ԵԴ1/0431/01/25

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ
Երևան քաղաքի առաջին ատյանի
ընդհանուր իրավասության
քրեական դատարանը (այսուհետ՝ նաև Դատարան)
նախագահող դատավոր Ա.Ասատրյան
դատական նիստի քարտուղար Ս.Սիմոնյան
մասնակցությամբ`
հանրային մեղադրող Վ.Հարությունյանի
պաշտպան Կ.Գաբոյանի
մեղադրյալ Վ.Լոռեցյանի

2025 թվականի մայիսի 19-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի` Վահան Համլետի Լոռեցյանի (ծնված՝ 1980 թվականի մայիսի 16-ին, հայ, ՀՀ քաղաքացի, հասցե՝ ք.Երևան, Լենինգրադյան փողոց, 22-րդ շենք, 10-րդ բնակարան)՝ ՀՀ քրեական օրենսգրքի 328-րդ հոդվածի 3-րդ մասի 3-րդ կետով
Պ Ա Ր Զ Ե Ց
1. Գործի դատավարական նախապատմությունը.
2025 թվականի փետրվարի 5-ին Երևան քաղաքի առաջին ատյանի ընդհանուր իրավասության քրեական դատարան է ստացվել թիվ 59109823 քրեական գործն ըստ մեղադրանքի Վահան Լոռեցյանի՝ ՀՀ քրեական օրենսգրքի 328-րդ հոդվածի 3-րդ մասի 3-րդ կետով: Քրեական գործին շնորհվել է թիվ ԵԴ1/0431/01/25 համարը:
2025 թվականի փետրվարի 7-ին որոշում է կայացվել Վահան Լոռեցյանի վերաբերյալ թիվ ԵԴ1/0431/01/25 քրեական գործով՝ վարույթ ստանձնելու և նախնական դատալսումներ նշանակելու մասին:
Նախնական դատալսումների ընթացքում Դատարանը, անդրադառնալով ՀՀ քրեական դատավարության օրենսգրքի 316-րդ հոդվածով նախատեսված հարցին, որոշում է կայացրել մեղադրյալի նկատմամբ մինչդատական վարույթի ընթացքում ընտրված խափանման միջոցը` բացակայելու արգելքը, անփոփոխ թողնելու մասին:
2. Մեղադրանքի փաստական նկարագրությունը.
Վահան Լոռեցյանին ՀՀ քրեական օրենսգրքի 328-րդ հոդվածի 3-րդ մասի 3-րդ կետով մեղադրանք է ներկայացվել այն բանի համար, որ նա «2023 թվականի սեպտեմբերի 20-ին «facebook.com» սոցիալական ցանցի «gorciqneri.varcuyt» նույնականացման տվյալներով «Վահան Լորեցյան» անվամբ գրանցված անհատական էջում հրապարակել է բռնություն գործադրելով զանգվածային անկարգություններ կատարելու հրապարակային կոչ պարունակող գրառումներ:
Այսպես.
Լեռնային Ղարաբաղի ժողովրդի նկատմամբ Ադրբեջանի կողմից 2023 թվականի սեպտեմբերի 19-ին 9-ին սանձազերծված լայնածավալ ագրեսիայի կապակցությամբ, 2023 թվականի սեպտեմբերի 20-ին Կառավարական տուն 1 հասցեի դիմաց տեղի ունեցող բողոքի ակցիային հասարակության բազմաթիվ անդամների մասնակցություն ապահովելու նպատակով, Հայաստանի Հանրապետությունում տիրող քաղաքական սուր իրադրության պայմաններն ու հասարակության անդամների հոգեբանական գերլարված և հուզական վիճակն օգտագործելով՝ Վահան Համլետի Լոռեցյանը 2023 թվականի սեպտեմբերի 20-ին, հաղորդակցական տեխնոլոգիաների օգտագործմամբ՝ «facebook.com» սոցիալական ցանցի «gorciqneri varcuyt» նույնականացման տվյալներով «Վահան Լորեցյան» անվամբ գրանցված անհատական էջում հրապարակել է բռնություն գործադրելով զանգվածային անկարգություններ կատարելու հրապարակային կոչ պարունակող գրառումներ, որոնք արտահայտվել են հետևյալում. «Որքան շատ մարդ գա հրապարակ այնքան լավ: Իսկ ով փորձում է ցրել, տեղում սատկացնել: Մարդիկ եթե հրապարակը լցվի, հավատացեք ամեն բան կփոխվի: Անկախ ամեն ինչից ով կցրի ցույցը, չլսեք, եկեք հրապարակ: Ոչ նախկին եմ, ոչ ներկա: Ով հրապարակից մարդկանց ցրի բոզի տղա է։ Մարդիկ ով ցրի՝ գլուխը տեղում ջարդել»»։
3. Արագացված վարույթը և լրացուցիչ դատալսումների ընթացքում հետազոտված թույլատրելի ապացույցները.
Նախնական դատալսումների ընթացքում մեղադրյալ Վահան Լոռեցյանը ներկայացրեց արագացված վարույթ կիրառելու մասին միջնորդություն՝ հայտնելով, որ իրեն պարզ է ներկայացված մեղադրանքը, ամբողջությամբ համաձայն է ներկայացված մեղադրանքի հետ, միջնորդությունը ներկայացրել է կամավոր, մինչև միջնորդությունը ներկայացնելը խորհրդակցել է իր պաշտպանի հետ, գիտակցում է արագացված վարույթ կիրառելու հետևանքները և պնդում է ներկայացված միջնորդությունը:
Պաշտպան Կ.Գաբոյանը միացավ մեղադրյալի միջնորդությանը:
Հանրային մեղադրող Վ.Հարությունյանը չառարկեց արագացված վարույթ կիրառելու դեմ:
Դատարանը, համոզվելով, որ առկա է ՀՀ քրեական դատավարության օրենսգրքի 464.1 հոդվածի 1-ին մասով նախատեսված հիմքը, բացակայում են ՀՀ քրեական դատավարության օրենսգրքի 464.1 հոդվածի 2-րդ մասով նախատեսված` արագացված վարույթի կիրառումը բացառող հանգամանքները, բավարարեց արագացված վարույթ կիրառելու մասին միջնորդությունը և որոշում կայացրեց լրացուցիչ դատալսումներ անցկացնելու մասին:
Լրացուցիչ դատալսումների ընթացքում հետազոտվել են հետևյալ թույլատրելի ապացույցները.
- ՀՀ ոստիկանության ինֆորմացիոն կենտրոնի օպերատիվ տեղեկատու քարտադարանի ձև 8 և ձև 9 տեղեկանքները, բժշկական փաստաթղթերի պատճեները, բնութագիրը, Աջափնյակ վարչական շրջանի համատիրության կողմից տրված տեղեկանքը:
4. Դատարանի փաստական վերլուծությունները և հաստատված կամ հերքված փաստական հանգամանքները.
Լրացուցիչ դատալսումների ընթացքում հետազոտված թույլատրելի ապացույցները, ինչպես նաև գործով կազմված մեղադրական եզրակացության մեջ պարունակվող տվյալները վերլուծելու և գնահատելու արդյունքում Դատարանը հաստատված է համարում սույն քրեական գործի լուծման համար նշանակություն ունեցող հետևյալ փաստական հանգամանքները.
- Վահան Լոռեցյանը նախկինում դատապարտված չի եղել,
- Վահան Լոռեցյանը բնութագրվում է դրականորեն,
- Վահան Լոռեցյանի խնամքին են առողջական խնդիրներ ունեցող մայրը և հաշմանդամություն ունեցող եղբայրը,
- ներկայացված մեղադրանքում Վահան Լոռեցյանն իրեն լիովին մեղավոր է ճանաչել, զղջացել է կատարածի համար, տվել է խոստովանական ցուցմունք։
5. Դատարանի իրավական վերլուծությունները, հետևությունները և որոշումները.
Արագացված վարույթ կիրառելու պայմաններում Դատարանն ապացուցված է համարում մեղադրյալ Վահան Լոռեցյանին վերագրվող փաստական հանգամանքները (արարքը), այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, ինչպես նաև գտնում է, որ մեղադրյալի արարքի նկատմամբ պետք է կիրառվի ՀՀ քրեական օրենսգրքի 328-րդ հոդվածի 3-րդ մասի 3-րդ կետը։
Դատարանի կողմից հաստատված փաստական հանգամանքների հիման վրա Դատարանը գտնում է, որ Վահան Լոռեցյանի անձը բնութագրող հանգամանք է նախկինում դատապարտված չլինելը, դրականորեն բնութագրվելը:
Դատարանը ղեկավարվելով ՀՀ քրեական օրենսգրքի 70-րդ հոդվածի 1-ին մասի 4-րդ կետով, գտնում է, որ Վահան Լոռեցյանի պատասխանատվությունն ու պատիժը մեղմացնող հանգամանք է՝ պատիժ նշանակելու պահին վերջինի խնամքի տակ առողջական խնդիրներ ունեցող մոր և հաշմանդամություն ունեցող եղբոր առկայությունը:
Դատարանը, ղեկավարվելով ՀՀ քրեական օրենսգրքի 70-րդ հոդվածի 2-րդ մասով, գտնում է, որ Վահան Լոռեցյանի պատասխանատվությունն ու պատիժը մեղմացնող հանգամանք պետք է դիտել՝ ներկայացված մեղադրանքում իրեն լիովին մեղավոր ճանաչելը, կատարածի համար զղջալը, խոստովանական ցուցմունք տալը։
Դատարանը, ղեկավարվելով ՀՀ քրեական օրենսգրքի 71-րդ հոդվածի 1-ին մասով, գտնում է, որ Վահան Լոռեցյանի պատասխանատվությունն ու պատիժը ծանրացնող հանգամանք առկա չէ:
Դատարանը գտնում է, որ կատարած հանցանքի համար մեղադրյալ Վահան Լոռեցյանը ենթակա է պատժի։
Դատարանը, հաշվի առնելով Վահան Լոռեցյանի կատարած հանցագործության բնույթը և հանրության համար վտանգավորության աստիճանը, նրա կատարած կոնկրետ գործողությունները, նրա անձը բնութագրող տվյալները, պատասխանատվությունը և պատիժը մեղմացնող հանգամանքները, ծանրացնող հանգամանքների բացակայությունը, ՀՀ քրեական օրենսգրքի 69-րդ հոդվածի 2-րդ մասում թվարկված մյուս հանգամանքները, գտնում է, որ ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակներն ապահովելու համար ՀՀ քրեական օրենսգրքի 328-րդ հոդվածի 3-րդ մասի 3-րդ կետով նախատեսված հանցանքի կատարման համար նրա նկատմամբ պատիժ պետք է նշանակել ազատազրկում՝ 2 (երկու) տարի ժամկետով:
Դատարանը միաժամանակ գտնում է, որ Վահան Լոռեցյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են։
Անդրադառնալով մեղադրյալ Վահան Լոռեցյանի կողմից իր նկատմամբ ազատազրկման ձևով նշանակված պատիժը կրելու հարցին՝ Դատարանը հարկ է համարում նշել հետևյալը.
ՀՀ քրեական օրենսգրքի 84-րդ հոդվածի համաձայն՝
«1. Եթե դատարանը հանցանք կատարած անձի նկատմամբ կարճաժամկետ ազատազրկման, կարգապահական գումարտակում պահելու կամ ազատազրկման ձևով պատիժ նշանակելիս հանգում է հետևության, որ պատժի նպատակների իրականացումը հնարավոր է առանց պատիժը կրելու, ապա կարող է որոշում կայացնել այդ պատիժը պայմանականորեն չկիրառելու մասին:
(...)
4. Պատիժը պայմանականորեն չկիրառելու վերաբերյալ որոշում կայացնելիս դատարանը պետք է հաշվի առնի հետևյալ հանգամանքները.
1) անձին մեղսագրվող հանցանքի բնույթն ու վտանգավորությունը,
2) պատիժը մեղմացնող և ծանրացնող հանգամանքները,
3) հանցանք կատարածի անձը,
4) պատճառած վնասը հատուցելու կամ այլ կերպ հարթելու պահանջի բացակայությունը կամ այն հատուցած կամ այլ կերպ հարթած լինելու հանգամանքը, եթե հանցագործությամբ վնաս է պատճառվել:
(...)»։
Մեղադրյալ Վահան Լոռեցյանի կողմից իր նկատմամբ նշանակված պատիժը կրելու հարցը լուծելիս Դատարանը հաշվի է առնում հետևյալ հանգամանքները՝
- Վահան Լոռեցյանի կատարած հանցանքը դասվում է միջին ծանրության հանցագործությունների շարքին,
- Վահան Լոռեցյանի անձը բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը,
- Վահան Լոռեցյանի կողմից իր նկատմամբ նշանակված պատիժը ռեալ կրելու դեպքում այն կարող է բացասական ազդեցություն ունենալ նրա ընտանիքի կյանքի պայմանների վրա, հաշվի առնելով, որ վերջինի խնամքին են գտնվում՝ առողջական խնդիրներ ունեցող մայրը և հաշմանդամություն ունեցող եղբայրը:
Վերոգրյալ հանգամանքների հաշվառմամբ Դատարանը գտնում է, որ ՀՀ քրեական օրենսգրքի 55-րդ հոդվածի 2-րդ մասով սահմանված պատժի նպատակների իրականացումը հնարավոր է առանց Վահան Լոռեցյանի կողմից իր նկատմամբ ազատազրկման ձևով նշանակված պատիժը կրելու, հետևաբար՝ ՀՀ քրեական օրենսգրքի 84-րդ հոդվածի կիրառմամբ այդ պատիժը պետք է պայմանականորեն չկիրառել։
Դատարանն արձանագրում է, որ մեղադրյալի կատարած արարքի հանրային վտանգավորության աստիճանի նվազեցման և պատժի նպատակների իրագործման տեսանկյունից պատիժը փաստացի կրելու անհրաժեշտության բացակայության մասին է վկայում այն, որ առաջադրված մեղադրանքում մեղադրյալն իրեն մեղավոր է ճանաչել, զղջացել է կատարած արարքի համար։
Միաժամանակ Դատարանը հարկ է համարում նշել, որ ՀՀ քրեական օրենսգրքի 84-րդ հոդվածի կիրառումը սահմանափակված չէ հանցագործության տեսակով, հանցավոր արարքի վտանգավորության աստիճանով ու բնույթով, ինչպես նաև անձանց շրջանակով, իսկ մեղադրյալի նկատմամբ նշանակված պատիժը պայմանականորեն չկիրառելու իրավաչափության կապակցությամբ վկայակոչված վերը նշված հանգամանքների համակցությունը բավարար է հանգելու հիմնավոր եզրակացության, որ նրա ուղղումը հնարավոր է առանց նշանակված պատիժը կրելու:
ՀՀ քրեական օրենսգրքի 84-րդ հոդվածի կիրառմամբ Վահան Լոռեցյանի նկատմամբ նշանակված պատիժը պայմանականորեն չկիրառելու պայմաններում Դատարանը գտնում է, որ նրա նկատմամբ պետք է սահմանել փորձաշրջան` 2 (երկու) տարի ժամկետով՝ փորձաշրջանի ընթացքում նրա վրա դնելով պարտականություններ՝
-առանց վարքագծի նկատմամբ վերահսկողություն իրականացնող իրավասու մարմնի համաձայնության չլքել Հայաստանի Հանրապետության տարածքը,
-բնակության վայրը փոխելու դեպքում վարքագծի նկատմամբ վերահսկողություն իրականացնող իրավասու մարմնին սեղմ ժամկետում հայտնել նոր բնակության վայրի հասցեն։
Դատարանը գտնում է, որ Վահան Լոռեցյանի նկատմամբ ընտրված խափանման միջոցը` բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը:
Դատարանն արձանագրում է, որ ՀՀ քրեական դատավարության օրենսգրքի 348-րդ հոդվածի 1-ին մասի 11-14-րդ հարցերին անդրադառնալու անհրաժեշտությունը սույն քրեական գործով բացակայում է։
Դատարանը գտնում է, որ վարութային ծախսերի հարցը պետք է համարել լուծված, քանի որ արագացված վարույթ կիրառելու պայմաններում ՀՀ քրեական դատավարության օրենսգրքի 167-րդ հոդվածի 1-ին մաuով նախատեսված վարութային ծախսերը մեղադրյալ Վահան Լոռեցյանից ենթակա չեն բռնագանձման՝ համաձայն ՀՀ քրեական դատավարության օրենսգրքի 464.4 հոդվածի 3-րդ մասի։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 276-րդ, 347-349-րդ, 464.4 և 464.5 հոդվածներով՝ Դատարանը
Վ Ճ Ռ Ե Ց
Վահան Համլետի Լոռեցյանին մեղավոր ճանաչել ՀՀ քրեական օրենսգրքի 328-րդ հոդվածի 3-րդ մասի 3-րդ կետով և նրա նկատմամբ պատիժ նշանակել՝ ազատազրկում 2 (երկու) տարի ժամկետով:
ՀՀ քրեական օրենսգրքի 84-րդ հոդվածի կիրառմամբ՝ Վահան Համլետի Լոռեցյանի նկատմամբ ազատազրկման ձևով նշանակված պատիժը պայմանականորեն չկիրառել՝ սահմանելով փորձաշրջան՝ 2 (երկու) տարի ժամկետով:
Փորձաշրջանի ընթացքում Վահան Համլետի Լոռեցյանի վրա դնել պարտականություններ՝ բնակության վայրը փոխելու դեպքում ՀՀ ԱՆ պրոբացիայի ծառայությանը սեղմ ժամկետում հայտնել իր նոր բնակության վայրի հասցեն, առանց ՀՀ ԱՆ պրոբացիայի ծառայության համաձայնության չլքել Հայաստանի Հանրապետության տարածքը:
Վահան Համլետի Լոռեցյանի նկատմամբ ընտրված խափանման միջոցը` բացակայելու արգելքը թողնել անփոփոխ՝ մինչև դատավճռի օրինական ուժի մեջ մտնելը:
Վարութային ծախսերի հարցը համարել լուծված:
Դատավճիռը կարող է բողոքարկվել վերաքննիչ քրեական դատարան ստանալու օրվանից հետո՝ մեկամսյա ժամկետում, բացառությամբ ՀՀ քրեական դատավարության օրենսգրքի 373-րդ հոդվածով և 375-րդ հոդվածի 1-3-րդ մասերով նախատեսված հիմքերով:


ԴԱՏԱՎՈՐ ԱՐԱՄԱՅԻՍ ԱՍԱՏՐՅԱՆ