ԵԴ1/0418/01/25

Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

10 փետրվարի 2025թ․ ք.Երևանում

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)՝ նախագահությամբ դատավոր Մ․Արամյանի, քարտուղարությամբ Մ.Պողոսյանի, գրավոր ընթացակարգով, համաձայնությամբ տուգանք նշանակելու վարույթի կիրառմամբ, քննելով քրեական գործն ըստ մեղադրանքի Արսեն Նորայրի Մարգարյանի /ծնված 29.08.1988թ, ազգությամբ հայ, ՀՀ քաղաքացի, միջնակարգ կրթությամբ, ամուսնացած, աշխատում է «ՄԵԿ» կահույքի սրահում, որպես արհեստավոր, բնակվող՝ քաղաք Երևան Նորագյուղ 76/1, նախկինում չդատված/ ՀՀ քրեական օրենսգրքի 396-րդ հոդվածի 1-ին մասով և Սերյոժա Հայկի Մանուկյանի /ծնված 15.03.1993թ, ազգությամբ հայ, ՀՀ քաղաքացի, միջնակարգ կրթությամբ, չամուսնացած, աշխատում է «Գրանտ Տոբակո» ՍՊԸ-ում որպես օդորակման սարքավորումների մասնագետ, բնակվող՝ քաղաք Երևան Սարի Թաղ 3-րդ փողոց 11-րդ տուն, նախկինում չդատված/ ՀՀ քրեական օրենսգրքի 396-րդ հոդվածի 1-ին մասով,

Պ Ա Ր Զ Ե Ց

Դատավճռի նկարագրական մաս․
2024 թվականի հունիսի 03-ին ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնում ՀՀ քրեական օրենսգրքի 393-րդ հոդվածի 1-ին մասով նախաձեռնվել է թիվ 12-0519-24 քրեական վարույթը:
2025 թվականի հունվարի 31-ին որոշում է կայացվել Սերյոժա Հայկի Մանուկյանի նկատմամբ ՀՀ քրեական օրենսգրքի 396-րդ հոդվածի 1-ին մասով նախատեսված հանցանքի կատարման համար հանրային քրեական հետապնդում հարուցելու մասին, և նույն օրը ներկայացվել է մեղադրյալին։
2025 թվականի հունվարի 31-ի որոշմամբ Արսեն Նորայրի Մարգարյանի նկատմամբ քրեական հետապնդում է հարուցվել ՀՀ քրեական օրենսգրքի 396-րդ հոդվածի 1-ին մասով և նույն օրը ներկայացվել է մեղադրյալին:
2024 թվականի հունիսի 05-ին Սերյոժա Մանուկյանի նկատմամբ խափանման միջոց է ընտրվել տնային կալանքը, որից հետո 2024 թվականի հուլիսի 30-ին վերջինս նկատմամբ ընտրվել է բացակայելու արգելք խափանման միջոցը։
2024 թվականի հունիսի 05-ին Արսեն մարգարյանի նկատմամբ ընտրվել է խափանման միջոց բացակայելու արգելքը։
2025 թվականի փետրվարի 04-ին ՀՀ Էրեբունի և Նուբարաշեն վարչական շրջանների դատախազությունից Երևան քաղաքի առաջին ատյանի ընդհանուր իրավասության քրեական դատարան է ստացվել թիվ 12-0519-24 նախաքննական համարով քրեական գործն ըստ մեղադրանքի՝ Սերյոժա Հայկի Մանուկյանի ՀՀ քրեական օրենսգրքի 396-րդ հոդվածի 1-ին մասով և Արսեն Նորայրի Մարգարյանի ՀՀ քրեական օրենսգրքի 396-րդ հոդվածի 1-ին մասով։
2025 թվականի փետրվարի 04-ին դատավորների միջև գործերի բաշխման էլեկտրոնային մակագրության համակարգի միջոցով թիվ ԵԴ1/0418/01/25 քրեական գործը մակագրվել է ինձ:
Գործը ինձ է հանձնվել 2025 թվականի փետրվարի 05-ին։
Սերյոժա Հայկի Մանուկյանին մեղադրանք է առաջադրվել հանրորեն վտանգավոր այն արարքների կատարման համար, որ նա «Արսեն Նորայրի Մարգարյանի հետ, առանց իրացնելու նպատակի, ապօրինի ձեռք է բերել և պահել զգալի չափերով` ընդհանուր 2.8 գրամ հաստատուն չոր քաշով «Մարիխուանա» և 0.21 գրամ քաշով «Մեթամֆետամին» տեսակի թմրամիջոցներ:
Այսպես.
Սերյոժա Հայկի Մանուկյանը և Արսեն Նորայրի Մարգարյանը, խախտելով «Թմրամիջոցների և հոգեմետ (հոգեներգործուն) նյութերի մասին» ՀՀ օրենքի 11-րդ հոդվածի 2-րդ կետի, ՀՀ Կառավարության 2010 թվականի մարտի 18-ի թիվ 270-Ն որոշման պահանջները, այն է` չունենալով բժշկական նպատակներով կամ բժշկի նշանակմամբ թմրամիջոցների և հոգեմետ /հոգեներգործուն/ նյութերի շրջանառություն իրականացնելու` թմրամիջոց ձեռք բերելու և պահելու թույլտվություն, առանց իրացնելու նպատակի, 2024 թվականի հունիսի 2-ին «Տելեգրամ» հավելվածում «GRISELDA» անվամբ գրանցված և դեռևս ինքնությունը չպարզված օգտատիրոջից 10.800 ՀՀ դրամ գումարով հանցավոր միասնական դիտավորությամբ ապօրինի ձեռք է բերել և մեկը մյուսի գործողությունները փոխլրացնելով 2024 թվականի հունիսի 3-ին անձնական օգտագործման համար ապօրինի պահել է ՀՀ կառավարության 2018 թվականի հունիսի 27-ի թիվ 707–Ն որոշման 1-ին հավելվածով սահմանված, զգալի չափերով «Մարիխուանա» տեսակի թմրամիջոց հանդիսացող՝ ընդհանուր 2.8 գրամ հաստատուն չոր քաշով բուսական զանգված և զգալի չափերով «Մեթամֆետամին» տեսակի թմրամիջոց հանդիսացող՝ ընդհանուր 0.21 գրամ քաշով բյուրեղանման զանգված, որոնք 2024 թվականի հունիսի 3-ին հայտնաբերվել և վերցվել են Երևան քաղաքի Արին Բերդ փողոցի 109 հասցեի հարակից տարածքում՝ պարեկային ծառայողների կողմից Սերյոժա Մանուկյանին և Արսեն Մարգարյանին մոտենալու ընթացքում Սերյոժա Մանուկյանի կողմից նախապես գցված վայրում կատարված դեպքի վայրի զննությամբ:
Այսինքն, Սերյոժա Հայկի Մանուկյանին մեղսագրվում է ՀՀ քրեական օրենսգրքի 396-րդ հոդվածի 1-ին մասով նախատեսված հանրորեն վտանգավոր արարքի կատարում»:
Արսեն Նորայրի Մարգարյանին մեղադրանք է առաջադրվել հանրորեն վտանգավոր այն արարքների կատարման համար, որ նա «Սերյոժա Հայկի Մանուկյանի հետ, առանց իրացնելու նպատակի, ապօրինի ձեռք է բերել և պահել զգալի չափերով` ընդհանուր 2.8 գրամ հաստատուն չոր քաշով «Մարիխուանա» և 0.21 գրամ քաշով «Մեթամֆետամին» տեսակի թմրամիջոցներ:
Այսպես.
Արսեն Նորայրի Մարգարյանը և Սերյոժա Հայկի Մանուկյանը, խախտելով «Թմրամիջոցների և հոգեմետ (հոգեներգործուն) նյութերի մասին» ՀՀ օրենքի 11-րդ հոդվածի 2-րդ կետի, ՀՀ Կառավարության 2010 թվականի մարտի 18-ի թիվ 270-Ն որոշման պահանջները, այն է` չունենալով բժշկական նպատակներով կամ բժշկի նշանակմամբ թմրամիջոցների և հոգեմետ /հոգեներգործուն/ նյութերի շրջանառություն իրականացնելու` թմրամիջոց ձեռք բերելու և պահելու թույլտվություն, առանց իրացնելու նպատակի, 2024 թվականի հունիսի 2-ին «Տելեգրամ» հավելվածում «GRISELDA» անվամբ գրանցված և դեռևս ինքնությունը չպարզված օգտատիրոջից 10.800 ՀՀ դրամ գումարով հանցավոր միասնական դիտավորությամբ ապօրինի ձեռք է բերել և մեկը մյուսի գործողությունները փոխլրացնելով 2024 թվականի հունիսի 3-ին անձնական օգտագործման համար ապօրինի պահել է ՀՀ կառավարության 2018 թվականի հունիսի 27-ի թիվ 707–Ն որոշման 1-ին հավելվածով սահմանված, զգալի չափերով «Մարիխուանա» տեսակի թմրամիջոց հանդիսացող՝ ընդհանուր 2.8 գրամ հաստատուն չոր քաշով բուսական զանգված և զգալի չափերով «Մեթամֆետամին» տեսակի թմրամիջոց հանդիսացող՝ ընդհանուր 0.21 գրամ քաշով բյուրեղանման զանգված, որոնք 2024 թվականի հունիսի 3-ին հայտնաբերվել և վերցվել են Երևան քաղաքի Արին Բերդ փողոցի 109 հասցեի հարակից տարածքում՝ պարեկային ծառայողների կողմից Սերյոժա Մանուկյանին և Արսեն Մարգարյանին մոտենալու ընթացքում Սերյոժա Մանուկյանի կողմից նախապես գցված վայրում կատարված դեպքի վայրի զննությամբ:
Այսինքն, Արսեն Նորայրի Մարգարյանին մեղսագրվում է ՀՀ քրեական օրենսգրքի 396-րդ հոդվածի 1-ին մասով նախատեսված հանրորեն վտանգավոր արարքի կատարում»:

Համաձայնությամբ տուգանք նշանակելու վարույթ կիրառելու հիմքերը.
Ըստ գործի նյութերի Սերյոժա Մանուկյանը և Արսեն Մարգարյանը առաջին անգամ կատարել են ոչ մեծ ծանրության հանցանք (հիմք՝ ՀՀ ոստիկանության ինֆորմացիոն կենտրոն օպերատիվ տեղեկատու քարտադարանից ստացված ձև 8 տեղեկանքը և հանրային քրեական հետապնդում հարուցելու մասին որոշումը)։ Գործում առկա է հսկող դատախազի գրավոր համաձայնությունը մեղադրյալներին համաձայնությամբ տուգանք նշանակելու վարույթ կիրառելու հնարավորության և իրավական հետևանքների մասին գրավոր ծանուցելու, մեղադրյալների դիրքորոշումը համաձայնությամբ տուգանք նշանակելու վարույթ կիրառելու վերաբերյալ։ Դատարանը նաև փաստում է, որ մեղադրյալները չեն վիճարկում իրենց ներկայացված մեղադրանքի փաստական հիմքն ու իրավական գնահատականը և պաշտպանների մասնակցությամբ կամավոր ցանկություն են հայտնել գործի քննությունը համաձայնությամբ տուգանք նշանակելու վարույթի կարգով իրականացնելու վերաբերյալ։ Քննիչը մեղադրյալների միջնորդության հիման վրա կազմել է համապատասխան արձանագրություններ, որոնք ստորագրված են մեղադրյալների, նրանց պաշտպանների և քննիչների կողմից։ Նման պայմաններում Դատարանը փաստում է, որ առկա է ՀՀ քրեական դատավարության օրենսգրքի 464.6-րդ հոդվածով սահմանված կարգով կազմված և ստորագրված արձանագրություն:
Դատարանը նաև արձանագրում է, որ մեղադրյալները չափահաս են, մեղադրվում են մեկ հանցանք կատարելու համար, մեղսագրվող արարքների համար ՀՀ քրեական օրենսգրքով սահմանված է տուգանք պատժատեսակը, մեղսագրվող արարքներով մասնավոր անձի շահերին վնաս չի պատճառվել, գույքային հայց չի հարուցվել, մեղադրական եզրակացությունը հաստատելիս հսկող դատախազը չի առարկել համաձայնությամբ տուգանք նշանակելու վարույթ կիրառելու դեմ, մեղադրյալները չեն հրաժարվել համաձայնությամբ տուգանք նշանակելու վարույթ կիրառելուց, պահպանված է ՀՀ քրեական դատավարության օրենսգրքի 464.6-րդ հոդվածով սահմանված կարգը:
Այսպիսով` Դատարանն արձանագրում է, որ առկա է համաձայնությամբ տուգանք նշանակելու վարույթ կիրառելու հիմքը, և բացակայում են ՀՀ քրեական դատավարության օրենսգրքի 464.7-րդ հոդվածի 2-րդ մասով նախատեսված համաձայնությամբ տուգանք նշանակելու վարույթի կիրառումը բացառող հանգամանքները:

Դատավճռի պատճառաբանական մաս․
Դատարանի իրավական վերլուծությունը, դատարանի հետևությունները և իրավական հիմնավորումները.
Դատարանը նախ փաստում է, որ առկա չեն ՀՀ քրեական դատավարության օրենսգրքի 464.8-րդ հոդվածի 4-րդ մասով նախատեսված համաձայնությամբ տուգանք նշանակելու վարույթը դադարեցնելու հիմքերը։ Առաջադրված մեղադրանքը մեղադրյալներ՝ Սերյոժա Մանուկյանի և Արսեն Մարգարյանի կողմից ընդունելու և համաձայնությամբ տուգանք նշանակելու վարույթ կիրառելու պայմաններում Դատարանը, գործով ձեռք բերված ապացույցների ընդհանուր կարգով սահմանված հետազոտություն չկատարելով, արձանագրում է, որ Սերյոժա Մանուկյանը և Արսեն Մարգարյանը կատարել են իրենց մեղսագրված հանցանքները, այն ճիշտ է որակված և համապատասխանում է ՀՀ քրեական օրենսգրքի 396-րդ հոդվածի 1-ին մասով նախատեսված հանցագործության հատկանիշներին:
ՀՀ քրեական դատավարության օրենսգրքի 464.9-րդ հոդվածի 1-ին մասի համաձայն՝ «Համաձայնությամբ տուգանք նշանակելու վարույթի արդյունքով դատարանը գրավոր ընթացակարգով կայացնում է մեղադրական դատավճիռ սույն օրենսգրքի 347-350-րդ հոդվածներով սահմանված կարգով` հաշվի առնելով սույն հոդվածով նախատեսված առանձնահատկությունները»:
Հաստատված համարելով մեղադրյալներ՝ Սերյոժա Մանուկյանի և Արսեն Մարգարյանի մեղավորությունն իրենց մեղսագրված հանցանքի կատարման մեջ՝ Դատարանը փաստում է, որ նրա նկատմամբ պետք է պատիժ նշանակել տուգանքի ձևով հաշվի առնելով ՀՀ քրեական օրենսգրքի 77-րդ հոդվածի վերաբերելի դրույթները:
ՀՀ քրեական օրենսգրքի 396-րդ հոդվածի համաձայն՝
/…/ 1. Առանց իրացնելու նպատակի զգալի չափերով թմրամիջոց, հոգեմետ (հոգեներգործուն) նյութ, դրանց պատրաստուկ կամ դրանց համարժեք նյութ (անալոգ) կամ դրանց ածանցյալ կամ պրեկուրսոր ապօրինի արտադրելը, պատրաստելը, վերամշակելը, ձեռք բերելը, պահելը, տեղափոխելը կամ առաքելը՝ պատժվում է տուգանքով՝ առավելագույնը տասնապատիկի չափով, կամ հանրային աշխատանքներով՝ առավելագույնը հարյուր ժամ տևողությամբ, կամ ազատության սահմանափակմամբ՝ առավելագույնը մեկ տարի ժամկետով, կամ կարճաժամկետ ազատազրկմամբ՝ առավելագույնը մեկ ամիս ժամկետով, կամ ազատազրկմամբ՝ առավելագույնը մեկ տարի ժամկետով:
ՀՀ քրեական օրենսգրքի 77-րդ հոդվածի 6-րդ մասի համաձայն՝ «Ավարտված կամ չավարտված հանցագործություններով համաձայնությամբ տուգանք նշանակելու վարույթի դեպքում նշանակվում է սույն օրենսգրքի Հատուկ մասի համապատասխան հոդվածի սանկցիայով նախատեսված տուգանքի նվազագույն չափը՝ առանց լրացուցիչ պատիժ և անվտանգության միջոց նշանակելու»:
ՀՀ քրեական օրենսգրքի 59-րդ հոդվածի համաձայն՝ «1.Տուգանքը դրամական տուժանք է, որը նշանակվում է սույն օրենսգրքով նախատեսված դեպքերում և չափերով:
2.Տուգանքը, որպես հիմնական պատիժ կարող է նշանակվել սույն օրենսգրքի Հատուկ մասով նախատեսված դեպքերում:
3.Տուգանքը, որպես հիմնական պատիժ սահմանվում է ոչ մեծ և միջին ծանրության հանցագործությունների համար՝ հանցանք կատարած անձի ամսական եկամտի հնգապատիկից հիսնապատիկի չափով։ (․․․)
5.Հանցանք կատարած անձի եկամտի բացակայության կամ դրա չափը պարզելու անհնարինության դեպքում տուգանքի չափը հաշվարկվում է հանցանքը կատարելու պահին նվազագույն աշխատավարձի չափով: Տուգանքի չափը որոշվում է նույն կարգով, եթե հանցանք կատարած անձի եկամուտն առաջացել է հանցանքն ավարտվելուց հետո։ Տուգանքի չափը որոշվում է նույն կարգով նաև այն դեպքում, երբ անձի ամսական եկամտի հաշվարկի արդյունքով դրա չափը պակաս է ստացվում նվազագույն աշխատավարձի չափից: (․․․)
8.Եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում։ (․․․)»։
ՀՀ քրեական օրենսգրքի 3-րդ հոդվածի 1-ին մասի 6-րդ կետի համաձայն՝ «ամսական եկամուտ` հանցանքն ավարտվելու օրվան նախորդող 12 ամիսների ընթացքում անձի ստացած միջին ամսական եկամտի 35 տոկոսը: Միջին ամսական եկամտի մեջ հաշվարկվում են ստացվող աշխատավարձը և դրան հավասարեցված այլ վճարումները, անձի կողմից իր ակտիվների ներդրմամբ (տրամադրմամբ) այլ անձանց գործունեությունից ստացված եկամուտը (շահաբաժինը, տոկոսը, ռոյալթին, վարձակալական վճարը): Ամսական եկամուտը հաշվարկելիս հաշվի չեն առնվում դրանց համար վճարվող հարկերը, տուրքերը կամ այլ վճարներ»։
ՀՀ քրեական օրենսգրքի 3-րդ հոդվածի 1-ին մասի 7-րդ կետի համաձայն՝ «նվազագույն աշխատավարձ՝ «Նվազագույն ամսական աշխատավարձի մասին» օրենքով սահմանված նվազագույն ամսական աշխատավարձի չափը.:
ՀՀ նվազագույն աշխատավարձի մասին օրենքի 1-ին հոդվածի համաձայն՝ «Հայաստանի Հանրապետությունում նվազագույն ամսական աշխատավարձը սահմանել 75000 դրամ»:
Նկատի ունենալով, որ Դատարանին չի ներկայացվել մեղադրյալների՝ հանցանքները կատարելուց առաջ մեկ տարվա ընթացքում ստացած, միջին եկամուտի չափը նվազագույն աշխատավարձի չափից ավել լինելու վերաբերյալ տեղեկություն Դատարանը, որպես հաշվարկային միավոր ընդունում է հանցանք կատարելու օրը սահմանված նվազագույն աշխատավարձը և պատիժ նշանակում տուգանք՝ նվազագույն աշխատավարձի հնգապատիկի չափով՝ 375․000 ՀՀ դրամ։
ՀՀ քրեական դատավարության օրենսգրքի 348-րդ հոդվածի 1-ին մասի համաձայն` դատավճիռ կայացնելիս Դատարանը պետք է անդրադառնա նաև խափանման միջոցի, ապացույցների պահպանման և տնօրինման հարցին, վարութային ծախսերի, գույքի նկատմամբ կիրառված (կիրառվելիք) արգելանքի, գույքային հայցի լուծման հարցերին, սակայն հաշվի առնելով, որ սույն քրեական գործով մեղադրյալներ Սերյոժա Մանուկյանի և Արսեն Մարգարյանի գույքի վրա արգելանք չի կիրառվել, քրեական գործում վարութային ծախսեր չկան (բացի այդ, ՀՀ քրեական դատավարության օրենսգրքի 464․9-րդ հոդվածի համաձայն ՀՀ քրեական դատավարության օրենսգրքի 167-րդ հոդվածի 1-ին մասով նախատեսված վարութային ծախսերը մեղադրյալից ենթակա չեն բռնագանձման), գույքային հայց չի ներկայացվել, սահմանափակվում է այդ փաստերի արձանագրմամբ:
Անդրադառնալով Սերյոժա Մանուկյանի նկատմամբ կիրառված խափանման միջոցի հարցին` Դատարանը գտնում է, որ վերջիններիս նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև սույն դատավճռի օրինական ուժի մեջ մտնեը:
Անդրադառնալով Արսեն Մարգարյանի նկատմամբ կիրառված խափանման միջոցի հարցին` Դատարանը գտնում է, որ վերջինիս նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև սույն դատավճռի օրինական ուժի մեջ մտնեը:
Դատավճիռն ուժի մեջ մտնելուց հետո քրեական գործով իրեղեն ապացույց ճանաչված 2․8 գրամ քաշով մարիխուանա և 0.21 գրամ քաշով «Մեթամֆետամին» տեսակի թմրամիջոցը ուղարկել ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժին՝ թիվ 12808324 քրեական վարույթին կցելու և վարույթի շրջանակներում պահելու համար։
Անդրադառնալով արտավարութային փաստաթղթերին՝ Դատարանն արձանագրում է, որ իրեղեն ապացույց հանդիսացող փաստաթղթերը պետք է պահվեն քրեական գործի հետ:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 347-350-րդ, 464.6-464.10-րդ հոդվածներով՝ Դատարանը՝

Վ Ճ Ռ Ե Ց

Արսեն Մարգարյանին մեղավոր ճանաչել ՀՀ քրեական օրենսգրքի 396-րդ հոդվածի 1-ին մասով նախատեսված հանցանք կատարելու մեջ և նրա նկատմամբ նշանակել պատիժ տուգանք՝ նվազագույն աշխատավարձի հնգապատիկի՝ 375․000 (երեք հարյուր յոթանասունհինգ հազար) ՀՀ դրամի չափով։
Արսեն Մարգարյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը:
Սերյոժա Մանուկյանին մեղավոր ճանաչել ՀՀ քրեական օրենսգրքի 396-րդ հոդվածի 1-ին մասով նախատեսված հանցանք կատարելու մեջ և նրա նկատմամբ նշանակել պատիժ տուգանք՝ նվազագույն աշխատավարձի հնգապատիկի՝ 375․000 (երեք հարյուր յոթանասունհինգ հազար) ՀՀ դրամի չափով։
Սերյոժա Մանուկյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո վերացնել Սերյոժա Մանուկյանի և Արսեն Մարգարյանի նկատմամբ ՀՀ պետական սահմանը հատելու և անձնագրային գործարքներ կատարելու արգելքները։
Դատավճիռն ուժի մեջ մտնելուց հետո քրեական գործով իրեղեն ապացույց ճանաչված 2.8 գրամ քաշով «Մարիխուանա» և 0․21 գրամ քաշով «Մեթամֆետամին» տեսակի թմրամիջոցը ուղարկել ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժին՝ թիվ 12808324 քրեական վարույթին կցելու և վարույթի շրջանակներում պահելու համար։
Արտավարութային փաստաթղթերը թողնել կցված գործի նյութերին։
Գույքային հայցի, վարույթային ծախսերի հարցը համարել լուծված:
Դատավճիռը վերաքննության կարգով կարող է բողոքարկվել ՀՀ վերաքննիչ քրեական դատարան` ստանալու օրվանից հետո՝ մեկամսյա ժամկետում:
Դատավճիռը ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով և 377-րդ հոդվածով նախատեսված հիմքերով չի կարող բողոքարկվել։

ԴԱՏԱՎՈՐ՝ ՄՈՒՇԵՂ ԱՐԱՄՅԱՆ