Գործ ԵԴ1/0288/01/25



Ո Ր Ո Շ ՈՒ Մ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ
ԵՎ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ՄԱՍԻՆ

03 հուլիսի 2025 թվական ք.Երևան

Երևան քաղաքի առաջին ատյանի ընդհանուր իրավասության քրեական դատարանը՝ նախագահությամբ դատավոր Ժ.Չիչոյանի, քարտուղարությամբ Ա.Մարտիրոսյանի, մասնակցությամբ՝ հանրային մեղադրող Ն.Հարությունյանի, պաշտպան Դ.Մարտիրոսյանի, տուժող Գ․Գրիգորյանի, տուժողի լիազոր ներկայացուցիչ Տ․Գրիգորյանի, մեղադրյալ Հ.Պետրոսյանի, դռնբաց դատական նիստում քննության առնելով մեղադրյալ Հովիկ Աշոտի Պետրոսյանի նկատմամբ՝ տուժողի հետ հաշտության հիմքով, քրեական հետապնդումը դադարեցնելու վերաբերյալ հարցը․
Պ Ա Ր Զ Ե Ց

2023 թվականի դեկտեմբերի 30-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ՝ Ն․Պետրոսյանը արձանագրություն է կազմել ՀՀ քրեական օրենսգրքի 324-րդ հոդվածի 1-ին մասի հատկանիշներով թիվ 60-5404-23 քրեական վարույթը նախաձեռնելու մասին։
2023 թվականի դեկտեմբերի 30-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ՝ Ն․Պետրոսյանը որոշում է կայացրել թիվ 60540423 քրեական վարույթով Հովիկ Աշոտի Պետրոսյանին որպես տուժող ճանաչելու մասին։
2023 թվականի դեկտեմբերի 30-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ՝ Ն․Պետրոսյանը որոշում է կայացրել թիվ 60540423 քրեական վարույթով Գևորգ Ոսկանի Գրիգորյանին որպես տուժող ճանաչելու մասին։
2024 թվականի հունիսի 13-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ՝ Ն․Պետրոսյանը որոշում է կայացրել թիվ 60540423 քրեական վարույթով Հովիկ Աշոտի Պետրոսյանի տուժողի դատավարական կարգավիճակը դադարեցնելու մասին։
2024 թվականի դեկտեմբերի 16-ին ՀՀ քննչական կոմիտեի Երևան քաղաքի քննչական վարչության ՃՏՀ քննության բաժնի քննիչ՝ Ն․Պետրոսյանը միջնորդություն է հարուցել քրեական վարույթի օրինականության նկատմամբ դատավարական հսկողություն իրականացնող դատախազին՝ Հովիկ Աշոտի Պետրոսյանի նկատմամբ ՀՀ քրեական օրենսգրքի 342-րդ հոդվածի 1-ին մասով, հանրային քրեական հետապնդում հարուցելու մասին։
2024 թվականի դեկտեմբերի 16-ին Երևան քաղաքի դատախազության ավագ դատախազ Ն.Հարությունյանը որոշում է կայացրել թիվ 60-5004-23 քրեական վարույթով ՀՀ քրեական օրենսգրքի 342-րդ հոդվածի 1-ին մասով Հովիկ Աշոտի Պետրոսյանի նկատմամբ հանրային քրեական հետապնդում հարուցելու մասին, մեղադրանքի փաստական կողմի հետևյալ նկարագրությամբ․ «[ն]ա, իր վարած ավտոմեքենայով խախտել է ճանապարհային երթևեկության կանոնների և ճանապարհային երթևեկության անվտանգության ապահովմանն ուղղված պահանջը, որի հետևանքով Գևորգ Ոսկանի Գրիգորյանի առողջությանն անզգուշությամբ պատճառել է ծանրության վնաս, որպիսի գործողությունները դրսևորվել են հետևյալում.
Այսպես՝
Հովիկ Աշոտի Պետրոսյանը, գտնվելով ոչ սթափ վիճակում՝ արտաշնչած օդում 0.267 միլիգրամ ալկոհոլի պարունակությամբ, և դրանով իսկ խախտելով ՀՀ Ազգային ժողովի կողմից 2005 թվականի հուլիսի 8-ին ընդունված «Ճանապարհային երթեւեկության անվտանգության ապահովման մասին» ՀՀ օրենքի 18-րդ հոդվածի 1-ին մասի «ա» կետի և 24-րդ հոդվածի 7-րդ մասի «ա» կետի պահանջները, 2023 թվականի դեկտեմբերի 30-ին՝ ժամը 05:00-ի սահմաններում, «Կիա» մակնիշի 68 BB 859 հաշվառման համարանիշի ավտոմոբիլը վարել է Երևան քաղաքի Իսակովի պողոտայով՝ «Կիլիկիա» ավտոկայանի կողմից Բագրատունյաց պողոտայի ուղղությամբ, մոտ 90 կմ/ժ արագությամբ, 2-րդ երթևեկելի գոտու միջնամասով և հասնելով Երևան քաղաքի Իսակովի պողոտայի և Ամերիկյան փողոցի լուսացույցով կարգավորվող խաչմերուկին՝ թույլ է տվել «Ճանապարհային երթևեկության անվտանգության ապահովման մասին» ՀՀ օրենքի 23-րդ հոդվածի 3-րդ մասի, ինչպես նաև «ՀՀ ճանապարհային երթևեկության կանոնները և տրանսպորտային միջոցների շահագործումն արգելող անսարքությունների և պայմանների ցանկը հաստատելու մասին» ՀՀ կառավարության 2007 թվականի հունիսի 28-ի թիվ 955-Ն որոշմամբ հաստատված ճանապարհային երթևեկության կանոնների 62-րդ և 65-րդ կետերի պահանջներին հակասող գործողություններ, այն է՝ ավտոմոբիլը վարել է բնակավայրում սահմանված թույլատրելի առավելագույն 60կմ/ժ արագությունը գերազանցող 90 կմ/ժ արագությամբ, չի հետևել ողջ ճանապարհատրանսպորտային իրադրության զարգացմանը և իր վարած ավտոմոբիլի ու առջևից համընթաց ընթացող՝ Գևորգ Ոսկանի Գրիգորյանի կողմից վարվող «Մազդա» մակնիշի 37 UG 910 հաշվառման համարանիշն ավտոմոբիլի միջև չի պահպանել անվտանգությունն ապահովող տարածություն, տեխնիկական տեսակետից ստեղծել է վթարային իրադրություն և այդ մեքենային չբախվելու համար փորձել է վերադասավորվել 3-րդ երթևեկելի գոտի, սակայն իր ավտոմեքենայի առջևի աջ անկյունային հատվածով բախվել է Գևորգ Գրիգորյանի կարած «Մազդա» մակնիշի 37 UG 910 հաշվառման համարանիշի ավտոմոբիլի հետևի ձախ անկյունային հատվածին, դրանցով պայմանավորել տվյալ պատահարի առաջացումը՝ ինքն իրեն զրկելով այն կանխելու տեխնիկական հնարավորությունից, որի հետևանքով՝ համակցված գանգուղեղային ու ողնաշարի պարանոցային հատվածքների /կռանիո-կերտեբրալ/ բութ բաց և փակ վնասվածքի՝ աջից ականջախանցու հետին մակերեսի շրջանի սալջարդ վերքի, աջից ուղեղի կիսագնդի ճակատային բլթի կոնտուզիոն պարենքիմատոզ արյունազեղման, աջից ուղեղի կիսագնդի ճակատային բլթի միջին աստիճանի սալջարդի, աջից ուղեղի կիսագնդի ճակատային բլթի սուբարախնոիդալ արյունազեղման, դեպի գանգի հիմ՝ սեպոսկրի մարմնի, թևերի շրջանների վրա տարածմամբ՝ աջից քունքոսկրի խրթեշի, բրգի բազմաթիվ, մախաթաձև ելունի գծային կոտրվածքների, աջից այտային աղեղի, աջից ակնակապճի հետին պատի, աջից հայմորյան խոռոչի առաջային, միջին պատերի աննշան տեղաշարժով, հիմային ծոցի պատերի՝ վերջինիս աջից բեկորների քիչ տեղաշարժով կոտրվածքների, ձախից քունքոսկրի բրգի թմբկախոռոչի, արտաքին լսողական անցուղու առաջային պատի կոտրվածքների և պարանոցային վեցերորդ ողի մարմնի սեպաձևի դեֆորմացիայով՝ վեցերորդ պարանոցային ողի փշային ելունի քիչ տեղաշարժով կոտրվածքի ձևով, որոնք ուղեկցվել են կոտրվածքների պրոեկցիայով՝ փափուկ հյուսվածքների էմֆիզեմայով, պնևմոցեֆալիայով, քունքոսկրերի, սեպաձև ոսկրի հեմոսինուսով, ձախակողմյան օտտոհեմոլիքվորեայով, աջից դիմային, զատիչ նյարդերի, ձախից ակնաշարժ նյարդի տրավմատիկ նևրոպաթիայով, աջակողմյան հետտրավմատիկ օտիտով և առաջին աստիճանի կոնդուկտիվ ծանրալսության զարգացումների ձևով Գևորգ Ոսկանի Գրիգորյանի առողջությանն անզգուշությամբ պատճառել է կյանքին վտանգ սպառնացող ծանր վնաս:»
2024 թվականի դեկտեմբերի 16-ին Հովիկ Աշոտի Պետրոսյանի նկատմամբ որպես խափանման միջոց է ընտրվել Հայաստանի Հանրապետությունից բացակայելու արգելքը։
2024 թվականի դեկտեմբերի 30-ին կազմվել է մեղադրական եզրակացությունը:
2025 թվականի հունվարի 16-ին Երևան քաղաքի դատախազության ավագ դատախազ Ն.Հարությունյանը որոշում է կայացրել մեղադրական եզրակացությունը հաստատելու մասին:
2025 թվականի հունվարի 17-ին թիվ 60-5404-23 քրեական գործը մուտք է եղել դատարան, թիվ ԵԴ1/0519/01/24 համարի ներքո էլեկտրոնային եղանակով մակագրվել և 2025 թվականի հունվարի 20-ին հանձնվել է դատավոր Ժ.Չիչոյանին:
2025 թվականի հունվարի 21-ին դատավոր Ժ․Չիչոյանը որոշում է կայացրել քրեական գործով վարույթ ստանձնելու և նախնական դատալսումներ նշանակելու մասին:
2025 թվականի հուլիսի 03-ի դատական նիստում պաշտպան Դ․Մարտիրոսյանը միջնորդություն ներկայացրեց մեղադրյալ Հովիկ Պետրոսյանի նկատմամբ քրեական հետապնդումը դադարեցնելու և քրեական գործի վարույթը կարճելու վերաբերյալ։
Մեղադրյալ Հովիկ Պետրոսյանը միացավ պաշտպանի ներկայացրած միջնորդությանը՝ հայտնեց, որ համաձայն է որպեսզի իր նկատմամբ քրեական հետապնդումը դադարեցվի տուժողի հետ հաշտվելու հիմքով:
Տուժող Գևորգ Գրիգորյանը և վերջինիս լիազոր ներկայացուցիչ Տիգրան Գրիգորյանը հայտնեցին, որ տուժողը հաշտվել է մեղադրյալ Հովիկ Պետրոսյանի հետ, նրա նկատմամբ քրեական հետապնդում իրականացնելու բողոք և գույքային պահանջ չունի և խնդրում է այդ հիմքով վերջինիս նկատմամբ քրեական հետապնդումը դադարեցնել և քրեական գործի վարույթը կարճել։
Հանրային մեղադրողը նշեց, որ ՀՀ քրեական օրենսգրքի 82-րդ հոդվածի կանոնի կիրառմամբ, չի առարկում մեղադրյալի նկատմամբ քրեական հետապնդումը դադարեցնելու դեմ՝ տուժողի հետ հաշտվելու հիմքով:
Դատարանը քննության առարկա դարձնելով մեղադրյալի նկատմամբ՝ ՀՀ քրեական օրենսգրքի 342-րդ հոդվածի 1-ին մասով, քրեական հետապնդումը՝ տուժողի հետ հաշտվելու հիմքով դադարեցնելու հարցը, գտնում է, որ քրեական հետապնդումը ենթակա է դադարեցման և քրեական գործի վարույթը կարճման հետևյալ հիմնավորմամբ.
ՀՀ քրեական օրենսգրքի 82-րդ հոդվածի 1-ին և 5-րդ մասերի համաձայն՝
«1. Եթե անձն առաջին անգամ է հանցանք կատարել, ապա ազատվում է քրեական պատասխանատվությունից, եթե նրա կատարած արարքը ոչ մեծ կամ միջին ծանրության հանցանք է, և նրա ու տուժողի միջև առկա է հաշտության վերաբերյալ ինքնուրույն և ազատ կամարտահայտության վրա հիմնված փոխադարձ համաձայնությունը, բացառությամբ այն դեպքերի, երբ կատարված հանցանքում առկա են ընտանիքում բռնության հատկանիշներ:
(...)
5. Նախկինում սույն հոդվածով նախատեսված հիմքով քրեական պատասխանատվությունից ազատված անձը չի կարող նույն հիմքով կրկին ազատվել քրեական պատասխանատվությունից»:
Նույն օրենսգրքի 3-րդ հոդվածի 1-ին մասի 2-րդ կետի համաձայն՝ «առաջին անգամ հանցանք կատարած` անձ, որը նախկինում հանցանք չի կատարել կամ կատարել է, սակայն ազատվել է քրեական պատասխանատվությունից, կամ որի դատվածությունը սույն օրենսգրքով սահմանված կարգով մարվել կամ վերացվել է»:
Նույն օրենսգրքի 17-րդ հոդվածի 3-րդ մասի համաձայն՝ միջին ծանրության հանցանքներ են համարվում սույն օրենսգրքով նախատեսված այն արարքները, որոնց համար սույն օրենսգրքի Հատուկ մասով նախատեսված առավելագույն պատիժը չի գերազանցում 5 տարի ժամկետով ազատազրկումը:
Վերոնշյալ նորմերի վերլուծությունից հետևում է, որ անձը տուժողի հետ հաշտության հիմքով ենթակա է քրեական պատասխանատվությունից ազատման, եթե գոյություն ունեն հետևյալ երեք պայմանների միաժամանակյա առկայությունը`
ա/ անձն առաջին անգամ կատարել է ոչ մեծ կամ միջին ծանրության հանցանք, որում առկա չեն ընտանիքում բռնության հատկանիշներ,
բ/ տուժողի և մեղադրյալի միջև առկա է հաշտության վերաբերյալ ինքնուրույն և ազատ կամարտահայտության վրա հիմնված փոխադարձ համաձայնություն,
գ/ նախկինում անձը տուժողի հետ հաշտության հիմքով չի ազատվել քրեական պատասխանատվությունից:
Համաձայն ՀՀ ոստիկանության ինֆորմացիոն կենտրոնի շտեմարանի տեղեկատվության՝ Հովիկ Աշոտի Պետրոսյանը համարվում են դատվածություն չունեցող անձ։ Դատարանն արձանագրում է նաև, որ մեղադրյալի նկատմամբ նախկինում չի կիրառվել տուժողի հետ հաշտության հիմքով քրեական պատասխանատվությունից ազատելու կառուցակարգը:
Հաշվի առնելով վերոնշյալը, ինչպես նաև հիմք ընդունելով այն փաստերը, որ 1) տուժողը հաշտվել է մեղադրյալ՝ Հովիկ Աշոտի Պետրոսյանի հետ, նրանց միջև առկա է ինքնուրույն և ազատ կամարտահայտության վրա հիմնված փոխադարձ համաձայնություն, 2) մեղադրյալը կատարել է արարք, որը ՀՀ քրեական օրենսգրքով դասվում է միջին ծանրության հանցագործությունների շարքին, ուստի, Դատարանը գտնում է, որ առկա են ՀՀ քրեական օրենսգրքի 82-րդ հոդվածով ամրագրված վավերապայմանները:
ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետի համաձայն՝ քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե` անձը Հայաստանի Հանրապետության քրեական օրենսգրքի ընդհանուր կամ հատուկ մասի դրույթների ուժով ենթակա է ազատման քրեական պատասխանատվությունից:
ՀՀ քրեական դատավարության օրենսգրքի 13-րդ հոդվածի 1-ին մասի 3-րդ կետի համաձայն՝ քրեական վարույթը ենթակա է կարճման, եթե` մեղադրյալի նկատմամբ դադարեցվել է քրեական հետապնդումը, և սպառվել են վարույթը շարունակելու բոլոր հնարավորությունները.
ՀՀ քրեական դատավարության օրենսգրքի 315-րդ հոդվածը սահմանում է.
«1. Սույն օրենսգրքի 12-րդ հոդվածի 1-ին մասի 3-14-րդ կետերով նախատեսված որևէ հանգամանքի առկայության դեպքում, երբ դա հնարավոր է առանց ապացույցների հետազոտման, դատարանը որոշում է կայացնում քրեական հետապնդումը դադարեցնելու և վարույթը կարճելու մասին: Եթե քրեական հետապնդումը բացառող հանգամանքը վերաբերում է մեղադրյալներից մեկին, ապա քրեական հետապնդումը դադարեցվում է միայն նրա նկատմամբ՝ առանց վարույթը կարճելու:
2. Քրեական հետապնդումը դադարեցնելու մասին որոշմամբ վերացվում են տվյալ մեղադրյալի նկատմամբ կիրառված հարկադրանքի միջոցները, իսկ վարույթը կարճելու դեպքում` նաև այլ անձանց նկատմամբ կիրառված հարկադրանքի միջոցները: Վարույթը կարճելու մասին որոշմամբ լուծվում է նաև իրեղեն ապացույցների տնօրինման հարցը:
3. Քրեական հետապնդումը դադարեցնելու և վարույթը կարճելու մասին որոշման պատճենն ուղարկվում է հանրային մեղադրողին և վարույթի մասնավոր մասնակիցներին:»
Քննության առնելով մեղադրյալի նկատմամբ կիրառված խափանման միջոցի հարցը՝ Դատարանը գտնում է, որ այն պետք է թողնել անփոփոխ` մինչև որոշման օրինական ուժի մեջ մտնելը։
Քննության առնելով քրեական գործով իրեղեն ապացույց ճանաչված՝ «Կիա» մակնիշի 68 BB 859 հաշվառման համարանիշի և «Մազդա» մակնիշի 37 UG 910 հաշվառման համարանիշի ավտոմեքենաների հարցը Դատարանը գտնում է, որ «Կիա» մակնիշի 68 BB 859 հաշվառման համարանիշի ավտոմեքենան պետք է հանձնել դրա սեփականատեր՝ Հովիկ Աշոտի Պետրոսյանին, իսկ «Մազդա» մակնիշի 37 UG 910 հաշվառման համարանիշի ավտոմեքենան դրա սեփականատեր՝ Տոլիկ Արմենի Համբարձումյանին։
Վերոգրյալի հիման վրա և ղեկավարվելով ՀՀ քրեական օրենսգրքի 82-րդ հոդվածով և ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետով, 13-րդ հոդվածի 1-ին մասի 3-րդ կետով և 315-րդ հոդվածով Դատարանը․

Ո Ր Ո Շ Ե Ց

Հովիկ Աշոտի Պետրոսյանի նկատմամբ ՀՀ քրեական օրենսգրքի 342-րդ հոդվածի 1-ին մասով քրեական հետապնդումը դադարեցնել՝ տուժողի և մեղադրյալի հաշտության հիմքով։
Որոշումն օրինական ուժի մեջ մտնելուց հետո Հովիկ Աշոտի Պետրոսյանի նկատմամբ կիրառված խափանման միջոցը՝ Հայաստանի Հանրապետությունից բացակայելու արգելքը և դրանով պայմանավորված սահմանափակումները՝ վերացնել։
Որոշումն օրինական ուժի մեջ մտնելուց հետո քրեական գործով իրեղեն ապացույց ճանաչված՝ «Կիա» մակնիշի 68 BB 859 հաշվառման համարանիշի ավտոմեքենան հանձնել դրա սեփականատեր՝ Հովիկ Աշոտի Պետրոսյանին, իսկ «Մազդա» մակնիշի 37 UG 910 հաշվառման համարանիշի ավտոմեքենան դրա սեփականատեր՝ Տոլիկ Արմենի Համբարձումյանին։
Թիվ ԵԴ1/0288/01/25 քրեական գործի վարույթը կարճել։
Որոշումը կարող է բողոքարկվել ՀՀ վերաքննիչ քրեական դատարան ստանալու պահից մեկամսյա ժամկետում:



ԴԱՏԱՎՈՐ՝ Ժ.ՉԻՉՈՅԱՆ