ԵԴ1/0031/01/25


ԵՐԵՎԱՆ ՔԱՂԱՔԻ ԱՌԱՋԻՆ ԱՏՅԱՆԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ՔՐԵԱԿԱՆ ԴԱՏԱՐԱՆ

Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՈՒՆԻՑ


«20» Հոկտեմբերի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝
նախագահող դատավոր՝ ԱՐՇԱԿ ՄԱԹԵՎՈՍՅԱՆ
քարտուղարությամբ՝ ՌՈԲԵՐՏ ՍԻՐԱԿԱՆՅԱՆԻ
ԵՎ ԹԱՄԱՐԱ ՀԱՐՈՒԹՅՈՒՆՅԱՆԻ
մասնակցությամբ.
հանրային մեղադրող՝ ԱՐՄԵՆ ԵՐԻՑՅԱՆԻ
մեղադրյալ՝ ԳՐԻԳՈՐ ՀՈՎՀԱՆՆԻՍՅԱՆԻ
պաշտպան՝ ՎԱՉԱԳԱՆ ՔՈՍՅԱՆԻ
դռնբաց դատական նիստում քննելով Գրիգոր Վալտերի Հովհաննիսյանի (1) վերաբերյալ քրեական գործն ըստ մեղադրանքի՝ ՀՀ քրեական օրենսգրքի 297 հոդվածի 2-րդ մասի 1-ին կետով.






1. ՄԵՂԱԴՐԱՆՔԻ ՓԱՍՏԱԿԱՆ ՆԿԱՐԱԳՐՈՒԹՅՈՒՆԸ.
Թիվ 14161123 քրեական վարույթով Գրիգոր Վալտերի Հովհաննիսյանին ՀՀ քրեական օրենսգրքի 297 հոդվածի 2-րդ մասի 1-ին կետով մեղադրանք է ներկայացվել հետևյալ արարքի համար.
«2023 թվականի մարտի 29-ին՝ ժամը 02:30-ի սահմաններում, Գրիգոր Վալտերի Հովհաննիսյանը, իր ընկերների՝ Տիգրան Գառնիկի Հարությունյանի, Վարդան Ֆելիքսի Հովսեփյանի և քննությամբ դեռևս ինքնությունները չպարզված անձանց հետ գտնվել է Երևան քաղաքի Բաղրամյան 74 հասցեում գործող «Քուին Մյուզիք Հոլ» ակումբում, որտեղ նշված անձինք իրենց վարքով հակադրվել են շրջապատին՝ միմյանց հետ զրուցելիս բարձրաձայն հնչեցնելով հայհոյանքներ, իսկ Գրիգոր Հովհաննիսյանը իր անձի առավելությունը ցուցադրելու նպատակով նախ գռեհիկ ձևով հարվածել է մատուցողուհի Արաքսյա Հակոբյանի հետույքին, ինչից հետո անվտանգության աշխատակից Յանիկ Կտոյանի կողմից ստանալով համարժեք ու իրավաչափ նկատողություն՝ նշված դիտողությունն ընդունել է ցավագին, դրան արձագանքել է լկտի ձևով՝ առաջացնելով վիճաբանություն: Վիճաբանության ընթացքում Գրիգոր Վալտերի Հովհաննիսյանը Տիգրան Գառնիկի Հարությունյանի և Վարդան Ֆելիքսի Հովսեփյանի հետ փոխլրացնելով միմյանց գործողությունները, հնչեցրել են սեռական բնույթի հայհոյանքներ և այլ անպարկեշտ արտահայտություններ՝ կոպիտ ձևով խախտելով հասարակական կարգը, ինչպես նաև հասարակության նկատմամբ ցուցաբերելով անհարգալից և բարոյական ու իրավական նորմերի նկատմամբ բացահայտ արհամարհական վերաբերմունք, համակեցության կանոնների ցուցադրաբար անտեսմամբ խախտել մարդկանց՝ նշված ակումբի աշխատակիցների անդորրը և խոչընդոտել հասարակական նշանակության օբյեկտի՝ «Քուին Մյուզիք Հոլ» ակումբի բնականոն աշխատանքը»։

2. ԴԱՏԱՔՆՆՈՒԹՅԱՆ ԸՆԹԱՑՔՈՒՄ ՀԵՏԱԶՈՏՎԱԾ ԹՈՒՅԼԱՏՐԵԼԻ ԱՊԱՑՈՒՅՑՆԵՐԸ.
ՀԻՄՆԱԿԱՆ ԴԱՏԱԼՍՈՒՄՆԵՐ

2.1 Փորձագետի թիվ 1850/հ եզրակացության «ՀԵՏԵՎՈՒԹՅՈՒՆՆԵՐ»-ի համաձայն.
«Ըստ ներկայացված բժշկական փաստաթղթերի տվյալների Գ.Հովհաննիսյանի մարմնական վնասվածքները ձախ աչքի զույգ կոպերի արյունահավաքի, քթոսկրերի, ձախ ակնակապճի ստորին պատի բազմաբեկոր տեղաշարժով կոտրվածքների ձևով, հետևանք են բութ, կոշտ առարկաների ներգործության, հնարավոր է նշված ժամկետին, որոնք առկա տվյալներով պատճառել են առողջությանը միջին ծանրության վնաս, առողջության տևական քայքայումով»։ (2)


2.2 «Դեպքի վայրի զննության մասին» 2023 թվականի մարտի 29-ի արձանագրության համաձայն.
«Դեպքի վայրը հանդիսանում Երևան քաղաքի Բաղրամյան 76 հասցեում գտնվող «Քուին մյուզիք հոլ»-ը, որի ձախ հատվածում գտնվում է «Sirius» խանութ սրահը: Նշված մուտքի հատվածը արտաքինից ապակեպատ է, որտեղ մուտք են գործում թվով 13 աստիճանավանդակներով դեպի ներքև առաջին հարկ, որի դիմաց առկա է 1x1 չափերի նստարան, որի դիմաց գտնում են ապակյա մուտքի դռներ, որոնք զննության պահին գտնվում էին բաց վիճակում: Մուտքի դռնից ներս աջ հատվածում առկա է հանդերձարան, որի դիմացից թվով 4 աստիճանավանդակներով իջնում ենք ներքև, որտեղ առկա է 3x3 չափերի միջանցք, որի դիմացից աջ առկա է 4x4 չափերի սենյակ, որը հանդիսանում է աշխատակիցների հանդերձասրահը, նշված միջանցքից առկա է մուտք դեպի հիմնական սրահ, որտեղ ձախ հատվածում գտնվում է բարը, որի դիմաց դրված են թվով 4 հատ աթոռներ, իսկ բարի սեղանի վրա առկա են մի քանի բաժակներ, որոնք կիսով չափ լցված են: Նշված բարի դիմացի հատվածում ձախից աջ հաջորդականությամբ դրված են թվով 18 սեղաններ՝ իրենց աթոռներով: Աջ կողմից թիվ 4 սեղանի տակ առկա է արնանման հետք, իսկ աթոռի տակ առկա է արնանման հետքերով անձեռոցիկ, որից մոտ 1 մետր հեռավորության վրա գետնին աթոռի տակ առկա է բաժակ: Վերը նկարագրված հանդերձարանից ուղիղ դեպի առաջ 1 մետր և ձախ կողմում գտնվում է սենյակ, որտեղ բեմն է, իսկ մուտքից 1 մետր ներս առկա է բեմ, որտեղ բեմի դիմացի հատվածում առկա են արնանման հետքեր, որոնք թափված են և բեմին, և գետնին, իսկ նշված բեմի դրսի ձախ հատվածում առկա է աթոռ, որի վրա նույնպես առկա էին արնանման հետքեր: Վերը նկարագրված բեմից վերցվեց բամբակով թվով 3 արյան նմուշ: Հիմնական սրահից դեպի ձախ առկա է 1x6 չափերի միջանցք, որը գնում է դեպի տեսախցիկների սենյակ, որը 3x3 չափերի է: Մուտքի դռնից ներս՝ աջ հատվածում դրված է մոնիտոր, իսկ նշված մոնիտորից աջ՝ պատի տակ, դրված է փայտյա պահարան և բազկաթոռ, իսկ բազկաթոռի դիմաց դրված են թվով 3 հատ սեղաններ, որոնց վրա առկա են բաժակներ, ջրի շիշ և մոխրամաններ: Նշված սենյակից վերցվեց սպիտակ գույնի «HIKVISION» մոդելի DVR սարք, որը փաթեթավորվեց և կնիքվեց ՀՀ ՔԿ կնիքով, որի գաղտնաբառը՝ ըստ զննության մասնակցի հայտարարության՝ «77Agun333» է: Վերը նշված «Մյուզիք հոլ»-ը կնիքվեց ՀՀ ՔԿ կնիքով: Զննության մասնակից Ա.Կարապետյանի հայտարարությամբ «Քուին մյուզիք հոլի» տեսանկաարահանող սարքավորումները աշխատում են օնլայն ռեժիմով, այսինքն` տեսագրությունները չեն պահպանվել, բացի այդ աշխատակիցների սենյակում բացի DVR սարքից այլ սարք, մասնավորապես՝ հիշողության կրիչ չհայտնաբերվեց»։ (3)

2.3 «Զննություն կատարելու մասին» 2023 թվականի ապրիլի 10-ի արձանագրության համաձայն.
«Լազերային սկավառակում առկա է թվով 3 տեսագրություն IP Camera12_BAREKAMUTYUN_TUPIK_BAREKAMUTYUN_TUPIK_20230329032957_20230329033556_1533117
Camera12_BAREKAMUTYUN_TUPIK_BAREKAMUTYUN_TUPIK_20230329033556_2023032904295 7_1535977» և «IP Camera14_BAREKAMUTYUN_TUPIK_BAREKAMUTYUN_TUPIK_20230329032959_2023032904295 9_1741363» անվամբ:
Զննության ենթարկելով «IP Camera12_BAREKAMUTYUN_TUPIK_BAREKAMUTYUN_TUPIK_20230329032957_2023032903355 6_1533117» տեսագրությունը պարզվեց, որ այն 5 րոպե 59 վայրկյան է, թվագրված է 03.29.2023 ժամը՝ 03:29:59: Նշված տեսագրության զննության արդյունքում, որևէ արտառոց դեպք չհայտնաբերվեց:
Զննության ենթարկելով IP Camera12_BAREKAMUTYUN_TUPIK_BAREKAMUTYUN_TUPIK_20230329033556_2023032904295 7_1535977» տեսագրությունը պարզվեց, որ այն 54 րոպե 00 վայրկյան է, թվագրված է 03.29.2023 ժամը՝ 03:35:57: Նշված տեսագրության թվագրության 04:02:10-ին երևում է մոտ 15 հոգի անձ, որոնք քայլելով ձախ կողմից գնում են դեպի աջ կողմ, նրանց մեջ երևում է 4 անձ, որոնք ոստիկանական համազգեստով են, այդ հավաքված անձանցից մի քանիսին ոստիկանները նստեցնում են մեքենաները և ճանապարհում են, իսկ մնացած անձինք ոստիկանների հետ վերադառնում են, այնուհետև ոստիկաններից մեկը հեռախոսով է խոսում, որից հետո նշված վայր են գալիս պարեկային ոստիկանության աշխատակիցները: Այս ամբողջ ժամանակահատվածում որևէ անձ մյուսին չի հարվածում, որևէ ծեծկռտուք առկա չէ:
Զննության ենթարկելով IP Camera14_BAREKAMUTYUN_TUPIK_BAREKAMUTYUN_TUPIK_20230329032959_2023032904295 9_1741363» տեսագրությունը պարզվեց, որ այն 59 րոպե 59 վայրկյան է, թվագրված է 03.29.2023 ժամը՝ 03:29:59: Նշված տեսագրությունը նույնանում է վերը նշված տեսագրության հետ, սակայն այն տեսանկարահանում է այլ դիրքից: 04:01:03-ին նշված վայր է մոտենում մեկ մեքենա, որից իջնում են 4 ոստիկան, որից հետո այդտեղ հավաքվում է մոտ 15 անձ, որոնցից մի մասին ոստիկանները նստեցնում են մեքենաները, իսկ մյուսներին իրենց հետ տանում դեպի իրենց մեքենայի մոտ, որից հետո ժամանում են ոստիկանության պարեկային ծառայության աշխատակիցները: Այս ամբողջ ժամանակահատվածում որևէ անձ մյուսին չի հարվածում, որևէ ծեծկռտուք առկա չէ»։ (4)
2.4 Դատաքննության ընթացքում հրապարակվել են արտավարութային փաստաթուղթ ճանաչված, դատավճռի 2.3 կետում նշված տեսագրությունները, որոնց բովանդակությունը համընկնում է դրանք զննելու մասին արձանագրությանը։ (5)
2.5 Դատաքննության ընթացքում վկա Արաքսյա Նորիկի Հակոբյանն, ըստ էության, ցուցմունք տվեց հետևյալի մասին.
-Հանրային մեղադրողի հարցերին ի պատասխան՝ Արաքսյա Հակոբյանը հայտնեց, որ ինքը 2020 թվականից աշխատում է «Քուին Մյուզիք Հոլ»-ում որպես մատուցողուհի։ Դեպքի օրը՝ 2023 թվականի մարտի 29-ին, ինքը սովորականի նման աշխատանքի է գնացել։ Իր աշխատանքի ընթացքում՝ ժամը 02:00-ից հետո «Քուին Մյուզիք Հոլ» են եկել 3 այցելու, ինչից հետո նրանց միացել են նաև այլ անձինք։ Նրանք նստած են եղել իր աշխատելու տարածքից մի քանի մետր հեռավորության վրա, այնպես, որ նրանց խոսակցությունները՝ այդ թվում հայհոյանքներն, իրեն լսելի են եղել։ Մեղադրյալը նույնպես գտնվել է այդ անձանց շարքում։ Դեպքի օրն այդ սեղանն ինքն է սպասարկել ու դեպքը հենց իր հետ է տեղի ունեցել։ Սկզբում ամեն բան նորմալ է եղել, սակայն երբ տղամարդիկ 6-ն են դարձել, ինքը խմիչքի 2-րդ շիշն է մոտեցրել նրանց։ Ինքը սկսել է լցնել տղամարդկանց բաժակները, երբ մեղադրյալն իրեն «ձեռք է գցել», սակայն ինքը որևէ բան չի ասել և լուռ հեռացել է սեղանի մոտից ու դրա մասին պատմել է անվտանգության աշխատակցին։ Դրանից անմիջապես հետո ինքը գնացել է խոհանոց և սրահ այլևս չի վերադարձել։ Ինքը խոհանոցից դուրս է եկել մոտ մեկ ժամ անց, երբ իրենց աշխատանքի ժամն ավարտվել է՝ մոտավորապես ժամը 04:00-ի սահմաններում։ Այդ ընթացքում իրենց ակումբում տեսել է ոստիկանների։ Խոհանոցում գտնվելու ընթացքում ինքը աղմուկ կամ վիճաբանության ձայներ չի լսել և տեղյակ չէ, թե կատարվածի մասին անվտանգության աշխատակիցն ասելուց հետո վերջինն ինչ է արել։ Դեպքի ժամանակ, ինչպես նաև դեպքից առաջ սրահում միացված է եղել երաժշտություն, և ինքը չի կարող հստակ ասել, թե Գրիգորն ու նրա ընկերները կոնկրետ ինչ են խոսել և ինչ հայհոյանքներ տվել և արդյոք դրանք լսելի են եղել ակումբի մյուս այցելուների համար։ Ինքը հիշում է, որ ակումբի մյուս այցելուները նստած են եղել Գրիգորենց սեղանից 2 սեղան այն կողմ։
Ինքը կարծում է, որ Գրիգորն իրեն պատահաբար չի հպվել, ինքը զգացել է, որ նա շոյել է իրեն, սակայն ինքն այդ պահին ոչինչ չի ասել, քանի որ Գրիգորն ու նրա ընկերները եղել են հարբած վիճակում, իսկ ինքն ամաչել է կատարվածից ու վախեցել։ Ինքը հետագայում իմացել է, որ ակումբում նաև ծեծկռտուք է եղել։ Այդ մասին ինքն իմացել է ոստիկանության բաժնում, իրեն ուղղված հարցերի բովանդակությունից։
-Պաշտպանի հարցերին ի պատասխան՝ Արաքսյա Հակոբյանը հայտնեց, որ երբ ինքը մոտեցել է անվտանգության աշխատակցին և հայտնել կատարվածի մասին, որքանով հիշում է, մյուս սեղանների այցելուներն արդեն սրահից դուրս գալիս են եղել, սակայն հստակ չի կարող ասել։ Ինքը չի հիշում, թե բառացի ինչ է ասել անվտանգության աշխատակցին, սակայն հիշում է, որ ասել է, որ իրեն այդ սեղանի հաճախորդները նեղացրել են ու ինքն այլևս չի մոտենալու ու սպասարկելու նրանց։ Չի հիշում նաև, թե անվտանգության աշխատակիցն իրեն այդ ժամանակ ինչ է պատասխանել։
Առհասարակ իր աշխատանքի ընթացքում, երբ ինքն այցելուներին է սպասարկում, սեղանից մոտ 3 մետր հեռավորության վրա է լինում։ Ակումբում երաժշտությունը բավականին բարձր է միացված լինում, այդ բարձրությանը զուգահեռ, այցելուններն էլ բարձր են զրուցում, Գրիգորն ու իր հետ եղած մյուս անձինք նույնպես բարձր են խոսել, սակայն նրանց խոսակցությունն իր համար ավելի լսելի է եղել, երբ ինքը նրանց սեղանին է մոտեցել մոխրաման փոխելու կամ խմիչք լցնելու համար։
Որքանով հիշում է, երբ Գրիգորն ու նրա ընկերները արդեն որոշ չափով ալկոհոլ օգտագործած վիճակում են եկել ակումբ։ Երբ Գրիգորն ու նրա ընկերները սկսել են բարձր խոսել ու հայհոյել, իրենց աշխատակիցներից ոչ ոք, այդ թվում՝ նաև ինքը, նրանց նկատողություն չի արել, քանի որ նրանց հայհոյանքներն այնչափ բարձր չեն եղել, որպեսզի լսելի լինեն ամբողջ սրահում։ Անձամբ ինքն այդ խոսակցությունները լսել է միայն այն ժամանակ, երբ Գրիգորենց սեղանին է մոտեցել սպասարկելու։ Նրանց սեղանը բազկաթոռներով սեղան է եղել։ Օղու շիշը դրված է եղել սեղանի ծայրին՝ իր համար հասանելի տեղում, որպեսզի ինքն առանց դժվարության վերցներ ու լցներ հաճախորդների բաժակները։ Հաշվի առնելով սեղանի երկարությունը, մյուս՝ իրենից ավելի հեռու նստած հաճախորդների բաժակները լցնելու համար ինքը որոշակի չափով պետք է ձգվեր, որ կարողանար լցնել դրանք, սակայն երբ Գրիգորը «ձեռք է գցել», ինքն արդեն բաժակները լցրած վերջացրած է եղել, ուղղակի դեռ շիշն իր ձեռքում է եղել։
Դեպքից բավական երկար ժամանակ է անցել ու ինքը չի կարող ասել, թե դեպքի օրը մեղադրյալն ինչ հագուստով է եղել։ Դեպքի ժամանակ ինքը Գրիգորին կողքով է կանգնած եղել՝ Գրիգորն իր աջ կողմում է նստած եղել, ձախ կողմում նույնպես հաճախորդ է եղել նստած։ Ինքը և տեսել է, և զգացել, որ Գրիգորն իր հետույքին ձեռք է տվել, սակայն որևէ բան չի ասել։ Այդ ժամանակ ինքը ցավ չի զգացել։ Իր կարծիքով Գրիգորն այդ ժամանակ արդեն իսկ որոշակի չափով հարբած է եղել։
Ինքը մոտ 5 տարի է, ինչ մատուցողուհի է աշխատում, սակայն Գրիգորի կողմից դրսևորած պահվածքի նման պահվածքի առաջին անգամ է հանդիպում, նախկինում նման խնդրի չի բախվել։ Ինքը չի կարող ասել Գրիգորը նման քայլ է արել այն պատճառով, որ ալկոհոլի ազդեցության տակ է եղել, թե գիտակցել է ու դիտավորությամբ է դա արել։ Ինքը չի հիշում, թե գործի նախաքննության ընթացքում Գրիգորի արարքը կոնկրետ ինչ բառով է նկարագրել։
-Նախագահողի հարցերին ի պատասխան՝ Արաքսյա Հակոբյանը հայտնեց, որ իրենց ակումբում երաժշտությունը բավականին բարձր է, և միմյանց լսելու համար իրենք աշխատողներով էլ իրար մոտ են կանգնում։ Ինքը Գրիգորի և նրա ընկերների կողմից հնչեցված հայհոյանքները լսել է, քանի որ նրանք բավականին բարձր են խոսել ու ալկոհոլի ազդեցության տակ են եղել։ Որքանով հիշում է, երբ ինքը մոտեցել է Գրիգորենց սեղանին, վերջինները շարունակել են հայհոյանքներով խոսել, սակայն չի հիշում իրեն նկատել ու շարունակել են հայհոյանքներ հնչեցնել, թե իրեն չեն էլ տեսել։
Իրենց ակումբի սեղաններն այնպիսի բարձրության են, որ եթե հաճախորդը նստած լինի, իսկ ինքը կանգնած, ապա հաճախորդի ձեռքը՝ սեղանին դրված վիճակում իր կոնքի հատվածի բարձրության կլինի։
Երբ Գրիգորն իրեն «ձեռք է գցել», ինքը շրջվել է նրան է նայել, բայց չի հիշում այդ ժամանակ Գրիգորը որ կողմ էր նայում։ Դրանից հետո ինքը օղու շիշը դրել է սեղանին և առանց որևէ բան ասելու հեռացել։ «Ձեռք գցել» ասելով ինքն ի նկատի ունի շոյելու ձևով կպնելը, հպվելը, քանի որ Գրիգորն իրեն չի հարվածել, չի սեղմել, «չի ճտացրել», այլ ուղղակի հպվել է։
Իր աշխատանքային պրակտիկայի ընթացքում շատ են եղել դեպքեր, երբ ինքը տեսել է, որ հաճախորդը (հաճախորդները) վատ վարք են դրսևորել, և հետագա անախորժություններից խուսափելու համար անվտանգության աշխատակցին դրա մասին նախապես տեղեկացրել է։ Ինչ վերաբերում է այս դեպքին, ապա ինքն ի սկզբանե նկատել է, որ Գրիգորն ու նրա ընկերները ոչ ադեկվատ են եղել, քանի որ բավականին բարձր են խոսել ու հայհոյանքներ հնչեցրել, սակայն անձամբ անվտանգության աշխատակցին մինչ դեպքի տեղի ունենալը որևէ բան չի հայտնել։
Ակումբի խոհանոց մուտքի դռան կողքից են մտնում, այնտեղ սրահի այցելուների ձայները լսելի չեն, սակայն երաժշտությունը լսվում է։ Դեպքի օրն ինքը չի հիշում, թե որ ժամին է անջատվել ակումբի երաժշտությունը, իսկ պարեկային ծառայության աշխատակիցներին ինքը տուն գնալիս է նկատել։ Երբ ինքը խոհանոցում է եղել, իրեն որևէ մեկը չի մոտեցել, որևէ բան չի հարցրել։ Դեպքի պահին սրահում բացի իրենից, անվտանգության աշխատակցից, հաճախորդներից, որքանով հիշում է եղել է նաև մյուս մատուցողուհին՝ Սերինեն, ում հետ այժմ շփում չունի։
Դատարանի կողմից բավարարվել է պաշտպանի միջնորդությունը, և նախաքննության ընթացքում ու Դատարանում տրված ցուցմունքների միջև առկա էական հակասությունների հիմքով հրապարակվել է վկա Արաքսյա Հակոբյանի 2023 թվականի մարտի 29-ի ցուցմունքի հետևյալ հատվածը.
«(...) մեր մոտ մենք ենք մեր հաճախորդների բաժակներն օղի լցնում, այսինքն` հաճախորդն իր ձեռքով չի վերցնում շիշը և լցնում, այդ 6 անձանցից մեկը, ով կլիներ 35-40 տարեկան, միջին բոյի, նորմալ կառուցվածքով, մեկ անգամ ձեռքի ափով հարվածեց հետույքիս, այդ ընթացքում ես վիրավորվեցի այդ անձի արարքից և հեռացա այդ սեղանից ու գնացի այդ մասին ասեցի մեր անվտանգության աշխատակից Յանիկին (...)»։(6)
Հակասությունների վերաբերյալ վկա Արաքսյա Հակոբյանն, ըստ էության, նշեց հետևյալը.
-Նախագահողի հարցերին ի պատասխան՝ Արաքսյա Հակոբյանը հայտնեց, որ և դատարանում, և նախաքննության ընթացքում իր կողմից ընտրվել են այնպիսի բառեր, որոնք նույն երևույթն են նկարագրել, ինքն ուղղակի չգիտի ուրիշ ինչ բառերով նկարագրի Գրիգորի գործողությունը։ Ինքը հստակ տարբերում է միամիտ ու դիտավորյալ դիպչելը, հակառակ դեպքում ինքը չէր մոտենա ու անվտանգության աշխատակցին էլ ոչինչ չէր հայտնի։ Ինքն էլ չգիտի, թե ինչպես նկարագրի կատարվածը, միայն կարող է ասել, որ հպվելու ձևն այնպիսինն է եղել, որ այդ ձևով որևէ մեկին միամիտ չեն հպվում։ Գրիգորն իր հետույքին ձեռքի ափով հարվածել է։
Գրիգորենց սեղանից բարձր հայհոյանքները լսելի են եղել, սակայն կոնկրետ Գրիգորին ինքը չի տեսել հայհոյելուց։
-Պաշտպանի հարցերին ի պատասխան՝ Արաքսյա Հակոբյանը հայտնեց, որ հստակ չի կարող ասել, թե Գրիգորն ինչու է նման քայլի դիմել, չի կարող նաև ասել դիտավորյալ է արել, թե ոչ։
Ինքը «խփել» ու «շոյել» ասելով ի նկատի է ունեցել նույն գործողությունը։
-Հանրային մեղադրողի հարցերին ի պատասխան՝ Արաքսյա Հակոբյանը հայտնեց, որ իր պատասխաններն իրար չեն հակասում, ինքը չի կարող գնահատել Գրիգորի դիտավորությունը, սակայն «փաստը մնում է փաստ», որ նման դեպք է տեղի ունեցել։ Որքանով հիշում է դեպքի պահին Գրիգորն այլ շարժումներ չի կատարել։
2.6 Դատաքննության ընթացքում վկա Աշոտ Բաբկենի Կարապետյանն, ըստ էության, ցուցմունք տվեց հետևյալի մասին.
-Հանրային մեղադրողի հարցերին ի պատասխան՝ Աշոտ Կարապետյանը հայտնեց, որ 2023 թվականին ինքն աշխատել է «Քուին Մյուզիք Հոլում» որպես տնօրեն, սակայն ներկայում էլ այնտեղ չի աշխատում։ Ակումբում ինքը ֆիքսված ժամային գրաֆիկով չի աշխատել։ Որպես կանոն ինքն աշխատանքի է եղել ամեն օր ժամը 22:00-ից կամ 23:00-ից մինչև 03:00-ն կամ 04:00-ն։ Դեպքի պահին ինքն արդեն ակումբում չի եղել, իսկ դեպքը, որքանով ինքն է տեղյակ, գիշերը ժամը 04։00-ից հետո է տեղի ունեցել։ Դեպքից հետո իրեն ակումբի աշխատակիցները զանգել ու հետ են կանչել։ Դեպքի մանրամասներն իրեն ակումբի աշխատակիցներն են պատմել, ասել, որ մատուցողուհիներից մեկի՝ Արաքսյայի հետ անախորժ դեպք է տեղի ունեցել, հաճախորդներից մեկը հարբած է եղել, «ձեռք է գցել» ու նեղացրել Արաքսյային։ Դեպքից բավական երկար ժամանակ է անցել ու ինքն արդեն շատ բաներ չի հիշում։
Երբ ինքն ակումբ է վերադարձել, ոստիկանության աշխատակիցներն արդեն այնտեղ են եղել, հարցրել են, թե ով է ակումբի տնօրենը, և ինքը նրանց հետ միասին ոստիկանության բաժին է գնացել։ Ինքը հիշում է, որ երբ ինքն ակումբ է հետ գնացել, ոստիկանության աշխատակիցները ակումբի տեսախցիկների տեսագրություններն արդեն վերցրած են եղել։ Ակումբի տեսախցիկներին հետևում են անվտանգության աշխատակիցները։ Իրենց ակումբի անվտանգության աշխատակից Յանիկին ինքը կարող է բնութագրել որպես պարկեշտ, աշխատանքային պարտականություններին բավականին լավ տիրապետող ու դրանք կատարող անձ։ Ակումբում իր աշխատելու ընթացքում բացի սույն դեպքից ինքը չի կարող մտաբերել որևէ դեպք, երբ հաճախորդն աշխատակիցներից որևէ մեկին անպարկեշտ ձևով հպված լինի։
-Պաշտպանի հարցերին ի պատասխան՝ Աշոտ Կարապետյանը հայտնեց, որ ինքը ռեստորանային ոլորտում է աշխատում արդեն 10 տարի։ «Քուին Մյուզիք Հոլում» ալկոհոլի օգտագործման չափի հետ կապված որևէ սահմանափակում չի եղել։ Ինքն ընդունում է, որ մարդիկ ակումբ գնում են խմելու, լիցքաթափվելու ու ժամանակ անցկացնելու համար, ուստի նաև բնական է, որ այցելուները կարող են նաև ոչ ադեկվատ վարքագիծ դրսևորել, սակայն խոսքը բնականաբար այն դեպքերի մասին չէ, երբ հաճախորդն ընդունելիի սահմանն անցնում է։ Եթե ակումբի աշխատակցի՝ մենեջերի, տնօրենի կողմից զգուշացվելուց հետո հաճախորդը շարունակում է նույն վարքագիծը, ապա հարցն արդեն անվտանգության աշխատակցի կողմից է լուծվում, ով կարող է հեռացնել անգամ հաճախորդին ակումբից։
-Նախագահողի հարցերին ի պատասխան՝ Աշոտ Կարապետյանը հայտնեց, որ «Քուին Մյուզիք Հոլում» երաժշտությունը բավականին բարձր է, հատկապես այն ժամանակ, երբ երգիչը կամ երգչուհին բեմում կենդանի երգում են։ Որքանով հիշում է դեպքի օրն ակումբում կենդանի երաժշտություն է եղել։
2.7 Դատաքննության ընթացքում վկա Յանիկ Յուրիկի Կտոյանն, ըստ էության, ցուցմունք տվեց հետևյալի մասին.
-Հանրային մեղադրողի հարցերին ի պատասխան՝ Յանիկ Կտոյանը հայտնեց, որ դեպքը տեղի է ունեցել մոտ 2 կամ 3 տարի առաջ, հստակ օրը չի հիշում։ Այդ ժամանակ ինքը աշխատել է «Քուին Մյուզիք Հոլում» որպես անվտանգության աշխատակից։ Դեպքի օրը մեղադրյալ Գրիգորն ու ևս 2 հոգի ակումբ են եկել, որոշ ժամանակ անց նրանց են միացել ևս երեք հոգի։
Եթե չի սխալվում Գրիգորը ևս երկու հոգու հետ ակումբ են եկել ժամը 02:30-ից 03:00-ն ընկած ժամանակահատվածում և նստել սրահի պատի տակի 2-րդ կամ 3-րդ սեղանին։ Նրանցից բացի սրահում եղել են նաև այլ այցելուներ, 1 կամ 2 սեղան ևս եղել է զբաղեցված։ Մյուս այցելուները Գրիգորենց սեղանից հեռու են եղել։
Սկզբում Գրիգորն ու նրա ընկերները նորմալ վարք են դրսևորել, այնուհետև, երբ նրանց են միացել ևս 3 հոգի, նրանք սկսել են բարձր խոսել, հետո նաև հայհոյանքներ հնչեցնել։ Նկատի ունենալով, որ ակումբում եղել են նաև այլ հաճախորդներ, ինքը, որևէ անախորժություն թույլ չտալու համար, բարի հատվածից մոտեցել է Գրիգորենց սեղանին և կանգնել նրանցից շուրջ 4 մետր հեռավորության վրա։ Ինքը հիշում է, որ Գրիգորն ու նրա ընկերները նաև ալկոհոլ են օգտագործել։ Մինչ մատուցողի Արաքսյայի կողմից կատարվածի մասին իրեն հայտնելը, ինքը Գրիգորին ու նրա ընկերներին որևէ նկատողություն չի արել։ Երբ Արաքսյան իրեն ասել է, որ Գրիգորը նրան «ձեռք է գցել», հետույքին է կպել և հրաժարվել է այլևս սպասարկել նրանց սեղանը, ինքը մոտեցել է Գրիգորենց սեղանին ու նրանց դեպի բարի կողմ հրավիրել, որտեղ երաժշտությունը ցածր էր և իրենք կարող էին հանգիստ խոսել։ Ինքն այդ քայլով փորձել է հասկանալ, թե ինչպես է տեղի ունեցել դեպքը, միամիտ է ստացվել, թե դիտավորություն է եղել։ Երբ Գրիգորի հետ միասին բարի մոտ են գնացել, նրան հարցրել է միտումնավոր է արել այդ քայլը, թե ոչ, իսկ Գրիգորը նրան ասել է «Հնուց էկած ա», ինչն իր համար եղել է անհասկանալի և ստեղծվել է տպավորություն, որ Գրիգորն ուղղակի ոչ ադեկվատ է։ Ինքը նորից է նույն հարցը տվել Գրիգորին, որից հետո նրանց է մոտեցել Գրիգորի ընկերներից մեկն, ում անունն ինքը չի հիշում։ Նա եկել է ու Գրիգորին քաշելով փորձել է հեռացնել բարի մոտից, իսկ Գրիգորը նրան ասել է, որ ոչ մի բան չի եղել, ամեն բան նորմալ է։ Խոսելու ընթացքում ինքը Գրիգորին ասել է, որ եթե միտումնավոր է արել այդ քայլը, այլևս նման բան չանի, հաշիվն էլ իրենց կմոտեցնեն ու թող վճարեն ու հեռանան ակումբից։ Նրանք մի կողմ են գնացել ու ինքը լսել է, թե ինչպես են նրանք միմյանց հետ խոսում և ասում «ով են սրանք, չկա սրանց հետ խոսալու, սրանք ՊՊԳՎ-ի աշխատող են»՝ այդ ընթացքում ևս օգտագործելով տհաճ արտահայտություններ ու հայհոյանքներ։ Ինքը լսել է, որ Գրիգորն այդ ընթացքում նաև անձամբ իրենց է հայհոյել։ Այդ ժամանակ էլ վիճաբանությունը սկսվել է։ Սկզբում եղել է քաշքշուկ, սակայն հետո ինքը Գրիգորի հնչեցրած հայհոյանքների համար հարվածել է վերջինին։ Դեպքի օրը Գրիգորն իրեն չի հարցրել, թե ինքը որտեղ և որպես ինչ է աշխատում։
Դեպքի պահին ինքը չի հիշում, թե Գրիգորի ընկերներն ինչ են արել, ինչպիսի վարք են դրսևորել, ինքը Գրիգորի վրա է կենտրոնացած եղել։ Իրավիճակը շատ խառն է եղել, ինքը նաև չի ֆիքսել, թե Գրիգորի ընկերներից նրա հետ միասին ով է հարվածներ հասցրել, իսկ ով բաժանել։
Ինքը չի հիշում, թե վիճաբանությունն ինչպես է դադարել, բայց հիշում է, որ այլ անձինք ևս խառնվել են իրավիճակը հանդարտեցնելու և իրեն ու Գրիգորին բաժանելու համար։ Դեպքի օրը՝ վիճաբանությունից հետո, ակումբը փակվել է գիշերը ժամը 04։00-ից հետո, հստակ ժամը չի հիշում։ Ակումբի գործունեության դադարելը ոստիկանների գալու հանգամանքով պայմանավորված չի եղել։
-Պաշտպանի հարցերին ի պատասխան՝ Յանիկ Կտոյանը հայտնեց, որ դեպքի ժամանակ սրահում այլ հյուրեր նույնպես եղել են, սակայն նրանք հեռացել են նախքան վիճաբանությունը սկսվելը։ Ինքը նախկինում որևէ պետական մարմնում չի աշխատել։ Ինքը չգիտի և չի կարող ասել, թե «ՊՊԳՎ» ինչ է նշանակում, բայց հիշում է, որ դեպքի օրը Գրիգորն իրեն շփոթել է այդ կառույցի աշխատակցի հետ։ Ինքը Գրիգորին հարվածել է, քանի որ նա անձնական բնույթի հայհոյանք է հնչեցրել իր հասցեին։ Իր աշխատանքային գործունեության ընթացքում երբևէ նման միջադեպ չի եղել։ Միջադեպին ակումբի աշխատակիցներից միայն ինքն է մասնակցել։ Ինքը տեղյակ չէ, թե «Քուին Մյուզիք Հոլում» տեսախցիկների համար պատասխանատուն ով է, այնտեղ աշխատելու ժամանակ երբևէ չի հետաքրքրվել։
-Նախագահողի հարցերին ի պատասխան՝ Յանիկ Կտոյանը հայտնեց, որ երբ Գրիգորն ասել է «սրանք ՊՊԳՎ-ի աշխատողներ են», ինքը նրան պատասխանել է, որ «խառնել է, ինքն այդտեղ չի աշխատում»։
2.8 Դատաքննության ընթացքում վկա Սերինե Ավետիքի Թովմասյանն, ըստ էության, ցուցմունք տվեց հետևյալի մասին.
-Հանրային մեղադրողի հարցերին ի պատասխան՝ Սերինե Թովմասյանն հայտնեց, որ ինքը «Քուին Մյուզիք Հոլում» աշխատել է որպես մատուցողուհի, իսկ մեղադրյալին հիշում է, քանի որ 2023 թվականի մարտ ամսին իրենց ակումբ է այցելել և նրա մասնակցությամբ անախորժ դեպք է տեղի ունեցել։ Գրիգորն իրեն «ոչ կոռեկտ է պահել»։ Սկզբում նրանք երեքով են եղել, հետո ավելի ուշ նրանց ևս 3 հոգի են միացել։ «Քուին Մյուզիք Հոլն» աշխատում է երեկոյան ժամը 21:00-ից մինչև 03:00-ն, սակայն լինում են դեպքեր, երբ են աշխատանքը վերջացնում են ավելի ուշ։ Գրիգորենց սեղանն ինքը չի սպասարկել։ Ինքը Գրիգորենց վատ վարքագիծը նրանց ակումբ մտնելիս արդեն նկատել է, նրանք սեղանին մոտենալիս անցել են իր կողքով և այդ ընթացքում օգտագործել վատ արտահայտություններ, այդ թվում՝ հայհոյանքներ։ Ինքը չի կարող ասել թե ում են ուղղված եղել նրանց հայհոյանքները։
Երբ իր կողմից սպասարկվող սեղանների այցելուները գնացել են, ինքը գնացել է խոհանոց և տեղյակ չէ, թե հետագայում Գրիգորն ու նրա ընկերները շարունակել են նույն վարքագիծը, թե ոչ։ Իր խոհանոցում գտնվելու ժամանակ եկել է նաև Արաքսյան, ով եղել է հուզված, սակայն տեղի ունեցածի մասին իրեն ոչինչ չի պատմել։ Ինքը հարցրել է Արաքսյային, թե ինչ է պատահել, իսկ նա իրեն պատասխանել է, որ հետո կխոսեն։ Երբ աշխատանքային ժամն ավարտվել է, ինքը պատրաստվել է, որ դուրս գա ակումբից, սակայն ոստիկանության ծառայողներն իրեն ասել են, որ չի կարող գնալ, քանի որ ակումբում ինչ-որ դեպք է տեղի ունեցել։ Ինքը հետ է գնացել, սպասել ակումբում, որից հետո իրենց տարել են ոստիկանության բաժին։ Ոստիկանություն գնալու ճանապարհին Արաքսյան պատմել է դեպքից որոշակի դրվագներ, ասելով, որ ակումբի հաճախորդներից մեկը խփել է իր հետույքին։ Արաքսյան նաև նկարագրել է, թե ով է դա արել, ասել, որ դա եղել է հայհոյանքներով խոսող տղամարդկանցից մեկը, ինչից ինքը հասկացել է, թե ում մասին է խոսքը։ Ինքը տեղի ունեցածի մասին Արաքսյայի, Յանիկի կամ ակումբի մյուս աշխատակիցներից որևէ մեկի հետ այլևս չի խոսել։
Դեպքի օրը, երբ իրենք տուն են գնացել, ակումբում ամեն բան իր տեղում է եղել, խառնաշփոթ չի եղել, իրենք սովորականի նման սեղանները հավաքել ու դուրս են եկել։ Ինքը չի հիշում այդ օրը Յանիկն իրենց հետ է եղել, թե ոչ, որովհետև շատ խառը իրավիճակ է եղել, ինքն էլ գրեթե ողջ գիշերը ոստիկանության բաժնում է անցկացրել ու շատ հոգնած է եղել։ Ոստիկանության բաժնում իրեն ասել են, որ դեպք է տեղի ունեցել, «մարդ են ծեծել», բայց թե ում, ինչի համար և ով է ծեծել, ինքը չգիտի։
-Պաշտպանի հարցերին ի պատասխան՝ Սերինե Թովմասյանը հայտնեց, որ ինքը նկատել է, որ ակումբ մտնելիս Գրիգորն ու նրա ընկերներն ալկոհոլ օգտագործած են եղել, քանի որ նրանց վրայից ալկոհոլի հոտ է եկել։ Ինքը որևէ մեկին չի զգուշացրել, որ հարբած անձինք են մտել ակումբ, քանի որ ինքն արդեն սպասարկելու սեղան է ունեցել, և դա իր պարտականությունը չի եղել։
2.9 Դատաքննության ընթացքում վկա Պետրոս Բալագայի Բաղրամյանն, ըստ էության, ցուցմունք տվեց հետևյալի մասին.
-Հանրային մեղադրողի հարցերին ի պատասխան՝ Պետրոս Բաղրամյանը հայտնեց, որ 2023 թվականին ինքն աշխատել է «Քուին Մյուզիք Հոլում» որպես գանձապահ։ Իրենց ակումբն աշխատում է երեկոյան 21:00-ից մինչև 04:00-ն։ Բացի գանձապահի գործառույթներից ինքը նաև աշխատանքային օրվա ավարտին ակումբն է փակել։ Դեպքի վերաբերյալ ինքը միայն գիտի, որ 2023 թվականի մարտ ամսին ակումբի հաճախորդներից մեկի ու իրենց մատուցողուհու միջև անախորժ իրավիճակ է ստեղծվել։ Դեպքի պահին ինքը ակումբում չի եղել՝ դուրս է եկել գումար մանրելու, որպեսզի կարողանա վճարել այդ օրվա աշխատավարձերը։ Երբ հետ է վերադարձել, իրեն պատմել են, որ ակումբում դեպք է տեղի ունեցել։ Դեպքի օրվա ավարտին ակումբում մնացել են ինքը, երաժշտական հաղորդավարն (DJ) ու երկու մատուցողուհի, հետո արդեն ոստիկանության աշխատակիցներն են մտել ակումբ, և արգելել են իրենց որևէ տեղ գնալ։ Ինքը չի հիշում, որ այդ օրը սրահում արյան կամ վիճաբանության արդյունքում առաջացած այլ հետքեր լինեն։ Դեպքի մանրամասների մասին ինքը հետագայում է իմացել իրենց մատուցողուհի Արաքսյայից։ Դեպքից հետո ինքը 3 օր ձերբակալված է եղել, գտնվել է ձերբակալվածների պահման վայրում։ Հետագայում, երբ աշխատանքի է վերադարձել, Արաքսյան իրեն պատմել է, որ հաճախորդներից մեկն իրեն «ձեռք է գցել», հայհոյանքներ հնչեցրել, սակայն չի հիշում իրեն պատմել են այդ հայհոյանքներն ում են ուղղված եղել, թե ոչ, քանի որ դեպքից բավական երկար ժամանակ է անցել։
-Պաշտպանի հարցերին ի պատասխան՝ Պետրոս Բաղրամյանը հայտնեց, որ իր աշխատանքային պրակտիկայի ընթացքում ակումբում վեճեր եղել են, սակայն նմանատիպ վիճաբանություն, որի ընթացքում հայհոյեն կամ մատուցողուհուն «ձեռք գցեն», երբեք չի եղել։
2.10 Դատաքննության ընթացքում վկա Տիգրան Գառնիկի Հարությունյանն, ըստ էության, ցուցմունք տվեց հետևյալի մասին.
-Հանրային մեղադրողի հարցերին ի պատասխան՝ Տիգրան Հարությունյանը հայտնեց, որ ինքը դեպքի օրը՝ 2023 թվականի մարտի 28-ին, գիշերային ուշ ժամի, իր ընկերներից Վարդանի և Գրիգորի հետ միասին ժամանց անցկացնելու նպատակով այցելել է «Քուին Մյուզիք Հոլ»։ Ինքը Վարդանին ու Գրիգորին հանդիպել է ակումբի դիմաց։ Ակումբ գալուց առաջ ինքն ալկոհոլ չի օգտագործել, ինչպես նաև տեղյակ չէ Վարդանն ու Գրիգորն օգտագործել էին, թե ոչ։
Դեպքի օրն իրենք ակումբի ընդհանուր սրահում են նստել, ինքն այլ հաճախորդների նկատել է, սակայն, եթե ճիշտ է հիշում, մոտ մեկ ժամ հետո նրանք գնացել են, և ակումբում միայն իրենք են մնացել։ Որքանով հիշում է, իրենք օղի են պատվիրել ու միրգ։ Սկզբից երեքով են եղել, հետո իրենց են միացել իր դպրոցական տարիների ընկերն ու նրա երկու ընկերները, ում ինքը չի ճանաչել։ Այդ օրն իրենց ժամանցն ավարտվել է վիճաբանությամբ։ Ինքը միայն այն պահն է նկատել, որ Վարդանն ու Գրիգորը սեղանից հեռացել են, երբ տեսել է, որ շուրջ 5 հոգի, հավաքված են և նրանց հետ են նաև իր ընկերները՝ Վարդանն ու Գրիգորը։ Ինքը չի հասցրել մոտենալ նրանց ու այդ պահին նրանց միջև սկսվել է վիճաբանությունը։ Այդ խառը քաշքշուկի ընթացքում ինքը հարված է ստացել քթին և գլուխը հարվածել է սրահի բեմին։ Ինքը չի տեսել, թե առաջինն ով և ում է հարվածել, քանի որ սրահի լուսային «էֆեկտները» թույլ չեն տվել։ Գլխին ստացած հարվածի պատճառով ինքը չի հիշում, թե հետո ինչ է տեղի ունեցել, հիշում է միայն, որ դեպքից հետո եղել է դրսում և իրեն ջուր են տվել։ Հետագայում, երբ ինքը խոսել է իր ընկերների հետ, Գրիգորն իրեն պատմել է, որ միջադեպը սկսվել է այն պահից, երբ անվտանգության աշխատակիցն իրեն ասել է, որ ինքն իբր դիպչել է մատուցողուհու հետույքին։ Ինքը նման բան չի սպասում Գրիգորից, քանի որ նկարագրվածն ընդունելի չէ իրենց ընկերական շրջապատում և Գրիգորի պատմածից զարմացել է։
Ինքը չի հիշում իրենց սեղանն ամբողջ ընթացքում նույն մատուցողուհին է սպասարկել, թե ոչ, սակայն վստահ է, որ իրենք որևէ մեկին նեղացնել չէին կարող։ Ակումբի աշխատակիցներին իրենք առաջին անգամ են տեսել, նախկինում երբեք որևէ մեկին չեն ճանաչել։ Իրենց ընկերական շրջապատում ընդունելի չէ հայհոյանքներով խոսելը, դեպքի օրը նույնպես զրուցելիս հայհոյանքներ չեն օգտագործել։ Իր կարծիքով վիճաբանությունը հրահրել են ակումբի աշխատակիցները, որպեսզի կարողանան շուտ ավարտել աշխատանքը։ Դեպքից հետո իրեն ձերբակալել ու տեղափոխել ոստիկանություն։
-Պաշտպանի հարցերին ի պատասխան՝ Տիգրան Հարությունյանը հայտնեց, որ ակումբում՝ առաջին մեկ ժամվա ընթացքում, իրենք մոտ 5-6 բաժակ օղի են օգտագործել, սակայն ինքը սթափությունը չի կորցրել։ Ակումբում գտնվելու ընթացքում Գրիգորն անընդհատ ներս ու դուրս է արել, և Գրիգորի ու Վարդանի մի պահ հեռանալն իր համար այդքան էլ նկատելի չի եղել։ Ինքը չի տեսել, որ Գրիգորին ինչ-որ մեկը մոտենա ու առանձին խոսելու համար մի կողմ կանչի։ Ակումբ մտնելիս ինքը կամ իր ընկերները հայհոյանք չեն տվել, իսկ երաժշտությունը եղել է միացված։
Իր դպրոցական ընկերոջ անունն Արմեն է։ Գրիգորն Արմենին ու նրա ընկերներին չի ճանաչել։ Ինքը բացառում է, որ Գրիգորի և Արմենի ու նրա ընկերների միջև այդ օրն ինչ-որ կոնֆլիկտ հասունացած լինի։ Իրենք միասին շատ լավ ժամանակ են անցկացրել։
Հավաքված տղաների մեջ ինքը կողքից նկատել է Գրիգորին, տեսել է նաև ոստիկանության հագուստով տղաների, նրանց հագին եղած «կամուֆլյաժից» է հասկացել, որ ոստիկաններ են։ Նրանց մոտենալուց հետո է նկատել, որ համազգեստով տղան հարվածել է Գրիգորին։ Ինքն այդ ժամանակ փորձել է բաժանել նրանց, սակայն իրեն էլ են հարվածել։ Որքանով հիշում է Գրիգորին 3 հոգով են հարվածել։ Ինքը հանգիստ է մոտեցել տղաներին, որևէ ագրեսիվ գործողություն կամ շարժում չի կատարել և չգիտի, թե ինչու են իրեն հարվածել։
Դեպքի հաջորդ օրը Գրիգորին տեղափոխել են հիվանդանոց, և, որքանով տեղյակ է, նա կոտրվածքներ է ունեցել։ Գրիգորը 10 օրից ավել հիվանդանոցում է եղել, այդ ընթացքում ինքը նրան 3-4 անգամ այցելել է։ Այցելությունների ընթացքում ինքը դեպքի մասին խոսել է Գրիգորի հետ, հարցրել իրականում նման բան եղել է, թե ոչ, իսկ Գրիգորն իրեն բառացիորեն պատասխանել է «Ես ինձ նման բան թույլ չէի տա»։
-Նախագահողի հարցերին ի պատասխան՝ Տիգրան Հարությունյանը հայտնեց, որ ինքը չի հիշում, երբ մտել են ակումբ, սպասարկող անձնակազմից ովքեր են եղել սրահում։ Հիշում է, որ սրահի մուտքի մոտ անվտանգության երկու աշխատակցի է տեսել, նրանցից բացի այլ անվտանգության աշխատակցի չի նկատել, մեկ մատուցողուհու է նկատել և բարմենին։
2.11 Դատաքննության ընթացքում վկա Հովսեփ Գարեգինի Սահակյանն, ըստ էության, ցուցմունք տվեց հետևյալի մասին.
-Հանրային մեղադրողի հարցերին ի պատասխան՝ Հովսեփ Սահակյանը հայտնեց, որ 2023 թվականի մարտ ամսին ինքը, որպես երաժշտական հաղորդավար, (DJ) աշխատել է «Քուին Մյուզիք Հոլում»։ Ակումբն ամեն օր աշխատում է մինչև գիշերը ժամը՝ 04:00-ն։ 2023 թվականի մարտի 28-ի լույս 29-ի գիշերն ակումբում տեղի ունեցած դեպքին ինքն ականատես չի եղել, քանի որ իր աշխատատեղից տեսանելի է միայն սրահի բեմը։ Դեպքի օրն ինքը որևէ արտառոց բան չի նկատել, դեպքի մասին էլ միայն հետո է տեղեկացել։ Իրեն պատմել են, որ իրենց ակումբի մատուցողուհիներից մեկին են «ձեռք գցել»։ Այդ ընթացքում ակումբի աշխատակիցները միմյանց պատմել են, թե ինչ է կատարվել ակումբում, ինքն էլ նրանց կողքին կանգնած լսել է այդ մասին։ Որքանով հիշում է, դեպքի օրը մատուցողուհիներից աշխատանքի են եղել 2-ը՝ Արաքսյան, իսկ մյուսի անունն արդեն չի հիշում, քանի որ նա դուրս է եկել աշխատանքից։ Դեպքը հենց Արաքսյայի հետ է տեղի ունեցել։ Ինքը չի հիշում ակումբն այդ օրը մարդաշատ է եղել, թե ոչ, քանի որ իր աշխատանքի տեղից ակումբի սրահը տեսանելի չի եղել։ Իր երաժշտական վահանակը դեպքի ժամանակ տեղադրված է եղել սրահի մուտքից ներս մտնող նեղ հատվածում՝ ապակիով առանձնացված փոքրիկ սրահում, որտեղից տեսանելի չեն սրահի սեղաններն ու հյուրերը։ Ակումբում երաժշտությունը մշտապես՝ մինչև ժամը 04։00-ն միացված է լինում, իսկ բարձրությունն այնպիսինն է, որ միևնույն սեղանին նստած անձինք խոսելիս միմյանց կարողանում են լսել։
-Պաշտպանի հարցերին ի պատասխան՝ Հովսեփ Սահակյանը հայտնեց, որ դեպքի օրը ակումբում եղել է անվտանգության աշխատակից՝ Յանիկը։ Անվտանգության աշխատակիցը, որքանով հիշում է, եղել է կապույտ ու մոխրագույն գույներով «կամուֆլյաժով»։ Ինքը հաստատապես հիշում է, որ այդ օրն անվտանգության մեկ աշխատակից է եղել, բայց հիմա կարգը փոխվել է, ակումբում մշտապես երկուսն են լինում։
Որքանով ինքն է տեղյակ սրահում տեսախցիկներ կան տեղադրված, սակայն տեղյակ չէ, թե դրանց վերահսկմամբ ովքեր են զբաղվում, չգիտի նաև դրանք ձայնագրում են, թե ոչ։ Ինքը տեղյակ է, որ կա մի տեսախցիկ, որը առցանց եղանակով բեմահարթակն է ցույց տալիս։
-Նախագահողի հարցերին ի պատասխան՝ Հովսեփ Սահակյանը հայտնեց, որ դեպքի ժամանակ ակումբի տնօրենը հանդիսացել է Աշոտը, ով դեպքից շուրջ 1 ժամ առաջ գնացել էր։ Դեպքից հետո, երբ ինքը բարի մոտ կանգնած է եղել ու սպասել, որ գանձապահ Պետրոսն իր աշխատավարձը տա, իրեն միայն լսելի են եղել դեպքի վերաբերյալ խոսակցությունները։ Որքանով հիշում է զրուցողները Արաքսյան ու մյուս մատուցողուհին են եղել։
2.12 Դատաքննության ընթացքում վկա Վարդան Ֆելիքսի Հովսեփյանն, ըստ էության, ցուցմունք տվեց հետևյալի մասին.
-Հանրային մեղադրողի հարցերին ի պատասխան՝ Վարդան Հովսեփյանը հայտնեց, որ դեպքի օրն իր ընկերների ՝ Գրիգորի և Տիգրանի հետ, գնացել են «Քուին Մյուզիք Հոլ»՝ ժամանակ անցկացնելու, որի ընթացքում ակումբի անվտանգության աշխատակցի հետ վիճաբանության մեջ են ընկել։ Վիճաբանության պատճառը կոնկրետ չի կարող նշել։ Վիճաբանության ընթացքում, եթե չի սխալվում, իրենց մոտեցել էին ևս 2 կամ 3 հոգի, ովքեր վիճաբանությանը չեն մասնակցել։ Որքանով ինքն է հասկացել նրանք Տիգրանի ծանոթներն են եղել, որոնց ինքը չի ճանաչել։
Դեպքի օրն իրենք սրահի առաջին կամ երկրորդ սեղանին են նստել։ Իրենց սեղանը սպասարկող մատուցողուհուն հերթական անգամ գումար տալուց հետո իրենց է մոտեցել սրահի անվտանգության աշխատակիցն ու Գրիգորին հրավիրել առանձին խոսելու։ Երբ Գրիգորն ու անվտանգության աշխատակիցն առանձնացել ու գնացել են սրահի բարի մոտ, ինքը նույնպես մոտեցել է նրանց, և այդ ժամանակ անվտանգության աշխատակիցն ասել է, թե իբր Գրիգորը մատուցողուհուն «ձեռք է տվել», իսկ Գրիգորը պատասխանել է, որ ինքն իրեն նման բան թույլ չէր տա։ Ինքը չի լսել, որ անվտանգության աշխատակիցը հայտնած լինի, թե որտեղից է նրան նման բան հայտնի դարձել։ Երբ ինքը մոտեցել է Գրիգորն ու անվտանգության աշխատակիցը մենակ են եղել, մի փոքր հեռու կանգնած է եղել մյուս անվտանգության աշխատակիցը։ Խոսակցության ժամանակ ինքն ու Գրիգորն ասել են, որ գնում են նստեն իրենց սեղանին, սակայն երբ պտտվել են, որ գնան, լսել են, որ անվտանգության աշխատակիցն ասել է «արա, որ մի բան եմ ասում, լսի», ինչից հետո Գրիգորը պտտվել է, սակայն չի հասցրել մի քայլ էլ անել, երբ անվտանգության աշխատակիցներից մեկը հարվածել է Գրիգորին։ Բուն վիճաբանության ժամանակ, հայհոյանքներ եղել են, սակայն մինչ այդ իրենք ընկերներով նորմալ զրուցել են։
-Պաշտպանի հարցերին ի պատասխան՝ Վարդան Հովսեփյանը հայտնեց, որ երբ իրենք նոր են հասել ակումբ ու 3 ընկերներով են եղել, նորմալ վարքագիծ են դրսևորել, խոսակցության ընթացքում հայհոյանքներ չեն հնչեցրել։ Ինքը Գրիգորի կողքին է նստած եղել՝ պատի տակ, իսկ Տիգրանն՝ իր դիմացը։ Սրահում երաժշտությունը եղել է բավականին բարձր, և իրենք միմյանց հետ խոսելիս մոտեցել են, որպեսզի իրենց ասածը լսելի լինի։ Երաժշտությունն այնքան բարձր է եղել, որ ինքը բացառում է, որ իրենց սեղանից մոտ 3-4 մետր հեռավորության գտնվող մարդիկ լսեին իրենց խոսակցությունը։
Երբ անվտանգության աշխատակիցը հարվածել է Գրիգորին, իրենք էլ սկսեն են նրան հարվածել, այդ ժամանակ վիճաբանությանը միացել են նաև ակումբի մյուս աշխատակիցներն ու սկսել հարվածել Գրիգորին։ Իրենց ընկերներից Տիգրանին ակումբի աշխատակիցներն այնպես են հարվածել, որ վերջինն ընկել ու կորցրել է գիտակցությունը։ Մյուս երեք անձինք, ովքեր հետո իրենց էին միացել, վիճաբանության ժամանակ փորձել են բաժանել իրենց։ Վիճաբանության սկզբում սրահի երաժշտությունը միացված է եղել, հետո, որքանով հիշում է, այն անջատել են։
Դեպքի օրը Գրիգորը միայն մատուցողուհու ձեռքին է կպել, այն նպատակով, որ մատուցողուհուն ականջն իրեն մոտիկ լինի պատվերը տալուց, քանի որ երաժշտությունը շատ բարձր է եղել, այլ բան ինքը չի նկատել։ Եթե Գրիգորը դիպչեր մատուցողուհու հետույքին, կոնքին կամ մարմնի այլ հատվածին, ինքը վստահաբար կնկատեր դա։
-Նախագահողի հարցերին ի պատասխան՝ Վարդան Հովսեփյանը հայտնեց, որ իրենց պատվերները մատուցողուհուն Գրիգորն է ասել ու զուգահեռ նաև թեյավճարներ տվել նրան։ Ուտելիքներից չի կարող հիշել, բայց խմիչքից մեկական շիշ փոքր օղի են պատվիրել ու իր համար գարեջուր։
Վիճաբանության ժամանակ ինքը լսել է, որ անվտանգության աշխատակիցն ասել է, թե իբր Գրիգորը մատուցողուհուն «ձեռք է գցել»։
2.11 Նկատի ունենալով, որ վարույթի մասնակիցներն իրենց եզրափակիչ ելույթներում հայտնել են վարույթի համար էական նշանակություն ունեցող նոր հանգամանքներ՝ Դատարանը վերսկսել է ապացույցների հետազոտումը և հիմնական դատալսումներում հետազոտվել են նաև.
-«Հանրային քրեական հետապնդումը դադարեցնելու մասին միջնորդությունը քննության առնելու վերաբերյալ» ՀՀ դատախազության Երևան քաղաքի Արաբկիր և Քանաքեռ-Զեյթուն վարչական շրջանների դատախազության ավագ դատախազ Արմեն Երիցյանի 2025 թվականի հունվարի 31-ի որոշումը, ըստ որի.
«(...)
Անդրադառնալով Տիգրան Հարությունյանի կողմից Գրիգոր Հովհաննիսյանի գործողությունները փոխլրացնելուն և հայհոյանքներ հնչեցնելուն, հարկ է արձանագրել, որ կատարված համակողմանի նախաքննությամբ ձեռք չի բերվել «հիմնավոր կասկածից վեր» ապացուցողական չափանիշին բավարարող տվյալներ առ այն, որ Տիգրան Հարությունյանի կողմից հնչեցվել են հայհոյանքներ: Նշված եզրահանգման համար հիմք են հանդիսանում վկաներ Յանիկ Կտոյանի, Արաքսյա Հակոբյանի, Սերինե Թովմասյանի նույնաբովանդակ ցուցմունքներն այն մասին, որ Տիգրան Հարությունյանին հայհոյանք հնչեցնելիս կամ Գրիգոր Հովհաննիսյանի գործողությունները փոխլրացնելիս չեն տեսել։ Այս համատեքստում հարկ է նշել նաև, որ եթե նույնիսկ հիմնավորվեր, որ Տիգրան Հարությունյանի կողմից հնչեցվել է հայհոյանք, ապա վարույթով ձեռք բերված տվյալները վկայում են այն մասին, որ հիշյալ հայհոյանքն ուղղված է եղել Գրիգոր Հովհաննիսյանի հասցեին և կրել է խրատական ու վերջինիս նախատելու բնույթ, քանի որ ենթադրյալ հայհոյանքին նախորդել է «էս ի՞նչ սարքիր» արտահայտությունը: Այլ կերպ ասած, Տիգրան Հարությունյանի գործողությունների՝ հասարակական կարգի դեմ ուղղված լինելու վերաբերյալ տվյալներ ձեռք չեն բերվել, որպիսի պայմաններում վերջինիս նկատմամբ ՀՀ քրեական օրենսգրքի 297-րդ հոդվածի 2-րդ մասի 1-ին կետով հարուցված հանրային քրեական հետապնդումը ենթակա է դադարեցման՝ ՀՀ քրեական դատավարության օրենսգրքի 12-րդ հոդվածի 1-ին մասի 1-ին կետի հիմքով։
(...)
ՈՐՈՇԵՑԻ
1. ՀՀ քննչական կոմիտեի Երևան քաղաքի վարչության Արաբկիր վարչական շրջանի քննչական բաժնի ավագ քննիչ Դ.Գևորգյանի միջնորդությունը բավարարել և թիվ 14837524 քրեական վարույթով Տիգրան Հարությունյանի նկատմամբ ՀՀ քրեական օրենսգրքի 297-րդ հոդվածի 2-րդ մասի 1-ին կետով իրականացվող հանրային քրեական հետապնդումը դադարեցնել՝ ՀՀ քրեական դատավարության օրենսգրքի 12-րդ հոդվածի 1-ին մասի 1-ին կետի հիմքով:
(...)»:
-«Հանրային քրեական հետապնդումը դադարեցնելու մասին միջնորդությունը քննության առնելու վերաբերյալ» ՀՀ դատախազության Երևան քաղաքի Արաբկիր և Քանաքեռ-Զեյթուն վարչական շրջանների դատախազության ավագ դատախազ Արմեն Երիցյանի 2025 թվականի ապրիլի 7-ի որոշումը, ըստ որի.
«(...)
Անդրադառնալով Վարդան Հովսեփյանի կողմից Գրիգոր Հովհաննիսյանի գործողությունները փոխլրացնելուն և հայհոյանքներ հնչեցնելուն, հարկ է արձանագրել, որ կատարված համակողմանի նախաքննությամբ ձեռք չի բերվել «հիմնավոր կասկածից վեր» ապացուցողական չափանիշին բավարարող տվյալներ առ այն, որ Վարդան Հովսեփյանի կողմից հնչեցվել են հայհոյանքներ: Նշված եզրահանգման համար հիմք են հանդիսանում վկաներ Յանիկ Կտոյանի, Արաքսյա Հակոբյանի, Սերինե Թովմասյանի նույնաբովանդակ ցուցմունքներն այն մասին, որ Վարդան Հովսեփյանին հայհոյանք հնչեցնելիս կամ Գրիգոր Հովհաննիսյանի գործողությունները փոխլրացնելիս չեն տեսել։ Այս համատեքստում հարկ է նշել նաև, որ եթե նույնիսկ հիմնավորվեր, որ Վարդան Հովսեփյանի կողմից հնչեցվել է հայհոյանք, ապա վարույթով ձեռք բերված տվյալները վկայում են այն մասին, որ հիշյալ հայհոյանքն ուղղված է եղել Գրիգոր Հովհաննիսյանի հասցեին և կրել է խրատական ու վերջինիս նախատելու բնույթ, քանի որ ենթադրյալ հայհոյանքին նախորդել է «էս ի՞նչ սարքիր» արտահայտությունը: Այլ կերպ ասած, Վարդան Հովսեփյանի գործողությունների՝ հասարակական կարգի դեմ ուղղված լինելու վերաբերյալ տվյալներ ձեռք չեն բերվել, որպիսի պայմաններում վերջինիս նկատմամբ ՀՀ քրեական օրենսգրքի 297-րդ հոդվածի 2- րդ մասի 1-ին կետով հարուցված հանրային քրեական հետապնդումը ենթակա է դադարեցման՝ ՀՀ քրեական դատավարության օրենսգրքի 12-րդ հոդվածի 1-ին մասի 1-ին կետի հիմքով։
(...)
ՈՐՈՇԵՑԻ
1. ՀՀ քննչական կոմիտեի Երևան քաղաքի վարչության Արաբկիր վարչական շրջանի քննչական բաժնի ավագ քննիչ Խ.Պողոսյանի միջնորդությունը բավարարել և թիվ 14837524 քրեական վարույթով Վարդան Հովսեփյանի նկատմամբ ՀՀ քրեական օրենսգրքի 297-րդ հոդվածի 2-րդ մասի 1-ին կետով իրականացվող հանրային քրեական հետապնդումը դադարեցնել` ՀՀ քրեական դատավարության օրենսգրքի 12-րդ հոդվածի 1-ին մասի 1-ին կետի հիմքով:
(...)»:
ԼՐԱՑՈՒՑԻՉ ԴԱՏԱԼՍՈՒՄՆԵՐ

2.12 Դատվածությունների և հետախուզման առկայության Ձև 8 հարցման պատասխանի համաձայն՝ Գրիգոր Վալտերի Հովհաննիսյանի նախկին դատվածությունների վերաբերյալ տվյալներ չեն ստացվել։
2.13 ՀՀ քաղաքացիական կացության ակտերի գրանցման տվյալների շտեմարանում միասնական էլեկտրոնային տեղեկատվական համակարգի միջոցով կատարված հարցմանն ի պատասխան ստացվել են՝
-ամուսնության պետական գրանցման թիվ 774 ակտը, համաձայն որի՝ Գրիգոր Հովհաննիսյանը և Թերեզա Հովհաննիսյանը (Նախոյանն) ամուսնացած են,
-ծննդի պետական գրանցման թիվ 1369 ակտը, համաձայն որի՝ 2015 թվականի հուլիսի 14-ին ծնված Դավիթ Հովհաննիսյանի հայրն է Գրիգոր Հովհաննիսյանը,
-ծննդի պետական գրանցման թիվ 1835 ակտը, համաձայն որի՝ 2019 թվականի դեկտեմբերի 9-ին ծնված Տիգրան Հովհաննիսյանի հայրն է Գրիգոր Հովհաննիսյանը,
-ծննդի պետական գրանցման թիվ 41120 ակտը, համաձայն որի՝ 2024 թվականի դեկտեմբերի 16-ին ծնված Լուսե Հովհաննիսյանի հայրն է Գրիգոր Հովհաննիսյանը:
2.14 ՀՀ պետական եկամուտների կոմիտեի հարկ վճարողների սպասարկման վարչության պետի գրության համաձայն՝ Գրիգոր Վալտերի Հովհաննիսյանը հանցանքն ավարտվելու օրվան՝ 2023 թվականի մարտի 29-ին նախորդող 12 ամիսների ընթացքում չի հանդիսացել վարձու աշխատող։ Հարկային մարմնի տեղեկատվական բազայում առկա չեն նաև Գրիգոր Վալտերի Հովհաննիսյանի կողմից իր ակտիվների ներդրմամբ (տրամադրմամբ) այլ անձանց գործունեությունից ստացված եկամուտի (շահաբաժնի, տոկոսի, ռոյալթիի, վարձակալական վճարի) վերաբերյալ տվյալներ: (7)
Պատժի վերաբերյալ կողմերի հակիրճ դիրքորոշումները.
Պատժի վերաբերյալ հարցերը քննարկելիս հանրային մեղադրողը խնդրեց Դատարանին Գրիգոր Հովհաննիսյանի կատարած հանցանքի համար որպես պատիժ նշանակել տուգանք՝ հանցանքը կատարելու պահին նվազագույն աշխատավարձի տասնհինգապատիկի չափով:
Պաշտպանը որևէ դիրքորոշում չհայտնեց:
Մեղադրյալ Գրիգոր Հովհաննիսյանը, պատասխանելով նախագահող դատավորի հարցերին, խնդրեց, իր նկատմամբ տուգանքի ձևով պատիժ նշանակելու պարագայում դրա վճարումը տարաժամկետել, քանի որ ինքն ի վիճակի չէ անհապաղ և ամբողջությամբ վճարել այն: Մեղադրյալը նաև հայտնեց, որ չի ցանկանում կատարել հանրային աշխատանքներ:
3. ԴԱՏԱՐԱՆԻ ՓԱՍՏԱԿԱՆ ՎԵՐԼՈՒԾՈՒԹՅՈՒՆՆԵՐԸ ԵՎ ԴԱՏԱՐԱՆԻ ԿՈՂՄԻՑ ՀԱՍՏԱՏՎԱԾ ԿԱՄ ՀԵՐՔՎԱԾ ՓԱՍՏԱԿԱՆ ՀԱՆԳԱՄԱՆՔՆԵՐԸ.
3.1 Հիմնական դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում հետևյալը.
ա) 2023 թվականի մարտի 29-ին՝ ժամը 02:30-ի սահմաններում, Գրիգոր Վալտերի Հովհաննիսյանն, իր ընկերների՝ Տիգրան Գառնիկի Հարությունյանի, Վարդան Ֆելիքսի Հովսեփյանի և ինքնությունները չպարզված անձանց հետ գտնվել է Երևան քաղաքի Բաղրամյան 74 հասցեում գործող «Քուին Մյուզիք Հոլ» ակումբում, որտեղ իր անձի առավելությունը ցուցադրելու նպատակով Գրիգոր Հովհաննիսյանը հարվածել է մատուցողուհի Արաքսյա Հակոբյանի հետույքին։
բ) Վերը նկարագրված արարքի համար անվտանգության աշխատակից Յանիկ Կտոյանի կողմից ստանալով նկատողություն՝ նշված դիտողությունն ընդունել է ցավագին, դրան արձագանքել է լկտի ձևով՝ առաջացնելով վիճաբանություն։
գ) Վիճաբանության ընթացքում Գրիգոր Վալտերի Հովհաննիսյանը հնչեցրել է սեռական բնույթի հայհոյանքներ և այլ անպարկեշտ արտահայտություններ՝ կոպիտ կերպով խախտելով հասարակական կարգը, հասարակության նկատմամբ ցուցաբերելով անհարգալից և բարոյական ու իրավական նորմերի նկատմամբ բացահայտ արհամարհական վերաբերմունք, համակեցության կանոնների ցուցադրաբար անտեսմամբ խախտելով մարդկանց՝ նշված ակումբի աշխատակիցների, անդորրը և խոչընդոտել հասարակական նշանակության օբյեկտի՝ «Քուին Մյուզիք Հոլ» ակումբի բնականոն աշխատանքը։
«Քուին Մյուզիք Հոլ» ակումբի բնականոն աշխատանքը խոչընդոտված լինելու փաստական հանգամանքը հաստատելիս՝ Դատարանը հաշվի է առնում այն, որ Գրիգոր Վալտերի Հովհաննիսյան կատարած արարքի հետևանքով տվյալ ակումբի մատուցողուհին՝ Արաքսյա Հակոբյանը, փաստացի դադարեցրել է իր աշխատանքը, իսկ անվտանգության աշխատակիցը՝ Յանիկ Կտոյանը, վիճաբանության մեջ է Գրիգոր Հովհաննիսյանի հետ, ինչի հետևանքով դեպքի վայր են եկել ոստիկանները։

դ) Միևնույն ժամանակ Դատարանն արժանահավատ չի համարում վկաներ Վարդան Հովսեփյանի և Տիգրան Հարությունյանի ցուցմունքներն առ այն, որ Գրիգոր Հովհաննիսյանը «Քուին Մյուզիք Հոլ» ակումբում չի հարվածել մատուցողուհի Արաքսյա Հակոբյանի հետույքին և վիճաբանությունը չի սկսվել նրա վարքագծի հետևանքով, քանի որ նշված վկաների ցուցմունքները հերքվում են հիմնական դատալսումերում հետազոտված մյուս ապացույցներով։ Ավելին՝ անտրամաբանական են նաև վկա Տիգրան Հարությունյանի ցուցմունքներն առ այն, որ ակումբի աշխատակիցները դիտավորյալ են հրահրել վիճաբանությունը, որպեսզի շուտ ավարտեն իրենց աշխատանքը, քանի որ վկայի այդ ենթադրությունը չի բխում հիմնական դատալսումներում հետազոտված որևէ ապացույցից և չի հիմնավորվում հստակ և համոզիչ փաստարկներով։
Տվյալ դեպքում Դատարանն առավել արժանահավատ է համարում «Քուին Մյուզիք Հոլ» ակումբի աշխատակիցների և հատկապես՝ Արաքսյա Հակոբյանի, Յանիկ Կտոյանի և Սերինե Թովմասյանի համանման ցուցմունքները, ովքեր Գրիգոր Հովհաննիսյանին նախկինում չեն ճանաչել և նրան մեղադրող ցուցմունքներ տալու շարժառիթներ չեն ունեցել։
• Այսպիսով, Դատարանն արձանագրում է, որ դատավճռի 2.2-2.9 և 2.11 կետերում նշված ապացույցները բացառում են Գրիգոր Վալտերի Հովհաննիսյանին մեղսագրված և նախորդ՝ «ա», «բ» և «գ» պարբերություններում նշված փաստական հանգամանքների ապացուցվածության վերաբերյալ որևէ կասկած։
3.2 Հիմնական դատալսումների ընթացքում հետազոտված ապացույցները ստուգելու և գնահատելու արդյունքում՝ Դատարանը հաստատված չի համարում այն, որ Գրիգոր Վալտերի Հովհաննիսյանն իրեն մեղսագրված արարքը կատարել է խմբի կազմում՝ Տիգրան Գառնիկի Հարությունյանի և Վարդան Ֆելիքսի Հովսեփյանի հետ միասին, քանի որ Գրիգոր Հովհաննիսյանին մեղսագրվող այդ փաստական հանգամանքները հերքվել են հիմնական դատալսումներում հետազոտված ապացույցներով։
3.3 Լրացուցիչ դատալսումների ընթացքում հետազոտված թույլատրելի ապացույցները ստուգելու և գնահատելու արդյունքում Դատարանը հաստատված է համարում նաև այն, որ Գրիգոր Վալտերի Հովհաննիսյանը նախկինում դատապարտված չի եղել, ամուսնացած է, նրա խնամքին են 3 անչափահաս երեխաները։ Հանցանքը կատարելուն նախորդող 12 ամիսների ընթացքում Գրիգոր Վալտերի Հովհաննիսյանը եկամուտ չի ստացվել։

4. ԴԱՏԱՐԱՆԻ ԻՐԱՎԱԿԱՆ ՎԵՐԼՈՒԾՈՒԹՅՈՒՆՆԵՐԸ, ՀԵՏԵՎՈՒԹՅՈՒՆՆԵՐՆ ՈՒ ՈՐՈՇՈՒՄՆԵՐԸ.
4.1 Հաստատված փաստական հանգամանքների և 2025 թվականի հոկտեմբերի 13-ին կայացված մեղադրական վերդիկտի հիման վրա Դատարանն ապացուցված է համարում մեղադրյալ Գրիգոր Վալտերի Հովհաննիսյանին վերագրվող սակայն խմբի կազմում չկատարված փաստական հանգամանքները (արարքը), այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ։
4.2 Միևնույն ժամանակ, դուրս չգալով մեղադրանքի հիմքում դրված փաստական հանգամանքների շրջանակից, հիմք ընդունելով Դատարանի կողմից հաստատված և հերքված փաստական հանգամանքները և մեղադրյալին վերագրվող արարքին տրված իրավական գնահատականի հարցը պատշաճ իրավական ընթացակարգի շրջանակներում քննարկելով կողմերի հետ, Դատարանը փոխում է մեղադրյալին վերագրվող արարքին տրված իրավական գնահատականը, սահմանելով, որ մեղադրյալ Գրիգոր Վալտերի Հովհաննիսյանին վերագրվող ապացուցված արարքի նկատմամբ ենթակա է կիրառման ոչ թե ՀՀ քրեական օրենսգրքի 297 հոդվածի 2-րդ մասի 1-ին կետը, այլ ՀՀ քրեական օրենսգրքի 297 հոդվածի 1-ին մասը։
4.1 Հաստատված փաստական հանգամանքների հիման վրա Դատարանն արձանագրում է, որ Գրիգոր Վալտերի Հովհաննիսյանի պատասխանատվությունն ու պատիժը մեղմացնող՝ ՀՀ քրեական օրենսգրքի 70 հոդվածով նախատեսված հանգամանք է պատիժ նշանակելու պահին մեղադրյալի խնամքի տակ երեք անչափահաս երեխաների առկայությունը:
4.2 Դատարանն արձանագրում է, որ Գրիգոր Վալտերի Հովհաննիսյանի պատասխանատվությունն ու պատիժը ծանրացնող՝ ՀՀ քրեական օրենսգրքի 71 հոդվածով նախատեսված հանգամանքներ առկա չեն։
4.3 Կատարած հանցանքի համար մեղադրյալ Գրիգոր Վալտերի Հովհաննիսյանը ենթակա է պատժի:
4.4 Պատժի տեսակն ու չափը որոշելիս Դատարանը, հաշվի է առնում հետևյալ հանգամանքները՝
-Գրիգոր Վալտերի Հովհաննիսյանի կատարած հանցանքի հանգամանքները, հանրային վտանգավորության աստիճանն ու բնույթը, մասնավորապես՝ այն, որ նրա կատարած հանցանքը դասվում է ոչ մեծ ծանրության հանցագործությունների շարքին։
-Գրիգոր Վալտերի Հովհաննիսյանի անձը բնութագրող տվյալները, նրա ստացած մարմնական վնասվածքների ծանրության աստիճանը, պատասխանատվությունը և պատիժը մեղմացնող հանգամանքի առկայությունն ու ծանրացնող հանգամանքի բացակայությունը, ՀՀ քրեական օրենսգրքի 69 հոդվածի 2-րդ մասում թվարկված մյուս հանգամանքները։
4.5 Այսպիսով, Դատարանը գտնում է, որ ՀՀ քրեական օրենսգրքի 55 հոդվածի 2-րդ մասով սահմանված պատժի նպատակներն ապահովելու համար Գրիգոր Վալտերի Հովհաննիսյանի կողմից ՀՀ քրեական օրենսգրքի 297 հոդվածի 1-ին մասով կատարված հանցագործության բնույթին, վտանգավորության աստիճանին, դրա կատարելու հանգամանքներին, ինչպես նաև հանցավորի անձին համաչափ պատիժ է վեցապատիկի չափով տուգանքը:
Հիմք ընդունելով ՀՀ քրեական օրենսգրքի 59 հոդվածի 5-րդ մասը, և հաշվի առնելով հանցանքն ավարտվելու օրվան նախորդող 12 ամիսների ընթացքում Գրիգոր Վալտերի Հովհաննիսյանի եկամտի բացակայության վերաբերյալ տվյալները՝ տուգանքի չափը պետք է հաշվարկել հանցանքը կատարելու պահին՝ 2023 թվականի մարտի 29-ին ՀՀ-ում սահմանված նվազագույն աշխատավարձի՝ 75.000 (յոթանասունհինգ հազար) ՀՀ դրամի չափով:
• Այսպիսով, Դատարանը գտնում է, որ ՀՀ քրեական օրենսգրքի 297 հոդվածի 1-ին նախատեսված հանցանքի կատարման համար Գրիգոր Վալտերի Հովհաննիսյանի նկատմամբ պատիժ պետք է նշանակել տուգանք՝ նվազագույն աշխատավարձի վեցապատիկի՝ 450.000 (չորս հարյուր հիսուն հազար) ՀՀ դրամի չափով։
4.6 Դատարանը գտնում է, որ կատարած հանցանքի համար Գրիգոր Վալտերի Հովհաննիսյանի նկատմամբ լրացուցիչ պատիժ նշանակելու հիմքերն ու անհրաժեշտությունը բացակայում են:
4.7 Գրիգոր Վալտերի Հովհաննիսյանը պետք է կրի իր նկատմամբ նշանակված պատիժը, քանի որ նրան պատժից ազատելու հիմքեր առկա չեն։
4.8 Հիմք ընդունելով ՀՀ քրեական օրենսգրքի 59 հոդվածի 8-րդ մասը, հաշվի առնելով մեղադրյալ Գրիգոր Վալտերի Հովհաննիսյանի եկամտի բացակայությունը, ինչպես նաև տուգանքի վճարման համար ժամկետ սահմանելու մասին վերջինի խնդրանքը՝ Դատարանը գտնում է, որ նշանակված տուգանքի վճարման ժամկետ պետք է սահմանել առավելագույնը՝ 1 (մեկ) տարի:
4.9 ՀՀ քրեական դատավարության օրենսգրքի 348 հոդվածի 1-ին մասի 11-14-րդ հարցերին անդրադառնալու անհրաժեշտությունը սույն քրեական գործով բացակայում է։
4.10 Գրիգոր Վալտերի Հովհաննիսյանի կիրառված խափանման միջոցը՝ բացակայելու արգելքը, պետք է թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը, քանի որ այն բավարար է մեղադրյալի կողմից ՀՀ քրեական դատավարության օրենսգրքի 116 հոդվածի 2-րդ մասով նախատեսված որևէ գործողություն կատարելու ռիսկերը չեզոքացնելու համար:
4.11 ՀՀ քրեական դատավարության օրենսգրքի 167 հոդվածի 1-ին մասի 1-6-րդ կետերով նախատեսված վարութային ծախսեր սույն քրեական գործով առկա չեն, իսկ 7-րդ կետով նախատեսված ծախսերի վերաբերյալ տվյալները բացակայում են: Ավելին՝ այդ վարութային ծախսերի հատուցման պահանջ Դատարանին չի ներկայացվել, որպիսի պայմաններում վարութային ծախսերի հարցը պետք է համարել լուծված։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 167, 276, 347, 348, 349 և 364 հոդվածներով՝ Դատարանը

Վ Ճ Ռ Ե Ց

1. Գրիգոր Վալտերի Հովհաննիսյանին մեղավոր ճանաչել ՀՀ քրեական օրենսգրքի 297 հոդվածի 1-ին մասով նախատեսված հանցանքը կատարելու մեջ, և նրա նկատմամբ պատիժ նշանակել տուգանք՝ հանցանքը կատարելու պահին նվազագույն աշխատավարձի վեցապատիկի՝ 450.000 (չորս հարյուր հիսուն հազար) ՀՀ դրամի չափով:
2. Նշանակված տուգանքի վճարման ժամկետ սահմանել առավելագույնը՝ 1 (մեկ) տարի:
3. Գրիգոր Հովհաննիսյանի նկատմամբ կիրառված խափանման միջոցը՝ բացակայելու արգելքը, թողնել անփոփոխ՝ մինչև դրա իրավաչափության պայմանների փոփոխումը՝ բայց ոչ ավելի, քան դատավճռի օրինական ուժի մեջ մտնելը։
Դատավճիռը վերաքննության կարգով կարող է բողոքարկվել Հայաստանի Հանրապետության վերաքննիչ քրեական դատարան՝ ստանալու օրվանից հետո՝ մեկամսյա ժամկետում:



ԴԱՏԱՎՈՐ ԱՐՇԱԿ ՄԱԹԵՎՈՍՅԱՆ


(1)Ծնված 1987 թվականի հունվարի 20-ին Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, նախկինում չդատապարտված, խնամքին երեք անչափահաս երեխա, հաշվառված է և բնակվում է Երևան քաղաքի Քոչարյան փողոցի 14 շենքի թիվ 24 բնակարանում, որպես խափանման միջոց է կիրառված ՀՀ-ից բացակայելու արգելքը:
(2)Տե՛ս քրեական գործ, հատոր 1, թերթեր 274-277:
(3)Տե՛ս քրեական գործ, հատոր 1, թերթեր 35-44։
(4)Տե՛ս քրեական գործ, հատոր 1, թերթեր 219-220։
(5)Տե՛ս քրեական գործ, հատոր 1, թերթ 131։
(6)Տե՛ս քրեական գործ հատոր 1, թերթեր 49-52։
(7)2.12-2.15 կետերի վերաբերյալ տե՛ս Դատարանում ստեղծված նյութերը: