ԵԴ1/0368/01/25

Դ Ա Տ Ա Վ Ճ Ի Ռ
Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ Ու Թ Յ Ա Ն Ա Ն Ու Ն Ի Ց

31.03.2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը՝

ՆԱԽԱԳԱՀՈւԹՅԱՄԲ ԴԱՏԱՎՈՐ՝ Մ. ՇԱՀՎԵՐԴՅԱՆԻ
ՔԱՐՏՈւՂԱՐՈւԹՅԱՄԲ՝ Հ. ՄԽԻԹԱՐՅԱՆԻ

Մասնակցությամբ՝

ՀԱՆՐԱՅԻՆ ՄԵՂԱԴՐՈՂ՝ Ա. ՄԵԺԼՈւՄՅԱՆԻ
ՄԵՂԱԴՐՅԱԼ՝ Ա. ԱԼԵՔՍԱՆՅԱՆԻ

Դռնբաց դատական նիստում քննեց քրեական գործն ըստ մեղադրանքի՝
Անդրանիկ Սամվելի Ալեքսանյանի, ծնված՝ 19.03.1997թ., ք.Երևան, ազգությամբ հայ, ՀՀ քաղաքացի, նախկինում չդատված, ըստ իր հայտարարության՝ միջնակարգ կրթությամբ, ամուրի և աշխատում է «Երևան Փրոջեքթ» ՍՊ ընկերությունում՝ որպես մենեջեր, հաշվառված և բնակվում է՝ ք.Երևան Նոր Նորք, Գալշոյան փողոցի 32-րդ շենքի 25-րդ բնակարանում:
Մեղադրվում է 2 դրվագ ՀՀ քրեական օրենսգրքի 344-րդ հոդվածի 2-րդ մասով:
Դատաքննությամբ և գործի տվյալներով պարզվեց հետևյալը.
ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ Դ.Շահբազյանի կողմից 15.07.2024թ. ՀՀ քրեական օրենսգրքի 344-րդ հոդվածի 2-րդ մասով նախաձեռնվել է թիվ 60544324 քրեական վարույթը:
Երևան քաղաքի Ավան և Նոր Նորք վարչական շրջանների դատախազության ավագ դատախազ Ա.Մեժլումյանի 14.08.2024թ. որոշմամբ՝ Անդրանիկ Սամվելի Ալեքսանյանի նկատմամբ ՀՀ քրեական օրենսգրքի 344-րդ հոդվածի 2-րդ մասով հարուցվել է հանրային քրեական հետապնդում:
ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ Ն.Սիմոնյանի կողմից 10.12.2024թ. ՀՀ քրեական օրենսգրքի 344-րդ հոդվածի 2-րդ մասով նախաձեռնվել է թիվ 60740924 քրեական վարույթը:
ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնի քննիչ Ն.Սիմոնյանի 08.01.2025թ որոշմամբ՝ թիվ 60740924 քրեական վարույթը միացվել է թիվ 60544324 քրեական վարույթին:
Երևան քաղաքի Ավան և Նոր Նորք վարչական շրջանների դատախազության ավագ դատախազ Ա.Մեժլումյանի 10.01.2025թ. որոշմամբ՝ Անդրանիկ Սամվելի Ալեքսանյանի նկատմամբ 2 դրվագ ՀՀ քրեական օրենսգրքի 344-րդ հոդվածի 2-րդ մասով հարուցվել է նոր հանրային քրեական հետապնդում:
ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ Ն.Սիմոնյանի կողմից 15.01.2025թ. Անդրանիկ Սամվելի Ալեքսանյանին հանձնվել է նոր հանրային քրեական հետապնդում հարուցելու մասին՝ 10.01.2025թ. որոշման պատճենը, պարզաբանվել մեղադրանքի փաստական հիմքը և իրավական գնահատականն ու ՀՀ քրեական դատավարության օրենսգրքի 43-րդ հոդվածով նախատեսված՝ նրա իրավունքները և պարտականությունները, ինչպես նաև նրան է հանձնվել դրանց ցանկը, որի մասին կազմվել է արձանագրություն:
Թիվ 60544324 քրեական վարույթի նյութերը մեղադրական եզրակացությամբ 27.01.2025թ. մուտքագրվել է Երևան քաղաքի առաջին ատյանի ընդհանուր իրավասության քրեական դատարանում:
Անդրանիկ Սամվելի Ալեքսանյանի 2 դրվագ ՀՀ քրեական օրենսգրքի 344-րդ հոդվածի 2-րդ մասով մեղադրանք է ներկայացվել այն բանի համար, որ նա, չունենալով տրանսպորտային միջոցներ վարելու իրավունք, հրաժարվել է սթափության վիճակի զննություն անցնելուց, և չունենալով տրանսպորտային միջոցներ վարելու իրավունք, ոչ սթափ վիճակում վարել է տրանսպորտային միջոցը.
Այսպես՝
Անդրանիկ Սամվելի Ալեքսանյանը, չունենալով տրանսպորտային միջոցներ վարելու իրավունք, 01.06.2024թ., ժամը` 0325-ին, Երևան քաղաքի Գալշոյան փողոցում վարել է «ԲՄՎ» մակնիշի «37 BZ 385» հաշվառման համարանիշի տրանսպորտային միջոցը և հրաժարվել է սթափության վիճակի զննություն անցնելուց, ինչի վերաբերյալ ՀՀ ոստիկանության պարեկային ծառայության աշխատակցի կողմից կազմվել է վարչական իրավախախտման վերաբերյալ թիվ 8180405136 արձանագրությունը:
Բացի այդ, Անդրանիկ Սամվելի Ալեքսանյանը, չունենալով տրանսպորտային միջոցներ վարելու իրավունք, 21.11.2024թ., ժամը` 0500-ին, գտնվելով 0.296մգ/լ ալկոհոլային խմիչք օգտագործած ոչ սթափ վիճակում, Երևան քաղաքի Գալշոյան փողոցում վարել է «ԲՄՎ» մակնիշի «37 BZ 385» հաշվառման համարանիշի տրանսպորտային միջոցը, ինչի վերաբերյալ ՀՀ ոստիկանության պարեկային ծառայության աշխատակցի կողմից կազմվել է վարչական իրավախախտման վերաբարյալ թիվ 8180428700 արձանագրությունը:
Ներկայացված մեղադրանքում Անդրանիկ Ալեքսանյանն իրեն լիովին մեղավոր ճանաչեց, և օգտվելով իր սահմանադրական իրավունքից՝ դատարանում ցուցմունք տալու ցանկություն չհայտնեց:
Սահմանված հերթականությամբ և հաջորդականությամբ հետազոտվեցին հետևյալ ապացույցները.
Մեղադրյալ Անդրանիկ Ալեքսանյանի կողմից մինչդատական վարույթում տրված ցուցմունքը, համաձայն որի՝ վերջինս ներկայացված մեղադրանքում իրեն լիովին մեղավոր է ճանաչել և հայտնել է, որ տրանսպորտային միջոցներ վարելու իրավունք չունենալով վարել է ավտոմեքենա և հրաժարվել է սթափության վիճակի զննություն անցնելուց: Բացի այդ, տրանսպորտային միջոցներ վարելու իրավունք չունենալու պայմաններում ոչ սթափ վիճակում վարել է տրանսպորտային միջոց:
Զննում կատարելու մասին 12.08.2024թ. արձանագրությունը, համաձայն որի.
• 2022թ. հունիսի 4-ին, ժամը՝ 0725-ին, Երևան քաղաքի Դավիթ-Բեկի փողոցում ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի 1-ին վաշտի պարեկ Կարեն Գյուլամիրյանի /կրծքանշան՝ թիվ 08379/ կողմից կազմվել է վարչական իրավախախտման վերաբերյալ թիվ 8180141370 արձանագրությունը, համաձայն որի` Անդրանիկ Սամվելի Ալեքսանյանը (ծնված՝ 19.03.1997թ., բնակվող` ք.Երևան, Նոր Նորք 5-րդ զանգված 32 շենք, 25 բնակարան հասցեում) 2022թ. հունիսի 4-ին, ժամը՝ 0700-ին` Երևան քաղաքի Դավիթ Բեկի փողոցում ոչ սթափ վիճակում վարել է «ԲՄՎ» մակնիշի «69 AP 696» հաշվառման համարանիշի տրանսպորտային միջոցը:
• Արձանագրության՝ վարչական իրավախախտում կատարած անձի բացատրությունը և դիտողությունը նշելու հատվածում առկա է ստորագրություն:
• Արձանագրությանը, իրավունքներին և պարտականություններին ծանոթանալու հատվածում առկա է ստորագրություն:
• Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր նշված է՝ 70.2 թիվը:
• Նույն որոշմամբ՝ Անդրանիկ Սամվելի Ալեքսանյանը վարորդական իրավունքի վկայականից զրկվել է 1 տարի ժամկետով:
• Ալկոհոլի պարունակության ստուգման կտրոնի զննությամբ պարզվել է, որ ստուգաչափման սարքի համարն է` 93000843, զննման համարը՝ 04633, զննման ամսաթիվը՝ 04.06.2022թ., զննման ժամը՝ 07:25:02, վերջին ստուգաչափման ամսաթիվը՝ 05.01.2022թ., դատարկ թեստ՝ 0.000մգ/լ, ստուգաչափման ձևաչափը՝ ավտոմատ, ալկոհոլի պարունակությունը՝ 0,584մգ/լ, վարորդի անուն-ազգանունը՝ Անդրանիկ Ալեքսանյան, տրանսպորտային միջոցի համարանիշը՝ «69 AP 696», ՃՈ տեսուչի ազգանունը՝ Գյուլամիրյան, կրծքանշանի համարը՝ 08379, ստորաբաժանումը՝ 2-րդ գումարտակ, 1-ին վաշտ:
• ՀՀ էկոնոմիկայի նախարարության «Ստանդարտացման և չափագիտության ազգային մարմին» ՓԲԸ-ի կողմից տրված թիվ 062512 ստուգաչափման վկայականի զննությամբ պարզվել է, որ վկայականն ուժի մեջ է 2022թ. հունվարի 5-ից մինչև 2023թ. հունվարի 5-ը, ստուգաչափման սարքի գործարանային համարն է՝ 93000843, տեսակը՝ Jupiter X/RP, չափման տիրույթը՝ 0.000÷1.200մգ/լ, ճշտության դասը, կարգը /սխալանքը/՝ 5±10%, արտադրողը` Չինաստան, պատկանում է ՀՀ ՊԾ-ին, ստուգաչափումը կատարվել է հետևյալ ստուգաչափման մեթոդիկայի անվանման նշագրով՝ MU2835-2008, ստուգաչափող անվան դիմաց առկա է ստորագրություն և նշված է Ա.Գուլքանյան, իսկ բաժնի /լաբորատորիայի վարիչ/ անվան դիմաց առկա է ստորագրություն և նշված է Գ.Մարտիրոսյան:
• 2024թ. հունիսի 1-ին, ժամը՝ 0330-ին, Երևան քաղաքի Գալշոյան փողոցում ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի 3-րդ վաշտի պարեկ Կարապետ Բետլեմյանի /կրծքանշան՝ թիվ 05569/ կողմից կազմվել է վարչական իրավախախտման վերաբերյալ թիվ 8180405136 արձանագրությունը, համաձայն որի՝ Անդրանիկ Սամվելի Ալեքսանյանը (ծնված՝ 19.03.1997թ., բնակվող՝ ք.Երևան, Նոր Նորք 5-րդ զանգված 32 շենք, 25 բնակարան հասցեում) 2024թ. հունիսի 1-ին, ժամը՝ 0325-ին, Երևան քաղաքի Գալշոյան փողոցում չունենալով տրանսպորտային միջոցներ վարելու իրավունք վարել է «ԲՄՎ» մակնիշի «37 BZ 385» հաշվառման համարանիշի տրանսպորտային միջոցը և հրաժարվել է սթափության վիճակի զննությունից:
• ՀՀ ոստիկանության «Ճանապարհային ոստիկանություն» ծառայության էլեկտրոնային ռեգիստրից ստացված տեղեկատվության զննությամբ պարզվել է, որ Անդրանիկ Սամվելի Ալեքսանյանի /ՀԾՀ՝ 2903970734/ անվամբ վարորդական իրավունքի վկայական գտնվել է զրկված վիճակում, սկիզբ՝ 04.06.2022թ., ավարտ՝ 05.06.2023թ.:
Զննում կատարելու մասին 08.01.2025թ. արձանագրությունը, համաձայն որի.
• 2022թ. հունիսի 4-ին, ժամը՝ 0725-ին, Երևան քաղաքի Դավիթ-Բեկի փողոցում ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի 1-ին վաշտի պարեկ Կարեն Գյուլամիրյանի /կրծքանշան՝ թիվ 08379/ կողմից կազմվել է վարչական իրավախախտման վերաբերյալ թիվ 8180141370 արձանագրությունը, համաձայն որի՝ Անդրանիկ Սամվելի Ալեքսանյանը (ծնված' 19.03.1997թ.) ժամը՝ 0700-ի սահմաններում, Երևան քաղաքի Դավիթ-Բեկի փողոցում վարել է «ԲՄՎ» մակնիշի «69 AP 696» հաշվառման համարանիշի տրանսպորտային միջոցը՝ ոչ սթափ վիճակում:
• Արձանագրության՝ վարչական իրավախախտում կատարած անձի բացատրությունը և դիտողությունը նշելու հատվածում առկա է ստորագրություն:
• Արձանագրությանը ծանոթանալու, իրավունքների ու պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումը ստանալու հատվածում առկա է ստորագրություն:
• Արձանագրության՝ ստացա ժամանակավոր վկայական հատվածում առկա չէ ստորագրություն:
• Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր նշված է՝ 70.2 թիվը:
• Թիվ 8180141370 վարչական գործով 2022թ. հունիսի 4-ին որոշում է կայացվել և Անդրանիկ Սամվելի Ալեքսանյանը զրկվել է վարորդական իրավունքից 1/մեկ/ տարի ժամկետով: Հիշյալ որոշման՝ «որոշման պատճենը և կատարման կարգի մասին քաղվածքն ստացա» հատվածում առկա է իրավախախտում կատարած անձի ստորագրությունը:
• Ալկոհոլի պարունակության ստուգման կտրոնի զննությամբ պարզվել է, որ ստուգաչափման սարքի համարն է՝ 93000843, զննման համարը՝ 04633, զննման ամսաթիվը՝ 04.06.2022թ., զննման ժամը՝ 07:25:02, վերջին ստուգաչափման ամսաթիվը՝ 05.01.2022թ., դատարկ թեստ՝ 0.000մգ/լ, ստուգաչափման ձևաչափը՝ ավտոմատ, ալկոհոլի պարունակությունը՝ 0.584մգ/լ, վարորդի անունն է՝ Անդրանիկ, ազգանունը՝ Ալեքսանյան, տրանսպորտային միջոցի համարանիշը՝ «69 AP 696», վարորդական վկայականի համարը՝ RF342557, Պ/Ծ ազգանունը՝ Գյուլամիրյան, կրծքանշանի համարը՝ 08379:
• ՀՀ էկոնոմիկայի նախարարության «Ստանդարտացման և չափագիտության ազագային մարմին» ՓԲԸ-ի կողմից տրված թիվ 062512 ստուգաչափման վկայականի զննությամբ պարզվել է, որ վկայականն ուժի մեջ է 2022թ. հունվարի 5-ից մինչև 2023թ. հունվարի 5-ը, ստուգաչափման սարքի գործարանային համարն է՝ 93000843, տեսակը՝ Jupiter X/RP, չափման տիրույթը՝ 0.000÷1.200մգ/լ, ճշտության դասը, կարգը /սխալանքը/՝ ±10%, արտադրողը՝ Չինաստան, պատկանում է ՀՀ ՊԾ-ին, ստուգաչափումը կատարվել է հետևյալ ստուգաչափման մեթոդիկայի անվանման նշագրով՝ MU2835-2008, ստուգաչափող անվան դիմաց առկա է ստորագրույթուն և նշված է Ա.Գուլքանյան, իսկ բաժնի /լաբորատորիայի վարիչ/ անվան դիմաց առկա է ստորագրույթյուն և նշված է Գ.Մարտիրոսյան:
• 2024թ. նոյեմբերի 21-ին, ժամը՝ 0515-ին, Երևան քաղաքի Գալշոյան փողոցում ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 3-րդ վաշտի պարեկ Դավիթ Մնացականյանի /կրծքանշան՝ թիվ 07574/ կողմից կազմվել է վարչական իրավախախտման վերաբերյալ թիվ 8180428700 արձանագրությունը, համաձայն որի՝ Անդրանիկ Սամվելի Ալեքսանյանը (ծնված՝ 19.03.1997թ.), ժամը՝ 0500-ի սահմաններում, Երևան քաղաքի Գալշոյան փողոցում վարել է «ԲՄՎ» մակնիշի «37 BZ 385» հաշվառման համարանիշի տրանսպորտային միջոցը` չունենալով տրանսպորտային միջոցներ վարելու իրավունք և ոչ սթափ վիճակում:
• Արձանագրության՝ վարչական իրավախախտում կատարած անձի բացատրությունը և դիտողությունը նշելու հատվածում առկա է ստորագրություն:
• Արձանագրությանը ծանոթանալու, իրավունքների ու պարտականությունների մասին քաղվածքը և խախտման քննարկման վայրի ու ժամանակի վերաբերյալ ծանուցումը ստանալու հատվածում առկա է ստորագրություն:
• Արձանագրության՝ ստացա ժամանակավոր վկայական հասվածում առկա չէ ստորագրություն:
• Արձանագրության ներքևի ձախ հատվածում առկա է արձանագրությունը կազմողի ստորագրությունը, որպես խախտման ծածկագիր նշված է` 203.5 թիվը:
• Ալկոհոլի պարունակության ստուգման կտրոնի զննությամբ պարզվել է, որ ստուգաչափման սարքի համարն է` 91100890, զննման համարը` 02565, զննման ամսաթիվը՝ 21.11.2024թ., զննման ժամը՝ 05:09:53, վերջին ստուգաչափման ամսաթիվը՝ 23.05.2024թ., դատարկ թեստ՝ 0.000մգ/լ, ստուգաչափման ձևաչափը՝ ավտոմատ, ալկոհոլի պարունակությունը՝ 0.296մգ/լ, վարորդի անունն է՝ Անդրանիկ, ազգանունը՝ Ալեքսանյան, տրանսպորտային միջոցի համարանիշը՝ «37 BZ 385», վարորդական վկայականի համարը՝ 2903970734, Պ/Ծ ազգանունը՝ Մնացականյան, կրծքանշանի համարը՝ 07574:
• ՀՀ էկոնոմիկայի նախարարության «Ստանդարտացման և չափագիտության ազագային մարմին» ՓԲԸ-ի կողմից տրված թիվ 121947 ստուգաչափման վկայականի զննությամբ պարզվել է, որ վկայականն ուժի մեջ է 2024թ. մայիսի 23-ից մինչև 2025թ. մայիսի 23-ը, ստուգաչափման սարքի գործարանային համարն է՝ 9100890, տեսակը՝ Jupiter X/RP, չափման տիրույթը՝ 0.000÷2.000մգ/լ, ճշտության դասը, կարգը /սխալանքը/՝ ±10%, արտադրողը՝ Չինաստան, պատկանում է ՀՀ ՊԾ-ին, ստուգաչափումը կատարվել է հետևյալ ստուգաչափման մեթոդիկայի անվանման նշագրով՝ MUL835-2008, ստուգաչափող անվան դիմաց առկա է ստորագրույթուն և նշված է Վ.Բաբաջանյան, իսկ բաժնի /լաբորատորիայի վարիչ/ անվան դիմաց առկա է ստորագրույթյուն և նշված է Գ.Մարտիրոսյան:
• ՀՀ ՆԳՆ ոստիկանության «Ճանապարհային ոստիկանություն» ծառայության էլեկտրոնային ռեգիստրում Անդրանիկ Սամվելի Ալեքսանյանի տվյալների (ՀԾ համարանիշ՝ 2903970734) մուտքագրման արդյունքում պարզվել է, որ վերջինիս տրանսպորտային միջոց վարելու իրավունքը (RF342557 սերիա համարի վարորդական վկայական) սույն քրեական վարույթը նախաձեռնելուց առաջ ունեցել է զրկված կարգավիճակ, սկիզբը՝ 04.06.2022թ., ավարտը՝ 05.06.2023թ.:
• ՀՀ ՆԳՆ ոստիկանության անձնագրային և վիզաների վարչության բնակչության պետական ռեգիստրի համակարգից ստացված քաղաքացու անձնագրի վերաբերյալ տեղեկանքի զննությամբ պարզվել է, որ Անդրանիկ Սամվելի Ալեքսանյանը ծնվել է 19.03.1997թ., անձնագիր՝ AL0403256, ՀԾ համարանիշն է՝ 2903970734, հաշվառված է՝ ք.Երևան, Նոր Նորք, Գալշոյան փողոց, 32 շենք, 25 բնակարան հասցեում:
Արտավարութային փաստաթուղթ ճանաչված և վարույթի նյութերին կցված՝ Անդրանիկ Սամվելի Ալեքսանյանի նկատմամբ կազմված վարչական իրավախախտման վերաբերյալ թիվ 8180141370, թիվ 8180405136 և թիվ 8180428700 արձանագրությունների, ալկոհոլի պարունակության ստուգման թիվ 04633 և թիվ 02565 կտրոնների, ստուգաչափման թիվ 121947 և թիվ 062512 վկայականների, ՀՀ ՆԳՆ ոստիկանության անձնագրային և վիզաների վարչության բնակչության պետական ռեգիստրի համակարգից ստացված քաղաքացու անձնագրի և ՀՀ ՆԳՆ ոստիկանության «Ճանապարհային ոստիկանություն» ծառայության էլեկտրոնային ռեգիստրից ստացված տեղեկատվության պատճենները:
Դատարանը, քրեական վարույթի ընթացքում հավաքված և մեղադրանքի հիմքում դրված ապացույցների ձևի և բովանդակության վերլուծության, միմյանց հետ համադրելու և ապացույցների ստացման աղբյուրները վերհանելու միջոցով, դրանք պատշաճ իրավական ընթացակարգի շրջանակներում ստուգման ենթարկեց և հետազոտված յուրաքանչյուր ապացույց գնահատեց վերաբերելիության, թույլատրելիության, հավաստիության, իսկ բոլոր ապացույցների համակցությունը՝ հիմնավոր եզրափակիչ դատավարական ակտ կայացնելու համար բավարարության տեսանկյունից, հետևաբար՝ ղեկավարվելով անմեղության կանխավարկածով և հիմնվելով պատշաճ ապացուցման արդյունքների վրա՝ հանգում է հետևության, որ ապացուցված է մեղադրյալ Անդրանիկ Սամվելի Ալեքսանյանին վերագրվող փաստական հանգամանքները (արարքը) և այդ արարքների քրեական հակաիրավականությունը, այդ արարքները կատարվել են նրա կողմից և ապացուցված է վերջինիս մեղավորությունը տվյալ արարքները կատարելու մեջ:
Դատարանը այդպիսի հետևության է հանգում, քանի որ դատաքննության ընթացքում մեղադրյալի մեղավորությունը հաստատվեց «հիմնավոր կասկածից վեր» ապացուցողական չափանիշին համապատասխան:
Անդրադառնալով ապացուցված արարքների նկատմամբ քրեական օրենսգրքի կիրառման ենթակա հոդվածի, հոդվածի մասի կամ կետի հարցին՝ դատարանը գտնում է, որ մեղադրյալ Անդրանիկ Ալեքսանյանին մեղսագրված արարքները համապատասխանում են 2 դրվագ ՀՀ քրեական օրենսգրքի 344-րդ հոդվածի 2-րդ մասի հատկանիշներին, որոնցով և պետք է ենթարկվի քրեական պատասխանատվության:
Պատիժ նշանակելիս դատարանը հաշվի է առնում կատարված հանցանքների բնույթն ու վտանգավորության աստիճանը, հանցագործությունների շարժառիթը և նպատակը, մեղադրյալի անձը բնութագրող, ինչպես նաև նրա պատասխանատվությունը և պատիժը մեղմացնող և ծանրացնող հանգամանքներն ու նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությունը:
Դատարանը մեղադրյալ Անդրանիկ Ալեքսանյանի անձը բնութագրող հանգամանք է դիտում՝ 2016թ. ապրիլի 2-ից 6-ի մարտական գործողությունների ժամանակ մարտական հերթապահություն իրականացնելը և 16.10.2020թ. մինչև 20.10.2020թ. պատերազմի ժամանակ ծառայելը :
Դատարանը մեղադրյալ Անդրանիկ Ալեքսանյանի պատասխանատվությունը և պատիժը մեղմացնող հանգամանք է համարում այն, որ ինքնակամ ներկայացել է վարույթն իրականացնող մարմնին և զղջացել է կատարած արարքների համար և ընդունել մեղքը, ինչը որպես մեղավոր անձի հետհանցավոր դրական վարքագիծ, վկայում է այն մասին, որ նա լրիվ գիտակցել է իր արարքի հանրային վտանգավորությունը և զղջացել է դրա համար:
Դատարանը մեղադրյալ Անդրանիկ Ալեքսանյանի պատասխանատվությունն ու պատիժը ծանրացնող հանգամանքներ չհայտնաբերեց:
Պատիժ նշանակելը քրեական գործերով արդարադատության իրականացման կարևոր և պատասխանատու բաղադրամասերից է, ուստի՝ օրենսդրի կողմից մեծապես կարևորվում է յուրաքանչյուր դեպքում անձի նկատմամբ պատիժ նշանակելիս քրեաիրավական նորմերով ամրագրված օրինականության, արդարության, պատասխանատվության անհատականացման և մարդասիրության սկզբունքների պահպանումը:
ՀՀ քրեական օրենսգրքի 7-րդ հոդվածի 1-ին մասի համաձայն՝
«Հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը»:
Հանցագործության համար մեղավոր ճանաչված անձի նկատմամբ նշանակվող պատժի նպատակներն են.
«(…) վերականգնել սոցիալական արդարությունը, վերասոցիալականացնել պատժի ենթարկված անձին և կանխել հանցագործությունները» (Տե՛ս ՀՀ քրեական օրենսգրքի 55-րդ հոդվածի 2-րդ մասը):
Շարադրված հոդվածների վերլուծությունից հետևում է, որ ՀՀ քրեական օրենսգրքի 55-րդ հոդվածի 2-րդ մասով սահմանված՝ սոցիալական արդարությունը վերականգնելու նպատակը բխում է արդարության և պատասխանատվության անհատականացման սկզբունքն ամրագրած՝ ՀՀ քրեական օրենսգրքի 7-րդ հոդվածի 1-ին մասի բովանդակությունից: Մասնավորապես՝ նշված հոդվածի այն պահանջից, ըստ որի՝ հանցանք կատարած անձին քրեական պատասխանատվության, պատժի կամ քրեաիրավական ներգործության այլ միջոցների ենթարկելը կամ քրեական պատասխանատվությունից կամ պատժից ազատելը պետք է լինի արդարացի՝ ապահովելով ինչպես կիրառվող օրենսդրության, այնպես էլ պետական հակազդեցության համաչափությունը կատարված հանցանքին, դա կատարելու հանգամանքներին, հանցավորի անձնավորությանը (Արդարության և պատասխանատվության անհատականացման սկզբունքի ու «Պատիժ» հասկացությանը և դրա նպատակների վերաբերյալ Վճռաբեկ դատարանն իրավական դիրքորոշում է հայտնել թիվ ՎԲ-50/07, թիվ ՎԲ-192/07, թիվ ՎԲ-201/07 և թիվ ԱՎԴ2/0059/01/08 որոշումներում):
ՀՀ քրեական օրենսգրքի 69-րդ հոդվածի 1-ին և 2-րդ մասերի համաձայն՝
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սանկցիայի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործությամբ պատճառված վնասի բնույթով և չափով, հանցագործության եղանակով, տեղով, ժամանակով, հանցագործության շարժառիթներով և նպատակներով, դիտավորության կամ անզգուշության տեսակով, պատասխանատվությունը և պատիժը մեղմացնող ու ծանրացնող հանգամանքներով, ինչպես նաև նշանակվող պատժի` հանցավորի վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությամբ»:
Վճռաբեկ դատարանը մշտապես ընդգծել է, որ պատժի արդարությունը դրսևորվում է հանցագործության և քրեաիրավական ներգործության միջոցների (պատժի) համաչափության ապահովմամբ: Հետևաբար՝ կոնկրետ գործով պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության բնույթի ու աստիճանի, հանցավորի անձի, պատիժը մեղմացնող և ծանրացնող հանգամանքների վերլուծության հիման վրա (Տե՛ս, mutatis mutandis, Վճռաբեկ դատարանի՝ Գառնիկ Գալստյանի գործով` 16.12.2014թ., թիվ ԵՄԴ/0027/01/14, Էդվարդ Ադամյանի գործով` 16.12.2014թ., թիվ ԵԷԴ/0048/01/14, Արարատ Ավագյանի և Վահան Սահակյանի գործով` 31.10.2014թ., թիվ ԵԿԴ/0252/01/13, Արմեն Շահբազյանի գործով` 15.08.2014թ., թիվ ԵՇԴ/0143/01/13, Նարեկ Սարգսյանի գործով` 22.12.2011թ., թիվ ԵԿԴ/0042/01/11 և Գարուշ Մադաթյանի գործով՝ 17.02.2009թ., թիվ ԵՇԴ/0029/01/08 որոշումները):
Մեղադրյալին մեղսագրվող հանցանքի հանրային վտանգավորության աստիճանի և բնույթի վերաբերյալ Վճռաբեկ դատարանը իրավական դիրքորոշում է արտահայտել Գ.Մադաթյանի վերաբերյալ գործով կայացրած որոշմամբ, համաձայն որի՝ «Արարքի հանրային վտանգավորության բնույթը հանցագործության որակական կողմն է, այն որոշվում է մեղքի ձևի և տեսակի, հանցագործության նպատակի և շարժառիթի, ինչպես նաև քրեական օրենսդրությամբ պահպանվող հասարակական հարաբերության՝ հանցանքի կատարման պահին ունեցած սոցիալական նշանակության վերաբերյալ փաստական տվյալների ամբողջությամբ:
Արարքի հանրային վտանգավորության աստիճանի որոշման ժամանակ դատարանը պետք է բացահայտի կատարված կոնկրետ հանցանքի առանձնահատուկ հատկանիշները, որոնք կարող են ազդել հանրության վտանգավորության վրա՝ հանցագործությամբ պատճառված վնասի չափը, հանցագործության կատարման եղանակը, հանցավոր մտադրության իրականացման աստիճանը, հանցակցության դեպքում՝ հանցավորի կատարած արարքը և հանցագործությանը նրա մասնակցության աստիճանը» (տե՛ս Գարուշ Մադաթյանի գործով Վճռաբեկ դատարանի՝ 17.02.2009թ., թիվ ԵՇԴ/0029/01/08 որոշման 14-րդ կետը):
Ավելին՝ Վճռաբեկ դատարանը մշտապես ընդգծել է, որ հանցագործության հանրային վտանգավորության տիպային բնութագիրն արտացոլվում է օրենսդրի կողմից սահմանված սանկցիայում, իսկ յուրաքանչյուր կոնկրետ գործով արարքի հանրային վտանգավորության գնահատականը դատարանի կողմից կարող է որոշվել կոնկրետ հանցագործության տարրերի առանձնահատկությունների, դրա կատարման հանգամանքների, հանցավորի անձնավորության, պատասխանատվությունն ու պատիժը մեղմացնող և ծանրացնող հանգամանքների հիման վրա (տե՛ս Վճռաբեկ դատարանի` Գառնիկ Սեյրանի Գալստյանի գործով` 16.12.2014թ., թիվ ԵՄԴ/0027/01/14, Արարատ Ավագյանի և Վահան Սահակյանի գործով՝ 31.10.2014թ., թիվ ԵԿԴ/0252/01/13 և այլ որոշումներ):
Ինչ վերաբերում է հանցագործության կատարման հանգամանքներին, ապա Վճռաբեկ դատարանն արձանագրել է, որ դրանք յուրաքանչյուր քրեական գործով պետք է գնահատման ենթարկվեն հանցագործության՝ հանրության համար վտանգավորության աստիճանի ու բնույթի համատեքստում: Գնահատման արդյունքում դատարանը պետք է պարզի հանցավոր վարքագծի դրսևորմանը նախորդող և ուղեկցող հանգամանքները, հանցավոր վարքագծի դրսևորման եղանակը, հանցավոր մտադրության իրականացման աստիճանը և այլն:
Դրանից բացի, դատարանի հետևությունները, ի թիվս այլոց, պետք է հիմնված լինեն օբյեկտիվ գոյություն ունեցող այնպիսի տվյալների համակողմանի վերլուծության վրա, որոնք բնութագրում են արարքը, հանցավորի կողմից արարքի հանրորեն վտանգավոր հետևանքները նախատեսելու բնույթն ու աստիճանը, հանցավորի անձը և վկայում են պատիժը պայմանականորեն չկիրառելու հիմքերի առկայության մասին (տե՛ս թիվ ԵԷԴ/0132/01/13, ԵԱՔԴ/0078/01/09, ԵԿԴ/0042/01/11, ՍԴ/0109/01/12, ԱՎԴ/0082/01/12, ԵԱՔԴ/0091/01/14 և ՎԲ-50/70 գործերով որոշումները):
ՀՀ քրեական օրենսգրքի ընդհանուր մասի վերը թվարկված դրույթներից և Վճռաբեկ դատարանի վերոնշյալ իրավական դիրքորոշումներից հետևում է, որ հանցագործության համար մեղավոր ճանաչված անձի նկատմամբ պատժատեսակի և պատժաչափի վերաբերյալ դատարանի որոշումը պետք է հիմնված լինի կատարած հանցագործության, դրա առանձնահատկությունների, գործի կոնկրետ հանգամանքների, հանցավորի անձի, պատասխանատվությունը և պատիժը մեղմացնող կամ ծանրացնող հանգամանքների բազմակողմանի գնահատման վրա՝ օրինականության, արդարության, պատասխանատվության անհատականացման և մարդասիրության սկզբունքներին համապատասխան, նպատակ ունենալով ապահովել ՀՀ քրեական օրենսգրքի 55-րդ հոդվածի 2-րդ մասում նշված պատժի նպատակների իրագործման հնարավորությունը:
ՀՀ քրեական օրենսգրքի 67-րդ հոդվածի 5-րդ մասի համաձայն՝
«Առաջին անգամ ոչ մեծ ծանրության հանցագործություն կատարած անձը չի կարող դատապարտվել ազատազրկման»:
Վերոգրյալի հաշվառմամբ նկատի ունենալով, որ Անդրանիկ Ալեքսանյանը առաջին անգամ կատարել է ոչ մեծ ծանրության հանցագործություններ ՝ դատարանը գտնում է, որ օրենքի ուժով վերջինս չի կարող դատապարտվել ազատազրկման:
Այսպիսով՝ դատարանը, հաշվի առնելով Ա.Ալեքսանյանի կատարած հանցանքների բնույթն ու վտանգավորության աստիճանը, հանցագործությունների շարժառիթը և նպատակը, գործի հանգամանքները, քրեական օրենսդրությամբ պահպանվող կոնկրետ հասարակական հարաբերության սոցիալական նշանակությունը և հանցագործությունների ծանրությունը, նրա անձը բնութագրող, այդ թվում՝ պատասխանատվությունը և պատիժը մեղմացնող հանգամանքները, ծանրացնող հանգամանքների բացակայությունը, նշանակվող պատժի` վերջինիս վերասոցիալականացման և իրավահպատակ վարքագծի ձևավորման գործընթացի ու նրա ընտանիքի կենսապայմանների վրա ազդեցությունը, հանցանքի սանկցիայով նախատեսված՝ նշանակման ենթակա պատժի առավելագույն և նվազագույն սահմանների շրջանակում, իր հայեցողության շրջանակներում ղեկավարվելով պատժի նշանակման օրինականության, արդարության, պատասխանատվության անհատականացման և մարդասիրության սկզբունքներով, օրենքով և ներքին համոզմամբ, գտնում է, որ Անդրանիկ Սամվելի Ալեքսանյանի նկատմամբ 2 դրվագ ՀՀ քրեական օրենսգրքի 344-րդ հոդվածի 2-րդ մասի սանկցիայով պատիժ պետք է նշանակել այդ հանցագործության համար նախատեսված պատիժներից առավել մեղմ պատժի՝ տուգանքի ձևով, քանի որ այն կարող է ապահովել պատժի նպատակները:
Տուգանքի ձևով պատիժ նշանակելիս դատարանն ուշադրություն է դարձնում նաև մեղադրյալի ու նրա ընտանիքի գույքային դրությանը, ինչպես նաև մեղադրյալի՝ եկամուտ ստանալու հնարավորությանը(նրա վաստակի չափը, ընտանիքի ապահովվածությունը և այլն), մասնավորապես՝ ՀՀ պետական եկամուտների կոմիտեից ստացված տեղեկատվության հիման վրա կատարված հաշվարկի արդյունքում՝ մեղադրյալ Անդրանիկ Ալեքսանյանին մեղսագրվող հանցանքներն ավարտվելու օրվան՝ 01.06.2024թ. և 21.11.2024թ. նախորդող 12 ամիսների ընթացքում վերջինիս ամսական եկամտի չափը պակաս է ստացվել նվազագույն աշխատավարձի չափից, հետևաբար՝ դատարանը գտնում է, որ տուգանքի չափը պետք է հաշվարկել հանցանքը կատարելու պահին նվազագույն աշխատավարձի՝ 75.000(յոթանասունհինգ հազար) ՀՀ դրամի չափով:
Ընդ որում, թեպետ իրավահպատակ վարքագիծը բնորոշ է հասարակության լայն շրջանակներին և յուրաքանչյուր քաղաքացու հասարակական պարտքն է, հետևապես անձի կողմից նախկինում հանցանք կատարած կամ դատապարտված չլինելը, ինչպես նաև նոր հանցանք չկատարելը չեն կարող դիտարկվել որպես անձի պատասխանատվությունը և պատիժը մեղմացնող հանգամանքներ, այդուհանդերձ՝ մեղադրյալ Ա.Ալեքսանյանի՝ նախկինում դատապարտված չլինելու և առաջին անգամ ոչ մեծ ծանրության հանցանքներ կատարած լինելու հանգամանքը գնահատելով վերջինիս կողմից դրա հետևանքները նախատեսելու բնույթի և աստիճանի կոնտեքստում, և ելնելով նաև մարդասիրության սկզբունքից, նրա դրսևորած հետհանցավոր դրական վարքագծից, ընտանեկան և սոցիալական դրությունից, սոցիալական միջավայրում մեղադրյալի զբաղեցրած տեղից և սոցիալական միջավայրում նրա բնութագրերից ու բոլոր այս հանգամանքների բազմակողմանի, լրիվ և օբյեկտիվ հետազոտության վրա հիմնված ներքին համոզմամբ՝ դատարանը հանգում է հետևության, որ տուգանքի նվազագույն չափը նշանակելով հնարավոր է հասնել ՀՀ քրեական օրենսգրքի 55-րդ հոդվածի 2-րդ մասով նախատեսված պատժի նպատակներին՝ սոցիալական արդարության վերականգնմանը, պատժի ենթարկված անձի վերասոցիալականացմանն ու հանցագործությունների կանխմանը, ինչպես նաև ապահովել ՀՀ քրեական օրենսգրքի 7-րդ և 69-րդ հոդվածներով սահմանված՝ արդարության, պատասխանատվության անհատականացման և պատիժ նշանակելու ընդհանուր սկզբունքները:
Նկատի ունենալով, որ Անդրանիկ Սամվելի Ալեքսանյանը կատարել է ՀՀ քրեական օրենսգրքի 344-րդ հոդվածի 2-րդ մասով նախատեսված երկու հանցանք, որոնցից ոչ մեկի համար քրեական պատասխանատվության չի ենթարկվել՝ դատարանը գտնում է, որ հանցագործությունների համակցությամբ յուրաքանչյուր հանցագործության համար առանձին պատիժ նշանակելով` վերջնական պատիժը պետք է որոշել ՀՀ քրեական օրենսգրքի 74-րդ հոդվածի 1-ին և 9-րդ մասերով սահմանված կարգով՝ նշանակված պատիժները լրիվ գումարելու միջոցով:
Դատարանը նաև պարզեց, որ մեղադրյալ Ա.Ալեքսանյանը չի կարող անհապաղ և ամբողջությամբ վճարել նշանակված տուգանքը, սակայն պատրաստակամ է այն վճարել մաս առ մաս:
ՀՀ քրեական օրենսգրքի 59-րդ հոդվածի 8-րդ մասի համաձայն՝
«Եթե դատապարտվողն ի վիճակի չէ անհապաղ և ամբողջությամբ վճարելու նշանակված տուգանքը, ապա դատարանը նրա համար վճարման ժամկետ է սահմանում՝ առավելագույնը 1 տարի, կամ թույլատրում է տուգանքը մաս առ մաս վճարել նույն ժամկետում։ (...)»:
Նկատի ունենալով, որ մեղադրյալ Անդրանիկ Ալեքսանյանը, նյութական դրությունից ելնելով, ի վիճակի չէ անհապաղ և ամբողջությամբ վճարելու տուգանքը, այսինքն՝ տուգանքի անհապաղ վճարումն անհնար է՝ դատարանը գտնում է, որ նրան պետք է թույլատրել նշանակվող տուգանքը մաս առ մաս վճարել 1 տարվա ընթացքում:
Քննարկելով խափանման միջոցի հարցը՝ դատարանը գտնում է, որ մեղադրյալ Անդրանիկ Սամվելի Ալեքսանյանի նկատմամբ կիրառված խափանման միջոց բացակայելու արգելքը վերացնելու կամ փոխելու հիմքեր չկան, հետևաբար՝ այն պետք է թողնել անփոփոխ՝ մինչև դատավճռի օրինական ուժի մեջ մտնելը:
Քննարկելով վարութային ծախսերի հարցը՝ դատարանն արձանագրում է, որ ՀՀ քրեական դատավարության օրենսգրքի 167-րդ հոդվածի 1-ին մասով նախատեսված վարութային ծախսերի վերաբերյալ տվյալները բացակայում են:
Անդրադառնալով ապացույցների տնօրինման հարցին՝ դատարանը գտնում է, որ արտավարութային փաստաթուղթ ճանաչված և վարույթի նյութերին կցված՝ Անդրանիկ Սամվելի Ալեքսանյանի նկատմամբ կազմված վարչական իրավախախտման վերաբերյալ թիվ 8180141370, թիվ 8180405136 և թիվ 8180428700 արձանագրությունների, ալկոհոլի պարունակության ստուգման թիվ 02565 և թիվ 04633 կտրոնների, ստուգաչափման թիվ 121947 և 062512 վկայականների, ՀՀ ՆԳՆ ոստիկանության անձնագրային և վիզաների վարչության բնակչության պետական ռեգիստրի համակարգից ստացված քաղաքացու անձնագրի և ՀՀ ՆԳՆ ոստիկանության «Ճանապարհային ոստիկանություն» ծառայության էլեկտրոնային ռեգիստրից ստացված տեղեկատվության պատճենները պետք է պահել վարույթի նյութերի հետ՝ դրանք պահելու ամբողջ ընթացքում:
Դատավճիռն օրինական ուժի մեջ մտնելուց հետո, Անդրանիկ Սամվելի Ալեքսանյանի նկատմամբ սույն քրեական գործի շրջանակներում կիրառված սահմանափակումները պետք է վերացնել:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 347-350-րդ և 364-րդ հոդվածներով՝ դատարանը.

Վ Ճ Ռ Ե Ց

Անդրանիկ Սամվելի Ալեքսանյանին մեղավոր ճանաչել 2(երկու) դրվագ ՀՀ քրեական օրենսգրքի 344-րդ հոդվածի 2-րդ մասով՝ յուրաքանչյուր դրվագով դատապարտելով տուգանքով՝ նվազագույն աշխատավարձի հնգապատիկի՝ 375.000(երեք հարյուր յոթանասուհինգ հազար) ՀՀ դրամի չափով:
ՀՀ քրեական օրենսգրքի 74-րդ հոդվածի 1-ին և 9-րդ մասերի կիրառմամբ՝ նշանակված պատիժները լրիվ գումարելու միջոցով, Անդրանիկ Սամվելի Ալեքսանյանի նկատմամբ վերջնական պատիժ նշանակել տուգանք՝ 750.000(յոթ հարյուր հիսուն հազար) ՀՀ դրամի չափով:
Անդրանիկ Սամվելի Ալեքսանյանին թույլատրել նշանակված՝ 750.000(յոթ հարյուր հիսուն հազար) ՀՀ դրամ տուգանքը մաս առ մաս վճարել 1(մեկ) տարվա ընթացքում:
Անդրանիկ Սամվելի Ալեքսանյանի նկատմամբ կիրառված խափանման միջոց բացակայելու արգելքը թողնել անփոփոխ՝ մինչև դատավճռի օրինական ուժի մեջ մտնելը:
Վարույթի նյութերին կցված արտավարութային փաստաթղթերը պահել վարույթի նյութերի հետ՝ դրանք պահելու ամբողջ ընթացքում:
Դատավճիռն օրինական ուժի մեջ մտնելուց հետո, Անդրանիկ Սամվելի Ալեքսանյանի նկատմամբ սույն քրեական գործի շրջանակներում կիրառված սահմանափակումները վերացնել:
Դատավճիռը կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո՝ մեկամսյա ժամկետում:


ԴԱՏԱՎՈՐ Մ. ՇԱՀՎԵՐԴՅԱՆ