ԵԴ1/0488/01/25



ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ
2025 թվականի փետրվարի 26-ին քաղաք Երևան
Երևան քաղաքի առաջին ատյանի ընդհանուր իրավասության քրեական դատարանը /այսուհետ նաև` Դատարան/` հետևյալ կազմով
Նախագահությամբ դատավոր՝ Վ.Մելիքյանի
Քարտուղարությամբ՝ Ա.Բարսամյանի
Մասնակցությամբ.
Հանրային մեղադրող՝ Ս.Մնացականյանի
Տուժող՝ Ա.Էլբակյանի
Մեղադրյալ՝ Գ.Ազիզյանի
դռնբաց դատական նիստում քննության առնելով քրեական գործն ըստ մեղադրանքի Գևորգ Ալբերտի Ազիզյանի (ծնված 26.06.1966թ., ազգությամբ հայ ՀՀ քաղաքացի, ամուսնացած, հաշվառված և բնակվող՝ ք.Երևան Նոր Արեշ 42 փողոց, 1-ին շենք, 15 բն. հասցեում, նախկինում չդատված, չի աշխատում) ՀՀ քրեական օրենսգրքի 254-րդ հոդվածի 3-րդ մասի 2-րդ կետով,
1.Գործի դատավարական նախապատմությունը.
24.12.2024 թվականին ՀՀ ՔԿ ԵՔՔՎ Էրեբունի և Նուբարաշեն վարչական շրջանների քննչական բաժնում ՀՀ քրեական օրենսգրքի 254-րդ հոդվածի 3-րդ մասի 2-րդ կետով նախաձեռնվել է թիվ 12826224 քրեական վարույթը /հատոր 1-ին, գ.թ. 4/:
24.12.2024 թվականին նախաքննական մարմնի որոշմամբ թիվ 12826224 քրեական վարույթով Արմենուհի Էլբակյանը ճանաչվել է տուժող /հատոր 1-ին, գ.թ. 11/:
27.12.2024 թվականին Երևան քաղաքի Էրեբունի և Նուբարաշեն վարչական շրջանների դատախազության դատախազ Ս.Մնացականյանի որոշմամբ Գևորգ Ալբերտի Ազիզյանի նկատմամբ հարուցվել է հանրային քրեական հետապնդում ՀՀ քրեական օրենսգրքի 254րդ հոդվածի 3-րդ մասի 2-րդ կետով /հատոր 1-ին, գ.թ. 57-58/:
28.12.2024 թվականին Երևան քաղաքի առաջին ատյանի ընդհանուր իրավասության քրեական դատարանի որոշմամբ մեղադրյալ Գևորգ Ալբերտի Ազիզյանի նկատմամբ խափանման միջոց է կիրառվել կալանքը երկու ամիս ժամկետով՝ կալանքի սկիզբը հաշվելով 27.12.2024 թվականից /հատոր 1-ին, գ.թ. 78-88/:
Թիվ ԵԴ1/0488/01/25 քրեական գործն ըստ մեղադրանքի՝ Գևորգ Ալբերտի Ազիզյանի ՀՀ քրեական օրենսգրքի 254-րդ հոդվածի 3-րդ մասի 2-րդ կետով ուղարկվել է Երևան քաղաքի առաջին ատյանի ընդհանուր իրավասության քրեական դատարան, մուտքագրվել է 2025 թվականի փետրվարի 11-ին և նույն օրը համակարգչային ծրագրի միջոցով իրականացվող գործերի բաշխմամբ մակագրվել և 2025 թվականի փետրվարի 11-ին հանձնվել է աշխատակազմին:
13.02.2025 թվականի Դատարանի որոշմամբ քրեական գործը վարույթ է ստանձնվել և նախնական դատալսումներ է նշանակվել:
26.02.2025 թվականին Դատարանը կայացրել է մեղադրական վերդիկտ և նույն օրը որոշում կայացրել լրացուցիչ դատալսումների անցնելու մասին:
2.Մեղադրանքի փաստական նկարագրությունը.
Գևորգ Ալբերտի Ազիզյանի նկատմամբ ՀՀ քրեական օրենսգրքի 254-րդ հոդվածի 3-րդ մասի 2-րդ կետով հանրային քրեական հետապնդում է հարուցվել այն բանի համար, որ նա գաղտնի հափշտակություն կատարելու դիտավորությամբ, 2024 թվականի դեկտեմբերի 24-ին՝ ժամը 03։00-ի սահմաններում, գտնվելով Երևան քաղաքի Նոր Արեշ 11-րդ փողոցում և օգտվելով նույն փողոցի վրա գտնվող 98-րդ համարի տանը մարդ չլինելու հանգամանքից, ապօրինի մուտք է գործել տուժող Արմենուհի Էլբակյանին պատկանող հիշյալ բնակարան և հափշտակել վարսահարդարիչ, արդուկ, 1 /մեկ/ շիշ վիսկի, 3 /երեք/ շիշ գինի, 2 /երկու/ հատ սեղանի ծածկոց, 2 /երկու/ հատ կանացի պայուսակ, 1 /մեկ/ զույգ կոշիկ, 18 /տասնութ/ հատ վզնոց, 10 /տաս/ հատ բանալի, 5 /հինգ/ հատ զույգ ականջօղեր, 4 /չորս/ հատ առանց զույգ ականջօղեր, կախազարդ, 3 /երեք/ հատ կոճակ, 7 /յոթ/ հատ տղամարդու մատանի, 28 /քսանութ/ հատ կանացի մատանի, 5 /հինգ/ հատ վզնոց-շղթա, գրպանի ժամացույց, ճամպրուկ, որի արդյունքում տուժող Արմենուհի Էլբակյանին պատճառել է մանր չափի՝ ընդհանուր 446.150 ՀՀ դրամի չափով գույքային վնաս:
3.Դատաքննությամբ հետազոտված թույլատրելի ապացույցները.
Մեղադրյալ Գևորգ Ազիզյանն իրեն մեղավոր է ճանաչել և օգտվելով իր իրավունքից հրաժարվել է ցուցմունք տալուց:
Հրապարակվել է մեղադրյալի նախաքննական ցուցմունքը, համաձայն որի՝ «...2024 թվականի դեկտեմբերի 24-ին` ժամը 01:00-ի սահմաններում, տանն օգտագործել է ալկոհոլային խմիչք, որից հետո իրեն լավ չի զգացել, որոշել է դուրս գալ` զբոսնելու: Քայլել է Երևան քաղաքի Նոր Արեշ 11-րդ փողոցով, հանկարծ նկատել է, որ տներից մեկի դուռը կողպեքով փակված է եղել, լույսերը` անջատված, այդ ժամանակ չհասկանալով, առանց երկար-բարակ մտածելու, որոշել է դարպասի վրայով թռնելով մտնել ներս` գողություն կատարելու նպատակով, քանի որ փողից մի քիչ նեղվել է և իրեն գումար է անհրաժեշտ եղել: Թռնելով դարպասի վրայով նկատել է տան պատուհանը, ձեռքով մի փոքր հրել է, այն բացվել է, որից հետո մտել է ներս ու սկսել թանկարժեք իրեր փնտրել, առաջինը նկատել է խմիչքները` թվով 4 հատ, վերցրել է դրանք, որից հետո սկսել է տան իրերը խառնելով թանկարժեք իրեր գտնել, պահարանի միջից գտել է զարդեր, անգամ չի էլ ստուգել, թե ինչ մետաղից են եղել, հավաքել է դրանք, պահարանից վերցրել ինչ-որ կոշիկ, սփռոց, առանց նայելու վերցրել է, դրանք անգամ իրեն հարկավոր չեն էլ եղել, չի հասկացել, թե ինչպես է վերցրել, հետո նկատել է ճամպրուկ, որոշել է` ինչ գտել է, վերցնի, լցնի ճամպրուկի մեջ, որպեսզի հեշտությամբ տանի, ճամպրուկը փակել է, դրա մեջ եղել են նաև կենցաղային տեխնիկաներ` մազերի հարդարիչ, արդուկ և այլ իրեր: Հետո, ճամպրուկը փակելուց հետո այն պատուհանից դուրս է հանել և կրկին պատուհանով դուրս եկել, որից հետո բացելով տան դուռը, գնացել է տուն: Դեպքի օրը եղել է մենակ, իր հետ այլ անձինք չեն եղել, մենակ է որոշել գողություն կատարել, իրեն որևէ մեկը չի դրդել այդ քայլին: Գողության մասին որևէ մեկին չի պատմել: Չի իմացել, թե ում տուն է մուտք գործում, տան տերերին չի ճանաչել, միայն տեսնելով, որ տանը մարդ չկա, պատահական մտել է այդ տուն: Նշել է, որ կյանքում առաջին անգամ է կատարել գողություն, հենց դա է եղել, որն էլ չհասկանալով կատարել է: Զղջում է կատարած արարքի համար...»:
/Հատոր 1-ին, գ.թ. 38-41, 60-61, 158-159/:
Տուժող Արմենուհի Էլբակյանը հիմնական դատալսումների ընթացքում ցուցմունք է տվել այն մասին, որ Երևան քաղաքի Նոր Արեշ 11 փողոցի 98 տուն հասցեն պատկանել է իրեն, ինքը մշտապես բնակվել է այդ հասցեում, սակայն իրենք ունեցել են ևս մեկ բնակարան:
2024 թվականի դեկտեմբերի սկզբներին տեղափոխվել են իրենց հասցե, սակայն անձնական իրերը թողել են Երևան քաղաքի Նոր Արեշ հասցեի տանը: 2024 թվականի դեկտեմբերի 24-ին` ժամը 09:30-ի սահմաններում, ինքն իրենց տան տեսախցիկներով նկատել է, որ ինչ-որ անծանոթ տղամարդ մուտք է գործել իրենց տուն, անմիջապես գնացել են այնտեղ և տեսել, որ անհայտ անձը խոհանոցի պատուհանից մտնելով իրենց տուն, խառնել է ամբողջ տան ապրանքները, գցել գետնին և տարբեր ապրանքներ գողացել, մասնավորապես նկատել է, որ տնից բացակայում է մեկ հատ ճամպրուկ, որի մեջ եղել են լրիվ նոր հագուստներ` կանացի, բացի դա, գողացել են նաև թվով 2 հատ փոքր և մեծ սեղանի համար նախատեսված ծածկոց /սփռոց/, տան հյուրասենյակի պահարանից բացակայել են նաև մի քանի թանկարժեք խմիչքներ, մասնավորապես թվով 2 հատ գինի, 1 հատ կոնյակ, 1 հատ վիսկի` շոտլանդական, 1 հատ օղի: Նշել է նաև, որ տան ննջասենյակից հափշտակել են նաև իրեն պատկանող թվով մեկ հատ ոսկյա վզնոց՝ խաչով, ինչպես նաև թվով 2 հատ արծաթյա թևնոց: Նշված արարքի կատարման հետևանքով իրեն պատճառվել է ընդհանուրը` մոտ 300.000 ՀՀ դրամ գումարի չափով գույքային վնաս:
Վկա Հրանտ Ղազարյանը ցուցմունք է տվել այն մասին, որ Երևան քաղաքի Նոր Արեշ 11 փողոցի 98 բանակարանը պատկանել է կնոջը` Արմենուհի Էլբակյանին, իրենք մշտապես բնակվել են այդ հասցեում, սակայն ունեն ևս մեկ բնակարան և 2024 թվականի դեկտեմբերի 7-ին տեղափոխվել են այնտեղ, սակայն իրենց անձնական իրերը թողել են իրենց` Նոր Արեշի տանը: 2024 թվականի դեկտեմբերի 24-ին` ժամը 09:30-ի սահմաններում, կինն իրենց տան տեսախցիկներով նկատել է, որ ինչ-որ մի անծանոթ տղամարդ մուտք է գործել տուն, իրենք անմիջապես գնացել են այնտեղ և տեսել, որ անհայտ անձը խոհանոցի պատուհանից մտնելով իրենց տուն, խառնել էր ամբողջ իրենց տան ապրանքները: Ինքն այդ ժամանակ զանգահարել է ոստիկանություն և հայտնել կատարվածի մասին: Չգիտի, թե ով է հանդիսացել նշված տղամարդը, որևէ անձի չի կասկածել նշված արարքի կատարման մեջ:
Հիմնական դատալսումների ընթացքում հետազոտվել են.
Հանցագործության մասին բանավոր հաղորդում ընդունելու վերաբերյալ թիվ 025135 արձանագրությունը, համաձայն որի` 2024 թվականի դեկտեմբերի 24-ին՝ ժամը 03:00-ի սահմաններում, անհայտ անձը տեխնիկական միջոցների գործադրմամբ բացել է իր կնոջ՝ Արմենուհի Մարտունիկի Էլբակյանին պատկանող՝ Երևան քաղաքի Նոր Արեշ 11-րդ փողոցի 98 հասցեի տան պատուհանը և մուտք գործելով տուն, գաղտնի հափշտակել մեկ հատ ,,Սամսունգ,, մոդելի բջջային հեռախոս, մեկ հատ ճամպրուկ, տարբեր տեսակի ոգելից խմիչքներ, ոսկյա զարդեր և հագուստներ՝ պատճառելով մոտ 500.000 ՀՀ դրամ գումարի չափով գույքային վնաս:
/Հատոր 1-ին, գ.թ. 3/:
Դեպքի վայրի զննություն կատարելու մասին արձանագրությունը, համաձայն որի` դեպքի վայր է հանդիսացել Երևան քաղաքի Նոր Արեշ 11 փողոցի 98-րդ հասցեն: Դեպքի վայրի զննության ժամանակ մասնակից Արմենուհի Էլբակյանը մատնացույց է արել իր բնակարանի դարպասը և հայտնել, որ անհայտ անձը նշված դարպասի վրայով մուտք է գործել իր բնակարան, որից հետո մատնացույց է արել իր բնակարանի խոհանոցի պատուհանը և հայտարարել, որ անհայտ անձը նշված պատուհանով ներս է մտել իր տուն և տնից կատարել գաղտնի հափշտակություն: Մասնավորապես, հափշտակել է մեկ հատ ճամպրուկ, որի մեջ եղել են լրիվ նոր հագուստներ` կանացի, բացի դա, գողացել են նաև թվով 2 հատ փոքր և մեծ սեղանի համար նախատեսված ծածկոց /սփռոց/, ննջասենյակում դրված Սամսունգ մոդելի բջջային հեռախոսը, տան հյուրասենյակի պահարանից բացակայել են նաև մի քանի թանկարժեք խմիչքներ, մասնավորապես թվով 2 հատ գինի, 1 հատ կոնյակ, 1 հատ վիսկի` շոտլանդական, 1 հատ օղի: Նշել է նաև, որ տան ննջասենյակից հափշտակել են նաև իրեն պատկանող թվով մեկ հատ ոսկյա վզնոց՝ խաչով, ինչպես նաև թվով 2 հատ արծաթյա թևնոց:
/Հատոր 1-ին, գ.թ. 6-9/:
Գևորգ Ալբերտի Ազիզյանին ձերբակալելու մասին արձանագրությունը, համաձայն որի՝ 26.12.2024թ.-ին Երևան քաղաքի Նոր Արեշ 42 փողոցի 1-ին շենքի բակից գողություն կատարելու՝ անմիջականորեն ծագած հիմնավոր կասկածով ձերբակալվել և ոստիկանության Էրեբունու բաժին է ներկայացվել Գևորգ Ալբերտի Ազիզյանը:
/Հատոր 1-ին, գ.թ. 25/:
Զննություն կատարելու մասին արձանագրությունը, համաձայն որի` Գևորգ Ազիզյանի մասնակցությամբ զննության է ենթարկվել դեպքի վայրում առկա տեսանկարահանող սարքերի արձանագրած տեսագրությունը, որի արդյունքում պարզվել է, որ տեսանյութի աջ կողմի վերևի հատվածում առկա է եղել 2024 DEC 24 գրառումը և ժամը՝ 03:02: Զննությանը մասնակից Գ.Ազիզյանը հայտարարել է, որ տեսանյութում պատկերված անձը հանդիսացել է ինքը, ում հագին առկա է եղել սպորտային համազգեստ, գլխարկ, վերջինս Երևան քաղաքի Նոր Արեշ 11 փողոցի 98-րդ տան դարպասի վրայով բարձրանալով, մուտք է գործել վերոնշյալ հասցե: Տեսանյութում պատկերված անձի աջ ձեռքին առկա է եղել դաջվածք՝ խաչի տեսքով, որն առկա է եղել նաև մասնակցի ձեռքին: Մասնակիցը հայտարարել է, որ տեսանյութում պատկերված անձն ինքն է հանդիսացել:
/Հատոր 1-ին, գ.թ. 10, 42/:
Զննություն կատարելու մասին արձանագրությունը, համաձայն որի` Արմենուհի Էլբակյանի մասնակցությամբ զննության է ենթարկվել ձերբակալված Գևորգ Ազիզյանի մոտից հայտնաբերված ճամպրուկը, որի մեջ առկա են եղել տարբեր իրեր, մասնավորապես թվով 1 հատ արդուկ Diamond ֆիրմայի, մեկ հատ դեղնականաչավուն դրամապանակ, որի մեջ առկա է եղել տոպրակ, իսկ միջին՝ մարգարտյա շղթա, ինչպես նաև մեկ հատ Իջևանի ստիպակ, չոր գինի, մեկ հատ Grants ֆիրամի վիսկի, երկու հատ ,,Սև Քիշմիշ,, գրառմամբ գինի, թվով 2 հատ սեղանի ծածկոց՝ մարմնագույն և խառը նախշերով, սև կտորե տոպրակ, որի մեջ առկա էր թվով 35 հատ արծաթյա մատանի՝ կանացի, մեկ հատ ժամացույց, մեկ հատ շղթա /բիժու/, որի վրա առկա է եղել սուր, երկար կախազարդ, մեկ հատ ականջող, որի վրա առկա է եղել փոքր քար, թվով 3 հատ կանացի արծաթյա շղթա, հյուսվածքներով և թվով 1 հատ ոսկյա բարակ շղթա, որի վրա առկա է եղել փոքր խաչ, բացի այդ, առկա է եղել նաև փոքր տոպրակի մեջ մատանու քար՝ դեղնավուն: Մեկ այլ տոպրակի միջից հայտնաբերվել է մարգարտյա շղթաներ, հին, թվով 5 հատ մեկ հատ մազերի սև հարդարիչ, մեկ հատ սպիտակ տուփով կանացի կոշիկներ, օգտագործված վիճակում, ճամպրուկի միջից հայտնաբերվել է նաև մեկ հատ սև կանացի պայուսակ, հնամաշ, որի մեջ առկա է եղել թվով 10 հատ կահույքի բանալիներ, որն ըստ մասնակցի, իրենց տան հին կահույքի բանալիներն են եղել: Մասնակիցը հայտարարել է, որ նշված բոլոր իրերը պատկանել են իրեն և հափշտակված եղել իր բնակության հասցեից:
/Հատոր 1-ին, գ.թ. 47-48/:
Զննություն կատարելու մասին արձանագրությունը, համաձայն որի` զննության է ենթարկվել ՀՀ ՆԳՆ ոստիկանության ՔՈԳՎ Երևան քաղաքի վարչության ՍԴՈՒՀԴՊ բաժնի ավագ քրեական ոստիկան, ոստիկանության ավագ լեյտենանտ Ա.Պետիկյանի կողմից 26.12.2024թ.-ին կազմված արձանագրությունը, համաձայն որի` այն կազմվել է Գևորգ Ազիզյանի, ընթերականեր` Ռուբեն Սերոբիի Կայիլյանի և Հակոբ Շավարշի Մանուկյանի մասնակցությամբ: Վերոնշյալ արձանագրության զննության արդյունքում պարզվել է, որ թիվ 12826224 վարույթով ձերբակալած Գևորգ Ազիզյանն իր բնակության հասցեի ննջասենյակից ներկայացրել է գողոն հանդիսացող ճամպրուկը, մեկ վարսահարդարիչ, մեկ արդուկ, մեկ զույգ կոշիկ, չորս խմիչք, երկու կանացի պայուսակ սև և կանաչ, 35 մատանիներ տարբեր տեսակի, հինգ վզնոց, մեկ ականջօղ, մեկ փաթեթով փայլուն քարեր, մեկ ժամացույց, տասը բանալի, մեկ փաթեթով մարգարտյա վզնողներ և մեկ փաթեթ տարբեր տեսակի զարդեր, որոնք փաթեթավորվել և կնիքվել են: Նշված արձանագրության ներքևի հատվածում առկա են եղել Գևորգ Ազիզյանի և ընթերակաների ստորագրությունները:
/Հատոր 1-ին, գ.թ. 28, 161/:
Դատաապրանքագիտական փորձաքննության թիվ 1-ԱՊ-25 եզրակացությունը, համաձայն որի՝ փորձաքննությանը ներկայացված ճամպրուկի և դրանում առկա ապրանքատեսակների միջին շուկայական արժեքը դեպքի օրվա դրությամբ կազմել է ընդհանուրը` 446.150 ՀՀ դրամ:
/Հատոր 1-ին, գ.թ. 136-142/:
Իրեղեն ապացույց ճանաչված՝ մեկ հատ «Hair Dryer» տեսակի վարսահարդարիչը, «Diamond» տեսակի արդուկը, 1 /մեկ/ շիշ «Grant's» տեսակի վիսկին, 3 /երեք/ շիշ գինիները՝ երկուսը՝ «Իջևան սպիտակ չոր գինի» և մեկ «Սև Քիշմիշ կարմիր կիսաքաղցր գինի», 2 /երկու/ հատ «Jumbo» տեսակի սեղանի ծածկոցները, 2 /երկու/ հատ կանացի պայուսակը, 1 /մեկ/ զույգ «DIVIDED» տեսակի կոշիկը, 18 /տասնութ/ հատ վզնոցները, 10 /տաս/ հատ բանալիները, 5 /հինգ/ հատ զույգ ականջօղերը, 4 /չորս/ հատ առանց զույգ ականջօղերը, կախազարդը, 3 /երեք/ հատ կոճակները, 7 /յոթ/ հատ տղամարդու մատանիները, 28 /քսանութ/ հատ կանացի մատանիները, 5 /հինգ/ հատ վզնոց-շղթան, գրպանի ժամացույցը և ճամպրուկը:
Արտավարութային փաստաթուղթն ապացույց ճանաչված` Արմենուհի Էլբակյանի կողմից ներկայացված լազերային սկավառակը:
/Հատոր 1-ին, գ.թ. 10, 160/:
Արտավարութային փաստաթուղթն ապացույց ճանաչված` ՀՀ ՆԳՆ ոստիկանության ՔՈԳՎ Երևան քաղաքի վարչության ՍԴՈՒՀԴՊ բաժնի ավագ քրեական ոստիկան, ոստիկանության ավագ լեյտենանտ Ա.Պետիկյանի կողմից 26.12.2024թ.-ին կազմված արձանագրությունը:
/Հատոր 1-ին, գ.թ. 162-163/:
4.Դատարանի փաստական վերլուծությունները և Դատարանի կողմից հաստատված փաստական հանգամանքները.
Գևորգ Ալբերտի Ազիզյանը գաղտնի հափշտակություն կատարելու դիտավորությամբ, 2024 թվականի դեկտեմբերի 24-ին՝ ժամը 03։00-ի սահմաններում, գտնվելով Երևան քաղաքի Նոր Արեշ 11-րդ փողոցում և օգտվելով նույն փողոցի վրա գտնվող 98-րդ համարի տանը մարդ չլինելու հանգամանքից, ապօրինի մուտք է գործել տուժող Արմենուհի Էլբակյանին պատկանող հիշյալ բնակարան և հափշտակել վարսահարդարիչ, արդուկ, 1 /մեկ/ շիշ վիսկի, 3 /երեք/ շիշ գինի, 2 /երկու/ հատ սեղանի ծածկոց, 2 /երկու/ հատ կանացի պայուսակ, 1 /մեկ/ զույգ կոշիկ, 18 /տասնութ/ հատ վզնոց, 10 /տաս/ հատ բանալի, 5 /հինգ/ հատ զույգ ականջօղեր, 4 /չորս/ հատ առանց զույգ ականջօղեր, կախազարդ, 3 /երեք/ հատ կոճակ, 7 /յոթ/ հատ տղամարդու մատանի, 28 /քսանութ/ հատ կանացի մատանի, 5 /հինգ/ հատ վզնոց-շղթա, գրպանի ժամացույց, ճամպրուկ, որի արդյունքում տուժող Արմենուհի Էլբակյանին պատճառել է մանր չափի՝ ընդհանուր 446.150 ՀՀ դրամի չափով գույքային վնաս:
Դատարանի իրավական վերլուծությունները.
Դատալսումների ընթացքում պատշաճ իրավական ընթացակարգով հետազոտված ապացույցների հիման վրա, դրանց ձևի և բովանդակության վերլուծության, այլ ապացույցների հետ համադրելու միջոցով, գնահատելով դրանք վերաբերելիության, թույլատրելիության, հավաստիության, իսկ բոլոր ապացույցներն իրենց համակցության մեջ՝ ներքին համոզման հիման վրա, անմեղության կանխավարկածով, հիմնվելով պատշաճ ապացուցման արդյունքների վրա, Դատարանը հանգում է հետևության, որ ապացուցված է մեղադրյալ Գևորգ Ալբերտի Ազիզյանի՝ ՀՀ քրեական օրենսգրքի 254-րդ հոդվածի 3-րդ մասի 2-րդ կետով վերագրվող արարքի փաստական հանգամանքները, ապացուցված է նշված արարքի քրեական հակաիրավականությունը, ապացուցված է նաև մեղադրյալի կողմից այդ արարքը կատարելը և նրա մեղավորությունը տվյալ արարքը կատարելու մեջ:
Մեղադրյալ Գևորգ Ալբերտի Ազիզյանի կատարած արարքի նկատմամբ կիրառելի է ՀՀ քրեական օրենսգրքի 254-րդ հոդվածի 3-րդ մասի 2-րդ կետը:
Դատարանը հաստատված համարելով հանցագործության և դրա կատարման մեջ Գևորգ Ալբերտի Ազիզյանի մեղքի ապացուցված լինելը հանգում է հետևության, որ վերջինս դա կատարելու համար ենթակա է քրեական պատասխանատվության և պատժի:
Դատարանը մեղադրյալ Գևորգ Ալբերտի Ազիզյանի պատասխանատվությունն ու պատիժը մեղմացնող և անձը բնութագրող հանգամանք է արձանագրում առաջադրված մեղադրանքն ընդունելը և անկեղծորեն զղջալը:
Դատարանը մեղադրյալ Գևորգ Ալբերտի Ազիզյանի պատասխանատվությունն ու պատիժը ծանրացնող հանգամանքներ չի արձանագրում:
Դատարանը, նպատակ ունենալով վերականգնելու սոցիալական արդարությունը, ուղղելու պատժի ենթարկված անձին, ինչպես նաև կանխելու հանցագործությունները և հաշվի առնելով Գևորգ Ալբերտի Ազիզյանի անձը, նրա պատասխանատվությունն ու պատիժը մեղմացնող հանգամանքների առկայությունը և ծանրացնող հանգամանքի բացակայությունը, հանգում է հետևության, որ մեղադրյալ Գևորգ Ալբերտի Ազիզյանի նկատմամբ պետք է պատիժ նշանակել ազատազրկման ձևով, որը տվյալ դեպքում համաչափ է կատարված կոնկրետ հանցագործության բնույթին, վտանգավորության աստիճանին, այն կատարելու հանգամանքներին, հանցավորի անձին և բավարար է պատժի նպատակների նվաճման տեսանկյունից:
Դատարանը հաշվի առնելով Գևորգ Ալբերտի Ազիզյանի կատարած հանցագործության բնույթն ու հասարակական վտանգավորության աստիճանը, բացառում է վերջինիս նկատմամբ նշանակվելիք պատիժը պայմանականորեն չկիրառելու հնարավորությունը, քանի որ նման դեպքում հնարավոր չէ հասնել պատժի նպատակներին` սոցիալական արդարության վերականգնմանը, պատժի ենթարկված անձի ուղղմանը և հանցագործությունների կանխմանը, կխախտվեն նաև ՀՀ քրեական օրենսգրքով սահմանված` արդարության, պատասխանատվության անհատականացման և պատիժ նշանակելու ընդհանուր սկզբունքները:
Քննության առնելով խափանման միջոցի հարցը, Դատարանը գտնում է, որ մեղադրյալ Գևորգ Ալբերտի Ազիզյանի նկատմամբ ընտրված կալանավորում խափանման միջոցը պետք է թողնել ամփոփոխ մինչև դատավճիռն օրինական ուժի մեջ մտնելը:
Քննության առնելով իրեղեն ապացույցի տնօրինման հարցը, Դատարանը գտնում է, որ իրեղեն ապացույց ճանաչված առարկաները պետք է թողնել տուժողի տնօրինմանը:
Քննարկելով դատական ծախսերի հարցը, Դատարանը գտնում է, որ մեղադրյալ Գևորգ Ալբերտի Ազիզյանից հօգուտ ՀՀ պետբյուջե պետք է բռնագանձել 648.000 ՀՀ դրամ՝ որպես դատական ծախսերի գումար:
Մեղադրյալից առգրավված իրերը ենթակա է վերադարձման վերջինիս մերձավոր ազգականին:
Քրեական վարույթով գույքային հայց չի հարուցվել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 347-349-րդ, 364-րդ հոդվածներով, Դատարանը.

Վ Ճ Ռ Ե Ց
Գևորգ Ալբերտի Ազիզյանին մեղավոր ճանաչել ՀՀ քրեական օրենսգրքի 254-րդ հոդվածի 3-րդ մասի 2-րդ կետով և դատապարտել ազատազրկման 4/չորս/ տարի ժամկետով:
Պատժի կրման սկիզբը հաշվել մեղադրյալին փաստացի ազատությունից զրկելու պահից՝ 27.12.2024 թվականից:
Գևորգ Ալբերտի Ազիզյանի նկատմամբ խափանման միջոց ընտրված կալանավորումը թողնել անփոփոխ` մինչև դատավճռի օրինական ուժի մեջ մտնելը:
Իրեղեն ապացույց ճանաչված առարկաները թողնել տուժողի տնօրինմանը:
Մեղադրյալ Գևորգ Ալբերտի Ազիզյանից հօգուտ ՀՀ պետբյուջե բռնագանձել 648.000 ՀՀ դրամ որպես դատական ծախսերի գումար:
Մեղադրյալից առգրավված իրերը վերադարձնել վերջինիս մերձավոր ազգականին:
Արտավարութային փաստաթղթերը թողնել կցված քրեական գործին՝ դրա պահպանության ողջ ժամանակահատվածում:
Դատավճիռը կարող է բողոքարկվել ՀՀ վերաքննիչ քրեական դատարան ստանալու օրվանից հետո՝ մեկամսյա ժամկետում:

ԴԱՏԱՎՈՐ Վ.ՄԵԼԻՔՅԱՆ