ԵԴ1/0451/01/25


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«26» Հունվարի 2026թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
քարտուղարությամբ՝ ՌՈԲԵՐՏ ՍԻՐԱԿԱՆՅԱՆԻ
մասնակցությամբ.
հանրային մեղադրողներ՝ ԱՆԴՐԱՆԻԿ ԱԼԵՔՅԱՆԻ
ԵՎ ՎԱՐԱԶԴԱՏ ՊԵՏՐՈՍՅԱՆԻ
տուժողներ՝ ՀՈՎՀԱՆՆԵՍ ՀԱՐՈՒԹՅՈՒՆՅԱՆԻ
ԵՎ ԿԱՐԵՆ ԽԱՉԱՏՐՅԱՆԻ
մեղադրյալ՝ ՎԱՀԱՆ ՊԱՊԻԿՅԱՆԻ
պաշտպան՝ ԿԱՐԵՆ ՄԱՆՈՒԿՅԱՆԻ
դռնբաց դատական նիստում քննելով Վահան Հարությունի Պապիկյանի (1) վերաբերյալ քրեական գործն ըստ մեղադրանքի՝ ՀՀ քրեական օրենսգրքի 452 հոդվածի 3-րդ մասով.




1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ.
Թիվ 13106824 քրեական վարույթով Վահան Հարությունի Պապիկյանին ՀՀ քրեական օրենսգրքի 452 հոդվածի 3-րդ մասով մեղադրանք է ներկայացվել հետևյալ արարքի համար.
«նա 2024 թվականի օգոստոսի 20-ին՝ ժամը 23:10-ից մինչև կեսգիշերն ընկած ժամանակահատվածում, իր բնակության՝ Երևան քաղաքի Ռուսթավելու փողոց 49 տուն հասցեում, իսկ հետո նաև Երևան քաղաքի Վրացյան փողոց 90 հասցեում գործող ՀՀ ՆԳՆ ոստիկանության Երևան քաղաքի վարչության Կենտրոնական բաժնում, նույն օրը՝ ժամը 23:04-ին, Ռուսթավելու փողոց 49 տուն հասցեում վիճաբանության ձայներ լսած Գայանե Երվանդի Մինասյանի կողմից ոստիկանություն կատարած ահազանգի կապակցությամբ նույն հասցե այցելած, պաշտոնատար անձ հանդիսացող ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 2-րդ վաշտի կրտսեր պարեկ Հովհաննես Սուրենի Հարությունյանի և նույն վաշտի ավագ պարեկ Կարեն Դերենիկի Խաչատրյանի օրինական ծառայողական գործունեությանը միջամտելու նպատակով, գտնվելով ալկոհոլի ազդեցության տակ, մի քանի անգամ ոտքերով հարվածներ է հասցրել վերջիններիս»։

2. ԴԱՏԱՔՆՆՈՒԹՅԱՆ ԸՆԹԱՑՔՈՒՄ ՀԵՏԱԶՈՏՎԱԾ ԹՈՒՅԼԱՏՐԵԼԻ ԱՊԱՑՈՒՅՑՆԵՐԸ.
ՀԻՄՆԱԿԱՆ ԴԱՏԱԼՍՈՒՄՆԵՐ

2.1 «Դեպքի վայրի զննություն կատարելու մասին» 2024 թվականի օգոստոսի 21-ի արձանագրության համաձայն.
«(...)
Դեպքի վայր է հանդիսանում Երևան քաղաքի Ռուսթավելու փողոցի 49-րդ տան բակային հատվածը:
Դեպքի վայր հանդիսացող Երևան քաղաքի Ռուսթավելու փողոցի 49-րդ տան անմիջապես դիմացի հատվածում՝ դեմքով տան մուտքի դռանը նայելիս աջակողմյան հատվածում շինության վրա առկա է Կոնդ 8 գրառումը: Բակային հատվածը ասֆալտապատ է, տեղ-տեղ քանդված վիճակում: Մասնակից Հովհաննես Հարությունյանը մատնացույց արեց այն հատվածը, որտեղ ձերբակալել են Վահան Պապիկյանին և վերջինս դիմադրել է: Նշված հատվածը գտնվում է ծածկի տակ, գետինը նույնպես ասֆալտապատ է, առկա են կենցաղային իրեր: Տվյալ հատվածին դեմքով նայելիս ձախակողմյան հատվածում առկա են ասֆալտապատ աստիճաններ, դրանից դեպի ձախ առկա են շների մնալու համար նախատեսված հատված՝ բուն (երկու գամփռ տեսակի շուն): Գետնին, ինչպես նաև աստիճաններին և բակային հատվածում դռներից մեկի վրա՝ սանհանգույցի դռան վրա հայտնաբերվեցին արնանման հետքեր, որտեղից վերցվեցին նմուշներ:
Դեպքի վայրի զննությամբ տեսանկարահանող սարքեր չհայտնաբերվեցին: Դեպքի վայրի զննության ավարտից հետո վերցված նմուշները փաթեթավորվեցին և կնքվեցին 769 համարի կնիքով» (2):
2.2 «Առարկաներ կամ փաստաթղթեր վերցնելու մասին» 2024 թվականի օգոստոսի 22-ի արձանագրության համաձայն.
«(...) թիվ 13106824 քրեական վարույթով կազմեցի սույն արձանագրությունն այն մասին, որ վարույթով վկա՝ ՀՀ ՆԳՆ ոստիկանության պարեկային ծառայության Երևան քաղաքի գնի 1-ին գումարտակի 2-րդ վաշտի ավագ պարեկ Կարեն Դերենիկի Խաչատրյանը ներկայացրեց իրեն ամրակցված տեսանկարահանող տեսախցիկի դեպքին վերաբերելի ժամանակահատվածի՝ 2024 թվականի օգոստոսի 20-ի՝ ժամը 23:10-ից մինչև 24:00-ն ընկած ժամանակահատվածի՝ տեսագրությունը էլեկտրոնային կրիչի վրա» (3):
2.3 «Առարկաներ կամ փաստաթղթեր վերցնելու մասին» 2024 թվականի օգոստոսի 22-ի արձանագրության համաձայն.
«(...) վարույթով վկա՝ ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 2-րդ վաշտի ավագ պարեկ Հովհաննես Սուրենի Հարությունյանը ներկայացրեց իրեն ամրակցված տեսանկարահանող տեսախցիկի դեպքին վերաբերելի ժամանակահատվածի՝ 2024 թվականի օգոստոսի 20-ի՝ ժամը 23:10-ից մինչև 24:00-ն ընկած ժամանակահատվածի՝ տեսագրությունը էլեկտրոնային կրիչի վրա» (4):
2.4 Վահան Հարությունի Պապիկյանի «Ձերբակալման վերաբերյալ» 2024 թվականի օգոստոսի 21-ի արձանագրության համաձայն.
«(...) Վահան Հարությունի Պապիկյանը (ծնված՝ 27.12.1982թ.) խուլիգանություն և իշխանության ներկայացուցչի նկատմամբ բռնություն գործադրելու անմիջականորեն ծագած հիմնավոր կասկածի հիմքով 2024 թվականի օգոստոսի 20-ին՝ ժամը 23:40-ին, Երևան քաղաքի Ռուսթավելու փողոցի 49 տուն հասցեից ձերբակալվել է:
(...)
Ձերբակալվածի մարմնի և հագուստի վրա ակնհայտ երևում էին արնանման հետքեր, գլխի ձախ հատվածում ակնհայտ վնասվածքներ, ձախ ուսի, վզի և մարմնի տարբեր հատվածներում առկա էին վնասվածքներ:
Ձերբակալվածը հրաժարվել է ստորագրել» (5):
2.5 Արտավարութային փաստաթուղթ ճանաչված՝ Կարեն Դերենիկի Խաչատրյանի և Հովհաննես Սուրենի Հարությունյանի կողմից ներկայացված տեսագրությունները զննելու մասին 2024 թվականի օգոստոսի 22-ի և 2025 թվականի հունվարի 25-ի արձանագրությունների և բուն տեսաձայնագրությունների համաձայն.
«Կարեն Դերենիկի Խաչատրյան 2008 անվանումով տեսագրությունը դիտելիս պարզվեց հետևյալը՝ տեսագրությունը արված է Կարեն Դերենիկի Խաչատրյանի կրծքավանդակին ամրացված տեսախցիկով, իսկ պարեկային մեքենայի վարորդ է հանդիսանում նույն վաշտի կրտսեր պարեկ՝ Հովհաննես Հարությունյանը: Տեսագրություն պատկերված է ինչպես են պարեկային մեքենայով գնում անհայտ անձի կողմից կատարված ահազանգի կապակցությամբ: Պարեկային մեքենան կայանում է և զրուցում են մի քաղաքացու հետ:
Քաղաքացի-Բարև Ձեզ ես էի Ձեզ հետ զրուցում: Այս արանքով, այս արանքով իջնում եք ներքև ենտեղ հոսթելա, հոսթելի դեմը դարպասա մոխրագույն ձայներ էր գալիս զամոկներ էր գցած անմարդկային ձայներ էին գալիս:
2-րդ քաղաքացի անմարդկային ձայներ է գալիս կինը ճչում էր արյուն էր գալիս գոռացինք միլիցիա ենք կանչում ասեց հա դրա համար մենք Ձեզ կանչեցինք:
Քաղաքացի-Կոնդի ժողովուրդը լսումա վերևի շենքերիցել են լսում
Կարեն Խաչատրյան-դիմացի դուռնա?
Քաղաքացի-հոսթելի դիմացի դուռնա: Մուտքը դժվարանում եմ ասեմ, գառաժի մուտքը այնտեղից է:
Կարեն Խաչատրյան լավ:
Կարեն Խաչատրյանը մոտենում է մեքենային նստում մեքենան և գնում դեպքի վայր: Բացատրում է Հովհաննես Հարությունյանին ինչպես գնան նկարագրված հասցեն։
Կարեն Խաչատրյանը և Հովհաննես Հարությունյանը մեքենայից իջնելով քայլում են դեպքի վայր: Փողոցում անցնում է մեկ տարեց քաղաքացի կին, ում հագին առկա է մուգ կարմիր գույնի բլուզ և սև շրջազգեստ, իսկ մյուս քաղաքացին դռան մուտքի մոտ կանգնած է:
Կարեն Խաչատրյան-բարև Ձեզ Ձայներ են գալիս որտեղիցա
3-րդ քաղաքացի-այստեղա մտեք։
Մոտենում են տան դարպասներին և ծեծում դարպասին: Տեսագրությունում երևում են երկու պարեկային ծառայության փորձաշրջան անցնող ուսանողներ որոնց հագին առկա է ոստիկանության համազգեստ առանց պարբերանշաններին:
Դուռը բացում է կիսամերկ մի քաղաքացի, ըստ մասնակցի հայտարարության հետագայում պարզել են, որ նշված տղամարդը հանդիսանում է՝ Վահան Պապիկյանը: Կարեն Խաչատրյանը և Վահան Պապիկյանը ձեռքով սեխմում են միմյան ողջունում:
Կարեն Խաչատրյան-բարև ձեզ մայոր Խաչատրյան
Վահան Պապիկյան-ուրախ ենք ախպեր ջան:
Կարեն Խաչատրյան-ինչ է պատահել։
Նշված Վահան Պապիկյանի կոկորդի հատվածում երևում է արնանման հետքեր։
Վահան Պապիկյան-Չէ ախպեր բան չի եղել տան հարցա ցավտ տանեմ
Կարեն Խաչատրյան-ահազանգա եղել, ստացել ենք ահազանգ է եղել։
Վահան Պապիկյան-ովա ահազանգել
Հովհաննես Հարությունյան-ում հետ էիք վիճաբանում
Վահան Պապիկայն-ախպորս
Հովհաննես Հարություն-ուր է Ձեր եղբայրը
Վահան Պապիկյան- պատասխանը չի լսվում այնուհետև ասում է ինչ հարց կա եկեք: Եկեք ցավներտ տանեմ: Բոլորով առաջանում են դեպի բակ:
Վահան Պապիկյան-եկեք նստենք տենանք ինչա եղել նստեք ախպերներ ջան: Լսվում է շների բարձր հաչոց: Էտ շների ձենը կտրեք:
Կարեն Խաչատրյան-ընգեր ախպորտ կկանչես
Վահան Պապիկյան-նստեք ախպեր
Կարեն Խաչատրյան-հաշվի նստած ենք
Վահան Պապիկան- մեր օջախի մեջես, մի հատ կնստես ախպեր
Կարեն Խաչատրյան-կպատմես ինչ է պատահել
Վահան Պապիկյան դիմում է Հովհաննես Հարությունյանին- ախպերս կգաս նստես, հեսա ասել եմ հեսա կոֆե դնեն
Հովհաննես Հարությունյան-որտեղա ախպերտ, կանչի մի հատ
Վահան Պապիկյան-ախպեր կնստես մի հատ
Հովհաննես Հարությունյան-ոչ Ձեր եղբորը կանչեք
Վահան Պապիկյան- դե դուրս արի տնիցս դուրս արի տարածքիցս
Հովհաննես Հարությունյան-չես կարա դուրս կանչես, չեմ կարա դուրս գամ
Վահան Պապիկյան ագռեսիվ տոնով-դուրս արի անձնական տարածքիցս տարացքիցս արա դու ով ես ասում եմ դուրս արի տարածքիցս:
Հովհաննես Հարությունյան-Չեմ կարող դուրս գամ ձայն մի բարձրացրա
Վահան Պապիկյան-Արա դու ով ես մտել ես անձնական տարածք դուրս արի:
Կարեն Խաչատրյան-մի րոպե, մի րոպե
Վահան Պապիկյան-ագռեսիվ տոնով ով ես դուր, արա ով ես դու
Կարեն Խաչատրյան չես տենում ովեմ ձայնտ մի բարձրացրա
Վահան Պապիկյան-ագռեսիվ տոնով ով ես դու չեմ տենում, ով ես մտել ես իմ տարածք, իմ տարածքի մեջ ես այ տղա, դու եկել մտելես իմ սեփական տարածք: Միջամտում է քաղաքացի ըստ մասնակցի հայտարարության հանդիսանում է եղբայրը։
Եղբայր-ինչ է պատահել
Վահան Պապիկյան ագռեսիվ վարքագծով մտելես իմ տարածք, հել հլը ստուց, ապե ինչ ես եկել մտել տարածքս, եղբայրը փորձում է հրելով եղբորը հեռու պահել ոստիկաններից։
Եղբայր-զանգի Պողոսյանին
Վահան Պապիկյանին փորձում են հանգստացնել եղբայրը և սև հագուստով մի կին թիկունքով կանգնած դեպի Վահան Պապիկյանը նրան խանգարելով որպեսզի ոստիկանների վրա չհարձակվի:
Վահան Պապիկյանը ագռեսի տոնով ասում է ապե հլը հել ստուց և ագռեսիվ վարքագծով շարժվում է դեպի Հովհաննես Հարությունյանը, իսկ եղբայրը և ներկա գտնվող կինը փորձում են հանգստացնեն Վահան Պապիկյանին:
Կարեն Խաչատրյան-հանգիստ պահեք Ձեզ։
Վահան Պապիկյան-արա հել հլը ստուց ու շրջանցում է եղբորը վրա հասնելով ոստիկանության աշխատակիցներին:
Հովհաննես Հարություն-հանգիստ խոսա:
Վահան Պապիկյան-իմ տան մեջ ես այ տղա հել հլը ստուց
Եղբայր- ապեր հելի դուրս հլը։
Վահան Պապիկյան-իմ տան մեջ ես արա դուրս հլը հեր:
Եղբայր-Դուրս եկեք, Վահիկ արիբան եմ ասում և փորձում է ագռեսիվ վարքագիծ եղբորը հանգստացնել:
Կարեն Խաչատրյան-Ձեզ հանգիստ պահեք:
Վահան Պապիկյան-ագռեսիվ տոնով ապե հլը դուրս եկեք:
Հովհաննես Հարությունյան-ձեռքտ ներքև իջացրա։
Եղբայր-հանգստացեք արա
Վահան Պապիկյան-ագռեսիվ տոնով խի եք եկել տանս վրա արա
Եղբայր-մի րոպ ապե մի արա
Կարեն Խաչատրյան-ասեցի թող
Եղբայր-ինչ եք անում արա և տեսագրությունում երևում է, որ Վահան Պապիկյանը և կարեն Խաչատրյանը ձեռքերով բռնել են միմյանցից
Եղբայր-հեռու գնա ասեցի
Կարեն Խաչատրայն-հեռու գնա ասացի, մի խանգարիր
Եղբայր-ախպերս մի րոպե թող: Տեսաօբյեկտիվի դիմացը փակ է փորձում են
Վահան Պապիկյանին հանգստացնեն երևում է Կարեն Խաչատրյանը փորձում է Վահան Պապիկյանի ձեռքը բռնել:
Վահան Պապիկյան-Ագրեսիվ վարքագիծ:Արա եկել ես մտել ես տուն, արա դու ով ես մտնես իմ տուն այ (...): Ով ես
Ոստիկանության աշխատակիցները փորձում են ձեռնաշղթաներ հագցնեն:
Վահան Պապիկյան-արա դու ով ես արա ով ես այ գանդոն:
Եղբայր-թողեք
Վահան Պապիկյանին փորձում են վնասազերծեն վերջինս ցուցաբերում է ագռեսիվ վարքագիծ
Վահան Պապիկյան-ձեռս թող այ (...):
Եղբայր- արա ես ինչ ես անում հանգստացի մի քանի վարկյան խառնաշփոթ է տեսաօբյեկտիվում երևում է Վահան Պապիկյանի մարմինը։
Վահան Պապիկան-Արա դու ով ես գաս իմ տան մեջ բան անես թող հլը ձեռքս։
Եղբայր մի րոպե։
Վահան Պապիկյան-ձեռքս թող հլը արա ձեռքս ջարդի արա թող: Այդ պահին ոստիկանները փորձելով կանխել վերջինս ագրեսիվ վարքագիծը պարկացնում են գետնին և փորձում ձեռնաշղթաներ հագցնեն Վահան Պապիկյանին։
Կարեն Խաչատրյան-ձեռքս թող
Վահան Պապիկյան ձեռքս արա
Հովհաննես Հարությունյան-ձեռքտ հետ բեր
Վահան Պապիկյան արա իմ տան մեջես, վերջինիս փորձում են ձեռնաշղթաներ հագցնեն որպեսզի կանխեն նրա ագռեսիվ վարքագիծը։
Կին- արյունա գալիս
Վահան Պապիկյան-արյուն է գալիս ապե, գլուխս կպավ գետնին
Կարեն Խաչատրյան-հեսա շտապօգնություն կանչենեք
Վահան Պապիկյան-արա գլուխս կպավ գետին
Եղբայր-գլուխը
Վահան Պապիկյան-Գլխիցս արյունա գալիս, գլխիցս արյունա գալիս այ գանդոն, արա գլուխս արա, գլխիցս արյուն գալիս արա կպավ գետին արա, խփեցի գետին արա, գլխիցս արյունա գալիս ախպեր: Գլխիցս արյունա գալիս ապե:
Կարեն Խաչատրյան-հել նստի ապեր։
Վահան Պապիկյան-գլխիցս արյունա գալիս ապեր, արյունա գալիս
Կարեն Խաչատրյան-ձեռքից փորձում է բարձրացնել նստացնել ասելով վերկաց:
Վահան Պապիկյան-ապե կպավ գետնին ջարդվավ
Կարեն Խաչատրյան-հելի, հելի մի հատ վեր կաց
Վահան Պապիկյան-գլխիցս արյունա գալիս այ գանդոն ես ինչ արեցիք, գլուխս կպավ գետնին արա
Կարեն Խաչատրյան-ասա շտապօգնություն գա
Վահան Պապիկյան-գլուխս արյունա (...), ես ինչ ես անում այ տղա (...) այ տղա և ոտքով հարված է հասցնում հավանաբար Հովհաննես Հարությունյանին, ասելով (...)
Կարեն Խաչատրյան-խելոք մնա
Վահան Պապիկյան-գլուխս ջարդվավ արա, (...) գլուխս ջարդվավ (...):
Եղբայր-ագռեսիվ տոնով ում հետա վիճաբանել, չգիտես ուրես եկել
Վահան Պապիկյան-(...) տանս մեջ գլուխս ջարդեն արա: Լսվում է եղբոր ձայնը, սակայն կոնկրետ ինչ է ասում չի լսվում
Եղբայր-ում հետա վիճաբանել:
Վահան Պապիկյան-(...)
Եղբայրը փորձում է զրուցել ոստիկանների հետ քաղաքացի մի կին կարճ սանրվածքով ձեռքի սրբիչով փորձում է կանգնացնել արյունը Վահան Պապիկյանի
Վահան Պապիկյան-(...)
Եղբայր- շոր բերեք որտեղ են խփել գլուխտ, արա ում հետա վիճաբանել է, Դու ով ես ասես իմ հետա վիճաբանել դու ով ես արա
Կարեն Խաչատրյան- կիմանաս ես ով եմ
Եղբայր- ագռեսիվ տոնով դու կիմանաս ես ովեմ արա
Կարեն Խաչատրյան- հանգիստ
Եղբայր- ագռեսիվ տոնով քեզ քաղաքավարի պահի
Վահան Պապիկյան-(...)
Եղբայր- մի հատ ուշքի արի
Վահան Պապիկան- ովոր սենց բան անի (...)
Եղբայր- Դուք սրա համար պատասխան եք տալու
Վահան Պապիկյան-(...)
Եղբայր-պահի ես որտեղիտ են խփել
Վահան Պապիկյան-գլուխս սաղ արյունա
Եղբայրը Կարեն Խաչատրյանին- խիես քաշքում, ինչի համար ես քաշքշում, տեսաօբյեկտիվում հայտնում է սև հագած տարեց մի կին և սկսում բջջային հեռախոսով տեսանկարահանել
Վահան Պապիկյան այ (...), եսկոմ գնա
Եղբայր-ճիշտ ես անում
Կարեն Խաչատրյան- Ձեր հետ է վիճաբանել
Եղբայր-գիժես դու
Կարեն Խաչատրյան-հարց տվեցի քո հետա վիճաբանել
Եղբայր- արա դու ով ես որ իմ անձնական հարցերի մեջ մտնես այ տղա, այ փալաս:
Վահան Պապիկան- ձեռքս թողեք
Եղբայր- Դու լավ չես քանի տարեկան տղա ես, քանի տարեկան տղաես
Կարեն Խաչատրյան-հաստատ ձեզանից մեծեմ
Վահան Պապիկյան-ինչ կլիրսես, որ մեծ լինես:
Եղբայր- Դու չես կարա ինձանից մես լինես այ տղա, ինձանից մեծես
Վահան Պապիկյան-ձեռներս բացեք։
Կին- ձեռները բացեք ով կանգնած է խոսակցության մասնակիցների դիմացի հատվածում:
Վահան Պապիկյան- թևերս բացեք արա, (...) թևերս բացեք, սաղ արյունա գալիս արա այ (...), լսի արա (...), տանդ տեղը իմանալու եմ (...), արա դու ով ես արա, (...) Վահան Պապիկյանը ցանկանում է վրա հասնել ոստիկաններին և նրան կրկին պառկացնում են
Եղբայր- ուշքի արի արա և հարձակվում է ոստիկանների վրա և նրանց քաշքշում
Կարեն Խաչատրյան-մի արա, մի արա
Վահան Պապիկյան-(...)։
Եղբայրը-Հովհաննես Հարությունյանին- խիես քցել գետին, խիես գլուխը ճղել
Հովհաննես Հարությունյան- ձերբակալված է մի խոչնդոտեք
Եղբայր-խիես գլուխը ճղել, դեբիլես լսվում են Վահան Պապիկյանի հայհոյանքները։
Եղբայր սրբիչ բեր, իմ տունես ինչ գործ ունես:
Կարեն Խաչատրյան-ահազանգով եկել եմ
Եղբայր- ինչ ահազանգ ովա տվել
Կարեն Խաչատրյան- ահազանգով եկել ենք ախպերտել սաղ արյան մեջա
Եղբայր- ինչ անենք իրա տան մեջ կարա սաղ արյուն լինի քեզ ինչ։
Վահան Պապիկյան-(...) փորձում է կինը օգնություն
Եղբայր- եքա տղա ես քաշում քցում ես գետին
Կարեն Խաչատրյան- քեզ հանգիստ
Վահան Պապիկյան-(...), դու գաս իմ տուն սենց պահես: Ոտքերով պառկած վիճակից փորձում է անկանոն շարժումներ կատարել
Եղբայր-խիես սենց անում քաշում գցում գետին եղբայրը ագռեսիվ տոնով վրա է հասնում և այդ ընթացքում Վահան Պապիկյանը պառկած տեղից ոտքով հարվածում է Կարեն Խաչատրյանին։
Եղբայր ագռեսիվ տոնով վրա է գալիս և ասում խիես ճղել։
Կարեն Խաչատրյան-ես չեմ ճղել
Եղբայր-(...)
Վահան Պապիկյան-արունս կանգնելա (...) և այդ պահին մոտնեում է ոստիկան, ըստ մասնակցի հայտարության հանդիսանում է ոստիկանության Կենտրոնական բաժնի աշխատակից, կինը լարված գոռում է պարեկների վրա։ Խառը իրարանցում է և եղբայրը գոռում է շոր բերեք: Եղբայրը Հովհաննես Հարությունյանին ասում է ինչ ես պատմում վերջինս պատասխանում է պատմում եմ այն, ինչ եղել է:
Վահան Պապիկյանը-(...) նստած տեղից հարվածում է Կարեն Խաչատրյանին շարունակելով լկտի կերպով խոչնդոտել ոստիկանների օրինական գործողությունները
Կին-ագռեսիվ տոնով ձեռքերով գոռում է ձեռքերը թուլացրեք արյունը կանգնում է պատասխանես տալու
Վահան Պապիկյան-(...), ոստիկանը նրան բարձրացնում է և վերջինը դրսևորելով հակաբարոյական վարքագիծ գոռում է (...) և գոռում է արյունս կանգեց:
Եղբայր-ագռեսիվ վարքագիծ վրա է հասնում Հովհաննես Հարությունյանին ասելով խփելու համար (...) օգնության հասած ոստիկանները ասում են հանգստացի վերջինս ասում է Վահագին ճանաչում եք դատախազ, Պողոսյան Վահագին ճանաչում եք դատախազ, իմ ախպերնա Պողոսյան Վահագը, խիես խփում, իսկ պարեկը հայտնում է, որ ոչ մեկին չի խբել: Այդ ընթացքում Վահան Պապիկյանին դուրս են բերում:
Վահան Պապիկյան-Ձեռքս պոկվումա, ձեռքս ցավումա և ուղեկցում են ավտոմեքենան: Վահան Պապիկյան-ախպերական թողեք, միքիչ թուլցրեք։
Կարեն Խաչատրյան-հասնենք կթուլացնենք վերջինիս մի քանի անգամ ասելուց հետո Վահան Պապիկյանին նստացնում են մեքենան:
Վահան Պապիկյան մեքենայի մեջ-արա ձեռս թուլցրեք Ձեր պահվածքը ճիշտ է։
Կարեն Խաչատրյան-քո պահվածքը ճիշտ է։
Վահան Պապիկյան-պահվածքս ճիշտ չի արա, քեֆս լավա խիես եկել մեր տուն ովա քեզ հրավիրել։
Կարեն Խաչատրյան ահազանգով եմ եկել։
Վահան Պապիկյան ես լավ ապրած տղայեմ ես ինչ եք անում այնուհետև վերջինս դրսևորում է ոչ ադեկվատ վարքագիծ։ Ոստիկանության Կենտրոնական բաժնի դեմը տալիս է սեռական բնույթի հայհոյանքներ ասելով, որ վաղը սախ փոխվելուա ու դուք կարողանալու եք երևալ: Մի քանի րոպես անց դիմում է Կարեն Խաչատրյանին գիտես 500000 ՀՀ դրամի համար ես (...) համար ծառայում ես գիտես (...), ես պատերազմ եմ տվել ես 44 օր պատերազմ եմ տվել դու ուրես ես վիզեմ դրել, (...) եկելա իրան սենցա պահում»։
«Կարեն Դերենիկի Խաչատրյան 2008.m4» անվանմամբ տեսաձայնագրության մեջ արձանագրված օրվա ժամով՝ 23։12-ից սկսած ագրեսիվ ձևով պահանջում է, որպեսզի պարեկները հեռանան իր բնակարանից և փորձում է առաջ գնալ դեպի պարեկները, սակայն նրանց միջև կանգնած տղամարդը Վահան Պապիկյանին պահում է։ Դրանից հետո Վահան Պապիկյանը Հովհաննես Հարությունյանի հետ ագրեսիվ խոսելով կրկին պահանջում է լքել իր բնակարանը, միաժամանակ երևում է քաշքշուկ։ Ժամը 23:18-ից 23։22-ն ընկած ժամանակահատվածում Վահան Պապիկյանը հայհոյանքներ է հնչեցնում Հովհաննես Հարությունյանի հասցեին, հարվածում է ինչպես Հովհաննես Հարությունյանին, այնպես էլ գետնին պառկած դիրքից ոտքերով հարվածներ է հասցնում Կարեն Խաչատրյանին։
«Հովհաննես Սուրենի Հարությունյան 2008.mp4» անվանմամբ տեսագրության մեջ արձանագրված օրվա ժամով՝ 23։12-ից սկսած ագրեսիվ ձևով պահանջում է, որպեսզի պարեկները հեռանան իր բնակարանից և փորձում է առաջ գնալ դեպի պարեկները, սակայն նրանց միջև կանգնած տղամարդը Վահան Պապիկյանին պահում է։ Դրանից հետո Վահան Պապիկյանը Հովհաննես Հարությունյանի հետ ագրեսիվ խոսելով կրկին պահանջում է լքել իր բնակարանը, քաշքշում է նրա համազգեստը, հրում, իսկ Հովհաննես Հարությունյանը մի քանի անգամ կրկնում է «մի արա, կձերբակալվես, շորերս թող»։ Ժամը 23:18-ից 23։22-ն ընկած ժամանակահատվածում Վահան Պապիկյանը հայհոյանքներ է հնչեցնում Հովհաննես Հարությունյանի հասցեին, հարվածում է ինչպես Հովհաննես Հարությունյանին, այնպես էլ գետնին պառկած դիրքից ոտքերով հարվածներ է հասցնում Կարեն Խաչատրյանին (6):
2.6 Դատաքննության ընթացքում տուժող Հովհաննես Սուրենի Հարությունյանն, ըստ էության, ցուցմունք տվեց հետևյալի մասին.
-Հանրային մեղադրողի հարցերին ի պատասխան՝ տուժող Հովհաննես Հարությունյանը հայտնեց, որ դեպքի ժամանակահատվածում աշխատել է ՀՀ ՆԳՆ ոստիկանության պարեկային ծառայության Երևան քաղաքի գնդում որպես պարեկ և ներկայում նույնպես զբաղեցնում է այդ պաշտոնը: Դեպքի օրը՝ որքանով հիշում է 2024 թվականի օգոստոս ամսին, ահազանգի հիման վրա մոտեցել են Երևան քաղաքի Ռուսթավելու փողոցի հասցեներից մեկին, որտեղ տեսել են մեղադրյալ Վահան Պապիկյանին։ Վահանի վրա եղել են վնասվածքներ, քերծվածքներ, նա արնահոսել է, սակայն ինքը չի հիշում արնահոսող վերքերի տեղակայումը։ Վահանն իրենց հրավիրել է ներս՝ տան բակ։ Ներս մտնելուն պես իրենք սկսել են զննել տան բակային հատվածը, որտեղ նույնպես արյան հետքեր են նկատել: Իրենք փորձել են հասկանալ, թե ով է վիճաբանության մյուս տուժողը: Այդ օրն իրենք այդպես էլ չեն հասկացել, թե ինչ է պատահել, և ում հետ էր վիճաբանել Վահանը։ Մինչև Վահանին ձեռնաշղթա հագցնելը, իրենք փորձել են նաև բանակցել Վահանի հետ, ընդհանուր լեզու գտնել, քանի որ իրենց դիմավորելիս Վահանը շատ լավ է խոսել իրենց հետ: Իր համար նույնիսկ անհասկանալի է եղել Վահանի վարքի այդքան կտրուկ փոփոխությունը: Այդ ժամանակ Վահանը սկսել է վիճաբանել իրենց հետ: Ամբողջ ընթացքում Վահանն իրեն շատ ագրեսիվ է պահել, եղել է անկառավարելի, իրենց կարգադրություններին չի ենթարկվել, փորձել է իրենց հարվածներ հասցնել, ինչի պատճառով իրենք Վահանին ձեռնաշղթաներ են հագցրել: Ինքն ի սկզբանե չէր հիշում, որ Վահանը հարվածել է իր ոտքերին, սակայն երբ Դատարանում հետազոտվեց դեպքի վերաբերյալ տեսագրությունը, ինքը վերհիշեց, որ Վահանը գետնին պառկած վիճակում հարվածներ է հասցրել իր ոտքերին: Իրավիճակը շատ լարված ու խառն է եղել, այդ պատճառով էլ ինքը դեպքի բոլոր մանրամասները չի մտապահել։ Վահանի հարվածներից ինքը ցավ չի զգացել: Դեպքից հետո ինքն իր համազգեստի վրա նկատել է թե արյան հետքեր և թե ոտնահետքեր:
Դեպքի օրն ինքն իր չորս գործընկերների հետ է եղել (երկուսը պրակտիկանտ), սակայն դեպքին առավելապես ներգրավված են եղել ինքն ու Կարենը: Երբ ինքը տունն է զննության ենթարկել, Կարենը խոսելիս է եղել Վահանի հետ՝ դեպքի մանրամասները պարզելու նպատակով: Ինքը չի հիշում, որ իր մյուս գործընկերների նկատմամբ Վահանը բռնություն գործադրած լինի:
-Պաշտպանի հարցերին ի պատասխան՝ տուժող Հովհաննես Հարությունյանը հայտնեց, որ ինքը տան երկրորդ հարկ բարձրացող աստիճանները նույնպես զննել է, քանի որ դրանց վրա նույնպես արյան հետքեր են եղել։ Ինքը կարծում է, որ իր գործողությունները խուզարկության տարրեր չեն պարունակել: Երբ Վահանը սկսել է իրենց քաշքշել, միջադեպին խառնվել է նաև մի տղամարդ, ով հանդիսացել է Վահանի եղբայրը: Քաշքշուկը սկսվել է այն պահից, երբ իրենք Վահանից փորձել են պարզել, թե ինչ է պատահել, իսկ Վահանն իրենց պատասխանել է, որ ամեն ինչ նորմալ է, դա իր տունն է, լավ են արել, որ եկել են, սակայն արդեն կարող են գնալ: Իրենք Վահանից պահանջել են, որպեսզի նա կանչի այն անձին, ում հետ վիճաբանել է: Իրենք հասկացել են, որ Վահանը գտնվում է ալկոհոլի ազդեցության տակ, փորձել են նրան հանդարտեցնել, սակայն Վահանը որևէ կերպ չի հանդարտվել: Ձերբակալման ընթացքում Վահանը գլխի հատվածում ստացել է վնասվածք։ Ձերբակալելուց հետո իր գործընկերը Վահանին առաջին բուժօգնությունն է ցույց տվել։ Իր գործընկերոջ և տեսագրությունում երևացող կնոջ կողմից ցուցաբերված բուժօգնության շնորհիվ արյունահոսությունը դադարել է:
Իր կարծիքով մինչև ձեռնաշղթա հագցնելը Վահանն այնպիսի վարքագիծ է դրսևորել՝ քաշքշել, հայհոյել, որ նրան ձեռնաշղթաներ հագցնելը եղել է անխուսափելի:
-Նախագահողի հարցերին ի պատասխան՝ տուժող Հովհաննես Հարությունյանը հայտնեց, որ ձերբակալման իրենք տեղյակ չեն եղել, թե վիճաբանության որ կողմն է Վահանը՝ տուժողն է, թե հանցանք կատարած անձը: Վահանին այդ վիճակում տեսնելով կասկած են ունեցել, որ վիճաբանություն, ծեծկռտուք է տեղի ունեցել, այդ պատճառով էլ որոշել են ձերբակալել ու ոստիկանության բաժին տեղափոխել: Իր կարծիքով ձեռնաշղթաները հագցնելուց հետո Վահանի գործողությունները՝ հարվածներն ուղղված են եղել իրենից վրեժխնդիր լինելուն, ձեռնաշղթաներից ազատվելուն և իր օրինական գործողությունների կատարմանը խոչընդոտելուն, սակայն Վահանն այդ հնարավորությունը չի ունեցել: Ձեռնաշղթաները Վահանին հագցնելուց հետո իրենք միանգամից նրան ոստիկանության բաժին չեն տեղափոխել, սպասել են, որպեսզի մյուս ծառայակիցներն օգնության հասնեն, քանի որ դեպքի վայրում գտնվող կինը և Վահանի եղբայրը խոչընդոտել են, փակել են ճանապարհը, այդ պատճառով իրենք որոշել են սպասել:
2.7 Դատաքննության ընթացքում տուժող Կարեն Դերենիկի Խաչատրյանն, ըստ էության, ցուցմունք տվեց հետևյալի մասին.
-Հանրային մեղադրողի հարցերին ի պատասխան՝ տուժող Կարեն Խաչատրյանը հայտնեց, որ դեպքի ժամանակահատվածում ինքը ծառայել է ՀՀ ՆԳՆ ոստիկանության պարեկային ծառայության Երևան քաղաքի գնդում, կոչումով մայոր է: Դեպքի օրը՝ 2024 թվականի օգոստոս ամսին, ինքը ծառայություն է իրականացրել Երևան քաղաքի Կենտրոն վարչական շրջանում: Այդ օրը ՀՀ ոստիկանության օպերատիվ կառավարման կենտրոնից ահազանգ է ստացվել առ այն, որ Երևան քաղաքի Ռուսթավելու փողոցի տներից մեկում ծեծկռտուք է: Ահազանգը կատարել են երկու կանայք։ Տեղ հասնելուց հետո իրենք սկզբում զրուցել են այդ կանանց հետ, ովքեր մատնացույց են արել կոնկրետ տունը: Ինքը թակել է նշված տան դուռը, և այն բացել է մեղադրյալը։ Վահանն այդ ժամանակ եղել է առանց վերնահագուստի, վրան եղել են արյան հետքեր և վնասվածքներ: Ինքը ներկայացել է ու Վահանին ասել է, որ ահազանգի շրջանակներում են մոտեցել իրենց տուն: Վահանն իրենց՝ իր գործընկերոջն ու իրենց հետ դեպքի վայր գնացած պրակտիկանտներին, տան բակ է հրավիրել, սուրճ առաջարկել, որից իրենք հրաժարվել են, ինչին ի պատասխան՝ Վահանն ասել է, եթե չեն ուզում, ուրեմն թող դուրս գան իրենց տանից: Ահազանգի հետ կապված Վահանն իրենց պատասխանել է, որ իրենց տանը ոչ մի բան չի եղել, սակայն իրենք տեսնելով Վահանի վիճակը, հասկացել են, որ նա ստում է: Իրենք փորձել են հասկանալ, թե ինչ է կատարվել, փորձել են Վահանից պարզաբանումներ ստանալ, սակայն Վահանը որևէ բացատրություն չի տվել, ավելին՝ սկսել է վիճաբանել իրենց հետ: Իր գործընկերը՝ Հովհաննեսը, տան բակային հատվածում սկսել է զննել արյան հետքերը: Իրավիճակը միանգամից է լարվել, ինքն էլ չի հասկացել, թե ինչու է Վահանն իրենց նկատմամբ այդքան ագրեսիվ դարձել: Իրենք փորձել են նրան հանգստացնել, չեն լարել իրավիճակը, հանգիստ են խոսել Վահանի հետ: Երբ Վահանը սկսել է ագրեսիվ վարք դրսևորել, քաշել է իր գործընկերոջ՝ Հովհաննեսի համազգեստից, իրենք ձերբակալել են նրան: Ինքը չի հիշում Վահան Պապիկյանի ձերբակալման վերաբերյալ արձանագրությունն ինքն է կազմել, թե Հովհաննեսը, չի հիշում նաև, թե որպես ձերբակալման հիմք արձանագրության մեջ ինչ են նշել: Մինչև ձեռնաշղթա հագցնելը, Վահանի կողմից հարվածներ չեն եղել, նա սկսել է իրենց համազգեստից քաշքշել, այդ պատճառով էլ ձերբակալել են: Ձեռնաշղթաները հագցնելիս Վահանն անկանոն շարժումներ է արել: Ձեռնաշղթաները հագցնելուց հետո Վահանը գետնի վրա պառկած վիճակում ոտքերով սկսել է հարվածներ հասցնել՝ իրեն, որքանով հիշում է, մեկ կամ երկու անգամ է հարվածել։ Հարվածներից ինքը ցավ չի զգացել: Այդ հարվածների ժամանակ իր գործընկեր Հովհաննեսը Վահանի տեսադաշտում է գտնվել, հեռու չի գնացել: Իր ընկալմամբ Վահանի ագրեսիվ վարքագիծն ուղղված է եղել և Հովհաննեսի, և իր դեմ: Վահան Պապիկյանին ոստիկանության բաժին տեղափոխելուց հետո վերջինն այնտեղ էլ շարունակել է ագրեսիվ վարքագիծ դրսևորել, հայհոյանքներ հնչեցնել:
-Պաշտպանի հարցերին ի պատասխան՝ տուժող Կարեն Խաչատրյանը հայտնեց, որ ի սկզբանե Վահանն անձամբ իր հանդեպ հարգալից է եղել, սակայն այն պահից սկսած, երբ նա սկսել է անհարգալից վերաբերմունք դրսևորել իր գործընկերոջ՝ Հովհաննեսի նկատմամբ, ինքը դա նաև իրեն է վերագրել: Վահանն անձամբ իրեն ուղղված վատ վերաբերմունք, հայհոյանք կամ հարված չի հասցրել: Հովհաննեսը բակը զննելու ընթացքում երկրորդ հարկ չի բարձրացել, քանի որ արյան հետքերն աստիճանների վրա վերջացել են: Դեպի երկրորդ հարկ գնացող աստիճանների զննության ընթացքում Վահանը Հովհաննեսին ձայն է տվել՝ ասելով. «էտ ուր ես գնում», սակայն անգամ եթե ձայն չտար Հովհաննեսը երկրորդ հարկ չէր բարձրանալու: Հովհաննեսի՝ աստիճաններից իջնելուց հետո Վահանն իրենց դուրս է հրավիրել: Իրենց ծառայողական լիազորությունների շրջանակներում Հովհաննեսը կարող էր նաև երկրորդ հարկ բարձրանալ, եթե արյան հետքեր նաև այնտեղ լինեին, դա խուզարկություն չի համարվում:
Իր կարծիքով Վահանը կոնկրետ Հովհաննեսի նկատմամբ վատ վերաբերմունք դրսևորելու պատճառներ չի ունեցել, քանի որ նրան նույնիսկ չի ճանաչել:
-Նախագահողի հարցերին ի պատասխան՝ Կարեն Խաչատրյանը հայտնեց, որ իրենք Վահան Պապիկյանին ձերբակալել են, քանի որ դեպքի հանգամանքները պարզելու ընթացքում նա իր գործընկերոջը հայհոյել է, քաշքշել է նրա համազգեստից, իսկ ահազանգի հիման վրա նրանք ընդամենը դեպքի վայր են մոտեցել, Վահանին ձերբակալելը կապ չի ունեցել ահազանգի հետ:
2.8 Դատաքննության ընթացքում վկա Մարինե Էդուարդի Պապիկյանը հայտնեց, որ Վահան Պապիկյանն իր որդի է և, ըստ էության, ցուցմունք տվեց հետևյալի մասին.
-Հանրային մեղադրողի հարցերին ի պատասխան՝ վկան հայտնեց, որ 2024 թվականի օգոստոսի 20-ին իրենք մասնակցել են ծննդյան տարեդարձի միջոցառման։ Վահան Պապիկյանի տրամադրությունը բարձր է եղել և նա ցանկացել է իրենց տան բակում գտնվող շներին ազատ արձակել, սակայն Վահանի եղբայրը թույլ չի տվել։ Ինքը միջադեպին ականատես չի եղել և տեղյակ չէ, թե ինչու են պարեկային ծառայության ոստիկաններն այդ օրը եկել իրենց տուն։ Ինքը բարձր ձայներ է լսել և դուրս գալով տեսել է, որ Վահանի ձեռքերը կապված են։ Վահանը ոստիկաններին չի դիմադրել և բոլոր գործողությունները եղել են ցավի պատճառով։
-Պաշտպանի հարցերին ի պատասխան՝ վկան հայտնեց, որ իրնեց տան 2-րդ հարկ տանող աստիճաններին կամ դրանց հարակից հատվածներում արնանման հետքեր չի նկատել, սակայն չի բացառել դրանց առկայությունը։
2.9 Դատաքննության ընթացքում վկա Գևորգ Հարությունի Պապիկյանը հայտնեց, որ Վահան Պապիկյանն իր եղբայրն է և, ըստ էության, ցուցմունք տվեց հետևյալի մասին.
-Հանրային մեղադրողի հարցերին ի պատասխան՝ վկան հայտնեց, որ Վահան Պապիկյանն իր եղբայրն է։ Դեպքը տեղի է ունեցել իրենց տանը, օգոստոսի 20-ին՝ երեկոյան։ Եղբայրը եղել է հարբած և ցանկացել է բակում կապված շներին ազատ արձակել, իսկ ինքը նրան թույլ չի տվել, ինչի պատճառով իրենց միջև բարձր տոնով խոսակցություն է սկսվել։ Երբ եկել են պարեկային ոստիկանները, Վահանը նրանց շատ բարեհամբույր հրավիրել է ներս և սուրճ առաջարկել։ Սակայն ընթացքում խոսակցությունը լարվել է։ Եղբայրը բարձր ձայնով է սկսել խոսել, հայհոյել է, իսկ պարեկային ոստիկանները փորձել են Վահանին գետնին գցելով ձեռնաշղթաներ հագցնել։ Եղբայրը չի դիմադրել և ցանկության դեպքում չէր էլ կարող դա անել։
-Պաշտպանի հարցերին ի պատասխան՝ վկան հայտնեց, որ դեպքի օրը Վահանը ունեցել է քերծվածքներ, որոնք ստացել է ոտքը սայթաքելու հետևանքով տան մուտքի մոտ գտնվող գերանների վրա ընկնելու պատճառով։ Գետնի վրա, ինչպես նաև լվացարանի մոտ՝ որտեղ Վահանը լվացվել է, մնացել են արնանման հետքեր։ Այդ ամենը եղել է մինչև ոստիկանների գալը։ Երբ ոստիկանները Վահանին գետնին են գցել՝ նա գլխի հատվածում վնասվածք է ստացել և դրանից հետո ավելի է բորբոքվել։
2.10 Դատաքննության ընթացքում վկա Վահե Նարիբեկի Ավետիսյանը, հայտնեց, որ 2024 թվականի օգոստոս ամսին եղել է պարեկային ծառայության կուրսանտ և, ըստ էության, ցուցմունք տվեց հետևյալի մասին.
-Հանրային մեղադրողի հարցերին ի պատասխան վկան հայտնեց, որ Վահան Պապիկյանին նախկինում չի ճանաչել, նրան առաջին անգամ հանդիպել է դեպքի օրը՝ 2024 թվականի օգոստոս ամսին, որքանով հիշում է օգոստոսի 21-ին։ Ինքն այդ ժամանակ պրակտիկա է անցել պարեկային ծառայությունում՝ կցված է եղել պարեկներ Հովհաննես Հարությունյանին և Կարեն Խաչատրյանին։ Ստացված ահազանգի հիման վրա իրենք մեկնել են դեպքի վայր՝ Երևան քաղաքի Ռուսթավելի փողոց։ Տան դուռը բացել է մի քաղաքացի, ում հագին եղել է միայն տաբատ։ Նրա գլխին և մարմնին նկատվել են արնանման հետքեր։ Այնուհետև այդ անձն իրենց հրավիրել է ներս՝ բակային հատված, որտեղ աստիճաների վրա և դեպի սանհանգույց տանող հատվածում կրկին նկատվել են արնանման հետքեր։ Այդ ժամանակ Հովհաննեսն ու Կարենը փորձել են կատարվածի մասին պարզաբանում ստանալ, սակայն քաղաքացին հրաժարվել է հարցերին պատասխանել, հայհոյել է նրանց և պահանջել է դուրս գալ տնից (նրա տարածքից)։ Դրանից հետո նշված անձի և պարեկային ոստիկանների միջև սկսվել է քաշքշոց։ Դրանից հետո անձը ձերբակալվել է և տեղափոխվել ոստիկանության Կենտրոնական բաժին։ Մինչև ոստիկանության բաժին տեղափոխելը այդ քաղաքացին ձերբակալված վիճակում մի քանի անգամ ոտքով հարվածել է Հովհաննես Հարությունյանին։
-Պաշտպանի հարցերին ի պատասխան՝ վկան հայտնեց, որ ինքն անձամբ տեսել է արնանման հետքերը, որոնք անզեն աչքով տեսանելի էին։ Հստակ չի հիշում արնանման հետքեր տեսել է նաև աստիճանների վրա, թե բակային հատված տանող նեղ արահետում, սակայն վստահ է, որ դրանք եղել են։ Իր կամ իրենց հետ եղած մյուս կուրսանտի հասցեին հայհոյանքներ չեն հնչել։ Հայհոյանքները հիմնականում հնչել են Կարեն Խաչատրյանի և Հովհաննես Հարությունյանի հասցեին։ Հիշում է, որ նախքան վիճաբանությունը նշված քաղաքացին իրենց սուրճ է առաջարկել։ Նշված քաղաքացին է քաշքշել է երկու պարեկային ոստիկաններին էլ, ինչի պատճառով ձերբակալվել է։ Ինքը չի հիշում նշված անձը ձերբակալված վիճակում արտահոսել է, թե ոչ։
2.11 Դատաքննության ընթացքում վկա Մարիամ Վահանի Բադալյանը, նշեց, որ ծառայության բերումով ճանաչում է Կարեն Խաչատրյանին, դեպքի բերումով՝ Վահան Պապիկյանին և, ըստ էության, ցուցմունք տվեց հետևյալի մասին.
-Հանրային մեղադրողի հարցերին ի պատասխան՝ վկան հայտնեց, որ դեպքը տեղի է ունեցել 2024 թվականի օգոստոս ամսին։ Ինքն այդ ժամանակ պրակտիկա է անցել ՀՀ ոստիկանության պարեկային ծառայությունում։ Երբ իրենք ժամանել են դեպքի վայր, տան դուռը բացել է Վահան Պապիկյանը։ Նա ամբողջությամբ եղել է արյունոտ, արյան հետքեր են եղել նաև գետնին։ Այդ ժամանակ պարեկային ոստիկան Հովհաննես Հարությունյանը սկսել է ուսումնասիրել գետնին եղած արյան հետքերը և փորձել է հասկանալ, թե դրանք ուր են տանում դրանք, ինչից Վահան Պապիկյանը լարվել է։ Որպեսզի Հովհաննեսը չառաջանա, Վահանը նրա հետ վիճաբանության մեջ է մտել և դիմադրություն ցույց տվել նրան։ Պապիկյանը ասում էր, որ դա նրա տան տարածքն է, իրենք իրավունք չունեն այդտեղ որևէ գործողություն կատարել։ Պապիկյանը ձերբակալման ընթացքում դիմադրում էր, փորձում էր հրել ոստիկաններին։ Ինքը տեսել է, որ Պապիկյանը ոտքերով թեթև հարվածներ է հասցրել Հովհաննեսին։ Ինքը նկատել է Վահան Պապիկյանի անկանոն շարժումները, դրանք որպես հարված բնութագրել չի կարող։ Ամբողջ կատարվածը չի նկատել, քանի որ փորձել է Վահան Պապիկյանի ազգականներին պահել, որպեսզի նրանք չխոչընդոտեն։
Պաշտպանի հարցերին ի պատասխան՝ վկան հայտնեց, որ արնանման հետքերը (կաթիլներ) եղել են առնվազն 5-6 տեղ՝ թե աստիճանների վրա, թե տան բակային հատվածում՝ լվացարանի կողմ տանող հատվածում։ Ինքը չի նկատել, որ Հովհաննեսը բարձրանա տան երկրորդ հարկ։ Պապիկյանն անընդհատ կրկնում էր, որ իրենք իրավունք չունեն իր տան բակում առաջանալ, ընտանեկան վեճեր բոլորի հետ պատահում են, իրենց օգնության կարիքը չկա։ Պապիկյանը բարձր տոնով և հայհոյանքներով խոսում էր հիմնականում Հովհաննես Հարությունյանի հետ։ Պապիկյանի ագրեսիվ պահվածքն է եղել նրա ձերբակալման պատճառը։ Իրենք ահազանգով էին գնացել նշված վայր և արյան հետքերը տեսնելով կարող էին հայտնաբերել առերևույթ հանցավոր դեպք (դիակ), իսկ Պապիկյանը թույլ չէր տալիս, որպեսզի իրենք պարզեին, թե ինչ խնդիր կար այդտեղ։ Վահանը ձեռնաշղթաները հագին ոտքերով անկանոն շարժումներ է արել, հնարավոր է որ հարվածներ էլ է հասցրել։ Ոստիկանության բաժնում ինքը ներկա չի եղել։ Ոստիկանության բաժնում Վահան Պապիկյանի վարքագիծն արդեն նորմալ է եղել։ Դեպքը տեղի կունենար ցանկացած ոստիկանի հետ, քանի որ վիճաբանության պատճառն, իր կարծիքով եղել է արյան հետքերն իրենց կողմից հայտնաբերելը։
2.12 Դատաքննության ընթացքում մեղադրյալ Վահան Հարությունի Պապիկյանն, ըստ էության, ցուցմունք տվեց հետևյալի մասին.
2024 թվականի օգոստոսի 20-ին իրենք մասնակցել են միջոցառման։ Այդ օրը տուն վերադառնալուց հետո ինքը կենցաղային հարցերի շուրջ վիճաբանել է իր եղբոր հետ։ Դրանից հետո եկել են ոստիկանները։ Տան դուռը բացել է ինքը և ներս հրավիրել ոստիկաններին, առաջարկել է սուրճ։ Դրանից հետո ոստիկաններից մեկը՝ Հովհաննես Հարությունյանը, բարձրացել է վերև և վերջինի հետ սկսվել է լեզվակռիվ։
-Հանրային մեղադրողի հարցերին ի պատասխան՝ մեղադրյալը հայտնեց, որ իր եղբոր հետ վիճաբանության ընթացքում հարվածներ չեն եղել։ Դեպքի օրն իր ճակատի հատվածում եղել է վնասվածք, որն արնահոսում էր։ Այդ վնասվածքն ինքը ստացել է տան բակում գտնվող սյանը հարվածելու հետևանքով։ Չի բացառում, որ իր արնահոսող վերքից նաև հետքեր լինեին գետնի վրա։ Երբ եկել են ոստիկանները, ինքն է բացել տան դուռը, նրանց հրավիրել ներս և առաջարկել զրուցել ու սուրճ խմել։ Այդ ժամանակ Հովհաննես Հարությունյանը, ով եղել է ոստիկանության համազգեստով, փորձել է բարձրանալ տան 2-րդ հարկ։ Ինքը Հովհաննեսին հարցրել է, թե ուր է գնում, սակայն չի հիշում, թե նա ինչ է պատասխանել։ Այդ հատվածում արյան հետքեր չեն եղել։ Ինքը չգիտի, թե ինչի համար է ձերբակալվել, ենթադրում է, որ հայհոյանքների համար. ձերբակալման պատճառն իրեն չեն ասել։ Ինքն ընդունում է, որ հայհոյել է ոստիկաններին, սակայն դա եղել է վերջինների կողմից իր նկատմամբ կիրառված ուժի հետևանքով։ Ձերբակալվելուց հետո ձեռքերով և ոտքերով կատարել է անկանոն շարժումներ, սակայն ինքը նպատակ չի ունեցել հարվածել ոստիկաններին։
-Պաշտպանի հարցերին ի պատասխան՝ մեղադրյալը հայտնեց, որ ինքը Հովհաննեսին հետ է կանչել և ասել, որ եթե նրանք չեն պարզաբանում, թե ինչ է տեղի ունենում՝ պետք է դուրս գան իր մասնավոր տարածքից, ինչից հետո Հովհաննեսի հետ սկսվել է վիճաբանություն։ Կարծում է, որ Հովհաննես Հարությունյանի գործողությունները եղել են ապօրինի, քանի որ նա իրավասու չէր բարձրանալ տան 2-րդ հարկ։ Ինքն իր որևէ խոսքով կամ գործողությամբ չի փորձել միջամտել ոստիկանների օրինական գործողություններին, այդ նպատակով ոստիկանների նկատմամբ բռնություն չի գործադրել։ Ոստիկանությանը վերաբերվում է ամենայն հարգանքով և նման բան չէր անի։ Հովհաննեսի հետ ծագած վիճաբանությունը եղել է անձնական բնույթի, քանի որ նա իր բոլոր առաջարկները մերժել է։ Վիճաբանությունն առաջացել է նաև այն պատճառով, որ ինքը գտնվել է ալկոհոլի ազդեցության տակ։ Իր ագրեսիվ վարքագիծը եղել է իր նկատմամբ կիրառված անհամաչափ ուժի և այդ ընթացքում ստացած վնասվածքի արդյունքը։
-Նախագահողի հարցերին ի պատասխան՝ մեղադրյալը հայտնեց, որ ինքը վնասվածք է ստացել ոստիկանների գալուց շուրջ 30 րոպե առաջ։ Մինչև ոստիկանների գալը ինքը տուն չի բարձրացել։ Ոստիկաններն իրեն ասել են, որ ահազանգի հիման վրա են եկել։ Ինքը ոստիկաններին ներս է հրավիրել ոչ միայն սուրճ խմելու, այլև զրուցելու և հասկանալու, թե ինչ է պատահել։ Ոստիկանների գործողություններն իր համար եղել են անսպասելի։ Վիրավորական է եղել այն, որ Հովհաննես Հարությունյանը փորձել է բարձրանալ տան 2-րդ հարկ: Երբ ինքը Հովհաննեսին հետ է կանչել, նա վերադարձել է, սակայն չի հիշում, թե ինչի համար է սկսել վիճաբանել վերջինի հետ։ Եթե ոստիկաններն իրեն ի սկզբանե պարզաբանած լինեին, թե ինչի համար են եկել, այս ամենը տեղի չէր ունենա։



ԵԶՐԱՓԱԿԻՉ ԵԼՈՒՅԹՆԵՐ

Հանրային մեղադրողն իր եզրափակիչ ելույթում վկայակոչելով հիմնական դատալսումների ընթացքում հետազոտված թույլատրելի ապացույցները՝ Դատարանին խնդրեց մեղադրյալ Վահան Հարությունի Պապիկյանի նկատմամբ կայացնել մեղադրական վերդիկտ։
Պաշտպանն իր եզրափակիչ ելույթում նշեց, որ դատաքննության ընթացքում չեն հետազոտվել այնպիսի ապացույցներ, որոնք փաստում են ոստիկանության աշխատակիցների կողմից Վահան Պապիկյանի տան բակում իրականացրած օրինական ծառայողական գործունեության մասին: Պաշտպանը նշեց, որ համապատասխան տեսագրությունների զննությամբ պարզ է դառնում, որ ոստիկանների գործողությունները նմանվել են խուզարկության: Պաշտպանը նշեց, որ Վահան Պապիկյանի գործողությունները միտված չեն եղել ոստիկանների օրինական ծառայողական գործունեությանը միջամտելուն և առավելապես եղել են Վահան Պապիկյանի և Հովհաննես Հարությունյանի միջև անձնական հարցերի շուրջ ծագած վիճաբանություն:
Մեղադրյալը նշեց, որ զղջում է իր կողմից կատարված բոլոր արարքների և հնչեցրած հայհոյանքների համար: Նշեց, որ դեպքը տեղի է ունեցել ալկոհոլի ազդեցության տակ և պարեկային ծառայության աշխատակիցներից ներողություն է խնդրել:
ԼՐԱՑՈՒՑԻՉ ԴԱՏԱԼՍՈՒՄՆԵՐ

2.13 Դատվածությունների և հետախուզման առկայության Ձև 8 հարցման պատասխանում առկա տվյալների համաձայն՝ Վահան Հարությունի Պապիկյանի վերաբերյալ 2003 թվականի ապրիլի 18-ին ընդունված ՀՀ քրեական օրենսգրքի 118 հոդվածի հատկանիշներով հարուցված թիվ 15121115 քրեական գործը 2016 թվականի հուլիսի 12-ին կարճվել է (7):
2.14 Վահան Հարությունի Պապիկյանի «Ձերբակալման վերաբերյալ» 2024 թվականի օգոստոսի 21-ի արձանագրության համաձայն.
«(...) Վահան Հարությունի Պապիկյանը (ծնված՝ 27.12.1982թ.) խուլիգանություն և իշխանության ներկայացուցչի նկատմամբ բռնություն գործադրելու անմիջականորեն ծագած հիմնավոր կասկածի հիմքով 2024 թվականի օգոստոսի 20-ին՝ ժամը 23:40-ին, Երևան քաղաքի Ռուսթավելու փողոցի 49 տուն հասցեից ձերբակալվել է (14):
2.15 «Մեղադրյալի նկատմամբ խափանման միջոց ընտրելու մասին» 2024 թվականի օգոստոսի 22-ի որոշման համաձայն՝ թիվ 13106824 քրեական վարույթով մեղադրյալ Վահան Հարությունի Պապիկյանի նկատմամբ որպես խափանման միջոց է ընտրվել բացակայելու արգելքը (9):
Պատժի վերաբերյալ կողմերի հակիրճ դիրքորոշումները.
Հանրային մեղադրողը Դատարանին խնդրեց Վահան Հարությունի Պապիկյանի նկատմամբ որպես պատիժ նշանակել ազատազրկում:
Պաշտպանը Դատարանին խնդրեց Վահան Պապիկյանի նկատմամբ պատիժ նշանակելիս առաջնորդվել նվազագույնի սկզբունքով, նշելով, որ վերջինը նախկինում դատապարտված չի եղել, իսկ ալկոհոլի օգտագործումը կապված չի եղել տվյալ արարքի կատարման հետ: Պաշտպանը նաև խնդրեց նշանակվելիք պատիժը պայմանականորեն չկիրառել:

3. ԴԱՏԱՐԱՆԻ ՓԱՍՏԱԿԱՆ ՎԵՐԼՈՒԾՈՒԹՅՈՒՆՆԵՐԸ ԵՎ ԴԱՏԱՐԱՆԻ ԿՈՂՄԻՑ ՀԱՍՏԱՏՎԱԾ ԿԱՄ ՀԵՐՔՎԱԾ ՓԱՍՏԱԿԱՆ ՀԱՆԳԱՄԱՆՔՆԵՐԸ.
3.1 Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում՝ Դատարանը հաստատված է համարում Վահան Պապիկյանին մեղսագրված հետևյալ փաստական հանգամանքները.
Վահան Պապիկյանը 2024 թվականի օգոստոսի 20-ին՝ ժամը 23:10-ից մինչև կեսգիշերն ընկած ժամանակահատվածում, Երևան քաղաքի Ռուսթավելու փողոցի թիվ 49 տան բակում վիճաբանության ձայների վերաբերյալ ահազանգի հիման վրա այցելած ՀՀ ներքին գործերի նախարարության ոստիկանության պարեկային ծառայության Երևան քաղաքի գնդի 1-ին գումարտակի 2-րդ վաշտի կրտսեր պարեկ Հովհաննես Սուրենի Հարությունյանի և նույն վաշտի ավագ պարեկ Կարեն Դերենիկի Խաչատրյանի օրինական ծառայողական գործունեությանը միջամտելու նպատակով, գտնվելով ալկոհոլի ազդեցության տակ, մի քանի անգամ ոտքերով հարվածներ է հասցրել վերջիններին։
Այս համատեքստում Դատարանի համար ընդունելի չեն պարեկային ոստիկանների գործողությունների օրինականությունը վիճարկող և տուժող Հովհաննես Հարությունյանի ու մեղադրյալ Վահան Պապիկյանի միջև ծագած վիճաբանության անձնական բնույթի վերաբերյալ պաշտպանի փաստարկները, քանի որ.
- «Ոստիկանության մասին» ՀՀ օրենքի 2 հոդվածի 3-րդ մասի համաձայն՝ Ոստիկանության խնդիրներն են օրենքին համապատասխան ապահովել` հանցագործությունների հայտնաբերումը և բացահայտումը։
- «Ոստիկանության պարեկային ծառայության կանոնագիրքը հաստատելու մասին» ՀՀ ոստիկանության պետի 2020 թվականի սեպտեմբերի 23-ի թիվ 36-Լ հրամանի 5 հոդվածի 3-րդ կետի համաձայն՝ Պարեկային ծառայության իրականացումը ոստիկանության խնդիրների կատարման եղանակներից է, որն ապահովվում է՝ հանցագործությունների և վարչական իրավախախտումների վերաբերյալ ստացված ահազանգերի անմիջական հակազդման, դրանց կանխման ու խափանման ուղղությամբ պարեկային կարգախմբերի ակտիվ գործողություններով։
- Ըստ դատարանում հետազոտված ապացույցների և մասնավորապես՝ տուժողների ու վկաների ցուցմունքների, ինչպես նաև դեպքի վայրի զննության արձանագրության՝ ՀՀ ներքին գործերի նախարարության ոստիկանության պարեկային ծառայության Երևան քաղաքի գնդի 1-ին գումարտակի 2-րդ վաշտի կրտսեր պարեկ Հովհաննես Սուրենի Հարությունյանը և նույն վաշտի ավագ պարեկ Կարեն Դերենիկի Խաչատրյանը Երևան քաղաքի Ռուսթավելու փողոցի թիվ 49 հասցե են եկել այդ տան բակում վիճաբանության վերաբերյալ ստացված ահազանգի հիման վրա և մուտք գործելով տան բակ, Վահան Պապիկյանի վրա ու գետնին նկատել են արյան հետքեր։ Այսինքն՝ պարեկային ոստիկաններ Հովհաննես Հարությունյանի և Կարեն Խաչատրյանի համար ակնհայտ է եղել, որ ահազանգը կեղծ չէ, և ամենայն հավանականությամբ տեղի է ունեցել վիճաբանություն, հետևաբար գետնին առկա արյան հետքերի կամ առերևույթ «իրավախախման» այլ հետքերի հայտնաբերումը ոչ թե եղել է խուզարկությանը բնորոշ որոնողական, այլ ստացված ահազանգի անմիջական հակազդման, «իրավախախտման» կանխման ու խափանման ուղղությամբ պարեկային կարգախմբերի ակտիվ գործողություն։
- Թե պաշտպանն իր եզրափակիչ ելույթում, և թե մեղադրյալն իր ցուցմունքով չեն վկայակոչել հետազոտված ապացույցներից բխող հստակ ու համոզիչ փաստարկներ առ այն, որ պարեկային ոստիկան Հովհաննես Հարությունյանի և Վահան Պապիկյանի վիճաբանությունը կրել է անձնական բնույթ։ Ավելին՝ մեղադրյալին ուղղված հարցին, թե ինչով էր Հովհաննես Հարությունյանի կողմից դեպի տան 2-րդ հարկ տանող աստիճանները գնալը եղել այդքան վիրավորական, մեղադրյալը չտվեց որևէ տրամաբանական պատասխան։
3.2 Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում՝ Դատարանը հաստատված չի համարում այն, որ Վահան Հարությունի Պապիկյանը Երևան քաղաքի Վրացյան փողոցի 90 հասցեում գնվող ՀՀ ներքին գործերի նախարարության ոստիկանության Երևան քաղաքի վարչության Կենտրոնական բաժնում ոտքերով հարվածներ է հասցրել պարեկային ոստիկաններ Հովհաննես Սուրենի Հարությունյանին և Կարեն Դերենիկի Խաչատրյանին, քանի որ նրան մեղսագրված այդ փաստական հանգամանքը չի հաստատվել հիմնական դատալսումների ընթացքում հետազոտված որևէ ապացույցով։ Թեև տուժող Կարեն Խաչատրյանն իր ցուցմունքով նշել է, որ Վահան Պապիկյանին ոստիկանության բաժին տեղափոխելուց հետո նա շարունակել է ագրեսիվ վարքագիծը և հնչեցնել է հայհոյանքներ, այդուհանդերձ վերջինի կողմից իրեն և Հովհաննես Հարությունյանին հարվածներ հասցնելու վերաբերյալ տվյալներ տուժողները չեն հայտնել։
3.3 Հիմնական դատալսումների ընթացքում հետազոտված թույլատրելի ապացույցները գնահատելու արդյունքում Դատարանն արժանահավատ չի համարում վկա Մարինե Էդուարդի Պապիկյանի և մեղադրյալ Վահան Հարությունի Պապիկյանի ցուցմունքներն առ այն, որ Վահան Պապիկյանն իր որևէ խոսքով կամ գործողությամբ չի փորձել միջամտել ոստիկանների օրինական գործողություններին, այդ նպատակով ոստիկանների նկատմամբ բռնություն չի գործադրել և նրա գործողությունները եղել են իր նկատմամբ կիրառված ուժի արդյունք, քանի որ այդ ցուցմունքները հերքվում է ինչպես տուժողների ու մյուս վկաների ցուցմունքներով, այնպես էլ արտավարութային փաստաթուղթ ճանաչված տեսագրություններով։
Մասնավորապես՝
- ՀՀ պարեկային ծառայողներ Կարեն Դերենիկի Խաչատրյանին և Հովհաննես Հարությունյանին ամրակցված տեսանկարահանող սարքերի տեսագրությունների օրվա ժամով՝ 23։10-ի սահմաններում, երևում է, թե ինչպես է Վահան Պապիկյանը պարեկային ծառայող Հովհաննես Հարությունյանին փորձել անընդհատ հրավիրել տան մյուս կողմ, իսկ վերջինի կողմից մերժում ստանալուց հետո հնչեցրել է հայհոյանքներ ու քաշքշել Հովհաննես Հարությունյանին, ով պարբերաբար պահանջել է թողնել իր հագուստը և նշել, որ շարունակելու դեպքում Վահան Պապիկյանը կձերբակալվի:
- Նույն տեսագրությունների օրվա ժամով 23:18-ից 23։22-ն ընկած ժամանակահատվածում Վահան Պապիկյանը հայհոյանքներ է հնչեցնում Հովհաննես Հարությունյանի հասցեին, հարվածում է ինչպես Հովհաննես Հարությունյանին, այնպես էլ գետնին պառկած դիրքից որքերով հարվածներ է հասցնում Կարեն Խաչատրյանին։
- Ավելին՝ վկա Մարինե Էդուարդի Պապիկյանն իր ցուցմունքով նշել է, որ ինքը բարձր ձայներ է լսել ու դուրս գալով տեսել է, որ Վահանի ձեռքերը կապված են, ինչը նշանակում է, որ Վահան Պապիկյանի ձերբակալման պատճառներն այդ պահին վկա Մարինե Պապիկյանին հայտնի չեն եղել, հետևաբար Վահան Պապիկյանի գործողությունների վերաբերյալ նրա ենթադրությունները փաստարկված չեն։
• Այսպիսով՝ Դատարանն արձանագրում է, որ հիմնական դատալսումների ընթացքում հետազոտված՝ դատավճռի 2.1-2.7 և 2.9-2.11 կետերում նշված ապացույցների համակցությունը բացառում է մեղադրական դատավճռի հիմքում դրվող՝ դատավճռի 3.1 կետում նշված յուրաքանչյուր փաստական հանգամանքի ապացուցվածության վերաբերյալ ցանկացած կասկած:
3.4 Լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները.
- Վահան Հարությունի Պապիկյանը նախկինում դատապարտված չի եղել:
- Վահան Հարությունի Պապիկյանը ձերբակալման ընթացքում գլխի շրջանում ստացել է վնասվածք և առավել ագրեսիվ վարքագիծն ու հարվածները սկսվել են դրանից հետո։

4. ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐՆ ՈՒ ՈՐՈՇՈՒՄՆԵՐԸ.
4.1 Դատարանի կողմից հաստատված փաստական հանգամանքների և 2026 թվականի հունվարի 12-ին կայացված մեղադրական վերդիկտի հիման վրա Դատարանն ապացուցված է համարում մեղադրյալ Վահան Հարությունի Պապիկյանին վերագրվող փաստական հանգամանքները՝ արարքը, այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքները կատարելու մեջ, սահմանելով, որ նրան վերագրվող ապացուցված արարքի նկատմամբ ենթակա է կիրառման ՀՀ քրեական օրենսգրքի 452 հոդվածի 3-րդ մասը:
4.2 Վահան Հարությունի Պապիկյանի պատասխանատվությունն ու պատիժը մեղմացնող հանգամանք պետք է դիտել կատարածի համար զղջալը, ինչը որպես մեղավոր անձի հետհանցավոր դրական վարքագիծ, վկայում է այն մասին, որ նա լրիվ գիտակցել է իր արարքի հանրային վտանգավորությունը:
Միևնույն ժամանակ Դատարանն արձանագրում է, որ Վահան Հարությունի Պապիկյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71 հոդվածով նախատեսված հանգամանք է հանցանքն ալկոհոլի ազդեցությամբ կատարելը:
4.3 Կատարած հանցանքի համար մեղադրյալ Վահան Հարությունի Պապիկյանը ենթակա է պատժի։
4.4 Պատժի տեսակն ու չափը, ինչպես նաև այն կրելու նպատակահարմարությունը որոշելիս Դատարանը, հաշվի է առնում հետևյալ հանգամանքները՝
- Վահան Պապիկյանի կատարած հանցանքի հանգամանքները, մասնավորապես այն, որ Վահան Պապիկյանի վարքագիծը էապես փոխվել է ձերբակալման ընթացքում գլխի շրջանում ստացած արնահոսող վնասվածքից հետո, ինչը ողջամտորեն կարող էր անձին դարձնել առավել ագրեսիվ ու անհանդուրժող։
- Տուժողներ Հովհաննես Հարությունյանն ու Կարեն Խաչատրյանը մեղադրյալի դեմ որևէ բողոք չեն ներկայացրել։
- Դատարանը հաշվի է առնում նաև Վահան Պապիկյանի պատասխանատվությունը մեղմացնող ու ծանրացնող հանգամանքները, ինչպես նաև մեղադրյալի անձը՝ մասնավորապես այն, որ նա ներողություն է խնդրել իր կատարածի համար, անկեղծորեն զղջացել, նախկինում դատապարտված չի եղել և դեպքից հետո դրսևորել է իրավահպատակ վարքագիծ։
4.5 Այսպիսով, Դատարանը գտնում է, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներն ապահովելու համար Վահան Հարությունի Պապիկյանի կողմից կատարված հանցագործության բնույթին, վտանգավորության աստիճանին, այն կատարելու հանգամանքներին, ինչպես նաև հանցավորի անձին համաչափ պատիժ է՝ 2 (երկու) տարի 6 (վեց) ամիս ժամկետով ազատազրկումը։
• ՀՀ քրեական օրենսգրքի 79 հոդվածի 3-րդ մասի կիրառմամբ Վահան Պապիկյանի պատժի ժամկետին պետք է հաշվակցել սույն քրեական գործով՝ 2024 թվականի օգոստոսի 20-ից մինչև օգոստոսի 22-ը փաստացի անազատության մեջ գտնվելու (ձերբակալված լինելու) 2 (երկու) օրը, և վերջնական պատիժ թողնել ազատազրկում՝ 2 (երկու) տարի 5 (հինգ) ամիս 28 (քսանութ) օր ժամկետով։
• Միևնույն ժամանակ, Դատարանն արձանագրում է, որ կատարած հանցանքի համար Վահան Պապիկյանի նկատմամբ լրացուցիչ պատիժ նշանակելու հիմքերն ու անհրաժեշտությունը տվյալ դեպքում բացակայում են։
4.6 Դատավճռի «4.4» կետում թվարկված հանգամանքների պայմաններում Դատարանը գտնում է, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներին հնարավոր է հասնել նաև առանց Վահան Պապիկյանի կողմից ազատազրկման ձևով պատիժը փաստացի կրելու:
Այսպիսով՝ Վահան Հարությունի Պապիկյանի նկատմամբ նշանակված պատիժը ՀՀ քրեական օրենսգրքի 84 հոդվածի կիրառմամբ պետք է պայմանականորեն չկիրառել՝ սահմանելով փորձաշրջան՝ 3 (երեք) տարի ժամկետով։
Փորձաշրջանի ընթացքում Վահան Պապիկյանի նկատմամբ պետք է նշանակել հետևյալ պարտականությունները՝
• առանց իր վարքագծի նկատմամբ վերահսկողություն իրականացնող իրավասու մարմնի համաձայնության չլքել Հայաստանի Հանրապետության տարածքը,
• բնակության վայրը փոխելու դեպքում իր վարքագծի նկատմամբ վերահսկողություն իրականացնող իրավասու մարմնին սեղմ ժամկետում հայտնել նոր բնակության վայրի հասցեն։
4.7 Դատարանն արձանագրում է, որ ՀՀ քրեական դատավարության օրենսգրքի 348 հոդվածի 1-ին մասի 11-րդ կետով նշված հարցին անդրադառնալու անհրաժեշտությունը բացակայում է, քանի որ տուժողներ Հովհաննես Հարությունյանն ու Կարեն Խաչատրյանը, հնարավորություն ունենալով Դատարանում պաշտպանելու իրենց շահերը, մեղադրյալ Վահան Պապիկյանի դեմ բողոք կամ պահանջ չեն ներկայացրել։
4.8 ՀՀ քրեական դատավարության օրենսգրքի 348 հոդվածի 1-ին մասի 12-14-րդ կետերով նախատեսված հարցերին անդրադառնալու անհրաժեշտությունը սույն քրեական գործով ևս բացակայում է։
4.9 Վահան Հարությունի Պապիկյանի նկատմամբ կիրառված խափանման միջոցը՝ Հայաստանի Հանրապետությունից բացակայելու արգելքը, պետք է թողնել անփոփոխ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար։
4.10 ՀՀ քրեական դատավարության օրենսգրքի 167 հոդվածի 1-ին մասի 1-6-րդ կետերով նախատեսված վարութային ծախսեր սույն քրեական գործով առկա չեն, իսկ 7-րդ կետով նախատեսված ծախսերի վերաբերյալ տվյալները բացակայում են: Ավելին՝ այդ վարութային ծախսերի հատուցման պահանջ Դատարանին չի ներկայացվել, որպիսի պայմաններում վարութային ծախսերի հարցը պետք է համարել լուծված։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 167, 276, 347, 348, 349 և 364 հոդվածներով՝ Դատարանը

Վ Ճ Ռ Ե Ց

1. Վահան Հարությունի Պապիկյանին մեղավոր ճանաչել ՀՀ քրեական օրենսգրքի 452 հոդվածի 3-րդ մասով նախատեսված հանցանքը կատարելու մեջ և նրա նկատմամբ պատիժ նշանակել ազատազրկում՝ 2 (երկու) տարի 6 (վեց) ամիս ժամկետով։
2. Պատժի ժամկետին հաշվակցել Վահան Պապիկյանի՝ 2024 թվականի օգոստոսի 20-ից մինչև օգոստոսի 22-ը փաստացի անազատության մեջ գտնվելու (ձերբակալված լինելու) 2 (երկու) օրը, և վերջնական պատիժ թողնել ազատազրկում՝ 2 (երկու) տարի 5 (հինգ) ամիս 28 (քսանութ) օր ժամկետով:
3. Նշանակված պատիժը պայմանականորեն չկիրառել՝ սահմանելով փորձաշրջան՝ 3 (երեք) տարի ժամկետով։
Փորձաշրջանի ընթացքում Վահան Պապիկյանի նկատմամբ նշանակել հետևյալ պարտականությունները՝
• առանց իր վարքագծի նկատմամբ վերահսկողություն իրականացնող իրավասու մարմնի համաձայնության չլքել Հայաստանի Հանրապետության տարածքը,
• բնակության վայրը փոխելու դեպքում իր վարքագծի նկատմամբ վերահսկողություն իրականացնող իրավասու մարմնին սեղմ ժամկետում հայտնել նոր բնակության վայրի հասցեն։
4. Վահան Պապիկյանի նկատմամբ կիրառված խափանման միջոցը՝ Հայաստանի Հանրապետությունից բացակայելու արգելքը, թողնել անփոփոխ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը:
Դատավճիռը վերաքննության կարգով կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում:



ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ



(1)
(2) Տե՛ս, քրեական գործ, հատոր 1, թերթեր 38-45ա, 45բ:
(3) Տե՛ս, քրեական գործ, հատոր 1, թերթեր 78:
(4) Տե՛ս, քրեական գործ, հատոր 1, թերթեր 79:
(5) Տե՛ս, քրեական գործ, հատոր 1, թերթեր 7-9:
(6) Տե՛ս, քրեական գործ, հատոր 1, թերթեր 78ա, 79ա, 80-88, 228-229:
(7) Տե՛ս Դատարանում ստեղծված նյութերը:
(8) Տե՛ս, քրեական գործ, հատոր 1, թերթեր 7-9:
(9) Տե՛ս քրեական գործ, հատոր 1, թերթ 117-118: