ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ ԸՆԴՀԱՆՈՒՐ ԻՐԱՎԱՍՈՒԹՅԱՆ
ՔՐԵԱԿԱՆ ԴԱՏԱՐԱՆ
Գործ թիվ ԵԴ1/0394/01/25

ՈՐՈՇՈՒՄ
(մասնավոր մեղադրանքով քրեական վարույթ սկսելը մերժելու մասին)

2025թ. փետրվարի 24 ք.Երևան

Երևան քաղաքի առաջին ատյանի ընդհանուր իրավասության քրեական դատարանի դատավոր Դավիթ Արղամանյանս՝ քննելով թիվ ԵԴ1/0394/01/25 գործով քրեական վարույթ սկսելու հարցը՝

ՊԱՐԶԵՑԻ
1. Գործի դատավարական նախապատմությունը.
1.2025 հունվարի 31-ին Արա Արկադիի Բարսեղյանի կողմից Երևան քաղաքի առաջին ատյանի ընդհանուր իրավասության քրեական դատարան է ստացվել «Մասնավոր գանգատ»՝ ընդդեմ Նվեր Նիկոլային Մանուկյանի։
2. 2025 թվականի փետրվարի 5-ին Դատարանը որոշում է կայացրել «Մասնավոր գանգատ»-ը Արա Բարսեղյանին վերադարձնել և թերությունների շտկման համար 5-օրյա ժամկետ տրամադրելու մասին։
3. 2025թ․ փետրվարի 20-ին Արա Արկադիի Բարսեղյան Երևան քաղաքի առաջին ատյանի ընդհանուր իրավասության քրեական դատարան է ներկայացրել «Մասնավոր գանգատ»-ի շտկված տարբերակը։
4. 2025թ․ փետրվարի 20-ին նշված գործն մակագրվել և 2025թ․ փետրվարի 21-ին հանձնվել է ինձ:
2. Դատարանի պատճառաբանություններն ու եզրահանգումը.
ՀՀ քրեական դատավարության օրենսգրքի 451-րդ հոդվածի համաձայն՝
«1. Մասնավոր մեղադրանքով վարույթը կարող է նախաձեռնվել այն դեպքում, երբ այն անձը, որը բավարար հիմքեր ունի ենթադրելու, որ Հայաստանի Հանրապետության քրեական օրենսգրքի 15-րդ հոդվածի 1-ին մասով նախատեuված արարքներով իրեն պատճառվել է վնաս, քրեական հայց է ներկայացնում դատարան:
2. Քրեական հայցը կարող է ներկայացնել միայն սույն հոդվածի 1-ին մասով նախատեսված անձը կամ նրա օրինական ներկայացուցիչը:
3. Քրեական հայցը պետք է բովանդակի՝
(...)
3) մեղադրանքի բովանդակությունը, այդ թվում՝ քրեական օրենսգրքի համապատասխան հոդվածը կամ հոդվածի մասը.
4. Սույն հոդվածի 2-րդ մասով նախատեսված անձը քրեական հայցը ներկայացնում է ենթադրյալ հանցանքի կատարման վայրի առաջին ատյանի դատարան:
(…)»
Նույն օրենսգրքի 452-րդ հոդվածի համաձայն՝
«1. Քրեական հայցն ստանալուց հետո դատավորը ստուգում է՝ արդյոք պահպանվել են սույն օրենսգրքի 451-րդ հոդվածի 3-րդ մասով սահմանված` քրեական հայցին ներկայացվող պահանջները, արդյոք քրեական հայցում նկարագրված փաստական հանգամանքների կապակցությամբ քրեական հետապնդումը կարող է իրականացվել մասնավոր կարգով, և հնգօրյա ժամկետում կայացնում է հետևյալ որոշումներից մեկը․
1) քրեական վարույթ սկսելու մասին.
2) քրեական հայցը վերադարձնելու մասին.
3) քրեական հայցը և կից նյութերն ըստ ընդդատության ուղարկելու մասին.
4) քրեական վարույթ սկսելը մերժելու մասին:
2. Քրեական հայցը, համապատասխան թերությունները մատնանշելով, առնվազն հինգ օր ժամկետով վերադարձվում է, եթե դրանում առկա են շտկելի թերություններ:
(…)
4. Քրեական վարույթ սկսելը մերժվում է, եթե`
(…)
4) դատարանի սահմանած ժամկետում քրեական հայցի թերությունները չեն վերացվել, կամ այն վերստին չի ներկայացվել:
(…)»
Նկատի ունենալով, որ «Մասնավոր գանգատ»-ը Դատարանի սահմանած ժամկետում չի համապատասխանեցվել սույն օրենսգրքի 451-րդ հոդվածով սահմանված պահանջներին, մասնավորապես՝ այն չի պարունակում քրեական օրենսգրքի համապատասխան հոդվածը կամ հոդվածի մասը, ուստի Դատարանը, ղեկավարվելով ՀՀ քրեական դատավարության օրենսգրքի 452-րդ հոդվածի 4-րդ մասի 4-րդ կետով՝ արձանագրում է, որ վարույթի սկսելը ենթակա է մերժման:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 451-րդ և 452-րդ հոդվածներով՝ Դատարանը

ՈՐՈՇԵՑ
1. Արա Արկադիի Բարսեղյանի 2025 թվականի հունվարի 31-ի «Մասնավոր գանգատ»-ի հիման վրա քրեական վարույթ սկսելը մերժել։
2. Որոշումն ուժի մեջ է մտնում կայացման պահից և բողոքարկման ենթակա չէ։

Դատավոր՝ Դավիթ Արղամանյան