Քրեական գործ թիվ ԵԴ1/0544/01/25







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ
ԴԱՏԱՎՃԻՌ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

«13» մարտի 2025 թվական ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ` նաև Դատարան)՝
նախագահությամբ դատավոր՝ Գ.ԱԲԵԼՅԱՆԻ
քարտուղարությամբ՝ Ս․ԶԱՔՈՅԱՆԻ
հանրային մեղադրող՝ Դ․ՆԵՐՍԻՍՅԱՆԻ
պաշտպան՝ Ա․ՀՈՎՀԱՆՆԻՍՅԱՆԻ
թարգմանիչ՝ Մ․ԶԱՔԱՐՅԱՆԻ
մեղադրյալ՝ Ջ․ԱՍԼԱՆԻ
դռնբաց դատական նիստում` արագացված վարույթի կարգով, քննեց քրեական գործն ըստ մեղադրանքի`
Ջոնի Ջամիլի Ասլանի՝ ծնված՝ 1964 թվականի դեկտեմբերի 20-ին՝ Սիրիայի Արաբական Հանրապետու-թյան քաղաք Քամիշլի, բարձրագույն կրթությամբ, ազգությամբ՝ ասորի, Սիրիայի Արաբական Հանրապետու-թյան քաղաքացի, մասնագիտությամբ երկրաչափ, ամուսնացած՝ ունի չորս երեխա, որոնցից երկուսն անչափահաս, հաշվառված՝ Սիրիայի Արաբական Հանրա-պետու¬թյուն, քաղաք Քամիշլի, Թաղլոփ փողոց, Ուալիդ փողոցի խաչմերուկ, 2-րդ հարկ, ՀՀ–ում մշտական բնակության վայր չունի, մեղադրանք է ներկայացվել ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով, որպես խափանման միջոց է կիրառվել ՀՀ-ից բացակայելու արգելքը
1․ Գործի դատավարական նախապատմությունը.
2024 թվականի նոյեմբերի 3-ին ՀՀ ԱԱԾ ՍՎ բաժնի հետախուզության գծով ավագ սպա Հ․Գրիգորյանն առերևույթ հանցանքի մասին հաղորդում է ներկայացրել, որի համաձայն՝ «(…) 2024 թվականի նոյեմբերի 3-ին, Բեյրութ-Երևան թիվ 275 չվերթով ՀՀ ժամանած Ջոնի Ասլան և Անհիդ Սաբրոն՝ սահմանային վերահսկողությունն անցնելու ժամանակ միմյանց հետ նախնական համաձայնությամբ ՀՀ ԱԱԾ ՍԶ աշխատակցին են ներկայացրել Դանիայի Թագավորության քաղաքացու՝ Ջոնի Ասլան (ծնված՝ 1964 թվականի դեկտեմբերի 20-ին, անձ. թիվ 8033055521) և Անհիդ Սաբրո (ծնված՝ 1942 թվականի հունվարի 1-ին, անձ. թիվ 180968311) տվյալներով լրացված, դեռևս չպարզված հանգամանքներում և ժամանակահատվածում ձեռք բերված պետական լիազոր մարմնի կողմից տրված իրավունք վերապահող կեղծ անձնագրերը և դրանց օգտագործմամբ միմյանց հետ նախնական համաձայնությամբ փորձել են առանց սահմանված փաստաթղթերի և պատշաճ թույլտվության հատել ՀՀ պետական սահմանը, սակայն նրանց դիտավորության մեջ ընդգրկված՝ ՀՀ պետական սահմանն ապօրինի հատելու հանցագործությունն իրենց կամքից անկախ հանգամանքներով չի իրագործվել, քանի որ բռնվել են սահմանապահ ծառայողների կողմից։ (…)»:
2024 թվականի նոյեմբերի 3-ին, ժամը՝ 13։30-ին, Ջոնի Ջամիլի Ասլանը՝ հանցանք կատարած լինելու անմիջականորեն ծագած հիմնավոր կասկածի առկայության հիմքով ձերբակալել է և նույն օրը ներկայացվել է վարույթն իրականացնող մարմնին։
Հաղորդման առթիվ՝ 2024 թվականի նոյեմբերի 3-ին, ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչության երրորդ վարչությունում ՀՀ քրեական օրենսգրքի 457-րդ հոդվածի 1-ին մասի և ՀՀ քրեական օրենսգրքի 44-469-րդ հոդվածի 3-րդ մասի 2-րդ կետի հատկանիշներով նախաձեռնվել է թիվ 58226824 քրեական վարույթը:
2024 թվականի նոյեմբերի 3-ին, ժամը՝ 21։19-ին ազատ է արձակվել՝ անազատության մեջ պահելու անհրաժեշտությունը վերանալու հիմքով։
2024 թվականի նոյեմբերի 4-ին ՀՀ գլխավոր դատախազության սահմանադրական կարգի հիմունքների, պետության հասարակական անվտանգության դեմ ուղղված հանցագործությունների գործերով վարչության դատախազ Դ․Ներսիսյանի որոշմամբ թիվ 58226824 քրեական վարույթով Ջոնի Ջամիլի Ասլանի նկատմամբ հանրային քրեական հետապնդում է հարուցվել ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 3-րդ մասի 2-րդ կետով:
2024 թվականի նոյեմբերի 4-ին, ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչության երրորդ վարչության քննիչ Գ․Մարկոսյանի կողմից որոշում է կայացվել թիվ 58226824 քրեական վարույթով Ջոնի Ջամիլի Ասլանի նկատմամբ որպես խափանման միջոց՝ ՀՀ-ից բացակայելու արգելքը կիրառելու մասին։
2025 թվականի հունվարի 30-ին ՀՀ գլխավոր դատախազության սահմանադրական կարգի հիմունքների, պետության հասարակական անվտանգության դեմ ուղղված հանցագործությունների գործերով վարչության դատախազ Դ․Ներսիսյանի որոշմամբ թիվ 58226824 քրեական վարույթով Ջոնի Ջամիլի Ասլանի նկատմամբ նոր հանրային քրեական հետապնդում է հարուցվել ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով:
2025 թվականի փետրվարի 5-ին, ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչության երրորդ վարչության քննիչ Գ․Մարկոսյանն որոշում է կայացրել թիվ 58226824 քրեական վարույթից՝ Ջոնի Ասլանի Ջամիլի՝ ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով ենթադրյալ հանցանքների կատարման վերաբերյալ, նոր վարույթ անջատելու և դրան թիվ 58202225 համարը շնորհելու մասին։
2025 թվականի փետրվարի 12-ին ՀՀ գլխավոր դատախազության սահմանադրական կարգի հիմունքների, պետության և հասարակական անվտանգու-թյան դեմ ուղղված հանցագործությունների գործերով վարչությունից Դատարան է ստացվել թիվ ԵԴ1/0544/01/25 (նախաքննական համարը՝ 58202225) քրեական գործն ըստ մեղադրանքի Ջոնի Ասլանի Ջամիլի՝ ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով։
Նույն օրը քրեական գործն էլեկտրոնային եղանակով մակագրվել, իսկ 2025 թվականի փետրվարի 13-ին հանձնվել է Դատարանի դատավոր Գ․Աբելյանին:
2025 թվականի փետրվարի 14-ին Դատարանի դատավոր Գ․Աբելյանի կողմից որոշում է կայացվել թիվ ԵԴ1/0544/01/25 քրեական գործով վարույթը ստանձնելու և նախնական դատալսումներ նշանակելու մասին։

2. Մեղադրանքի փաստական նկարագրությունը.
Ջոնի Ասլանի Ջամիլին մեղադրանք է ներկայացվել ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով՝ այն բանի համար, որ. «(…) [Ն]ա, դիտավորություն ունենալով ապօրինի՝ առանց սահմանված փաստաթղթերի և պատշաճ թույլտվության հատել ՀՀ պետական սահմանը և մուտք գործել Հայաստանի Հանրապետություն, դեռևս չպարզված ժամանակ և հանգամանքներում ձեռք է բերել պետական մարմնի կողմից տրվող, իրավունք վերապահող կեղծ փաստաթուղթ հանդիսացող՝ իր կենսաչափական տվյալներով և լուսանկարով Դանիայի Թագավորության քաղաքացու «803305521» սերիա–համարի կեղծ անձնագիրը և 2024 թվականի նոյեմբերի 3-ին՝ ժամը 11:47-ի սահմաններում, դիտավորությամբ՝ խախտելով «Պետական սահմանի մասին» ՀՀ օրենքի 11-րդ հոդվածի և «ՀՀ պետական սահմանի ռեժիմ սահմանելու մասին» ՀՀ կառավարության 2011 թվականի մայիսի 12-ի թիվ 702-Ն որոշման պահանջները, «Զվարթնոց» օդանավակայանում՝ սահմանային վերահսկողության ժամանակ, օգտագործելով հիշյալ անձնագիրը՝ այն ՀՀ ԱԱԾ ՍԶ աշխատակցին ներկայացնելով, այդ կերպ՝ կեղծ 1 փաստաթղթի օգտագործմամբ, առանց սահմանված փաստաթղթերի ու պատշաճ թույլտվության փորձել է հատել ՀՀ պետական սահմանը և մուտք գործել ՀՀ, սակայն նրա դիտավորությամբ մեջ ընդգրկված հանցագործությունը նրա կամքից անկախ հանգամանքներում չի իրագործվել, քանի որ վերը նշված անձնագրի կեղծ լինելու հանգամանքը պարզվել է ՀՀ ԱԱԾ ՍԶ աշխատակիցների կողմից:
Այսինքն՝ Ջոնի Ջամիլի Ասլանը կատարել է հակաիրավական արարքներ, որոնք նախատեսված են ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով: (…)»։

3. Արագացված վարույթը և լրացուցիչ դատալսումների ընթացքում հետազոտված թույլատրելի ապացույցները.
Նախնական դատալսումների ընթացքում մեղադրյալ Ջոնի Ջամիլի Ասլանը ներկայացրեց արագացված վարույթ կիրառելու մասին միջնորդություն՝ հայտնելով, որ իրեն պարզ է ներկայացված մեղադրանքը, ամբողջությամբ համաձայն է ներկայացված մեղադրանքի հետ, միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպան՝ Ա․Հովհաննիսյանի հետ, գիտակցում է արագացված վարույթ կիրառելու հետևանքները և պնդում է ներկայացված միջնորդությունը:
Հանրային մեղադրող Դ․Ներսիսյանը չառարկեց արագացված վարույթ կիրառելու դեմ:
Դատարանը, համոզվելով, որ առկա է ՀՀ քրեական դատավարության օրենսգրքի 464.1-ին հոդվածի 1-ին մասով նախատեսված հիմքը, բացակայում են ՀՀ քրեական դատավարության օրենսգրքի 464.1-ին հոդվածի 2-րդ մասով նախատեսված` արագացված վարույթի կիրառումը բացառող հանգամանքները, բավարարեց արագացված վարույթ կիրառելու մասին միջնորդությունը և որոշում կայացրեց լրացուցիչ դատալսումներ անցկացնելու մասին:
Լրացուցիչ դատալսումների ընթացքում հետազոտվել են հետևյալ թույլատրելի ապացույցները.
- 2024 թվականի նոյեմբերի 3-ի՝ անձի ձերբակալման արձանագրությունը , որի համաձայն՝ նույն թվականի նոյեմբերի 3-ին, ժամը՝ 13։30-ին, Ջոնի Ջամիլի Ասլանը հանցանք կատարած լինելու անմիջականորեն ծագած հիմնավոր կասկածի հիմքով ձերբակալվել է,
- ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանի 2024 թվականի նոյեմբերի 3-ի Ձև 8 տեղեկանքը, համաձայն որի՝ Ջոնի Ջամիլի Ասլանը նախկինում դատապարտված չի եղել ,
- 2024 թվականի նոյեմբերի 3-ի ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչության երրորդ վարչության քննիչ Գ․Մարկոսյանի՝ հանցանք կատարած լինելու անմիջականորեն ծագած հիմնավոր կասկածի առկայության դեպքում Ջոնի Ջամիլի Ասլանին ձերբակալելու մասին որոշումը , որի համաձայն՝ վերջինս նույն թվականի նոյեմբերի 3-ին, ժամը՝ 18։50-ին ներկայացվել է վարույթն իրականացնող մարմնին,
- 2024 թվականի նոյեմբերի 3-ի՝ ձերբակալվածին ազատ արձակելու մասին որոշումը , որի համաձայն՝ նույն օրը, ժամը 21։19-ին, ձերբակալված Ջոնի Ջամիլի Ասլանն ազատ է արձակվել,
- մեղադրյալ Ջոնի Ջամիլի Ասլանի՝ 2025 թվականի հունվարի 30-ին որպես մեղադրյալ հարցաքննության արձանագրությունը , համաձայն որի՝ վերջինս ընդունել է իրեն առաջադրված մեղադրանքը՝ խնդրելով մեղմ վերաբերվել և զղջացել է կատարվածի համար,
-երկու անչափահաս երեխաների անձնագրերի պատճենները ։

4.Դատարանի փաստական վերլուծությունները և հաստատված կամ հերքված փաստական հանգամանքները.
Լրացուցիչ դատալսումների ընթացքում հետազոտված թույլատրելի ապացույցները, ինչպես նաև գործով կազմված մեղադրական եզրակացության մեջ պարունակվող տվյալները վերլուծելու և գնահատելու արդյունքում Դատարանը հաստատված է համարում սույն քրեական գործի լուծման համար նշանակություն ունեցող հետևյալ փաստական հանգամանքները.
- Ջոնի Ջամիլի Ասլանը նախկինում դատապարտված չի եղել,
- Ջոնի Ջամիլի Ասլանն ունի բարձրագույն կրթություն,
- Ջոնի Ջամիլի Ասլանն ամուսնացած է, ունի չորս երեխա, որոնցից երկուսը անչափահաս են,
- Ջոնի Ջամիլի Ասլանն իրեն մեղավոր է ճանաչել ներկայացված մեղադրանքում՝ զղջալով կատարածի համար։

5. Դատարանի իրավական վերլուծությունները, հետևությունները և որոշումները.
Արագացված վարույթ կիրառելու պայմաններում Դատարանն ապացուցված է համարում մեղադրյալ Ջոնի Ջամիլի Ասլանին վերագրվող փաստական հանգամանքները (արարքները), այդ արարքների քրեական հակաիրավականու¬թյունը, մեղադրյալի կողմից այդ արարքները կատարելը, մեղադրյալի մեղավորությունը տվյալ արարքները կատարելու մեջ, ինչպես նաև գտնում է, որ մեղադրյալի արարքների նկատմամբ պետք է կիրառվի ՀՀ քրեական օրենսգրքի 457-րդ հոդվածի 1-ին մասը և ՀՀ քրեական օրենսգրքի 44-469-րդ հոդվածի 1-ին մասը։
Դատարանի կողմից հաստատված փաստական հանգամանքների հիման վրա՝ Դատարանը գտնում է, որ Ջոնի Ջամիլի Ասլանի անձը բնութագրող հանգամանքներ են բարձրագույն կրթություն ունենալը, ամուսնացած լինելը, նախկինում դատապարտված չլինելը։
Դատարանը, ղեկավարվելով ՀՀ քրեական օրենսգրքի (այսուհետ՝ նաև Օրենսգիրք) 70-րդ հոդվածով գտնում է, որ Ջոնի Ջամիլի Ասլանի պատասխանատվությունն ու պատիժը մեղմացնող հանգամանք պետք է դիտել՝ ներկայացված մեղադրանքում իրեն լիովին մեղավոր ճանաչելը, կատարած արարքների համար զղջալը և խնամքին երկու անչափահասների առկայությունը։
Դատարանը միաժամանակ արձանագրում է, որ Ջոնի Ջամիլի Ասլանի պատասխանատվությունն ու պատիժը ծանրացնող՝ Օրենսգրքի 71-րդ հոդվածի 1-ին մասով նախատեսված հանգամանքներ առկա չեն:
Դատարանը գտնում է, որ կատարած հանցանքի համար մեղադրյալ Ջոնի Ջամիլի Ասլանը ենթակա է պատժի։
Պատիժ նշանակելու հարցի համատեքստում Դատարանը հարկ է համարում արձանագրել հետևյալը՝
Օրենսգրքի 55-րդ հոդվածի համաձայն՝ «1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները:»։
Օրենսգրքի 69-րդ հոդվածի համաձայն՝ «1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները»։
Օրենսգրքի 73-րդ հոդվածի 1-ին մասի համաձայն՝
«Չավարտված հանցագործության համար պատիժ նշանակելիս հաշվի են առնվում հանցավորի արարքի բնույթն ու վտանգավորության աստիճանը, հանցավոր մտադրության իրականացման աստիճանը և այն հանգամանքները, որոնց հետևանքով հանցագործությունն ավարտին չի հասցվել: Համաձայնությամբ տուգանք նշանակելու վարույթով սույն հոդվածում նշված կանոնները չեն կիրառվում։»։
Վճռաբեկ դատարանը մշտապես ընդգծել է, որ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ։ Քրեական օրենքը համընդհանուր բնույթ ունի, իսկ արարքը և հանցավորի անձը կոնկրետ են։ Հետևաբար, կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի , հանցավորի անձի, պատիժը մեղմացնող և ծանրացնող հանգամանքների վերլուծության հիման վրա` ելնելով պատժի նպատակների իրացումն ապահովելու անհրաժեշտությունից ։
Մասնավորապես՝ Վճռաբեկ դատարանն ընդգծել է, որ հանցանքի հանրային վտանգավորության բնույթն ու աստիճանը ճիշտ գնահատելու և հանցավորի նկատմամբ համաչափ պատիժ նշանակելու համար անհրաժեշտ է, ի թիվս այլնի, հատուկ ուշադրություն դարձնել հանցավոր վարքագծի դրսևորման եղանակին, հանցանքի կատարման գործիքին և հանցագործության իրադրությանը, պատճառված վնասի բնույթին, արարքի նկատմամբ անձի հոգեբանական վերաբերմունքին, հանցագործության նպատակին և շարժառիթին: Այս առումով Վճռաբեկ դատարանը փաստել է, որ անձի արարքում հանցակազմը որակյալ դարձնող մեկից ավելի հանգամանքների առկայությունը կարող է վկայել ինչպես հանցագործության, այնպես էլ հանցավորի անձի հանրային բարձր վտանգավորության մասին, հետևաբար այն պետք է համաչափ գնահատականի արժանանա դատարանի կողմից և հաշվի առնվի պատիժ նշանակելիս :
Հիմքում ունենալով վերոնշյալը և հաշվի առնելով մեղադրյալ Ջոնի Ջամիլի Ասլանի կատարած հանցանքների հանգամանքները, նրա անձը բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայու-թյունը, Օրենսգրքի 69-րդ հոդվածի 2-րդ մասում թվարկված մյուս հանգամանքները, ինչպես նաև այն, որ Օրենսգրքի 457-րդ հոդվածի 1-ին մասի և 469-րդ հոդվածի 1-ին մասի սանկցիաներով որպես հիմնական պատիժ է նախատեսված նաև տուգանքի ձևով, գտնում է, որ Օրենսգրքի 77-րդ հոդվածի վերաբերելի կանոնների կիրառմամբ և Օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար՝ վերջինիս նկատմամբ՝
- Օրենսգրքի 457-րդ հոդվածի 1-ին մասով նախատեսված հանցանքի կատարման համար՝ նրա նկատմամբ որպես հիմնական պատիժ պետք է նշանակել տուգանք՝ հանցանքը կատարելու պահին նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով (5x75․000)։
- Օրենսգրքի 44-469-րդ հոդվածի 1-ին մասով նախատեսված հանցանքի կատարման համար՝ յուրաքանչյուր դրվագի համար նրա նկատմամբ որպես հիմնական պատիժ պետք է նշանակել տուգանք՝ հանցանքը կատարելու պահին նվազագույն աշխատավարձի հնգապատիկի՝ 750.000 (յոթ հարյուր հիսուն հազար) ՀՀ դրամի չափով (10x75․000)։
Տուգանքի հաշվարկման կարգի վերաբերյալ դատարանի նախորդ պարբերությունում նշված հետևությունները պայմանավորված այն հանգամանքով, որ հանցանքն ավարտվելու օրվան նախորդող 12 ամիսների ընթացքում մեղադրյալ Ջոնի Ջամիլի Ասլանը չի ունեցել եկամուտ (այդպիսի տվյալներ առկա չեն վարույթի նյութերում), ուստի Դատարանը գտնում է, որ վերջինիս նկատմամբ տուգանք պատժատեսակի չափը հաշվարկելիս որպես ելակետ պետք է ընդունել նրա կողմից հանցանք կատարելու պահին գործող Հայաստանի Հանրապետությունում սահմանված նվազագույն աշխատավարձի չափը, այսինքն՝ 75.000 (յոթանասունհինգ հազար) ՀՀ դրամը։
Դատարանը, հաշվի առնելով, որ մեղադրյալ Ջոնի Ջամիլի Ասլանը հանդիսանում է Սիրիայի Արաբական Հանրապետության քաղաքացի, ինչպես նաև այն, որ բացակայում են Օրենսգրքի 62-րդ հոդվածի 6-7-րդ մասով բացառող հանգամանքները և հիմքում ունենալով սույն գործի փաստական տվյալների ամբողջությունը, գտնում է, որ պատժի նպատակների իրականացումը՝ հատկապես համանման հանցանքների կանխումը, հնարավոր է մեղադրյալի նկատմամբ Օրենսգրքի 44-469-րդ հոդվածի 1-ին մասով որպես հիմնական պատիժ նշանակված 750.000 (յոթ հարյուր հիսուն հազար) ՀՀ դրամի չափով տուգանքին որպես լրացուցիչ պատիժ միացնելու եղանակով, այն է՝ օտարերկրյա քաղաքացուն Հայաստանի Հանրապետության տարածքից վտարելու, տվյալ դեպքում՝ մեղադրյալին ՀՀ-ից վտարելով Սիրիայի Արաբական Հանրապետություն՝ 5 (հինգ) տարի ժամկետով։
Դատարանը գտնում է, որ Օրենսգրքի 74-րդ հոդվածով սահմանված կարգով՝ ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով նշանակված պատիժները լրիվ գումարելու միջոցով՝ Ջոնի Ջամիլի Ասլանի նկատմամբ վերջնական պատիժ պետք է նշանակել տուգանք՝ 1.125.000 (մեկ միլիոն հարյուր քսանհինգ հազար) ՀՀ դրամի չափով՝ ՀՀ-ից վերջինիս վտարելով Սիրիայի Արաբական Հանրապետություն՝ 5 (հինգ) տարի ժամկետով։
Դատարանը գտնում է, որ մեղադրյալ Ջոնի Ջամիլի Ասլանը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն։
Դատարանը գտնում է, որ Ջոնի Ջամիլի Ասլանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ` մինչև դատավճռի օրինական ուժի մեջ մտնելը, քանի որ մեղադրական դատավճիռ կայացնելու և տուգանքի ձևով պատիժ նշանակելու պայմաններում առկա է ողջամիտ ենթադրություն առ այն, որ մեղադրյալը կարող է դիմել փախուստի և չկատարել իր վրա դրված պարտականությունները, իսկ նման խափանման միջոցի կիրառումը բավարար է մեղադրյալի փախուստը կանխելու և նրա վրա դրված պարտականությունների կատարումն ապահովելու համար։
Դատարանն արձանագրում է, որ ՀՀ քրեական դատավարության օրենսգրքի 348-րդ հոդվածի 1-ին մասի 11-13-րդ կետերով նշված հարցերին անդրադառնալու անհրաժեշտությունը սույն քրեական գործով բացակայում է։
Դատարանն արձանագրում է նաև, որ դատավճիռն օրինական ուժի մեջ մտնելուց հետո՝ իրեղեն ապացույց ճանաչված՝ թիվ «180968311» և «803305521» սերիա-համարի Դանիայի Թագավորության քաղաքացու անձնագրերը, ինչպես նաև արտավարութային փաստաթղթերը պետք է պահել քրեական գործի նյութերի հետ՝ դրանք պահելու ամբողջ ընթացքում, իսկ «ՕՊՊՕ Ա52» տեսակի բջջային հեռախոսը պետք է վերադարձնել մեղադրյալ Ջոնի Ջամիլի Ասլանին։
Դատարանը գտնում է, որ վարութային ծախսերի հարցը պետք է համարել լուծված, քանի որ արագացված վարույթ կիրառելու պայմաններում ՀՀ քրեական դատավարության օրենսգրքի 167-րդ հոդվածի 1-ին մաuով նախատեսված վարութային ծախսերը մեղադրյալ Ջոնի Ջամիլի Ասլանից ենթակա չեն բռնագանձման՝ համաձայն ՀՀ քրեական դատավարության օրենսգրքի 464.4-րդ հոդվածի 3-րդ մասի։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 99-րդ, 100-րդ, 276-րդ, 347-350-րդ, 464.4-րդ և 464.5-րդ հոդվածներով` Դատարանը


ՎՃՌԵՑ

1. Ջոնի Ջամիլի Ասլանին մեղավոր ճանաչել ՀՀ քրեական օրենսգրքի 457-րդ հոդվածի 1-ին մասով և ՀՀ քրեական օրենսգրքի 44-469-րդ հոդվածի 1-ին մասով նախատեսված հանցանքների կատարման մեջ։
2. ՀՀ քրեական օրենսգրքի 457-րդ հոդվածի 1-ին մասով նախատեսված հանցանքի կատարման համար Ջոնի Ջամիլի Ասլանի նկատմամբ պատիժ նշանակել տուգանք՝ հանցանքը կատարելու պահին նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով։
3. ՀՀ քրեական օրենսգրքի 44-469-րդ հոդվածի 1-ին մասով նախատեսված հանցանքի կատարման համար Ջոնի Ջամիլի Ասլանի նկատմամբ պատիժ նշանակել տուգանք՝ հանցանքը կատարելու պահին նվազագույն աշխատավարձի տասնապատիկի՝ 750.000 (յոթ հարյուր հիսուն հազար) ՀՀ դրամի չափով՝ ՀՀ-ից վտարելով Սիրիայի Արաբական Հանրապետություն՝ 5 (հինգ) տարի ժամկետով։
4. ՀՀ քրեական օրենսգրքի 74-րդ հոդվածով սահմանված կարգով՝ հանցագործությունների համակցությամբ նշանակված պատիժները լրիվ գումարելու միջոցով՝ ՀՀ քրեական օրենսգրքի 457-րդ հոդվածի 1-ին մասով որպես պատիժ նշանակված՝ 375.000 (երեք հարյուր յոթանասունհինգ հազար) ՀՀ դրամ տուգանքը գումարել ՀՀ քրեական օրենսգրքի 44-469-րդ հոդվածի 1-ին մասով որպես պատիժ նշանակված՝ 750.000 (յոթ հարյուր հիսուն հազար) ՀՀ դրամի չափով տուգանքին՝ վերջնական պատիժ նշանակելով տուգանք՝ 1.125.000 (մեկ միլիոն հարյուր քսանհինգ հազար) ՀՀ դրամի չափով՝ ՀՀ-ից Ջոնի Ջամիլի Ասլանին վտարելով Սիրիայի Արաբական Հանրապետություն՝ 5 (հինգ) տարի ժամկետով։
5. Ջոնի Ջամիլի Ասլանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը։
6. Դատավճռի օրինական ուժի մեջ մտնելուց հետո՝ իրեղեն ապացույց ճանաչված թիվ «180968311» և «803305521» սերիա-համարի Դանիայի Թագավորության քաղաքացու անձնագրերը, ինչպես նաև արտավարութային փաստաթղթերը պահել քրեական գործի նյութերի հետ՝ դրանք պահելու ամբողջ ընթացքում։
7. Դատավճռի օրինական ուժի մեջ մտնելուց հետո՝ իրեղեն ապացույց ճանաչված Ջոնի Ջամիլի Ասլանի «ՕՊՊՕ Ա52» տեսակի բջջային հեռախոսը վերադարձնել վերջինիս։
8. Վարութային ծախսերի հարցը համարել լուծված:
9. Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո` մեկամսյա ժամկետում, սակայն այն չի կարող բողոքարկվել ՀՀ քրեական դատավարության օրենսգրքի 373-րդ հոդվածով և 375-րդ հոդվածի 1-3-րդ մասերով նախատեսված հիմքերով:


ԴԱՏԱՎՈՐ՝ Գ․ԱԲԵԼՅԱՆ