ԵԴ1/0489/01/25




ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«13» մարտի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` Դատարան)

նախագահությամբ՝ դատավոր Տաթևիկ Մուրադյանի,
քարտուղարությամբ՝ Ագնետա Հակոբյանի,

մասնակցությամբ՝
հանրային մեղադրող՝ Ռաֆիկ Դոխոյանի,
մեղադրյալ՝ Օնիկ Առաքելյանի,

դռնբաց դատական նիստում քննելով քրեական գործն ըստ մեղադրանքի՝
Օնիկ Տարոնի Առաքելյանի՝
(ծնված՝ 15.03.1989թ. Արագածոտնի մարզ գ. Վարդենուտ, ազգությամբ հայ, ՀՀ քաղաքացի, բարձրագույն կրթությամբ, չամուսնացած, չի աշխատում, դատվածություն չունեցող, հաշվառված և բնակվող՝ Արագածոտնի մարզ, գ. Վարդենուտ, 13-րդ փողոց, 1-ին տուն հասցեում) ՀՀ քրեական օրենսգրքի 344-րդ հոդվածի 2-րդ մասով՝ երկու դրվագով,

ՊԱՐԶԵՑ

1. Քրեական գործի դատավարական նախապատմությունը.
2024 թվականի մայիսի 30-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության հատկանիշներով նախաձեռնվել է թիվ 60-2094-24 քրեական վարույթը:
2024 թվականի հունիսի 14-ին ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործության հատկանիշներով նախաձեռնվել է թիվ 60-2321-24 քրեական վարույթը:
2024 թվականի հունիսի 14-ին նախաքննության մարմնի որոշմամբ՝ թիվ 60232124 քրեական վարույթը միացվել է թիվ 60209424 քրեական վարույթին և նախաքննությունը շարունակվել է թիվ 60209424 քրեական վարույթով:
2025 թվականի հունվարի 24-ին ՀՀ դատախազության Երևան քաղաքի Շենգավիթ վարչական շրջանի դատախազության դատախազ Դ. Թադևոսյանի որոշմամբ՝ թիվ 60209424 քրեական վարույթով Օնիկ Տարոնի Առաքելյանի նկատմամբ ՀՀ քրեական օրենսգրքի 344-րդ հոդվածի 2-րդ մասով և ՀՀ քրեական օրենսգրքի 344-րդ հոդվածի 2-րդ մասով հարուցվել է հանրային քրեական հետապնդում:
2025 թվականի փետրվարի 10-ին Երևան քաղաքի առաջին ատյանի ընդհանուր իրավասության քրեական դատարան է ստացվել քրեական գործն ըստ մեղադրանքի՝ Օնիկ Տարոնի Առաքելյանի՝ ՀՀ քրեական օրենսգրքի 344-րդ հոդվածի 2-րդ մասով՝ երկու դրվագով, որին շնորհվել է ԵԴ1/0489/01/25 համարը:
Նույն օրը քրեական գործն էլեկտրոնային եղանակով մակագրվել և 2025 թվականի փետրվարի 11-ին հանձնվել է Երևան քաղաքի առաջին ատյանի ընդհանուր իրավասության քրեական դատարանի դատավոր Տաթևիկ Մուրադյանին։
2025 թվականի փետրվարի 12-ին Դատարանի կողմից որոշում է կայացվել թիվ ԵԴ1/0489/01/25 քրեական գործի վարույթն ստանձնելու և նախնական դատալսումներ նշանակելու մասին։
2025 թվականի փետրվարի 26-ին, Դատարանը թիվ ԵԴ1/0489/01/25 քրեական գործով կայացրել է մեղադրական վերդիկտ՝ Արկադի Աշոտի Սարոյանին մեղավոր ճանաչելով ՀՀ քրեական օրենսգրքի 344-րդ հոդվածի 2-րդ մասով՝ երկու դրվագով նախատեսված արարքների կատարման մեջ:

2. Մեղադրանքի փաստական նկարագրությունը.
Օնիկ Տարոնի Առաքելյանին մեղադրանք է ներկայացվել ՀՀ քրեական օրենսգրքի 344-րդ հոդվածի 2-րդ մասով՝ երկու դրվագով այն բանի համար, որ «նա, չունենալով տրանսպորտային միջոցներ վարելու իրավունք, 2024 թվականի մայիսի 12-ին երկու անգամ ոչ սթափ վիճակում վարել է տրանսպորտային միջոց։
Այսպես.
Օնիկ Առաքելյանը, վարչական իրավախախտման գործով թիվ 8180165475 որոշմամբ օրենքով սահմանված կարգով 1 տարի ժամկետով՝ 2022 թվականի հոկտեմբերի 24-ից մինչև 2023 թվականի հոկտեմբերի 24-ն ընկած ժամանակահատվածում, հանդիսանալով տրանսպորտային միջոցներ վարելու իրավունքից զրկված և պատշաճ եղանակով այդ մասին տեղեկացված լինելով, իր նշված իրավունքից զրկման ժամկետը լրանալուց հետո սահմանված կարգով այն չվերականգնելու պայմաններում, 2024 թվականի մայիսի 12-ին՝ ժամը 01:40-ի սահմաններում, ոչ սթափ վիճակում՝ մեկ լիտր արտաշնչած օդի մեջ 0.679 մգ/լ մաքուր ալկոհոլի պարունակությամբ, Երևան քաղաքի Թամանցիների փողոցում ուղղակի դիտավորությամբ վարել է «Mercedes Benz» մակնիշի 37 FG 229 հաշվառման համարանիշի տրանսպորտային միջոցը, ինչը հայտնաբերվել և արձանագրվել է ՀՀ ՆԳՆ ոստիկանության պարեկային ծառայության 2-րդ գումարտակի 3-րդ վաշտի պարեկի կողմից:
Դրանից հետո նշված տրանսպորտային միջոցը Երևան քաղաքի Բագրատունյաց փողոց տեղափոխելու վերաբերյալ պարտավորագրի համաձայն հանձնվել է տրանսպորտային միջոցներ վարելու իրավունք ունեցող Կորյուն Նվերի Գասպարյանին, ում կողմից այն նշված հասցե տեղափոխելուց հետո, Օնիկ Առաքելյանը Երևան քաղաքի Թամանցիների փողոցում հայտնաբերվելուց հետո նույն օրը՝ ժամը 03:25-ի սահմաններում, ոչ սթափ վիճակում՝ մեկ լիտր արտաշնչած օդի մեջ 0.410 մգ/լ մաքուր ալկոհոլի պարունակությամբ, Երևան քաղաքի Բագրատունյաց փողոցում վարել է հիշատակված տրանսպորտային միջոցը, ինչը հայտնաբերվել և արձանագրվել է ՀՀ ՆԳՆ ոստիկանության պարեկային ծառայության 2-րդ գումարտակի 1-ին վաշտի պարեկի կողմից:»։

3. Դատաքննության ընթացքում հետազոտված թույլատրելի ապացույցները.
Հիմնական դատալսումների ընթացքում հետազոտված թույլատրելի ապացույցները.
- Դատաքննության ընթացքում մեղադրյալ Օնիկ Տարոնի Առաքելյանը, օգտվելով իր սահմանադրական իրավունքից, հրաժարվեց ցուցմունք տալ։
Նախաքննության ընթացքում մեղադրյալ Օնիկ Առաքելյանն իրեն մեղավոր է ճանաչել ՀՀ քրեական օրենսգրքի 344-րդ հոդվածի 2-րդ մասով (2 դրվագով) ներկայացված մեղադրանքում և ցուցմունք է տվել այն մասին, ունեցել է «B,C» կարգերի վարորդական իրավունքի վկայական: 2022 թվականին տրանսպորտային միջոցը վարել է ոչ սթափ վիճակում, ինչի կապակցությամբ պարեկային ծառայության համապատասխան ծառայողների կողմից կազմվել է վարչական իրավախախտման վերաբերյալ արձանագրություն և կայացվել է համապատասխան որոշում՝ իրեն տրանսպորտային միջոցներ վարելու իրավունքից մեկ տարի ժամկետով զրկելու վերաբերյալ։ Որոշման վերաբերյալ ծանուցումը ստացել է հենց այդ պահին՝ կայացնելուց անմիջապես հետո: 2024 թվականի մայիսի 12-ին՝ (ժամը ստույգ չի հիշում) գիշերային ժամի, Երևան քաղաքի Թամանցիների փողոցում «Մերսեդես» մակնիշի 37 FG 229 հաշվառման համարանիշի ավտոմեքենան, իր ընկերոջ՝ Կորյուն Գասպարյանի հետ, վարել է ոչ սթափ վիճակում՝ չունենալով տրանսպորտային միջոցներ վարելու իրավունք, ինչի կապակցությամբ պարեկային ծառայողները, կանգնեցնելով իրեն, ստուգել են իր փաստաթղթերը, սթափությունը և կազմել են վարչական իրավախախտման վերաբերյալ թիվ 8180405155 արձանագրությունը: Արձանագրությունը կազմելուց հետո պարեկային ծառայողները ծանոթացրել են արձանագրության բովանդակության հետ, ինչի վերաբերյալ որևէ առարկություն չի ներկայացրել և ստորագրել է արձանագրության համապատասխան տողերում, որից հետո պարեկային ծառայողներն իր համաձայնությամբ ավտոմեքենայի վարումը հանձնել են իր ընկերոջը՝ Կորյունին, որպեսզի նա ավտոմեքենան վարի և գնան «Սիթիի» մոտ գտնվող Կորյունի բարեկամի տուն, որտեղ և նախապես գնալուց եղել են: Հասնելով նշված վայր՝ բարձրացել են Կորյունի բարեկամի տուն, որոշակի ժամանակ անց, ստացել է հեռախոսազանգ, դուրս է եկել տնից և նույն ավտոմեքենան վարել է Երևան քաղաքի Բագրատունյաց պողոտայում ոչ սթափ վիճակում՝ չունենալով տրանսպորտային միջոցներ վարելու իրավունք, ինչի կապակցությամբ պարեկային ծառայողները, կանգնեցնելով իրեն, ստուգել են իր փաստաթղթերը, սթափությունը և կազմել են վարչական իրավախախտման վերաբերյալ թիվ 8180403977 արձանագրությունը։ Արձանագրությունը կազմելուց հետո պարեկային ծառայողները ծանոթացրել են արձանագրության բովանդակության հետ, ինչի վերաբերյալ որևէ առարկություն չի ներկայացրել և ստորագրել է արձանագրության համապատասխան տողերում: Հայտարարել է, որ ընդունում է իր մեղավորություն և խնդրում է վարույթն իրականացնող մարմնին հաշվի առնելով այդ հանգամանքը՝ հնարավորինս մեղմ վերաբերվել:
(գ․թ․ 59-62, դատական նիստի արձանագրություն)
- Նախաքննության մարմնի կողմից 2024թ. օգոստոսի 09-ին կազմված զննում կատարելու մասին արձանագրությունը, համաձայն որի՝ 2024 թվականի մայիսի 12-ին՝ ժամը 03:49-ին, Երևան քաղաքի Բագրատունյաց պողոտայում ՀՀ ոստիկանության պարեկային ծառայության Երևան քաղաքի գնդի պարեկ Սուրեն Ավագյանի (01736) կողմից Օնիկ Տարոնի Առաքելյանի (ծնվ.15.03.1989թ., ՀԾՀ 2503890520, բն. Արագածոտնի մարզ գ. Վարդենուտ 13-րդ փողոց 1-ին տուն) վերաբերյալ կազմվել է վարչական իրավախախտման վերաբերյալ արձանագրությունը (կից չլրացված վարչական իրավախախտման որոշում՝ 8180403977), այն մասին, որ վերջինս 2024թ. մայիսի 12-ին՝ ժամը 03:25-ին, Երևան քաղաքի Թամանցիների փողոցում վարել է «Մերսեդես» մակնիշի 37 FG 229 հաշվառման համարանիշի ավտոմեքենան՝ չունենալով տրանսպորտային միջոցներ վարելու իրավունք և ոչ սթափ վիճակում: Արձանագրության համապատասխան տողերում առկա են ծանուցվողի (վարորդի) ու պարեկային ծառայողի ստորագրությունները:
Օնիկ Առաքելյանին սթափության զննության ենթարկելու վերաբերյալ կտրոնի պատճենը, համաձայն որի՝ զննության սարքի համարն է 91100840, զննման համարը՝ 03716, զննման ամսաթիվը՝ 12.05.2024թ., ստուգումը կատարվել է ավտոմատ, ժամը 03:40:26-ին, ալկոհոլի պարունակությունը՝ 0.410մգ/լ, վարորդի անունը՝ Օնիկ, ազգանունը՝ Առաքելյան, տրանսպորտային միջոցի համարանիշը՝ 37 FG 229, ՀԾՀ 2503890520, Պ/ծ ազգանունը՝ Ավագյան, կրծքանշանի համարը՝ 01736:
Սթափության զննության 91100840 համարի սարքի ստուգաչափման թիվ 113383 վկայականի պատճենը, համաձայն որի՝ ստուգաչափման թվականն է 07.12.2023թ., այն ուժի մեջ է մինչև 07.12.2024թ.: Չափման միջոցի անվանումը և տեսակը՝ ալկոտեստեր, գործարանային համարը՝ 91100840 տեսակը՝ «Jupiter X/RP», չափման տիրույթը ՝ (0.000-2.000մգ/լ, ճշտության կարգը և դասը (սխալանքը) 0÷0,1±5%,0.1÷0.15±8%>0.15±10%, արտադրողը՝ Չինաստան, պատկանում է ՀՀ ՊԾ։
ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրի Օնիկ Տարոնի Առաքելյանի տվյալների (ՀԾՀ 2503890520) մուտքագրման արդյունքում ստացված տեղեկատվության քաղվածքի պատճենը, համաձայն որի՝ Օնիկ Առաքելյանը տրանսպորտային միջոցներ վարելու իրավունքից 2022 թվականի հոկտեմբերի 24-ին զրկվել է 1 տարի ժամկետով (զրկման սկիզբ 24.10.2022թ., զրկման ավարտ 24.10.2023թ.)։
2022 թվականի հոկտեմբերի 24-ին՝ ժամը 02:55-ին, ՀՀ ոստիկանության պարեկային ծառայության Երևան քաղաքի գնդի կրտսեր պարեկ Ա. Ղազարյանի կողմից կազմված վարչական իրավախախտման վերաբերյալ արձանագրությունը, համաձայն որի՝ Օնիկ Տարոնի Առաքելյանը, 24.10.2022 թվականին՝ ժամը 02։47-ին, Երևան քաղաքի Ջանիբեկյան փողոցում «Մերսեդես» մակնիշի 37 FG 229 հաշվառման համարանիշի ավտոմեքենան վարել է ոչ սթափ վիճակում, ինչից հետո կայացվել է վարչական իրավախախտման վերաբերյալ թիվ 8180165475 որոշումը՝ Օնիկ Տարոնի Առաքելյանին տրանսպորտային միջոցներ վարելու իրավունքից 1 տարի ժամկետով զրկելու վերաբերյալ: Վարչական իրավախախտման արձանագրության և որոշման համապատասխան տողերում առկա են ծանուցվողի (վարորդի) և պարեկային ծառայողի ստորագրությունները:
Օնիկ Առաքելյանին սթափության զննության ենթարկելու վերաբերյալ կտրոնի պատճենը, համաձայն որի՝ զննության սարքի համարն է 91100934, զննման համարը՝ 00651, ալկոհոլի պարունակությունը՝ 0.707 մգ/լ, վարորդի անունը՝ Օնիկ, ազգանունը՝ Առաքելյան, տրանսպորտային միջոցի համարանիշը՝ 37 FG 229, ՎիՎ. MI999516, տեսուչի ազգանունը՝ Ղազարյան, կրծքանշանի համարը՝ 03763, սթափության կտրոնի համապատասխան տողերում առկա են «հրաժարվեց» գրառումը և ստորագրություն:
Սթափության զննության 91100934 համարի սարքի ստուգաչափման թիվ 074584 վկայականի պատճենը, համաձայն որի՝ ստուգաչափման թվականն է 11.07.2022թ., այն ուժի մեջ է մինչև 11.07.2023թ.: Չափման միջոցի անվանումը և տեսակը՝ ալկոտեստեր, գործարանային համարը՝ 91100934 տեսակը՝ «Jupiter X/RP», չափման տիրույթը ՝ (0.000-0.200մգ/լ, ճշտության կարգը և դասը (սխալանքը) 0÷0,1±5%,0.1÷0.15±8%>0.15±10%, արտադրողը՝ Չինաստան, պատկանում է ՀՀ ՊԾ։ Վկայականի դարձերեսին առկա են «Վկայական 074584, Չափման տիրույթը 0.000-2.000մգ/լ, վրիպակի արդյունքում նշվել է 0.000-0.200մգ/լ, պետք է գրվեր 0.000-2.000մգ/լ»:
2024 թվականի մայիսի 12-ին՝ ժամը 01:50-ին, ՀՀ ոստիկանության պարեկային ծառայության Երևան քաղաքի գնդի կրտսեր պարեկ Գ. Հայրումյանի կողմից կազմված վարչական իրավախախտման վերաբերյալ արձանագրությունը, համաձայն որի՝ Օնիկ Տարոնի Առաքելյանը 12.05.2024 թվականին՝ ժամը 01:40-ին, Երևան քաղաքի Թամանցիների փողոցում վարել է «Մերսեդես» մակնիշի 37 FG 229 հաշվառման համարանիշի ավտոմեքենան՝ չունենալով տրասնպորտային միջոցներ վարելու իրավունք և ոչ սթափ վիճակում: Արձանագրության համապատասխան տեղերում առկա են ծանուցվողի (վարորդի) որ պարեկային ծառայողի ստորագրությունները:
Օնիկ Առաքելյանին սթափության զննության ենթարկելու վերաբերյալ կտրոնի պատճենը, որի համաձայն՝ զննության սարքի համարն է 91100999, զննման համարը՝ 02181, զննման ամսաթիվը՝ 12.05.2024թ., ստուգումը կատարվել է ավտոմատ, ժամը 01:44:45-ին, ալկոհոլի պարունակությունը՝ 0.679մգ/լ, վարորդի անունը՝ Օնիկ, ազգանունը՝ Առաքելյան, տրանսպորտային միջոցի համարանիշը՝ 37 FG 229, ՀԾՀ 2503890520, Պ/ծ ազգանունը՝ Հայրումյան, կրծքանշանի համարը՝ 12401:
Սթափության զննության 91100999 համարի սարքի ստուգաչափման թիվ 113413 վկայականի պատճենը, համաձայն որի՝ ստուգաչափման թվականն է 07.12.2023թ., այն ուժի մեջ է մինչև 07.12.2024թ.: Չափման միջոցի անվանումը և տեսակը՝ «Jupiter X/RP», չափման տիրույթը՝ 0.000-2.000մգ/լ, ճշտության կարգը և դասը (սխալանքը) 0÷0,1±5%,0.1÷0.15±8%>0.15±10%, արտադրողը՝ Չինաստան, պատկանում է ՀՀ ՊԾ։
Պարտավորագրի պատճենը, համաձայն որի՝ 2024 թվականի ապրիլի 12-ին Կորյուն Նվերի Գասպարյանը պարտավորվել է «Մերսեդես» մակնիշի 37 FG 229 հաշվառման համարանիշի ավտոմեքենան տեղափոխել Բագրատունյաց փողոց: Պարտավորագրին կից ներկայացվել է RI211883 սերիա համարի վարորդական իրավունքի վկայական, և առկա է ստորագրություն:
(գ․թ․ 3-10, 17-25, 32-35, դատական նիստի արձանագրություն)

- Նախաքննության մարմնի կողմից 2024 թվականի սեպտեմբերի 6-ին կայացված արտավարութային փաստաթուղթ ճանաչելու մասին որոշումը, համաձայն որի՝ արտավարութային փաստաթուղթ են ճանաչվել ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրում առկա Օնիկ Տարոնի Առաքելյանի վարորդական վկայականի վերաբերյալ տեղեկատվության քաղվածի, Օնիկ Տարոնի Առաքելյանի վերաբերյալ 2024թ. մայիսի 12-ին կազմված վարչական իրավախախտման վերաբերյալ արձանագրության (կից չլրացված վարչական իրավախախտման որոշում՝ 8180403977), Օնիկ Առաքելյանին սթափության զննության ենթարկելու վերաբերյալ թիվ 03716 կտրոնի, 91100840 սթափության զննության սարքի ստուգաչափման թիվ 113383 վկայականի, Օնիկ Առաքելյանի վերաբերյալ 2022 թվականի հոկտեմբերի 24-ին կազմված վարչական իրավախախտման վերաբերյալ արձանագրության (կից չլրացված վարչական իրավախախտման որոշում՝ 8180165475), Օնիկ Առաքելյանին սթափության զննության ենթարկելու վերաբերյալ 00651 զննման համարի կտրոնի, 91100934 համարի սարքի ստուգաչափման թիվ 074584 վկայականի և դարձերեսի, Օնիկ Առաքելյանի վերաբերյալ 2024թ. մայիսի 12-ին՝ կազմված վարչական իրավախախտման վերաբերյալ արձանագրության (կից չլրացված վարչական իրավախախտման որոշում՝ 8180405155), Օնիկ Առաքելյանին 2024 թվականի մայիսի 12-ին՝ սթափության զննության ենթարկելու վերաբերյալ 02181 զննման համարի կտրոնի, 91100999 համարի սարքի ստուգաչափման թիվ 113413 վկայականի, պարտավորագրի պատճենները, որոնք կցվել են գործի նյութերին:
(գ.թ. 36-37, դատական նիստի արձանագրություն)
Լրացուցիչ դատալսումների ընթացքում հետազոտված թույլատրելի ապացույցները.
 ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանից ստացված տեղեկանքը, համաձայն որի՝ Օնիկ Տարոնի Առաքելյանը դատվածություն չունի:
 Միասնական էլեկտրոնային տեղեկատվական համակարգում կատարված հարցման արդյունքում ստացված պատասխանի համաձայն՝ ՀՀ պետական եկամուտների կոմիտեի տվյալների շտեմարանում հանցանքները կատարելուն նախորդող 12 ամիսների ընթացքում Օնիկ Տարոնի Առաքելյանի եկամուտների վերաբերյալ տվյալներ առկա չեն։

4. Դատարանի փաստական վերլուծությունները և հաստատված կամ հերքված փաստական հանգամանքները.
Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը գտնում է, որ առկա է փոխկապակցված վերաբերելի, թույլատրելի, հավաստի ապացույցների ամբողջություն, որը թույլ է տալիս հաստատված համարելու, որ Օնիկ Առաքելյանը, վարչական իրավախախտման գործով թիվ 8180165475 որոշմամբ օրենքով սահմանված կարգով 1 տարի ժամկետով՝ 2022 թվականի հոկտեմբերի 24-ից մինչև 2023 թվականի հոկտեմբերի 24-ն ընկած ժամանակահատվածում, հանդիսանալով տրանսպորտային միջոցներ վարելու իրավունքից զրկված և պատշաճ եղանակով այդ մասին տեղեկացված լինելով, իր նշված իրավունքից զրկման ժամկետը լրանալուց հետո սահմանված կարգով այն չվերականգնելու պայմաններում, 2024 թվականի մայիսի 12-ին՝ ժամը 01:40-ի սահմաններում, ոչ սթափ վիճակում՝ մեկ լիտր արտաշնչած օդի մեջ 0.679 մգ/լ մաքուր ալկոհոլի պարունակությամբ, Երևան քաղաքի Թամանցիների փողոցում ուղղակի դիտավորությամբ վարել է «Mercedes Benz» մակնիշի 37 FG 229 հաշվառման համարանիշի տրանսպորտային միջոցը, ինչը հայտնաբերվել և արձանագրվել է ՀՀ ՆԳՆ ոստիկանության պարեկային ծառայության 2-րդ գումարտակի 3-րդ վաշտի պարեկի կողմից:
Դրանից հետո նշված տրանսպորտային միջոցը Երևան քաղաքի Բագրատունյաց փողոց տեղափոխելու վերաբերյալ պարտավորագրի համաձայն հանձնվել է տրանսպորտային միջոցներ վարելու իրավունք ունեցող Կորյուն Նվերի Գասպարյանին, ում կողմից այն նշված հասցե տեղափոխելուց հետո, Օնիկ Առաքելյանը Երևան քաղաքի Թամանցիների փողոցում հայտնաբերվելուց հետո նույն օրը՝ ժամը 03:25-ի սահմաններում, ոչ սթափ վիճակում՝ մեկ լիտր արտաշնչած օդի մեջ 0.410 մգ/լ մաքուր ալկոհոլի պարունակությամբ, Երևան քաղաքի Բագրատունյաց փողոցում վարել է հիշատակված տրանսպորտային միջոցը, ինչը հայտնաբերվել և արձանագրվել է ՀՀ ՆԳՆ ոստիկանության պարեկային ծառայության 2-րդ գումարտակի 1-ին վաշտի պարեկի կողմից:
Դատարանը գտնում է, որ դատավճռի հիմքում դրված՝ փոխկապակցված վերաբերելի, թույլատրելի, հավաստի ապացույցների ամբողջությունը բացառում է Օնիկ Տարոնի Առաքելյանին ներկայացված մեղադրանքի ապացուցվածության վերաբերյալ ցանկացած հիմնավոր կասկած։
Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները. Օնիկ Տարոնի Առաքելյանը դատվածություն չունի, մեղսագրվող արարքները կատարելու մեջ իրեն մեղավոր է ճանաչում, մեղսագրվող հանցանքները ավարտվելու օրվան նախորդող 12 ամիսների ընթացքում վերջինիս ստացած եկամտի վերաբերյալ տվյալները բացակայում են։

5. Դատարանի իրավական վերլուծությունները, հետևությունները և որոշումները.
Հիմնական դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, դրանց պատշաճ հետազոտման և վերլուծության վրա հիմնված ներքին համոզմամբ, մեղադրյալի մեղավորության վերաբերյալ չփարատվող բոլոր ողջամիտ կասկածները նրա օգտին մեկնաբանելով, Դատարանը հանգում է հետևության, որ ապացուցված է Օնիկ Տարոնի Առաքելյանին վերագրվող արարքները, այդ արարքների քրեական հակաիրավականությունները, այդ արարքները մեղադրյալի կողմից կատարելը, ինչպես նաև նրա մեղավորությունը տվյալ արարքների կատարման մեջ:
Դատարանը հանգում է այն հետևության, որ մեղադրյալ Օնիկ Տարոնի Առաքելյանը կատարել է իրեն մեղսագրված արարքները, որոնց նկատմամբ կիրառելի է ՀՀ քրեական օրենսգրքի 344-րդ հոդվածի 2-րդ մասը և ՀՀ քրեական օրենսգրքի 344-րդ հոդվածի 2-րդ մասը:
Դատարանը, հաստատված համարելով հանցագործությունների և դրանց կատարման մեջ Օնիկ Տարոնի Առաքելյանի մեղքի ապացուցված լինելը, գտնում է, որ նա ենթակա է պատժի կատարած հանցանքների համար:
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, գտնում է, որ Օնիկ Տարոնի Առաքելյանի պատասխանատվությունն ու պատիժը մեղմացնող հանգամանք պետք է դիտել ներկայացված մեղադրանքում իրեն լիովին մեղավոր ճանաչելը և կատարածի համար զղջալը (Դատարանի նման մոտեցումը համահունչ է Սերոբ Սարգսյանի գործով 2012 թվականի նոյեմբերի 1-ի թիվ ՍԴ/0109/01/12 որոշման 27-րդ կետում ՀՀ վճռաբեկ դատարանի արտահայտած իրավական դիրքորոշմանը:
Դատարանն արձանագրում է, որ Օնիկ Տարոնի Առաքելյանի պատասխանատվությունն ու պատիժը ծանրացնող հանգամանքներ առկա չեն:
Միաժամանակ, որպես մեղադրյալ Օնիկ Տարոնի Առաքելյանի անձը բնութագրող տվյալներ, Դատարանն արձանագրում է, որ նա թեև չունի դատվածություն, սակայն նախկինում դատապարտվել է նույնասեռ հանցավոր արարքներ կատարելու համար:
Դատարանը, հաշվի առնելով Օնիկ Տարոնի Առաքելյանի կատարած հանցանքների հանգամանքները, նրա անձը բնութագրող տվյալը, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ՀՀ քրեական օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ ՀՀ քրեական օրենսգրքի 344-րդ հոդվածի 2-րդ մասի սանկցիայով որպես հիմնական պատիժ է նախատեսված նաև տուգանքի ձևով և ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար նշված հանցագործությունների կատարման համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ ՀՀ քրեական օրենսգրքի 344-րդ հոդվածի 2-րդ մասով հիմնական պատիժ պետք է նշանակել տուգանք՝ նվազագույն աշխատավարձի յոթապատիկի՝ 525.000 (հինգ հարյուր քսանհինգ հազար) ՀՀ դրամ գումարի չափով, իսկ ՀՀ քրեական օրենսգրքի 344-րդ հոդվածի 2-րդ մասով՝ տուգանք՝ նվազագույն աշխատավարձի յոթապատիկի՝ 525.000 (հինգ հարյուր քսանհինգ հազար) ՀՀ դրամ գումարի չափով։
Դատարանն արձանագրում է, որ ՀՀ քրեական օրենսգրքի 74-րդ հոդվածով սահմանված կարգով՝ Օնիկ Տարոնի Առաքելյանի նկատմամբ ՀՀ քրեական օրենսգրքի 344-րդ հոդվածի 2-րդ մասով՝ առաջին դրվագով նշանակված 525.000 (հինգ հարյուր քսանհինգ հազար) ՀՀ դրամ գումարի չափով տուգանքին պետք է լրիվ գումարել ՀՀ քրեական օրենսգրքի 344-րդ հոդվածի 2-րդ մասով՝ երկրորդ դրվագով նշանակված 525.000 (հինգ հարյուր քսանհինգ հազար) ՀՀ դրամ գումարի չափով տուգանքը և Օնիկ Տարոնի Առաքելյանի նկատմամբ վերջնական պատիժ պետք է նշանակել տուգանք՝ 1.050.000 (մեկ միլիոն հիսուն հազար) ՀՀ դրամ գումարի չափով:
Դատարանը միաժամանակ գտնում է, որ կատարած հանցանքներից յուրաքանչյուրի համար Օնիկ Տարոնի Առաքելյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
Միաժամանակ նկատի ունենալով և հաշվի առնելով վերջինիս գույքային դրության վերաբերյալ գործում առկա տվյալները, Դատարանը գտնում է, որ Օնիկ Տարոնի Առաքելյանի նկատմամբ նշանակվող տուգանքի վճարումը պետք է տարաժամկետել և նրան թույլատրել տուգանքը վճարել մաս առ մաս՝ 1 (մեկ) տարվա ընթացքում՝ ըստ մեղադրյալի և ՀՀ ԱՆ պրոբացիայի ծառայության համապատասխան մարմնի կողմից համատեղ սահմանած վճարման ժամանակացույցի:
Դատարանը, անդրադառնալով ՀՀ քրեական դատավարության 348-րդ հոդվածով նախատեսված՝ դատավճիռ կայացնելիս դատարանի լուծմանը ենթակա մյուս հարցերին, արձանագրում է, որ գործով իրեղեն ապացույցներ չկան, գույքային հայց ներկայացված չէ, առկա չէ նաև հատուցման ենթակա գույքային այլ վնաս և դրա ապահովման նպատակով արգելադրված որևէ գույք, քրեական վարույթով առկա չեն նաև վարութային ծախսեր:
Անդրադառնալով մեղադրյալի նկատմամբ ընտրված խափանման միջոցի հարցին՝ Դատարանն արձանագրում է, որ վերջինիս նկատմամբ որպես խափանման միջոց ընտրված բացակայելու արգելքը պետք է թողնել անփոփոխ մինչև դատավճռի օրինական ուժի մեջ մտնելը, իսկ դրանից հետո պետք է վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 167-րդ, 347-350-րդ և 352-353-րդ հոդվածներով` Դատարանը

ՎՃՌԵՑ

Օնիկ Տարոնի Առաքելյանին մեղավոր ճանաչել ՀՀ քրեական օրենսգրքի 344-րդ հոդվածի 2-րդ մասով և ՀՀ քրեական օրենսգրքի 344-րդ հոդվածի 2-րդ մասով նախատեսված հանցագործությունների կատարման մեջ։
Օնիկ Տարոնի Առաքելյանի նկատմամբ ՀՀ քրեական օրենսգրքի 344-րդ հոդվածի 2-րդ մասով առաջին դրվագով պատիժ նշանակել տուգանք՝ նվազագույն աշխատավարձի յոթապատիկի՝ 525.000 (հինգ հարյուր քսանհինգ հազար) ՀՀ դրամի չափով:
Օնիկ Տարոնի Առաքելյանի նկատմամբ ՀՀ քրեական օրենսգրքի 344-րդ հոդվածի 2-րդ մասով երկրորդ դրվագով պատիժ նշանակել տուգանք՝ նվազագույն աշխատավարձի յոթապատիկի՝ 525.000 (հինգ հարյուր քսանհինգ հազար) ՀՀ դրամի չափով:
ՀՀ քրեական օրենսգրքի 74-րդ հոդվածով սահմանված կարգով՝ Օնիկ Տարոնի Առաքելյանի նկատմամբ ՀՀ քրեական օրենսգրքի 344-րդ հոդվածի 2-րդ մասով՝ առաջին դրվագով նշանակված 525.000 (հինգ հարյուր քսանհինգ հազար) ՀՀ դրամի չափով տուգանքին լրիվ գումարել ՀՀ քրեական օրենսգրքի 344-րդ հոդվածի 2-րդ մասով՝ երկրորդ դրվագով նշանակված 525.000 (հինգ հարյուր քսանհինգ հազար) ՀՀ դրամի չափով տուգանքը և նրա նկատմամբ վերջնական պատիժ նշանակել տուգանք՝ 1.050.000 (մեկ միլիոն հիսուն հազար) ՀՀ դրամի չափով:
Օնիկ Տարոնի Առաքելյանին թույլատրել որպես պատիժ նշանակված 1.050.000 (մեկ միլիոն հիսուն հազար) ՀՀ դրամի չափով տուգանքը վճարել մաս առ մաս 1 (մեկ) տարվա ընթացքում՝ ըստ վերջինի և ՀՀ ԱՆ պրոբացիայի ծառայության համապատասխան ստորաբաժանման կողմից սահմանված տուգանքի վճարման ժամանակացույցի:
Օնիկ Տարոնի Առաքելյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը, որից հետո վերացնել։
Վարութային ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում:


ԴԱՏԱՎՈՐ ՏԱԹԵՎԻԿ ՄՈՒՐԱԴՅԱՆ