց ուղղությամբ ընթացող «HYUNDAI AVANTE 1.6» մակնիշի 37 PQ 145 հաշվառման համարանիշի ավտոմեքենայի վարորդ Արփինե Սաշայի Օհանյանի երթևեկությանը ու առջևի մասով բախվել վերջինիս վարած «HYUNDAI AVANTE 1.6» մակնիշի 37 PQ 145 հաշվառման համարանիշի ավտոմեքենայի առջևի հատվածին, ապա վազանցվող «ZHONGTONG LCK6860HGN» մակնիշի 758 CQ 61 h/h (5749S hh) ավտոբուսին, տեխնիկական տեսակետից ստեղծել վթարային իրադրություն՝ դրանով իսկ պայմանավորել տվյալ ընդհարման առաջացումը՝ ինքն իրեն զրկելով այն կանխելու տեխնիկական հնարավորությունից, որի հետևանքով ձախ ճակատային շրջանի ենթամաշկային արյունազեղման, ենթաստամոքսային գեղձի պոչի ջնջխման, փայծաղի պատռման ձևով, ուղեկցված հեմոպերիտոներումով Արփինե Սաշայի Օհանյանի առողջությանն անզգուշությամբ պատճառել է ծանր վնաս՝ կյանքին վտանգ սպառնացող:

1.2. Կողմերի միջնորդությունները և դիրքորոշումները․
Քրեական գործի նախնական դատալսումների ընթացքում մեղադրյալ Ենոք Նորիկի Հայրապետյանի օրինական ներկայացուցիչ Անի Ենոքի Հայրապետյանը միջնորդել է ՀՀ քրեական օրենսգրքի 342-րդ հոդվածի 1-ին մասով քրեական հետապնդումը դադարեցնել և քրեական վարույթը կարճել՝ մեղադրյալի մահանալու հիմքով։
Հանրային մեղադրող Կարեն Իսրաելյանը և տուժող Արփինե Օհանյանը չեն առարկել Ենոք Հայրապետյանի նկատմամբ քրեական հետապնդումը դադարեցնելու դեմ։


2. Պատճառաբանական մաս.

ՀՀ քրեական օրենսգրքի 342-րդ հոդվածի համաձայն՝
«1. Ավտոմեքենա կամ մեխանիկական այլ տրանսպորտային միջոց վարող անձի կողմից ճանապարհային երթևեկության անվտանգության ապահովմանն ուղղված պահանջ կամ ճանապարհային երթևեկության կամ տրանսպորտային միջոցների շահագործման անվտանգությունն ապահովող կանոն խախտելը, որը մարդու առողջությանն անզգուշությամբ պատճառել է ծանր կամ միջին ծանրության վնաս (․․․)»։
ՀՀ քրեական դատավարության օրենսգրքի 12-րդ հոդվածի 1-ին մասի 10-րդ կետի համաձայն`
«Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե` անձը մահացել է.»:
ՀՀ քրեական դատավարության օրենսգրքի 12-րդ հոդվածի 3-րդ մասի համաձայն`
«Սույն հոդվածի 1-ին մաuի 10-րդ կետով նախատեսված հանգամանքի առկայությունը քրեական հետապնդումը բացառող չէ, եթե մահացածի օրինական ներկայացուցիչն առարկում է դրա դեմ այն հիմքով, որ մահացածը չի կատարել իրեն մեղսագրվող արարքը: Այu դեպքում քրեական վարույթը շարունակվում է ընդհանուր կարգով, սակայն մեղադրական վերդիկտ կայացնելու դեպքում այդ անձի նկատմամբ պատիժ չի նշանակվում: Սույն հոդվածի 1-ին մաuի 10-րդ կետը չի տարածվում քաղաքացիական դատավարության կարգով անձին մահացած ճանաչելու դեպքերի վրա:»:
Սույն գործով քննարկվող հարցին վերաբերելի փաստական հանգամանքները հետևյալն են․
- 2023 թվականի սեպտեմբերի 14-ին մեղադրյալ Ենոք Նորիկի Հայրապետյանը մահացել է, որի վերաբերյալ առկա են «Էրեբունի» ԲԿ-ի տեղեկանքը և դատաբժշկական փորձագետի եզրակացությունը,
- մեղադրյալ Ենոք Հայրապետյանին մեղսագրված դեպքով վերջինիս օրինական ներկայացուցիչ Անի Հայրապետյանը միջնորդել է ՀՀ քրեական դատավարության օրենսգրքի 12-րդ հոդվածի 1-ին մասի 10-րդ կետի հիմքով քրեական գործի վարույթը կարճել՝ նշելով, որ միջնորդությունը ներկայացրել է կամավոր։
Վերը նշված իրավական նորմերը կիրառելով սույն գործով փաստական հանգամանքների նկատմամբ՝ Դատարանը գտնում է, որ մահացած մեղադրյալ Ենոք Նորիկի Հայրապետյանի նկատմամբ քրեական հետապնդումը ենթակա է դադարեցման:
ՀՀ քրեական դատավարության օրենսգրքի 13-րդ հոդվածի 1-ին մասի 3-րդ կետը սահմանում է․
«Քրեական վարույթը ենթակա է կարճման, եթե` կայացվել է անձի նկատմամբ քրեական հետապնդում չհարուցելու կամ մեղադրյալի նկատմամբ քրեական հետապնդումը դադարեցնելու մասին որոշում, և սպառվել են վարույթը շարունակելու բոլոր հնարավորությունները․»։
Այսպիսով, վերոշարադրյալ իրավանորմերի հիման վրա Դատարանը գտնում է, որ մեղադրյալ Ենոք Նորիկի Հայրապետյանի նկատմամբ ՀՀ քրեական օրենսգրքի 342-րդ հոդվածի 1-ին մասով քրեական հետապնդումը պետք է դադարեցնել, միաժամանակ քրեական վարույթը կարճել, քանի որ տվյալ դեպքում սպառվել են վարույթը շարունակելու բոլոր հնարավորությունները (գործը մեկ մեղադրյալի ենթադրյալ կատարած հանցանքի վերաբերյալ է, որի նկատմամբ քրեական հետապնդումը ենթակա է դադարեցման)։
Անդրադառնալով իրեղեն ապացույցների տնօրինման հարցին և հաշվի առնելով ՀՀ քրեական դատավարության օրենսգրքի 100-րդ հոդվածի կարգավորումները, Դատարանը կարծում է, որ սույն դատական ակտն օրինական ուժի մեջ մտնելուց հետո գործով իրեղեն ապացույց ճանաչված և ՀՀ ՆԳՆ ոստիկանության պարեկային ծառայության Երևան քաղաքի գնդի հատուկ պահպանվող տարածքում պահվող «Հյունդայի» մակնիշի 37 PQ 145 և «ՎԱԶ» մակնիշի 37 TM 629 հաշվառման համարանիշի ավտոմեքենաները պետք է վերադարձնել օրինական տիրապետողներին։
Անդրադառնալով վարութային ծախսերի հարցին, Դատարանը փաստում է․
ՀՀ քրեական դատավարության օրենսգրքի 167-րդ հոդվածի 3-րդ մասի համաձայն՝
«Եթե դատապարտված մեղադրյալը վճարունակ է, ապա սույն հոդվածի 1-ին մասի 1-ին, 2-րդ և 4-7-րդ կետերում թվարկված վարութային ծախսերի հատուցման պարտականությունը դատարանը դնում է նրա վրա:»։
Նշված կարգավորումը հաշվի առնելով՝ Դատարանը գտնում է, որ վարութային ծախսերի հարցը պետք է համարել լուծված, քանի որ սույն գործով դատապարտված մեղադրյալի կարգավիճակով անձ առկա չէ։
Դատարանը գտնում է, որ դատական ակտն օրինական ուժի մեջ մտնելուց հետո ապացույց ճանաչված փաստաթղթերը պետք է թողնել քրեական գործի նյութերում։
Սույն դատական ակտը կայացնելիս Դատարանը ղեկավարվում է ՀՀ քրեական դատավարության օրենսգրքի 12-րդ, 13-րդ, 30-րդ, 33-րդ, 98-100-րդ, 364-րդ հոդվածներով։

3. Եզրափակիչ մաս.
Ելնելով վերոգրյալից` Դատարանը

ՈՐՈՇԵՑ

Միջնորդությունը բավարարել։
ԵԴ1/0549/01/25 քրեական գործով մեղադրյալ Ենոք Նորիկի Հայրապետյանի նկատմամբ ՀՀ քրեական օրենսգրքի 342-րդ հոդվածի 1-ին մասով քրեական հետապնդումը դադարեցնել՝ մեղադրյալի մահանալու հիմքով, և քրեական վարույթը կարճել։
Դատական ակտն օրինական ուժի մեջ մտնելուց հետո իրեղեն ապացույց ճանաչված և ՀՀ ՆԳՆ ոստիկանության պարեկային ծառայության Երևան քաղաքի գնդի հատուկ պահպանվող տարածքում պահվող «Հյունդայի» մակնիշի 37 PQ 145 և «ՎԱԶ» մակնիշի 37 TM 629 հաշվառման համարանիշի ավտոմեքենաները վերադարձնել օրինական տիրապետողներին։
Դատական ակտն օրինական ուժի մեջ մտնելուց հետո ապացույց ճանաչված փաստաթղթերը թողնել քրեական գործի նյութերում։
Որոշումը կարող է բողոքարկվել ՀՀ վերաքննիչ քրեական դատարան այն ստանալու օրվանից հետո` մեկամսյա ժամկետում:


ԴԱՏԱՎՈՐ ՎԱՀԵ ՋԻՎԱՆՅԱՆ