ԵԴ1/0469/01/25

Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

21 փետրվարի 2025թ․ ք.Երևանում

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)

նախագահությամբ
դատավոր՝ Մ․Արամյանի
քարտուղարությամբ՝ Մ.Պողոսյանի
մասնակցությամբ`
հանրային մեղադրող՝ Ռ․Դոխոյանի
մեղադրյալ՝ Վ․Վարդանյանի

դռնբաց դատական նիստում քննեց քրեական գործն ըստ մեղադրանքի` Վաչագան Վարդանյանի /ծնվել է 1994 թվականի դեկտեմբերի 15-ին՝ Էջմիածին քաղաքում, ազգությամբ հայ է, Հայաստանի Հանրապետության քաղաքացի, ամուսնացած է (խնանմքին ունի 4 անչափահաս երեխա), չի աշխատում, նախկինում դատապարտված, հաշվառված Էջմիածին քաղաքի Իսակովի 2-րդ փկղ 5-րդ տանը, բնակվում է Երևան քաղաքի Դավիթ Բեկի դիալոգի 23-րդ տանը/։
Վաչագան Վարդանյանին մեղադրանք է առաջադրվել ՀՀ քրեական օրենսգրքի 344-րդ հոդվածի 1-ին մասով, խափանման միջոց է կիրառվել բացակայելու արգելքը:

Դատավճռի նկարագրական մաս.
2024 թվականի նոյեմբերի 19-ին՝ ՀՀ քրեական օրենսգրքի 344-րդ հոդվածի 1-ին մասով ՀՀ ՔԿ ԵՔՔՎ ՃՏՀ քննության բաժնում նախաձեռնվել է թիվ 60677724 քրեական վարույթը։
2025 թվականի հունվարի 24-ին որոշում է կայացվել Վաչագան Հրաչյաի Վարդանյանի նկատմամբ ՀՀ քրեական օրենսգրքի 344-րդ հոդվածի 1-ին մասով նախատեսված հանցանք կատարելու համար հանրային քրեական հետապնդում հարուցելու մասին, և վերջինիս 2025 թվականի հունվարի 29-ին ՀՀ քրեական օրենսգրքի 344-րդ հոդվածի 1-ին մասով ներկայացվել է մեղադրանք:
2025 թվականի փետրվարի 07-ին ՀՀ դատախազության Շենգավիթ վարչական շրջանի դատախազությունից Երևան քաղաքի առաջին ատյանի ընդհանուր իրավասության քրեական դատարան է ստացվել թիվ 60677724 նախաքննական համարով քրեական գործն ըստ մեղադրանքի Վաչագան Հրաչյայի Վարդանյանի ՀՀ քրեական օրենսգրքի 344-րդ հոդվածի 1-ին մասով։
2025 թվականի փետրվարի 07-ին դատավորների միջև գործերի բաշխման էլեկտրոնային մակագրության համակարգի միջոցով թիվ ԵԴ1/0469/01/25 քրեական գործը մակագրվել է ինձ։
Գործը ինձ է հանձնվել 2025 թվականի փետրվարի 10-ին:
Վաչագան Վարդանյանին մեղադրանք է առաջադրվել հանրորեն վտանգավոր այն արարքի կատարման համար, որ նա «զրկված լինելով՝ տրանսպորտային միջոցներ վարելու իրավունքից, վարել է տրանսպորտային միջոց:
Այսպես․
Վաչագան Հրաչյայի Վարդանյանը 2024թ.-ի հուլիսի 8-ից մինչև 2025թ.-ի հուլիսի 8-ը զրկված լինելով տրանսպորտային միջոց վարելու իրավունքից՝ այդ ժամանակահատվածում՝ 2024 թվականի հոկտեմբերի 22-ին, ժամը 04:47-ին, Երևան քաղաքի Թամանցիների փողոցում վարել է «Օպել» մակնիշի, 37 AY 352 հաշվառման համարանիշով տրանսպորտային միջոցը, ինչը հայտնաբերվել ՀՀ ոստիկանության պարեկային ծառայության աշխատակիցների կողմից և կազմվել է վարչական իրավախախտման վերաբերյալ արձանագրություն:
Այսինքն՝ Վաչագան Հրաչյայի Վարդանյանին մեղսագրվում է հանցավոր արարքի կատարում, որը նախատեսված է ՀՀ քրեական օրենսգրքի 344-րդ հոդվածի 1-ին մասով»:

Դատաքննության ընթացքում հետազոտված թույլատրելի ապացույցներ
Մեղադրյալ Վաչագան Վարդանյանը հրաժարվեց, թե՛ դատաքննության ընթացքում ցուցմունք տալուց, թե՛ նախաքննության ընթացքում առանց պաշտպանի տված ցուցմունքները պնդելուց։
Որպես արտավարույթային փաստաթուղթ ապացույց ճանաչված, զննված և քրեական վարույթի նյութերին կցված հետևյալ փաստաթղթերը.
Զննության ենթարկելու մասին արձանագրությամբ համաձայն որի՝ 2024թ. հոկտեմբերի 22-ին ժամը` 04:52-ին, Երևան քաղաքի Թամանցիների փողոցում ՀՀ ոստիկանության պարեկային ծառայության Երևան քաղաքի գնդի կրտսեր պարեկ Կոլյա Հարությունյանի (05189) կողմից Վաչագան Հրաչյայի Վարդանյանի (ծնվ.15.12.1994թ., բն․ ք. Էջմիածին Իսակով 2-րդ փկղ 5-րդ տուն) վերաբերյալ կազմվել է վարչական իրավախախտման վերաբերյալ արձանագրությունը (կից չլրացված վարչական իրավախախտման որոշում` 8180418372), այն մասին, որ վերջինս 2024թ. հոկտեմբերի 22-ին` ժամը 04:47-ին, Երևան քաղաքի Թամանցիների փողոցում վարել է «Օպել» մակնիշի 37 AY 352 հաշվառման համարանիշի ավտոմեքենան` տրանսպորտային միջոց վարելու իրավունքից զրկված վիճակում: Արձանագրության համապատասխան տողերում առկա են ծանուցվողի (վարորդի) և պարեկային ծառայողի ստորագրությունները:
Քրեական վարույթի նյութերում առկա է նաև ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրի Վաչագան Հրաչյաի Վարդանյանի տվյալների (ՀԾՀ 2512940136) մուտքագրման արդյունքում ստացված տեղեկատվության քաղվածքի պատճեն, համաձայն որի, Վաչագան Վարդանյանը տրանսպորտային միջոցներ վարելու իրավունքից 2024 թվականի հուլիսի 8-ին զրկվել է 1 տարի ժամկետով՝ (զրկման սկիզբ 08․07․2024թ, զրկման ավարտ 08․07․2025թ)։
2024թ. հուլիսի 8-ին ժամը` 03:55-ին, Վաղարշապատ քաղաքի Գ․ Լուսավորիչ փողոցում ՀՀ ոստիկանության պարեկային ծառայության Արմավիրի մարզի գումարտակի ավագ պարեկ Սերգո Համբոյանի կողմից Վաչագան Հրաչյաի Վարդանյանի (ծնվ.15.12.1994թ., ՎիՎ․ RE050326, բն․ ք. Էջմիածին Իսակով 2-րդ փկղ 5-րդ տուն) վերաբերյալ կազմվել է վարչական իրավախախտման վերաբերյալ արձանագրություն, առ այն, որ վերջինս 2024թ. հուլիսի 8-ին Վաղարշապատ քաղաքում «Օպել» մակնիշի 37 AY 352 հաշվառման համարանիշի ավտոմեքենան վարել է ոչ սթափ վիճակում, ինչից հետո կայացվել է վարչական իրավախախտման վերաբերյալ թիվ 8180422354 որոշումը՝ Վաչագան Վարդանյանին տրանսպորտային միջոցներ վարելու իրավունքից 1 տարի ժամկետով զրկելու վերաբերյալ։ Վարչական իրավախախտման արձանագրության և որոշման համապատասխան տողերում առկա են ծանուցվողի (վարորդի) և պարեկային ծառայողի ստորագրությունները։
Վաչագան Վարդանյանին սթափության զննության ենթարկելու վերաբերյալ կտրոնի պատճենի զննությամբ պարզվել է, որ ստուգաչափման սարքի համարն է 91101175, զննման համարը՝ 00542, զննման ամսաթիվը` 08.07.2024թ., ստուգումը կատարվել է ավտոմատ, ժամը 03:50:14-ին, ալկոհոլի պարունակությունը՝ 0.625մգ/լ, վարորդի անունը` Վաչագան, ազգանունը՝ Վարդանյան, տրանսպորտային միջոցի համարանիշը՝ 37 AY 352, ՎիՎ RE050326, ՊԾ ազգանունը (Դոխոյան, կրծքանշանի համար 09054: Սթափության զբբության կտրոնի համապատասխան տողերում առկա է «հրաժարվում է ստորագրելուց» գրառումը և ստորագրություն։
Առկա է նաև սթափության 91101175 համարի սարքի ստուգաչափման թիվ 106452 վկայականի պատճենը, որի զննությամբ պարզվեց, որ ստուգաչափման թվականն է 03․10․2023թ․, այն ուժի մեջ է մինչև 27․09․2024թ․» Չափման միջոցի անվանումը և տեսակը՝ ալկոտեստեր, գործարանային համարը՝ 91101227 տեսակը՝ «Jupiter X/RP», չափման տիրույթը՝ (0․000-2․000մգ/լ), ճշտության կարգը և դասը (սխալանքը) 0÷0,1±5%,0.1÷0.15±8%>0.15±10%, արտադրողը՝ Չինաստան, պատկանում է ՀՀ ՊԾ։Վ. թ. 4-8,12-13
Քրեական վարույթով 2025 թվականի հունվարի 5-ին կայացված արտավարութային փաստաթուղթ ճանաչելու մասին որոշմամբ, համաձայն որի՝ արտավարութային փաստաթուղթ են ճանաչվել՝ ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրում առկա Վաչագան Հրաչյայի Վարդանյանի վարորդական վկայականի վերաբերյալ տեղեկատվության քաղվածքի պատճենը, Վաչագան Հրաչյայի Վարդանյանի վերաբերյալ 2024թ. հոկտեմբերի 22-ին կազմված վարչական իրավախախտման վերաբերյալ արձանագրության (կից չլրացված վարչական իրավախախտման որոշում` 8180418372), Վաչագան Վարդանյանի վերաբերյալ 2024թ. հուլիսի 8-ին կազմված վարչական իրավախախտման վերաբերյալ արձանագրության (կից լրացված վարչական իրավախախտման որոշում` 8180422354), Վաչագան Վարդանյանին սթափության զննության ենթարկելու 00542 կտրոնի, սթափության զննության 91101175 սարքի 106452 ստուգաչափման վկայականի պատճենները, որոնք կցվել են քրեական վարույթի նյութերին։Վ․թ․ 14-15
Վերոգրյալ ապացույցների հիման վրա Դատարանը հաստատված է համարում հետևյալ փաստական հանգամանքները, մասնավորապես.
-Վաչագան Վարդանյանը 2024 թվականի հոկտեմբերի 22-ի դրությամբ զրկված է եղել տրանսպորտային միջոցներ վարելու իրավունքից,
-Վաչագան Վարդանյանը զրկված լինելով տրանսպորտային միջոցներ վարելու իրավունքից 2024 թվականի հոկտեմբերի 22-ին` ժամը 04:47-ին, Երևան քաղաքի Թամանցիների փողոցում վարել է «Օպել» մակնիշի, 37 AY 352 հաշվառման համարանիշով տրանսպորտային միջոցը։

Դատավճռի պատճառաբանական մաս.
ՀՀ քրեական դատավարության օրենսգրքի 97-րդ հոդվածի համաձայն/․․․/ 1. Վարույթի ընթացքում ձեռք բերված ապացույցները, ներառյալ վարույթի մասնավոր մասնակիցների ներկայացրած ապացույցները համարվում են թույլատրելի, քանի դեռ պատշաճ իրավական ընթացակարգով հակառակը չի հաստատվել:
2. Օրենքի էական խախտմամբ ստացված տվյալները, ինչպես նաև դրանց հիման վրա կատարված վարութային գործողությունների արդյունքով ձեռք բերված տվյալները ճանաչվում են անթույլատրելի և չեն կարող օգտագործվել որպես ապացույց/․․․/:
ՀՀ քրեական դատավարության օրենսգրքի 102-րդ հոդվածի համաձայն`
/․․․/1. Քրեական վարույթի ընթացքում ապացուցման ենթակա են՝
1)դեպքը և դրա հանգամանքները (ժամանակը, տեղը, եղանակը և այլն).
2)մեղադրյալի առնչությունը դեպքին.
3)ենթադրյալ հանցագործության՝ քրեական օրենքով նախատեսված հատկանիշները.
4) մեղադրյալի մեղավորությունը ենթադրյալ հանցանքը կատարելու մեջ.
5) քրեական պատասխանատվությունը կամ պատիժը մեղմացնող և ծանրացնող հանգամանքները.
6) մեղադրյալի անձը բնութագրող հանգամանքները.
7) ենթադրյալ հանցագործությամբ պատճառված վնասը.
8)այն հանգամանքները, որոնք թույլ են տալիս անձին ազատել քրեական պատասխանատվությունից կամ պատժից.
9) այն հանգամանքները, որոնցով անձը հիմնավորում է վարույթի ընթացքում իր գույքային պահանջները.
10) այն հանգամանքները, որոնցով վարույթի մասնակիցը կամ այլ անձը հիմնավորում է իր պահանջները/․․․/:
ՀՀ քրեական դատավարության օրենսգրքի 105-րդ հոդվածի համաձայն` /․․․/ 1.Յուրաքանչյուր ապացույց ենթակա է գնահատման՝ վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից:
2. Քննիչը, դատախազը, դատավորը, ղեկավարվելով քրեադատավարական օրենսդրությամբ, ներառյալ ապացուցման չափանիշների մասին վերաբերելի կանոններով, ապացույցները գնահատում են դրանց պատշաճ հետազոտման և վերլուծության վրա հիմնված ներքին համոզմամբ:
3. Ոչ մի տվյալ նախապես հավաստի ապացույցի ուժ չունի: Դատավորը, ինչպես նաև քննիչը և դատախազը չպետք է կանխակալ վերաբերմունք դրսևորեն ապացույցներին, չպետք է դրանց որոշ մասին մյուսների նկատմամբ առավել կամ նվազ նշանակություն տան, քանի դեռ պատշաճ իրավական ընթացակարգի շրջանակներում դրանք չեն գնահատվել/․․․/:
ՀՀ քրեական դատավարության օրենսգրքի 276-րդ հոդվածը սահմանում է, որ
/․․․/ 1. Առաջին ատյանի դատարանում վարույթն իրականացվում է միայն մեղադրյալի նկատմամբ և միայն նրան ներկայացված մեղադրանքով:/․․․/:
Հետազոտված ապացույցների հիման վրա Դատարանը առանձին սենյակում գնահատելով դրանք իրենց համակցության մեջ, համադրելով մեղադրյալին առաջադրված մեղադրանքի ձևակերպման հետ, որ նա «զրկված լինելով՝ տրանսպորտային միջոցներ վարելու իրավունքից, վարել է տրանսպորտային միջոց:
Վաչագան Հրաչյաի Վարդանյանը 2024թ.-ի հուլիսի 8-ից մինչև 2025թ.-ի հուլիսի 8-ը զրկված լինելով տրանսպորտային միջոց վարելու իրավունքից՝ այդ ժամանակահատվածում՝ 2024 թվականի հոկտեմբերի 22-ին՝ ժամը 04:47-ին, Երևան քաղաքի Թամանցիների փողոցում վարել է «Օպել» մակնիշի, 37 AY 352 հաշվառման համարանիշով տրանսպորտային միջոցը, ինչը հայտնաբերվել ՀՀ ոստիկանության պարեկային ծառայության աշխատակիցների կողմից և կազմվել է վարչական իրավախախտման վերաբերյալ արձանագրություն», նշված արարքը ՀՀ քրեական օրենսգրքի 344-րդ հոդվածի 1-ին մասով որակման համատեքստում ՀՀ քրեական դատավարության օրենսգրքի 342-րդ հոդվածի 1-ին մասով նախատեսված հարցերին պատասխանելիս գտել է, որ
ապացուցված են մեղադրյալին վերագրվող փաստական հանգամանքները (արարքը),
ապացուցված է այդ արարքի քրեական հակաիրավականությունը,
ապացուցված է մեղադրյալի կողմից այդ արարքը կատարելը,
ապացուցված է մեղադրյալի մեղավորությունը տվյալ արարքը կատարելու մեջ:
2. Սույն հոդվածի 1-ին մասում նշված հարցերից որևէ մեկին ժխտական պատասխան տալու դեպքում դատարանը կայացնում է արդարացման վերդիկտ։
3. Սույն հոդվածի 1-ին մասում նշված բոլոր հարցերին հաստատական պատասխան տալու դեպքում դատարանը կայացնում է մեղադրական վերդիկտ, որով սահմանում է նաև, թե ապացուցված արարքի նկատմամբ քրեական օրենսգրքի, որ հոդվածը, հոդվածի մասը կամ կետն է ենթակա կիրառման:
Համաձայն ՀՀ քրեական դատավարության օրենսգրքի 348-րդ հոդվածի` դատավճիռ կայացնելիս դատարանը մի շարք այլ հարցերի հետ միասին պետք է լուծի նաև այն հարցը, թե մեղադրյալը պատժի ենթակա է, թե ոչ, պատժի ինչ տեսակ պետք է նշանակվի և պետք է արդյոք նա այն կրի:
Դատարանը դրական պատասխանելով ՀՀ քրեական դատավարության օրենսգրքի 342-րդ հոդվածի 1-ին մասով նախատեսված հարցերին գտնում է, որ կատարած արարքի համար Վաչագան Վարդանյանը ենթակա է քրեական պատասխանատվության և պատժի:
ՀՀ քրեական օրենսգրքի 344-րդ հոդվածի 1-ին մասը սահմանում է՝ /…/1․Տրանսպորտային միջոցներ վարելու իրավունքից զրկված կամ տրանսպորտային միջոցներ վարելու իրավունքը կասեցված անձի կողմից տրանսպորտային միջոց վարելը՝ պատժվում է տուգանքով` առավելագույնը տասնապատիկի չափով, կամ հանրային աշխատանքներով` առավելագույնը հարյուր ժամ տևողությամբ, կամ կարճաժամկետ ազատազրկմամբ՝ առավելագույնը մեկ ամիս ժամկետով:/.../:
Մեղադրյալին վերագրվող արարքը ՀՀ քրեական օրենսգրքի 17-րդ հոդվածի համաձայն հանդիսանում է ոչ մեծ ծանրության հանցանք։
ՀՀ քրեական օրենսգրքի 55-րդ հոդվածի համաձայն` /․․․/ Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները/․․․/:
Հաստատված համարելով մեղադրյալ Վաչագան Վարդանյանի մեղավորությունն իրեն մեղսագրված հանցանքի կատարման մեջ Դատարանը գտնում է, որ անհրաժեշտ է անդրադառնալ մեղադրյալի նկատմամբ պատիժ նշանակելու հետ կապված հետևյալ հարցերին.
1) դատապարտված մեղադրյալի պատասխանատվությունը և պատիժը մեղմացնող կամ ծանրացնող հանգամանքներին, ինչպես նաև նրա անձը բնութագրող հանգամանքներին
2) պատժի, մասնավորապես՝ արդյոք մեղադրյալը ենթակա է պատժի և ի՞նչ պատիժ պետք է նշանակվի նրա նկատմամբ, մեղադրյալը պետք է կրի իր նկատմամբ նշանակված պատիժը, թե ոչ։
Անդրադառնալով մեղադրյալի պատասխանատվությունը և պատիժը մեղմացնող, ծանրացնող հանգամանքներին, ինչպես նաև նրա անձը բնութագրող հանգամանքներին՝ Դատարանն անհրաժեշտ է համարում նշել հետևյալը.
ՀՀ քրեական օրենսգրքի 69-րդ հոդվածի համաձայն` «1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները: (…)»:
ՀՀ քրեական օրենսգրքի 71-րդ հոդվածի համաձայն՝
1. Քրեական պատասխանատվությունը կամ պատիժը ծանրացնող հանգամանքներ են՝
1) հանցանքը դատվածություն ունեցող անձի կողմից կատարելը, (…)
Ըստ ՀՀ ԱՆ Պրոբացիայի ծառայության կողմից ստացված գրության «Վաչագան Հրաչյայի Վարդանյանը (ծնված` 15.12.1994թ.) Արմավիրի մարզի առաջին ատյանի ընդհանուր իրավասության դատարանի 2024 թվականի հոկտեմբերի 23-ի թիվ ԱՐԴ/1006/01/24 դատավճռով մեղավոր է ճանաչվել ՀՀ քրեական օրենսգրքի 344-րդ հոդվածի 1-ին մասով նախատեսված հանցանքի կատարման մեջ և նրա նկատմամբ պատիժ է նշանակվել տուգանք՝ 375.000 (երեք հարյուր յոթանասունհինգ հազար) ՀՀ դրամի չափով:
Վաչագան Հրաչյայի Վարդանյանին թույլատրվել է նշանակված՝ 375.000 (երեք հարյուր յոթանասունհինգ հազար) ՀՀ դրամի չափով տուգանքի վճարումը կատարել մաս առ մաս՝ տասներկու ամսվա ընթացքում՝ կատարելով առաջին 11 ամիսների ընթացքում 31000 ՀՀ դրամի վճարում, իսկ վերջին 1 ամսվա ընթացքում 34000 ՀՀ դրամի վճարում:
Թիվ ԱՐԴ/1006/01/24 դատավճիռը 31.12.2024թ. մտել է օրինական ուժի մեջ, իսկ 17.01.2025թ.-ին ստացվել և ի կատար ածման է ընդունվել ՀՀ ԱՆ պրոբացիայի ծառայության Արմավիրի մարզային մարմնում։
21.01.2025թ. ը հաշվառման է վերցվել Արմավիրի մարզային մարմնի կողմից և նույն օրը վերջինիս բացատրվել են իր իրավունքներն ու պարտականությունները, ինչպես նաև պատասխանատվությունը դրանք չկատարելու դեպքում։
03.02.2025թ.-ին Արմավիրի մարզային մարմինը միջնորդություն է ուղարկել գույքի բռնագանձման վերաբերյալ։
Շահառու Վաչագան Հրաչյայի Վարդանյանը նշանակված տուգանքի՝ 375.000 ՀՀ դրամից մինչ այս պահը չի կատարել որևէ վճարում»։
Դատարանը արձանագրում է, որ թիվ ԱՐԴ/1006/01/24 դատավճիռը օրինական ուժի մեջ է մտել սույն գործով կատարված հանցանքից հետո, ուստի մեղադրյալը 2024 թվականի հոկտեմբերի 22-ի դրությամբ չի ունեցել դատվածություն:
Դատարանը մեղադրյալի արարքում չի արձանագրում պատիժը ծանրացնող հանգամանք:
Վաչագան Վարդանյանի անձը բնութագրող հանգամանքներն են, մասնավորապես խոստովանական ցուցմունքներ տալը:
Դատարանը միաժամանակ արձանագրում է, որ Վաչագան Վարդանյանի պատասխանատվությունն ու պատիժը մեղմացնող հանգամանքներ առկա չեն (թեպետ մեղադրյալի անձնական տվյալների մեջ նշված է, որ վերջինս ունի չորս երեխա, սակայն դատարանին չներկայացվեց նշված փաստ հավաստող փաստաթղթեր):
Հաշվի առնելով վերոգրյալը, ինչպես նաև Վաչագան Վարդանյանի կատարած հանցագործության հանրության համար վտանգավորության աստիճանը և բնույթը, նրա անձը բնութագրող տվյալները, պատասխանատվությունը ծանրացնող հանգամանքի և պատիժը մեղմացնող հանգամանքների բացակայությունը, ինչպես նաև այն, որ մեղադրյալը հայտնեց իր նյութական վատ վիճակում գտնվելու հանգամանքի և հանրային աշխատանքներ պատիժը կատարելու պատրաստակամություն մասին, ուստի Դատարանը գտնում է, որ մեղադրյալի նկատմամբ պետք է նշանակել պատիժ հանրային աշխատանքների ձևով։
Նշված եզրահանգումը Դատարանը գալիս է հաշվի առնելով, որ արդեն իսկ մեղադրյալի նկատմամբ նշանակված է եղել պատիժ տուգանքի ձևով, որը մինչ այս պահը չի կատարվել, ուստի Դատարանը նշանակում է ավելի խիստ պատիժ որպիսի ապահովվի պատժի կատարումը և պատժի նպատակների կենսագործումը:
ՀՀ քրեական օրենսգրքի 60-րդ հոդվածը սահմանում է, որ
1. Հանրային աշխատանքները դատարանի նշանակած և իրավասու մարմնի որոշած վայրում չվարձատրվող, դատապարտյալի ուսումնառությունից կամ աշխատանքից ազատ ժամանակահատվածում նրա կողմից հանրության համար օգտակար այնպիսի աշխատանքների կատարումն է, որոնք չեն վտանգում նրա ֆիզիկական կամ հոգեկան առողջությունը։
2. Հանրային աշխատանքները դատապարտյալի համաձայնությամբ ոչ ավելի, քան օրական 4 ժամ տևողությամբ սահմանվում են ոչ մեծ և միջին ծանրության հանցագործությունների համար՝ 60-270 ժամ տևողությամբ/.../:
ՀՀ քրեական օրենսգրքի 74-րդ հոդվածը սահմանում է, որ
/…/1. Հանցագործությունների համակցությամբ յուրաքանչյուր հանցագործության համար առանձին պատիժ (հիմնական և լրացուցիչ) նշանակելով` դատարանը վերջնական պատիժը որոշում է նշանակված պատիժները լրիվ կամ մասնակիորեն գումարելու միջոցով: Մասնակի գումարման դեպքում վերջնական պատիժը պետք է ավելի լինի, քան համակցության մեջ մտնող հանցագործությունների համար նշանակված առավել խիստ պատիժը: Հանցագործությունների համակցությամբ վերջնական պատիժը որոշելիս մասնակի գումարվող պատիժը չի կարող պակաս լինել տվյալ պատժատեսակի համար սույն օրենսգրքով նախատեսված նվազագույն չափից կամ ժամկետից, սակայն վերջնական պատիժը չի կարող գերազանցել սույն հոդվածի 2-րդ, 3-րդ, 4-րդ, 5-րդ, 6-րդ և 9-րդ մասերով նախատեսված առավելագույն չափը կամ ժամկետը:/…/11. Պատիժը նշանակվում է սույն հոդվածի կանոններով, եթե դատավճիռ կայացնելուց հետո պարզվի, որ դատապարտյալը մեղավոր է նաև մեկ այլ հանցանքի համար, որը նա կատարել է նախքան առաջին գործով դատավճիռ կայացնելը: Այս դեպքում վերջնական պատժի ժամկետին հաշվակցվում է առաջին դատավճռով նշանակված պատժի կրած մասը և պատժի կրման սկիզբ է համարվում առաջին դատավճռով նշանակված պատժի կրման սկիզբը:/.../:
Առաջնորդվելով ՀՀ քրեական օրենսգրքի 74-րդ հոդվածով Դատարանը որոշում է նշանակված պատիժը ամբողջությամբ գումարել ԱՐԴ/1006/01/24 դատավճռով նշանակված պատժին՝ 375․000 ՀՀ դրամ տուգանքին և սահմանել վերջնական պատիժ հանրային աշխատանք 60 ժամ տևողությամբ և տուգանք 375․000 (երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 59-րդ հոդվածի 8-րդ մասը սահմանում է, որ
/…/8. Եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում/…/։
Դատարանը հաշվի առնելով տուգանքը մաս առ մաս վճարելու հնարավորություն տալու վերաբերյալ մեղադրյալի խնդրանքը որոշում է կայացնում նշանակված տուգանք պատժի վճարումը տարաժամկետել մեկ տարի ժամկետով` տուգանքի վճարումը կատարել մաս առ մաս՝ տասներկու ամսվա ընթացքում` ըստ պրոբացիայի ծառայության կազմած ժամանակացույցի։
Անդրադառնալով խափանման միջոցի հարցին, Դատարանը գտնում է, որ Վաչագան Վարդանյանի նկատմամբ ընտրված խափանման միջոցը` բացակայելու արգելքը, պետք է թողնել անփոփոխ, մինչև դատավճռի օրինական ուժի մեջ մտնելը:
Բացի այդ, Դատարանը գտնում է, որ դատավճիռը օրինական ուժի մեջ մտնելուց հետո Վաչագան Վարդանյանի վերաբերյալ Հայաստանի Հանրապետության սահմանային էլեկտրոնային կառավարման տեղեկատվական (ՍԷԿՏ) համակարգում բացառապես սույն գործով առկա արգելանքը պետք է վերացնել:
ՀՀ քրեական դատավարության օրենսգրքի 348-րդ հոդվածի 1-ին մասի համաձայն` դատավճիռ կայացնելիս Դատարանը պարտավոր է անդրադառնալ ի թիվս այլնի նաև իրեղեն ապացույցների, վարույթային ծախսերի, գույքի նկատմամբ կիրառված (կիրառվելիք) արգելադրման, գույքային հայցի հարցերին, սակայն Դատարանը, պարզելով, որ սույն քրեական գործով մեղադրյալի գույքի վրա արգելանք չի կիրառվել, գույքային հայց չի ներկայացվել, սահմանափակվում է այդ փաստերի արձանագրմամբ:
Քրեական գործին կցված արտավարութային փաստաթղթերը անհրաժեշտ է պահել քրեական գործի հետ միասին՝ դրանց պահելու ամբողջ ժամանակամիջոցում:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 97-րդ, 102-րդ, 105-րդ, 276-րդ, 348-349-րդ, 352-356-րդ և 364-րդ հոդվածներով` Դատարանը․
Վ Ճ Ռ Ե Ց

Վաչագան Վարդանյանին մեղավոր ճանաչել ՀՀ քրեական օրենսգրքի 344-րդ հոդվածի 1-ին մասով նախատեսված հանցանք կատարելու մեջ և պատիժ նշանակել հանրային աշխատանք 60 ժամ տևողությամբ։
ՀՀ քրեական օրենսգրքի 74-րդ հոդվածով սահմանված կարգով նշանակված պատիժը ամբողջությամբ գումարել ԱՐԴ/1006/01/24 դատավճռով նշանակված պատժին՝ 375․000 ՀՀ դրամ տուգանքին և սահմանել վերջնական պատիժ հանրային աշխատանք 60 ժամ տևողությամբ և տուգանք 375․000 (երեք հարյուր յոթանասունհինգ հազար) ՀՀ դրամի չափով:
Նշանակված տուգանք պատժի վճարումը տարաժամկետել մեկ տարի ժամկետով՝ տուգանքի վճարումը կատարել մաս առ մաս, տասներկու ամսվա ընթացքում` ըստ պրոբացիայի ծառայության կազմած ժամանակացույցի։
Վաչագան Վարդանյանի նկատմամբ ընտրված խափանման միջոցը` բացակայելու արգելքը, թողնել անփոփոխ մինչև սույն դատավճռի օրինական ուժի մեջ մտնելը:
Դատավճիռը օրինական ուժի մեջ մտնելուց հետո Վաչագան Վարդանյանի վերաբերյալ Հայաստանի Հանրապետության սահմանային էլեկտրոնային կառավարման տեղեկատվական (ՍԷԿՏ) համակարգում բացառապես սույն գործով առկա արգելանքը վերացնել:
Իրեղեն ապացույցների, գույքային հայցի, վարույթային ծախսերի հարցը համարել լուծված:
Քրեական գործին կցված արտավարութային փաստաթղթերը պահել քրեական գործի հետ միասին՝ դրանց պահելու ամբողջ ժամանակամիջոցում:
Դատավճիռը կարող է բողոքարկվել Հայաստանի Հանրապետության վերաքննիչ քրեական դատարան` ստանալու օրվանից մեկամսյա ժամկետում:


ԴԱՏԱՎՈՐ` ՄՈՒՇԵՂ ԱՐԱՄՅԱՆ