ԵԴ1/0294/01/25


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«5» Փետրվարի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
քարտուղարությամբ՝ ՌՈԲԵՐՏ ՍԻՐԱԿԱՆՅԱՆԻ
մասնակցությամբ.
հանրային մեղադրող՝ ԱՐՏՅՈՄ ԲԱԴԱԼՅԱՆԻ
մեղադրյալ՝ ԱՐՄԱՆ ԱԲՐԱՀԱՄՅԱՆԻ
դռնբաց դատական նիստում քննելով Արման Արթուրի Աբրահամյանի(1) վերաբերյալ քրեական գործն ըստ մեղադրանքի՝ ՀՀ քրեական օրենսգրքի 344 հոդվածի 2-րդ մասով.








1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ.
Թիվ 60702524 քրեական վարույթով Արման Արթուրի Աբրահամյանին ՀՀ քրեական օրենսգրքի 344 հոդվածի 2-րդ մասով մեղադրանք է ներկայացվել հետևյալ արարքի համար.
«[Նա] 2024 թվականի նոյեմբերի 10-ին, ժամը 03:00-ին, Երևան քաղաքի Նորագավիթ 1-ին փողոցում, չունենալով տրանսպորտային միջոցներ վարելու իրավունք, գտնվելով ոչ սթափ (հարբած) վիճակում` արտաշնչած օդում մաքուր ալկոհոլի պարունակությունը 0,555 մգ/լ, վարել է «Մերսեդես Բենց» մակնիշի, 57 AM 007 հաշվառման համարանիշով տրանսպորտային միջոցը, ինչը հայտնաբերվել է ՀՀ ոստիկանության պարեկային ծառայության աշխատակիցների կողմից և կազմվել է վարչական իրավախախտման վերաբերյալ արձանագրություն»։

2. ԴԱՏԱՔՆՆՈՒԹՅԱՆ ԸՆԹԱՑՔՈՒՄ ՀԵՏԱԶՈՏՎԱԾ ԹՈՒՅԼԱՏՐԵԼԻ ԱՊԱՑՈՒՅՑՆԵՐԸ.
ՀԻՄՆԱԿԱՆ ԴԱՏԱԼՍՈՒՄՆԵՐ

2.1 «Փաստաթղթերի զննում կատարելու մասին» 2024 թվականի դեկտեմբերի 16-ի արձանագրության համաձայն.
«1. Սույն քրեական վարույթի 4-րդ թերթում գտնվող վարչական իրավախախտման վերաբերյալ 8180417604 արձանագրությունը այն մասին, որ 2024 թվականի նոյեմբերի 10-ին ՀՀ ՆԳՆ ոստիկանության պարեկային ծառայության Երևան քաղաքի գնդի 4-րդ գումարտակի 1-ին վաշտի պարեկ Տիգրան Միրզոյանը Արման Արթուրի Աբրահամյանի (ծնված 20.05.2002 թ-ին, ք. Երևան, Նոր Արեշ 35 փ., 127/3 շ., 182 բն., ՀԾՀ՝ 3025020180) նկատմամբ 10.11.2024թ.-ին՝ 03:20-ին, կազմել է թիվ 8180417604 արձանագրությունը, ըստ որի վերջինս 10.11.2024թ.-ին` ժամը 03:00-ին, Երևան քաղաքի Նորագավիթի 1-ին փողոցում, «ՄԵՐՍԵԴԵՍ-ԲԵՆՑ» մակնիշի 57 AM 007 հաշվառման համարանիշի տրանսպորտային միջոցը վարել է՝ չունենալով տվյալ կարգի տրանսպորտային միջոցներ վարելու իրավունք և ոչ սթափ վիճակում:
2. Քրեական վարույթի 5-րդ թերթում գտնվող սթափության վիճակի թիվ 02528 արձանագրության զննությամբ պարզվել է, որ սթափության զննությունն իրականացվել է Jupiter X/RP տեսակի 91101052 համարի ստուգաչափ սարքի միջոցով՝ 2024 թվականի նոյեմբերի 10-ին՝ ժամը 03:15:59-ին: Սարքը վերջին անգամ ստուգաչափվել է՝ 2024 թվականի հոկտեմբերի 27-ին: Արման Արթուրի Աբրահամյանի արտաշնչած օդի մեջ ալկոհոլի պարունակությունը կազմում է 0,555մգ/լ:
3. Քրեական վարույթի 6-րդ թերթում գտնվող Alcovisor Jupiter X/RP 91101052 համարի սարքի ստուգաչափման թիվ 136832 վկայականի զննությամբ պարզվեց, որ նշված սարքը ստուգաչափվել է 2024 թվականի հոկտեմբեր 7-ին ստուգաչափման սարքը ուժի մեջ է մինչև 2025 թվականի հոկտեմբերի 7-ը:
4. Քրեական վարույթի 7-րդ թերթում ՀՀ ոստիկանության «Ճանապարհային ոստիկանություն» ծառայության էլեկտրոնային շտեմարանի «վարորդական վկայականի տվյալներ» բաժնում մուտքագրված Արման Արթուրի Աբրահամյանի (ՀԾՀ 3025020180) տվյալներին համապատասխան արտածվել է տեղեկատվություն. Արձանագրվել է՝ 0 գրառում»:(2)

ԼՐԱՑՈՒՑԻՉ ԴԱՏԱԼՍՈՒՄՆԵՐ

2.2 Դատվածությունների և հետախուզման առկայության Ձև 8 հարցման պատասխանի, «DataLex» դատական տեղեկատվական համակարգում առկա տվյալների, ինչպես նաև ՀՀ արդարադատության նախարարության պրոբացիայի ծառայության Երևանի քաղաքային մարմնի պետ Վահրամ Խալաթյանի 2025 թվականի հունվարի 30-ի թիվ 29.2.1/5915-2025 գրության համաձայն՝
-Թիվ ԵԴ1/2487/01/24 քրեական գործով Երևան քաղաքի առաջին ատյանի ընդհանուր իրավասության քրեական դատարանի 2024 թվականի հոկտեմբերի 17-ի դատավճռով՝ Արման Արթուրի Աբրահամյանը մեղավոր է ճանաչվել 2024 թվականի օգոստոսի 7-ին ՀՀ քրեական օրենսգրքի 344 հոդվածի 2-րդ մասով նախատեսված արարքը կատարելու համար և դատապարտվել է տուգանքի` 375.000 ՀՀ դրամի չափով: Միաժամանակ տուգանքի վճարման համար տրամադրվել է 1 տարի ժամկետ:
Դատավճիռն օրինական ուժի մեջ է մտել 2024 թվականի դեկտեմբերի 10-ին, իսկ 2024 թվականի դեկտեմբերի 27-ին ստացվել է ի կատար ածման:
2025 թվականի հունվարի 14-ին Արման Աբրահամյանը հաշվառվել է ՀՀ ԱՆ պրոբացիայի ծառայության Երևանի քաղաքային մարմնում:
Սույն գործով տուգանքի վճարման անդորրագիր չի ներկայացվել։ Պարտավորության չափը կազմում է 375.000 ՀՀ դրամ:
-Թիվ ԵԴ1/3133/01/24 Երևան քաղաքի առաջին ատյանի ընդհանուր իրավասության քրեական դատարանի 2024 թվականի նոյեմբերի 19-ի դատավճռով՝ Արման Արթուրի Աբրահամյանը մեղավոր է ճանաչվել 2023 թվականի դեկտեմբերի 20-ին ՀՀ քրեական օրենսգրքի 344 հոդվածի 2-րդ մասով նախատեսված արարքը կատարելու համար և դատապարտվել է տուգանքի` 375.000 ՀՀ դրամի չափով: Միաժամանակ տուգանքի վճարման համար տրամադրվել է 1 տարի ժամկետ՝ յուրաքանչյուր ամիս 31.250 ՀՀ դրամ վճարելու պայմանով:
Դատավճիռն օրինական ուժի մեջ 2024 թվականի դեկտեմբերի 24-ին մտել է, իսկ 2024 թվականի դեկտեմբերի 30-ին ստացվել է ի կատար ածման:
2025 թվականի հունվարի 14-ին Արման Աբարահամյանը հաշվառվել է ՀՀ ԱՆ պրոբացիայի ծառայության Երևանի քաղաքային մարմնում:
2025 թվականի հունվարի 20-ին իրականացվել է 31.250 ՀՀ դրամի վճարում: Պարտավորության չափը կազմում է 343.750 ՀՀ դրամ:
-Թիվ ԵԴ1/3358/01/24 քրեական գործով Երևան քաղաքի առաջին ատյանի ընդհանուր իրավասության քրեական դատարանի 2024 թվականի դեկտեմբերի 2-ի դատավճռով Արման Արթուրի Աբրահամյանը, մեղավոր է ճանաչվել 2023 թվականի սեպտեմբերի 6-ին ՀՀ քրեական օրենսգրքի 344 հոդվածի 2-րդ մասով նախատեսված արարքը կատարելու համար և դատապարտվել է տուգանքի՝ 375.000 ՀՀ դրամի չափով: Միաժամանակ տուգանքի վճարման համար տրամադրվել է 5 ամիս ժամկետ՝ յուրաքանչյուր ամիս 75.000 ՀՀ դրամ վճարելու պայմանով:
2025 թվականի հունվարի 16-ին Արման Աբարահամյանը հաշվառվել է ՀՀ ԱՆ պրոբացիայի ծառայության Երևանի քաղաքային մարմնում:
2025 թվականի հունվարի 20-ին իրականացվել է 75.000 ՀՀ դրամի վճարում։ Պարտավորության չափը կազմում է 300.000 /երեք հարյուր հազար/ ՀՀ դրամ։
2.3 ՀՀ պետական եկամուտների կոմիտեի հարկ վճարողների սպասարկման վարչության պետի 2025 թվականի հունվարի 29-ի գրության համաձայն՝ Արման Արթուրի Աբրահամյանը հանցանքն ավարտվելու օրվան նախորդող 12 ամիսների ընթացքում չի հանդիսացել վարձու աշխատող։ Հարկային մարմնի տեղեկատվական բազայում առկա չեն նաև Արման Արթուրի Աբրահամյանի կողմից իր ակտիվների ներդրմամբ (տրամադրմամբ) այլ անձանց գործունեությունից ստացված եկամուտի (շահաբաժնի, տոկոսի, ռոյալթիի, վարձակալական վճարի) վերաբերյալ տվյալներ։(3)
Քննարկման ենթակա հարցերի վերաբերյալ կողմերի դիրքորոշումները.
2.4 Պատժի վերաբերյալ հարցերը քննարկելիս հանրային մեղադրողը Դատարանին խնդրեց Արման Արթուրի Աբրահամյանի նկատմամբ որպես պատիժ նշանակել տուգանք՝ հանցանքը կատարելու պահին նվազագույն աշխատավարձի յոթնապատիկի չափով: Հանրային մեղադրողը Դատարանին խնդրեց նաև առաջնորդվել դատավճիռների համակցության կանոններով, և սույն քրեական գործով դատավճռին գումարել Արման Աբրահամյանի վերաբերյալ նախորդ դատավճիռներով տուգանքի ձևով նշանակված պատիժները:
2.5 Մեղադրյալն, ըստ էության, Դատարանին խնդրեց տուգանքի ձևով պատիժ նշանակելու դեպքում դրա վճարումը տարաժամկետել, քանի որ ինքը չունի հիմնական աշխատանք, զբաղվում է շինարարական մասնավոր աշխատանքներով, բացի այդ խնամքին է առողջական խնդիրներ ունեցող հայրը, ուստի տուգանքի ձևով պատիժ նշանակվելու դեպքում չի կարող այն միանգամից և ամբողջությամբ վճարել: Մեղադրյալը նաև հայտնեց համաձայն է և ցանկանում է կատարել հանրային աշխատանքներ:
3. ԴԱՏԱՐԱՆԻ ՓԱՍՏԱԿԱՆ ՎԵՐԼՈՒԾՈՒԹՅՈՒՆՆԵՐԸ ԵՎ ԴԱՏԱՐԱՆԻ ԿՈՂՄԻՑ ՀԱՍՏԱՏՎԱԾ ԿԱՄ ՀԵՐՔՎԱԾ ՓԱՍՏԱԿԱՆ ՀԱՆԳԱՄԱՆՔՆԵՐԸ.
3.1 Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում այն, որ Արման Արթուրի Աբրահամյանը չունենալով տրանսպորտային միջոցներ վարելու իրավունք և գտնվելով ոչ սթափ (հարբած) վիճակում, այն է՝ նրա արտաշնչած 1 լիտր ծավալով օդի մեջ մաքուր ալկոհոլի պարունակությունը, հաշվի առնելով ստուգաչափման սարքի հնարավոր սխալանքը, կազմել է 0,4995 մգ/լ, 2024 թվականի նոյեմբերի 10-ին՝ ժամը 03:00-ին Երևան քաղաքի Նորագավիթ 1-ին փողոցում վարել է «Մերսեդես Բենց մակնիշի 57 AM 007 հաշվառման համարանիշի ավտոմեքենան:
3.2 Հիմնական և լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև սույն քրեական գործի լուծման համար նշանակություն ունեցող հետևյալ փաստական հանգամանքները.
-Արման Արթուրի Աբրահամյանը երիտասարդ է, սույն քրեական գործով հաստատված հանցանքը կատարելու պահին դատվածություն չի ունեցել, ներկայացված մեղադրանքում իրեն մեղավոր է ճանաչել:
4. ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐՆ ՈՒ ՈՐՈՇՈՒՄՆԵՐԸ.
4.1 Դատարանի կողմից հաստատված փաստական հանգամանքների և 2025 թվականի փետրվարի 5-ին կայացված մեղադրական վերդիկտի հիման վրա Դատարանն ապացուցված է համարում մեղադրյալ Արման Արթուրի Աբրահամյանին վերագրվող արարքը, այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, սահմանելով, որ նրա կատարած արարքի նկատմամբ ենթակա է կիրառման ՀՀ քրեական օրենսգրքի 344 հոդվածի 2-րդ մասը:
4.2 Դատարանի կողմից հաստատված փաստական հանգամանքների հիման վրա Դատարանն արձանագրում է, որ չնայած նրան, որ Արման Արթուրի Աբրահամյանը ներկայացված մեղադրանքում իրեն մեղավոր է ճանաչել, այնուհանդերձ դատավճռի 2.1 կետում շարադրված փաստական տվյալների պայմաններում ակնհայտ է, որ նա ամբողջությամբ չի գիտակցել իր արարքի հանրային վտանգավորությունը և զղջացել դրա համար:
Միևնույն ժամանակ Դատարանն արձանագրում է, որ Արման Արթուրի Աբրահամյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71 հոդվածով նախատեսված հանգամանքներ առկա չեն:
4.3 Կատարած հանցանքի համար մեղադրյալ Արման Արթուրի Աբրահամյանը ենթակա է պատժի։
4.4 Դատապարտված մեղադրյալի նկատմամբ նշանակվող պատժի տեսակն ու չափը որոշելիս՝ Դատարանը հաշվի է առնում հետևյալը՝
-Արման Արթուրի Աբրահամյանի կատարած հանցանքի հանգամանքները, հանրային վտանգավորության աստիճանն ու բնույթը, մասնավորապես՝ այն, որ նրա կատարած հանցանքը դասվում է ոչ մեծ ծանրության հանցագործությունների շարքին։
-Արման Արթուրի Աբրահամյանի անձը բնութագրող տվյալները՝ մասնավորապես այն, որ նա սույն դատավճռով հաստատված արարքը կատարել է նույնական արարքների համար իր նկատմամբ այլ քրեական գործերով մեղադրանք ներկայացված լինելու և դրանք դատարանում ըստ էության քննվելու պայմաններում:
Ավելին՝ Արման Արթուրի Աբրահամյանը թիվ ԵԴ1/2487/01/24 քրեական գործով Երևան քաղաքի առաջին ատյանի ընդհանուր իրավասության քրեական դատարանի 2024 թվականի հոկտեմբերի 17-ի դատավճռով դատապարվելով 375.000 ՀՀ դրամի չափով տուգանքի, 2024 թվականի նոյեմբերի 10-ին կատարել է սույն դատավճռով հաստատված հանցանքը, ինչը վկայում է այն մասին, որ նախկինում նշանակված այդ պատիժը բավարար չի եղել նրա վերասոցիալականացման և իրավահպատակ վարքագծի ձևավորման համար։
-Արման Արթուրի Աբրահամյանի պատասխանատվությունը և պատիժը մեղմացնող և ծանրացնող հանգամանքների բացակայությունը, ՀՀ քրեական օրենսգրքի 69 հոդվածի 2-րդ մասում թվարկված մյուս հանգամանքները։
• Այսպիսով, Դատարանը գտնում է, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներն ապահովելու համար Արման Արթուրի Աբրահամյանի կողմից կատարված հանցագործության բնույթին, վտանգավորության աստիճանին, դրա կատարելու հանգամանքներին, ինչպես նաև հանցավորի անձին համաչափ պատիժ է կարճաժամկետ ազատազրկումը՝ 2 (երկու) ամիս ժամկետով:
• Միևնույն ժամանակ, Դատարանն արձանագրում է, որ կատարած հանցանքների համար Արման Աբրահամյանի նկատմամբ լրացուցիչ պատիժ նշանակելու հիմքերն ու անհրաժեշտությունը տվյալ դեպքում բացակայում են։
4.5 Մեղադրյալ Արման Արթուրի Աբրահամյանի կողմից իր նկատմամբ նշանակված պատիժը կրելու հարցը որոշելիս Դատարանը հաշվի է առնում այն հանգամանքը, որ Արման Աբրահամյանի նկատմամբ նշանակվել է ՀՀ քրեական օրենսգրքի 344 հոդվածի 2-րդ մասի սանկցիայով նախատեսված առավել խիստ պատիժը։
Վերը նշվածի պայմաններում Դատարանը գտնում է, որ նշանակված պատիժը պայմանականորեն չկիրառելը և 1 (մեկ) տարի ժամկետով փորձաշրջան սահմանելը տվյալ դեպքում կարող են բավարար լինել քրեական պատժի նպատակներն իրացնելու, այդ թվում՝ պատժի ենթարկված անձին ուղղելու համար։
• Այսպիսով՝ Դատարանը գտնում է, որ Արման Արթուրի Աբրահամյանի նկատմամբ նշանակված պատիժը՝ 2 (երկու) ամիս ժամկետով կարճաժամկետ ազատազրկումը, ՀՀ քրեական օրենսգրքի 84 հոդվածի կիրառմամբ պետք է պայմանականորեն չկիրառել՝ սահմանելով 1 (մեկ) տարի ժամկետով փորձաշրջան։
Փորձաշրջանի ընթացքում Արման Աբրահամյանի նկատմամբ պետք է նշանակել հետևյալ պարտականությունները.
-առանց իր վարքագծի նկատմամբ վերահսկողություն իրականացնող իրավասու մարմնի համաձայնության չլքել Հայաստանի Հանրապետության տարածքը,
-բնակության վայրը փոխելու դեպքում իր վարքագծի նկատմամբ վերահսկողություն իրականացնող իրավասու մարմնին սեղմ ժամկետում հայտնել նոր բնակության վայրի հասցեն:
4.6 Անդրադառնալով Արման Արթուրի Աբրահամյանի նկատմամբ սույն դատավճռով նշանակված պատժին թիվ ԵԴ1/2487/01/24, ԵԴ1/3133/01/24 և ԵԴ1/3358/01/24 քրեական գործերով նշանակված պատիժները լրիվ կամ մասնակիորեն գումարելու հարցին՝ Դատարանը գտնում է, որ սույն քրեական գործով դատավճիռների համակցությամբ պատիժ նշանակելը կարող է բացասաբար անդրադառնալ այդ քրեական գործերով տուգանքի ձևով նշանակված պատժի կատարման վրա, քանի որ դրանք արդեն իսկ գտնվում են կատարման փուլում, և դատապարտյալի կողմից արդեն իսկ կատարվել են տուգանքի որոշակի մասի վճարումներ, իսկ պատիժները գումարելն անխուսափելիորեն կհանգեցնի տուգանքի կատարման կասեցմանը։
Վերոգրյալի պայմաններում Դատարանը գտնում է, որ սույն քրեական գործով պատիժ նշանակելիս պետք է չկիրառել ՀՀ քրեական օրենսգրքի 75 հոդվածի 1-ին մասը և սույն դատավճռով նշանակվող պատժին պետք է չգումարել թիվ ԵԴ1/2487/01/24, ԵԴ1/3133/01/24 և ԵԴ1/3358/01/24 քրեական գործերով Արման Արթուրի Աբրահամյանի նկատմամբ տուգանքի ձևով նշանակված պատիժները:
4.7 ՀՀ քրեական դատավարության օրենսգրքի 348 հոդվածի 1-ին մասի 11-14-րդ հարցերին անդրադառնալու անհրաժեշտությունը սույն քրեական գործով բացակայում է։
4.8 Արման Արթուրի Աբրահամյանի նկատմամբ կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար։
4.9 ՀՀ քրեական դատավարության օրենսգրքի 167 հոդվածի 1-ին մասի 1-6-րդ կետերով նախատեսված վարութային ծախսեր սույն քրեական գործով առկա չեն, իսկ 7-րդ կետով նախատեսված ծախսերի վերաբերյալ տվյալները բացակայում են: Ավելին՝ այդ վարութային ծախսերի հատուցման պահանջ Դատարանին չի ներկայացվել, որպիսի պայմաններում վարութային ծախսերի հարցը պետք է համարել լուծված։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 167, 276, 347, 348, 349 և 364 հոդվածներով՝ Դատարանը

Վ Ճ Ռ Ե Ց

1. Արման Արթուրի Աբրահամյանին մեղավոր ճանաչել ՀՀ քրեական օրենսգրքի 344 հոդվածի 2-րդ մասով նախատեսված հանցանքը կատարելու մեջ և նրա նկատմամբ պատիժ նշանակել կարճաժամկետ ազատազրկում՝ 2 (երկու) ամիս ժամկետով:
2. Արման Աբրահամյանի նկատմամբ նշանակված պատիժը պայմանականորեն չկիրառել՝ սահմանելով փորձաշրջան՝ 1 (մեկ) տարի ժամկետով։
Փորձաշրջանի ընթացքում Արման Աբրահամյանի նկատմամբ նշանակել հետևյալ պարտականությունները՝
-առանց իր վարքագծի նկատմամբ վերահսկողություն իրականացնող իրավասու մարմնի համաձայնության չլքել Հայաստանի Հանրապետության տարածքը,
-բնակության վայրը փոխելու դեպքում իր վարքագծի նկատմամբ վերահսկողություն իրականացնող իրավասու մարմնին սեղմ ժամկետում հայտնել նոր բնակության վայրի հասցեն։
3. Արման Աբրահամյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը:
4. Վարութային ծախսերի հարցը համարել լուծված:
Դատավճիռը վերաքննության կարգով կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում:



ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ


(1)Ծնված՝ 2002 թվականի մայիսի 20-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, նախկինում դատապարտված, չի աշխատում, հաշվառված է և բնակվում է Երևան քաղաքի Նոր Արեշ 35 փողոցի 127/3 շենքի թիվ 182 բնակարանում, որպես խափանման միջոց է կիրառված բացակայելու արգելքը։
(2)Տե՛ս, քրեական գործ, հատոր 1, թերթեր 12-13
(3)2.2 և 2.3 կետերի վերաբերյալ, տե՛ս, Դատարանում ստեղծված նյութերը