ԵԴ1/0021/01/25

Ո Ր Ո Շ ՈՒ Մ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ՄԱՍԻՆ

«14» փետրվարի 2025թ. ք․Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ նաև` Դատարան)

դատավոր՝ Մ․Արամյանի
քարտուղարությամբ՝ Մ․Պողոսյանի
հանրային մեղադրող՝ Ա․Հեբոյանի

դռնբաց դատական նիստում քննեց քրեական գործն ըստ մեղադրանքի` Ժորա Ռաֆիկի Դավթյանին /ծնված՝ 13.01.1965թ., հաշվառված ք. Էջմիածին, «Արմավիր» ՔԿՀ կալանավոր/։
Ժորա Դավթյանին մեղադրանք է առաջադրվել ՀՀ քրեական օրենսգրքի 166-րդ հոդվածի 2-րդ մասի 5-րդ կետով,
Պ Ա Ր Զ Ե Ց

2024 թվականի օգոստոսի 14-ին ՀՀ քննչական կոմիտեի Էրեբունի և Նուբարաշեն վարչական շրջանների քննչական բաժնում ՀՀ քրեական օրենսգրքի 167-րդ հոդվածի 2-րդ մասի 5-րդ կետով նախաձեռնվել է թիվ 12152424 քրեական վարույթը:
2024 թվականի հոկտեմբերի 28-ին հսկող դատախազի կողմից կայացվել է որոշում Ժորա Դավթյանի նկատմամբ ՀՀ քրեական օրենսգրքի 166-րդ հոդվածի 2-րդ մասի 5-րդ կետով հանրային քրեական հետապնդում հարուցելու մասին, որը 2024 թվականի դեկտեմբերի 12-ին ներկայացվել է վերջինիս։
2024 թվականի դեկտեմբերի 20-ին կայացվել է հանրային քրեական հետապնդում հարուցելու մասին նոր որոշում՝ ՀՀ քրեական օրենսգրքի 166-րդ հոդվածի 2-րդ մասի 5-րդ կետով, որը 2024 թվականի դեկտեմբերի 26-ին ներկայացվել է Ժորա Դավթյանին։
Ժորա Ռաֆիկի Դավթյանի նկատմամբ ՀՀ քրեական օրենսգրքի 166-րդ հոդվածի 2-րդ մասի 5-րդ կետով հանրային քրեական հետապնդում է հարուցվել այն ենթադրյալ արարքի համար, որ նա «2024 թվականի օգոստոսի 13-ին՝ ժամը 22:00-ի սահմաններում, Սերգեյ Հովհաննեսի Միքայելյանի բնակության վայր հանդիսացող Երևան քաղաքի Վարդաշեն 9 փողոցի 70 հասցեում գտնվող «Հանս Քրիստիան Կոֆոեդ» անօթևանների տան թիվ 10 սենյակում, Սերգեյ Միքայելյանի և Արտեմ Համբարձումյանի միջև կենցաղային հարցերի շուրջ առաջացած վիճաբանության ժամանակ, Արամայիս Ժորայի Փափազյանի հետ, մարմնական վնասվածք հասցնելու դիտավորությամբ, խմբի կազում, միմյանց գործողությունները փոխլրացնելով, ձեռքերով և Ա.Փափազյանին պատկանող թևատակի հենակներով /կաստիլ/ բազմաթիվ հարվածներ են հասցրել Ս.Միքայելյանի մարմնի տարբեր մասերին՝ վերջինիս պատճառելով պոլիտրավմասի, աջ դաստակի 1-ին մատի եղնգային ֆալանգի ենթահոդախախտի, 2-րդ մետակարպալ ոսկրի գլխիկի ներմղված տեղաշարժով կոտրվածքի, աջ ծղիկոսկրի դիաֆիզար, բեկորավոր, բաց տեղաշարժով կոտրվածքի, ձախ ազդրոսկրի դրսային կոճի եզրային, պոկումային, բաց տեղաշարժով կոտրվածքի, ձախ ազդրի ստորին երրորդականի կտրած վերքի, աջ նախաբազկի ստորին երրորդականի կտրած վերքի, գլխի ճակատային շրջանի քերծվածքի, ծնկահոդի կողմնային մակերեսի պատռված՝ հոդ թափանցումով վերքի ձևով մարմնական վնասվածքներ, առողջությանը պատճառելով ծանր վնաս՝ ընդհանուր աշխատունակության կայուն կորստի մեկ երրորդից ավելի։
Այսպիսով՝ Ժորա Ռաֆիկի Դավթյանին մեղսագրվում է ՀՀ քրեական օրենսգրքի 166-րդ հոդվածի 2-րդ մասի 5-րդ կետով նախատեսված հանցանքի կատարում:»։
Դատարանը ստացված տվյալների հիման վրա քննարկման առարկա դարձրեց մեղադրյալ Ժորա Դավթյանի նկատմամբ ՀՀ քրեական օրենսգրքի 166-րդ հոդվածի 2-րդ մասի 5-րդ կետով իրականացվող ք քրեական հետապնդումը դադարեցնելու հարցը՝ Ժորա Դավթյանի մահվան հիմքով:
Դատարան է ստացվել հետևյալ տեղեկությունները և գրությունները.
-ՀՀ ԱՆ «Դատապարտյալների հիվանդանոց» ՔԿ հիմնարկից ստացված գրություն համաձայն որի. «Ի պատասխան Ձեր կողմից ուղարկված 08.01.2025թ. ԴԴԱ-8.1 3478 գրության մուտք ՀՀ ԱՆ «Դատապարտյալների հիվանդանոց» ՔԿՀ 15.01.2025/ հայտնվում է, որ ՀՀ ԱՆ «Դատապարտյալների հիվանդանոց» ՔԿ հիմնարկում 2025թ-ի հունվարի 7-ին ժամը 15:00-ի սահմաններում մահացել է կալանավորված անձ Ժորա Ռաֆիկի Դավթյանը՝ ծնված 13.01.1965թ. ք. Էջմիածին, ազգությամբ հայ, ՀՀ քաղաքացի, բարձրագույն կրթությամբ, չի աշխատել, նախկինում դատված, ամուսնալուծված, հաշվառված Արմավիրի մարզ, քաղաք Էջմիածին, Սուրբ Մ. Մաշտոցի փողոց, 85 շենք, բնակարան 15 հասցեում, մշտական բնակության վայր չունի»:
-Մեղադրյալ Ժորա Դավթյանի մերձավոր ազգական հանդիսացող կնոջը Գոհար Մարգարյանին ուղղարկվել է ծանուցագիր, որը ետ է վերադարձվել անհայտ նշագրումով:
-2025 թվականի փետրվարի 14-ին՝ ժամը 15։45-ին, դատարանի աշխատակազմը +7952558-55-53 բջջային հեռախոսահամարով կապնվել է թիվ ԵԴ1/0021/01/25 քրեական գործով մեղադրյալ Ժորա Դավթյանի որդու՝ Հրաչիկ Վելիջանյանի հետ՝ ով գտնվել է ՀՀ սահմաններից դուրս: Հեռախոսային խոսակցության ընթհացքում վերջինս առարկություն չի հայտնել իր հոր մահվան հիմքով քրեական հետապնդումը դադարեցնելու և քրեական գործի վարույթը կարճելու հարցի վերաբերյալ։Կազմվել է արձանագրություն:
Հանրային մեղադրող Ա․Հեբոյանը գրավոր դիրքորոշմամբ չի առարկել նշված հիմքով քրեական հետապնդումը դադարեցնելու և քրեական գործի վարույթը կարճելու դեմ:
Պաշտպան Տ․Գրիգորյանը գրավոր դիրքորոշմամբ չի առարկել նշված հիմքով քրեական հետապնդումը դադարեցնելու դեմ:
Տուժող Սերգեյ Միքայելյանին ուղարկվել է ծանուցագիր, որը փոստային ծառայության կողմից ետ է վերադարձվել չպահանջված նշագրումով։
Դատարանը, քննարկելով մահվան հիմքով մեղադրյալ Ժորա Դավթյանի նկատմամբ իրականացվող քրեական հետապնդումը դադարեցնելու և գործի վարույթը կարճելու հարցը, լսելով դատավարության կողմերի կարծիքը, գտնում է, որ մեղադրյալի նկատմամբ իրականացվող քրեական հետապնդումը՝ ՀՀ քրեական օրենսգրքի 166-րդ հոդվածի 2-րդ մասի 5-րդ կետով ենթակա է դադարեցման, իսկ քրեական գործի վարույթը՝ կարճման հետևյալ պատճառաբանությամբ.
ՀՀ քրեական դատավարության օրենսգրքի 12-րդ հոդվածի համաձայն՝
1. Քրեական հետապնդում չպետք է հարուցվի, իսկ հարուցված քրեական հետապնդումը ենթակա է դադարեցման, եթե`
(…)
10) անձը մահացել է.
(…)
3. Սույն հոդվածի 1-ին մաuի 10-րդ կետով նախատեսված հանգամանքի առկայությունը քրեական հետապնդումը բացառող չէ, եթե մահացածի օրինական ներկայացուցիչն առարկում է դրա դեմ այն հիմքով, որ մահացածը չի կատարել իրեն մեղսագրվող արարքը: Այu դեպքում քրեական վարույթը շարունակվում է ընդհանուր կարգով, սակայն մեղադրական վերդիկտ կայացնելու դեպքում այդ անձի նկատմամբ պատիժ չի նշանակվում: Սույն հոդվածի 1-ին մաuի 10-րդ կետը չի տարածվում քաղաքացիական դատավարության կարգով անձին մահացած ճանաչելու դեպքերի վրա:
(…)»:
ՀՀ քրեական դատավարության օրենսգրքի 311-րդ հոդվածի համաձայն՝
«1. Նախնական դատալսումների ընթացքում սույն հոդվածով սահմանված հաջորդականությամբ դատարանը քննարկման առարկա է դարձնում՝
(…)
3) քրեական հետապնդումը դադարեցնելու կամ վարույթը կարճելու հարցը.
(…):»:
ՀՀ քրեական դատավարության օրենսգրքի 315-րդ հոդվածի համաձայն՝
«1. Սույն օրենսգրքի 12-րդ հոդվածի 1-ին մասի 3-14-րդ կետերով նախատեսված որևէ հանգամանքի առկայության դեպքում, երբ դա հնարավոր է առանց ապացույցների հետազոտման, դատարանը որոշում է կայացնում քրեական հետապնդումը դադարեցնելու և վարույթը կարճելու մասին: Եթե քրեական հետապնդումը բացառող հանգամանքը վերաբերում է մեղադրյալներից մեկին, ապա քրեական հետապնդումը դադարեցվում է միայն նրա նկատմամբ՝ առանց վարույթը կարճելու:(…)»:
Անդրադառնալով սույն քրեական գործի փաստական հանգամանքներին՝ Դատարանն արձանագրում է, որ ըստ ՀՀ ԱՆ «Դատապարտյալների հիվանդանոց ՔԿ հիմարկի պետի կողմից Դատարանին հասցեագրված գրության Ժորա Ռաֆիկի Դավթյանը մահացել է 2025թ-ի հունվարի 7-ին՝ ժամը 15:00-ի սահմաններում, (տե՛ս քրեական գործի նյութեր): Միաժամանակ՝ Դատարանն արձանագրում է, որ սույն քրեական գործով առկա չէ առարկություն քրեական հետապնդումը դադարեցնելու մասին՝ մահացածի մերձավոր ազգականի կողմից այն հիմքով, որ մահացածը չի կատարել իրեն մեղսագրվող արարքը:
Բացի այդ սույն քրեական գործից առկա է անջատված մաս, որը վերաբերում է մյուս մեղադրյալին, հետևաբար սույն քրեական գործը Դատարան է ուղարկվել բացառապես Ժ.Դավթյանի մեղադրանքով:
Այսպիսով՝ Դատարանն արձանագրում է, որ սույն դեպքում առկա է քրեական հետապնդումը բացառող հանգամանք, որպիսի պայմաններում անհրաժեշտ է Ժորա Դավթյանի նկատմամբ ՀՀ քրեական օրենսգրքի 166-րդ հոդվածի 2-րդ մասի 5-րդ կետով իրականացվող քրեական հետապնդումը ՀՀ քրեական դատավարության օրենսգրքի 12-րդ հոդվածի 1-ին մասի 10-րդ կետով նախատեսված հիմքով դադարեցնել և քրեական գործի վարույթ կարճել:
ՀՀ քրեական դատավարության օրենսգրքի 315-րդ հոդվածի համաձայն՝
«(...)
2. Քրեական հետապնդումը դադարեցնելու մասին որոշմամբ վերացվում են տվյալ մեղադրյալի նկատմամբ կիրառված հարկադրանքի միջոցները, իսկ վարույթը կարճելու դեպքում` նաև այլ անձանց նկատմամբ կիրառված հարկադրանքի միջոցները: Վարույթը կարճելու մասին որոշմամբ լուծվում է նաև իրեղեն ապացույցների տնօրինման հարցը:
(...):»:
ՀՀ քրեական դատավարության օրենսգրքի 117-րդ հոդվածի 1-ին մասի համաձայն`
«Եթե խափանման միջոցի գործողության ընթացքում փոխվել կամ վերացել են դրա իրավաչափության պայմանները, վարույթն իրականացնող մարմինն իր իրավասության սահմաններում որոշում է կայացնում խափանման միջոցը փոխելու կամ վերացնելու մասին»:
Ժորա Դավթյանի նկատմամբ խափանման միջոց չի ընտրվել:
Անդրադառնալով քրեական գործով լուծման մյուս հարցերին՝ Դատարանն արձանագրում է, որ սույն քրեական գործին կցված արտավարութային փաստաթղթերը անհրաժեշտ է պահել քրեական գործի հետ միասին՝ դրանց պահելու ամբողջ ժամանակամիջոցում:
Անդրադառնալով սույն քրեական գործով դատական ծախսերին՝ Դատարանը հաշվի առնելով մեղադրյալի մահացած լինելու հանգամանքը, ուստի գտնում է, որ վարութային ծախսերի հարցը պետք է համարել լուծված:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 12-րդ, 33-րդ, 311-րդ, 315-րդ հոդվածներով` Դատարանը,

Ո Ր Ո Շ Ե Ց

Մեղադրյալ Ժորա Դավթյանի նկատմամբ ՀՀ քրեական օրենսգրքի 166-րդ հոդվածի 2-րդ մասի 5-րդ կետով իրականացվող քրեական հետապնդումը դադարեցնել ՀՀ քրեական դատավարության օրենսգրքի 12-րդ հոդվածի 1-ին մասի 10-րդ կետով, այն է՝ անձի մահվան հիմքով:
Թիվ ԵԴ1/0021/01/25 քրեական գործի վարույթը կարճել՝ ՀՀ քրեական դատավարության օրենսգրքի 13-րդ հոդվածի 1-ին մասի 3-րդ կետով։
Քրեական գործին կցված արտավարութային փաստաթղթերը պահել քրեական գործի հետ միասին՝ դրանց պահելու ամբողջ ժամանակամիջոցում:
Վարութային ծախսերի, իրեղեն ապացույցների գույքային հայցի հարցը համարել լուծված:
Որոշումն կարող է բողոքարկվել ՀՀ վերաքննիչ քրեական դատարան ստացման օրվանից հետո՝ տասնօրյա ժամկետում:

ԴԱՏԱՎՈՐ ՄՈՒՇԵՂ ԱՐԱՄՅԱՆ