ԵԴ1/0367/01/25

Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

30 հունվարի 2025թ․ ք.Երևանում

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)

նախագահությամբ
դատավոր՝ Մ․Արամյանի
քարտուղարությամբ՝ Մ.Պողոսյանի
մասնակցությամբ`
հանրային մեղադրող՝ Ա․Ոսկանյանի
մեղադրյալ՝ Ռ․Վարդանյանի

դռնբաց դատական նիստում քննեց քրեական գործն ըստ մեղադրանքի` Ռաֆիկ Վարդանյանի (ծնված` 23.08.1991 թվականին, Երևան քաղաքում, ազգությամբ հայ, ՀՀ. քաղաքացի, նախկինում չդատապարտված, բարձրագույն կրթությամբ, չամուսնացած, չի աշխատում, հաշվառված և բնակվող՝ քաղաք Երևան, Անդրանիկի 25 շենք 42 բնակարան հասցեում, անձնագրի համար AU0369074)։
Ռաֆիկ Վարդանյանին մեղադրանք է առաջադրվել ՀՀ քրեական օրենսգրքի 396-րդ հոդվածի 1-ին մասով, խափանման միջոց է կիրառվել բացակայելու արգելք:

Դատավճռի նկարագրական մաս.
2024 թվականի նոյեմբերի 7-ին նախաձեռնվել է թիվ 16833824 քրեական վարույթը:
2024 թվականի դեկտեմբերի 25-ին ՀՀ քրեական օրենսգրքի 396-րդ հոդվածի 1-ին մասով հարուցվել է հանրային քրեական հետապնդում։
2024 թվականի դեկտեմբերի 25-ին Ռաֆիկ Սահակի Վարդանյանին ՀՀ քրեական օրենսգրքի 396-րդ հոդվածի 1-ին մասով ներկայացվել է մեղադրանք:
2024 թվականի դեկտեմբերի 25-ին Ռաֆիկ Սահակի Վարդանյանի նկատմամբ խափանման միջոց է կիրառվել բացակայելու արգելք:
Ռաֆիկ Սահակի Վարդանյանին մեղադրանք է առաջադրվել հանրորեն վտանգավոր այն արարքի կատարման համար, որ նա «խախտելով «Թմրամիջոցների և հոգեմետ (հոգեներգործուն) նյութերի մասին» 2002 թվականի դեկտեմբերի 26-ի ՀՀ օրենքի 11-րդ հոդվածի 2-րդ մասի և ՀՀ Կառավարության 2010 թվականի մարտի 18-ի թիվ 270-ն որոշման պահանջները, այն է՝ չունենալով բժշկական նպատակներով կամ բժշկի նշանակմամբ` թմրամիջոցների և հոգեմետ (հոգեներգործուն/ նյութերի շրջանառություն իրականացնելու` թմրամիջոց ձեռք բերելու, պահելու և իրացնելու թույլտվություն, քննությամբ չպարզված օրը և ժամին ինքնությունը՝ չպարզված անձից ապօրինի ձեռք է բերել և մինչև 2024թ. նոյեմբերի 7-ը՝ ժամը 14:23-ի սահմաններում, իր տաբատի ձախ գրպանում զիպ, փականով պոլիէթիլենային թղանաթից փաթեթում ապօրինի պահել է ՀՀ Կառավարության 2018 թվականի հունիսի 27-ի N 707-ն որոշման 1-ին հավելվածում ընդգրկված զգալի չափերով՝ 0,15 գրամ քաշով «Հերոին» տեսակի թմրամիջոց, որը հայտնաբերվել է 2024թ-ի նոյեմբերի 7-ին՝ ժամը 14:23-ի սահմաններում, ՀՀ ՆԳՆ ոստիկանության ՔՈԳՎ ԹԱՇԴՊ բաժնի աշխատակիցների կողմից՝ Ռաֆիկ Վարդանյանի անձնական խուզարկության ժամանակ:
Այսպիսով Ռաֆիկ Սահակի Վարդանյանին մեղսագրվում է հանցանքի կատարում, որը նախատեսված է ՀՀ քրեական օրենսգրքի 396-րդ հոդվածի 1-ին մասով։»:

Դատաքննության ընթացքում հետազոտված թույլատրելի ապացույցներ
Դատաքննության ընթացքում մեղադրյալ Ռաֆիկ Վարդանյանը հրաժարվեց ցուցմունք տալուց, սակայն պնդեց իր նախաքննական ցուցմունքները:
Դատարանը որոշեց թույլատրել հրապարակել նրա նախաքննական ցուցմունքը համաձայն որի՝ «Ընդունել է մեղքը, զղջացել է կատարածի համար և հրաժարվել է դեպքի վերաբերյալ ցուցմունք տալուց»:/Տես՝ վ․թ․ 14-16, 68-72/
Որպես արտավարույթային փաստաթուղթ ապացույց ճանաչված, զննված և քրեական վարույթի նյութերին կցված հետևյալ փաստաթղթերը.
Փորձագետի 19.06Ք-24 եզրակացությունը, համաձայն որի փորձաքննության ներկայացված ընդհանուր 0,15 գրամ քաշով դարչնագույն փոշեկոշտուկավոր փշրվող զանգվածը հանդիսանում է Հերոին,, տեսակի թմրամիջոց։/Տես՝ վ․թ․ 76-78/
Իրեղեն ապացույց ճանաչված՝ Ռաֆիկի Սահակի Վարդանյանի անձնական խուզարկությամբ տաբատի ձախ գրպանից հայտնաբերված և վերցված 0,15 գրամ քաշով դարչնագույն փոշեկոշտուկավոր փշրվող զանգվածը հանդիսանում է «Հերոին» տեսակի թմրամիջոցով։/Տես՝ վ․թ․ 118-119/
Անձնական խուզարկության ենթարկելու մասին արձանագրությունը, համաձայն որի Ռաֆիկ Սահակի Վարդանյանի հագին տաբատի ձախ գրպանից հայտնաբերվել և վերցվել է 0,15 գրամ քաշով դարչնագույն փոշեկոշտուկավոր փշրվող զանգվածը հանդիսանում է «Հերոին» տեսակի թմրամիջոց։/Տես՝ 8/
Ձերբակալման վերաբերյալ արձանագրությունը, համաձայն որի ձերբակալված Ռաֆիկ Սահակի Վարդանյանի անձնական խուզարկությամբ, ի թիվս այլոց, հայտնաբերվել և վերցվել է 0,15 գրամ քաշով դարչնագույն փոշեկոշտուկավոր փշրվող զանգվածը հանդիսանում է «Հերոին» տեսակի թմրամիջոց:/Տես՝ վ․թ․ 6/
Վերոգրյալ ապացույցների հիման վրա Դատարանը հաստատված է համարում հետևյալ փաստական հանգամանքները, մասնավորապես.
-Ռաֆիկ Վարդանյանը խախտելով «Թմրամիջոցների և հոգեմետ նյութերի մասին» 2002 թվականի դեկտեմբերի 26-ին ընդունված ՀՀ օրենքի և ՀՀ Կառավարության 2018 թվականի հունիսի 27-ին ընդունված թիվ 707-Ն որոշման պահանջները, 2024թ. նոյեմբերի 7-ի դրությամբ չի ունեցել թմրամիջոց պահելու թույլտվություն,
-Ռաֆիկ Վարդանյանը առանց իրացման նպատակի, անձնական օգտագործման համար չպարզված անձից ապօրինի ձեռք է բերել և 2024թ. նոյեմբերի 7-ին ապօրինի պահել է զգալի չափերի՝ 0,15 գրամ քաշով «Հերոին» տեսակի թմրամիջոց:

Դատավճռի պատճառաբանական մաս.
ՀՀ քրեական դատավարության օրենսգրքի 97-րդ հոդվածի համաձայն/․․․/ 1. Վարույթի ընթացքում ձեռք բերված ապացույցները, ներառյալ վարույթի մասնավոր մասնակիցների ներկայացրած ապացույցները համարվում են թույլատրելի, քանի դեռ պատշաճ իրավական ընթացակարգով հակառակը չի հաստատվել:
2. Օրենքի էական խախտմամբ ստացված տվյալները, ինչպես նաև դրանց հիման վրա կատարված վարութային գործողությունների արդյունքով ձեռք բերված տվյալները ճանաչվում են անթույլատրելի և չեն կարող օգտագործվել որպես ապացույց/․․․/:
ՀՀ քրեական դատավարության օրենսգրքի 102-րդ հոդվածի համաձայն`
/․․․/1. Քրեական վարույթի ընթացքում ապացուցման ենթակա են՝
1)դեպքը և դրա հանգամանքները (ժամանակը, տեղը, եղանակը և այլն).
2)մեղադրյալի առնչությունը դեպքին.
3)ենթադրյալ հանցագործության՝ քրեական օրենքով նախատեսված հատկանիշները.
4) մեղադրյալի մեղավորությունը ենթադրյալ հանցանքը կատարելու մեջ.
5) քրեական պատասխանատվությունը կամ պատիժը մեղմացնող և ծանրացնող հանգամանքները.
6) մեղադրյալի անձը բնութագրող հանգամանքները.
7) ենթադրյալ հանցագործությամբ պատճառված վնասը.
8)այն հանգամանքները, որոնք թույլ են տալիս անձին ազատել քրեական պատասխանատվությունից կամ պատժից.
9) այն հանգամանքները, որոնցով անձը հիմնավորում է վարույթի ընթացքում իր գույքային պահանջները.
10) այն հանգամանքները, որոնցով վարույթի մասնակիցը կամ այլ անձը հիմնավորում է իր պահանջները/․․․/:
ՀՀ քրեական դատավարության օրենսգրքի 105-րդ հոդվածի համաձայն` /․․․/ 1.Յուրաքանչյուր ապացույց ենթակա է գնահատման՝ վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից:
2. Քննիչը, դատախազը, դատավորը, ղեկավարվելով քրեադատավարական օրենսդրությամբ, ներառյալ ապացուցման չափանիշների մասին վերաբերելի կանոններով, ապացույցները գնահատում են դրանց պատշաճ հետազոտման և վերլուծության վրա հիմնված ներքին համոզմամբ:
3. Ոչ մի տվյալ նախապես հավաստի ապացույցի ուժ չունի: Դատավորը, ինչպես նաև քննիչը և դատախազը չպետք է կանխակալ վերաբերմունք դրսևորեն ապացույցներին, չպետք է դրանց որոշ մասին մյուսների նկատմամբ առավել կամ նվազ նշանակություն տան, քանի դեռ պատշաճ իրավական ընթացակարգի շրջանակներում դրանք չեն գնահատվել/․․․/:
ՀՀ քրեական դատավարության օրենսգրքի 276-րդ հոդվածը սահմանում է, որ
/․․․/ 1. Առաջին ատյանի դատարանում վարույթն իրականացվում է միայն մեղադրյալի նկատմամբ և միայն նրան ներկայացված մեղադրանքով:/․․․/:
Հետազոտված ապացույցների հիման վրա Դատարանը առանձին սենյակում գնահատելով դրանք իրենց համակցության մեջ, համադրելով մեղադրյալին առաջադրված մեղադրանքի ձևակերպման հետ, որ նա «խախտելով «Թմրամիջոցների և հոգեմետ (հոգեներգործուն) նյութերի մասին» 2002 թվականի դեկտեմբերի 26-ի ՀՀ օրենքի 11-րդ հոդվածի 2-րդ մասի և ՀՀ Կառավարության 2010 թվականի մարտի 18-ի թիվ 270-ն որոշման պահանջները, այն է՝ չունենալով բժշկական նպատակներով կամ բժշկի նշանակմամբ` թմրամիջոցների և հոգեմետ (հոգեներգործուն) նյութերի շրջանառություն իրականացնելու` թմրամիջոց ձեռք բերելու, պահելու և իրացնելու թույլտվություն, քննությամբ չպարզված օրը և ժամին ինքնությունը չպարզված անձից ապօրինի ձեռք է բերել և մինչև 2024թ. նոյեմբերի 7-ը՝ ժամը 14:23-ի սահմաններում, իր տաբատի ձախ գրպանում զիպ, փականով պոլիէթիլենային թղանաթից փաթեթում ապօրինի պահել է ՀՀ Կառավարության 2018 թվականի հունիսի 27-ի N 707-ն որոշման 1-ին հավելվածում ընդգրկված զգալի չափերով՝ 0,15 գրամ քաշով «Հերոին» տեսակի թմրամիջոց, որը հայտնաբերվել է 2024թ-ի նոյեմբերի 7-ին՝ ժամը 14:23-ի սահմաններում՝ ՀՀ ՆԳՆ ոստիկանության ՔՈԳՎ ԹԱՇԴՊ բաժնի աշխատակիցների կողմից՝ Ռաֆիկ Վարդանյանի անձնական խուզարկության ժամանակ», նշված արարքը ՀՀ քրեական օրենսգրքի 396-րդ հոդվածի 1-ին մասով որակման համատեքստում ՀՀ քրեական դատավարության օրենսգրքի 342-րդ հոդվածի 1-ին մասով նախատեսված հարցերին պատասխանելիս եզրահանգել է, որ
ապացուցված են մեղադրյալին վերագրվող փաստական հանգամանքները (արարքը),
ապացուցված է այդ արարքի քրեական,
ապացուցված է մեղադրյալի կողմից այդ արարքը կատարելը,
ապացուցված է մեղադրյալի մեղավորությունը տվյալ արարքը կատարելու մեջ:
2. Սույն հոդվածի 1-ին մասում նշված հարցերից որևէ մեկին ժխտական պատասխան տալու դեպքում դատարանը կայացնում է արդարացման վերդիկտ։
3. Սույն հոդվածի 1-ին մասում նշված բոլոր հարցերին հաստատական պատասխան տալու դեպքում դատարանը կայացնում է մեղադրական վերդիկտ, որով սահմանում է նաև, թե ապացուցված արարքի նկատմամբ քրեական օրենսգրքի, որ հոդվածը, հոդվածի մասը կամ կետն է ենթակա կիրառման:
Համաձայն ՀՀ քրեական դատավարության օրենսգրքի 348-րդ հոդվածի` դատավճիռ կայացնելիս դատարանը մի շարք այլ հարցերի հետ միասին պետք է լուծի նաև այն հարցը, թե մեղադրյալը պատժի ենթակա է, թե ոչ, պատժի ինչ տեսակ պետք է նշանակվի և պետք է արդյոք նա այն կրի:
Դատարանը դրական պատասխանելով ՀՀ քրեական դատավարության օրենսգրքի 342-րդ հոդվածի 1-ին մասով նախատեսված հարցերին գտնում է, որ կատարած արարքի համար Ռաֆիկ Վարդանյանը ենթակա է քրեական պատասխանատվության և պատժի:
ՀՀ քրեական օրենսգրքի 55-րդ հոդվածի համաձայն` /․․․/ Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից կամ ազատություններից սույն օրենսգրքով նախատեսված զրկմամբ կամ դրանց սահմանափակմամբ:
2. Պատժի նպատակներն են` վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները/․․․/:
ՀՀ քրեական օրենսգրքի 396-րդ հոդվածի համաձայն՝
/․․․/1. Առանց իրացնելու նպատակի զգալի չափերով թմրամիջոց, հոգեմետ (հոգեներգործուն) նյութ, դրանց պատրաստուկ կամ դրանց համարժեք նյութ (անալոգ) կամ դրանց ածանցյալ կամ պրեկուրսոր ապօրինի արտադրելը, պատրաստելը, վերամշակելը, ձեռք բերելը, պահելը, տեղափոխելը կամ առաքելը՝ պատժվում է տուգանքով՝ առավելագույնը տասնապատիկի չափով, կամ հանրային աշխատանքներով՝ առավելագույնը հարյուր ժամ տևողությամբ, կամ ազատության սահմանափակմամբ՝ առավելագույնը մեկ տարի ժամկետով, կամ կարճաժամկետ ազատազրկմամբ՝ առավելագույնը մեկ ամիս ժամկետով, կամ ազատազրկմամբ՝ առավելագույնը մեկ տարի ժամկետով:
Դատարանը դատապարտված-մեղադրյալի պատիժը և պատասխանատվությունը ծանրացնող կամ մեղմացնող հանգամանք չի արձանագրում:
Ռաֆիկ Վարդանյանի անձը բնութագրող հանգամանքներն են, մասնավորապես խոստովանական ցուցմունքներ տալը, պատիժ նշանակելու պահին դատվածություն չունեցող անձ հանդիսանալը (տեղեկություն Ձև 8 տեղեկանք):
Մեղադրյալին վերագրվող արարքը ՀՀ քրեական օրենսգրքի 17-րդ հոդվածի համաձայն հանդիսանում է ոչ մեծ ծանրության հանցանք։
ՀՀ քրեական օրենսգրքի 59-րդ հոդվածի համաձայն` /․․․/ 1. Տուգանքը դրամական տուժանք է, որը նշանակվում է սույն օրենսգրքով նախատեսված դեպքերում և չափերով: /․․․/,/․․․/8. Եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում/․․․/։
ՀՀ քրեական օրենսգրքի 67-րդ հոդվածի 5-րդ կետի համաձայն /․․․/ 5. Առաջին անգամ ոչ մեծ ծանրության հանցագործություն կատարած անձը չի կարող դատապարտվել ազատազրկման/․․․/ ինչպես նաև հաշվի առնելով մեղադրյալի անձը բնութագրող տվյալները, գտնում է, որ ՀՀ քրեական օրենսգրքի 55-րդ հոդվածով սահմանված պատժի նպատակներին հասնելու համար նրա նկատմամբ ՀՀ քրեական օրենսգրքի 396-րդ հոդվածի 1-ին մասով նախատեսված հանցանք կատարելու համար պետք է նշանակել տուգանքի ձևով պատժատեսակ։
Հանցանք կատարելու պահին «Նվազագույն աշխատավարձի մասին» ՀՀ օրենքի 1-ին հոդվածի համաձայն /․․․/ 1. Հայաստանի Հանրապետությունում նվազագույն ամսական աշխատավարձը սահմանել 75.000 դրամ:/․․․/։
Նկատի ունենալով, որ Դատարան չի ներկայացվել Ռ․Վարդանյանի՝ հանցանքը կատարելուց առաջ մեկ տարվա ընթացքում ստացած, միջին եկամուտի պարզման վերաբերյալ տեղեկություն, ուստի Դատարանը, որպես հաշվարկային միավոր ընդունում է հանցանք կատարելու օրվա դրությամբ սահմանված նվազագույն աշխատավարձը և պատիժ նշանակում տուգանք՝ նվազագույն աշխատավարձի հնգապատիկի չափով՝ 375․000 ՀՀ դրամ։
Նշանակված տուգանք պատժի վճարումը տարաժամկետել մեկ տարի ժամկետով՝ 11 (տասնմեկ) ամիս սահմանել վճարման պարտականություն յուրաքանչյուր ամիս 30.000 (երեսուն հազար) ՀՀ դրամի չափով, իսկ վերջին 1 (մեկ) ամիսը 45.000 (քառասունհինգ հազար) ՀՀ դրամի չափով:
Անդրադառնալով խափանման միջոցի հարցին, Դատարանը գտնում է, որ Ռ․Վարդանյանի նկատմամբ ընտրված խափանման միջոցը` բացակայելու արգելքը, պետք է թողնել անփոփոխ, մինչև դատավճռի օրինական ուժի մեջ մտնելը:
Բացի այդ, Դատարանը գտնում է, որ դատավճիռը օրինական ուժի մեջ մտնելուց հետո Ռ․Վարդանյանի վերաբերյալ Հայաստանի Հանրապետության սահմանային էլեկտրոնային կառավարման տեղեկատվական (ՍԷԿՏ) համակարգում բացառապես սույն գործով առկա արգելանքը պետք է վերացնել:
Դատավճիռն ուժի մեջ մտնելուց հետո քրեական գործով իրեղեն ապացույց ճանաչված զգալի չափերի 0.15 գրամ քաշով «Հերոին» տեսակի թմրամիջոցը՝ պետք է ուղարկել ՀՀ ՔԿ ԵՔՔՎ Մալաթիա-Սեբաստիա վարչական շրջանների քննչական բաժին՝ թիվ 16109425 քրեական վարույթին կցելու և վարույթի շրջանակներում պահելու համար։
Դատավճիռն օրինական ուժի մեջ մտնելուց հետո Ռաֆիկ Վարդանյանից ահնրաժեշտ է հօգուտ ՀՀ պետական բյուջե բռնագանձել 72.000 (յոթանասուներկու հազար) ՀՀ դրամ` որպես քրեական գործով կատարված վարույթային ծախս(հիմք փորձաքննության արժեքի վերաբերյալ տեղեկանք)։
ՀՀ քրեական դատավարության օրենսգրքի 348-րդ հոդվածի 1-ին մասի համաձայն` դատավճիռ կայացնելիս Դատարանը պարտավոր է անդրադառնալ ի թիվս այլնի նաև գույքի նկատմամբ կիրառված (կիրառվելիք) արգելադրման, գույքային հայցի հարցերին, սակայն Դատարանը, պարզելով, որ սույն քրեական գործով մեղադրյալի գույքի վրա արգելանք չի կիրառվել, գույքային հայց չի ներկայացվել, սահմանափակվում է այդ փաստերի արձանագրմամբ:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 97-րդ, 102-րդ, 105-րդ, 276-րդ, 348-349-րդ, 352-356-րդ և 364-րդ հոդվածներով` Դատարան․

Վ Ճ Ռ Ե Ց

1)Ռաֆիկ Վարդանյանին մեղավոր ճանաչել ՀՀ քրեական օրենսգրքի 396-րդ հոդվածի 1-րդ մասով նախատեսված հանցանք կատարելու համար և պատիժ նշանակել տուգանք՝ նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով։
Նշանակված տուգանք պատժի վճարումը տարաժամկետել մեկ տարի ժամկետով՝ 11 (տասնմեկ) ամիս սահմանել վճարման պարտականություն յուրաքանչյուր ամիս 30.000 (երեսուն հազար) ՀՀ դրամի չափով, իսկ վերջին 1 (մեկ) ամիսը 45.000 (քառասունհինգ հազար) ՀՀ դրամի չափով:
Դատավճիռը օրինական ուժի մեջ մտնելուց հետո Ռաֆիկ Վարդանյանի վերաբերյալ Հայաստանի Հանրապետության սահմանային էլեկտրոնային կառավարման տեղեկատվական (ՍԷԿՏ) համակարգում բացառապես սույն գործով առկա արգելանքը վերացնել:
2)Դատավճիռն օրինական ուժի մեջ մտնելուց հետո քրեական գործով իրեղեն ապացույց ճանաչված զգալի չափերի 0.15 գրամ քաշով «Հերոին» տեսակի թմրամիջոցը՝ ուղարկել ՀՀ ՔԿ ԵՔՔՎ Մալաթիա-Սեբաստիա վարչական շրջանների քննչական բաժին՝ թիվ 16109425 քրեական վարույթին կցելու և վարույթի շրջանակներում պահելու համար։
Ռաֆիկ Վարդանյանից հօգուտ ՀՀ պետական բյուջե բռնագանձել 72.000 (յոթանասուներկու հազար) ՀՀ դրամ` որպես քրեական գործով կատարված վարույթային ծախս։
Քրեական գործին կցված արտավարութային փաստաթղթերը պահել քրեական գործի հետ միասին՝ դրանց պահելու ամբողջ ժամանակամիջոցում:
Գույքային հայցի հարցը համարել լուծված:
Դատավճիռը կարող է բողոքարկվել Հայաստանի Հանրապետության վերաքննիչ քրեական դատարան` ստանալու օրվանից մեկամսյա ժամկետում:


ԴԱՏԱՎՈՐ` ՄՈՒՇԵՂ ԱՐԱՄՅԱՆ