ԵԴ1/4008/01/24






Դ Ա Տ Ա Վ Ճ Ի Ռ
ՀԱՅԱՍՏԱՆԻ ՀԱՆՐԱՊԵՏՈւԹՅԱՆ ԱՆՈւՆԻՑ


«20» հունվարի 2025թ. ք.Երևան

Երևան քաղաքի առաջին ատյանի ընդհանուր իրավասության քրեական դատարանը (այսուհետ՝ նաև Դատարան)՝ նախագահությամբ՝ դատավոր Ա.Ասատրյանի, համաձայնությամբ տուգանք նշանակելու վարույթի կիրառմամբ, գրավոր ընթացակարգով քննելով քրեական գործն ըստ մեղադրանքի Արփինե Մյասնիկի Ստեփանյանի (ծնված՝ 1981 թվականի փետրվարի 14-ին, հայ, ՀՀ քաղաքացի, հաշվառված է Գեղարքունիքի մարզի, Գավառ համայնքի, Ազատության փողոցի, 1-ին նրբանցքի, 1-ին փակուղի, 1-ին շենքի, 38-րդ բնակարան հասցեում, բնակվում է Երևան քաղաքի, Էրեբունի համայնքի, Ազատամարտիկների փողոցի, 158-րդ տուն հասցեում)՝ ՀՀ քրեական օրենսգրքի 457-րդ հոդվածի 1-ին մասով
Պ Ա Ր Զ Ե Ց
Գործի դատավարական նախապատմությունը.
2024 թվականի հունիսի 25-ին ՀՀ քննչական կոմիտեի Երևան քաղաքի քննչական վարչության Շենգավիթ վարչական շրջանի քննչական բաժնում նախաձեռնվել է թիվ 11145724 քրեական վարույթը:
2024 թվականի դեկտեմբերի 24-ին՝ Արփինե Մյասնիկի Ստեփանյանի նկատմամբ հարուցվել է հանրային քրեական հետապնդում՝ ՀՀ քրեական օրենսգրքի 457-րդ հոդվածի 1-ին մասով:
2024 թվականի դեկտեմբերի 26-ի որոշմամբ՝ Արփինե Ստեփանյանի նկատմամբ որպես խափանման միջոց է կիրառվել բացակայելու արգելքը:
2024 թվականի դեկտեմբերի 30-ին Արփինե Ստեփանյանի վերաբերյալ թիվ 11145724 քրեական վարույթը մեղադրական եզրակացությամբ և համաձայնությամբ տուգանք նշանակելու վարույթ նախաձեռնելու մասին արձանագրությամբ ուղարկվել է Երևան քաղաքի առաջին ատյանի ընդհանուր իրավասության քրեական դատարան: Քրեական գործին շնորհվել է ԵԴ1/4008/01/24 համարը։
Նույն օրը թիվ ԵԴ1/4008/01/24 քրեական գործը մակագրվել, իսկ 2025 թվականի հունվարի 3-ին հանձնվել է դատավոր Ա.Ասատրյանին։
Դատարանը, համոզվելով, որ առկա է ՀՀ քրեական դատավարության օրենսգրքի 464․6 հոդվածով նախատեսված համաձայնությամբ տուգանք նշանակելու վարույթ կիրառելու հիմքը, մասնավորապես՝ մեղադրյալ Արփինե Ստեփանյանը հանդիսանում է առաջին անգամ հանցանք կատարած անձ, նրան մեղսագրվում է ոչ մեծ ծանրության հանցագործության կատարում, վերջինը չի վիճարկել իրեն ներկայացված մեղադրանքի փաստական հիմքն ու իրավական գնահատականը և պաշտպանի հետ խորհրդակցելուց հետո կամավոր ցանկություն է հայտնել, որ դատարանում գործի քննությունն իրականացվի համաձայնությամբ տուգանք նշանակելու վարույթի կարգով և բացակայում են նույն օրենսգրքի 464.7 հոդվածի 2-րդ մասով նախատեսված հանգամանքները, որոշում է կայացրել քրեական գործի վարույթը ստանձնելու և համաձայնությամբ տուգանք նշանակելու վարույթ հարուցելու մասին, իսկ դատավճռի կայացման օր է նշանակվել 2025 թվականի հունվարի 20-ը։
Մեղադրանքի փաստական նկարագրությունը.
Արփինե Ստեփանյանին ՀՀ քրեական օրենսգրքի 457-րդ հոդվածի 1-ին մասով մեղադրանք է ներկայացվել այն բանի համար, որ նա «ներգաղթային արտոնագիր ստանալու համար ԱՄՆ դեսպանատուն ներկայացրել է իրավաբանական նշանակություն ունեցող փաստ հավաստող՝ առաջնահերթ աշխատող և արտակարգ կարողությունների կամ ձիրքի տեր հանդիսանալու վերբերյալ կեղծ փաստաթղթեր:
Այսպես՝
Արփինե Մյասնիկի Ստեփանյանը՝ 2023 թվականի դեկտեմբերի 1-ին ներգաղթի 1-140 ձևի միջնորդություն է ներկայացվել ՀՀ-ում ԱՄՆ դեսպանատուն՝ հայտնելով արվեստի բնագավառում իր արտակարգ կարողությունների մասին և ի հաստատումն այդ պնդմանը, միջնորդագրին կցել է երաշխավորագրերի, վկայականների, պատվոգրերի ու դիպլոմների պատճեններ: 2024թ. փետրվարի 26-ին Արփինե Ստեփանյանը հրավիրվել է հարցազրույցի, որի ժամանակ պահանջվել է «ՅՈՒՄԱԿՍ» սուրհանդակային ծառայության միջոցով հյուպատոսական բաժնին ներկայացնել վկայականների, պատվոգրերի, դիպլոմների բնօրինակները և ցուցահանդեսների մասնակցության վերաբերյալ ապացույցներ: Արփինե Մյասնիկի Ստեփանյանը «ՅՈՒՄԱԿՍ» սուրհանդակային ծառայության միջոցով 20.06.2024թ. ներկայացրել է իրավաբանական նշանակություն ունեցող փաստ հավաստող առաջնահերթ աշխատող և արտակարգ կարողությունների կամ ձիրքի տեր հանդիսանալու փաստը հավաստող կեղծ փաստաթղթեր, մասնավորապես՝
1. 2-րդ կարգի դիպլոմ՝ #12436/20 մասնակցության համար, Արվեստի 3-րդ միջազգային hunnnli, Perspective Center, 2021թ.:
2. Golden Time Talent մրցանակ, 30 ապրիլի 2020թ., գրանցման կոդ՝ # GTSC-1401 0084:
3. Unique մրցանակ ARAXA-blog-ից, 12 հուլիսի 2023թ.:
4. Հայաստանի նկարիչների միության անդամի վկայական՝ 5 դեկտեմբերի 2017թ.
5. Ակադեմիական վկայական՝ Աշխարհի ժողովուրդների հոգևոր միասնության և համագործակցության միջազգային ակադեմիայից (International Academy of Spiritual Unity and Collaboration of the Peoples of the World), 14 oqnuunnuh 2022թ.:
6.Պատվոգիր Մաչանենց արվեստի միջազգային 8-րդ սիմպոզիումից, օգոստոս 2023թ.:
7.Պողոսյան մրցանակ Հայաստանի Հանրապետության հիմնադրամից, 14 օգոստոսի 2020р.:
8. Սոլո արվեստի ցուցահանդեսի հաղթողի մրցանակ Light Space Time-ից, 2022թ.:
9. Ժամանակակից արվեստի մրցույթ, 2-րդ տեղի դիպլոմ, Talant of Russia-ից ապրիլ 2019թ»:

Համաձայնությամբ տուգանք նշանակելու վարույթի արդյունքով մեղադրական դատավճիռ կայացնելու համար էական նշանակություն ունեցող փաստական հանգամանքները.
- ՀՀ ոստիկանության ինֆորմացիոն կենտրոնի ձև 8 տեղեկանքի համաձայն՝ Արփինե Ստեփանյանը նախկինում դատապարտված չի եղել:
- Արփինե Ստեփանյանին վերագրվում է ոչ մեծ ծանրության հանցագործության կատարում:
- Համաձայնությամբ տուգանք նշանակելու վարույթ նախաձեռնելու վերաբերյալ արձանագրության համաձայն՝ «ՀՀ քրեական դատավարության օրենսգրքի 464.6 հոդվածով սահմանված կարգով կազմեցի սույն արձանագրությունն այն մասին, որ մեղադրյալ Արփինե Մյասնիկի Ստեփանյանը հայտնեց, որ չի վիճարում իրեն ներկայացված մեղադրանքի փաստական հիմքը և իրավական գնահատականը, ցանկանում է` դատարանում գործի քննությունն իրականացվի համաձայնությամբ տուգանք նշանակելու վարույթի կարգով, և նման ցանկությունը կամավոր հայտնել է իր պաշտպանի հետ խորհրդակցելուց հետո: Սույն արձանագրությունը կազմելուց առաջ, իրեն ուղղված հարցերին ի պատասխան, մեղադրյալը հայտնեց, որ գիտակցում է իր միջնորդության բնույթն ու հետևանքները, և խնդրում է, որպեսզի իր նկատմամբ տուգանքի ձևով նշանակվելիք պատիժը տարաժամկետվի և թույլատրվի այն վճարել մաս-մաս՝ մեկ տարվա ընթացքում:
Սույն արձանագրությունը կցվում է մեղադրական եզրակացությանը»։
Արձանագրությունը ստորագրված է նաև մեղադրյալ Արփինե Ստեփանյանի և վերջինի պաշտպան Գոհար Կարապետյանի կողմից:

Դատարանի իրավական վերլուծությունները, հետևությունները և որոշումները.
ՀՀ քրեական դատավարության 469.9 հոդվածի համաձայն՝
«1. Համաձայնությամբ տուգանք նշանակելու վարույթի արդյունքով դատարանը գրավոր ընթացակարգով կայացնում է մեղադրական դատավճիռ սույն օրենսգրքի 347-350-րդ հոդվածներով սահմանված կարգով` հաշվի առնելով սույն հոդվածով նախատեսված առանձնահատկությունները:
2. Դատավճիռը կայացվում է համաձայնությամբ տուգանք նշանակելու վարույթ կիրառելու մասին որոշումը կայացնելուց հետո՝ հնարավորին չափ սեղմ ժամկետում, սակայն ոչ ուշ, քան 15 օրվա ընթացքում։
3. Համաձայնությամբ տուգանք նշանակելու վարույթի արդյունքով մեղադրական դատավճիռ կայացնելիս դատարանը նշանակում է պատիժ՝ հաշվի առնելով Հայաuտանի Հանրապետության քրեական օրենսգրքի 77-րդ հոդվածի վերաբերելի դրույթները:
4. Սույն օրենսգրքի 167-րդ հոդվածի 1-ին մասով նախատեսված վարութային ծախսերը մեղադրյալից ենթակա չեն բռնագանձման:
5. Դատավճիռը պետք է պարունակի պարզաբանում այն բողոքարկելու՝ սույն օրենսգրքով նախատեսված սահմանափակումների վերաբերյալ։
6. Դատավճիռը կայացնելուց հետո՝ ոչ ուշ, քան հինգ օրվա ընթացքում, ուղարկվում է դատապարտված մեղադրյալին, նրա պաշտպանին, հանրային մեղադրողին»:
Համաձայնությամբ տուգանք նշանակելու վարույթ կիրառելու պայմաններում Դատարանն ապացուցված է համարում մեղադրյալ Արփինե Ստեփանյանին վերագրվող փաստական հանգամանքները (արարքը), այդ արարքի քրեական հակաիրավականությունը, մեղադրյալի կողմից այդ արարքը կատարելը, մեղադրյալի մեղավորությունը տվյալ արարքը կատարելու մեջ, ինչպես նաև գտնում է, որ մեղադրյալի արարքի նկատմամբ պետք է կիրառվի ՀՀ քրեական օրենսգրքի 457-րդ հոդվածի 1-ին մասը։
Համաձայնությամբ տուգանք նշանակելու վարույթի կիրառման պայմաններում Դատարանը, հաշվի առնելով ՀՀ քրեական օրենսգրքի 77-րդ հոդվածի 6-րդ մասի պահանջը, գտնում է, որ մեղադրյալի նկատմամբ պատիժ պետք է նշանակել տուգանքի ձևով՝ վերջինին մեղսագրվող հոդվածի սանկցիայով նախատեսված տուգանքի նվազագույն չափով:
Հիմք ընդունելով ՀՀ քրեական օրենսգրքի 59-րդ հոդվածի 5-րդ մասը և մեղսագրվող հանցանքն ավարտվելու օրվան նախորդող 12 ամիսների ընթացքում մեղադրյալ Արփինե Ստեփանյանի եկամտի վերաբերյալ գործի նյութերում տվյալների բացակայությունը՝ Դատարանը գտնում է, որ տուգանքի չափը պետք է հաշվարկվի հանցանքը կատարելու պահին` 2023 թվականի դեկտեմբերի 1-ին, նվազագույն աշխատավարձի, այն է՝ 75.000 (յոթանասունհինգ հազար) ՀՀ դրամի չափով (տե՛ս «Նվազագույն ամսական աշխատավարձի մասին» ՀՀ օրենքը)։
Այսպիսով, Դատարանը գտնում է, որ Արփինե Ստեփանյանի նկատմամբ պատիժ պետք է նշանակել տուգանք` նվազագույն աշխատավարձի հնգապատիկի՝ 375.000 (երեք հարյուր յոթանասունհինգ հազար) ՀՀ դրամի չափով (5 x 75.000)։
Հիմք ընդունելով ՀՀ քրեական օրենսգրքի 59-րդ հոդվածի 8-րդ մասը և հաշվի առնելով մեղադրյալ Արփինե Ստեփանյանն ի վիճակի չէ անհապաղ և ամբողջությամբ վճարելու 375.000 (երեք հարյուր յոթանասունհինգ հազար) ՀՀ դրամի չափով նշանակված տուգանքը (խնդրել է որպիսի իր նկատմամբ նշանակվող տուգանք պատիժը տարաժամկետվի 1 տարի ժամանակով)՝ Դատարանը գտնում է, որ նրան պետք է թույլատրել նշանակված տուգանքը վճարել մաս առ մաս՝ 1 (մեկ) տարվա ընթացքում՝ յուրաքանչյուր ամիս նվազագույնը 31.250 (երեսունմեկ հազար երկու հարյուր հիսուն) ՀՀ դրամ վճարելու պայմանով:
Անդրադառնալով մեղադրյալ Արփինե Ստեփանյանի նկատմամբ ընտրված խափանման միջոցի հարցին՝ Դատարանը գտնում է, որ վերջինի նկատմամբ որպես խափանման միջոց ընտրված բացակայելու արգելքը պետք է թողնել անփոփոխ՝ մինչև դատավճռի օրինական ուժի մեջ մտնելը:
Դատարանն արձանագրում է, որ ՀՀ քրեական դատավարության օրենսգրքի 348-րդ հոդվածի 1-ին մասի 11-14-րդ հարցերին անդրադառնալու անհրաժեշտությունը սույն քրեական գործով բացակայում է։
Դատարանը գտնում է, որ վարութային ծախսերի հարցը պետք է համարել լուծված, քանի որ համաձայնությամբ տուգանք նշանակելու վարույթ կիրառելու պայմաններում ՀՀ քրեական դատավարության օրենսգրքի 167-րդ հոդվածի 1-ին մաuով նախատեսված վարութային ծախսերը մեղադրյալ Արփինե Ստեփանյանից ենթակա չեն բռնագանձման՝ համաձայն ՀՀ քրեական դատավարության օրենսգրքի 464.9 հոդվածի 4-րդ մասի։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 30-31-րդ, 100-րդ, 347-350-րդ, 364-րդ, 347-րդ, 464.9-464.10 հոդվածներով՝ Դատարանը
Վ Ճ Ռ Ե Ց

Արփինե Մյասնիկի Ստեփանյանին մեղավոր ճանաչել ՀՀ քրեական օրենսգրքի 457-րդ հոդվածի 1-ին մասով և նրա նկատմամբ պատիժ նշանակել տուգանք՝ նվազագույն աշխատավարձի հնգապատիկի՝ 375․000 (երեք հարյուր յոթանասունհինգ հազար) ՀՀ դրամի չափով:
ՀՀ քրեական օրենսգրքի 59-րդ հոդվածի 8-րդ մասի կարգով՝ թույլատրել Արփինե Մյասնիկի Ստեփանյանին սույն դատավճռով նշանակված 375.000 (երեք հարյուր յոթանասունհինգ հազար) ՀՀ դրամ գումարի չափով տուգանքը վճարել մաս առ մաս՝ 1 (մեկ) տարվա ընթացքում՝ յուրաքանչյուր ամիս նվազագույնը 31.250 (երեսունմեկ հազար երկու հարյուր հիսուն) ՀՀ դրամ վճարելու պայմանով:
Արփինե Մյասնիկի Ստեփանյանի նկատմամբ ընտրված խափանման միջոցը՝ բացակայելու արգելքը, թողնել անփոփոխ՝ մինչև դատավճռի օրինական ուժի մեջ մտնելը:
Դատավճիռը, բացառությամբ ՀՀ քրեական դատավարության օրենսգրքի 373-րդ հոդվածով, 375-րդ հոդվածի 1-3-րդ մասերով և 377-րդ հոդվածով նախատեսված հիմքերով, կարող է բողոքարկվել ՀՀ վերաքննիչ քրեական դատարան՝ այն ստանալու օրվանից հետո՝ մեկամսյա ժամկետում:


ԴԱՏԱՎՈՐ Ա.ԱՍԱՏՐՅԱՆ

Դատավճիռը մտել է օրինական ուժի մեջ:

ԴԱՏԱՎՈՐ Ա.ԱՍԱՏՐՅԱՆ