ԵԴ1/0066/01/25

Ո Ր Ո Շ Ո Ի Մ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ՀԱՐՑԸ ՔՆՆՈՒԹՅԱՆ ԱՌՆԵԼՈՒ ՄԱՍԻՆ
Երևան քաղաքի առաջին ատյանի ընդհանուր իրավասության
քրեական դատարանը (այսուհետ՝ նաև Դատարան)
նախագահող դատավոր Ա.Ասատրյան
դատական նիստի քարտուղար Ս.Սիմոնյան
մասնակցությամբ`
հանրային մեղադրող Դ.Հովհաննիսյանի
մեղադրյալ Գ.Ալեքսանյանի

2025 թվականի դեկտեմբերի 19-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի` Գագիկ Սամվելի Ալեքսանյանի (ծնված՝ 1993 թվականի հունվարի 4-ին, ազգությամբ հայ, ՀՀ քաղաքացի, հաշվառված և բնակվում է Երևան քաղաքի, Մալաթիա-Սեբաստիա համայնքի, Հաղթանակ 7-րդ փողոցի, 2-րդ նրբանցքի, 6-րդ տուն հասցեում)՝ ՀՀ քրեական օրենսգրքի 462-րդ հոդվածի 1-ին մասով
Պ Ա Ր Զ Ե Ց
Գործի դատավարական նախապատմությունը.
1. 2025 թվականի հունվարի 8-ին թիվ 92-0679-24 քրեական գործն ըստ մեղադրանքի Գագիկ Սամվելի Ալեքսանյանի՝ ՀՀ քրեական օրենսգրքի 462-րդ հոդվածի 1-ին մասով ուղարկվել է Երևան քաղաքի առաջին ատյանի ընդհանուր իրավասության քրեական դատարան:
Քրեական գործին շնորհվել է թիվ ԵԴ1/0066/01/25 համարը:
Նույն օրը թիվ ԵԴ1/0066/01/25 քրեական գործը համակարգչային ծրագրի միջոցով իրականացվող գործերի բաշխմամբ, մակագրվել է դատավոր Արամայիս Ասատրյանին:
2025 թվականի հունվարի 10-ին որոշում է կայացվել Գագիկ Սամվելի Ալեքսանյանի վերաբերյալ թիվ ԵԴ1/0066/01/25 քրեական գործով՝ վարույթ ստանձնելու և նախնական դատալսումներ նշանակելու մասին:
Նախնական դատալսումների ընթացքում Դատարանը, անդրադառնալով ՀՀ քրեական դատավարության օրենսգրքի 316-րդ հոդվածով նախատեսված հարցին, որոշում է կայացրել մեղադրյալի նկատմամբ մինչդատական վարույթի ընթացքում ընտրված խափանման միջոցը` բացակայելու արգելքը, անփոփոխ թողնելու մասին:
Մեղադրանքի փաստական կողմի նկարագրությունը.
2. Գագիկ Սամվելի Ալեքսանյանին ՀՀ քրեական օրենսգրքի 462-րդ հոդվածի 1-ին մասով մեղադրանք է ներկայացվել այն բանի համար, որ նա «հաշվառված լինելով ՀՀ ՊՆ Զ և ԶՀԾ Երևանի թիվ 1/ ՀՀ ՊՆ ՀԶԿ Երևանի թիվ 1 զինվորական կոմիսարիատում/ տարածքային ստորաբաժանումում և հանդիսանալով պահեստազորային, շարքային, ենթակա է եղել ՀՀ կառավարության 29.02.2024 թվականի թիվ 281-Ն որոշմամբ հայտարարված՝ 2024 թվականի հունիսի 11-ին անցկացվող վարժական հավաքին, սակայն 17.04.2024 թվականին ստանալով նշված վարժական հավաքին մասնակցելու ծանուցագիրը՝ չի ներկայացել տարածքային ստորաբաժանում վարժական հավաքին մասնակցելու համար՝ այդ կերպ խուսափելով վերոնշված անց կացվող վարժական հավաքից՝ այդ վարժական հավաքից ազատվելու` օրենսդրությամբ սահմանված հիմքերի բացակայության դեպքում»։
2.1. 2025 թվականի դեկտեմբերի 19-ին դատարան է ստացվել ՀՀ ՊՆ ՀԶԿ Երևանի թիվ 1 զինվորական կոմիսարիատի զինվորական կոմիսարի պարտականությունների ժամանակավոր կատարող Ա.Բալայանի գրությունը, համաձայն որի՝ «(...) Գագիկ Սամվելի Ալեքսանյանը 04.09.2025թ. ՀՀ Կառավարության №1250-Ն որոշման համաձայն մեկնել է սեպտեմբերի 23-ից հոկտեմբերի 17-ը անցկացվող 25-օրյա վարժական հավաքների անցկացման վայր (․․․․)»։
Դատական նիստում արտահայտված դիրքորոշումները.
3. Գագիկ Ալեքսանյանը խնդրեց ՀՀ քրեական օրենսգրքի 462-րդ հոդվածի 3-րդ մասի կիրառմամբ իր նկատմամբ քրեական հետապնդումը դադարեցնել։ Նշեց նաև, որ գիտակցում է վերոհիշյալ հիմքով քրեական հետապնդման դադարեցման բնույթը և հետևանքը։
Հանրային մեղադրող Դ․Հովհաննիսյանը չառարկեց ՀՀ քրեական օրենսգրքի 462-րդ հոդվածի 3-րդ մասի կիրառմամբ Գագիկ Ալեքսանյանի նկատմամբ քրեական հետապնդումը դադարեցնելու կապակցությամբ։
Դատարանի իրավական վերլուծությունները.
4. ՀՀ քրեական դատավարության օրենսգրքի 12-րդ հոդվածի համաձայն`
«1. Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե`
(...)
12) անձը Հայաuտանի Հանրապետության քրեական oրենuգրքի ընդհանուր կամ հատուկ մասի դրույթների ուժով ենթակա է ազատման քրեական պատաuխանատվությունից.
(…)»:
5. ՀՀ քրեական օրենսգրքի 462-րդ հոդվածի համաձայն`
«1. Հայտարարված վարժական հավաքին կանչված քաղաքացու կողմից վարժական հավաքից խուսափելը, որը դրսևորվել է վարժական հավաքին ներգրավվելու նպատակով իր հաշվառման վայրի զինվորական կոմիսարիատ ներկայանալու պարտականության խախտման կամ օրենքով սահմանված առողջական վիճակի հետազոտում և բժշկական փորձաքննություն չանցնելու կամ վարժական հավաքին ներգրավվելուց հրաժարվելու կամ վարժական հավաքին ներգրավվելուց որևէ այլ եղանակով խուսափման ձևով, վարժական հավաքին կանչվելու ենթակա չլինելու՝ օրենքով սահմանված հիմքերի բացակայության դեպքում՝
պատժվում է տուգանքով՝ տասնհինգապատիկից երեսնապատիկի չափով, կամ կարճաժամկետ ազատազրկմամբ՝ առավելագույնը երկու ամիս ժամկետով, կամ ազատազրկմամբ՝ մեկից երեք տարի ժամկետով:
2. Սույն հոդվածի 1-ին մասով նախատեսված արարքը, որը կատարվել է՝
1) իրեն մարմնական վնասվածք պատճառելու կամ հիվանդության սիմուլյացիայի ճանապարհով կամ
2) փաստաթուղթ կեղծելու կամ խաբեության այլ ճանապարհով՝ պատժվում է ազատազրկմամբ՝ երկուսից հինգ տարի ժամկետով:
3. Սույն հոդվածի 1-ին կամ 2-րդ մասով նախատեսված հանցանք կատարած անձն ազատվում է քրեական պատասխանատվությունից, եթե կամովին ներկայացել և ներգրավվել է վարժական հավաքին»:
5. Դատարանը նախ հարկ է համարում արձանագրել, որ նոր իրավակարգավորումը (ՀՀ քրեական օրենսգրքի 462-րդ հոդվածի 3-րդ մասը)՝ տվյալ կոնկրետ դեպքում, բարելավում է Գագիկ Ալեքսանյանի վիճակը: Մասնավորապես, եթե Գագիկ Ալեքսանյանին վերագրվող արարքի կատարման ժամանակ գործող խմբագրությամբ ՀՀ քրեական օրենսգրքի 462-րդ հոդվածը խրախուսական նորմ չէր նախատեսում, ապա նոր իրավակարգավորմամբ նախատեսված է, որ անձն ազատվում է քրեական պատասխանատվությունից, եթե կամովին ներկայացել և ներգրավվել է վարժական հավաքին։ Հետևաբար` Դատարանը գտնում է, որ նոր ընդունված օրենսդրությունն այդ մասով՝ Գագիկ Ալեքսանյանի համար համարվում է պատիժը մեղմացնող օրենք, ուստի այն (ՀՀ քրեական օրենսգրքի 462-րդ հոդվածի 3-րդ մասը) հետադարձության կարգով կիրառելի է Գագիկ Ալեքսանյանի նկատմամբ:
Անդրադառնալով սույն գործի փաստական հանգամանքներին, Դատարանն արձանագրում է, որ Գագիկ Սամվելի Ալեքսանյանը 2025 թվականի սեպտեմբերի 23-ից հոկտեմբերի 17-ը՝ ներգրավվել է 25-օրյա վարժական հավաքին։ Միաժամանակ վերջինը խնդրել է ՀՀ քրեական օրենսգրքի 462-րդ հոդվածի 3-րդ մասի կիրառմամբ՝ իր նկատմամբ քրեական հետապնդումը դադարեցնել:
Հիմք ընդունելով վերը շարադրվածը՝ Դատարանը գտնում է, որ Գագիկ Սամվելի Ալեքսանյան նկատմամբ ՀՀ քրեական օրենսգրքի 462-րդ հոդվածի 1-ին մասով՝ քրեական հետապնդումը պետք է դադարեցնել՝ ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետի՝ այն է՝ ՀՀ քրեական օրենսգրքի 462-րդ հոդվածի 3-րդ մասի ուժով՝ քրեական պատասխանատվությունից ազատման ենթակա լինելու հիմքով:
Անդրադառնալով խափանման միջոցի հարցին, Դատարանը գտնում է, որ մեղադրյալ Գագիկ Սամվելի Ալեքսանյանի նկատմամբ ընտրված խափանման միջոցը` բացակայելու արգելքը, պետք է վերացնել:
Միաժամանակ Դատարանը գտնում է, որ թիվ ԵԴ1/0066/01/25 (նախաքննական համար՝ 92-0679-24) քրեական վարույթը ենթակա է կարճման՝ մեղադրյալի նկատմամբ քրեական հետապնդումը դադարեցվելու և վարույթը շարունակելու բոլոր հնարավորությունները սպառվելու հիմքով:
Ելնելով վերոգրյալից և ղեկավարվելով ՀՀ քրեական օրենսգրքի 9-րդ, 462-րդ, ՀՀ քրեական դատավարության օրենսգրքի 12-13-րդ հոդվածներով` Դատարանը
Ո Ր Ո Շ Ե Ց
Գագիկ Սամվելի Ալեքսանյանի նկատմամբ ՀՀ քրեական օրենսգրքի 462-րդ հոդվածի 1-ին մասով՝ քրեական հետապնդումը դադարեցնել՝ ՀՀ քրեական դատավարության օրենսգրքի 12-րդ հոդվածի 1-ին մասի 12-րդ կետի՝ այն է՝ ՀՀ քրեական օրենսգրքի 462-րդ հոդվածի 3-րդ մասի ուժով՝ քրեական պատասխանատվությունից ազատման ենթակա լինելու հիմքով:
Գագիկ Սամվելի Ալեքսանյանի նկատմամբ ընտրված խափանման միջոցը` բացակայելու արգելքը, վերացնել:
Թիվ ԵԴ1/0066/01/25 (նախաքննական համար՝ 92-0679-24) քրեական գործի վարույթը կարճել՝ մեղադրյալի նկատմամբ քրեական հետապնդումը դադարեցվելու և վարույթը շարունակելու բոլոր հնարավորությունները սպառվելու հիմքով։
Որոշումը կարող է բողոքարկվել վերաքննիչ քրեական դատարան` ստանալու օրվանից հետո՝ մեկամսյա ժամկետում:


ԴԱՏԱՎՈՐ Ա.ԱՍԱՏՐՅԱՆ