ԵԴ1/0470/01/25



Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ

Երևան քաղաքի առաջին ատյանի ընդհանուր իրավասության
քրեական դատարանը՝

Նախագահությամբ դատավոր Ն.Բաղդասարյանի,
Քարտուղարությամբ Ա.Սարգսյանի,
Մասնակցությամբ՝
Հանրային մեղադրող Ա.Բաղդասարյանի,
Մեղադրյալ Չինգիս Սերգեևիչ Կուուլարի
Պաշտպան Ս.Գուլքանյանի,

Թարգմանիչ Լ. Կարապետյանի,

2025 թվականի մարտի 11-ին, Երևան քաղաքում, դռնբաց դատական նիստում՝ արագացված վարույթի կիրառմամբ քննության առնելով քրեական գործն ըստ մեղադրանքի`
Չինգիս Սերգեևիչ Կուուլարի՝ ծնված՝ 25.10.1984թ., ՌԴ Տիվայի Հանրապետության Կիզիլ քաղաքում, ազգությամբ տուվացի, ՌԴ քաղաքացի, բարձրագույն կրթությամբ, ամուսնացած, խնամքին՝ հինգ անչափահաս երեխա և վատառողջ կինը, նախկինում չդատված, չի աշխատում, հաշվառված և բնակվել է՝ ԻԻՀ, քաղաք Թեհրան, Մոֆաթեհ փողոց, Դեռաֆշ նրբանցք, 14 շենք, բնակարան 3 հասցեում, ՀՀ-ում բնակության վայր չունի, մեղադրանք է ներկայացվել ՀՀ քրեական օրենսգրքի 457-րդ հոդվածի 1-ին մասով, 44-469-րդ հոդվածի 1-ին մասով, որպես խափանման միջոց կիրառվել է վարչական հսկողությունը և բացակայելու արգելքը

Պ Ա Ր Զ Ե Ց՝

Գործի դատավարական նախապատմությունը.
2024 թվականի նոյեմբերի 26-ին՝ ժամը 03։30-ին հանցանք կատարելու անմիջականորեն ծագած կասկածանքի հիման վրա Չինգիս Սերգեևիչ Կուուլարը ՀՀ ԱԱԾ աշխատակցի կողմից ձերբակալվել է և նույն օրը ներկայացվել է ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչություն։
Դեպքի առթիվ 2024 թվականի նոյեմբերի 26-ին ՀՀ քրեական օրենսգրքի 457-րդ հոդվածի 1-ին մասով /երկու դրվագ/ և 44-469-րդ հոդվածի 1-ին մասով նախաձեռնվել է թիվ 58229624 քրեական վարույթը, նույն օրը որոշում է կայացվել Չինգիս Սերգեևիչ Կուուլարին ձերբակալելու մասին։
2024 թվականի նոյեմբերի 26-ին դատավարական ղեկավարում իրականացնող դատախազի կողմից որոշում է կայացվել Չինգիս Սերգեևիչ Կուուլարի նկատմամբ ՀՀ քրեական օրենսգրքի 457-րդ հոդվածի 1-ին մասով և 44-469-րդ հոդվածի 1-ին մասով հանրային քրեական հետապնդում հարուցելու մասին այն բանի համար, որ նա հանդիսանալով ՌԴ քաղաքացի, նախաքննության ընթացքում դեռևս չպարզված ժամանակահատվածում, վայրում և չպարզված հանգամանքներում ձեռք է բերել պետական մարմնի կողմից տրվող, իրավաբանական նշանակություն ունեցող փաստ հավաստող կեղծ փաստաթուղթ' թիվ 657659492 համարի ՌԴ քաղաքացու անձնագիր, որից հետո, գտնվելով Հայաստանի Հանրապետությունում 2024 թվականի նոյեմբերի 26-ին' ժամը 00:40-ի սահմաններում, «Զվարթնոց» օդանավակայանով Երևան-Դոհա-Սան Պաուլո տարանցիկ թիվ 286 չվերթով Հայաստանի Հանրապետության պետական սահմանը հատելու նպատակով «Քաթար էյրւվեյզ» ավիաընկերության աշխատակցին է ներկայացրել իր լուսանկարով և կենսորոշիչ տվյալներով լրացված վերը նշված կեղծ անձագիրը և ստացել նստեցման կտրոն' այդպիսով օգտագործելով պետական մարմնի կողմից տրվող, իրավաբանական նշանակություն ունեցող փաստ հավաստող կեղծ փաստաթուղթը' թիվ 657659492 համարի ՌԴ քաղաքացու անձնագիր:
Բացի այդ, Չինգիս Սերգեևիչ Կուուլարը, ապօրինի' առանց սահմանված փաստաթղթերի և պատշաճ թույլտվության, խախտելով «Պետական սահմանի մասին» ՀՀ օրենքի 11-րդ հոդվածի և «ՀՀ պետական սահմանի ռեժիմ սահմանելու մասին» ՀՀ կառավարության 2011 թվականի մայիսի 12֊ի թիվ 702-Ն որոշման պահանջները, պետական մարմնի կողմից տրվող, իրավաբանական նշանակություն ունեցող փաստ հավաստող կեղծ փաստաթուղթը' թիվ 657659492 համարի ՌԴ քաղաքացու անձնագիրն օգտագործելով' փորձել է հատել Հայաստանի Հանրապետության պետական սահմանը, սակայն իր դիտավորության մեջ ընդգրկված հանցագործությունն իր կամքից անկախ հանգամանքներով չի իրագործվել, քանի որ անձնագրի կեղծ լինելու հանգամանքը հայտնաբերվել է ՀՀ ԱԱԾ սահմանապահ ծառայողների կողմից և վերջինիս ելքը Հայաստանի Հանրապետությունից արգելվել է::
Երևան քաղաքի առաջին ատյանի ընդհանուր իրավասության քրեական դատարանի` 27.11.2024թ. որոշմամբ մեղադրյալ Չինգիս Սերգեևիչ Կուուլարի նկատմամբ որպես խափանման միջոց է կիրառվել տնային կալանքը՝ երկու ամիս ժամկետով։
Երևան քաղաքի առաջին ատյանի ընդհանուր իրավասության քրեական դատարանի` 22.01.2025թ. որոշմամբ մեղադրյալ Չինգիս Սերգեևիչ Կուուլարի նկատմամբ որպես խափանման միջոց է կիրառվել վարչական հսկողությունը և բացակայելու արգելքը:
07.02.2025թ. հսկող դատախազի կողմից որոշում է կայացվել թիվ 58229624 քրեական վարույթով մեղադրական եզրակացությունը հաստատելու մասին, և քրեական վարույթը մեղադրական եզրակացությամբ ուղարկվել է Երևան քաղաքի առաջին ատյանի ընդհանուր իրավասության քրեական դատարան, որտեղ այն ստացվել է նույն օրը, և դրան շնորհվել է ԵԴ1/0470/01/25 հերթական համարը:
Քրեական գործը մակագրվել է նույն դատարանի դատավոր Ն.Բաղդասարյանիս և «Վարույթ ստանձնելու և նախնական դատալսումներ նշանակելու մասին» դատարանի 11.02.2025թ. որոշմամբ նշանակվել են նախնական դատալսումներ:
Նախնական դատալսումների ընթացքում մեղադրյալ Չինգիս Սերգեևիչ Կուուլարի նկատմամբ որպես խափանման միջոց կիրառված վարչական հսկողությունը և բացակայելու արգելքը թողնվել է անփոփոխ:

Արագացված վարույթ.
Նախնական դատալսումների ընթացքում մեղադրյալ Չինգիս Սերգեևիչ Կուուլարը միջնորդեց կիրառել արագացված վարույթ: Պաշտպան Ս.Գուլքանյանը միացավ միջնորդությանը։
Հանրային մեղադրող Ա.Բաղդասարյանը չառարկեց արագացված վարույթ կիրառելու դեմ:
Հանրային մեղադրողի կողմից մեղադրանքի փաստական հիմքը և իրավական գնահատականը ներկայացնելուց հետո մեղադրյալ Չինգիս Սերգեևիչ Կուուլարը, պատասխանելով Դատարանի հարցերին՝ հայտնեց, որ մեղադրանքի էությունն իրենց պարզ է, մեղադրանքի հետ համաձայն է, բավարար ժամանակ ունեցել է պաշտպանի հետ խորհրդակցելու և առաջադրված մեղադրանքը քննարկելու համար, պաշտպանը պատասխանել է հետաքրքրող հարցերին, գիտակցում է, որ պարտավոր չէ համաձայնվել առաջադրված մեղադրանքին և ունի ընդհանուր կարգով գործի քննության իրավունք, կամավոր է ներկայացրել միջնորդությունը, տեղյակ է, որ արագացված վարույթ կիրառելու դեպքում ապացույցներ չեն հետազոտվելու և դատավճիռ է կայացվելու մեղադրանքի հետ մեղադրյալի համաձայնության հիման վրա, տեղյակ է, որ արագացված վարույթ կիրառելու դեպքում դատավճիռը չի կարող բողոքարկվել ՀՀ քրեական դատավարության օրենսգրքի 373-րդ հոդվածով և 375-րդ հոդվածի 1-3-րդ մասերով նախատեսված հիմքերով:
Պաշտպան Ս.Գուլքանյանը, պատասխանելով Դատարանի հարցերին՝ հայտնեց, որ պաշտպանյալի հետ մանրամասն և ամբողջությամբ քննարկել են մեղադրանքի էությունը, որի հետ նա համաձայն է, մեղադրյալը հասկանում և գիտակցում է մեղադրանքի կետերը և հանգամանքները, մեղադրյալը կամավոր և գիտակցված է ընդունում մեղադրանքը և ներկայացրել միջնորդությունը, պարզաբանել է արագացված վարույթ կիրառելու միջնորդության էությունը, հետևանքները, բողոքարկման սահմանափակ լինելու հանգամանքը և այլ հարցեր։
Դատարանը, հաշվի առնելով, որ առկա է ՀՀ քրեական դատավարության օրենսգրքի 464.1-րդ հոդվածի 1-ին մասով նախատեսված հիմքը, բացակայում են ՀՀ քրեական դատավարության օրենսգրքի 464.1-րդ հոդվածի 2-րդ մասով նախատեսված արագացված վարույթի կիրառումը բացառող հանգամանքները, մեղադրյալը համաձայն են իրենց մեղսագրվող արարքներին, միջնորդությունը ներկայացրել է կամավոր և գիտակցում է միջնորդության բնույթը և հետևանքները, որոշել է արագացված վարույթ կիրառելու մասին միջնորդությունը բավարարել և անցկացնել լրացուցիչ դատալսումներ:

Դատարանի իրավական վերլուծությունները.
ՀՀ քրեական դատավարության օրենսգրքի 464.2-րդ հոդվածի 6-րդ մասի համաձայն՝
Արագացված վարույթ կիրառելու մասին միջնորդությունը բավարարելու դեպքում դատարանը սույն օրենսգրքով սահմանված ընդհանուր կարգով ապացույցների հետազոտում չի իրականացնում և որոշում է կայացնում լրացուցիչ դատալսումներ անցկացնելու մասին:
ՀՀ քրեական դատավարության օրենսգրքի 464.3-րդ հոդվածի համաձայն՝
 1. Արագացված վարույթով լրացուցիչ դատալսումների ընթացքում դատարանը քննարկում է սույն օրենսգրքի 345-րդ հոդվածի 1-ին մասի 2-9-րդ կետերով և 11-րդ կետով նշված հարցերը:
2. Սույն հոդվածի 1-ին մասով սահմանված հարցերի քննարկումն ավարտելուց հետո դատարանը հեռանում է առանձին սենյակ` հայտարարելով դատավճռի հրապարակման վայրը, տարին, ամիսը, օրը և ժամը:
ՀՀ քրեական դատավարության օրենսգրքի 464.4-րդ հոդվածի համաձայն՝
 1. Արագացված վարույթի արդյունքով դատարանը կայացնում է մեղադրական դատավճիռ սույն օրենսգրքի 347-350-րդ հոդվածներով սահմանված կարգով` հաշվի առնելով սույն հոդվածով նախատեսված առանձնահատկությունները:
2. Դատարանը արագացված վարույթի արդյունքով մեղադրական դատավճիռ կայացնելիս նշանակում է պատիժ՝ հաշվի առնելով Հայաuտանի Հանրապետության քրեական օրենսգրքի ընդհանուր մասի վերաբերելի դրույթները:
3. Սույն օրենսգրքի 167-րդ հոդվածի 1-ին մասով նախատեսված վարույթային ծախսերը մեղադրյալից ենթակա չեն բռնագանձման:
4. Դատավճիռը հրապարակելուց հետո դատավորը կողմերին պարզաբանում է նաև դատավճիռը բողոքարկելու` սույն օրենսգրքով նախատեսված սահմանափակումները:
Դատարանն ապացուցված է համարում մեղադրյալ Չինգիս Սերգեևիչ Կուուլարի կողմից իրեն մեղսագրվող արարքների կատարումը, որոնք համապատասխանում են ՀՀ քրեական օրենսգրքի 457-րդ հոդվածի 1-ին մասի և 44-469-րդ հոդվածի 1-ին մասի հատկանիշներին, տվյալ արարքները կատարելու մեջ նրա մեղավորությունը և գտնում, որ իր կատարած հանցանքների համար նա ենթակա է պատժի։
Մեղադրյալի նկատմամբ պատիժ նշանակելիս՝ դատարանը գտնում է հետևյալը.
ՀՀ Սահմանադրության 71-րդ հոդվածի համաձայն՝
«1. Հանցանք կատարած անձի պատժի հիմքը նրա մեղքն է:
2. Օրենքով սահմանված պատիժը, ինչպես նաև նշանակված պատժատեսակը և պատժաչափը պետք է համաչափ լինեն կատարված արարքին»:
ՀՀ քրեական օրենսգրքի 7-րդ հոդվածի 1-ին մասի համաձայն`
«1. Հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը»:
ՀՀ քրեական օրենսգրքի 55-րդ հոդվածի 2-րդ մասի համաձայն՝
«1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները»:
ՀՀ քրեական օրենսգրքի 69-րդ հոդվածի համաձայն`
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ:
3. Ազատությունից զրկելու հետ կապված պատիժ կարող է նշանակվել, եթե դատարանը հիմնավորի, որ առավել մեղմ պատժատեսակը չի կարող ապահովել պատժի նպատակները:
4. Պատժի կատարման կարգը և պայմանները սահմանվում են Հայաստանի Հանրապետության քրեակատարողական օրենսդրությամբ»:
ՀՀ քրեական օրենսգրքի 77-րդ հոդվածի 4.1-րդ և 4․2-րդ մասերի համաձայն՝
«4.1. Արագացված վարույթ կիրառելու դեպքում պատիժը չի կարող գերազանցել սույն օրենսգրքի Հատուկ մասի համապատասխան հոդվածի սանկցիայով նախատեսված առավել խիստ պատժատեսակի համար նախատեսված առավելագույն չափի կամ ժամկետի երեք քառորդը։ Եթե առավել խիստ պատժատեսակի երեք քառորդը պակաս է ստացվում սույն օրենսգրքի Հատուկ մասի համապատասխան հոդվածի սանկցիայով նախատեսված առավել խիստ պատժատեսակի նվազագույն չափից կամ ժամկետից, ապա այն չի կարող պակաս լինել նվազագույն չափից կամ ժամկետից։
4.2. Չավարտված հանցագործություններով արագացված վարույթ կիրառելու դեպքում սույն հոդվածի 4.1-ին մասով նախատեսված կանոնը կիրառվում է չավարտված հանցագործության համար սույն օրենսգրքի 73-րդ հոդվածով նախատեսված պատժի նշանակման կանոնները կիրառելուց հետո: Եթե հաշվարկի արդյունքով պատժաչափը պակաս է ստացվում չավարտված հանցագործության համար պատժի նշանակման կանոնների կիրառմամբ սույն օրենսգրքի Հատուկ մասի համապատասխան հոդվածի սանկցիայով նախատեսված առավել խիստ պատժատեսակի նվազագույն չափից կամ ժամկետից, ապա նշանակվում է այն չափը կամ ժամկետը, որն ստացվել է հաշվարկի արդյունքով։»։
Վերոհիշյալ իրավադրույթների համատեքստում ուսումնասիրելով մեղադրյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մեղադրյալ Չինգիս Սերգեևիչ Կուուլարի նկատմամբ, նրա կատարած հանցանքների համար պատիժ նշանակելիս` դատարանը հաշվի է առնում հանցանքների բնույթն ու հանրության համար վտանգավորության աստիճանը, հանցավորի անձը բնութագրող հանգամանքները, այն, որ նա երիտասարդ է, նախկինում դատված չի եղել։
Մեղադրյալ Չինգիս Սերգեևիչ Կուուլարի կատարած հանցագործությունների համար պատիժ նշանակելիս՝ որպես նրա պատասխանատվությունը և պատիժը մեղմացնող հանգամանք դատարանը դիտում է խնամքին հինգ անչափահաս երեխաների և վատառողջ կնոջ առկայությունը, կատարած արարքների համար զղջալը և մեղքն ընդունելը, ինչը որպես մեղավոր անձի հետհանցավոր դրական վարքագիծ, վկայում է այն մասին, որ նա լրիվ գիտակցել է իր արարքի հանրային վտանգավորությունը և զղջացել է դրա համար:
Մեղադրյալ Չինգիս Սերգեևիչ Կուուլարի պատասխանատվությունը կամ պատիժը ծանրացնող հանգամանքներ դատարանը չի արձանագրում:
Վերոգրյալի հիման վրա, ՀՀ քրեական օրենսգրքի 77-րդ հոդվածի 4.1-րդ մասի կանոնների հաշվառմամբ, պատժի տեսակը և չափն ընտրելիս ղեկավարվելով պատիժ նշանակելու ընդհանուր սկզբունքներով, հաշվի առնելով մեղադրյալի կատարած հանցագործությունների բնույթը և հանրության համար վտանգավորության աստիճանը, դա կատարելու հանգամանքները, նրա անձը բնութագրող տվյալների և պատասխանատվությունն ու պատիժը մեղմացնող հանգամանքների համակցությունը, ինչպես նաև պատասխանատվությունն ու պատիժը ծանրացնող հանգամանքների բացակայությունը, դատարանը գտնում է, որ մեղադրյալ Չինգիս Սերգեևիչ Կուուլարի նկատմամբ անհրաժեշտ է նշանակել պատիժ` ՀՀ քրեական օրենսգրքի 457-րդ հոդվածի 1-ին մասով՝ տուգանք` նվազագույն աշխատավարձի տասներկուսապատիկի չափով, ՀՀ քրեական օրենսգրքի 44-469-րդ հոդվածի 1-ին մասով՝ տուգանք` նվազագույն աշխատավարձի տասնհինգապատիկի չափով, ինչն անհրաժեշտ և բավարար է պատժի նպատակների իրագործման, սոցիալական արդարությունը վերականգնելու, պատժի ենթարկված անձին վերասոցիալականացնելու և հանցագործությունները կանխելու համար:
Միաժամանակ, անդրադառնալով մեղադրյալի նկատմամբ նշանակվող տուգանքի ձևով պատժի չափին՝ դատարանն արձանագրում է հետևյալը․
ՀՀ քրեական օրենսգրքի 59-րդ հոդվածի 5-րդ մասի համաձայն՝ «Հանցանք կատարած անձի եկամտի բացակայության կամ դրա չափը պարզելու անհնարինության դեպքում տուգանքի չափը հաշվարկվում է հանցանքը կատարելու պահին նվազագույն աշխատավարձի չափով: Տուգանքի չափը որոշվում է նույն կարգով, եթե հանցանք կատարած անձի եկամուտն առաջացել է հանցանքն ավարտվելուց հետո։ Տուգանքի չափը որոշվում է նույն կարգով նաև այն դեպքում, երբ անձի ամսական եկամտի հաշվարկի արդյունքով դրա չափը պակաս է ստացվում նվազագույն աշխատավարձի չափից»։
Նկատի ունենալով, որ մեղադրյալ Չինգիս Սերգեևիչ Կուուլարը չունի եկամուտ՝ դատարանը գտնում է, որ նշանակվող տուգանքի չափի հաշվարկային հիմք պետք է ընդունել արարքի կատարման պահին գործող «Նվազագույն ամսական աշխատավարձի մասին» օրենքով սահմանված նվազագույն ամսական աշխատավարձի չափը՝ 75.000 (յոթանասունհինգ հազար) ՀՀ դրամը:
ՀՀ քրեական օրենսգրքի 74-րդ հոդվածի համաձայն՝
1. Հանցագործությունների համակցությամբ յուրաքանչյուր հանցագործության համար առանձին պատիժ (հիմնական և լրացուցիչ) նշանակելով` դատարանը վերջնական պատիժը որոշում է նշանակված պատիժները լրիվ կամ մասնակիորեն գումարելու միջոցով: Մասնակի գումարման դեպքում վերջնական պատիժը պետք է ավելի լինի, քան համակցության մեջ մտնող հանցագործությունների համար նշանակված առավել խիստ պատիժը: Հանցագործությունների համակցությամբ վերջնական պատիժը որոշելիս մասնակի գումարվող պատիժը չի կարող պակաս լինել տվյալ պատժատեսակի համար սույն օրենսգրքով նախատեսված նվազագույն չափից կամ ժամկետից, սակայն վերջնական պատիժը չի կարող գերազանցել սույն հոդվածի 2-րդ, 3-րդ, 4-րդ, 5-րդ, 6-րդ և 9-րդ մասերով նախատեսված առավելագույն չափը կամ ժամկետը:
...
3. Եթե հանցագործությունների համակցությունն ընդգրկում է միայն միջին ծանրության կամ միջին և ոչ մեծ ծանրության հանցանքներ կամ անզգուշությամբ կատարված ծանր հանցանքներ, ապա ազատազրկման ձևով վերջնական պատիժը նշանակվում է պատիժները լրիվ կամ մասնակիորեն գումարելու միջոցով: Գումարելիս ազատազրկման ձևով վերջնական պատիժը չի կարող գերազանցել 10 տարին:
...
9. Հանցագործությունների համակցության դեպքում մյուս պատիժները լրիվ կամ մասնակիորեն գումարելու դեպքում նշանակվող վերջնական պատիժը չի կարող գերազանցել սույն օրենսգրքի Ընդհանուր մասով պատժի տվյալ տեսակի համար սահմանված առավելագույն ժամկետը կամ չափը: ...»:
Հիմք ընդունելով ՀՀ քրեական օրենսգրքի 74-րդ հոդվածի կանոնները, դատարանը գտնում է, որ Չինգիս Սերգեևիչ Կուուլարի նկատմամբ պատիժ պետք է նշանակել ՀՀ քրեական օրենսգրքի 457-րդ հոդվածի 1-ին մասով նշանակված տուգանքի /նվազագույն աշխատավարձի տասներկուսապատիկի՝ 900.000 ինը հարյուր հազար) ՀՀ դրամի չափով/ և 44-469-րդ հոդվածի 1-ին մասով նշանակված տուգանքի /նվազագույն աշխատավարձի տասնհինգապատիկի՝ 1.125.000 մեկ միլիոն հարյուր քսանհինգ հազար) ՀՀ դրամի չափով/ ձևով պատիժները լրիվ գումարելու միջոցով, մասնավորապես՝ պետք է վերջնական պատիժ սահմանել տուգանք՝ 2.025.000 երկու միլիոն քսանհինգ հազար) ՀՀ դրամի չափով, ինչն անհրաժեշտ և բավարար է պատժի նպատակների իրագործման, սոցիալական արդարությունը վերականգնելու, պատժի ենթարկված անձին վերասոցիալականացնելու և հանցագործությունները կանխելու համար:
Հաշվի առնելով ՀՀ քրեական օրենսգրքի 79-րդ հոդվածի իրավակարգավորումները՝ դատարանը գտնում է, որ Չինգիս Սերգեևիչ Կուուլարի նկատմամբ նշանակված 2.025.000 երկու միլիոն քսանհինգ հազար) ՀՀ դրամի չափով տուգանքն անհրաժեշտ է մեղմացնել, հաշվի առնելով վերջինիս անազատության մեջ գտնվելու 61 /վաթսունմեկ/ օրը, և վերջնական պատիժ սահմանել՝ տուգանք՝ 500.000 (հինգ հարյուր հազար) ՀՀ դրամի չափով:
Դատարանը գտնում է, որ իր նկատմամբ նշանակված պատիժը մեղադրյալ Չինգիս Սերգեևիչ Կուուլարը պետք է կրի, քանի որ դրան խոչընդոտող հանգամանքներ առկա չեն:
Անդրադառնալով մեղադրյալի նկատմամբ լրացուցիչ պատիժ՝ Հայաստանի Հանրապետության տարածքից վտարելը նշանակելու կամ չնշանակելու հարցին՝ դատարանն արձանագրում է հետևյալը.
ՀՀ քրեական օրենսգրքի 62-րդ հոդվածի համաձայն՝
«1. Օտարերկրյա քաղաքացուն Հայաստանի Հանրապետության տարածքից վտարելը Հայաստանի Հանրապետությունում քրեական պատասխանատվության ենթակա օտարերկրյա քաղաքացուն Հայաստանի Հանրապետության սահմաններից հեռացնելն է՝ արգելելով նրան գտնվել Հայաստանի Հանրապետությունում:
(...)
5. Օտարերկրյա քաղաքացին կարող է վտարվել իր քաղաքացիության պետություն կամ այն պետություն, որտեղ վերջինս մշտապես բնակվում է: Վտարման երկիրը սահմանում է դատարանը՝ հաշվի առնելով դատապարտյալի կարծիքը:
6. Այս պատժատեսակը չի կարող նշանակվել`
1) փախստականի կարգավիճակ ունեցող կամ Հայաստանի Հանրապետությունում ապաստան ստացած անձի նկատմամբ, բացառությամբ Հայաստանի Հանրապետության միջազգային պայմանագրերով նախատեսված դեպքերի,
2) չվերադարձելիության սկզբունքից օգտվող օտարերկրյա քաղաքացու նկատմամբ, բացառությամբ Հայաստանի Հանրապետության միջազգային պայմանագրերով նախատեսված դեպքերի,
3) մինչև հանցանք կատարելը Հայաստանի Հանրապետության քաղաքացու կամ Հայաստանի Հանրապետությունում հատուկ կացության կարգավիճակ ունեցող կամ Հայաստանի Հանրապետությունում մշտապես բնակվող անձի հետ ամուսնացած կամ խնամքին Հայաստանի Հանրապետության քաղաքացի հանդիսացող երեխա ունեցող անձի նկատմամբ,
4) եթե անձը վտարվող պետության տարածքում քրեական հետապնդման է ենթարկվում այնպիսի արարքի համար, որը կարող է պատժվել մահապատժով,
5) եթե հիմնավորվում է, որ վտարվող պետության տարածքում անձը կարող է հետապնդման ենթարկվել ռասայական, կրոնական, ազգային, սոցիալական որոշակի խմբի պատկանելության կամ քաղաքական հայացքների համար, կամ
6) եթե հիմնավորվում է, որ վտարվող պետության տարածքում անձը կարող է ենթարկվել խոշտանգման կամ այլ դաժան, անմարդկային կամ նվաստացնող վերաբերմունքի կամ պատժի։
7. Հայաստանի Հանրապետությունից չի կարող վտարվել այն անձը, որի նկատմամբ նշանակվել է սույն հոդվածով նախատեսված պատիժը, սակայն մինչև պատժի կատարումը դատապարտյալը ձեռք է բերել փախստականի կամ Հայաստանի Հանրապետությունում ապաստան ստացածի կարգավիճակ, կամ նրա նկատմամբ հաստատվել է չվերադարձելիության սկզբունքի կիրառելիությունը, բացառությամբ Հայաստանի Հանրապետության միջազգային պայմանագրերով նախատեսված դեպքերի:»:
Անդրադառնալով լրացուցիչ պատիժ նշանակելու հարցին՝ դատարանը գտնում է, որ տվյալ դեպքում դրա հիմքերն ու անհրաժեշտությունը բացակայում են, քանի որ Չինգիս Սերգեևիչ Կուուլարը Հայաստանի Հանրապետությունում չի կատարել բռնությամբ զուգորդված որևէ հանցանք և վերջինի հանցավոր գործողություններն ուղղված են եղել ոչ թե Հայաստանի Հանրապետություն ապօրինի մուտք գործելուն, այլ ՀՀ տարածքն ապօրինի լքելուն, որպիսի պայմաններում դատարանի գնահատմամբ նրա նկատմամբ լրացուցիչ պատիժ նշանակելու՝ Հայաստանի Հանրապետության տարածքից վտարելու հիմքերը և անհրաժեշտությունը բացակայում են:
ՀՀ քրեական օրենսգրքի 59-րդ հոդվածի 8-րդ մասի համաձայն` «Եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում։(...)»:
Նկատի ունենալով, որ մեղադրյալ Չինգիս Սերգեևիչ Կուուլարը չի աշխատում, նյութական դրությունից ելնելով՝ չի կարող անհապաղ և ամբողջությամբ վճարել նշանակված տուգանքը, սակայն պատրաստակամ է այն վճարել՝ դատարանը գտնում է, որ պետք է տուգանքի վճարման համար սահմանել 1 /մեկ/ տարի ժամկետ:
Քննարկելով խափանման միջոցի հարցը, դատարանը գտնում է, որ Չինգիս Սերգեևիչ Կուուլարի նկատմամբ ընտրված խափանման միջոց վարչական հսկողությունը և բացակայելու արգելքը պետք է թողնել անփոփոխ մինչև դատավճռի օրինական ուժի մեջ մտնելը։
Քննարկելով ապացույցների պահպանման և տնօրինման հարցը, ղեկավարվելով ՀՀ քրեական դատավարության օրենսգրքի 99-րդ հոդվածով՝ դատարանը գտնում է, որ արտավարույթային փաստաթղթերը, ինչպես նաև 29.01.2025թ. որոշմամբ իրեղեն ապացույց ճանաչված Չինգիս Սերգեևիչ Կուուլարի անվամբ լրացված Ռուսաստանի Դաշնության քաղաքացու 65 N 7659492 սերիական համարով անձնագիրը պահել քրեական վարույթի նյութերի հետ:
Դատարանը գտնում է նաև, որ 26.11.2024թ. Չինգիս Սերգեևիչ Կուուլարի անձնական խուզարկությամբ հայտնաբերված և վերցված իրերը պետք է վերադարձնել վերջինիս կամ վերջինիս կողմից լիազորված անձին։
Հաշվի առնելով, որ սույն քրեական գործով գույքային հայց չի հարուցվել, գույքի արգելադրում չի կիրառվել, դատարանն այդ հարցերին չի անդրադառնում։
Հաշվի առնելով, որ սույն գործով կիրառվել է արագացված վարույթ, դատարանը գտնում է, որ վարութային ծախսերի հարցը պետք է համարել լուծված։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 464.4-րդ հոդվածով, դատարանը.

Վ Ճ Ռ Ե Ց՝

Մեղադրյալ Չինգիս Սերգեևիչ Կուուլարին մեղավոր ճանաչել ՀՀ քրեական օրենսգրքի 457-րդ հոդվածի 1-ին մասով, 44-469-րդ հոդվածի 1-ին մասով նախատեսված արարքների կատարման մեջ, և նրա նկատմամբ նշանակել պատիժ՝
- ՀՀ քրեական օրենսգրքի 457-րդ հոդվածի 1-ին մասով՝ տուգանք` նվազագույն աշխատավարձի տասներկուսապատիկի՝ 900.000 ինը հարյուր հազար) ՀՀ դրամի չափով,
- ՀՀ քրեական օրենսգրքի 44-469-րդ հոդվածի 1-ին մասով՝ տուգանք` նվազագույն աշխատավարձի տասնհինգապատիկի՝ 1.125.000 մեկ միլիոն հարյուր քսանհինգ հազար) ՀՀ դրամի չափով,
ՀՀ քրեական օրենսգրքի 74 հոդվածի 3-րդ մասի կիրառմամբ՝ նշանակված պատիժները լրիվ գումարելու միջոցով՝ վերջնական պատիժ սահմանել ազատազրկում տուգանք՝ 2.025.000 երկու միլիոն քսանհինգ հազար) ՀՀ դրամի չափով:
ՀՀ քրեական օրենսգրքի 79-րդ հոդվածի 4-րդ մասի կիրառմամբ Չինգիս Սերգեևիչ Կուուլարի նկատմամբ նշանակված պատիժը մեղմացնել և վերջնական պատիժ նշանակել տուգանք՝ 500.000 (հինգ հարյուր հազար) ՀՀ դրամի չափով:
Դատավճիռը օրինական ուժի մեջ մտնելուց հետո մեղադրյալ Չինգիս Սերգեևիչ Կուուլարի նկատմամբ նշանակված տուգանքի վճարման համար սահմանել 1 /մեկ/ տարի ժամկետ:
Մեղադրյալ Չինգիս Սերգեևիչ Կուուլարի նկատմամբ ընտրված խափանման միջոց վարչական հսկողությունը և բացակայելու արգելքը թողնել անփոփոխ՝ մինչև դատավճռի օրինական ուժի մեջ մտնելը:
29.01.2025թ. որոշմամբ իրեղեն ապացույց ճանաչված Չինգիս Սերգեևիչ Կուուլարի անվամբ լրացված Ռուսաստանի Դաշնության քաղաքացու 65 N 7659492 սերիական համարով անձնագիրը պահել քրեական վարույթի նյութերի հետ:
26.11.2024թ. Չինգիս Սերգեևիչ Կուուլարի անձնական խուզարկությամբ հայտնաբերված և վերցված իրերը վեևադարձնել վերջինիս կամ վերջինիս կողմից լիազորված անձին։
Արտավարութային փաստաթղթերը պահել քրեական վարույթի նյութերի հետ։
Վարութային ծախսերի հարցը համարել լուծված։
Դատավճիռը կարող է բողոքարկվել ՀՀ վերաքննիչ քրեական դատարան՝ ստանալու օրվանից հետո՝ մեկամսյա ժամկետում, բացառությամբ ՀՀ քրեական դատավարության օրենսգրքի 373-րդ հոդվածով և 375-րդ հոդվածի 1-3-րդ մասերով նախատեսված հիմքերի:

ԴԱՏԱՎՈՐ Ն. ԲԱՂԴԱՍԱՐՅԱՆ